1-2. Ɛzɩ Keɣa 33:9 yɔɔdʋʋ yɔ, pɩsa nɛ ɖɩna se Yehowa wɛ ɖeu lɛ, ɛbɛ pɩpɔzʋʋ se ɖɩla?

KPAƔ se nɔɔyʋ ha-ŋ tɔɔnaɣ nakɛyɛ nɛ wiɖiyi ŋtɩɖɩŋ-kɛ nɛ ŋna. Ŋpɩzɩɣ nɛ ŋtɩlɩ tɔm natʋyʋ tɔɔnaɣ ŋga kɔ-yɔɔ, ye ŋcɔnɩ-kɛ, ŋnɩɩ kɔ-sɔzɩŋ, ŋtɩlɩ mbʋ mbʋ pakpaɣaa nɛ palabɩnɩ-kɛ yɔ, yaa ye ŋpɔzɩ ɛyaa lalaa se peheyi-ŋ lɩmaɣza wena pɛwɛnɩ tɔɔnaɣ ŋga kɔ-yɔɔ yɔ. Ɛlɛ, nʋmɔʋ ŋgʋ ki-ɖeke kɩ-yɔɔ ŋpɩzɩɣ ŋtɩŋna nɛ ŋna se ŋsɔɔlɩ tɔɔnaɣ ŋga yaa ŋtɩsɔɔlɩ-kɛ yɔ ŋgʋ lɛ se ña-maɣmaɣ ŋɖɩŋ-kɛ.

² Ðɩpɩzɩɣ nɛ ɖɩtɩlɩ Yehowa kɩbandʋ yɔɔ tɔm natʋyʋ, ye ɖɩkalɩɣ Bibl nɛ ɖɛ-ɛgbɛyɛ takayɩsɩ, nɛ ye ɛyaa lalaa iheyiɣ-ɖʋ wazasɩ nzɩ pehiɣ Yehowa cɔlɔ yɔ sɩ-tɔm yɔ. Ɛlɛ ye ɖa-maɣmaɣ ‘ɖɩɖɩŋ’ Yehowa kɩbandʋ yɔ, ɖɩkaɣ naʋ kpayɩ kpayɩ se ɛwɛ ɖeu. (Kalɩ Keɣa 33:9.) Iyele nɛ ɖɩkpaɣ kɩɖaʋ nakʋyʋ nɛ ɖɩna nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ ɩ-taa nakʋyʋ. Ðɩkpaɣ se ɖɩsɔɔlaa se ɖɩla alɩwaatʋ tɩŋa Ɛsɔ sɛtʋ tʋmɩyɛ naɖɩyɛ, ɛlɛ pɩsa nɛ ɖɩtalɩ kaɖʋwa ŋga lɛ, pɩkaɣ pɔzʋʋ se ɖɩcaɣ wezuu kɛlɛʋ. Pɩtɩla, ɖoŋ ɖoŋ ɖɩkalɩɣ tamaɣ ŋga Yesu laba se ye ɖɩsɩ Kewiyaɣ tʋma kajalaɣ lone taa yɔ, Yehowa kaɣ-ɖʋ haʋ mbʋ pɩpɔzʋʋ-ɖʋ toovenim taa yɔ. Ɛlɛ wiɖiyi tamaɣ ŋga katɩla ɖɔ-hɔɔlʋʋ taa nɛ ɖɩna. (Mat. 6:33) Paa mbʋ yɔ, ɖɩwɛnɩ tisuu Yesu tamaɣ ŋga kɔ-yɔɔ, pʋyɔɔ lɛ ɖɩpasɩ liidiye nɖɩ ɖɩyakɩnɩ wondu yɔ ɖɩ-yɔɔ, ɖɩpasɩ alɩwaatʋ ndʋ ɖɩkpakɩɣ nɛ ɖɩlakɩnɩ tomnaɣ yɔɔ tʋmɩyɛ yɔ tɩ-yɔɔ, nɛ ɖɩka ɖa-lɩmaɣza ɖɔ-tɔm susuu tʋmɩyɛ yɔɔ. Alɩwaatʋ ndʋ ɖɩlakɩ mbʋ yɔ, ɖa-maɣmaɣ ɖiɖiɣziɣna se toovenim taa lɛ, Yehowa cɔŋnɩ ɖa-kɩcɛyɩm ɖeɖe. Ða-maɣmaɣ ‘ɖɩɖɩŋɩɣ’ Yehowa kɩbandʋ.

3. Ɛzɩ Keɣa 15:1, 2 yɔɔdʋʋ yɔ, mba Yehowa lakɩ kɩbandʋ?

³ Yehowa kɛ “paa anɩ lɛ ɛ-camɩyɛ laɖʋ,” halɩ pɩkpɛndɩnɩ mba paasɩŋɩ-ɩ yɔ. (Keɣa 144:9; Mat. 5:45) Ɛlɛ kɔzɩ kɔzɩ lɛ, mba pɔsɔɔlɩ Yehowa nɛ pɛsɛɣ-ɩ nɛ pa-kalɩzaɣ pilim yɔ, pehikiɣ  wazasɩ sakɩyɛ ɛ-cɔlɔ. (Kalɩ Keɣa 15:1, 2.) Iyele nɛ ɖɩna hɔɔlɩŋ weyi ɩ-taa Yehowa lakɩ-ɖʋ kɩbandʋ yɔ ɩ-taa nɩɩyɩ.

4. Ɛzɩma Yehowa lakɩ kɩbandʋ ɛyaa mba papaɣzɩɣ-ɩ ñɔtɩnʋʋ yɔ?

