1-2. Shakawn 34:8 hta tsun da ai hte maren, Yehowa a mai kaja ai lam hte seng nna anhte gara hku sharin la lu na kun?

NANG kalang mung n sha ga ai malu masha hpe sha yu na matu, marai langai ngai tsun ai hpe shingran yu u. Nang gaw dai malu masha hpe yu na, sama marawp yu na, gara hku shadu da ai hpe chye hkra galaw na (sh) dai malu masha hte seng nna kaga ni hpe san ai hku nna, dai malu masha a lam hpe chye hkra galaw na re. Raitim, dai malu masha hpe ra ai, n ra ai hpe chye na matu gaw tinang nan chyim yu ra na re.

² Chyum Laika hte anhte a laili laika ni hpe hti ai, Yehowa kaw na lu la ai shaman chyeju ni a lam hpe kaga ni tsun dan ai hpe madat ai hku nna, Yehowa a mai kaja ai lam hpe sharin la lu na re. Raitim, shi a mai kaja ai lam hpe tinang nan “chyim yu” na nga yang she, Yehowa gaw kade daram mai kaja ai hpe gaja wa chye na wa na re. (Shakawn 34:8 hpe hti u.) Dai hpe galaw lu ai ga shadawn langai hpe yu yu ga. Aten hpring magam lama ma hta anhte shang lawm lu ai ngu saga. Raitim, dai bandung de du na matu, anhte a prat hpe asan sha tawn ra na re. Mungdan hpe shawng tawn na nga yang, ra kadawn ai lam hpe Yehowa madi shadaw ya na re ngu ai Yesu a ga sadi hte seng nna, chyahkring hkring hti ga na re. Raitim, tinang nan gaw, dai ga sadi hpring sup wa ai mahkrum madup hpe kalang mung n hkrum ga ai rai na re. (Mat 6:33) Raitim, Yesu a ga sadi hpe kam ai majaw, anhte a jai gumhpraw hpe shayawm ai, bungli aten hpe galai shai nna hkaw tsun magam hta myit maju jung ga ai. Dai hku galaw na nga yang, anhte a ra kadawn ai lam hpe Yehowa gaw gaja wa madi shadaw ya ai ngu ai mahkrum madup hpe lu la na re. Yehowa a mai kaja ai lam hpe anhte nan “chyim yu” ga ai.

3. Shakawn 16:1, 2 hta tsun da ai hte maren, Yehowa a mai kaja ai lam hpe kadai ni akyu lu la ai kun?

 ³ Yehowa gaw “nlang hte hpe mai kaja ai myit madun” ai. Shi hpe n chye ai ni hpe pyi madun ai. (Shk 145:9; Mat 5:45) Raitim, laksan hku nna, Yehowa hpe tsawra nna myit masin mahkra hte magam gun nga ai ni gaw, shi a shaman chyeju hpe law law lu la ai. (Shakawn 16:1, 2 hpe hti u.) Yehowa a mai kaja ai lam kaw na akyu lu la mai ai lam nkau hpe hkaja mat ga.

4. Yehowa gaw shi hte ni htep hkra shakut ai ni hpe shi a mai kaja ai lam gara hku madun ai kun?

⁴ Yehowa kaw na sharin la lu ai lam ni hpe hkan sa shagu, anhte a prat hta kaja ai akyu hpe mu lu ai. Shi a lam hpe sharin la nna, shi hpe tsawra wa ai hte maren, shi hte tsan gang mat shangun chye ai myit mang lam hte lailen ni hpe tawt lai lu hkra shi karum ya ai. (Kol 1:21) Yehowa hpe apnawng nna hkalup hkam ai shaloi, shi gaw anhte hpe kaja ai myit nsam jaw nna, shi hte hku hkau wa ai hku nna shi a mai kaja ai lam hpe grau hkamsha lu ai. —1 Pe 3:21.

