1-2. Bilondeshel mukand a Misambw 34:8, tudy mwa kumanyik bulengel bwa Yehow bicy?

LANG ket neey muut kahand ubiiy kukwaakish cyaakudy ciwudy kuy mwanj kulabuloh bend. Udy mwa kulongelok bwaal bukwaabw habitaatal cyakudy eecy hawiicitaatal, hawiicinuunuuk, ni umvw muhuuy a cicy, eecy kwihangujoh bakwaabw bwa kumvw mudyobw baleeb bwa cyakudy aacy. Nook, mushind aakaabumw wa kumanyik mudyecy bwiibuh kwiicikat, bikaam wiilabwiil kaayeeb.

² Tudy mwa kulong bwa kumanyik neey Yehow i mulengel, hatubabal Bibl ni mikand yiitut yikwaabw ni hakumvw mudy bakwaabw baleeb bwa mabenesh madyobw bahet kudy Yehow. Ki twiiyiiy kwiikal ni kumvw kulengel bwa mudy Yehow mulengel ‘hakwiilabwiil’ kaayeet bulengel bwindiy. (Bal Misambw 34:8.) Tutalaay cileejel cidy mwa kwiitwambulwiish bwa kulong naak. Tufwanyikij neey, tudy bakat kukal mudimw kahand wa ku diib ni ku diib, ki bwiitut kukumbaj kiihacil aak, bikaam tuhehej shikacil iitut. Misang yikwaabw tudyaakal teng tubal mulay wa Yeez wa neey: tut bateek myand ya Bukaleng ha cyaab cya kuuhal, Yehow wiiyiiy kwiitwaakish biit bitukaakaam menmen, ki katwiin banj kutaloh bend Yehow mwiitulongel naak. (Mat. 6:33) Ki, mutudy biitabij mulay wa Yeez, tukeekeehesh mushind ututuutuul fwalang, tukeehesh diib ku midimw yitut ya bikam, ni twiitwaal bikasakan mu mudimw a bukajaady. Tut balong nook, twiiyiiy kumanyik tut kaayeet mudy Yehow wiitukumbajil menmen bitukaakaam. Twiiyiiy ‘kwiilabwiil’ kaayeet bulengel bwa Yehow.

3. Bilondeshel mukand a Misambw 16:1, 2, i bangany bahehet myand yilengel ya kudy Yehow?

³ Yehow i “mulengel bwa boos,” ning kudy aab bady kabay bamumanyik. (Mis. 145:9; Mat. 5:45) Ki nang-nang aab bady bakat Yehow ni bamukadil mudimw ni mucim aabab woos, ki bahehet  kis yivul ya kudyey. (Bal Misambw 16:1, 2.) Tutalayaak mishind yidy Yehow mwiituleej bulengel bwindiy.

4. I mushind kaay udy Yehow uleej baat batwaatwaadij kufweej kudyey bulengel bwindiy?

⁴ Ciisang cyoos cituloolond may ma Yehow, Tutaatal mudyem miitwambulwiish mu shikacil iitut. Bu mutwaakady balong bwa kumumanyik ni tut kwiiy kumukat, i mwiitwambulwiish bwa kutaatameen meej mabiih ni kulek kulong myand yidyey kay mukat. (Kol. 1:21) Ni diib ditwaakady biilambul kudy Yehow ni batambul, twiiyil kumanyik bulengel bwindiy ni i mwiitwaakish cikwaabw mucim a mund mulengel ni mwiitukok kudyey bwa tushaal balund bindiy.​—1 Py. 3:21.

