1-2. Otja kEpsalme 34:8, matu yenene vi okumuna ouwa wa Jehova?

NGATU tje wa pewa ovikurya ove mbi u hi ya rora okurya. Ove mo yenene okutjiwa otjiṋa ohunga navyo tji mo tara komuano mu mavi munika, omuṋuko wavyo, na indu tji wa paha okutjiwa kutja ovikeṋa mbya ungurisiwa okuvirongerisa poo indu tji wa pura ku varwe. Nungwari, kutja u tjiwe kutja ovikurya mbyo mo vi vanga ove mo sokuvirora omuini.

² Eṱe matu yenene okurihonga ohunga nouwa wa Jehova mokulesa Ombeibela nomambo nga zikamena ku yo. Nu wina matu yenene okupuratena komahungi ohunga nozondaya varwe nḓu va muna okuza ku Jehova. Posi yokutja, eṱe matu yenene okurimunina ouwa wa Jehova indu tji twa ‘roro’ ouwa we oveni. (Lesa Epsalme 34:8.) Ngatu tare kotjihorera tjomuano mu matu yenene okutjita nao. Ngatu tje matu vanga okukarera Jehova oruveze aruhe, nungwari kokutja tu yenenise ondando ndjo matu hepa okukara nehupo ndi hi noviṋa ovingi. Eṱe mape ya povikando ovingi twa lesa omakwizikiro wa Jesus wokutja indu tji twa twa po Ouhona wa Mukuru poruveze orutenga Jehova me tu pe oviṋa mbi matu hepa, posi yokutja eṱe katu ya rora okumuna omakwizikiro ngo mehupo retu. (Mat. 6:33) Nungwari, mena rongamburiro yetu momakwizikiro wa Jesus tu kondja kutja atu ha kara nehupo roviṋa ovingi, nu tu paha oviungura mbi ha kambura oruveze rwetu oruingi kutja tu yenene okuungura ovingi motjiungura tjokuzuvarisa. Indu tji twa tjiti nao, eṱe matu yenene okurimunina oveni kutja Jehova u rikendera kovihepwa vyetu. Eṱe tu ‘rirorera’ oveni ouwa wa Jehova.

3. Otja kEpsalme 16:1, 2, oouṋe mbe muna ouwa wa Jehova?

³ Jehova “omuwa kovandu avehe,” nandarire imba mbe hi nakumutjiwa. (Eps. 145:9; Mat. 5:45) Nungwari, eye u yandja ovingi ku imba mbe mu suvera nu mbe kondja okumukarera aruhe. (Lesa Epsalme 16:1, 2.) Ngatu tare komiano tjiva Jehova me tu raisira ouwa.

4. Jehova u raisa vi ouwa ku imba mba utu okutumbuka ku ye?

 ⁴ Indu tji matu raisa onḓuviro koviṋa Jehova mbi me tu hongo, tu muna mo ouwa. Otjotjihorera, indu tji twe rihonga ovingi ohunga na ye nokuuta okumusuvera, Eye we tu vatera okuisa omeripura nozongaro ozombi nḓaaze tjiti kutja e he tu yakura. (Kol. 1:21) Indu tji twe riyandja oveni ku Jehova nokupapitisiwa, eye we tu pa oviṋa ovingi oviwa tjimuna omeritjiviro omawa womomutima noupanga ouwa kuna ye.—1 Petr. 3:21.

5. Omomuano uṋe mu matu yenene okumuna ouwa wa Jehova motjiungura tjetu tjokuzuvarisa?

⁵ Eṱe tu kayenda komurungu okumuna ouwa wa Jehova otja tji matu zuvarisa. Hapo oove omundu wohoṋi? Ovakarere va Jehova ovengi ve ri nao. Mape ya ngunda au hi ya rira omukarere wa Jehova kona pu we ripura okukakongora ondjuwo yomundu ngu hi nakutjiwa nokuhungira kuna ye ohunga nOmbeibela. Posi yokutja, ndino otjiṋa tji u tjita aruhe. Nu Jehova wina we ku vatera okuyorokera otjiungura tjokuzuvarisa. Nove wa yenena okumuna ombatero ya Jehova momiano vyarwe wina. Eye we ku vatera kutja u porimane indu tji wa hakaene nomupirukire. Eye wina we ku vatera okuzemburuka etjangwa esemba okuhaṋasana ku nomundu ngu me ku puratene nombango. Neye we ku pomasa wokukayenda komurungu okuzuvarisa nandarire indu ovandu tjaave ha vanga okukupuratena.—Jer. 20:7-9.