5. Hkaw tsun lawk hta Yehowa a mai kaja ai lam hpe gara hku hkamsha lu ai kun?

⁵ Hkaw tsun magam hta anhte shang lawm ai hte maren, Yehowa a mai kaja ai lam hpe matut nna hkamsha lu na re. Nang gaw kaya chye ai wa kun? Yehowa a masha law law gaw kaya chye ma ai. Yehowa a mayam garai n byin shi ai shaloi, tsasam ni a chyinghka hpe akawk nna, masha ni nau n ra ai shiga hpe tsun dan ra na re ngu galoi mung myit hkrup na n re. Raitim, ya gaw, nang dai hpe ayan galaw nga ai. Dai hta n-ga, Yehowa a karum shingtau lam hte hkaw tsun bungli hta kabu gara lu na matu nang sharin la wa ai. Yehowa madi shadaw ya ai hpe lam amyu myu hte nang hkamsha lu wa ai. Ninghkap ai lam ni hkrum ai shaloi, matut simsa na matu karum ya wa ai. Myit lawm ai nta madu ni hpe tsun dan na matu, Chyum daw ni hpe bai matsing hkra mung karum ya wa ai. Hkaw tsun lawk hta n kam madat ai ni hte hkrum tim pyi, matut nna hkaw tsun lu hkra, nang hpe n-gun jaw wa ai. —Yer 20:7-9.

6. Yehowa lajang da ya ai shaman shakyang lam ni gaw, shi a mai kaja ai lam hpe gara hku madun dan ai kun?

⁶ Hkaw tsun magam a matu shaman ya ai hku nna mung, Yehowa gaw shi a mai kaja ai lam hpe madun ai. (Yhn 6:45) Bat lapran zuphpawng hta atsawm hkyen lajang da ai tsun shaga ladat ni hpe madat la nna, dai hpe hkaw tsun magam hta akyu jashawn na matu n-gun jaw hkrum ai. Shawng nnan hta ladat nnan hpe galaw ai shaloi loi gaw tsang chye ai. Raitim, dai ladat nnan hpe galaw ai shaloi, anhte a hkaw tsun lawk hta akyu nga ai hpe mu lu ai. Zuphpawng ni hte zuphpawng kaba ni hta anhte kalang mung n galaw ga ai magam hta shang lawm na matu mung n-gun jaw hkrum ai. Dai hku galaw na matu, anhte myit tsang chye ai. Raitim, shakut galaw na nga yang, Yehowa shaman chyeju jaw na re. Anhte a masa gara hku mi nga tim, Yehowa hpe kaja htum sak jaw na matu, ladat nnan ni hpe tam ai shaloi lu la ai shaman chyeju nkau hpe bawngban yu ga. Dai hpang, anhte a magam bungli hpe maden jat lu ai lam ni hpe mung bawngban mat wa ga.

7. Anhte a hkaw tsun magam hpe maden jat na matu shakut ai nga yang, hpa shaman chyeju lu la na kun?

⁷ Yehowa hte anhte grau ni htep lu ai. Kolambia hta madu jan hte rau magam gun nga ai myitsu salang Sammyue * a kasi ningli hpe yu yu ga. Shan gaw, shanhte a nawku hpung hta ningshawng hku magam gun nga ai. Raitim, grau ra ai nawku hpung hta karum ya ai hku nna, shanhte a hkaw tsun magam hpe maden jat mayu wa ai. Dai bandung de du na matu, sak jaw ra ai lam nkau hpe galaw wa ai. “Mahte 6: 33 hpe hkan sa nna, n ra ai rai ni hpe n mari sai. Raitim, yak dik htum gaw nta hpe tawn da kau ra ai re. Nta hpe anhte nan hkrang soi wa nna,  nta gap ai shaloi mung hka n kap wa ai” ngu Sammyue tsun ai. Shan yan a lit nnan hta, lai wa sai aten na shang gumhpraw a htam kru hta, htam mi daram hte sha nga lu ai hpe chye wa ai. “Anhte a lahkam hpe Yehowa gara hku lam matsun ai, kyu hpyi ga hpe gara hku mahtai jaw ai ngu ai hpe mu wa ai. Shawng de kalang mung n hkrum ga ai lam hku nna, shi a ra sharawng ai lam hte tsawra myit hpe hkamsha lu wa ai” ngu Sammyue tsun ai. Na a hkaw tsun magam hpe lam lama ma hku nna maden jat lu na kun? Rai yang, Yehowa hte grau ni htep wa nna, nang hpe shi lanu lahku nga ai hpe mung kam wa na re.—Shk 18:25.

