1-2. A mɛɛ Sam 34:​8 dimi yɛ, vɛɛ naŋ looku yɛ sina mɛɛ Chɛhowa cho wana kɛndɛ yɛ?

YIYAŊNDƆ maa a ke num nyɛdiaa opum le dioo, kɛ kani bɛɛ a di wɔ nyɛdiaa koŋ te. Le ma sina a nyɛdiaa koŋ okɔɔ, mɛɛ ma mɛɛndaŋ ndu, ma chuŋnuŋ ndu, ɔɔ ma nyuna wanaa cheleŋ a ndu okɔɔ. Kɛ a koŋ kpou, nɛi kpeekpei ŋ nɔla ma sina a nyɛdiaa koŋ okɔɔ wo cho ndu miɔɔnɔŋndo ni, okoŋ ma sina yeela ndɔɔ.

² Le miŋ pɛɛku a mɛɛ Chɛhowa cho wana kɛndɛ yɛ okɔɔ, mɛɛ miŋ veelu diomndaŋ o Baabuiyo niŋ a o yaula naalaŋ niŋ. Ŋ nɔla vɛlɛ miŋ pɛɛku a ndu okɔɔ, te ŋ tuei pɛ acheleŋnda suɛi a salala Chɛhowa dɔu niŋ nda laŋ okɔɔ. Kɛ le miŋ nɔ sinapɛŋgoo kpeekpei a mɛɛ Chɛhowa cho wana kɛndɛ yɛ okɔɔ, mɛɛ miŋ tofa ndu. (Nuawɔ Sam 34:​8.) Ŋ tuuwɔ ndi o nɛiyo hoo choo. Ŋ dimi wɔ maa a yeema ma kandu kɔɔfaleŋ tosaa, kɛ le ma komal kpeleŋndo hoo mɛɛ ma tosa yoomu numndo tɛtɛlɛ. Naapum a veelu niŋ diomndaŋ o diomnde mɛyaale Chiisu leŋ niŋ maa te ŋ handu Masale Mɛlɛkaleŋ nyɛ tase o yoomula naalaŋ niŋ pɛ, Chɛhowa cho naa nyɔɔŋ ŋ tɔŋ kpou ke. Kɛ kani bɛɛ a chi wɔ diomnde mɛyaale leŋ o peelɔŋndo le. (Maa. 6:​33) A koŋ kpou, ma laalaŋ diomnde mɛyaaleŋ ndeŋ. Okoŋ, ma tosa yɛlɛmiaalaŋ a mɛɛ ŋ pisi nyɛsɔlaa numndo yɛ vɛlɛ a mɛɛ ŋ chua teleŋndo o wallo niŋ yɛ, le halikpeŋ ma tosa tau o wali dimiaa yooŋgu kɛndɔɔ niŋ. Mɛɛ ŋ tosa keŋ, ma cha kɛsɛ maa Chɛhowa buulaŋ le yeemaŋ numndoŋ, nduyɛ maa o cho wana kɛndɛ.

3. A mɛɛ Sam 16:​1, 2 dimi yɛ, nɛɛ waa Chɛhowa hiau yɛ sɔɔŋ kɛndɔŋ tosal?

³ Chɛhowa cho “wana kɛndɛ” o wana o wana lo, hali wanaa sina ndu le wa bɛɛ. (Sam 145:​9; Maa. 5:​45) Kɛ wanaa kaala ndu nduyɛ ma wa ndu piɛiyo a kɔl ndaa kpou wa o hiau sɔɔŋ kɛndɔŋ  tosal. (Nuawɔ Sam 16:​1, 2.) Ŋ yaasiaŋndɔ sɔɔŋ kɛndɔŋ ŋpum ŋ Chɛhowa tosal naa niŋndoŋ.

