1-2. Na kutadila Nkunga 34:8, yinki beto lenda sala samu na kumona mambote ya Yehova?

KANISA ntete mpangi mosi mepesa nge madia yina nge kudia ntete ve. Nge lenda longuka diambu mosi na yina metadila madia yango na kutalaka yau, na kuwaka nsunga na yau, kubaka yau, to kuyuvusa makanisi ya bantu yankaka samu na madia yango. Kasi, mutindu mosi kaka ya kukindimisa ti madia yango kele mbote, kele ya kumeka yau nge mosi.

² Beto lenda longuka mambu mingi na yina metadila mambote ya Yehova na kutangaka Biblia mpe mikanda na beto ata mpe na kuwaka bantu yankaka yina kena kutubila balusakumunu yina babakaka na Yehova. Kasi beto lenda bakusa mambote ya Yehova kana beto “memeka” yau beto mosi. (Tanga Nkunga 34:8.) Beto tubila mutindu mosi yina beto lenda sala yau. Kanisa ntete beto zola sala kisalu mosi ya ntangu nionso, kasi samu na kukokisa lukanu yango, yakelomba beto kumisa luzingu na beto pepele. Mbala yankaka beto ketangaka mingi nsilulu ya Yesu yina metuba ti kana beto metula Kimfumu na kisika ya ntete, Yehova kepesa beto bima yina beto kevuanda na yau nsatu, kasi beto mona ntete ve Yehova sala plina samu na beto. (Mat. 6:33) Na yau, na kuvuandaka na kiminu na nsilulu ya Yesu, beto lenda soba mutindu na beto ya kusadila mbongo, kubongisa programe na beto ya kisalu ya kinsuni, mpe kusala yina beto lenda samu na kusala mingi na kisalu ya kusamuna. Kana beto mesala plina, beto kemona ti Yehova kekokisaka mpenza bansatu na beto. Beto “meka” mambote ya Yehova beto mosi.

3. Na nguizani na Nkunga 16:1, 2, banani kebakaka mambote ya Yehova?

³ Yehova kele ‘mbote samu na bisemua nionso,’ ata mpe na bayina zaba yandi ve. (Nk. 145:9; Mat. 5:45) Kasi Yehova kepesaka balusakumunu mingi na bayina kezolaka yandi mpe kesadilaka yandi na muela na bau ya mvimba. (Tanga Nkunga 16:1, 2.) Beto tadila ndambu ya mambote yina Yehova kesadilaka beto.

4. Yinki mutindu Yehova kemonisaka mambote na yandi na bayina kena kubanda kupusana penepene na yandi?

 ⁴ Konso ntangu yina beto kena kusadila mambu beto kena kulonguka samu na Yehova, beto kemonaka mambote yakenatinaka beto na luzingu. Ntangu beto longukaka mambu na yandi mpe beto bandaka kuzola yandi, yandi sadisaka beto beto nunga makanisi mpe mambu ya yimbi yina vuandaka kabula beto na yandi. (Kol. 1:21) Mpe ntangu beto kukipesaka na Yehova mpe beto bakaka mbotama, beto monaka mambote na yandi, na kifuani kikansasa ya mbote mpe kinkundi ya ngolo na yandi.—1 Pi. 3:21.

5. Yinki mutindu beto kemonaka mambote ya Yehova na kisalu ya kusamuna?

⁵ Beto ketatamanaka kumona mambote ya Yehova kana beto mekukipesa na kisalu ya kusamuna. Nge kevuandaka muntu ya nsoni? Bisadi mingi ya Yehova kele mutindu yina. Mbala yankaka tekila nge kuma kusadila Yehova, nge salaka baka dikanisi ve ya kukuenda bula na porte ya muntu yina nge zaba ve mpe kusolola na yandi mambu metadila Biblia. Kasi bubu yayi, nge kesalaka yau mbala na mbala. Mpe Yehova sadisaka nge nge longuka diaka kusepela na kisalu ya kusamuna! Nge monaka lusadusu ya Yehova na mitindu mingi yankaka. Yandi sadisaka nge nge tanina kiyenge na nge na ntuala ya muntu mosi yina vuandaka telemina nge. Yandi sadisaka nge diaka nge bambukila verse ya kusadila kana muntu mesepala kuwa nge. Mpe yandi pesaka nge ngolo ya kutatamana ntangu nge kutanaka na kumekama na terituare na nge.—Yer. 20:7-9.

