1-2. Nitihka Masmur 34:8, baka ni kitai ulih belajar pasal pemadas Jehovah?

GAMBARKA lebuh orang ngasuh nuan nguji sekeda pemakai ke enda kala diempa nuan. Nuan ulih belajar pasal pemakai nya lebuh nuan meda iya, nyium bau iya, belajarka chara manduk, tauka nanya penemu orang pasal pemakai nya. Taja pia, nuan semina ulih nemu sekalika nuan rindu pemakai nya enti nuan empu ke nyepi pemakai nya.

² Kitai ulih belajar pasal pemadas Jehovah lebuh kitai macha Bup Kudus enggau litaricha sereta ninga ari peneleba orang bukai pasal baka ni Jehovah udah merekatka sida. Tang kitai semina ulih nemu pemadas Jehovah enti kitai “ngasaika” pemadas Iya kediri empu. (Bacha Masmur 34:8.) Ambika chunto, engka kitai deka gawa penuh jam ke Jehovah. Tang kena nyapai juluk ati nya, kitai patut ngelengkaka sekeda utai ba pengidup kitai. Kitai engka udah suah macha semaya Jesus ke madah, enti kitai ngenuluka Perintah Petara, Jehovah deka meri utai ke diguna kitai. Taja pia, kitai empu engka bedau kala ngasaika semaya nya dikeamatka. (Mat. 6:33) Tang ketegal kitai arapka semaya Jesus, kitai bejimat lebuh ngena duit, ngaga ubah ba jadual kereja lalu enggau naka ulih ngereja pengawa nginjil. Lebuh kitai ngereja nya, kitai ulih “ngasaika” pemadas Jehovah, laban Iya endang meri utai ke diguna kitai.

3. Nitihka Masmur 16:1, 2, Jehovah meri utai ti manah ngagai sapa?

³ Jehovah “manah enggau semua orang,” nyengkaum sida ke enda ngelala Iya. (Mas. 145:9; Mat. 5:45) Tang Jehovah  ngereja mayuh utai ti manah kelebih agi ngagai sida ke rinduka Iya lalu bebendar gawa ke Iya. (Bacha Masmur 16:1, 2.) Peratika sekeda utai manah ke udah digaga Jehovah ke kitai.

4. Baka ni Jehovah ngayanka pemadas ngagai orang ke berengkah deka semak enggau Iya?

⁴ Tiap kali kitai nitihka utai ke dipelajar kitai pasal Jehovah, kitai meda baka ni ajar nya nulung kitai ba pengidup. Ambika chunto, lebuh kitai belajar mayuh agi pasal Jehovah lalu belabuh rinduka Iya, Jehovah nulung kitai badu ngereja sereta berundingka utai ti enda ngelantangka ati Iya. (Kol. 1:21) Lalu lebuh kitai nyerahka diri ngagai Iya sereta dibaptisa, Jehovah meri kitai mayuh agi utai ti manah, baka ati ti beresi sereta peluang bisi kaul ti rapat enggau Iya.—1 Pet. 3:21.

5. Baka ni kitai ngasaika pemadas Jehovah ba pengawa nginjil?

⁵ Kitai mega ngasaika pemadas Jehovah lebuh ngereja pengawa nginjil. Kati nuan orang ke pemalu? Mayuh ari nembiak Jehovah mega orang ti pemalu. Engka sebedau nuan nyadi Saksi-Saksi Jehovah, nuan engka enda nyangka diri ulih bejaku enggau orang ke enda dikelala lalu berandau pasal Bup Kudus. Tang diatu, nuan suah ngereja nya. Jehovah indah nulung nuan gaga ati lebuh ngereja pengawa nginjil! Nuan mega engka ngasaika sukung ari Jehovah nengah mayuh chara. Iya udah nulung nuan enda takut lebuh disakal. Iya mega nulung nuan ngingatka ayat Bup Kudus lebuh berandau enggau orang ke bisi minat. Lalu Iya mega meri nuan pengering ngambika ulih terus nginjil taja pan orang enggai ningaka pesan ke dibai nuan.—Jer. 20:7-9.