6. Omahongero Jehova nge yandja ye raisa vi ouwa we?

⁶ Jehova wina u tu raisira ouwa mokutuhonga omiano vyokuzuvarisa. (Joh. 6:45) Pozombongarero zomokati kotjivike tu puratena kovihorera vyokuzuvarisa, nu tu tunduuzwa okuungurisa ovihorera mbyo tji matu zuvarisa. Poutenga, eṱe mape ya atu tira okuungurisa omiano omipe vyokuzuvarisa mbi, posi yokutja indu tji twa tjiti nao mape ya atu munu kutja omiano omipe mbi mavi ungura nawa momaturiro mu tu zuvarisa. Eṱe wina tu tunduuzwa pozombongarero na pomaworonganeno wotukondwa okukondja okuungurisa omiano pekepeke vyokuzuvarisa mbi tu hi ya rora okuungurisa. Imbi wina mape ya avi tjiti kutja tu tire, posi yokutja tji twa kondjo okutjita nao Jehova u tu sera ondaya. Matu katara kozondaya Jehova nḓu me tu pe indu tji twa kondjo okuungurisa omiano omipe mbi mavi tu vatere okuungurira Jehova otja pu matu yenene nandarire kehi yozongaro mu tu ri. Okuzambo matu katara komiano mu matu yenene okuyenenisa ozondando zetu.

7. Ozondaya zeṋe nḓu matu munu indu tji matu kondjo okuungura oukukutu motjiungura tjokuzuvarisa?

⁷ Eṱe tu tumbuka popezu na Jehova. Tara kotjihorera tjomunene wombongo wena Samuel, * ngu karera pu nomukazendu we moColombia. Ovakupasane mba va ri nondjoroka okurira ovakandjira mombongo yawo, posi yokutja owo aave vanga okuungura ovingi motjiungura tjokuzuvarisa mokuvatera ombongo ndji nouhepe. Okuyenenisa ondando ndjo, owo aave sokuisa okutjita oviṋa tjiva mbi va suvera. Samuel wa tja: “Eṱe twe ripurira ku Mateus 6:33 natu isa okuranda oviṋa mbi he ri ohepero. Posi yokutja, otjiṋa otjizeu ya ri okuza po pomaturiro wetu. Oyo ya tungirwe momuano mbwaatu vanga nu kaya ri nozondjo.” Owo tji va tjindira kombongo ombe, kaave hepa ovimariva ovingi tji mave sasaneke na imbi mbyaave ungurisa komurungu wanao. Samuel wina wa tja: “Eṱe twa muna omiano Jehova me hongorera omikambo vyetu nokuzuvira ozongumbiro zetu. Eṱe tu muna kutja Jehova u nonyuṋe mu eṱe nu tu muna orusuvero rwe momuano mu tu hi na indu twe ru mwine.” Hapo mo yenene okupaha omiano vyokuungura ovingi motjiungura tjokuzuvarisa? Indu tji peri  nao, ove mo yenene okukara nongamburiro kutja mo tumbuka popezu na Jehova, neye me ku pe avihe mbi mo hepa.—Eps. 18:25.

8. Matu rihongo ye okuza komambo nga hungirwa i Ivan na Viktoria?

⁸ Eṱe tu muna ondjoroka mokukarera Jehova. Tara komambo nga hungirwa i Ivan na Viktoria, ovakupasane mbe karera otjovakandjira moKyrgyzstan. Owo ve hupa ehupo ndi hi noviṋa ovingi kokutja ve yenene okuriyandjera motjiungura ngamwa atjihe nandarire tjokutunga. Ivan wa tja: “Eṱe aatu ungura oukukutu motjiungura ngamwa atjihe. Nandarire kutja komaandero weyuva aatu urwa, eṱe twa ri nohange mena rokutja aatu tjiwa kutja twa ungurisa omasa wetu motjiungura tja Jehova. Eṱe wina twa ri nondjoroka mena rokutja twa hakaena nomapanga omengi nu twe rihonga oviṋa ovingi.”—Mar. 10:29, 30.

9. Ovikwaye omukazendu omukambure ngwa ri mongaro onḓeu mbya tjita kutja ma ungure ovingi motjiungura tjokuzuvarisa, nu kwa kongorera ye?