8. Aiban hte Bittoria tsun ai ga kaw na hpa sharin la lu ai kun?

⁸ Anhte a magam kaw nna kabu gara lam hpe tam mu ai. Kajit-satan hta ningshawng hku nna magam gun nga ai, Aiban hte Bittoria yan la tsun ai ga hpe mung sadi yu u. Shan a prat hpe asan sha tawn wa ai majaw, gawgap bungli hte hpawn, gara lit hpe raitim galaw lu wa ai. Aiban ndai hku tsun ai: “Lit langai hpra hpe anhte hpring tup shang lawm ai. Lani mi htum ai shaloi kade ba tim, Mungdan bungli hta anhte a n-gun hpe akyu jashawn nga ai hpe chye ai majaw, myit dik ai, simsa lam lu ai. Hku hkau lam ni hte anhte lu wa ai pyaw hpa myit dum hpa lam ni a majaw mung, an grai kabu gara lu wa ai.” —Mrk 10:29, 30.

9. Yakhkak ai masa nga ai nauna langai gaw, shi a hkaw tsun magam hpe maden jat na matu hpa galaw wa ai kun? Hpa akyu lu la wa ai kun?

⁹ Yakhkak ai masa lam ni hte hkrum tim pyi, Yehowa a magam hta kabu gara lam hpe tam mu ai. Ga shadawn, Sinna Ahprika hta nga ai asak kaba sai gaida Mera gaw, sarawun bungli kaw na pyin sin la ai hte ningshawng galaw hpang wa ai. Mera gaw lami laman machyi ai ana nga ai majaw, nta langai hpang langai hkaw tsun sa ai shaloi, hkying hkum mi sha shang lawm lu ai. Raitim, shawa hpawng man sakse hkam ai hta gaw aten law law shang lawm lu ai. Ngut nna, shi hta bai kawan ai hte Chyum ga sharin law law nga ai. Nkau hpe gaw phone hte matut mahkai ai. Dai hku galaw lu na matu, Mera hpe hpa gaw shadut ya wa ai kun? “Nye a salum hta Yehowa hte Yesu Hkristu hpe tsawra ai myit hpring chyat nga ai. Shi a magam hta grau nna shang lawm lu hkra karum ya rit ngu, Yehowa kaw chyahkring hkring kyu hpyi ai.” —Mat 22:36, 37.

10. 1 Petru 5:10 hta tsun da ai hte maren, rawt jat hkra shakut nga ai ni gaw Yehowa kaw na hpa lu la na kun?

¹⁰ Yehowa kaw na kahtap nna shaman shakyang lam ni lu la ai. Mawreshet kaw ningshawng hku nna magam gun nga ai Kenni gaw, dai lam jaw ai hpe mu wa ai. Tengman ai lam hpe sharin la ai shaloi, dakkasu jawng lung nga ai hpe hkring kau ai. Hkalup hkam la nna aten hpring magam hta shang lawm ai. Shi ndai hku tsun ai: “‘Ngai nga nga nngai, ngai hpe shangun dat e’ngu tsun wa ai myihtoi Esaia a ga hte maren, asak hkrung lu hkra ngai shakut ai.” (Esa 6:8) Kenni gaw gawgap bungli ni hta shawng lawm wa nna, Chyum Laika hta madung tawn ai laili laika ni hpe shi a amyu ga hte ga gale ai bungli hta mung karum ya wa ai. “Lit ni hpe ngut kre lu na matu, shaman shakyang ai lam ni hpe ngai lu la wa ai” ngu Kenni tsun ai. Raitim, dai bungli hpe gara hku galaw na ngu ai hta n-ga, shi sharin la wa ai. Shi ndai hku mung tsun ai: “Yehowa a matu grau kaja ai mayam byin hkra, shalat la ra ai atsam ningja ni hte ngai hta shadawn sharam ai lam nga ai ngu ai hpe mung sharin la wa ai.” (1 Petru 5:10 hpe hti u.) Nang mung galai shai ai lam ni galaw na nga yang, Yehowa gaw lam amyu myu hte shaman shakyang ya lu na re.