4. Vɛɛ Chɛhowa tosallɛ wanaa kandu ndu sɔɔŋguu wo ikɛiya sɔɔŋ kɛndɔŋ?

⁴ Teleŋ o teleŋ naŋ dɔu pɛ nyɛ naŋ pɛɛku a Chɛhowa okɔɔ wo o wali niŋ, miŋ che fulamakɔɔlila kɛndɛlaŋ leniŋ. Le tamaseliiyo, mɛɛ naŋ pɛɛku a ndu okɔɔ nduyɛ miŋ kandu ndu kaala, mbo mala naa le yiyaŋnda wɔɔŋndaŋ a sɔɔŋ wɔɔŋndoŋ fafaŋndo. (Kolo. 1:​21) Nduyɛ mɛɛ naŋ yɔŋguŋ o ndu lo okoŋ miŋ sɔla yiŋɔɔ, mbo chɔɔlu naa sɔɔŋ kɛndɔŋ tosal. Mbo ke naa kɔl iyama walaŋndo, nduyɛ mbo tosa miŋ luɛi o chaŋyɛi kpɛɛluŋnde niŋ a ndu.—1 Pitɛ 3:​21.

5. Vɛɛ naŋ cha yɛ maa Chɛhowa cho wana kɛndɛ o wali pollo niŋ?

⁵ Ŋ nɔla miŋ hiou lachi a chɔɔ mɛɛ Chɛhowa cho wana kɛndɛ yɛ, te ŋ wa pɛ kɔlaŋ o wali pollo niŋ. Baa wana la siɔmboo ŋ cho ni? Te lende i cho ni, mɛɛ a cho numpilɛ le. Wanaa Chɛhowaa a bɔɔbɔɔ nɔ siɔmbulaŋ. Naapum tuupa ma simnuŋ Sei Chɛhowaa, siɔmbulaŋ la wa num tau le kɔlaŋ dio waŋndo kundɔɔ le ndu yooŋgu kɛndɔɔ dimullo. Kɛ suŋ suŋ niŋ, ma tosa keŋ teleŋ o teleŋ siɔmbula ve num te. I hiou kpou ve, Chɛhowa mala num niŋ ma kaala wali dimiaa yooŋgu kɛndɔɔ tau. Nduyɛ a che niŋ mɛɛ Chɛhowa toolu num o nɛila bɔɔbɔɔ niŋ yɛ. O mala num niŋ ma pɔlul kɔllo mɛɛ wana ŋ komal o yooŋgu kɛndɔɔ dimioo niŋndo simul num. O mala num niŋ vɛlɛ ma loonuŋ bolle Baabuile kɛndɛleŋ le suɛi o wana yaŋ num nilaŋ ndo lo. Nduyɛ o yɔŋ bɛɛ mi waŋnda yeŋ num lani le, mbo luei num yoomuaŋ le halikpeŋ ma hiou lachi a yooŋgu kɛndɔɔ dimioo.—Chɛlui. 20:​7-9.

6. Vɛɛ pɛɛku Chɛhowa cho naa kioo wo chɔm yɛ maa o cho wana kɛndɛ?

⁶ Chɛhowa chɔm niŋ naa mɛɛ o cho wana kɛndɛ yɛ sanaa a naa pɛɛkoo le yooŋgu kɛndɔɔ dimioo. (Chɔŋ 6:​45) O bɔŋaŋnda naŋ bii o lɔɔ tɛɛŋ ndaŋ niŋ, ma chɔm naa nyɛ naŋ nɔ le dimioo o wali pollo niŋndo, nduyɛ ma dɛɛniaa naa le miŋ dɔu ndu o wali niŋ. O tasela ndɔ, mi siooŋnde bii naa le nyɛ naŋ tosa wɔ paandu le wo tosaa. Kɛ te ŋ tosa ndu pɛ, miŋ saaluŋ maa ndu kpeekpei wanaa cho o tanda naa niŋnda yeema ni. Miŋ sɔla vɛlɛ dɛɛniaa o bɔŋaŋndaŋ a o bɔŋaŋnda bɛndaŋ maa, ŋ nɔ miŋ yɔŋguŋ le yooŋgu kɛndɔɔ dimioo o nɛila teŋgeŋ teŋgeŋnda naŋ tofa wɔ paandu le laŋ niŋ. Lepum hei bɛɛ ve bɛɛŋ bɛɛŋ le tosaa le. Kɛ te ŋ kindiŋ pɛ le ndi tosaa, mi Chɛhowa dɔu naa sala. Ŋ yaasiaŋndɔ sɔɔŋ kɛndɛŋ Chɛhowa cho naa tosal loŋ te ŋ dɔu pɛ tiindaŋndo o ndu niŋ, nduyɛ miŋ yɔŋguŋ le nɛila sɛnɛilaŋ soliŋndo kpeku le yooŋgu kɛndɔɔ dimioo, o yɔŋ bɛɛ miŋ nɔ bahawɛilaŋ. O mɛɛlulaŋ, ŋ cho vɛlɛ chɔ nɛila naŋ tiuba miŋ chɔɔlu yɔŋgɔŋ tau o wali dimiaa yuŋgu kɛndɔɔ niŋndo.