⁴ Alɩwaatʋ ndʋ payɩ ɖɩɖɔŋ tɔm ndʋ ɖɩkpɛlɩkɩɣ Yehowa cɔlɔ yɔ tɩ-yɔɔ yɔ, ɖɩnaɣ se pɩwɛɣnɩ ɖoŋ kɩbaŋ ɖe-wezuu caɣʋ yɔɔ. Ðɩkpɛlɩkɩ ɛ-yɔɔ tɔm nɛ ɖɩpaɣzɩ-ɩ sɔɔlʋʋ lɛ, ɛsɩnɩ-ɖʋ nɛ ɖɩwa lɩmaɣza nɛ lakasɩ nzɩ siiyeba nɛ ɖiposini-i yɔ. (Kol. 1:21) Nɛ alɩwaatʋ ndʋ ɖɩha ɖa-tɩ Yehowa nɛ pamɩyɩsɩ-ɖʋ lɩm yɔ, ɛlabɩ-ɖʋ kɩbandʋ nɛ pɩkɩlɩ; tɩ-taa natʋyʋ lɛ se ɛha-ɖʋ ɛhʋyɛ kɩbanɖɛ nɛ eyele nɛ taabalɩyɛ kɩbanɖɛ wɛɛ ɖa nɛ ɩ ɖɛ-hɛkʋ taa.—1 Pɩy. 3:21.

5. Ɛzɩma Yehowa lakɩ-ɖʋ kɩbandʋ ɖɔ-tɔm susuu tʋmɩyɛ taa?

⁵ Alɩwaatʋ ndʋ ɖɩpaɣzɩɣ tɔm susuu yɔ, Yehowa woki pɩ-yɔɔ nɛ ɛlakɩ-ɖʋ kɩbandʋ. Ŋkɛ ɛyʋ weyi ɛwɛ fɛyɛ yɔ? Yehowa sɛyaa sakɩyɛ wɛ fɛyɛ. Pɩtɩla, pʋcɔ nɛ ŋpɩsɩɣ Yehowa sɛyʋ lɛ, ŋtaamaɣzɩ kpa se wiɖiyi ŋkaɣ pɩzʋʋ nɛ ŋwolo ɛyʋ weyi ŋŋsɩŋɩ-ɩ yɔ ɛ-tɛ nɛ ŋsusi-i Bibl taa tɔm. Ɛlɛ sɔnɔ, ŋlakɩ mbʋ ɖoŋ ɖoŋ. Pɩtasɩ lɛ, Yehowa sɩnɩ-ŋ nɛ ŋsɔɔlɩ tɔm susuu tʋmɩyɛ. Yehowa sɩnɩ-ŋ hɔɔlɩŋ lɛɛŋ taa ɖɔɖɔ. Ɛsɩnɩ-ŋ nɛ ŋɖɔkɩ ña-laŋɩyɛ alɩwaatʋ ndʋ nɔɔyʋ kaɖɩnɩ-ŋ yɔ. Ɛsɩnɩ-ŋ ɖɔɖɔ nɛ ŋtɔzɩ mayaɣ ŋga kamʋnaa yɔ kɔ-yɔɔ alɩwaatʋ ndʋ ɖɩɣdʋ nɔɔyʋ sɔɔlaa se ewelisiɣni-ŋ yɔ. Nɛ ɛha-ŋ ɖoŋ se ŋwolo pɩ-yɔɔ nɛ ŋsusi tɔm paa ɛyaa ɩtɩsɔɔlɩ se pewelisini-ŋ yɔ.—Yer. 20:7-9.

6. Falɩsʋʋ mbʋ ɖɩmʋʋ Yehowa cɔlɔ yɔ, ɛzɩma pɩwɩlɩɣ kpayɩ kpayɩ se ɛlakɩ-ɖʋ kɩbandʋ?

⁶ Yehowa lakɩ-ɖʋ kɩbandʋ ɖɔɖɔ alɩwaatʋ ndʋ ɛfalɩsɩɣ-ɖʋ se ɖɩpɩzɩ nɛ ɖɩla tɔm susuu tʋmɩyɛ yɔ. (Yoh. 6:45) Kpɩtaʋ hɛkʋ taa kediɣzaɣ taa, ɖiwelisiɣ kɛdɛsɩ nzɩ pɔñɔɔzɩ camɩyɛ yɔ nɛ peseɣtiɣ-ɖʋ se ɖɩlabɩnɩ-sɩ tʋmɩyɛ tɔm susuu taa. Kajalaɣ taa lɛ, sɔɔndʋ pɩzɩɣ nɛ tɩkpa-ɖʋ pazɩ se ɖɩlabɩnɩ tʋmɩyɛ lɔŋ tasʋʋ kɩfam nabʋyʋ. Ɛlɛ alɩwaatʋ ndʋ ɖɩlakɩnɩ-pʋ tʋmɩyɛ yɔ, ɖɩpɩzɩɣ nɛ ɖiɖiɣzina se pɩlakɩ tʋmɩyɛ camɩyɛ. Pɩtasɩ lɛ, peseɣtiɣ-ɖʋ kediɣzisi taa nɛ kigbeɣliŋ taa se ɖɩlabɩnɩ tʋmɩyɛ tɔm susuu nʋmɔʋ kɩfaŋ, weyi pɩtɩla ɖɩtɩlabɩnɩ-ɩ tʋmɩyɛ nɛ ɖɩna yɔ. Hɔɔlʋʋ ŋgʋ kɩ-taa ɖɔɖɔ lɛ, pɩkaɣ pɔzʋʋ se ɖiyele mbʋ pɩmalɩnɩ-ɖʋ yɔ pɩ-labʋ; ɛlɛ ye ɖɩlabɩ mbʋ yɔ, ɖɩhaɣ nabʋyʋ Yehowa se ɛwazɩ pɩ-yɔɔ. Paa wɛtʋ ndʋ taa ɖɩtɩɩwɛɛ yɔ, alɩwaatʋ ndʋ ɖɩlakɩnɩ tʋmɩyɛ nʋmɔŋ kɩfaŋ nɛ ɖɩhaɣ Yehowa mbʋ ɖɩwɛna nɛ pɩkpaɖɩ ɖeu yɔ, ɖihikiɣ wazasɩ sakɩyɛ. Iyele nɛ ɖɩna sɩ-taa nasɩyɩ. Pʋwayɩ lɛ, ɖɩkaɣ naʋ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwalɩsɩ ɖɔ-tɔm susuu tʋmɩyɛ yɔ.

