1-2. Ngoku kiri omwa Esyonyimbo 34:8, thwang’igha thuthi okwa bubuya bwa Yehova?

THATHERA akasasani iwahebwa ekindu eky’erirya ekya wuthali wathalyako. Iwangana kighako kindu kirebe omw’ikisamalira, erikibehako, eribulya ngakikolirwe omuki, kutse eribulya abandi nga bakyasi bathi. Aliwe, enzira nguma y’eriminyiramo nga wangana kyanza ly’erikirozyako.

² Ithwangan’igha kindu kirebe okwa bubuya bwa Yehova omw’isoma e Biblia n’ebitabu byethu kuthya n’eriowa abandi bakakania okwa mighisa eyo Yehova abiribaha. Aliwe thukendi minya ngoku Yehova ni mubuya omw’iyileberya obubuya bwiwe ithw’ibene-bene. (Soma Esyonyimbo 34:8.) Thulebaye enzira nguma eyo thwangakoleramo ekyo. Thuthabugha thuthi thwanzire erisangira omwa mulingo mulebe w’omubiiri w’omughulhu wosi, aliwe ithwe erithoka erihika okwa kilhubirirwa ekyo thutholere ithw’olhobya engebe. Obundi thwabirisoma mughulhu mungyi omulhaghe wa Yesu ow’eribugha indi thwamahira Obwami bw’embere, Yehova iniakendithuha ebyo thukayithagha, aliwe ithwabya isithuli thwathayilhangirira omulhaghe oyo akathuberererako. (Mt. 6:33) Nomwabine, busana n’erikirirya omwa mulhaghe wa Yesu, thukakehaya emikolesirye yethu y’esyosente, emibiiri yethu y’ekihugho, neryo ithwahwerya amalengekania wethu okwa mubiiri wethu w’erithulira. Thukendibya thukakolha ekyo, thukendi yilhangirira ngoku kwenene Yehova atsomene ebiyithawa byethu. Thukayileberaya kutse erirozya obubuya bwa Yehova ithw’ibene-bene.

3. Ngoku kiri omwa Esyonyimbo 16:1, 2, ni bahi abakabana obubuya bwa Yehova?

³ Yehova ni “mwenge oko bosi,” nibya akaha n’abathamwasi. (Esy. 145:9; Mt. 5:45) Aliwe kwilhabirirya abanzire Yehova n’abakamukolera  n’omuthima wabu wosi bakabana emighisa mingyi erilhua okw’iyo. (Esyonyimbo 16:1, 2.) Thuthalebya esyonzira ndebe esyo bubuya bwa Yehova bukathughasiramo.

4. Yehova akakanganaya athi obubuya bwiwe okw’abakatsuka eriyithunda okw’iyo?

⁴ Obuli erighendera okwa bya thuk’igha oku Yehova, thukayilhangirira ebibuya ebikalhwiririramu. Thukabya thukamwighako n’erimwanza, akathuwathikaya erirwanisya amalengekania n’emitse mibi ebyabya ibyabirithughabulha okw’iyo. (Kol. 1:21) Kandi omughulhu thwayihayo oku Yehova n’eribatizibwa, muthw’ongera eriyilhangirira obubuya bwiwe akathuha obunyamuthima-thima obuwene n’erithuyira mw’abanywani biwe.​—1 Pet. 3:21.

5. Thukayilhangirira thuthi obubuya bwa Yehova omw’ithulira?

⁵ Thukalholha embere eriyilhangirira obubuya bwa Yehova thukasangira omwa mubiiri w’erithulira. Wuli w’esisoni? Abangyi b’okwa bandu ba Yehova ku bali bathya. Obundi wuthe wabya mughuma w’okwa baghombe ba Yehova, wangabya isiwabya wukalengekania wuthi iwakongotha okwa lhuyi lhw’omundu oyo wuthasi n’erimubwira okwa mwatsi ogho abangyi bathasi. Aliwe munabwire, ekyo wukakikolha mughulhu wosi. Ekikulhu kutsibu, busana n’obuwathikya bwa Yehova, wabirigha eritsemera omubiiri w’erithulira! Wabiriyilhangirira obuwathikya bwa Yehova omwa nzira nyingyi. Abirikuwathikya eribya iwunathekene wukahakanisibwa. Kandi abirikuwathikya eryibuka erisako eritholere ery’eribwira oyuwamanzisibwa. Kandi abirikuha akaghalha k’erilholha embere n’omughulhu abandu bakaghana erihulikirira.​—Yer. 20:7-9.

