1-2. Kũringana na Thaburi 34:8, nĩ atĩa twagĩrĩirũo gwĩka nĩguo twĩyonere wega wa Jehova?

TA HŨŨRA MBICA ũheetwo irio ũtarĩ warĩa mbere ĩyo. No ũmenye ũhoro wa cio na njĩra ya gũcirora, gũcinungĩra, kũũria indo iria ihũthĩrĩtwo gũciruga, kana kũũria andũ arĩa angĩ mawoni maciĩgiĩ. O na kũrĩ ũguo, ũndũ ũrĩa ũngĩgũteithia kũmenya kana no igũkenie kana itingĩgũkenia, nĩ gũcicama we mwene.

² No tũmenye atĩ Jehova nĩ mwega na njĩra ya gũthoma Bibilia, mabuku maitũ, o hamwe na gũthikĩrĩria andũ angĩ magĩtaarĩria irathimo iria mamũkĩrĩte kuuma kũrĩ Jehova. No nĩgetha tũtaũkĩrũo nĩ wega wa Jehova, no mũhaka ‘tũcame’ ithuĩ ene. (Thoma Thaburi 34:8.) Ta wĩcirie ũhoro wa ngerekano ĩno. Ta nĩ tũtue atĩ nĩ tũrenda kũingĩra ũtungata-inĩ wa mahinda mothe, no nĩgetha tũhote gũkinyĩra muoroto ũcio nĩ tũrabatara kũhũthahũthia ũtũũro witũ. No gũkorũo twanathoma maita maingĩ kĩĩranĩro kĩa Jesu atĩ tũngĩiga Ũthamaki mbere, Jehova nĩ arĩtigagĩrĩra atĩ nĩ tuona kĩrĩa tũrabatara, no tũtirĩ tweyonera ũndũ ũcio ithuĩ ene. (Mat. 6:33) No tondũ twĩ na wĩtĩkio harĩ kĩĩranĩro kĩu kĩa Jesu, tũkanyihanyihia mahũthĩro maitũ na mathaa marĩa tũhũthagĩra wĩra-inĩ, na tũkahũthĩra mathaa maingĩ ũtungata-inĩ. Rĩrĩa tweka ũguo, tũkeyonera ithuĩ ene atĩ Jehova nĩ arũmbũyagia mabataro maitũ. Na njĩra ĩyo ‘tũgacama’ ithuĩ ene tũkeyonera atĩ Jehova nĩ mwega.

3. Kũringana na Thaburi 16:1, 2, nĩa monaga wega wa Jehova?

³ Jehova akoragwo arĩ “mwega harĩ andũ othe,” nginya harĩ andũ arĩa matamũĩ. (Thab. 145:9; Mat. 5:45) No andũ arĩa mamwendete na mamũtungatagĩra na ngoro yothe, nĩ mamũkagĩra irathimo nyingĩ kuuma kũrĩ we. (Thoma Thaburi 16:1, 2.)  Rekei tuone njĩra imwe tũgunĩkaga nacio kuumana na wega wa Jehova.

4. Jehova onanagia wega wake atĩa harĩ andũ arĩa marambĩrĩria kũmũkuhĩrĩria?

⁴ Hĩndĩ ciothe rĩrĩa twahũthĩra maũndũ marĩa tũrarutwo nĩ Jehova, nĩ tuonaga maumĩrĩra mega marĩa maumanaga na ũndũ ũcio. Rĩrĩa twerutire ũhoro wake na tũkĩmwenda, nĩ aatũteithirie gũtigana na mwĩcirĩrie na mĩtugo ĩrĩa ĩtamũkenagia. (Kol. 1:21) Na rĩrĩa tweyamũrĩire Jehova na tũkĩbatithio, nĩ tweyoneire wega wake o na makĩria tondũ nĩ aatũteithirie kũgĩa na thamiri njega na tũkĩgĩa ũrata wa hakuhĩ makĩria hamwe nake.—1 Pet. 3:21.