5. I mushind kaay utudy batal bulengel bwa Yehow mu mudimw iitut a bukajaady?

⁵ Tutuutungunuk ni kumanyik bulengel bwa Yehow hatumukaakadil mudimw. Udyaakal uciinok bwa kwiisamb ni baat eeny? Ki mudy baat ba Yehow bavul. Misang yikwaabw, kuuhal kwiibuh kushaal mwiin mudimw a Yehow, kwaakadyoh bend mwanj kukookoloh ku cibel cya muut uwukiish mumanyik ni kiihacil ka kumwambil myand ya mu Bibl. Ki leeloow, ulong mudimw oow haciibidil. Yehow i mukwambulwiish cikwaabw bwiibuh kwiikal ni musangal a kukal mudimw a kudiil baat musah! Udy mutal mudy Yehow mukwambulwiish mu mishind yivul. I mukwambulwiish bwiibuh kubatamij micim kuuhal kwa bulwiish. Ni bwa kuvuluk verseh mulengel wa kwambil muut ukacil bwa kukukun mat. Ni i mukwaakish bukash bwiibuh kutungunuk ni kudiil baat musah ning diib didy baat balek kukukun mat.​—Jer. 20:7-9.

6. I mushind kaay udy Yehow mwiituleej cijaadik cya bulengel bwindiy?

⁶ Yehow i mwiituleej cikwaabw bulengel bwindiy ha kwiitulongweesh mu mudimw a bukajaady. (Jah 6:45) Mu cisangil ciitut cya mukacy mwa luming, bituleeleejomw mishind yihehel ya mwa kutwaadij kwiisamb ni baat, ni bitukakashish bwiitut kukal naay mudimw mu mudimw a bukajaady. Cya kuuhal, tudy mwa kumvwok mooy bwa kulong bwaal kahand buhyaabuhy, ki tut bibulong, tudy mwa kutal neey mushind muhyaamuhy oow uhehetangan ni baat ba mu teritwaar iitut. Bitukaakashish cikwaabw mu bisangil ni mu bihwiil bwa kukal mudimw ni mishind yishil-shilangan mu mudimw a bukajaady yitudy katuy banj kukaloh bend naay mudimw. Cikwaabw, tudy mwa kumvw mooy bwa kulond myand eey, ki tut biiyilond, Yehow wiiyiiy kwiitufiil kis. Tutalaayaak mabenesh matudy mwa kuhet hakulong mishind yihyaahihy bwa kwaakish Yehow cidy cilengel bwiitut, ning tut biikal mu shikacil kaay woos. Tutalululaay cikwaabw mishind yidy mwa kwiitwambulwiish bwa kuvudij mudimw iitut a bukajaady.

7. I kis kay yitwiiyiiy kuhet hatwiikaakashishomw bwa kuvudij mudimw iitut a bukajaady?

⁷ Tufweefweej cikwaabw habwiih menmen ni Yehow. Tuleebaay bwa Samuel, * mukul ukaakal mudimw haakaabumw ni mukaj indiy mu cibunj cya Colombie. Biin maluw aab baakady ni musangal a kwiikal baaseb aa njil mu cisumbw cyaabab, ki bakaamin kuvudij mudimw aabab wa bukajaady bwa kuy kambulwiish cisumbw cyaakady cikaam dyambulwiish. Bwa kukumbajobw kihacil aak, byaakady bibalomb bwa kuleek kulong midimw kahand yaakadyobw bakat kulong. Samuel uleeleeb neey: “Tulondel diiy didy mu Matewus 6:33 ni tulekel bwa kusumb biit byaakady kabiy ni buseeb.” “Ki byaakady bikasakan bwa kushiy nzubw iitut. Waakady mwiibak mu mushind utwaakady bakat, ni katwaakadyoh bend biisomb fwalang bwa kumwiibak.” Mu mudimw muhyaamuhy uhetelobw, wa kulong mu cisumbw cya ha cyaab cyeeny, biin maluw aab bakamin bwa kwiikalok ni tumakut twaakady mwa kwiibambulwiish mu  mafuk macyaakadyobw beeny. Samuel uleeleeb neey: “Tudy batal mudy Yehow mwiitulombol mu myand yiitut ni mwaalabul ku masambil miitut.” “Tudy batal neey, Yehow i mwiitwanyish ni mwiitukat mu mushind utwaakady katuy beleloh bend meej.” Udy mwa kuvudijok mudimw iibuh wa bukajaady mu mushind kahand eeny? Biby naak, iikal mutwiishibw neey wiiyiiy kufweej habwiih menmen ni Yehow ni wiiyiiy kukwaakish cyoos ciwukaakaam.​—Mis. 18:25.