6. Erithendeka eryo Yehova akaha likakanganaya lithi obubuya bwiwe?

⁶ Kandi Yehova abirithukangania obubuya bwiwe omw’ithuthendeka busana n’omubiiri w’erithulira. (Yn. 6:45) Okwa muhindano wethu w’ahakathi-kathi k’eyenga, thukahulikirira ebya thwangabugha ebyuwene, kandi thukahirawa mw’omuhwa w’eribikolesya omw’ithulira. Okw’itsuka, ithwangana sagha erilengesya enzira mbyaka, aliwe thwamalengesyayo, ithukendi lhangira ngoku enzira eyo yikakolha ndeke omwa bulhambu bwethu. Kandi okwa mihindano n’okwa mihindano minene-minene thukahirawa mw’omuhwa w’erisangira omwa syonzira sy’erithulira esyo thwangabya isithuli thwathakolesya. Ekyo nakyo, ikikendimanyisya kithi thukendi yithagha eriyithalya okwa bindi, aliwe thwamakikolha, ithukendiha Yehova ekyo angatsumulha. Thulebaye emighuma y’okwa mighisa eya thwangabana thwamakolesya esyonzira mbyaka esya thukahebawa eriha Yehova y’ekyuwene kutsibu, nomuthwangabya ithuli omwa mibere eyiri yithi. Neryo ibbwa thuthalebya esyonzira esyo thwanga kanyiriryamo omubiiri wethu w’erithulira.

7. Ni mughisa wahi ogho thukabana thukalengaho erikanyirirya omubiiri wethu w’erithulira?

⁷ Thukongera eriyithunda hakuhi na Yehova. Thulebaye eky’erileberyako ky’omusyakulhu w’ekithunga oyukahulhawamo Samuel, * oyo iyo na mukali wiwe bakakolera e Colombia. Abathahenie aba babya ibanemutsemera obutemburi omwa kithunga ky’ewabu, aliwe mubanza erikanyirirya omubiiri wabu w’erithulira omw’iwathikya ekithunga ekiri mw’obuyithawa. Erihika okwa kilhubirirwa ekyo, mubayithagha eriyithalya okwa bindu birebe. Samuel akabugha athi: “Muthwaghendera okwa biri omwa Matayo 6:33 n’erileka erighulha ebindu ebyo thutheyithagha. Aliwe ekyathukalira kutsibu lyabya iry’erisighania enyumba yethu. Yabya yuwene kutsibu, kandi isithuwithe kuyo kw’ibanza.” Omwa lhusunzo lhuhyaka olho, abathahenie aba nibya mubabana ibakendibya bakakolesya  esyosente nyike kutsibu okwa syabalhue bakakolesya. Samuel akabugha athi: “Thwabiriyilhangirira ngoku Yehova akathusondolha kandi kw’akasubiraya emisabe yethu. Thukayowa Yehova iniakathutsemera kandi thwabiriyilhangirira olhwanzo lhwiwe omwa nzira esyathwabya isithuli thwathabana.” Wangana thoka erikanyirirya omubiiri wawu w’erithulira omwa nzira ndebe? Kyamabya okwa kiri kithya, wuyikethere ngoku wukendyongera eriyithunda hakuhi na Yehova kandi ngoku akendi kutsomana.​—Esy. 18:25.

8. Wam’ighaki okwa ebya Ivan na Viktoria babugha?

⁸ Thukabana etseme omwa mubiiri wethu. Thalebya ebya Ivan na Viktoria, abathahenie abakakolha ng’abatemburi e Kyrgyzstan babugha. Mubolhobya engebe yabu nuku bangabya ibangana wathikya okwa lhusunzo lhwosi-lhwosi, imwamuli n’olhw’obuhimbe. Ivan akabugha athi: “Muthwayihwerya omwa buli mubiiri owathukahebawa. Nomwakine indi ekiro ikikahwa ithwabirilhuha, ithukayowa ndeke n’eritsema habw’eriminya ku thwabirikolesya akaghalha kethu omwa mubiiri w’Obwami. Kandi muthwabana etseme nene habw’eribana abanywani n’ebyalholirweko ebikatsemesaya.”​—Mk. 10:29, 30.

9. Ni kyahi ekya mwali wethu oyuli omwa mibere eyikalire abirikolha erikanyirirya omubiiri wiwe, kandi mwabirilhwiririraki?