6. Baka ni latih ke diberi Jehovah nunjukka pemadas Iya?

⁶ Jehovah mega udah ngayanka pemadas Iya enggau ngelatih kitai ba pengawa nginjil. (Jhn. 6:45) Ba gempuru tengan minggu, kitai belajar chara berandau ke ulih dikena kitai nginjil ngagai orang, lalu kitai ulih ngena chara tu ba pengawa nginjil. Keterubah iya, kitai engka berasai takut deka nguji chara baru. Tang lebuh kitai ngereja nya, kitai engka ngasaika chara baru tu ngena ba kandang alai endur kitai nginjil. Ba gempuru sereta konvensyen, kitai diperansang ngena chara baru lebuh nginjil. Kitai engka enda kala nguji chara nya sebedau tu. Tu tau ngasuh kitai berasai takut. Tang lebuh kitai nguji chara baru, Jehovah tentu deka merekatka kitai. Diatu aram kitai berandauka sekeda berekat ke diulih kitai lebuh kitai ngiga chara baru deka gawa bebendar ke Jehovah, enda ngira nama gaya kitai. Udah nya, kitai deka berandauka baka ni kitai ulih nyapai juluk ati kitai.

7. Nama berekat ke diulih enti kitai enggau naka ulih ngereja mayuh agi ba pengawa nginjil?

⁷ Kitai ulih majak semak enggau Jehovah. Peratika chunto seiku tuai gempuru ke benama Samuel. * Iya enggau bini iya nginjil ba Colombia. Seduai iya gaga ati ngerintis ba eklisia asal, tang seduai iya bisi juluk ati deka nulung eklisia ke begunaka penginjil. Kena nyapai juluk ati nya, seduai iya patut ngelengkaka sekeda utai ti dikerinduka seduai iya. Ku Samuel, “Kami duai nitihka jaku lalau ba Matthew 6:33 lalu badu meli utai ke enda diguna kami. Tang utai ti pemadu tusah nya deka ninggalka rumah kami. Rumah nya digaga nitihka pelan dikinginka kami. Lalu kami enda agi berutang mayar rumah nya.” Lebuh mindah ngagai eklisia baru, Samuel  enggau bini iya sedar, seduai iya enda begunaka mayuh duit kena beridup. Ku Samuel nampung baru, “Kami udah meda baka ni Jehovah ngiring kami lalu nyaut sampi kami. Kami ngasaika Iya gaga ati enggau kami. Lalu kami mega ngasaika pengerindu Iya ba chara ke enda kala diasaika kami ngelama tu.” Kati nuan ulih ngereja mayuh agi ba pengawa nginjil? Enti ulih, andal meh nuan ulih majak semak ngagai Jehovah lalu Iya deka nyaga nuan.—Mas. 18:25.

8. Nama ulih dipelajarka nuan ari utai ke disebut Ivan enggau Viktoria?

⁸ Kitai deka tetemuka pengaga ati ba pengawa kitai. Peratika utai ke disebut Ivan enggau Viktoria, sepasang laki bini ke ngerintis di Kyrgyzstan. Seduai iya idup enggau pengumbas iya ngambika ulih ngereja sebarang pengawa ke diberi, nyengkaum ba projek nirika bengunan. Ku Ivan madah: “Kami duai gawa bebendar ba tiap iti projek. Taja pan kami duai berasai lelak pengudah gawa, tang kami berasai gaga ati, laban kami nemu udah ngena pengering kami gawa bebendar ke Jehovah. Kami mega gaga ati laban bisi mayuh kaban ti baru lalu bisi pengingat ti manah enggau sida.”—Mrk. 10:29, 30.