7. Ye ɖɩñakɩ pana se ɖɩwalɩsɩ ɖɛ-Ɛsɔ sɛtʋ tʋmɩyɛ yɔ, wazaɣ ŋga ɖihikiɣ?

⁷ Ðɩñɔtʋʋnɩ Yehowa nɛ pɩkɩlɩ. Iyele nɛ ɖɩna ɛgbɛyɛ taa ɛzʋtʋyʋ nɔɔyʋ kɩɖaʋ. Payaɣ-ɩ se Samuel, * ɛ nɛ ɛ-halʋ palakɩ pɛ-Ɛsɔ sɛtʋ tʋmɩyɛ Kolombii ɛjaɖɛ taa. Ɛ nɛ ɛ-halʋ pa-taa kaawɛ leleŋ se pɛwɛɛ nɛ palakɩ nʋmɔʋ lɩzʋʋ tʋmɩyɛ pɛ-ɛgbɛyɛ taa, ɛlɛ paasɔɔlaa se pawalɩsɩ pɛ-Ɛsɔ sɛtʋ tʋmɩyɛ nɛ powolo paɖʋ nesi ɛgbɛyɛ nɖɩ ɖɩ-taa pɩpɔzʋʋ tɔm susuyaa nɛ pɩkɩlɩ yɔ. Pʋcɔ nɛ patalɩ kaɖʋwa ŋga lɛ, pɩɩpɔzaa se palaa kɩlaŋ nɩɩyɩ. Samuel yɔɔdaa se: “Ðɩlabɩnɩ tʋmɩyɛ tɔm ndʋ tɩwɛ Maatiyee 6:33 taa yɔ nɛ ɖiyele yabʋ wondu ndʋ tɩ-tɔm tɩcɛyɩ yɔ. Ɛlɛ nɩŋgbaŋaɣ ŋga kɛ-kpɛzʋʋ kaakɩlɩ-ɖʋ labʋ kaɖɛ yɔ, ŋga lɛ se ɖɩɖɛɛ nɛ ɖiyele ɖa-ɖɩɣa. Paama-kɛ ɖeyi ɖeyi ɛzɩ ɖɩsɔɔlʋʋ yɔ, nɛ ɖɩtɩkɩndɩ liidiye pʋcɔ nɛ ɖɩma-kɛ.” Koobu ɛnʋ nɛ ɛ-halʋ pakʋyaa nɛ powolo ɛgbɛyɛ kɩfaɖɛ taa lɛ, liidiye nɖɩ pɩpɔzʋʋ-wɛ se pɔcɔnɩ pa-kɩcɛyɩm ɖeɖe yɔ, ɖɩtɩɖɔɔ nɛ pɩtalɩ nɖɩ pɩpɔzaɣ-wɛ ɖooo lɛ yɔ. Samuel tasɩ yɔɔdʋʋ se: “Ðɩna ɛzɩma Yehowa ɖiyi nɩŋgbanzɩ nzɩ  ɖɩkpɛzaa yɔ nɛ ecosi ɖa-adɩma yɔɔ yɔ. Ðiɖiɣzinaa se ɖɔ-tɔm kɛdɩnɩ Yehowa nɛ ɛsɔɔlɩ-ɖʋ, nɛ wiɖiyi pɩtɩlabɩ-ɖʋ mbʋ.” Ŋpɩzɩɣ ŋtɩŋnɩ nʋmɔʋ nakʋyʋ yɔɔ nɛ ŋwalɩsɩ ñɛ-Ɛsɔ sɛtʋ tʋmɩyɛ na? Ye ɛɛɛ yɔ, ña-taa pɩzɩɣ nɛ pɩtɛ se ŋkaɣ ñɔtɩnʋʋ Yehowa nɛ pɩkɩlɩ nɛ ɛkaɣ cɔnʋʋ ñɔ-yɔɔ.—Keɣa 17:26.

8. Tɔm ndʋ Ivan nɛ Viktoria pɔyɔɔdaa yɔ, ɛbɛ tɩkpɛlɩkɩɣ-ŋ?

⁸ Ðihikiɣ taa leleŋ ɖɛ-Ɛsɔ sɛtʋ tʋmɩyɛ taa. Ivan nɛ ɛ-halʋ Viktoria pɛkɛ nʋmɔʋ lɩzɩyaa Kirgizistan; na tɔm ndʋ pɔyɔɔdaa yɔ. Pacaɣ wezuu kɛlɛʋ se pɩsa nɛ paha pa-tɩ faaa nɛ pala paa tʋmɩyɛ nɖɩ, pɩkpɛndɩnɩ Ɛsɔ sɛtʋ kuduyuŋ maʋ tʋma. Ivan yɔɔdaa se: “Ðɩñaɣ pana nɛ ɖɩla ɖo-ɖoŋ ɖeɖe paa tʋmɩyɛ nɖɩ lɛ ɖɩ-taa. Evemiye tɛŋ lɛ pɩnɩ-ɖʋ; paa mbʋ yɔ, ɖihikaɣ laŋhɛzɩyɛ nɛ taa leleŋ mbʋ pʋyɔɔ yɔ ɖɩnawa se ɖɩkpaɣ ɖo-ɖoŋ nɛ ɖɩɖʋnɩ nesi Kewiyaɣ tʋmɩyɛ. Ðihiɣ taa leleŋ siŋŋ ɖɔɖɔ mbʋ pʋyɔɔ yɔ, ɖihiɣ taabalaa kɩfama sakɩyɛ nɛ ɖɩkatɩ wɛtʋ kɩbandʋ sakɩyɛ ndʋ tɩ-yɔɔ ɖɩɩsɔʋ yɔ.”—Mark. 10:29, 30.