⁹ Eṱe tu muna ondjoroka motjiungura tja Jehova nandarire kehi yozongaro ozonḓeu. Otjotjihorera, Mirreh, omukazendu omuhepundu omunene motjiwondo ngwa tura moWest Africa, wa isa oviungura vye otjonganga na utu otjiungura tjoukandjira. Mirreh u nomutjise woramatika mbu tjita kutja i rire ouzeu ku ye okukawondja, nu u yenena okuungura oure woiri imwe uriri okuza kondjuwo nondjuwo motjiungura tjokuzuvarisa. Posi yokutja, eye u yenena okukara ozoiri ozengi motjiungura tjokuzuvarisa momivanda vyotjihuro. Nu u novahongwa vOmbeibela novandu ovengi mbe yenena okukavarura rukwao, nu tjiva ve hakaenena mongoze. Ovikwaye mbya tjita kutja Mirreh ma kare nonḓero yokuungurira Jehova? Eye wa tja: “Ami mba suvera Jehova na Jesus Kristus nomutima wandje auhe, nu aruhe mbi kumba kutja Jehova me ndji vatere okutjita imbi mbi me yenene motjiungura tje.”—Mat. 22:36, 37.

10. Otja ku 1 Petrus 5:10, ombatero iṋe imba mbe kondja okuungura ovingi motjiungura tja Jehova ndji ve muna okuza ku ye?

¹⁰ Eṱe tu muna omahongero okuza ku Jehova. Omukandjira wena Kenny ngu karera moMauritius, wa muna ouatjiri womambo ngo. Indu tja tjiwa ouatjiri, eye wa isa omahongero wokombanda, a papitisiwa nu a rire omuzuvarise woruveze aruhe. Eye wa tja: “Ami ee kondjo okuhupa otja komambo womuprofete Jesaja, ngwa tja: ‘Owami ngwi, ndji hinda!’” (Jes. 6:8) Kenny wa ungura oukukutu moviungura vyokutunga neye wina wa vatera okutoroka omambo nga zikamena kOmbeibela meraka re. Kenny wa tja: “Ami mba muna omahongero nge ndji pa ondjiviro ndjee hepa kutja mbi yenenise otjiungura tjandje.” Posi yokutja, eye we rihonga ovingi pendje nokuungura oviungura mbyo uriri. Eye wina wa tja: “Ami mba yenena okutjiwa oungundipare wandje nu wina mba muna kutja pe novikaṋena tjiva mbyee hepa kutja mbi tjate ku Jehova.” (Lesa 1 Petrus 5:10.) Hapo ove mape ya o yenene okutjita omarundurukiro mehupo roye kutja u yenene okukara noruveze okuungura ovingi motjiungura tja Jehova nokuhongwa i ye?

11. Ozongondjero zeṋe ovakazendu ovakambure moSouth Korea nḓu va tjita kokutja ve ungure ovingi motjiungura tjokuzuvarisa, nu kwa kongorera tjike? (Tara kotjiperendero tjokombanda yokambo nga.)

¹¹ Nandarire Ovahongonone mba karera Jehova oruveze orure ve hepa omahongero kutja ve tjiwe omiano omipe vyokuzuvarisa, nu owo ve muna ouwa momahongero ngo. Moruveze rwomutjise wo-COVID-19, ovanene vombongo ya South Korea va tja: “Ovandu tjiva mbaave nangarasi kamaave yenene okukara norupa motjiungura tjokuzuvarisa mena rokutja kavandu ovaveruke, nai ve tjita nao okupitira moviungurisiwa vyomahakaeneno wouye wakandino. Ovakazendu ovakambure vetatu votjiwondo tjokombanda yozombura 80 ve rihonga  okuungurisa okombiuta nu nai ve kara norupa motjiungura tjokuzuvarisa ape eyuva arihe.” (Eps. 92:14, 15) Ove mo yenene okurora ouwa wa Jehova indu tji wa kondjo okuungura ovingi motjiungura tjokuzuvarisa. Tara koviṋa tjiva mbi mo yenene okutjita okuyenenisa ondando ndjo.