8. I biny bitudy mwa kulongel ku maalabul ma Ivan ni Viktoria?

⁸ Tuhehet musangal mu mudimw iitut. Tal maalabul mady Ivan ni Viktoria batwaal, biin maluw bakaakal mudimw bu baaseb aa njil mu cibunj cya Kyrgyzstan. Bakacil bwa kwiikal ni shikacil muhehel ni kiihacil kakwiikalobw biin bukish bwa mudimw woos waakadyobw mwa kwiibakish bwa kulong, ni cikwaabw bwa midimw ya lwiibak. Ivan uleeleeb neey: “twaakady bitwaal bikasakan mu mudimw woos. Ning mutwaakady tukooy ku bulekel kwa diifuk, twaakady teng ni diitalal ni musangal, ni bamanyik neey: tudy batwaal bukash bwiitut bwa mudimw a Bukaleng. Tudy bahet cikwaabw musangal hakuhet balund bavul ni myand yikwaabw yivul yilengel ya kuvuluk.”​—Mark 10:29, 30.

9. I shikacil kaay yikwaabw ya makab yidy biin-kweet bakwaabw bataatameen bwa kuvudij mudimw aabab wa bukajaady, ni i bihet kaay bihetelobw?

⁹ Tuhehet musangal mu mudimw a Yehow ning tut biikal mu shikacil ya makab. Cileejel, Mirreh, mukaj a mulufwiil ukaady muut mukuluuh udy mushikacil mu Afrik wa butamb butweetweelel diib, waakady dokteer. Haakadyey mwiiy kukooy bwa midimw yindiy ya bumungang, wangacil mudimw a buuseb aa njil. Mirreh waakady ni lubeel lukasakan menmen ni waakady ni mushind a kudiil baat musah teng diib dyaakaabumw ku nzubw ni ku nzubw. Ki waakady mwa kuhitij diib divul mu mudimw a bukajaady ha byaab bidy baat bavul. Ni waakady ni makumbul mavul ni malong ma Bibl, ni waakady wiisamb ni bakwaabw ku telefon. Bwabiny Mirreh waakady mukat kulong bivul mu mudimw a Yehow? Uleeleeb neey: “Naakady mukat Yehow ni Yeez bikasakan. Ni naakady teng nasambil Yehow bwa kuuyambulwiishey bwa mim kulong bivul mu mudimw indiy”​—Mat. 22:36, 37.

10. Teng mudyeby bileej mu mukand a 1 Pyeel 5:10, i biny bihehet baat bakuukumbaj myand yilomb mu mudimw a Yehow?

¹⁰ Tuhehet malongweesh makwaabw kudy Yehow. Kenny, seb aa njil ukaakadil mudimw mu cibunj cya Mauritius, utadil neey bwaal oobw i bwa biin-biin. Halongeley myand ya biin-biin, wiiyil kulek kalaas ka Iniversiteh, kutambuley, ni utwaadijil kukadil Yehow mudimw a ku diib ni ku diib. Uleeleeb neey: “Nady mukat kwiikal bu muprofet Yeshaay, uleebel neey: ‘Mim oow, tumaany!’ (Ye. 6:8) Kenny i mukal midimw yivul ya lwiibak, ni waakady mwambulwiish cikwaabw mu mudimw a kwaalabul mikand yumvumvwiij myand ya mu Bibl mu cileebel cindiy. Kenny uleeleeb neey: “Baakady balongweesh myand yinaakady nakaam bwa kukumbaj midimw yaam bilengel.” Ki ulongel bikasakan mushind a kukal midimw aay. Uleeleeb cikwaabw neey: “Nalongel bwa kweehuk myand yikwaabw ni kwiikal ni biikadil binakaakaam bwa kwiikal mwiin mudimw a Yehow mulengel.” (Bal 1 Pyeel 5:10.) Misang yikwabw, udy mwa kulongololok shikacil iibuh bwa Yehow akulongweesh mu mishind yivul eeny?