5. Twĩyonagĩra wega wa Jehova atĩa tũrĩ ũtungata-inĩ?

⁵ Nĩ tũthiaga na mbere kuona wega wa Jehova rĩrĩa twanyitanĩra ũtungata-inĩ. Hihi nĩ wĩtigagĩra gũthiĩ kũhunjia? Ndungata nyingĩ cia Jehova nĩ ciĩtigagĩra. No kũhoteke ũtanatuĩka Mũira wa Jehova, nduoonaga ta ũngĩhota kũhũũra hũndi kwa mũndũ ũtoĩ na ũmũhunjĩrie ũhoro wa Bibilia. O na kũrĩ ũguo, rĩu wĩkaga ũguo maita maingĩ. Makĩria ma ũguo, Jehova nĩ agũteithĩtie gũkenera wĩra ũcio wa kũhunjia. Jehova nĩ agũteithagia na njĩra ingĩ nyingĩ. Nĩ agũteithagia gũikara ũhooreire rĩrĩa warĩrio ũũru ũtungata-inĩ. Ningĩ nĩ agũteithagia kũririkana rĩandĩko rĩrĩa rĩagĩrĩire hĩndĩ ĩrĩa ũrahunjĩria mũndũ ũrakenio nĩ ũhoro mwega. Na nĩ akũheaga hinya wa gũthiĩ na mbere kũhunjia o na rĩrĩa andũ maga gũthikĩrĩria gĩcigo-inĩ kĩanyu.—Jer. 20:7-9.

6. Jehova atuonagia wega wake na njĩra ĩrĩkũ rĩrĩa aratũmenyeria?

⁶ Jehova ningĩ nĩ atuonetie wega wake na njĩra ya gũtũmenyeria nĩguo tũhote kũhunjia. (Joh. 6:45) Hĩndĩ ya mũcemanio wa gatagatĩ-inĩ ga kiumia nĩ gũkoragwo na icunjĩ ihaarĩrĩirio wega cituonagia ũrĩa tũngiuga ũtungata-inĩ na nĩ twĩkĩragwo ngoro kũhũthĩra maũndũ macio. Kĩambĩrĩria-inĩ no twĩtigĩre kũhũthĩra njĩra njerũ iria tũrarutwo, no tũngĩcihũthĩra no ikorũo na maumĩrĩra mega gĩcigo-inĩ gitũ. Ningĩ rĩrĩa twathiĩ mĩcemanio-inĩ na igomano-inĩ, nĩ twĩkĩragwo ngoro kũhũthĩra njĩra njerũ cia kũhunjia, iria no kũhoteke o na tũtirĩ twageria mbere ĩyo. O na gũtuĩka no twĩtigĩre kũhũthĩra njĩra icio, Jehova nĩ arĩtũrathimaga rĩrĩa twacihũthĩra. Rekei rĩu twarĩrĩrie irathimo imwe tũngĩgĩa nacio, tũngĩhoka Jehova na tũgerie njĩra njerũ cia kũmũtungatĩra gũtekũmakania maũndũ marĩa tũragerera. Nĩ tũgũcoka twarĩrĩrie njĩra iria tũngĩandandũra nacio ũtungata witũ.