6. Yinki mutindu formasion yina Yehova kepesaka beto kemonisaka mambote na yandi samu na beto?

⁶ Yehova monisaka beto diaka mambote na yandi na kupesaka beto formasion samu na kisalu ya kusamuna. (Yoa. 6:45) Na lukutakanu na beto ya katikati ya sabala, beto kekuwaka masolo ya bifuani ya mutindu ya kusolola na bantu, mpe beto kekindusuaka na kusadila yau na kisalu ya kusamuna. Samu na mbala ya ntete, beto lenda vuanda na mukakatano ya kumeka kusadila mutindu ya yimpa, kasi kana beto mesala yau, beto lenda mona ti mutindu yango ya yimpa kena kusepedisa bantu na terituare na beto. Na balukutakanu ya kimvuka mpe balukutakanu ya nene, beto kekindusuaka diaka na kubanda kusadila mayele ya mutindu na mutindu na kisalu ya kusamuna. Yau mpe lenda sala ti beto vuanda na mukakatano, kana beto memeka mayele yango, Yehova kesakumuna beto. Beto tadila balusakumunu beto lenda baka kana beto kena kusadila mayele ya yimpa samu na kusadila Yehova na makoki na beto ata kana beto kena kukutana na yinki diambu. Mpe na manima beto kemona mutindu beto lenda kokisa balukanu na beto.

7. Yinki mambote beto kebaka kana beto kena kusosa diaka kusala mingi na kisala ya Yehova?

⁷ Beto kepusana penepene ya Yehova. Beto tadila kifuani ya nkulutu mosi na nkumbu ya Samuel, * yina kena kusala kintuadi na nketo na yandi na Colombie. Bankuelani yango vuandaka na kiese ya kusala kisalu ya mpasudi nzila na kimvuka mosi ya buala na bau, kasi basosaka diaka kusala mingi na kisalu na bau ya kusamuna na kupesaka maboko na kimvuka yina vuandaka na nsatu mingi. Samu na kukokisa lukanu yango, yalombaka bakukiyimina mambu yankaka ya luzingu na bau. Samuel metuba: “Beto sadilaka Matayo 6:33 mpe beto lembaka kusumba bima yina beto vuandaka na mfunu na yau ve.” Yandi mebuela: “Kasi diambu vuandaka mpasi ya kusala kele ya kubika yinzo yina beto vuandaka vuanda. Beto tungaka yinzo yango na makoki yina beto vuandaka na yau.” Ntangu bakuendaka na kimvuka yankaka, bavuandaka na nsatu ya mbongo mingi ve samu na kukokisa bansatu na bau. Samuel metuba: “Beto monaka mutindu Yehova kena kutuadisa beto mpe mutindu yandi kena kupesa bamvutu na bisambu na beto.” Yandi mebuela: “Beto mendimisama ti Yandi kena kusepela na  beto mpe yandi kena kumonisina beto nzola yina beto salaka mona ntete ve.” Nge kele na dikoki ya kusala diaka mingi na kisalu ya Yehova? Kana yakele mutindu yina, nge lenda ndimisama ti nge kepusana penepene ya Yehova mpe yandi ketanina nge.—Nk. 18:25.

8. Yinki dilongi beto mebaka na bakomantere ya Ivan mpe Viktoria?

⁸ Beto kebaka kiese na kisalu ya Yehova. Beto tadila bakomantere ya bankuelani mosi na bankumbu ya Ivan mpe Viktoria, yina kena kusala lokola bampasudi nzila na buala ya Kirghizistan. Bakumisaka luzingu na bau pepele samu na kuvuanda bavolontere na konso kisika baketinda bau, ata mpe na baproje ya kutunga. Ivan metuba: “Beto vuandaka kukipesa na konso kiyekua yina bavuandaka pesa beto. Atako tovuandaka lemba na nsuka ya kilumbu, kasi beto vuandaka na kiyenge na kati ya ntima mpe na kiese na kuzabaka ti beto pesaka bangolo na beto samu na kisalu ya Kimfumu. Beto bakaka diaka kiese ya nene na kinkundi yina beto salaka na bampangi mpe mambu yankaka yina beto salaka.”—Mar. 10:29, 30.

9. Yinki mambu ya mpasi mpangi mosi ya nketo nungaka samu na kusala diaka mingi na kisalu ya Yehova, mpe yinki mambote yabimisaka?