⁹ Thukabana etseme omwa mubiiri wa Yehova nibya n’omughulhu thuli omwa mibere eyikalire. Ng’eky’erileberyako, Mirreh, omukwakali omukekulhu omwa West Africa, mwahumulibwa okwa mubiiri wiwe w’obudokita neryo amatsuka obutemburi. Mirreh akwire obulhwere obukalhuma kutsibu obw’esyonungu neryo akathoka erikolha esaha nguma nyisa omw’ithulira nyumba okwa nyumba. Aliwe akathoka erithulira saha nyingyi okwa kaggali k’ebitabu. Awithe ab’erisubako n’abigha be Biblia bangyi, abaghuma b’okw’ibo akabeghesaya omw’ikolesya esimu. Ni kyahi ekyahira omu Mirreh mw’omuhwa w’erikolha bingyi? “Omwa muthima waghe ngayowa inganzire kutsibu Yehova na Kristo Yesu. Kandi mughulhu wosi ngasaba Yehova indi angwathikaye ngakole bingyi omwa mubiiri wiwe ngoku nangathoka.”​—Mt. 22:36, 37.

10. Ngoku kiri omu Isaya 54:13, abakayihayo erikolera Yehova ya bingyi bakabanaki?

¹⁰ Yehova akathuthendeka omwa nzira muthina-muthina. Kenny, omutemburi oyukakolera e Mauritius, mwalhangira eki ini kwenene. Abere akaminya ekwenene, mwaleka eyunivasite, amabatizibwa n’eringira omwa mubiiri w’omughulhu wosi. Akabugha athi, “Ngalengaho erighendera okwa binywe by’omuminyereri Isaya oyuwabugha athi: ‘Ingye yono hano. Wunyithume!’” (Isa. 6:8) Kenny abiriwathikya okwa mibiiri y’obuhimbe nga yan’eyo kandi abiriwathikya okw’ihindulha ebitabu ebiseghemere okwa Biblia omwa mubughe wabu. Kenny akabugha athi: “Munabana erithendekwa eryo nayithagha eryo nabaniramo amenge w’eriberererya esyongwamirwa syaghe.” Mwathasubulira okw’ibana amenge masa. Ak’ongerako athi, “Munaminya erilemererwa lyaghe n’emibere eyo ngatholere ingabya nayu eribya mughombe mubuya wa Yehova.” (Soma Isaya 54:13.) Busana naki iwuthalebya emibere eya wulimu n’erilhangira nga wangana yihayo eryongera erithendekwa na Yehova?

11. Ni kaghalha kahi ako bali bethu e South Korea bahiraho erisangira omw’ithulira, kandi mumwalhwiririraki? (Lebaya ekisasani ky’okwa kidipa.)

¹¹ Nibya n’Abema ba Yehova ababirighunza myaka mingyi bakaghasirawa omw’ithendekwa bakasangira omwa nzira mbyaka y’erithulira. Omwa buthuku bw’ekihunzo ky’ekorona (COVID-19), abasyakulhu b’ekithunga abe South Korea mubahandika bathi: “Abandi ababya bakalengekania bathi sibangathoka erisangira omwa mubiiri w’erithulira busana n’amaghalha wabu, lino banemukolhagho erilhabira omwa  nganirania y’evidiyo. Bali bethu basathu abali omwa myaka ye 80 mubigha erikolesya enzira mbyaka y’etekinologia eyi n’eritsuka erikolesyayo hakuhi obuli kiro.” (Esy. 92:14, 15) Wunanzire erikanyirirya omubiiri wawu w’erithulira wanayileberya obubuya bwa Yehova? Lengekanaya okwa biika ebyo wanga kwama ebyanga kuwathikya erihika okwa kilhubirirwa ekyo.

12. Ni kyahi ekya Yehova akalhaghanisaya abakamuyikethera?

¹² Igha eriyikethera Yehova. Akalhaghanisaya erithuthulirako emighisa thwamamuyikethera n’erimukolera n’omuthima wethu wosi. (Mal. 3:10) Mwali wethu oyuwikere e Colombia oyukahulhawamo Fabiola mwalhangira Yehova akaberererya omulhaghe oyu w’okw’iyo. Mwanza erikolha obutemburi bw’omughulhu wosi imwanamabatizibwa. Aliwe, mwira wiwe n’abaana biwe basathu ibasamalire omusara wiwe. Neryo abere akahika omwa myaka yiwe y’erihumulibwa okwa mubiiri, mwasaba kutsibu Yehova y’obuwathikya. Akabugha athi: “Mughulhu mungyi kikathwalha buthuku buuli abandu erilighirwa omusara owakahebawa abakahumulibawa okwa mubiiri, aliwe owaghe munalhuaho ingalighirwagho halilhabire kwezi kughuma nalisabiregho. Mukyabya nga kithiko-thiko!” Enyuma w’amezi abiri mwatsuka erikolha ng’omutemburi. Lino ali omwa myaka yiwe ye 70 kandi amabirikolha obutemburi ahabw’emyaka eyilhabire oku 20. Omwa myaka eyo, amabiriwathikya abandu munani erihika okw’ibatizibwa. Akabugha athi: “Nomwakine indi hakanayira ingayowa amani isyali, Yehova akanyiwathikaya obuli kiro erikwama-kwamania n’endegheka yaghe.”