7. Salala kuɛɛ naŋ sɔla yɛ te ŋ yɔŋguŋ pɛ le chɔɔloo tosaa tau o wali dimiaa yooŋgu kɛndɔɔ niŋ?

⁷ Miŋ sɔɔŋguu Chɛhowa ikɛi kpɛɛluŋ. Tofawɔ tamasi bɛndu kunda pilɛ o Kolombiaa niŋ diolaŋ Saamiɛɛ. * Mi che bɛɛ ndu nda laa ndɔ wa kɔɔfaleŋ tueiyɔɔ yeela o kunda ndaa niŋ, kɛ ndaa yeema ma chɔɔlu tosa tau o wali pollo niŋ. Le hei, ma kɛɛsiaa le kɔlaŋ malaa o kunda yeemɛi cho le wanaa dimiaa yooŋgu kɛndɔɔ wo niŋ. Le mi ndaa komal kpeleŋndo hoo, ndaa nɔ ma soliŋ sala. Mi Saamiɛɛ dimi aa: “Mi che bɛɛ miŋ duau nyɛ Maatiu 6:​33 dimi wo o wali niŋ, nduyɛ miŋ kialu nyɛm naŋ heuba le woŋ piondɔɔ, kɛ i wa ikala kpoke naa o ba le fondaŋ naa malɔɔ miŋ kuɛ naa cheleŋ. Naŋ kaala bɔɔ chiɛi naŋ wa wo, nduyɛ naŋ nɔ kuee wana o wana le.” Mɛɛ nda kuɛ o kunda cheleŋ niŋ, nyɛsɔlaa nyɛɛmbɔ koni ndaa soliŋ niŋ kpeku ni. Mi Saamiɛɛ dimi vɛlɛ aa: “Ŋ che niŋ mɛɛ Chɛhowa mala naa yɛ a mɛɛ o muli piɛile naaleŋ yɛ. Miŋ sinaŋ kɛsɛ  maa Chɛhowa hini kɔl a naa, nduyɛ o chɔm niŋ o nɛila bɔɔbɔɔ niŋ mɛɛ kpɛ o kaala naa yɛ.” Baa a nɔla pa ma soliŋ nɛi cheleŋ kpeku le halikpeŋ ma yɔŋguŋ tau o wali dimiaa yooŋgu kɛndɔɔ niŋ? Te a tosa lende pɛ, mɛɛ kɛsiŋ o kɔl maa a cho Chɛhowa sɔɔŋguu ikɛi kpɛɛluŋ, nduyɛ o cho num ke nyɛm ŋ hauba woŋ.—Sam 18:​25.

8. Yɛɛ naŋ pɛɛku yɛ o nyɛ Ivaŋ nda Vitooliaa dimi wo niŋ?

⁸ Miŋ sɔla kɔl kɛndɔɔ o wali naŋ wa tosaa wo niŋ. Tofawɔ nyɛ Ivaŋ nda Vitooliaa dimi wo. Pɔnɔɔ a lanɔɔ hoo cho kɔɔfaleŋ tosaa o lɛŋnde Kachikistaŋ ndeŋ niŋ. Ma tosa yoomu ndaa tɛtɛlɛ le halikpeŋ ma yɔŋguŋ le wali kɛ kɛ tosaa o kɔɔnaa niŋ, mɛɛ taŋgullo cho naa yɛ. Mi Ivaŋ dimi aa: “Te naŋ yɔŋguŋ pɛ le wali kɛ kɛ tosaa, miŋ naŋ tosa ndu a yoomuma naŋ kpou. Mi che bɛɛ mi naŋ wa a saŋgɛi te paaleŋ lee del pɛ, kɛ mi naŋ wa a kɔl kɛndɛ nduyɛ mi naŋ nɔ kɔl hiniaa kanifuule, ŋ sina maa ŋ soliŋ yoomuma naŋ kpeku le wali Chɛhowaa tosaa. Mi naŋ wa vɛlɛ a kɔl kɛndɛ le chaŋyaŋ kɛndɛŋ naŋ sɔla woŋ vɛlɛ a sɔɔŋ yɔŋnaŋ kɛndɛŋ naŋ tuei yeela woŋ.”—Maki 10:​29, 30.