7. Nĩ kĩrathimo kĩrĩkũ tũngĩgĩa nakĩo tũngĩandandũra ũtungata witũ?

⁷ Nĩ tũkuhagĩrĩria Jehova makĩria. Ta wĩcirie ngerekano ya mũthuri ũmwe wa kĩũngano wĩtagwo Samuel, * ũrĩa ũtungataga hamwe na mũtumia wake bũrũri-inĩ wa Colombia. Nĩ maakenagĩra ũtungata wa ũpainia kĩũngano-inĩ kĩao o na gũtuĩka nĩ meendaga kwandandũra ũtungata wao na njĩra ya gũteithĩrĩria kĩũngano kĩrĩ na bata mũnene wa ahunjia. Nĩguo makinyĩre muoroto ũcio wao, nĩ maabataraga kwĩima maũndũ matiganĩte. Samuel aaugire ũũ: “Nĩ twahũthĩrire rĩandĩko rĩa Mathayo 6:33 na tũgĩtiga kũgũra indo citarĩ cia o mũhaka. No ũndũ ũmwe warĩ mũritũ mũno harĩ ithuĩ, nĩ gũthama nyũmba ĩrĩa twaikaraga. Yaakĩtwo wega mũno na ndĩarĩ na thiirĩ twabataraga kũrĩha.” No rĩrĩa maathamĩire kĩũngano kĩngĩ, moonire atĩ maabataraga o tũbeca tũnini mũno, maringithanĩtie na iria maahũthagĩra mbere ĩyo. Samuel aaugire ũũ: “Nĩ tuonete ũrĩa Jehova atũtongoragia na agacokia mahoya maitũ. Gũkĩra hĩndĩ ĩngĩ o yothe nĩ tuonaga atĩ Jehova nĩ arakenio nĩ ithuĩ na nĩ atwendete.” Hihi no ũhote  kwandandũra ũtungata waku na njĩra ĩmwe kana ĩngĩ? Angĩkorũo no ũhote, korũo na ma atĩ nĩ ũgũkuhĩrĩria Jehova makĩria na nĩ egũkũrũmbũiya.—Thab. 18:25.

8. Ũreruta atĩa kuumana na ciugo cia Ivan na Viktoria?

⁸ Ũtungata nĩ ũtũrehagĩra gĩkeno. Ta wĩcirie ũhoro wa mũrũ wa Ithe witũ Ivan na mũtumia wake Viktoria arĩa matungataga marĩ mapainia thĩinĩ wa Kyrgyzstan. Nĩ maahũthahũthirie ũtũũro wao nĩguo makahota kwĩrutĩra mawĩra-inĩ matiganĩte, nginya wĩra-inĩ wa mĩako ya ithondeka. Ivan aaugire ũũ: “Nĩ twerutanagĩria biũ wĩra-inĩ o wothe twaheo. O na gũtuĩka hwaĩ-inĩ twakoragwo tũnogete, nĩ twaiguaga twĩ na thayũ na tũiganĩire nĩ ũndũ wa kũmenya atĩ tũhũthĩrire hinya witũ wĩra-inĩ wa Ũthamaki. Ningĩ nĩ tũgĩĩte na gĩkeno kĩnene nĩ ũndũ wa gũkorũo na arata aingĩ na maũndũ maingĩ mega twĩyoneire.”—Mar. 10:29, 30.

9. Mwarĩ wa Ithe witũ ũmwe ekĩte maũndũ marĩkũ nĩguo andandũre ũtungata wake o na arĩ na moritũ, na ũndũ ũcio ũkoretwo na maumĩrĩra marĩkũ?

⁹ Nĩ tũgĩaga na gĩkeno ũtungata-inĩ wa Jehova o na rĩrĩa tũracemania na moritũ. Kwa ngerekano, mwarĩ wa Ithe witũ ũmwe mũkũrũ wĩtagwo Mirreh na ũkoragwo arĩ wa ndigwa kuuma West Africa, rĩrĩa aaritaire wĩra-inĩ wake wa ũndagĩtarĩ nĩ aambĩrĩirie ũpainia. Mirreh akoragwo na mũrimũ wa arthritis na ndangĩhota kũhunjia nyũmba kwa nyũmba makĩria ma ithaa rĩmwe. Ĩndĩ no ahote kũhũthĩra mahinda maingĩ akĩhunjia kũndũ kwa mũingĩ. Akoragwo na andũ aingĩ a gũcokera na arutwo a Bibilia, na amwe ao athomaga nao na thimũ. Nĩ kĩĩ gĩtũmaga Mirreh ende gwĩka maũndũ makĩria ũtungata-inĩ wa Jehova? Aaugire ũũ: “Nĩ ngoragwo nyendete Jehova na Jesu Kristo kuuma ngoro-inĩ. Ningĩ nĩ hoyaga Jehova kaingĩ andeithie gwĩka ũrĩa wothe ingĩhota ũtungata-inĩ wake.”—Mat. 22:36, 37.

