1-2. Kala kilondekesa Jisálamu 34:8, ihi itwatokala kubhanga phala kumona kuma Jihova mukwa kubhanga mbote?

XINGANEKA kwila sayi muthu wakubhana kudya maji eye nuka wakudile. Eye utena kwijiya dingi yalungu ni kudya kuku mukwivwa o dizumba ni kusota kwijiya o ima yatemu, mba kwibhwidisa o athu alola kyá o kudya kuku. Maji o ukexilu wabetakota wakwijya se eye wandakuwabhela mba kana, eye mwéne watokala kukulola.

² Tutena kudilonga kwila Jihova mukwa kubhanga mbote, mukutanga o Bibidya ni madivulu metu, ni kwivwa akwetu yalungu ni mabesá atambula kwa Jihova. Maji tutendela dingi mu ukexilu watenena kwila Jihova mukwa kubhanga mbote, kyoso etu mwene ‘ki tumulola’ mumbote yatubhangela kumwenyu wetu. (Tanga Jisálamu 34:8.) Mukifika, tutale o ukexilu umoxi wakubhanga kiki. Tuxinganeke kwila twamesena kudibhakula musidivisu yathembu yoso, maji phala kukumbidila o jimbambe jitwaxindi twandabhinga kuxisa ima kudima. Nange twatange kya veji javulu o kikanenu kya Jezú kya kwila se tuta o Utuminu wa Nzambi kupholo, Jihova wandatubhana o ima itwabhindamena mwene. Maji etu nuka twamwene Jihova kubhanga o ima yiyi kumwenyu wetu. (Mat. 6:33) Maji kuma twadyelela mukikanenu kya Jezú, tusosolola o kitadi kitungastala, tulungulula ima kusalu yetu ni kubhanga dingi mukikalakalu kya kuboka. Kyoso kitubhanga kiki twandamona ni mesu metu kwila mukidi Jihova udikila o ibhindamu yetu. Kifwa ‘tulola’ o mbote ya Jihova kumwenyu wetu.

3. Kala kilondekesa Jisálamu 16:1, 2, nanyi utambula o mbote ya Jihova?

³ Jihova “ene oso u a bhanga mwene mbote” kate mwene yó akambe ku mwijiya. (Jisá. 145:9; Mat. 5:45) Maji bengebenge yó  amuzolo amusidivila ni mwenyu woso atambula mabesá avulu kwa mwene. (Tanga Jisálamu 16:1, 2.) Tutale o ima yambote yene mutubhangela Jihova.

4. Kyebhi Jihova kyalondekesa o mbote yê kwa yó amuzukama?

⁴ Ithangana yoso itukumbila o ima itulonga Jihova, twandamona kwila yene yatukwatekesa kumwenyu wetu. Kyoso kituya ni kudilonga yalungu ni mwene ni kumuzola, mwene wandatukwatekesa kutolola o ixinganeku ni ukexilu wayibha utena kuzanga o ukamba wetu ni mwene. (Kol. 1:21) Kyoso kitudibhakula ni kudibatizala JIhova utubhana dingi o kitongolwelu kyazele ni ukamba wambote ni mwene.—1 Phe. 3:21.

5. Kyebhi kitumona o mbote ya Jihova mu ukunji wetu?

⁵ Etu tusuluka ni kumona o mbote ya Jihova kyoso kitudibhakula mu ukunji. O kwila eye umukwa jisonyi? Avulu bhukaxi ka mundu wa Jihova akwa jisonyi. Nange ande dya kukituka Mbangi ya Jihova eye nuka waxinganekene kwila wejiya kudibhata dya muthu kuzwela nê yalungu ni Bibidya. Maji lelu wene mukibhanga veji javulu. Jihova kate wene mukukwatekesa kusanguluka mu kikalakalu kya kuboka! Eye wenemumona o kikwatekesu kya Jihova mu maukexilu avulu. Mwene wakukwatekesa kutululuka kyoso muthu mukuboka kyakutambwijila ni undanda. Mwene we wakukwatekesa kulembalala o velusu yatokala phala kuzwela ni mukwa dibhata. Mwene wenemukubhana o nguzu phala usuluke ni kuboka némwene kyoso athu mumbambe yé kamesena kwivwa.—Jel. 20:7-9.