9. Nama digaga seiku menyadi ke bisi penanggul ngambika ulih ngereja mayuh agi ba pengawa nginjil, lalu nama asil iya?

⁹ Kitai ulih tetemuka pengaga ati ba pengawa ke Jehovah taja pan napi sekeda penanggul. Mirreh, seiku balu ti tuai ari Afrika Barat, kala gawa nyadi lutur. Lebuh iya pinchin iya berengkah ngerintis. Tang iya bisi penyakit ti amat pedis ke ngasuh iya tusah deka bejalai. Nya alai, iya semina ulih nginjil ari rumah ke rumah pengelama sejam. Tang iya ulih nginjil mayuh agi ngena troli litaricha. Iya mega bisi mayuh datai ngabas sereta pemelajar Bup Kudus, lalu sekeda ari nya digaga ngena talipun. Nama meransang Mirreh deka gawa mayuh agi ke Jehovah? Ku iya, “Aku amat rinduka Jehovah enggau Jesus Kristus. Lalu aku seruran besampi ngambika Jehovah nulung aku ngereja mayuh agi ba pengawa Iya.”—Mat. 22:36, 37.

10. Nitihka John 6:45, nama utai ke diterima sida ke gawa mayuh agi ke Jehovah?

¹⁰ Kitai deka nerima mayuh agi latih ari Jehovah. Tu meh ke diasai Kenny, seiku pengerintis ba Mauritius. Lebuh iya belajarka pemendar, iya badu belajar ba universiti, dibaptisa, lalu gawa penuh jam ke Jehovah. Ku iya madah, “Aku nguji nunda nabi Isaiah, ke madah: ‘Aku deka! Asuh aku!’” (Isa. 6:8, Bup Kudus Berita Manah Ka Rebak Diatu) Kenny kala nulung ba sekeda projek nirika bengunan. Pia mega, iya bisi nulung ba pengawa nyalin litaricha Bup Kudus ngagai bansa jaku diri empu. Ku Kenny madah, “Aku nerima latih ke nulung aku ngereja pengawa aku.” Tang iya ukai semina belajar chara ngereja pengawa nya. Ku iya nampung baru, “Aku mega belajar pasal tatak diri empu sereta kualiti ke patut dikemansangka ngambika ulih gawa mayuh agi ke Jehovah sereta bala menyadi.” (Bacha John 6:45.) Kati nuan ulih ngaga ubah? Enggau nya, nuan meri peluang ngagai Jehovah ngambika Iya ulih ngelatih nuan.

11. Nama digaga menyadi indu ba Korea Selatan ngambika ulih enggau pengawa nginjil, lalu nama asil iya? (Peda gambar ba mua majalah.)

¹¹ Indah Saksi-Saksi Jehovah ke bepeneleba mega bulih penguntung lebuh sida nerima latih ngereja pengawa nginjil ti baru. Maya penyakit COVID-19, tuai gempuru ba siti eklisia di Korea Selatan nulis: “Bisi sekeda menyadi ke ngumbai diri enda ulih enggau  pengawa nginjil ketegal sida enda bepengerai. Tang diatu sida ulih ngereja nya nengah konferen video. Bisi tiga iku menyadi indu ke beumur lebih ari 80 taun berengkah belajar chara ngena komputer, lalu diatu sida nyauka ninting hari enggau pengawa nginjil.” (Mas. 92:14, 15) Kati nuan deka ngereja mayuh agi ba pengawa nginjil lalu ngasaika pemadas Jehovah? Peratika sekeda chara ke ulih dikereja nuan ngambika ulih nyapai juluk ati tu.