12. Jehova wa kwizika tjike ku imba mbe riyameka ku ye?

¹² Rihonga okuriyameka ku Jehova. Eye wa kwizika kutja me tu sere ondaya indu tji matu riyameke ku ye natu mu ungurire nomutima auhe. (Mal. 3:10) Omukazendu omukambure moColombia wena Fabiola wa muna omayenenisiro womakwizikiro wa Jehova ngo. Eye aa vanga okurira omukandjira omukarerere kombunda yokupapitisiwa. Nungwari, eye aa sokuvatera okutumba omurumendu we novanatje vawo vetatu. Indu tja isa oviungura eye wa kumba ku Jehova nomutima we auhe kutja me mu vatere. Eye wa tja: “Potuingi pe kambura orure okumuna otjimariva tji tji sutwa kovandu tji va isa oviungura, posi yokutja ihi otjandje tja kambura omueze umwe uriri kombunda ya indu tji mba tjita omaningiriro. Iho tjiri tja ri otjihimise.” Omieze vivari kombunda yanao wa rira omukandjira. Eye nai u notjiwondo tjozombura 70 nu wa karera otjomukandjira oure wozombura zokombanda 20. Oure woruveze ndwo, eye wa vatera ovandu hambondatu okupapitisiwa. Eye wa tja: “Nandarire kutja mbi rimuna oungundipare oruveze rumwe, Jehova u ndji vatera eyuva arihe kutja mbi kayende komurungu notjiungura tjandje tjoukandjira.”

13-14. Ovihorera viṋe mbi mavi yenene okutuvatera okuriyameka ku Jehova nokuungura ovingi motjiungura tje?

 ¹³ Rihongera kovihorera vya imba mbaave riyameke ku Jehova. Ombeibela i novihorera ovingi vya imba mbaave ungura oukukutu motjiungura tja Jehova. Povikando ovingi Jehova aa sere ovakarere ve mbo ondaya, posi yokutja owo aave sokutjita otjiṋa okuraisa kutja ve nongamburiro mu ye. Otjotjihorera, Abraham wa serwa ondaya i Jehova kombunda ya indu tja tjinda “mehi re e hi nokutjiwa kutja ma i pi.” (Hebr. 11:8) Jakob wa serwa ondaya kombunda yokukondja nomuengeli. (Gen. 32:24-30) Ovapristeri aave sokutenga po okutwa mo ozombaze zawo momeva yOnḓonḓu Jordan, kutja otjiwaṋa tja Israel tji konde indu tji tja ri pokuhita mEhi Ekwizikwa.—Jos. 3:14-16.

¹⁴ Ove wina mo yenene okurihongera kovihorera vyovakarere va Jehova voruveze rwetu mbe kondja okuriyameka ku ye nokuungura ovingi motjiungura tje. Otjotjihorera, omurumendu omukambure wena Payton nomukazendu we Diana, va ri nondjoroka okulesa ohunga novakambure mbaave kondjo okuungura ovingi motjiungura tja Jehova tjimuna imba mba tamunwa mongongorasaneno ndji “Owo ve riyandjera oveni.” * Payton wa tja: “Indu tjaatu lese omahungi ngo, eṱe aatu rimunu tjimuna matu tarere omundu ngu ma ri ovikurya oviwa ovitjate. Otja tjaatu tarere eṱe aatu vanga ‘okurirorera oveni ouwa wa Jehova.’” Korusenina, Payton na Diana va tjindira koruveze ku ku nouhepe wovazuvarise. Hapo ove wa rora okulesa ongongorasaneno ndjo nokutarera ouvidio mbwi Okuzuvarisa motukondwa twokokure—Australia na inga Okuzuvarisa motukondwa twokokure—Ireland ku ke ri mOtjiingirisa, mbwa pitisiwa ko-jw.org? Oviṋa mbi mavi yenene okukuvatera okutjiwa mbi mo yenene okutjita kutja u ungure ovingi motjiungura tja Jehova.

15. Okukara puna imba mba suvera okuungura ovingi motjiungura tja Jehova maku tu vatere vi?

¹⁵ Toorora omapanga omawa. I rira oupupu ku eṱe okurya ovikurya mbi tu hi ya rora okurya indu tji tu ri puna imba mbe vi suvera. Momuano otjingewo, indu tji twa kara puna imba mbe twa po ombango ya Jehova poruveze orutenga mehupo rawo, eṱe matu kara nonḓero yokutjita nao wina. Iho otji tja tjitwa ku Kent nomukazendu we Veronica. Kent wa tja: “Omapanga neṱunḓu retu ve tu tunduuza okupaha omiano omipe mu matu yenene okukarera Jehova. Eṱe twa muna kutja okukara puna imba mbe twa po Ouhona wa Mukuru outenga mehupo rawo, kwe tu vatera kutja tu pahe omiano omipe vyokukarera Jehova.” Kent na Veronica nai ve karera otjovakandjira vapeke moSerbia.

16. Otja komasanekero wa Jesus nge ri mu Lukas 12:16-21, ongwaye tji twa sokukara nonḓero yokutjita omarundurukiro mehupo retu?