6. Kyebhi o ilungesu itubhana Jihova ilondekesa o mbote itubhangela?

⁶ Jihova wene mulondekesa o mbote yê mukutulonga phala kuboka. (Nzwá 6:45) Mukyônge kyetu kya kaxi kasemana tumona o phangu yambote yalungu ni ihi itutena kuzwela kyoso kitwamubokela akwetu, etu tutena kukayela o ixinganeku yiyi mu ukunji. Etu kudimatekenu nange tukala ni hele mukusota kubanga o ima mu ukexilu wa ubhe, maji kyoso kitukibhanga tumona kwila o njimbu yamukwatekesa o athu mu mbambe yetu. Muyônge ya kilunga ni muyônge yamakota ene mutuswinisa kukayela ukexilu wa ubhe nuka twa ubhangele. Kiki nange kitubhangesa kukala ni hele; maji kyoso kitusota kubhanga o ima yiyi Jihova utubesowala. Kindala twandadilonga yalungu ni ima yambote yandatubhana Jihova kyoso kitumudyelela ni kusota kubhanga o ima m’ukexilu wa ubhe phala kubhanga dingi kabasa o ukexilu wa mwenyu wetu. Kyenyiki tubhitulule maukexilu ututena kusanzumuna dingi o ukunji wetu.

7. Mabesá ebhi utwandatambula kyoso kitukalakala ni nguzu yoso phala kusanzumuna o ukunji wetu?

⁷ Etu tuzukama dingi kwa Jihova. Tala o kifika kya kafunga amwixana Samuwele, * wamusidivila kumoxi ni muhatu wê mu ixi ya Colombia. O dikaza didi dyasangulukile mu kukala aboki athembu yoso mu kilunga kyâ, maji ene amesenene kusanzumuna dingi o ukunji wâ phala kukwatekesa o kilunga kyexile dingi ni ibhindamu yavulu. Maji phala kukumbidila o mbambe yiyi abhingile kweha ima yawabhelele o kubhanga. Phange Samuwele wambe: “Twakumbidila o divulu dya Matesu 6:33, tweha kusumba ima kitwa ibhindamene. Maji o kima kyatubhonzele dingi o kuxisa o inzo yetu. O inzo a itungile mwene kala kitwamesenene, kitwexile ni dikongo.” Kyoso ene kyayi mukilunga kya ubhe, kabhingile kungastala kitadi kyavulu phala kudikila o ibhindamu yâ. Phange Samuwele wambe: “Etu twamono kyebhi Jihova kyatwendesa ni kutambwijila o misambu yetu. Twamono kwila mwene wasangulukile n’etu, watuzolo mu ukexilu nuka twa ufikile.” O kwila eye utena kusanzumuna o ukunji we m’ukexilu yú? Se kyene  ki ubhanga, eye wandazukama dingi kwa Jihova ni kwila mwene wandadikila o ibhindamu yé yoso.—Jisá. 18:25.

8. Ihi i utena kudilonga ni izwelu ya phange Tonyi ni Madisela?

⁸ Twandasanguluka musidivisu yetu. Tala yazwela Tonyi ni Madisela, dikaza dyamusidivila kala aboki athembu yoso mu ixi ya Quirguistão. Ene axisa ima kudima kumwenyu wâ phala kudibhakula kabasa kikalakalu, kala o kukwatekesa o kutunga Ididi ya Ubhezelu. Phange Tonyi wambe: “Etu tukalakala ni nguzu yoso kate bhwoso bhu tutena, kabasa o ikalakalu. Sumbala kudisukilu dya kizuwa etu twexile mutohoka maji twexile ni kutululuka ni kudivwa kyambote mukwijiya kwila twangasta o kithangana kyetu ni nguzu mukikalakalu kya Utuminu. Etu we twasanguluka kyavulu mukonda twabhange makamba avulu a ubhe tulembalala o ima yambote itwabhange.”—Mál. 10:29, 30.