12. Nama semaya Jehovah ngagai sida ke bepanggai ba Iya?

¹² Belajar meh bepanggai ba Jehovah. Iya udah besemaya deka merekatka kitai lebuh kitai arapka Iya lalu ngereja utai enggau naka ulih ke Iya. (Mal. 3:10) Tu meh ke diasai seiku menyadi indu ba Colombia ke benama Fabiola. Iya meda chara Jehovah ngamatka semaya Iya. Fabiola deka terus nyadi pengerintis biasa pengudah iya dibaptisa. Tang iya patut kereja ngambika ulih ngintu laki enggau tiga iku anak iya. Nya alai, lebuh iya ulih pinchin, iya bebendar besampi minta tulung ngagai Jehovah. Ku iya madah: “Ke suah agi orang patut nganti lama sebedau sida nerima duit pinchin. Tang aku nerima duit pinchin pengudah sebulan aku minta. Tu amat tulung ari Jehovah!” Dua bulan pengudah nya, iya nyadi pengerintis biasa. Diatu iya udah beumur lebih ari 70 taun lalu udah ngerintis lebih ari 20 taun. Pengelama timpuh nya, iya udah nulung lapan iku orang dibaptisa. Ku iya: “Taja pan kekadang aku berasai lemi,  tang Jehovah udah nulung aku ninting hari ngambika aku ulih terus ngerintis.”

13-14. Nama teladan ke ulih nulung kitai arapka Jehovah lalu nyapai juluk ati kitai?

¹³ Belajar ari teladan sida ke bepanggai ba Jehovah. Kitai ulih macha pasal teladan sida ke bebendar gawa ke Jehovah ba Bup Kudus. Tang, sida patut ngereja sekeda utai kena ngayanka diri arapka Jehovah sebedau Jehovah merekatka sida. Ambika chunto, Jehovah semina merekatka Abraham pengudah Abraham ninggalka rumah iya, “taja pen iya enda nemu tunga pejalai diri.” (Heb. 11:8) Lalu Jehovah merekatka Jakop pengudah Jakop bibat enggau seiku melikat. (P-kal. 32:24-30) Peratika mega utai ke nyadi sebedau bansa Israel ulih tama ngagai Menua ti Udah Disemaya. Sida semina ulih meraka ke seberai pengudah bala imam ngindik ai Sungai Jordan ti rarat.—Jos. 3:14-16.

¹⁴ Nuan mega tau belajar ari teladan nembiak Jehovah kemayaharitu ke udah bepanggai ba Iya sereta nyapai juluk ati sida. Ambika chunto, menyadi Payton enggau bini iya, Diana, rindu macha pasal peneleba bala menyadi Kristian ke nyapai juluk ati sida gawa ke Jehovah. * Payton madah: “Lebuh kami macha peneleba sida, tu baka ke kami benung meda orang makai pemakai ti nyamai. Majak kami meda sida, majak agi kami deka ‘ngasaika pemadas Jehovah.’” Nyau kelama, Payton enggau Diana pindah ngagai endur ke begunaka penginjil. Kati nuan udah meda video Menginjil di Daerah Terpencil—Australia enggau Menginjil di Daerah Terpencil—Ireland ke bisi ba jw.org? * Video tu deka nulung nuan ngiga chara nuan ulih gawa mayuh agi ke Jehovah.

15. Nama penguntung iya enti kitai begulai enggau sida ke ngenuluka Jehovah?

¹⁵ Begulai enggau bakih ke ulih meransang. Kitai engka senang agi deka nguji pemakai ti baru enti kitai begulai enggau sida ke rinduka pemakai nya. Baka nya mega, enti kitai begulai enggau menyadi Kristian ke ngenuluka Jehovah ba pengidup sida, kitai mega diperansang ngiga chara ngambika ulih gawa mayuh agi ke Petara. Tu meh utai ke nyadi ngagai sepasang melaki-bini ke benama Kent enggau Veronica. Ku Kent: “Diri sebilik enggau bala bakih meransang kami nguji chara baru gawa ke Jehovah. Kami sedar enti kami begulai enggau menyadi ke ngenuluka Perintah Petara, kami mega deka berani agi nguji pengawa ti baru.” Diatu Kent enggau Veronica gawa nyadi pengerintis spesial di Serbia.