¹⁶ Tjita omarundurukiro kutja u karere Jehova. Eṱe katu hepa okuisa oviṋa avihe mehupo mbi tu yorokisa kutja tu karere Jehova. (Omuzuv. 5:19, 20) Posi yokutja, indu tji twa toorora okuhina okuungura ovingi motjiungura tja Jehova mena rokutja katu nakuvanga okuisa oviṋa tjiva mbi twa suvera, mape ya atu tjiti ondataiziro otjingeyo ndji ndja tjitwa i yomurumendu momasanekero wa Jesus ngwe ripahera ehupo ewa nungwari a zembi Mukuru. (Lesa Lukas 12:16-21.) Omurumendu omukambure wena Christian, ngwa tura moFrance, wa tja: “Ami hi mba ri noruveze ku Jehova na keṱunḓu randje.” Eye nomukazendu we va tya okurira ovakandjira. Nungwari kutja ve yenenise ondando ndjo, owo aave sokuisa oviungura vyawo. Owo va uta okangetjefa okaṱiṱi kokukohorora kutja ve rihupise oveni, nu ve rihonga okukara noviṋa oviṱiṱi mehupo. Hapo owo va ri nohange okutjita omarundurukiro ngo? Christian  wa tja: “Eṱe nai tu nondjoroka onyingi motjiungura tjokuzuvarisa nu tu kara nohange tji matu munu ovandu amave rihongo ohunga na Jehova.”

17. Ongwaye tji mape ya a rire ouzeu okuungurisa omuano omupe wokuzuvarisa?

¹⁷ Kara nonḓero yokuungurisa omiano omipe vyokuzuvarisa. (Oviung. 17:16, 17; 20:20, 21) Omukazendu omukandjira wena Shirley ngwa tura moAmerica, aa sokurundurura omuano we wokuzuvarisa moruveze rwomutjise wo-COVID-19. Eye rutenga aa tira okuzuvarisa okupitira mongoze, posi yokutja kombunda yokumuna omahongero okuza komutarere worukondwa eye wa uta okuungurisa omuano wokuzuvarisa mbo aruhe. Eye wa tja: “Pomautiro ee tira, posi yokutja nambano mbi muna ondjoroka okuzuvarisa momuano mbwo. Nu nai eṱe tu hakaena novandu ovengi okukapita imba mbaatu hakaene indu tjaatu zuvarisa okuza kondjuwo nondjuwo.”

18. Otjikeṋa tji matji tu vatere okutuurunga omauzeu indu tji matu kondjo okuungura ovingi motjiungura tjokuzuvarisa?

¹⁸ Kara nondando nu u kondje okuiyenenisa. Indu tji matu munu ouzeu, eṱe tu ningira ombatero ku Jehova mongumbiro na tu kondjo okuripura nawa kutja matu tjiti vi ohunga nouzeu mbwo. (Omiano 3:21) Omukazendu wena Sonia, ngu karera otjomukandjira omukarerere mokambumba keraka rOtjiromania moEurope, wa tja: “Ami mba suvera okutjanga ozondando zandje pombapira nokutwa poṋa pu me yenene okuzemuna oupupu. Kombanda yotjitiha tjandje ami mbi notjiperendero tjozondjira mbari nḓa tara momihunga pekepeke. Indu tji mbi nondando okutjita, mbi tara pomahakaeneno wozondjira nḓo nu e ripura kutja ondando yandje mai ndji twara momuhunga uṋe.” Sonia u kondja okukara noumune ouwa ohunga nomauzeu we. Eye u tja: “Ami mba tya kutja hi nakuyandjera ouzeu mbu me munu okundjitjaera okuyenenisa ozondando zandje tjimuna omira tji i tjaera omundu, nungwari moruveze rwanao me u vara otja ondopa ndji mai yenene okundjivatera okutuurunga komunda imbwo warwe.”

19. Eṱe matu sokurimanena okutjita tjike?

¹⁹ Jehova u tu sera ondaya momiano omingi. Eṱe matu yenene okuraisa ondangi kozondaya nḓo mokutjita avihe pu matu yenene okuyeta ohiviro ku ye. (Hebr. 13:15) Eṱe matu yenene okuungura ovingi momiano pekepeke okukarera Jehova neye me tu sere ondaya momiano omingi. Ngatu pahe omiano mu matu yenene ‘okurora nokumuna’ ouwa wa Jehova eyuva arihe. Okuzambo otji matu sana ku Jesus, ngwa tja: “Otjikurya tjandje okwo ngwi okutjita ombango ya ingwi ngwe Ndji hinda, nokumana otjiungura tje.”—Joh. 4:34.