10. O ta ũrĩa 1 Petero 5:10 yonanĩtie-rĩ, nĩ ũndũ ũrĩkũ andũ arĩa merutagĩra biũ ũtungata-inĩ wa Jehova mamũkagĩra?

¹⁰ Nĩ tũmenyeragio nĩ Jehova. Kenny ũrĩa ũtungataga arĩ painia thĩinĩ wa Mauritius nĩ eyoneire ũndũ ũcio. Eruta ũhoro wa ma nĩ aatiganire na gĩthomo kĩa igũrũ, akĩbatithio, na akĩingĩra ũtungata-inĩ wa mahinda mothe. Aaugire ũũ: “Nĩ ndĩrutanagĩria gũtũũra kũringana na ciugo cia mũnabii Isaia ũrĩa waugire ‘Niĩ ũyũ haha! Ndũma!’” (Isa. 6:8) Kenny nĩ atungatĩte mawĩra-inĩ matiganĩte ma mĩako na agateithĩrĩria nginya wĩra-inĩ wa gũtaũra mabuku na rũthiomi rwao. Aaugire ũũ: “Nĩ ndaateithagio kũgĩa na ũmenyeru ũrĩa wabataranagia nĩguo hote kũhingia wĩra ũrĩa ndĩrehokerũo.” No Kenny to ũmenyo aagĩire naguo tu wa kũruta wĩra ũrĩa eehokeirũo. Oongereire ũũ: “Ningĩ nĩ ndamenyire nĩ maũndũ marĩkũ itangĩahotire kũhingia na ngumo iria ingĩabatarire gũkũria nĩguo hote gũtungatĩra Jehova wega makĩria.” (Thoma 1 Petero 5:10.) Na githĩ to ũthuthurie ũrĩa maũndũ maku mahaana nĩguo wone kana no ũgĩe na mweke wa kũmenyerio nĩ Jehova maũndũ-inĩ matiganĩte?

11. Aarĩ a Ithe witũ kuuma bũrũri-inĩ wa South Korea mekĩte maũndũ marĩkũ nĩguo manyitanĩre ũtungata-inĩ, na ũndũ ũcio ũkoretwo na maumĩrĩra marĩkũ? (Rora mbica ngothi-inĩ.)

¹¹ Aira a Jehova arĩa makoretwo ũhoro-inĩ wa ma mĩaka mĩingĩ, o nao nĩ mamenyeragio rĩrĩa mambĩrĩria ũtungata mwerũ. Ihinda-inĩ rĩa kĩng’ũki kĩa mũrimũ wa Korona, athuri a kĩũngano kĩmwe bũrũri-inĩ wa South Korea maandĩkire marũa makiuga ũũ: “Andũ amwe arĩa meeciragia atĩ matingĩhota kũhunjia nĩ ũndũ wa ũgima wao wa mwĩrĩ rĩu nĩ mareka ũguo makĩhũthĩra indo ta zoom. Aarĩ a Ithe witũ atatũ a mĩaka mĩrongo ĩnana na kĩndũ nĩ merutĩte kũhũthĩra njĩra icio njerũ, na nĩ macihũthagĩra kũhunjia hakuhĩ o mũthenya.” (Thab. 92:14, 15) Hihi no wende kwandandũra  ũtungata waku na ũcame wega wa Jehova na gĩkĩro kĩnene makĩria? Rekei tuone makinya mamwe ũngĩoya magũteithie gũkinyĩra muoroto ũcio.