16. Baka ke dipadah ba sempama Jesus di Luke 12:16-21, nama kebuah kitai patut ngelengkaka sekeda utai?

¹⁶ Sanggup ngelengkaka utai ke Jehovah. Ngambika kitai ngelantangka ati Jehovah, kitai enda ibuh ngelengkaka semua utai ti dikerinduka kitai. (P-jar. 5:19, 20) Taja pia, enti kitai milih enggai ngereja mayuh ke Jehovah ketegal kitai enggai ngelengkaka sekeda utai ti dikerinduka kitai, kitai nyau baka seiku lelaki ba sempama Jesus ke bebendar ngulihka mayuh utai ti manah tang enda ibuhka Petara. (Bacha Luke 12:16-21.) Seiku menyadi lelaki ke benama Christian, ke diau di Perancis, madahka, “Aku ngasaika diri enda meri utai ti pemadu manah ngagai Jehovah sereta diri sebilik.” Iya enggau bini iya mutuska deka ngerintis. Tang kena nyapai juluk ati nya, seduai iya patut badu kereja. Kena ngiga belanja, seduai iya berengkah meresi rumah tauka opis orang lalu belajar puas ati enggau  utai ti dikemisi seduai iya, taja pan penatai pemisi seduai iya engka kurang agi ari ngelama tu. Kati seduai iya gaga ati pengudah ngelengkaka sekeda utai ngambika ulih ngerintis? Ku Christian madah, “Diatu kami duai gaga agi ba pengawa nginjil lalu gaga ati meda pemelajar Bup Kudus sereta orang ke diabas kami belajar pasal Jehovah.”

17. Nama kebuah kitai engka tusah deka nguji chara nginjil ti baru?

¹⁷ Uji meh chara nginjil ti baru. (SKR. 17:16, 17; 20:20, 21) Shirley, seiku pengerintis ari Amerika Serikat, patut ngaga ubah ba chara nginjil maya penyakit COVID-19 nyadi. Keterubah iya, iya bisi asai kakang ati deka nginjil ngena talipun. Tang pengudah iya nerima latih ba minggu tuai ti ngabas datai, iya diatu suah agi nginjil ngena talipun. Ku iya madah: “Keterubah iya, aku berasai amat takut, tang diatu aku amat rindu nginjil ngena talipun. Kami ulih nginjil ngagai mayuh agi orang enti dibanding enggau nginjil ari rumah ke rumah!”

18. Baka ni kitai ulih nyapai juluk ati taja pan napi penanggul?

¹⁸ Tetapka juluk ati lalu enggau naka ulih nyapai iya. Lebuh kitai napi penanggul, kitai besampi minta tulung lalu ngena penalam runding kena mutarka penanggul. (J-lam. 3:21) Sonia, seiku pengerintis biasa ba raban bansa jaku Romany di Eropah, madahka: “Aku rindu nulis juluk ati aku ba keretas lalu ngelekatka iya ba endur ke ulih dipeda. Ba atas mija aku, aku bisi gambar ti nunjukka dua iti jalai ke mai ngagai endur ti bebida. Lebuh aku patut ngaga pemutus, aku meda gambar nya lalu berunding sekalika pemutus aku deka nulung aku nyapai juluk ati tauka enda.” Sonia nguji ngembuan runding ti positif pasal penanggul ke ditapi iya. Ku iya madah: “Lebuh aku napi penanggul, aku patut berunding sekalika penanggul nya baka dinding ti nagang aku ari nyapai juluk ati tauka baka jematan ke nulung aku nyapai juluk ati nya.”

19. Baka ni kitai ngayanka diri beterima kasihka pemadas Jehovah?

¹⁹ Jehovah udah merekatka kitai enggau mayuh chara. Baka ni kitai ulih ngayanka diri beterima kasih enggau berekat ke diulih kitai? Enggau naka ulih meh ngereja utai ti mai puji ngagai Jehovah. (Heb. 13:15) Tu nyengkaum ngiga chara baru ngambika ulih gawa mayuh agi ke Iya. Udah nya, Jehovah deka merekatka kitai mayuh agi. Aram meh kitai ngiga chara ‘ngasaika pemadas Jehovah’ ninting hari. Udah nya, kitai deka nyadi baka Jesus ke madah: ‘Pemakai aku nya ngereja peneka Iya ke ngirumka aku, lalu nembuka pengawa Iya.’—Jhn. 4:34.