9. Ihi yene mubhanga phange yamuhatu phala kusanzumuna o ukunji wê sumbala ni ibhidi?

⁹ Tusanguluka musidivisu yetu kwa Jihova né mwene kyoso kikumoneka ibhidi kumwenyu. Mukifika, Phange Mila, mutudi wakuka kyá watungu kumbandu ya África Kutudila Kumbi, kyoso mwene kyeha o ufunu wê wadotola, wamateka kukalakala kala muboki wathembu yoso. Phange Mila wala ni uhaxi umubhekela ndolo yavulu, umufidisa kubhanga ola javulu mu kikalakalu kyakuboka inzo ni nzo. Maji mwene ubhita dingi ji ola javulu mukubhana umbangi mukididi mubhita athu avulu. Mwene wala ni athu avulu phala kwakunda ni maxibulu phala kwa alonga, sayi yâ wabokela bhukaxi kamutelembe. Mukonda dyahi phange Mila wamesena kubhanga dingi phala Jihova? Mwene wamba: “Eme ngazolo kyavulu Jihova ni Jezú. Ithangana yoso ngisamba kwa Jihova phala kungikwatekesa kubhanga dingi kate bhwoso bhungitena musidivisu yê.”—Mat. 22:36, 37.

10. Kala kilondekesa o 1 Phetele 5:10, ihi ibhanga yó akumbidila o kikalakalu kyatambula kwa Jihova?

¹⁰ Jihova utulonga kubhanga o kikalakalu kyatubhana. Phange Kanguya, wamusidivila kala muboki wathembu yoso mu ixi ya Maurício wamono o kidi kiki. Kyoso mwene kyadilongo o kidi, mwene weha o xikola yakatunda, wadibatizala, wamateka o sidivisu yathembu yoso. Mwene wambe: “Ngasoto kukayela o phangu ya polofeta Izaya kyoso mwene kyambe: ‘Eme’ami-ú, Ngana, ngi tume eme.’” (Iza. 6:8) Phange Kanguya wakwatekesa mukikalakalu kya kutunga o Ididi ya Ubhezelu, wakwatekesa we kulungulula o madivulu metu mudimi dyê dya uvwalukilu. Phange Kanguya wambe: “Angilongo kubhanga o kikalakalu kya ngibhele, kyabandekesa o uhete wami phala kubhanga o kikalakalu.” Maji mwene kadilongele ngó kubhanga o kikalakalu kyê. Mwene wambe dingi, “Ngadilongele we kubhanga ima yangibhonzele ku ibhanga ni idifwa ingatokalele kukala nayu phala kukala selevende yambote ya Jihova.” (Tanga 1 Phetele 5:10.) O kwila utena kutonginina o ukexilu wa mwenyu wé phala kumona se utena kudibhakula mu kikalakalu kya Jihova?

11. Nguzu yahi yabhange phange yetu yamuhatu mu ixi ya Coreia do Sul phala kudibhakula musidivisu ya kuboka ni kyebhi kyaditundu? (Tala ofoto yakapa.)

¹¹ Né mwene yó ala kyá Jimbangi ja Jihova mumivu yavulu, ene musota kubhanga hanji o ima mu ukexilu wa ubhe mukikalakalu kya kuboka. Mukithangana kiki kya dibhebhu dya COVID-19, sayi tufunga mu ixi ya Coreia do Sul asoneka: “Amoxi exile muxinganeka kwila kejitena kuboka mukonda dya sawidi yâ, kindala amukalakala kyavulu mukonda twamuboka bhukaxi ka jividyukoferensya. Jiphange jitatu ala mukitala kya 80, adilongo kukalakala ni jikomputadolo phala kubhanga o kikalakalu kiki, kindala amubhanga o sidivisu yakuboka.” (Jisá. 92:14, 15) O kwila eye wamesena kusanzumuna  dingi o ukunji ni kulola Jihova? Tala o ima i utena kubhanga yandakukwatekesa kukumbidila o jimbambe jê.

12. Ihi yakanena Jihova kwa yó amudyelela?

¹² Dilonge kudyelela kwa Jihova. Mwene wakanena kutubhana ima yavulu yambote kyoso kitumudyelela ni kubhanga yoso itutena musidivisu yê. (Mal. 3:10) Phange ya muhatu amwixana Fabiola watungu ku ixi ya Colombia wamono o kidi kiki ku mwenyu wê. Mwene wamesenene kusidivila kala muboki wathembu yoso kyoso kyadibatizala. Maji wabhingile kukalakala kyavulu phala kudikila o mwiji wê. Kyenyiki kyoso kyeha kukalakala kusalu, mwene wasambe ni nguzu yoso phala Jihova kumukwatekesa. Mwene wambe: “Muveji javulu, o athu ene mukingila kithangana kyavulu phala kumateka kutambula o kitadi kya mivu yakalakala, maji eme ngakingila ngó mbeji imoxi. Kiki kyedile kala madiwanu!” Mukubhita mbeji jiyadi mwene wamateka kukalakala kala muboki wathembu yoso. Kindala mwene wala mu kitala kya 70, wamukalakala kala muboki wathembu yoso 20 amivu. Mumivu yoso yiyi, mwene wakwatekesa kyá dinake dya athu kudibatizala. Mwene wambe: “Sumbala sayi ithangana kingikala ni nguzu, maji Jihova izuwa yoso wene mungikwatekesa kukumbidila o izuwa ingaxindi yakuboka.”