11. Hkaw tsun magam hta shang lawm lu hkra, Dingda Koria kaw na nauna ni gara hku shakut shaja wa ai kun? Hpa akyu lu la wa ai kun? (Makawp sumla hpe yu u.)

¹¹ Mahkrum madup nga ai Sakse Hkam ni pyi, magam bungli nnan hpe shakut ai shaloi, shaman shakyang ai lam kaw na akyu lu la ai. Kobit-19 kap bra ana byin nga ai laman Dingda Koria hta nga ai nawku hpung kaw na myitsu salang  ni ndai hku ka ai: “Shanhte a hkamja lam a majaw, hkaw tsun magam hta n shang lawm lu ai ngu shadu nga ai nkau gaw, ya nga yang, video hte matut mahkai lam ni galaw nga sai. Asak 80 jan sai nauna 3 gaw ladat nnan ni hpe sharin la nna, hkaw tsun magam hta shani shagu ngu na daram shang lawm nga sai.” (Shk 92:14, 15) Na a hkaw tsun magam hpe maden jat nna, Yehowa a mai kaja ai lam hpe grau nna chyim yu mayu ai kun? Dai bandung de du lu hkra nang hpe karum ya lu ai lam nkau hpe yu yu ga.

12. Yehowa gaw, shi hpe kamhpa ai ni hpe hpa ga sadi jaw ai kun?

¹² Yehowa hpe kamhpa na matu sharin la u. Shi hpe kamhpa nna kaja htum hpe sak jaw na nga yang, shaman chyeju law law jaw na ngu shi ga sadi jaw ai. (Mal 3:10) Kolambia kaw na nauna Hpabiola gaw, shi a mabyin hta Yehowa a dai ga sadi ni hpring tsup wa ai hpe mu wa ai. Shi gaw hkalup hkam ngut nna kade nna yang, aten galu ningshawng hku nna magam gun mayu wa ai. Raitim, madu wa hte kasha masum gaw shi a shang gumhpraw hta sha shamyet shanat nga ra ai. Dai majaw, pyin sin lu hkra karum ya rit ngu Yehowa kaw aja awa kyu hpyi ai. Shi ndai hku tsun ai: “Gaja nga yang, pyin sin lu na matu grai na hkra la ra ai. Raitim, ngai gaw shawk tawn da nna shata mi hta lu wa ai. Dai gaw grai mauhpa re!” Shata lahkawng na ai hpang ningshawng galaw ai. Ya nga yang, shi gaw asak 70 jan sai. Ningshawng bungli hta shang lawm nga ai 20 ning jan na sai. Dai aten laman masha marai 8 hpe hkalup hkam lu hkra karum ya wa ai. Shi ndai hku tsun ai: “Kalang lang n-gun n nga ai ngu hkamsha tim, nye a chyarang hte maren matut galaw lu hkra, Yehowa shani shagu karum ya ai.”

13-14. Yehowa hpe kamhpa nna rawt jat ai lam ni galaw lu hkra, gara ga shadawn ni gaw karum ya lu ai kun?

 ¹³ Yehowa hpe kamhpa ai ni a kasi ningli ni kaw na sharin la u. Chyum Laika hta Yehowa a magam hpe shakut wa ai ni a kasi ningli ni hte hpring nga ai. Mabyin law law hta dai mayam ni gaw, Yehowa kaw na shaman chyeju hpe garai n lu la shi yang, shanhte shawng galaw hpang wa ai. Ga shadawn, Abraham gaw “gade sa wa ai shi n chye ti mung” shi a nta hpe tawn da kau ngut ai hpang she, Yehowa kaw na shaman chyeju lu la wa ai. (Heb 11:8) Yaku gaw, lamu kasa hte kamu hkat ngut ai hpang she shaman chyeju lu la wa ai. (Nin 32:24-30) Israela amyu masha ni gaw, Ga Sadi Tawn Da Ai Mungdan de n shang shi yang, hka hpung la ja ai Yawdan Hka kaw hkinjawng ni kabye ngut ai hpang she, shanhte rap mat wa lu ai. —Ysh 3:14-16.