9. Yɛɛ ndepilɛnɔ pilɛ nɔ bahawɛila kala kalalaŋ ndo tosa yɛ niŋ le halikpeŋ mbo chɔɔlu tosa tau o wali Chɛhowaa niŋ, nduyɛ fulamakɔɔli kuɛɛ o sɔla yɛ?

⁹ Ŋ nɔla miŋ wa a kɔl kɛndɛ o wali Chɛhowaa niŋ o yɔŋ bɛɛ mi simultaŋ la komal naa. Le tamaseliiyo, mi Miilɛ ndepilɛnɔ yuuwo o Afilika Ba Paaleŋ le Dello niŋ mal wali o wa tosaa wo le mbo kandu kɔɔfaleŋ. Kɛ ndepilɛnɔɔ hoo nɔ nyɛ nɛiyaa kala kalaa o dialloŋ niŋ. Le hei, o nɔla kɔlaŋ tau le. Hawɛiyo opilɛ kpe o nɔla yooŋgu kɛndɔɔ dimioo chiɛiyo a chiɛiyo ni. Kɛ te o yɔŋ pɛ mbo wa yooŋgu kɛndɔɔ dimioo a pɛŋgɛi mapuuluei, mbo chua hawɛila bɔɔbɔɔ. O nɔ miiŋgula makɔɔlaŋ a pɛɛkula Baabuilaŋ tau, nduyɛ apum o foŋndo choo o suukaŋ a nda ni. Yɛɛ nyindu yɛ Miilɛ le tosaa tau o wali Chɛhowaa niŋ? Mi ndupila dimi aa: “Kaala ya nɔ le Chɛhowa a Chiisu Kiliti wo cho o piaa cha o kɔl nuu niŋ. Mi piɛi o Chɛhowa lo teleŋ o teleŋ le mbo mala ya le halikpeŋ mi tosa mɛɛ ya tiuba yɛ o wali ndɔɔ niŋ.”—Maa. 22:​36, 37.

10. A mɛɛ Pitɛ Tasoo 5:​10 dimi yɛ, yɛɛ wanaa yɔŋguŋ le ma chɔɔlu tosa tau o wali Chɛhowaa niŋnda sɔla yɛ ndu o ba?

¹⁰ Miŋ chɔɔlu pɛɛkoo sɔla Chɛhowa o ba. Mi Kɛni, kɔɔfanɔɔ o lɛŋnde Mɔlitɔs leŋ niŋ cha maa hei cho tonya. Mɛɛ o pɛɛku tonyaa, mbo mal kɔlaŋ o sukuu bɛndoo, mbo sɔla yiŋɔɔ nduyɛ mbo kandu kɔɔfale lɔɔlɔɔ leŋ tosaa. Mbo dimi aa: “Mi kindiŋ kpoke le diomnda Aisaya wana ndoo suaa le Mɛlɛka wo dimi laŋ dɔwɔɔ o wali niŋ. Mi Aisaya dimi aa: ‘A che ya. Viom ya.’” (Aisaya 6:​8) Kɛni yɔŋguŋ niŋ tau le chiɛila kɔɔnaa taŋgullo. Nduyɛ o tosa niŋ wallo a kunda hiviaa latulu le yaula naalaŋ hivioo o suɛi nduɛi maŋgalɛi niŋ. Mbo dimi aa: “Mi sɔla pɛɛkoo le halikpeŋ mi tosa wali nda ke ya le tosaa wo.” O cho ko le mi Kɛni chaa wali ndɔɔ tosaa le o sɔla pɛɛkoo le, kɛ mbo pɛɛku vɛlɛ sɔɔŋ cheleŋndoŋ. Mbo chɔɔlu dimi aa: “Mi pɛɛku le sinaa kpeleŋ nuu vɛlɛ a suliŋnda ya nɔ mi nɔ le mi Chɛhowa soliŋ ya kpeku nduyɛ mi mala puaapiliaa niaa wo.” (Nuawɔ Pitɛ Tasoo 5:​10.) Naapum num bɛɛ tiuba ma tosa yɛlɛmiaalaŋ le halikpeŋ ma sɔla Chɛhowa pɛɛkoo o ba le wali ndɔɔ tosaa.