13-14. Phangu yebhi itena kutukwatekesa kudyelela kwa Jihova ni kukumbidila o jimbambe jetu?

¹³ Dilonge ni jiphangu ja athu adyelele kwa Jihova. Mu Bibidya mwala phangu ya athu  akalakala ni nguzu yoso musidivisu ya Jihova. Kwene phangu javulu ja athu atambula dibesá dya Jihova kyoso kyabhange ima yalondekesa kwila ene adyelele kwa Jihova. Mukifika, kiki kyabhiti ni Mbalahamu kyoso kya xisa o dibhata dyê—“sé kwijiya kwoso kwanda kuya”—Jihova wamubesowala. (Jihe. 11:8) Jakobo watambula ngó o dibesá dya katunda kyoso kyabhânge ni anju. (Dim. 32:24-30) Kyoso akwa Izalayele kyexile phala kubokona mu Ixi ya a Kanene, akwa Izalayele akingila kyoso akunji kyadyota mumenya angiji ya Njolodá phala o mundu kuzawuka.—Josu. 3:14-16.

¹⁴ Eye utena kudilonga ni jiphangu jambote ja Jimbangi ja Jihova mu izuwa yetu, enemudyelela kwa Jihova ni kukumbidila o jimbambe jâ. Mukifika phange amwixana Patrik kumoxi ni muhatwê, Diana, asangulukile mukutanga o misoso yajiphange asanzumuna o sidivisu yâ kwa Jihova, kala yó a atumbula mumbandu “Eles se Ofereceram.” * Phange Patrik wambe: “Kyoso kitwexile mutanga o misoso yâ, twadivwile kala twamumona muthu wamudya kudya kwatowala. Kyoso kitwayi ni kutala etu twamesene dingi ‘kulola ni kumona kwila Jihova mukwa kubhanga o mbote.’” Kudisukilu o misoso yiyi yabhangesa Patrik ni Diana kudibhakula phala kusidivila bhwoso bhwexile ibhindamu yadikota. O kwila eye watange kyá o jimbandu jiji? O kwila eye watale kyá o vidyu, Kubhana Umbangi mu Mbambe Kene mu Boka-mu—Austrália ni Kubhana Umbangi mu Mbambe Kene mu Boka-mu—Irlanda yala mu jw.org? O milongi yiyi nange itena kukwatekesa kusota o ukexilu u utena kusanzumuna o sidivisu yé kwa Jihova.

15. Kudilunga ni athu ambote kutena kutukwatekesa kyebhi?

¹⁵ Sola makamba ambote. Kikwanda tubhonza kudya o kudya nuka twakudile kyoso kitubhita kithangana ni athu awabhela o kudya kuku. Kyene kimoxi we se tubhita ithangana ni yó ata Jihova kupholo ku mwenyu wâ, etu we nange twandasota maukexilu a kusanzumuna o ukunji wetu musidivisu ya Nzambi. Kiki kyene kyabhiti ni dikaza Kent ni Veronica. Phange Kent wambe: “Makamba metu ni mwiji wetu atuswinisa kusota maukexilu a ubhe phala kubhanga o ukunji wetu.” “Twamono kwila kudilunga ni athu ata o Utuminu kupholo ya mwenyu wâ, kwatubhana nguzu phala kusota kubhanga ima ya ubhe m’ukunji.” Phange Kent ni Veronica kindala amusidivila kala aboki akatunda mu ixi ya Sérvia.

16. Kala kilondekesa o kifika kya Jezú kitusanga mudivulu dya Luka 12:16-21, mukonda dyahi twatokala kukala polondo phala kuxisa ima kudima?