¹⁴ Yehowa hpe kamhpa nna rawt jat hkra shakut ai dai ni aten na Sakse Hkam ni a kasi ningli ni kaw nna mung akyu lu la mai ai. Ga shadawn hpunau Petan hte madu jan Daiyana gaw, “Tinang Hkum Tinang Sharawng Awng Let Sak Jaw Ai Ni” (BU) ngu ai sumhpa * zawn re ai, Yehowa a magam hpe maden jat wa ai hpunau nauna ni a lam hti ai hpe ra sharawng ai. Petan ndai hku tsun ai: “Shanhte a mahkrum madup hpe hti ai shaloi, marai langai ngai gaw grai mu ai malu masha hpe kabu gara hte sha nga ai hpe yu taw nga ai zawn hkamsha ai. Anhte yu magam, Yehowa a mai kaja ai lam hpe chyim yu nna chye mayu ai myit law wa magam re.” Hpang jahtum hta Petan hte Daiyana gaw grau ra ai shara hta magam gun na matu htawt mat ai. Dai sumhpa hpe hti ga ai kun? Ngut na, jw.org hta mara da ai San San Rai Nga Ai Shara Hta Sakse Hkam Ai Lam—Awstelia (BU) hte San San Rai Nga Ai Shara Hta Sakse Hkam Ai Lam—Aiyalen (E) ngu ai video hpe yu ga ai kun? Hkaw tsun magam hpe maden jat lu hkra, dai hkingrai ni gaw karum ya lu ai.

15. Kaja ai kanawn manang ni gaw, anhte hpe gara hku karum ya lu ai kun?

¹⁵ Kaja ai kanawn manang hpe lata u. Kalang mung n sha ga ai malu masha hpe sha yu na matu, dai lu sha hpe grai sha ra ai ni hte rau sha na nga yang, anhte a matu grau loi na re. Dai zawn sha, tinang a prat hta Yehowa hpe shawng tawn ai ni hte kanawn mazum na nga yang, Karai a magam hta maden jat mayu wa na re. Ken hte Braw-nika ngu ai yan la mung, dai lam teng ai hpe mu wa ai. “Anhte a manang ni hte nta masha ni gaw, magam gun ai hta lam nnan ni hpe tam na matu n-gun jaw ai. Mungdan hpe shawng tawn ai ni hte kanawn mazum ai gaw, lam nnan ni hpe shakut galaw yu na matu, kam ai myit lu la shangun ai hpe anhte sadi hkrup ai” ngu Ken tsun ai. Ya nga yang Ken hte Braw-nika gaw Sabia hta laksan ningshawng hku nna magam gun nga sai.

16. Luka 12:16-21 hta mu lu ai Yesu a ga shadawn hte maren, sharawng awng let hpa majaw sak jaw ging ai kun?

¹⁶ Yehowa a matu sak jaw u. Yehowa a ra sharawng ai lam hpe lu na matu, lam yawng hpe asum n hkam kau ra ai. (Hpj 5:19, 20) Raitim, sak jaw ai lam ni n galaw ai sha, Karai a magam hta grau shang lawm na matu htingnut nga ai nga yang, nga mu nga mai ai prat hpe lu tawn da tim, Karai hpe ndang kau ai Yesu a ga shadawn kaw na la langai zawn, anhte shut ai hpe galaw hkrup chye ai. (Luka 12:16-21 hpe hti u.) Pyintit kaw nga ai hpunau Hkristiyan ndai hku tsun ai: “Yehowa hte nta masha ni a matu, nye a kaja htum aten hte n-gun hpe n jaw wa ai.” Shi hte shi madu jan gaw ningshawng galaw na matu dawdan wa ai. Raitim, dai bandung de du na matu, shanhte na bungli hpe tawn da kau ra ai. Shan yan gaw, tinang hkum tinang madi shadaw na matu, jasan jaseng bungli hpe galaw nna shang gumhpraw kachyi mi hte sha, chye nga na matu sharin la wa ai. Shan yan a sak jaw  ai lam gaw akyu rawng ai kun? Hkristiyan ndai hku tsun ai: “Ya gaw hkaw tsun magam hta grau kabu gara nga nna, Yehowa a lam hpe sharin la nga ai Chyum ga sharin ni hte bai kawan ai ni hpe mu lu ai majaw mung kabu gara nga ai.”