13-14. Ni by’erileberyako byahi ebyanga kuwathikya eriyikethera Yehova n’erihika okwa bilhubirirwa byawu?

 ¹³ Ighira okwa by’erileberyako by’abayikethera Yehova. Omwa Biblia muswire eby’erileberyako by’abandu abayihweraya omwa mubiiri wa Yehova. Omwa by’erileberyako bingyi, abaghombe ba Yehova abo ibakatsuka eriyira ekya bakakolha imubabana emighisa y’embaghane ya Yehova. Ng’eky’erileberyako, Abrahamu abere abirisighania eka ewiwe​—nomwakine indi abya “isyasi eyo akaya”​—Yehova ni mwabya amutsumwire. (Ebr. 11:8) Yakobo abere abirilhwa n’omumalaika ni mwabya abwene emighisa y’embaghane. (Enz. 32:24-30) Ekihanda kye Israeli ikikisiya ikingira omwa Kihugho Ekyalhaghanisibawa, abahereri babere babirilyatha omwa Lhusi Yorodani abandu mubabya bathokire erisoka.​—Yos. 3:14-16.

¹⁴ Kandi wangana ghasirwa omwa ky’erileberyako ky’Abema abamunabwire ababiriyikethera Yehova n’erihika okwa bilhubirirwa byabu. Ng’eky’erileberyako, mughalha wethu Payton na mukali wiwe, Diana, ibakatsemera erisoma emyatsi eyihambire okwa balikyethu ababiryongera erikolha bingyi omwa omubiiri wa Yehova, ng’abakanibweko omwa bikabera eryasira omwa katsweka “Mubayihayo Ahathe Erikakwa.” * Payton akabugha athi: “Ithukabya thukasoma ebyalholirweko byabu, ithukabya ng’abasamalire omundu oyukalya ebyalya ebisihire kutsibu. Ithukabya thukongera eribya nga thunamusamalire, ikwa thukan’ongera thuthya erianza ‘erilengesya, n’erilebya Yehova kwali mubuya.’” Erighunzerera, Payton na Diana mubaghenda eyiri obuyithawa bunene. Wunewasoma emyatsi eyikabera eryasa eyi? Kandi wunewathalebya evidiyo eya Erithulira Omwa Bulhambu bwa Haali​—Australia na Erithulira Omwa Bulhambu bwa Haali​—Ireland esiri okwa jw.org? Omwatsi oyu angana kuwathikya eriminya esyonzira esyo wangakanyiriryamo omubiiri wawu.

15. Abanywani abuwene bangathuwathikya bathi?

¹⁵ Sombolha abanywani abuwene. Kyangana thwolhobera erirya okwa byalya ebya thuthe thwathalyako thwamabya thukasiba n’ababyanzire. Kuthya, thwamanywana abakahira Yehova y’embere omwa ngebe yabu, ithwangan’ongera erisondekania esyonzira esy’erikoleramo bingyi omwa mubiiri wa Nyamuhanga. Mughalha wethu Kent na Veronica mubalhangira ekyo ini kwenene. Kent akabugha athi: “Banywani bethu n’ab’eka yethu mubathuhira mw’omuhwa w’erilengesya esindi nzira mbyaka sy’erikoleramo Yehova. Muthwaminya ngoku erisiba n’abakahira Obwami bw’embere, ky’ekyathuhira mw’omuhwa w’eritsuka eyindi nzira mbyaka y’erikoleramo Yehova.” Lino Kent na Veronica bakakolha ng’abatemburi b’embaghane e Serbia.

16. Ngoku kiri omwa musyo wa Yesu owali omu Luka 12:16-21, busana naki thutholere ithwabya ithunayitheghekire eriyithalya okwa bindi?