⁹ Beto kebaka kiese na kisalu ya Yehova ata kana beto kena kukutana na mambu ya mpasi. Na kifuani, Mirreh, mpangi mosi ya nketo, na Afrique de l’Ouest yina mepusana na bamvula mpe yandi mefuilaka bakala, yandi mebakaka pansion na kisalu ya kimunganga mpe yandi bandaka kisalu ya mpasudi nzila. Mirreh vuandaka niokuama na maladi mosi mpe yavuandaka sala ti yandi vuanda na mukakatano ya kutambula mpe yandi vuandaka kaka na dikoki ya kulutisa wola mosi na kisalu ya kusamuna yinzo na yinzo. Kasi yandi kele na dikoki ya kulutisa ntangu mingi na kisalu ya kusamuna na kisika ya bantu mingi. Yandi kele na bantu mingi ya kuvutukila mpe bandongokolo ya Biblia, yandi kesololaka na mingi kati na bau na nzila ya telefone. Samu na yinki Mirreh kesepelaka kusala mingi samu na Yehova? Yandi metuba: “Ntima na munu mefulukaka na nzola samu na Yehova mpe Yesu Klisto. Mpe mukesambilaka Yehova mbala na mbala samu yandi sadisa musala yina mukele na dikoki ya kusala na kisalu na yandi.”—Mat. 22:36, 37.

10. Mutindu 1 Piere 5:10 memonisa yau, yinki Yehova kepesaka na bantu yina kesosaka kusala diaka mingi na kisalu na yandi?

¹⁰ Yehova kepesaka beto diaka formasion yankaka. Kenny, yina kena kusala lokola mpasudi nzila na Ile Maurice, monaka ti yakele kedika. Ntangu yandi vuandaka longuka kedika, yandi lembaka kutanga na iniversite, yandi bakaka mbotama, mpe yandi bandaka kisalu ya ntangu nionso. Yandi metuba: “Munu kemekaka kuvuanda na luzingu yina kele na nguizani na bampova ya mbikudi Yezaya, yina tubaka: ‘Munu yayi! Tinda munu!’” (Yez. 6:8) Kenny pesaka maboko na baproje mingi na kisalu ya kutunga, mpe yandi pesaka diaka maboko samu na kubangula mikanda yina kesasilaka Biblia na ndinga ya buala na yandi. Yandi metuba: “Munu bakaka formasion yina longaka munu makoki yina muvuandaka na yau nsatu samu na kukokisa biyekua na munu.” Kasi yandi longukaka mambu mingi samu na mutindu ya kusala bisalu yango. Yandi mebuela: “Munu longukaka bisika makoki na munu mesuka mpe bikadulu yina mufueti kudisa samu na kukuma kisadi ya mbote ya Yehova.” (Tanga 1 Piere 5:10.) Samu na yinki ve kutadila luzingu na nge mpe kumona kana nge lenda kukibongisa diaka samu na kubaka formasion yina mekatuka na Yehova?

11. Yinki bangolo bampangi ya banketo ya Corée du Sud kena kusala samu na kukipesa na kisalu ya Yehova, mpe yinki mambote yakena kubimisa? (Tala foto ya kuvertire.)

¹¹ Ata mpe Bambangi yankaka yina mesala mingi na kisalu ya Yehova kele na nsatu ya formasion ya Yehova. Na ntangu yayi ya maladi ya yimbi ya COVID-19, bankulutu ya kimvuka mosi na Corée du Sud sonikaka: “Bantu yankaka yina vuandaka kanisa ti balenda pesa ve maboko na kisalu ya kusamuna samu na mavimpi na bau, bubu yayi bakena kusala yau na nzila ya vidéoconférence. Bampangi tatu ya banketo ya bamvula 80 longukaka kusadila ordinatere mpe babandaka kusamuna  konso kilumbu.” (Nk. 92:14, 15) Nge kesepela kusala diaka mingi na kisalu ya Yehova mpe kumeka diaka mambote na yandi? Tala ndambu ya mambu nge lenda sala samu nge kokisa lukanu yango.