11. I mushind kaay waakady biin-kweet ba mu Koreh wa kucyaash biikashishomw bwa kulong mudimw a bukajaady, ni bihet kaay bihetelobw? (Tal cifwaatul cya ha cizubw.)

¹¹ Ning Batemw bakaady bashimat bakaakaam byaabw bwa biikal bibalongweesh hadyobw batang kukal mudimw muhyaamuhy. Mu ciisang cya cihuh cya KOVID-19, bakul ba mu cisumbw cya mu Koreh wa kucyaash bafundil neey: “Bamw baakady balang neey kabaakady mwa kukaloh bend mishind yikwaabw ya mudimw a bukajaady bwa cilumbw cya makand ma nyeet, kaabaak bady ni mushind a kumulong ku dyambulwiish  dya byaamw bidy ni video ya kutalangan. Baan-beet baan-bakaj basat bakaady ni mivw yihit ha 80 balongel mwa kukal mudimw ni byaamw ni batangil kudiil baat bavul musah.” (Mis. 92:14, 15) Udy mukatok kuvudij mudimw iibuh ni kulabul cikwaabw bulengel bwa Yehow eeny? Tutalaay myand yiwudy mwa kulong bwiibuh kukumbaj kiihacil aak.

12. I biny bidy Yehow mulay baat bamuteetekel micim?

¹² Long bwa kuteekel Yehow micim. I mwiitulay bwa kwiitulongel myand yilengel yivul tut bamuteekel micim ni tut bamuh cidy cilengel bwiitul. (Mal. 3:10) Mwiin-kweet mwaan-mukaj wa mu Colombie diijin dindiy Fabiola utadil mwaakady mulay a Yehow mumukumbanyin. Waakady mukat kukal mudimw bu seb aa njil haanyim a kutambuley. Nook, mbaayend ni baan baabab basat baakady beyeeleel tufwalang tukeeh twaakadyey naat. Nook, haakadyey mwiiy kukooy, waakady musambil bikasakan bwa Yehow amwambulwiish. Uleeleeb neey: “Byangangat mafuk mavul bwa kuhet fwalang ya bulekel ya ku mudimw bwa kwiikish, ki nahetel yaamim haanyim ha suuny aakaabumw. Byaakady bu cishim!” Haanyim ha suuny iibidy yiy kwiifundishey bu seb aa njil. Kaabaak udy ni mivw yihit ha 70 ni i mukal mudimw a buuseb aa njil oobw mu mivw 20. Mu ciisang aacy, i mwambulwiish baat mwandamukul bwa kufikobw teng ni ku baatiisumw. Uleeleeb neey: “Haniyuyumvw mukooyel, Yehow uuyambambulwiish bwa mim kutungunuk ni mudimw aam wa buuseb aa njil.”

13-14. I bileejel kaay bidy mwa kwiitwambulwiish bwa kuteekel Yehow micim ni bwa kukumbaj biihacil biitut?

¹³ Longel ku bileejel bya baat baakady bateekel Yehow micim. Bibl i mwiiwul teh ni bileejel bya baat baakady bakadil Yehow mudimw  bikasakan. Kudy bileejel bya baat bavul baakady Yehow mufiil kis mu mushind a habwaah teng haakadyobw balong bwaal kahand bwa kuleej mwaakadyobw bamuteekel micim. Cileejel, byaakady teng diib dyaakady Abraham mumwangal kwaabab​—“waay kwaakadyey kay mumanyik”​—ki Yehow kumufiil kis. (Ebr. 11:8) Byaakady teng haanyim a Jakobw muman kul diivit ni mwanjel ki haakadyey mwiiy kuhet diibenesh dya habwaah. (Kbwa. 32:24-30) Haakady biin Izaleel habwiih ni kutweelobw mu Bulab Bulay, byaakady teng haakady balambul ba milambul badyaat mu mwanz a Yurdaan ki diib dyaakady baat basabuk Musul.​—Joz. 3:14-16.