9. (a) Ɛbɛ koobu halɩñɩnʋ nɔɔyʋ laba nɛ ɛwalɩsɩ ɛ-Ɛsɔ sɛtʋ tʋmɩyɛ paa ɛkataɣ tɩlasɩ yɔ? (b) Nɛ ɛbɛ lɩ pɩ-taa?

⁹ Ðihikiɣ taa leleŋ Yehowa sɛtʋ taa, halɩ pɩkpɛndɩnɩ alɩwaatʋ ndʋ ɖɩkatɩɣ tɩlasɩ yɔ. Mirreh wɛ Afrika wɩsɩ ɖɩɖʋyɛ taa, ɛkpadɩyaa nɛ ɛkɛ lelu, nɛ ɛɛkɛ ɖɔkɔtɔ. Alɩwaatʋ ndʋ ɛmʋ hɛzʋʋ tʋmɩyɛ taa yɔ, ɛpaɣzɩ labʋ nʋmɔʋ lɩzʋʋ tʋmɩyɛ. Mirreh wɛnɩ kʋdɔŋ sɔsɔʋ nakʋyʋ nɛ kiyeki nɛ ɖɔnɛ wɛɣ-ɩ kaɖɛ; nɛ ɛlɩɣ tɔm susuu lɛ, ñɩɣyʋʋ kʋɖʋmʋʋ ɖeke ɛpɩzɩɣ nɛ ɛla kpaɣ ɖɩɣa nɛ ŋwolo ɖɩɣa. Ɛlɛ ɛpɩzɩɣ nɛ ɛlakɩ sakɩyɛ samaɣ taa tɔm susuu taa. Ɛwɛnɩ pɩsɩ nɛ ŋna-ɩ waa nɛ Bibl kpɛlɩkɩyaa sakɩyɛ, nɛ pɔrtaabɩlɩ yɔɔ ɛtɩŋɩɣna nɛ ɛ nɛ pa-taa nabɛyɛ palakɩ kɛdaɣ. Ɛbɛ seɣti Mirreh nɛ ɛwalɩsɩ ɛ-Ɛsɔ sɛtʋ tʋmɩyɛ? Ɛyɔɔdaa se: “Mɔnsɔɔlɩ Yehowa nɛ Krɩstʋ Yesu siŋŋ. Nɛ ɖoŋ ɖoŋ lɛ, mantɩmɩɣnɩ Yehowa se ɛsɩnɩ-m nɛ mala mon-ɖoŋ ɖeɖe ɛ-sɛtʋ taa.—Mat. 22:36, 37.

10. Ɛzɩ 1 Pɩyɛɛrɩ 5:10 wɩlʋʋ yɔ, ɛyaa mba pawalɩsɩɣ pɛ-Ɛsɔ sɛtʋ tʋmɩyɛ yɔ, ɛbɛ Yehowa lakɩ-wɛ?

¹⁰ Yehowa falɩsɩɣ-ɖʋ nɛ pɩkɩlɩ. Kenny kɛ nʋmɔʋ lɩzɩyʋ lɩm hɛkʋ taa tɛtʋ ndʋ payaɣ se Moorisi yɔ tɩ-taa. Eɖiɣzinaa se tɔm ndʋ tɩkɛ toovenim. Alɩwaatʋ ndʋ ɛkpɛlɩkɩ toovenim yɔ, eyebi labʋ sukuli kɩtɛzʋʋ, ɛha ɛ-tɩ nɛ pamɩyɩsɩ-ɩ lɩm nɛ ɛpaɣzɩ labʋ alɩwaatʋ tɩŋa Ɛsɔ sɛtʋ tʋmɩyɛ. Ɛyɔɔdaa se: “Mañaɣ pana se mala ɛzɩ nayʋ Izaayii kaalabʋ yɔ. Izaayii yɔɔdaa se: ‘Ma yɔ, tiyi-m.’” (Iza. 6:8) Kenny ɖʋ nesi Ɛsɔ sɛtʋ kuduyuŋ maʋ tʋma tam sakɩyɛ, nɛ ɛɖʋ nesi ɖɔɖɔ nɛ pɛɖɛzɩ ɖa-takayɩsɩ ɛ-kʋnʋŋ taa. Kenny yɔɔdaa se: “Mamʋ falɩsʋʋ nɛ pɩsɩnɩ-m nɛ mɛwɛɛnɩ lɛɣtʋ ndʋ pɩpɔzaɣ-m se mala tʋma wena paɖʋwaɣ-m yɔ.” Ɛlɛ, pɩtasɩna se ɛkpɛlɩkɩ ɛzɩma ɛla tʋma wena paɖʋwaɣ-ɩ yɔ lɛ, ɛkpɛlɩkɩ nabʋyʋ ɖɔɖɔ. Ɛtasɩ yɔɔdʋʋ se: “Mantɩlɩ mon-ɖoŋ kamaɣ nɛ mɛnkpɛlɩkɩ wɛtʋ kɩbandʋ ndʋ pɩpɔzʋʋ se mɛwɛɛna nɛ manpɩsɩ Yehowa sɛyʋ kɩbanʋ nɛ pɩkɩlɩ yɔ.” (Kalɩ 1 Pɩyɛɛrɩ 5:10.) Pɩtɩla, ña ɖɔɖɔ ŋpɩzɩɣ nɛ ŋla lɛɣzɩtʋ natʋyʋ nɛ pɩsa nɛ Yehowa falɩsɩ-ŋ nɛ pɩkɩlɩ.