¹⁶ Xisa ima kudima mukonda dya Jihova. Etu kitwabhingi kuxisa o ima yoso itwawabhela phala kusangulukisa Jihova. (Ndo. 5:19, 20) Maji se tukamba kubhanga dingi musidivisu ya Jihova mukonda kitwamesena kuxisa kudima o ima itwawabhela, twandata we o kitondalu kya diyala mukifika kya Jezú wakalakala ni nguzu yoso phala kukala ni ima yambote maji kabhangyê o vondadi ya Nzambi. (Tanga Luka 12:16-21.) Phange amwixana Ndala, watungu ku França wambe: “Eme kingexile mubhana o kithangana kyami ni nguzu yami phala Jihova ni mwiji wami.” Mwene ni muhatwê asolo kukala aboki athembu yoso. Maji phala kukumbidila o mbambe yâ ene abhingile kuxisa o salu yâ. Phala kudikila o ibhindamu yâ ene amateka kubhanga o kikalakalu kya kuxixila, adilongo kusanguluka ni ima yexile nayu. O kwila ene asangulukile mukuxisa ima kudima phala kukala aboki athembu yoso? Phange Ndala wambe: “Etu twasanguluka dingi ni ukunji wetu kindala ni kumona o kusanguluka kwa maxibulu metu ni kulonga o athu utwamukunda yalungu ni Jihova.”

17. Mukonda dyahi kutena kubhonza phala etu kusota kubhanga ima ya ubhe m’ukunji wetu?

 ¹⁷ Kusota kubhanga ima m’ukunji wetu. (Ika. 17:16, 17; 20:20, 21) Madisela, muboki wathembu yoso watungu mu ixi ya Estados Unidos, walungulula o ukexilu wakuboka mukithangana kiki kya dibhebhu dya COVID-19. Kudimatekenu mwene wexile ni hele yakubhana umbangi bhukaxi ka mutelembe. Maji kyoso kyatambula o itendelesu yalungu ni ukexilu wakuboka, mwene wamateka kuboka jinga ithangana yoso. Mwene wambe: “Kudimatekenu ngexile ni woma, maji mukidi, kindala ngasanguluka ni ukexilu yú wakuboka. Kindala twamudizwelesa dingi ni athu o kyoso kitwexile muboka nzo ni inzo ndenge!”

18. Ihi itena kutukwatekesa kudibhana ni ibhidi kyoso kitumesena kusanzuma o ukunji wetu?

¹⁸ Sola Jimbambe ni kusota kujikumbidila. Kyoso kitudibhana ni ibhidi, etu tusamba mukubhinga kikwatekesu ni kuxinganeka kyambote itubhanga. (Jisa. 3:21) Sonia, wamusidivila kala muboki wathembu yoso mudimi dya Romani ku Europa, wambe: “Eme ngawabhela kusoneka o jimbambe jami muphaphela ni kuta o phaphela yiyi mukididi bhu ngitena ku itala ni lusolo. Kuthandu dya meza yami ngabhange dezenyu ya njila yala ni jiphambu. Ande dya kusola kima ngitala kujiphambu ngixinganeka se o kima kingandasola kyandagikwatekesa kukumbidila o mbambe ingaswu mba kana.” Sonia wasoto kukala ni ixinganeku yambote yalungu ni ibhidi yexile mudibhana nanyu. Mwene wambe: “Ibhidi yosoyoso ingidibhana nayu, ngabhingi kusola se yandakala phalelu yandangifidisa kukumbila o mbambe ingaswu mba yandakala mulonde wandangikwatekesa ku ikumbidila.”

19. Kyebhi kitutena kulondekesa kwila tusanguluka ni ima itubhana Jihova?

¹⁹ Jihova utubesowala mu maukexilu avulu. Tutena kulondekesa kwila tu akwa kusakidila kyoso kitubhanga yoso itutena phala kumusangulukisa. (Jihe. 13:15) Etu nange tutena kubhanga ima yavulu kiyadifu phala kusidivila Jihova, mukusuluka Jihova utena kutubesowala mu maukexilu avulu. Kala kizuwa, tusotyenu maukexilu akulola ni tumone, “kuma Jihova wene ni mbote.” Kyenyiki twandatena kuzwela kala kyazwela Jezú: “Kúdya kwami, o kubhanga vondadi ya yó wa ngi tumu, ni kuzubha o kikalakalu kyê kya ngi bhana o kubhanga.”—Nzwá 4:34.