¹⁴ Udy mwa kulongel cikwaabw ku bileejel bya Batemw ba leel baakady bateekel Yehow micim ni bahetel musangal bwa myand yaakadyobw bakumbaj. Cileejel, mwiin-kweet mwaan-mulum Payton ni macimen indiy, Diana, baakady ni musangal bwa kubal myand ya biin-kweet baan-balum ni baan-bakaj baakady bakadil Yehow mudimw bikasakan, bu yidyobw baleej ha cyaab cya neey: “Ils se sont offerts volontairement.” * Payton uleeleeb neey: “Hanabaabal myand yaababw, tumvwiil bu muut usaasangeel cyakudy cilengel. Hatwaakady twend ni kutal, ni tukacil cikwaabw bwa ‘kulabul ni kutal neey Yehow i mulengel.’” Mafuk malondel, Payton ni Diana bamwangeel ni kuyobw kukal mudimw cyaab cyaakadyobw bakaam dyambulwiish. Ukaady mubalok byeeb biin bwaal bya ha cyaab eecy eeny? Ukaady mutalok video yileeleeb bwa Témoignage dans le térritoire isolé​—en Australie ni Témoignage dans le territoire isolé​—en Ireland bidy mu jw.org eeny? Myand eey yidy mwa kukwambulwiish bwiibuh kutal mushind uwudy mwa kuvudij mudimw iibuh.

15. I mushind kaay udy cikong cya baat balengel mwa kwiitwambulwiish?

¹⁵ Sungul cikong cilengel. I bihehel menmen bwiitut kudy cyakudy citudy katuy banj kulabuloh haakaabumw ni baat bady biicikat. I bya mushind aakaabumw, tut tuhitij diib haakaabumw ni cikong cya baat bady bateek Yehow ha cyaab cya kuuhal mu shikacil aabab, tudy mwa kuhet mushind a kuvudij mudimw iitut a Mawej. Biin maluw aab: Kent ni Veronica batadil neey, bwaal oobw i bwa biin-biin. “Balund biitut ni biin mu cisak baakady biitukashish bwa kukadil Mawej mudimw mu mishind yikwaabw yihyaayihy,” ki mudy Kent muleeb. “Tudy bakumbaj bwaal oobw bwaal twaakady mu cikong cya baat baakady bateek myand ya Bukaleng ha cyaab cya kuuhal, tuhetel musangal a kukal mudimw muhyaamuhy.” Kent ni Veronica bakaakal mudimw kaabaak bu baaseb aa njil ba habwaah mu cibunj cya Serbie.

16. Bilondeshel kasumw katwaadil Yeez kady mu mukand a Luuk 12:16-21, bwabiny bikaam twiikal ni lukat lwa kwiitwaal mu midimw?

¹⁶ Iitwaal mu midimw ya Yehow. Katwiinoh bend bakat kulek midimw yitwaakaakish musangal bwa kusangeej Yehow. (Mul. 5:19, 20) Nook, tudy mwa kulek kulong bivul mu mudimw a Yehow bwaal katwiin bakatoh bend kulek myand yitudy bakat, tudy mwa kulong byeet cilem cyaakaabumw ni cilongel muut uleebel Yeez mu kasumw waakady mukal mudimw bikasakan bwa kwiikaamineey bihak bwindiy kaayend ki kulekey kutat bwa Mawej (Bal Luuk 12:16-21.) Mwiin-kweet mwaan-mulum Christian, udy mushikacil mu cibunj cya France, uleeleeb neey, “Cyaakadyoh bend mutwaal diib divul ni bukash bwaamim kudy Yehow ni bwa cisak cyaam.” Yiy ni mukaj indiy bangacil dihangadik dya kushaal baaseb aa njil. Ki bwa kukumbaj kiihacil aak, byaakady bikaam balek midimw yaabab. Bwa kwiiyambulwiishobw, batwaadijil kukal kamudimw kakulongolweelangan mu nzubw, ni baakady basangal ni tufwalang tukeeh twaakadyobw  bahet ku mudimw aabab. Badyok ni musangal bwa mudyobw balek myand yaabab bwa kushaalobw baaseb aa njil eeny? Christian uleeleeb neey, “Tudy bakat mudimw iitut oow bikasakan ni tusaasangal bwa kutal mudy balony ba Bibl ni baat batukukumbul balong Bibl bwa kumanyik Yehow.”