11. (a) Pana wena Kooree Hadɛ Kiŋ ɛjaɖɛ taa koobiya halɩñɩma nabɛyɛ ñaɣaa se pɩsa nɛ papɩzɩ nɛ paɖʋ nesi tɔm susuu tʋmɩyɛ? (b) Nɛ ɛbɛ lɩ pɩ-taa? (Cɔnɩ takayaɣ huyuu yɔɔ kɩlɛmʋʋ.)

¹¹ Halɩ mba pɛkɛ Yehowa Aseɣɖe Tɩnaa pɩlakɩ pɩnzɩ sakɩyɛ yɔ, pɩpɔzʋʋ se pafalɩsɩ-wɛ alɩwaatʋ ndʋ pañɩnɩɣ se pala Ɛsɔ sɛtʋ tʋmɩyɛ kɩfaɖɛ naɖɩyɛ yɔ. COVID-19 kʋdɔŋ alɩwaatʋ taa, Kooree Hadɛ Kiŋ ɛjaɖɛ taa ɛgbɛyɛ naɖɩyɛ taa ɛzʋtʋyaa yɔɔdaa se: “Ɛyaa mba ɖooo lɛ pataapɩzɩɣ se palɩɩ nɛ posusi tɔm alɩwaatʋ sakɩyɛ mbʋ pʋyɔɔ yɔ pɛfɛyɩnɩ tɔnʋʋ taa alaafɩya yɔ, lɛɛlɛɛyɔ papɩzɩɣ nɛ patɩŋɩɣnɩ visioconférence yɔɔ nɛ posusuu tɔm ɖoŋ ɖoŋ. Koobiya halɩñɩma nabɛyɛ naadozo wɛnɩ pɩnzɩ 80 mbʋ yɔ; pɛkpɛlɩkɩ ɛzɩma patɩŋnɩ ordinatɛɛrɩ yɔɔ nɛ posusi tɔm yɔ nɛ lɛɛlɛɛyɔ pañakɩ pana se ye pɩsaŋ yɔ posusi tɔm paa evemiye  nɖɩ.” (Keɣa 91:15, 16) Ŋsɔɔlaa se ŋwalɩsɩ ñɛ-Ɛsɔ sɛyʋ tʋmɩyɛ nɛ ŋɖɩŋ Yehowa kɩbandʋ nɛ pɩkɩlɩ? Na nɩŋgbanzɩ nzɩ ŋpɩzɩɣ ŋkpɛzɩ nɛ pɩsɩnɩ-ŋ nɛ ŋtalɩ kaɖʋwa ŋga yɔ sɩ-taa nasɩyɩ.

12. Tamaɣ ŋga Yehowa labɩ mba pataɣ-ɩ liu yɔ?

¹² Kpɛlɩkɩ ɛzɩma ŋtaa Yehowa liu yɔ. Ɛlabɩ-ɖʋ tamaɣ se ye ɖɩtaɣ-ɩ liu nɛ ɖɩhaɣ-ɩ mbʋ ɖɩwɛna nɛ pɩkpaɖɩ ɖeu yɔ, ɛkaɣ-ɖʋ wazʋʋ. (Mal. 3:10) Payaɣ koobu halɩñɩnʋ nɔɔyʋ se Fabiola nɛ ɛwɛ Kolombii ɛjaɖɛ taa. Ɛnawa se Yehowa ɖɔm ɛ-tamaɣ yɔɔ ɛ-hɔɔlʋʋ taa. Pamɩyɩsɩ-ɩ lɩm nɛ pitileɖi lɛ, ɛɛsɔɔlaa se ɛla paa ɖooye nʋmɔʋ lɩzʋʋ tʋmɩyɛ. Ɛlɛ pɩɩpɔzaa se ɛla tʋmɩyɛ nɛ ɛcɔnɩ ɛ-hɔʋ yɔɔ. Pʋyɔɔ lɛ, alɩwaatʋ talaa se ɛmʋ hɛzʋʋ tʋmɩyɛ taa lɛ, ɛtɩmnɩ Yehowa siŋŋ se ɛsɩnɩ-ɩ. Ɛyɔɔdaa se: “Ðoŋ ɖoŋ lɛ, pɩpɔzʋʋ se ɛyaa ɩɖaŋ alɩwaatʋ sakɩyɛ pʋcɔ nɛ papaɣzɩ mʋʋ liidiye nɖɩ pɛhɛyɩɣ-wɛ hɛzʋʋ wayɩ yɔ, ɛlɛ manpaɣzɩ ma-ñɩnɖɛ mʋʋ fenaɣ kʋɖʋmaɣ wayɩ. Pɩɩwɛ ɛzɩ maamaaci lakasɩ nasɩyɩ yɔ!” Fenasɩ naalɛ wayɩ lɛ, ɛpaɣzɩ nʋmɔʋ lɩzʋʋ tʋmɩyɛ. Lɛɛlɛɛyɔ ɛwɛnɩ pɩnzɩ 70 mbʋ yɔ, nɛ ɛkɛʋ nʋmɔʋ lɩzɩyʋ yɔ, pɩcɛzɩ pɩnzɩ 20. Alɩwaatʋ ndʋ tɩ-tɩŋa tɩ-taa, ɛsɩnɩ ɛyaa lutozo nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm. Ɛtasɩ yɔɔdʋʋ se: “Paa nabʋyʋ taa pɩlakɩ-m ɛzɩ mɛnfɛyɩ ɖoŋ yɔ, Yehowa sɩɣnɩ-m paa evemiye nɖɩ se pɩsa nɛ mowolo pɩ-yɔɔ nɛ malakɩ nʋmɔʋ lɩzʋʋ tʋmɩyɛ.”