11. Sɛmbɛ yɛɛ ndepiliaa o Kooliaa batouwo niŋ dɔu yɛ le halikpeŋ ma chɔɔlu tosa tau o wali Chɛhowaa niŋ, nduyɛ fulamakɔɔli kuɛɛ nda sɔla yɛ? (Tofa vɛlɛ fotueiyo o kɔɔ.)

¹¹ Wanaa viou niŋ Chɛhowa piɛiyo wa bɛɛ nɔla ma sɔla tɔnɔɔ, te a yɔŋguŋ pɛ le nɛi sɛnɛi cheleŋ pɛɛkoo le wali Chɛhowaa tosaa. Le tamaseliiyo, a teleŋ naa Kolonaa hoo, mi bɛnduaa kundaa o Kooliaa batouwo niŋ poonyiaa a mɛɛ puaapiliaa yɔŋguŋ le yooŋgu kɛndɔɔ dimioo o nɛi cheleŋ niŋ yɛ okɔɔ. Ma poonyiaa aa: “Wanaa dimiaa yooŋgu kɛndiaa ndaa yiyaŋ maa bahawɛi kɛndiaa cho nda kuuna yooŋgu kɛndɔɔ dimioo wa, kandu niŋ yooŋgu kɛndɔɔ dimioo o nyɛm mapuuloŋ choo. Mi ndepiliaa  yaawaa hiou niŋ wɔsilaŋ 80 wa pɛɛku mɛɛ wana soliŋ kɔmpitɛiyo kpeku le yooŋgu kɛndɔɔ dimioo yɛ. Nduyɛ suŋ suŋ niŋ, ma soliŋ kɔmpitɛiyo kpeku sɔŋgɔ lepaa o lepaa le yooŋgu kɛndɔɔ dimioo.” (Sam 92:​14, 15) Baa a yeema pa ma yɔŋguŋ le chɔɔloo tosaa tau o wali Chɛhowaa niŋ nduyɛ ma chɔɔlu tofa mɛɛ o cho wana kɛndɛ yɛ? Tofawɔ sɔɔŋ ŋtiŋ ŋ mala num ma komal kpeleŋndo hoo wo.

12. Diomnde yɛɛ Chɛhowa mel lɛ naa te ŋ dɔu pɛ tiindaŋndo o ndu niŋ?

¹² Dɔu tiindaŋndo o Chɛhowa niŋ. Te ŋ dɔu pɛ tiindaŋndo o ndu niŋ nduyɛ miŋ tosa o naŋ tiuba wo, o mɛi lediom maa o cho naa salaa dɔwɔɔ. (Mal. 3:​10) Mi ndepilɛnɔ pilɛ o lɛŋnde Kolombiaaleŋ niŋ diolaŋ Fabooliaa cha mɛɛ diomnde mɛyaaleŋ ndeŋ le peeluŋ o yoomu ndɔɔ niŋ yɛ. Mɛɛ o sɔla yiŋɔɔ, ndoo nɔ yeemɛi le mbo kandu kɔɔfale lɔɔlɔɔ leŋ tosaa. Kɛ ndoo nɔ wɔ mbo wa wallo tosaa kalaŋ le halikpeŋ mbo toolu yuŋgu ndɔɔ. Mɛɛ wɔsila ndoo nɔ le wallo malɔɔ laŋ la fuuluu, mbo piɛi o Chɛhowa lo a kɔllo kpou le mbo mala ndu. Mbo dimi aa: “Te wɔsila numnda waltaŋ la chuu pɛ, mbo chua teleŋndo tau le mi wanaa ŋ wa wallo le nda wa ke num nyɛsɔlaa numndo. Kɛ ya paŋgei ipilɛ kinɛi nda chua ni ma kandu ya nyɛsɔlaa nuu kioo. I wa ko maa kaamaa!” Paŋgoŋ ŋmuuŋ okoŋ kɔɔli, mbo kandu kɔɔfaleŋ. Nduyɛ mi che bɛɛ o cho niŋ o wɔsiŋ 70 niŋ, kɛ o tosa niŋ kɔɔfaleŋ le wɔsilaŋ 20. O mala niŋ pɛŋ wanaa ŋɔmaa ma sɔla yiŋɔɔ. Mbo chɔɔlu dimi aa: “Mi che bɛɛ teleŋndaŋ lapum mi vi ŋdial, kɛ mi Chɛhowa mala ya lepaa o lepaa le halikpeŋ mi hiou lachi a kɔɔfaleŋ tosaa.”