12. Jehova eranĩire ũndũ ũrĩkũ nĩ ũndũ wa andũ arĩa mamwĩhokaga?

¹² Wĩrute kwĩhokaga Jehova. Eranĩire atĩ nĩ arĩtũrathimaga na njĩra nene twamwĩhoka na tweka ũrĩa wothe tũngĩhota. (Mal. 3:10) Mwarĩ wa Ithe witũ wĩtagwo Fabiola kuuma Colombia nĩ eyoneire Jehova akĩhingia kĩĩranĩro kĩu ũtũũro-inĩ wake. Aarĩ na muoroto wa gũtuĩka painia wa mahinda mothe kahinda kanini thutha wake kũbatithio. O na kũrĩ ũguo, nĩ aabataraga kũruta wĩra nĩguo ateithie mũthuri wake kũhingia mabataro ma famĩlĩ. Kwoguo rĩrĩa ihinda rĩake rĩa kũritaya wĩra rĩakinyire, nĩ aahoire Jehova mũno nĩguo amũteithie. Aaugire ũũ: “Kaingĩ nĩ kuoyaga ihinda inene mũndũ agĩkambĩrĩria kwamũkĩra mbeca ciake cia ritaya, no niĩ ndambĩrĩirie gũciamũkĩra mweri ũmwe thutha wakwa kũritaya. Kĩarĩ ta kĩama.” Mĩeri ĩĩrĩ thutha ũcio akĩambĩrĩria ũpainia. Rĩu arĩ na mĩaka mĩrongo mũgwanja na kĩndũ na akoretwo arĩ painia makĩria ma mĩaka 20. Ihinda-inĩ rĩu, nĩ ahotete gũteithia andũ anana nginya makabatithio. Aaugire ũũ: “O na gũtuĩka rĩmwe nĩ njiguaga itarĩ na hinya, Jehova nĩ andeithagia o mũthenya na ngahota gũthiĩ na mbere na ũpainia.”

13-14. Nĩ cionereria ta irĩkũ ingĩtũteithia kwĩhoka Jehova na kwandandũra ũtungata witũ?

¹³ Wĩrute kuumana na andũ arĩa meehokire Jehova. Bibilia nĩ ĩkoragwo na cionereria cia  andũ aingĩ meerutanĩirie biũ ũtungata-inĩ wa Jehova. Aingĩ ao maarathimirũo nĩ Jehova thutha wao gwĩka ũndũ woonanirie atĩ maarĩ na wĩtĩkio harĩ we. Kwa ngerekano, Jehova aarathimire Iburahimu thutha wa gũthaama mũciĩ wake “o na gũtuĩka ndaamenyaga kũrĩa aathiaga.” (Ahib. 11:8) Nake Jakubu aamũkĩrire kĩrathimo kĩa mwanya thutha wa kũgiana na mũraika. (Kĩam. 32:24-30) Na rĩrĩa rũrĩrĩ rwa Isiraeli rwarĩ hakuhĩ kũingĩra Bũrũri-inĩ wa Kĩĩranĩro, andũ maahotire kũringa mũkĩra ũrĩa ũngĩ wa Rũũĩ rwa Jorodani thutha wa athĩnjĩri-Ngai gũtobokia magũrũ mao rũũĩ-inĩ rũu.—Josh. 3:14-16.