17. Hkaw tsun ladat nnan hta shang lawm ai shaloi, anhte shakut na matu hpa gaw yak shangun chye ai kun?

¹⁷ Magam nnan hpe sharawng awng let shakut mayu ai myit nga u. (Kas 17:16, 17; 20:20, 21) Amerikan mungdan hta nga ai ningshawng Shale gaw, Kobit-19 kap bra ana byin nga ai laman, shi a magam hpe galai shai ai lam ni galaw wa ai. Shawng nnan hta gaw phone hte sakse hkam na matu htingnut wa ai. Raitim, hpung kawan bat laman shaman shakyang ai lam hpe lu la ngut ai hpang, phone hte sakse hkam ai hta ayan shang lawm nga ai. Shi ndai hku tsun ai: “Nnan hta gaw grai hkrit ai. Raitim, ya ngai gaja wa grai pyaw nga sai. Nta langai hpang langai sa ai hta na masha law law hpang de grau du lu ai.”

18. Anhte a hkaw tsun magam hpe maden jat na matu shakut ai shaloi, mayak mahkak ni hkrum ai nga yang hpa gaw karum ya lu ai kun?

¹⁸ Masing jahkrat nna shakut galaw u. Mayak mahkak ni hkrum ai shaloi, lajang da ai hpe tatut galaw lu hkra, anhte a myit mang ai lam hpe kaja htum akyu jashawn lu na matu kyu hpyi ai. (Gsh 3:21) Urawpa kaw na Ro-mani amyu ga shaga ai hpung hta aten galu ningshawng hku nna, magam gun nga ai Sonia ndai hku tsun ai: “Ngai na masing ni hpe laika pa hta ka jahkrat nna mu lu ai shara hta tawn da ai. Nye a saboi hta n bung ai shara de sa nga ai lam lahkawng hpe soi tawn da ai. Dawdan lam ni jahkrat ai shaloi, dai sumla hpe yu nna, nye a dawdan lam gaw gara lam de woi mat lu ai hpe myit yu ai.” Sonia gaw, shi hkrum ai mayak mahkak ni hpe kaja ai ningmu hte mu chye na matu shakut ai. “Masa lam nnan langai hpra gaw, nye a myit jasat hta madung nna, ngai hpe pat shingdang nga ai shakum (sh) karum ya nga ai mahkrai langai hte bung mat shangun lu ai” ngu shi tsun ai.

19. Anhte a dawdan lam gaw hpa rai ging ai kun?

¹⁹ Yehowa gaw anhte hpe lam law law hte shaman chyeju jaw nga ai. Shi hpe shakawn lu ai lam yawng hpe galaw ai hku nna, dai shaman chyeju ni hpe anhte gade daram manu shadan ai lam madun lu ai. (Heb 13:15) Dai hta kahtap nna shaman chyeju lu la na matu, anhte a hkaw tsun magam hpe maden jat lu hkra, lam nnan ni hpe galaw yu ai lam lawm ai. ‘Yehowa mai kaja nga ai hpe chyim yu nna chye’ lu ai lam ni hpe shani shagu tam nga ga. Rai yang, “ngai e shangun dat ai wa a myit hku hkan galaw na hte, shi a magam bungli shangut lu na gaw, nye a shahpa rai nga li ai” ngu tsun wa ai Yesu hte bung lu na re. —Yhn 4:34.