13-14. Tamaseliila kuɛɛ la mala yɛ naa le tiindaŋndo dɔwɔɔ o Chɛhowa niŋ nduyɛ miŋ tosa tau?

 ¹³ Pɛɛku o tamaseliila wanaa dɔu tiindaŋndo o Chɛhowa niŋnda niŋ. Baabuiyo nɔ tamaseliilaŋ tau a wanaa ndaa yɔŋguŋ a kɔllo kpou o wali Chɛhowaa niŋnda okɔɔ. Teleŋnda bɔɔbɔɔ, mi waŋnda haa ndaa tosa fɛŋ nyɛ le halikpeŋ mi Chɛhowa ndoo dɔu nda sala. Le tamaseliiyo, Ebilaham mal fɛŋ chiee ndɔɔ, “mi che bɛɛ ndoo sina naa ndoo nɔ le kɔlaŋ nda le,” malaŋ Chɛhowa duau ndu sala. (Hibu. 11:​8) Chekɔpu sɔŋga fɛŋ a maalikɛinɔɔ malaŋ Chɛhowa duau ndu sala. (Chɛ. 32:​24-30) Mɛɛ kaaleŋ Isɔluɛi wa luɛiyɔɔ o Lɛŋnde Mɛyaaleŋ niŋ, mɛɛ mi wanaa soliaa lasalaa tual fɛŋ o pioo Chɔɔdaŋ, malaŋ pee koŋ pɛŋgi hiouwɔɔ le mi Isɔluɛiya tiuba taŋɔɔ.—Chɔɔ. 3:​14-16.

¹⁴ A nɔla vɛlɛ ma pɛɛku tau o tamaseliila Seiyaa Chɛhowaa o palɛi nɛi niŋ a dɔu tiindaŋndo o Chɛhowa niŋ, nduyɛ ma wa tosaa tau wa. Le tamaseliiyo, puaapilɛnɔ pilɛ diolaŋ Petɔŋ nda laa ndɔ Daina, ndaa tuɛi bɔɔ diomndaŋ veeloo yeela a puaapiliaa a ndepiliaa yɔŋguŋ le tosaa tau o wali Chɛhowaa niŋnda okɔɔ, mɛɛ a nda soo o buŋgɛi hei bɛŋgu wa cho naa yɛ, “They Offered Themselves Willingly.” * Mi Petɔŋ dimi aa: “Mɛɛ naŋ veelu diomndaŋ a puaapiliaa a ndepiliaa haa okɔɔ, miŋ cha sɔɔŋ ndaŋ yɔŋnaŋndoŋ naŋ chaa nyɛdiaa yeelɛiyo naŋ wa dioo ni. Mɛɛ naŋ veelu diomndaŋ fau a nda okɔɔ, lende koni naŋ nɔ yeemɛi le miŋ ‘tofa nduyɛ miŋ che mɛɛ Chɛhowa cho wana kɛndɛ yɛ ni.’” Teleŋ biŋgi okoŋ kɔɔli, mi Petɔŋ nda Daina kua naa yeemɛi cho tau wa. A veelu niŋ pa diomndaŋ o buŋgɛi hei niŋ? Nduyɛ a tofa niŋ pa vidueilaŋ ndaŋ Witnessing in Isolated Territory—Australia a Witnessing in Isolated Territory—Ireland o jw.org? Buŋgɛi keŋ a vidueilaŋ ndaŋ la nɔla mi la mala num ma nuuviaa nɛilaŋ, le halikpeŋ ma chɔɔlu yɔŋgɔŋ tau o wali Chɛhowaa niŋ.