¹⁴ Ningĩ no ũgunĩke ũngĩthuthuria cionereria cia mahinda maya cia andũ manehoka Jehova na makongerera ũtungata wao. Kwa ngerekano, mũrũ wa Ithe witũ wĩtagwo Payton na mũtumia wake Diana nĩ maakenagĩra gũthoma ũhoro wĩgiĩ aarĩ na ariũ a Ithe witũ arĩa mandandũrĩte ũtungata wao harĩ Jehova ta icunjĩ cia kĩrũmanĩrĩrio kĩa “Meerutĩire Meyendeire.” * Payton aaugire ũũ: “Rĩrĩa twathoma icunjĩ icio, twaiguaga tũtariĩ ta mũndũ ũrerorera mũndũ ũngĩ akĩrĩa irio irĩ na cama. O ũrĩa tũrerorera noguo twaiguaga tũkĩenda ‘gũcama tuone atĩ Jehova nĩ mwega.’” Thutha wa ihinda, Payton na Diana nĩ maathamĩire kũndũ kũrĩ na bata mũnene wa ahunjia. Hihi nĩ ũthomete icunjĩ cia kĩrũmanĩrĩrio kĩu? Na hihi nĩ wĩroreire video ya Kũhunjia Gĩcigo Gĩtahunjagio Kaingĩ—Australia na Kuhubiri Katika Eneo la Mbali​—Ireland thĩinĩ wa website ya jw.org? Icunjĩ icio na video no igũteithie kuona ũrĩa ũngĩandandũra ũtungata waku.

15. Gũthuura arata ega kũngĩtũteithia atĩa?

¹⁵ Thuura arata ega. Nĩ ũndũ mũhũthũ kũrĩa irio tũtarĩ twarĩa mbere ĩyo, tũngĩhũthagĩra mahinda na andũ mendete irio icio. Na njĩra o ta ĩyo, tũngĩkorũo na arata mahũthagĩra ũtũũro wao gũtungatĩra Jehova, no ũkorũo ũrĩ ũndũ mũhũthũ harĩ ithuĩ kwandandũra ũtungata witũ harĩ Ngai. Mũrũ wa Ithe witũ wĩtagwo Kent na mũtumia wake Veronica, nĩ meyoneire ũũma wa ũndũ ũcio. Kent aaugire ũũ: “Arata aitũ na andũ a famĩlĩ nĩ maatwĩkĩraga ngoro tũgerie ũtungata wa mũthemba ũngĩ. Nĩ twamenyire atĩ kũnyitanĩra na andũ maigaga ũtungata wa Ngai mbere, nĩ gwatũteithirie kũgĩa na ũmĩrĩru wa kũgeria ũtungata mwerũ.” Rĩu Kent na Veronica matungataga marĩ mapainia a mwanya bũrũri-inĩ wa Serbia.

16. O ta ũrĩa ngerekano ya Jesu thĩinĩ wa Luka 12:16-21 yonanĩtie-rĩ, nĩkĩ nĩ twagĩrĩirũo gũkorũo twĩhaarĩirie kwĩima?

¹⁶ Koragwo wĩhaarĩirie kwĩima nĩ ũndũ wa Jehova. Tũtirabatara gũtigana na maũndũ mothe tũkenagĩra atĩ nĩguo tũkenie Jehova. (Koh. 5:19, 20) O na kũrĩ ũguo, tũngĩrega kwandandũra ũtungata witũ atĩ tondũ tũtirenda gũtigana na indo kana maũndũ mamwe twendete, tũngĩkorũo tũtariĩ ta mũndũ ũrĩa Jesu aagwetire ngerekano-inĩ yake ũrĩa wekĩrĩire mũno kũgĩa na ũtũũro mwega handũ ha gũtungatĩra Ngai. (Thoma Luka 12:16-21.) Mũrũ wa Ithe witũ wĩtagwo Christian kuuma Faranja aaugire: “Ndiahũthagĩra mahinda na hinya wakwa kwĩheana biũ harĩ Jehova.” Marĩ na mũtumia wake nĩ maatuire itua rĩa kwambĩrĩria ũpainia. No nĩguo makinyĩre muoroto ũcio nĩ maabataraga gũtiga mawĩra mao. Nĩguo mahote kũhingia mabataro mao nĩ maambĩrĩirie kawĩra kanini, na makĩĩruta kũiganĩra na tũbeca tũnini tũrĩa moonaga. Maagĩire na maumĩrĩra marĩkũ thutha wa kwĩima na njĩra ĩyo? Christian aaugire ũũ: “Nĩ tũkenagĩra ũtungata na njĩra nene, na nĩ tũkenaga kuona arutwo a Bibilia na andũ arĩa tũcokagĩra makĩĩruta ũhoro wa Jehova.”