17. Bwabiny bidy mwa kwiitukasakeen bwiitut kulong mudimw a bukajaady ni mishind yihyaayihy?

¹⁷ Kat bwa kukal mudimw ni mishind yihyaayihy. (Yil. 17:16, 17; 20:20, 21) Shirley, seb aa njil wa mu États-Unis, waakady mulongolol mudimw indiy a bukajaady mu ciisang cya cihuh cya KOVID-19. Kuuhal-hal, waakady weelakan bwa kudiil baat musah ku telefon. Haanyim uhetel dilongweesh haakadyobw biiy kwiibakumbul kudy mulombol a cijeng, nook, utwaadijil kudiil baat musah ha ciibidil ku dyambulwiish dya telefon. Uleeleeb neey: “Ku butambwiil, naakady naciin, ki kaabaak nady mukat kulong nook. Twiisaasamb ni baat bavul bihitok mutwaakady tulong mudimw a ku cibel ni ku cibel!”

18. I biny bidy mwa kwiitwambulwiish bwa kuhit bilengel ni makab mady mwa kwiitukakadish bwa kuvudij mudimw iitut a bukajaady?

¹⁸ Iifundil kiihacil ni teet bwa kwiikakumbaj. Diib dituheehet makab, tusaasambil bwa kuhet dyambulwiish ni tulang bikasakan bwa mushind utudy mwa kuhit naam bilengel. (Tus. 3:21) Sonia, ukaakal mudimw bu seb aa njil wa ha ciibidil haakaabumw ni kasumbw ka cileebel cya ciin Romany mu Mput, uleeleeb neey: “Nady mukat kufund biihacil byaam ha diibij ni kuteek diibij eedy ha cyaab citook bwa niikal nooshoh diis. Ha mees aam, nady muzoloh njil yibidy yital byaab bishilangan. Diib dinangangat dihangadik bwa kulong bwaal, nataatal njil yibidy eey ni nalang ning dihangadik dyaam didy mwa kuyambulwiish bwa kukumbaj eecy kulek kukumbaj kihacil kaam.” Sonia i mukat kwiikal ni meej malengel bwa makab mamufiifiikil. “Bwa shikacil woos muhyaamuhy umufiifiiki,” uleeleeb neey, “udy bu ciman ciikaakaakadish bwa kukumbaj kiihacil kaam eecy cilamb ciiyambambulwiish bwa kwiikakumbaj​—bilondeshel meej maam.”

19. I mushind kaay utudy mwa kufwiijok Yehow bwa byoos bidyey mwiitwaakish?

¹⁹ Yehow witufiifiil kis mu mishind yivul. Tudy mwa kuleej mushind utwanyanyiish mabenesh aam hatuloolong bwaal boos bwa kumuh lutumb. (Ebr. 13:15) Kulong kwa nook kuleeleej mutudy bakontonon mishind yihyaayihy bwa kuvudij mudimw iitut a bukajaady, ni hatuloolong nook, Yehow wiiyiiy kwiitufiil cikwaabw kis. Diifuk dyoos, twiikal tutal mishind yitudy mwa “kulabul ni kutal neey Yehow i mulengel.” Twiiyiiy kwiikal cikwaabw bu Yeez, uleebel neey: “Byaakudy bya mim i kulong bidy waakady muutum mukat, ni kuman mudimw uuheeley bwa kukal.”​—Jah 4:34.