¹⁶ Yithalhaye okwa bindi busana na Yehova. Sibugha ambu thutholere ithwayithalya okwa buli kindu ekya thukatsemera nuku thutsemesaye Yehova. (Omu. 5:19, 20) Aliwe, thwamaghana erikolha bingyi omwa mubiiri wa Yehova habw’erithasagha eriyithalya okwa bindi, ithwangana kolha ekisobyo ekiri ng’eky’omulhume oyuli omwa musyo wa Yesu oyuwakolha kutsibu eribya omwa ngebe eyuwene aliwe amaghana eritsomana ebya Nyamuhanga. (Soma Luka 12:16-21.) Mughalha wethu oyukahulhawamo Christian, oyuwikere e France, akabugha athi, “Nabya isingaliha Yehova n’eka yaghe endambi n’akaghalha ebikaghunza.” Iyo na mukali wiwe mubathwamu erikolha obutemburi. Aliwe erihika okwa kilhubirirwa ekyo, mubayithagha erileka emibiiri yabu. Eribana ebiyithawa byabu, mubatsuka akabiiri kake k’eriyonza amanyumba, kandi mub’igha eribyaho okwa kasente kake.  Mbwino eriyithalya okwa bindi mukyanabalethera etseme? Christian akabugha athi, “Lino thukatsemera kutsibu omubiiri wethu w’erithulira kandi thukatsema thukalhangira abigha be Biblia n’abathukasubako bak’igha oku Yehova.”

17. Ni kyahi ekyangathulemesya erilengesya enzira mbyaka y’erithuliramo?

¹⁷ Ibya iwunayitheghekire erilengesya esyonzira mbyaka sy’erithuliramo. (Emib. 17:16, 17; 20:20, 21) Shirley, omutemburi e United States, mwabya w’erihindulha endegheka yiwe y’erithulira omwa buthuku bw’ekihunzo ky’ekorona. Okw’itsuka, mwasagha erilengesya erithulira okwa simu. Abere abiribana erithendekwa omwa buthuku bw’olhubungo lhw’omulebererya, mwatsukiraho erisangira omw’ithulira eri mughulhu wosi. Akabugha athi: “Okw’itsuka, erithulira eri irikubahisaya, aliwe lino ngatsemeralyo. Thukathulira bandu bangyi kwilhaba abo thwabya thukathulira nyumba okwa nyumba!”

18. Ni kyahi ekyanga thuwathikya erighumira ebitsibu ebyo thukabana thukalengaho erikanyirirya omubiiri wethu w’erithulira?

¹⁸ Hiraho ekilhubirirwa kandi kiberereraye. Omughulhu thuwithe ebitsibu, omw’isaba thukalengaho erikolesya amaaka wethu w’erilengekania eriminya eky’erikolha. (Emi. 3:21) Sonia, oyukakolha ng’omutemburi w’omughulhu wosi omwa gurupu y’Olhuromani e Europe, akabugha athi: “Ngabeghere erihandika ebilhubirirwa byaghe okwa lhupapura n’erilhuhira ahalhangirikire. Oko kabada yaghe kunatherire ekisasani eky’esyonzira ibiri esithahukere. Omughulhu ngawithe erithwamu, ngasamalira esyonzira esyo n’erilebya erithwamu lyaghe nga likendinyilholya omwa nzira yahi.” Sonia akalengaho eribya n’amalengekania awatholere okwa bitsibu ebyo akabana. Akabugha athi: “N’ingye nangathwamu emibere mihyaka eyo ngabyamo nga yibye lhuhimbo olhukanyikakiraya erihika okwa bilhubirirwa byaghe kutse ekilhalhu ekikanyiwathikaya.”

19. Thutholere ithwathwamu erikolhaki?

¹⁹ Yehova akathutsumulha omwa nzira nyingyi. Thwangana kangania nga thukasima bungahi emighisa eyo omw’ikolha ekyosi-kyosi ekyo thwangathoka erimupipa. (Ebr. 13:15) Ekyo mwanganabya erilengesya emibere mihyaka ey’erikanyiriryamo omubiiri wethu w’Obwami, nuku thutholere eryongerwa emighisa. Obuli kiro, thulengeho erisondekania esyonzira esyo thwanga lengeseryamo ‘n’erilebya Yehova kw’ali mubuya.’ Neryo ithukendibya nga Yesu, oyuwabugha athi: “Akalyo kaghe ni kolha erisonda ly’oyo wanyithuma, n’eribugha omubiiri ogho amba.”​—Yn. 4:34.