13-14. Kɩɖaŋ weyi pɩzɩɣ nɛ ɩsɩnɩ-ɖʋ nɛ ɖɩtaa Yehowa liu nɛ ɖɩwalɩsɩ ɖɛ-Ɛsɔ sɛtʋ tʋmɩyɛ?

¹³ Kpɛlɩkɩ lɔŋ ɛyaa mba pata Yehowa liu yɔ pa-kɩɖaŋ taa. Ðɩnaɣ ɛyaa mba palabɩ tʋmɩyɛ  nɛ kpekpeka Yehowa sɛtʋ taa yɔ pa-kɩɖaŋ sakɩyɛ Bibl taa. Hɔɔlɩŋ sakɩyɛ taa lɛ, pɩɩpɔzaa se Yehowa sɛyaa mba, pala nabʋyʋ nɛ pawɩlɩ se pataɣ-ɩ liu pʋcɔ nɛ ɛwazɩ-wɛ. Kɩɖaŋ nɩɩyɩ yɔ: Abraham ɖɛwa nɛ eyele ɛ-ɖɩɣa “paa ɛtaatɩlɩ ɖenɖe eɖiɣni wobu yɔ,” pʋcɔ nɛ Yehowa wazɩ-ɩ. (Ebr. 11:8) Yakɔɔb lʋbɩnɩ Ɛsɔ tiyiyu nɔɔyʋ nɛ pɩtɛ lɛ, ɛmʋ wazaɣ ŋga kɛwɛ ŋgee yɔ. (Kiɖe 32:24-30) Alɩwaatʋ ndʋ pɩkazɩ pazɩ se Izrayɛɛlɩ samaɣ ɛsʋʋ Lidaʋ Tɛtʋ taa yɔ, cɔjɔnaa tisi pa-nɩŋgbanzɩ Yɔɔrdaŋ Pɔɔ taa nɛ pɩtɛ lɛ, samaɣ pɩzaa nɛ kɛtɛzɩ.—Yoz. 3:14-16.

¹⁴ Ðɩpɩzɩɣ ɖɔɖɔ nɛ ɖɩkpɛlɩkɩ lɔŋ ɖa-alɩwaatʋ taa Yehowa Aseɣɖe Tɩnaa mba pata Yehowa liu nɛ pawalɩsɩ pɛ-Ɛsɔ sɛtʋ tʋmɩyɛ yɔ pa-kɩɖaŋ taa. Kɩɖaʋ nakʋyʋ yɔ. Payaɣ koobu abalɩñɩnʋ nɔɔyʋ se Payton. Ɛ nɛ ɛ-halʋ Diana pɔsɔɔlɩ kalʋʋ koobiya mba pawalɩsɩ pɛ-Ɛsɔ sɛtʋ tʋmɩyɛ yɔ pɔ-tɔm, ɛzɩ mba pɔ-tɔm pɔyɔɔdɩ tɔm ñʋŋ “Paha pa-tɩ faaa” * taa mbʋ yɔ. Payton yɔɔdaa se: “Alɩwaatʋ ndʋ ɖɩkalɩɣ koobiya mba pɔ-tɔm yɔ, pɩlakɩ-ɖʋ ɛzɩ ɖɩwɛɛ nɛ ɖɩcɔŋnɩ ɛyʋ nɔɔyʋ, weyi ɛwɛɛ nɛ ɛtɔkɩ tɔɔnaɣ leleŋ ñɩŋga nakɛyɛ yɔ. Ðɩwɛɛ nɛ ɖɩkalɩɣ pɔ-tɔm nɛ pɩkɩlɩɣ lɛ, ɖɩsɔɔlɩ nɛ pɩkɩlɩ se ‘ɖɩɖɩŋ nɛ ɖɩna Yehowa wɛ ɖeu ɛzɩma yɔ.’” Pʋwayɩ, Payton nɛ Diana pakʋyaa nɛ powolo ɖenɖe pɩpɔzʋʋ tɔm susuyaa nɛ pɩkɩlɩ yɔ se paɖʋ nesi. Ŋkalɩ tɔm ñʋŋ ɛnɩ? Nɛ ŋcɔnɩ Tɔm susuu poliŋ egeetiye taa—Oostrali nɛ Prédication dans des régions isolées—Irlande tɛ videowaa mba pɛwɛ jw.org yɔɔ yɔ? Tɔm ñʋŋ ɛnɩ nɛ videowaa mba papɩzɩɣ pasɩnɩ-ŋ nɛ ŋñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋwalɩsɩ ñɛ-Ɛsɔ sɛtʋ tʋmɩyɛ yɔ.