17. Nĩ kĩĩ kĩngĩtũma twage kũgeria njĩra njerũ cia kũhunjia?

 ¹⁷ Koragwo wĩhaarĩirie kũgeria njĩra njerũ cia kũhunjia. (Atũm. 17:16, 17; 20:20, 21) Painia ũmwe bũrũri-inĩ wa Amerika (US) wĩtagwo Shirley nĩ aabatarire kũgarũrĩra njĩra cia kũhunjia hĩndĩ ya mũrimũ wa Korona. Kĩambĩrĩria-inĩ nĩ eetigagĩra kũhunjia na thimũ. No thutha wa kũmenyerio hĩndĩ ya iceera rĩa mũrori wa mũthiũrũrũko nĩ aambĩrĩirie kũhunjagia na thimũ kaingĩ. Aaugire ũũ: “Kĩambĩrĩria-inĩ nĩ ndeetigagĩra no rĩu nĩ ngenagĩra mũno. Rĩu nĩ tũhotaga kũhunjĩria andũ aingĩ o na gũkĩra rĩrĩa twahunjagia nyũmba kwa nyũmba.”

18. Nĩ ũndũ ũrĩkũ ũngĩtũteithia kũhiũrania na moritũ rĩrĩa tũrabanga kwandandũra ũtungata witũ?

¹⁸ Wĩigĩre muoroto na wĩrutanĩrie kũũkinyĩra. Rĩrĩa twacemania na moritũ, nĩ tũhoyaga na tũgeciria na njĩra ndikĩru ũrĩa tũkũhiũrania na mathĩna macio. (Thim. 3:21) Sonia ũrĩa ũtungataga arĩ painia wa hĩndĩ ciothe gĩkundi-inĩ kĩmwe kĩa rũthiomi rwa Romania thĩinĩ wa Rũraya aaugire: “Nyandĩkaga mĩoroto yakwa handũ karatathi-inĩ ngacoka ngakaiga handũ ndĩkonaga. Metha-inĩ yakwa, ngoragwo njigĩte mbica ĩcoretwo njĩra igĩrĩ irorete mĩena ngũrani. Rĩrĩa ndĩratua itua nĩ ndoraga njĩra icio cierĩ na ngeyũria kana itua rĩu nĩ rĩkũndeithia gũkinyĩra muoroto wakwa kana rĩtikũndeithia.” Sonia nĩ ageragia gũkorũo na mwerekera ũrĩa wagĩrĩire wĩgiĩ moritũ marĩa aragerera. Aaugire ũũ: “Ũgarũrũku o wothe ndacemania naguo no ũtuĩke rũthingo rwa kũngirĩrĩria gũkinyĩra muoroto wakwa kana ũtuĩke ndaraca ya kũndeithia gũkinyĩra muoroto wakwa gũkĩringana na mwerekera wakwa.”

19. Twagĩrĩirũo gũtua itua rĩrĩkũ?

¹⁹ Jehova nĩ atũrathimaga na njĩra nyingĩ. No tuonanie atĩ nĩ tũkenagĩra irathimo icio na njĩra ya gwĩka ũrĩa wothe tũngĩhota gwĩka maũndũ ma kũmũgoocithia. (Ahib. 13:15) Nĩguo tũhote gwĩka ũguo, no tũbatare kũgeria njĩra njerũ cia kwandandũra ũtungata witũ, na ũndũ ũcio ũtũme twamũkĩre irathimo makĩria. O mũthenya rekei tũcaragie njĩra cia ‘gũcama tuone atĩ Jehova nĩ mwega.’ Tweka ũguo tũrĩkoragwo tũhaana ta Jesu ũrĩa waugire: “Irio ciakwa nĩ gwĩka wendi wa ũrĩa wandũmire na kũrĩkia wĩra wake.”—Joh. 4:34.