15. Vɛɛ chaŋyaŋ kɛndɔŋ mala yɛ naa?

¹⁵ Hɛli chaŋyaŋ dɛɛniaa num le ma tosa tau o wali Chɛhowaa niŋndo. Mii wa tɛtɛlɛ le miŋ tuei nyɛdiaa naŋ di wɔ paandu le wo yeela, te ŋ wa ndu pɛ dioo a acheleŋnda. O nɛi pilɛ koŋ choo, te ŋ chua pɛ teleŋndo latulu a wanaa kɛsi Chɛhowa wana tasoo o yoomula ndalaŋ niŋnda, keŋ cho naa mala miŋ nuuviaa nɛilaŋ le halikpeŋ miŋ yɔŋguŋ tau o wali Chɛhowaa niŋ. Mi Kɛŋ nda laa ndɔ cha mɛɛ hei cho tonya yɛ. Ma dimi aa: “Mi chaŋyaŋ naŋ a yuŋgula naalaŋ la dɛɛniaa naa le miŋ tofa vɛlɛ nɛi sɛnɛi cheleŋ o wali Chɛhowaa niŋ.” Mi Kɛŋ dimi aa: “Miŋ cha kɛsɛ maa teleŋndo chuaa latulu a wanaa kɛsi Masale Mɛlɛkaleŋ nyɛ tase o yoomula ndalaŋ niŋnda, mala naa ni le nɛila sɛnɛila cheleŋ soliŋndo kpeku o wali Chɛhowaa niŋ.” Kɛŋ nda Vɛlonika cho niŋ suŋ suŋ kɔɔfale teŋgeŋndeŋ tosaa o lɛŋnde Saabiaa leŋ niŋ.

16. A mɛɛ tale Chiisu dimi o Luku 12:​16-21 niŋndo chɔm yɛ, le yɛɛ naŋ nɔ yɛ miŋ soliŋ sala?

¹⁶ Soliŋ sala le Chɛhowa. O cho sɔɔŋ tosa miŋ tuei yoomoo yeela woŋ kpou le naŋ nɔ miŋ mal le miŋ nɛŋi Chɛhowa kɔl te. (Ikili. 5:​19, 20) Kɛ te ŋ kɛɛ pɛ le nyɔɔŋ muŋ ŋpum malɔɔ le halikpeŋ miŋ tosa tau o wali Chɛhowaa niŋ, mɛɛ ŋ cho biondɔŋ pilɔɔ tosaa o po Chiisu soo a ndu okɔɔ o tale ndɔɔ niŋndo tosa wo. Mi poo hoo kindiŋ le yoomu sɔvɛ sɔviɔɔ nɔɔ, okoŋ mbo puɛɛnuŋ a Mɛlɛka. (Nuawɔ Luku 12:​16-21.) Mi puaapilɛnɔ pilɛ o lɛŋnde Filaŋsileŋ niŋ diolaŋ Kilistiaŋ dimi aa: “I ve teleŋndo a yoomuma niaŋ soliŋ kpeku tau o wali Chɛhowaa niŋ a le yuŋgu nuu le.” Mi ndu nda laa ndɔ kɛɛsiaa le kɔɔfaleŋ tosaa. Kɛ le mi ndaa komal kpeleŋndo hoo, ndaa nɔ ma mal walta nda wa tosaa laŋ, okoŋ ma kandu chiɛila pilalaŋ dindioo le halikpeŋ ma sɔla nyɛm nda hauba woŋ. Mi pɔnɔɔ a lanɔɔ hoo pɛɛku le waa a kɔl hiniaa. Baa a wa  pa a kɔl kɛndɛ le sala soliaŋndo hoo? Mi Kilistiaŋ dimi aa: “Miŋ tuei niŋ wali pollo yeela tau. Nduyɛ miŋ naŋ kɔl tau te ŋ che pɛ pɛɛkula Baabuila naalaŋ a miiŋgula makɔɔla naalaŋ pɛɛkoo a Chɛhowa okɔɔ.”