15. Ye ɖɩwɛnɩ taabalaa kɩbama yɔ, ɛzɩma pɩpɩzɩɣ nɛ pɩsɩnɩ-ɖʋ?

¹⁵ Wɛɛnɩ taabalaa kɩbama. Ye ɖɩkpakɩɣ alɩwaatʋ nɛ ɖa nɛ ɛyaa lalaa mba pɔsɔɔlɩ tɔɔnaɣ ŋga wiɖiyi ɖɩtɩɖɩŋ nɛ ɖɩna yɔ ɖɩcakɩ yɔ, pɩwɛɣ-ɖʋ kɛlɛʋ se ɖɩtɔɔ tɔɔnaɣ ŋga. Mbʋ ɖɔɖɔ ye ɖɩkpakɩɣ alɩwaatʋ nɛ ɖa nɛ ɛyaa mba pasɩɣ Yehowa kajalaɣ lone taa pe-wezuu caɣʋ taa yɔ ɖɩcakɩ yɔ, pɩwɛɣ-ɖʋ kɛlɛʋ nɛ pɩkɩlɩ se ɖɩñɩnɩ nʋmɔŋ weyi ɩ-yɔɔ ɖɩtɩŋna nɛ ɖɩwalɩsɩ ɖɛ-Ɛsɔ sɛtʋ tʋmɩyɛ yɔ. Kent nɛ ɛ-halʋ Veronica peɖiɣzinaa se tɔm ndʋ tɩkɛ toovenim. Kent yɔɔdaa se: “Ða-taabalaa nɛ ɖɔ-hɔʋ taa ñɩma peseɣti-ɖʋ se ɖɩñaɣ pana nɛ ɖɩmaɣzɩ Ɛsɔ sɛtʋ tʋma kɩfana nɛ ɖɩna. Ðiɖiɣzinaa se ɖɩkpaɣ alɩwaatʋ nɛ ɖa nɛ ɛyaa mba pacalɩɣnɩ ñɩnʋʋ Kewiyaɣ yɔ ɖɩcakɩ lɛ, piyeba nɛ ɖa-taa tɛ se ɖɩñakɩ pana nɛ ɖɩla Ɛsɔ sɛtʋ tʋmɩyɛ kɩfaɖɛ naɖɩyɛ.” Lɛɛlɛɛyɔ Kent nɛ Veronica pɛkɛ nʋmɔʋ lɩzɩyaa kiya Sɛrbii ɛjaɖɛ taa.

16. Ɛzɩ kɩɖaʋ ŋgʋ kɩ-tɔm Yesu yɔɔdɩ Luka 12:16-21 taa yɔ kɩwɩlʋʋ yɔ, ɛbɛ yɔɔ pɩpɔzʋʋ se ɖitisi faaa nɛ ɖɩlaa kɩlaŋ?

¹⁶ Laa kɩlaŋ Yehowa. Pɩtɩcɛyɩ se ɖɩha siɣye mbʋ payɩ ɖɩsɔɔlaa yɔ pʋcɔ nɛ ɖɔ-tɔm kɛdɩnɩ Yehowa. (Ekl. 5:19, 20) Ɛlɛ, ye ɖɩlɩzaa se ɖɩɩlakɩ sakɩyɛ Yehowa sɛtʋ taa mbʋ pʋyɔɔ yɔ ɖɩtɩsɔɔlɩ se ɖɩlaa kɩlaŋ yɔ, pɩpɩzɩɣ nɛ piyiɣdi-ɖʋ ɛzɩ abalʋ weyi ɛ-tɔm Yesu yɔɔdɩ ɛ-kɩɖaʋ taa yɔ. Abalʋ ɛnʋ ɛɛñaɣ pana siŋŋ se ɛwɛɛnɩ wondu sakɩyɛ, ɛlɛ ɛpaa taawɛɛnɩ Ɛsɔ. (Kalɩ Luka 12:16-21.) Payaɣ koobu abalɩñɩnʋ nɔɔyʋ se Christian nɛ ɛwɛ Fransɩ ɛjaɖɛ taa. Ɛyɔɔdaa se: “Mantaahaɣ Yehowa nɛ mɔ-hɔʋ ma-alɩwaatʋ nɛ mon-ɖoŋ ɛzɩ pɩpɔzʋʋ yɔ.” Ɛ nɛ ɛ-halʋ pakpaɣ lɩmaɣzɩyɛ se palakɩ nʋmɔʋ lɩzʋʋ tʋmɩyɛ. Ɛlɛ pʋcɔ nɛ patalɩ kaɖʋwa ŋga lɛ, pɩɩpɔzaa se peyele tʋma wena palakaɣ yɔ. Pɩsa nɛ pɔcɔnɩ pa-kɩcɛyɩm ɖeɖe lɛ, papaɣzɩ labʋ ɖamɩŋ tɛɛ mɛlʋʋ tʋmɩyɛ naɖɩyɛ nɛ pɛkpɛlɩkɩ ɛzɩma pe-liu ɛsɩnɩ mbʋ pɛwɛnɩ pazɩ yɔ. Ɛzɩ pa-taa wɛ leleŋ se paha siɣye wondu natʋyʋ se pɩsa nɛ pala nʋmɔʋ lɩzʋʋ tʋmɩyɛ na? Christian yɔɔdaa se: “Lɛɛlɛɛyɔ ɖihikiɣ taa leleŋ tɔm susuu tʋmɩyɛ taa nɛ pɩkɩlɩɣ nɛ  ɖa-taa lakɩ leleŋ alɩwaatʋ ndʋ ɖɩnaɣ ɖe-Bibl kpɛlɩkɩyaa nɛ ɖɛ-tɛ pɩsɩ ŋna-ɩ waa kpɛlɩkɩɣ Yehowa tɔm yɔ.”

17. Ɛbɛ yɔɔ pɩpɩzɩɣ nɛ pɩlabɩ-ɖʋ kaɖɛ se ɖɩlabɩnɩ tʋmɩyɛ tɔm susuu nʋmɔʋ kɩfalʋʋ nakʋyʋ?