17. Yɛɛ mala yɛ ndepilɛnɔ pilɛ o Amɛlika niŋ le nɛila sɛnɛilaŋ soliŋndo kpeku o yooŋgu kɛndɔɔ dimioo niŋ?

¹⁷ Yɔŋguŋ le nɛila sɛnɛila cheleŋ soliŋndo kpeku o wali Chɛhowaa niŋ. (Walta. 17:​16, 17; 20:​20, 21) Mi kɔɔfanɔ pilɛ Amɛlika diolaŋ Siɛɛli tosa yɛlɛmiaalaŋ a mɛɛ o dimi yooŋgu kɛndɔɔ yɛ, a teleŋ naa Kolonaa. O tasela ndɔ, ndoo fula ŋdial le yooŋgu kɛndɔɔ dimioo o foŋndo choo le. Kɛ mɛɛ buɛi ibuŋgaa hiŋ kunda ndaa yilɔɔ nduyɛ mbo sɔla pɛɛkoo a ndi okɔɔ, mi keŋ tosa mbo kandu yooŋgu kɛndɔɔ dimioo teleŋ o teleŋ o nɛiyo hoo choo. Mbo dimi aa: “O kandɔŋndo, I wa a siooŋnde. Kɛ suŋ suŋ niŋ, mi tuei ndu yeela tau. Nɛiyo hoo soliŋndo kpeku cho naa malaa le waŋnda yooŋgu kɛndɔɔ dimullo mbo hiau teleŋ naŋ kua chiɛiyo a chiɛiyo wo!”

18. Yɛɛ mala yɛ naa miŋ chɔulaba simultaŋ le halikpeŋ miŋ chɔɔlu tosa tau o yooŋgu kɛndɔɔ dimioo niŋ?

¹⁸ Poonyiaa nyɛ ŋ tuu le tosaa wo, nduyɛ ma kindiŋ le ndu tosaa. Te bahawɛiyo komal naa pɛ, ŋ nɔ miŋ piɛi o Chɛhowa lo le mbo mala naa nduyɛ miŋ yiyaŋ yiŋgoloŋ a mɛɛ naŋ soli bahawɛi koŋ yɛ okɔɔ. (Pulɔ. 3:​21) Mi Sooniaa, kɔɔfanɔ lɔɔlɔɔ wo o kunda nda dimi suɛi maŋgalɛi Luomani ve o lɛŋnde Yulopileŋ niŋndo dimi aa: “I hɛnaŋ bɔɔ nyɛ ya tuu le tosaa wo poonyiaa o yauwo choo, okoŋ mi kɛsi yau koŋ naa i wa tɛtɛlɛ le mi che ndu wa. I tuuliaa niŋ nɛilaŋ la tiɔɔŋ o yauwo choo, okoŋ mi kɛsi ndu o tibii nuu choo. Nduyɛ teleŋ o teleŋ ya yeema pɛ kɛɛsiaa tosaa, nɛila tiɔɔŋ nda laŋ ya tofa ni le chɔɔ naa kɛɛsiaa ni koŋ cho ya yɔɔ wa.” Sooniaa kɛsi kɔllo o bahawɛila ndɔlaŋ choo le. Mbo dimi aa: “Te bahawɛiyo komalla pɛ, yapila tosa ni le ndu chɔɔ maa kpaki kuuna ya le kpeleŋ nuu komallo wo ɔɔ tal ya keeku choo le kpeleŋ nuu komallo wo.”

19. Vɛɛ naŋ chɔm yɛ maa ŋ nɔ balika melaa le salala Chɛhowa cho naa dɔwɔɔ laŋ?

¹⁹ Mi Chɛhowa dɔu naa sala o nɛila bɔɔbɔɔ niŋ. Ŋ chɔm maa ŋ nɔ balika melaa le salala o cho naa dɔwɔɔ laŋ te ŋ tosa pɛ mɛɛ naŋ tiuba yɛ le ndu saŋgalaa. (Hibu. 13:​15) Hei sim ni maa ŋ nɔ miŋ soliŋ nɛila cheleŋ kpeku le halikpeŋ miŋ tosa tau o wali dimiaa yooŋgu kɛndɔɔ niŋ. Nduyɛ keŋ tosa mi Chɛhowa dɔu naa sala tau. Lepaa o lepaa, ŋ nɔ miŋ nuuviaa nɛilaŋ le miŋ ‘tofa nduyɛ miŋ che mɛɛ Chɛhowa cho wana kɛndɛ yɛ.’ Hei cho tosa mi naa bɛɛ dimi maa Chiisu. Mbo dimi aa: “Nyɛdiaa nuu cho hɛnaŋ wana vem ya wo tosaa a wali ndɔɔ siouwo ni.”—Chɔŋ 4:​34.