¹⁷ Tisi faaa nɛ ŋlabɩnɩ tʋmɩyɛ tɔm susuu nʋmɔŋ kɩfaŋ. (Tʋma 17:16, 17; 20:20, 21) Shirley kɛ nʋmɔʋ lɩzɩyʋ Etaazuunii ɛjaɖɛ taa. COVID-19 kʋdɔŋ alɩwaatʋ taa, pɩɩpɔzaa se ɛlɛɣzɩ nʋmɔŋ weyi ɩ-yɔɔ ɛtɩŋaɣnaɣ nɛ esusuu tɔm yɔ. Kiɖe tɛɛ lɛ, sɔɔndʋ kpaɣaɣ-ɩ se ɛtɩŋnɩ pɔrtaabɩlɩ yɔɔ nɛ esusi tɔm. Ɛlɛ, egeetiye yɔɔ cɔnɩyʋ kilimi pɛ-ɛgbɛyɛ yɔɔ nɛ ɛfalɩsɩ-ɩ nɛ pɩtɛ lɛ, ɛpaɣzɩ tɩŋnʋʋ pɔrtaabɩlɩ yɔɔ nɛ esusuu tɔm ɖoŋ ɖoŋ. Ɛyɔɔdaa se: “Kiɖe tɛɛ lɛ, sɔɔndʋ kpaɣaɣ-m, ɛlɛ lɛɛlɛɛyɔ mɔnsɔɔlɩ tɔm susuu nʋmɔʋ ŋgʋ siŋŋ. Ðɩlakaɣ kpaɣ ɖɩɣa nɛ ŋwolo ɖɩɣa lɛ, ɖɩtaanaɣ ɛyaa sakɩyɛ ɛzɩ lɛɛlɛɛyɔ yɔ!”

18. Alɩwaatʋ ndʋ ɖɩñakɩ pana se ɖɩwalɩsɩ ɖɛ-Ɛsɔ sɛtʋ tʋmɩyɛ yɔ, ɛbɛ pɩzɩɣ pɩsɩnɩ-ɖʋ nɛ ɖɩwa kala wena ɖɩkatɩɣ yɔ?

¹⁸ La ɖʋtʋ natʋyʋ nɛ ŋñaɣ pana nɛ ŋɖɔ tɩ-yɔɔ. Alɩwaatʋ ndʋ ɖɩkatɩɣ tɩlasɩ yɔ, ɖɩtɩmɩɣ nɛ ɖɩpɔzʋʋ sɩnʋʋ nɛ ɖɩmaɣzɩɣ camɩyɛ se ɖɩna mbʋ ɖɩla nɛ ɖɩcɔnɩ si-ɖeɖe yɔ. (Adu. 3:21) Sonia kɛ paa ɖooye nʋmɔʋ lɩzɩyʋ nɛ ɛwɛ Erɔɔpɩ ɛjaɖɛ naɖɩyɛ taa ɛgbɛyɛ cikpeɖe naɖɩyɛ taa, nɛ Romani kʋnʋŋ pɔyɔɔdʋʋ ɖɩ-taa. Ɛyɔɔdaa se: “Mɔnsɔɔlɩ maʋ kaɖʋsɩ nzɩ mɛwɛna yɔ takayaɣ nakɛyɛ yɔɔ. Mamaɣ-sɩ kɔ-yɔɔ lɛ, mansɩɣ-kɛ ɖenɖe manpɩzɩɣ nɛ mana-kɛ kɛlɛʋ yɔ. Mɛwɛnɩ kɩlɛmʋʋ nakʋyʋ nɛ kɩ-yɔɔ lɛ, palɩzɩ habɛɛ naalɛ wena awokini hɔɔlɩŋ ndɩ ndɩ taa yɔ nɛ kɩwɛ mɛn-tɛ taabɩlɩ yɔɔ. Alɩwaatʋ ndʋ pɩpɔzʋʋ se mankpaɣ lɩmaɣzɩyɛ naɖɩyɛ yɔ, mɔncɔŋnɩ habɛɛ ana a-naalɛ nɛ mamaɣzɩɣ se mana se lɩmaɣzɩyɛ nɖɩ mankpakɩɣ yɔ ɖɩkaɣ-m sɩnʋʋ se mantalɩ man-kaɖʋwa yaa ɖɩɩsɩɣnɩ-m.” Sonia ñakɩ pana se ɛwɛɛnɩ lɩmaɣza kɩbana tɩlasɩ nzɩ ɛkatɩɣ yɔ sɩ-yɔɔ. Ɛyɔɔdaa se: “Paa wɛtʋ kɩfatʋ ndʋ lɛ, tɩpɩzɩɣ nɛ tɩwɛɛ ɛzɩ koloŋa ŋga kaɖɩkɩ-m nʋmɔʋ yɔ yaa kondoloko ŋgʋ kɩsɩɣnɩ-m yɔ, pɩlɩɣnɩ lɩmaɣza wena mɛwɛna yɔ a-cɔlɔ na.”

19. Ɛbɛ pɩwɛɛ se ɖɩtɛ ɖa-taa se ɖɩlakɩ?

¹⁹ Yehowa wazɩɣ-ɖʋ hɔɔlɩŋ sakɩyɛ taa. Ðɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ siŋŋ wazasɩ nzɩ sɩ-yɔɔ, ye ɖɩlakɩ mbʋ payɩ ɖɩpɩzɩɣ yɔ se pɩkɔnɩ-ɩ samtʋ yɔ. (Ebr. 13:15) Mbʋ ɖɩpɩzɩɣ nɛ ɖɩla yɔ pɩ-taa nabʋyʋ lɛ se ɖɩtɩŋnɩ nʋmɔŋ kɩfaŋ yɔɔ nɛ ɖɩwalɩsɩ ɖɛ-Ɛsɔ sɛtʋ tʋmɩyɛ. Ye ɖɩlakɩ mbʋ yɔ, piyeki nɛ ɛwazɩ-ɖʋ nɛ pɩkɩlɩ. Paa evemiye nɖɩ lɛ, iyele nɛ ɖɩñɩnɩ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ‘ɖɩɖɩŋ nɛ ɖɩna Yehowa wɛ ɖeu ɛzɩma yɔ.’ Ðɩnɛ ɛlɛ ɖɩkaɣ wɛʋ ɛzɩ Yesu yɔ. Ɛyɔɔdaa se: “Mɔn-tɔɔnaɣ kɛlɛ se mala weyi etiyi-m yɔ ɛ-sɔɔlɩm nɛ mɛntɛ ɛ-tʋmɩyɛ.”—Yoh. 4:34.