12. Yinki nsilulu Yehova mepesa bantu yina ketudilaka yandi ntima?

¹² Longuka kutudila Yehova ntima. Yandi mepesa nsilulu ya kusadila beto mambu mingi ya mbote ntangu beto kena kutudila yandi ntima mpe beto kena kusala yina beto lenda samu na kusadila yandi. (Mal. 3:10) Mpangi mosi ya nketo na nkumbu ya Fabiola kevuandaka na buala ya Colombie monaka mutindu Yehova kokisilaka yandi nsilulu yango. Yandi vuandaka na nsatu ya kukuma mpasudi nzila kaka na manima ya kubaka mbotama na yandi. Kasi, yandi vuandaka diaka na kiyekua ya kupesa bakala na yandi maboko samu na kusadisa dibuta na bau yina vuandaka na bana tatu. Na yau, ntangu yandi bakaka pansion, yandi sambilaka mingi Yehova samu na kulomba lusadusu na yandi. Yandi metuba: “Mbala mingi yakelombaka ntangu mingi luta samu bandima kupesa muntu pansion, kasi samu na munu bandimaka kupesa munu pansion kaka ngonda mosi na manima ya kulomba yau. Yavuandaka lokola kimangu!” Na manima ya bangonda zole, yandi bandaka kisalu ya mpasudi nzila. Bubu yayi yandi kele na bamvula 70 mpe yandi mekokisa bamvula 20 na kisalu ya mpasudi nzila. Na ntangu yango, yandi sadisaka bantu 8 samu babaka mbotama. Yandi metuba: “Atako mbala yankaka mukelembaka nzutu, kasi Yehova kesadisaka munu konso kilumbu samu munu tatamana kisalu na munu ya mpasudi nzila.”

13-14. Yinki bifuani lenda sadisa nge nge tudila diaka Yehova ntima mpe nge kokisa balukanu na nge?

 ¹³ Baka malongi na bifuani ya bantu yina tudilaka Yehova ntima. Biblia kele na bifuani mingi ya bantu yina kukipesaka ngolo na kisalu ya Yehova. Bifuani mingi kati na yau memonisa ti bantu yango salaka diambu mosi samu na kumonisa ti batudilaka Yehova ntima, bosi na manima nde Yehova vuandaka sakumuna bau. Na kifuani ya Abrahami, kaka na manima ya kubika yinzo na yandi—‘ata yandi zabaka ve kisika yandi vuandaka kuenda’—nde Yehova sakumunaka yandi. (Ebr 11:8) Kaka na manima ya kunuana na mbasi mosi nde Yakobi bakaka lusakumunu. (Kuy. 32:24-30) Ntangu dibuta ya Yisaele kumaka pene ya kukota na Ntoto ya nsilulu, kaka ntangu banganga-nzambi kotaka na Nzadi ya Yordani nde na manima yapesaka dibuta nionso nzila ya kusabuka.—Yoz. 3:14-16.

¹⁴ Nge lenda baka diaka malongi na bifuani ya bampangi na beto ya bubu yayi yina tudilaka Yehova ntima mpe bakokisaka balukanu na bau. Na kifuani, mpangi mosi ya bakala na nkumbu ya Payton mpe nketo na yandi Diana, vuandaka sepela kutanga masolo ya bampangi yina salaka mingi na kisalu ya Yehova, masolo lokola “Bamipesaki na bolingo na bango moko.” * Payton metuba: “Kana beto kena kutanga masolo na bau, beto vuandaka kukimona lokola beto kena kutala muntu mosi yina kena kudia madia ya kitoko. Lokola beto vuandaka tala yau mingi, yavuandaka buela nsatu na beto ya ‘kumeka mpe kumona ti Yehova kele mbote.’” Na yau, Payton mpe Diana kuendaka na kisika nsatu vuandaka mingi. Nge tangaka masolo yango? Mpe nge ketalaka bavideo lokola Prédication dans des régions isolées: Australie mpe Prédication dans des régions isolées: Irlande yina kele na jw.org? Bisadulu yango lenda sadisa nge nge sosa mutindu yina nge lenda sala diaka mingi na kisalu ya Yehova.

15. Yinki mutindu bankundi ya mbote lenda sadisa beto?

¹⁵ Pona bankundi ya mbote. Yakevuandaka pete samu na beto na kudia madia yina beto kudia ntete ve kana beto kele kintuadi na bantu yankaka yina kesepelaka na yau. Mutindu mosi mpe, kana beto mesala kinkundi na bantu yina ketulaka Yehova na kisika ya ntete na luzingu na bau, yakevuanda pete samu na beto kusosa mutindu ya kusala diaka mingi na kisalu ya Nzambi. Bankuelani mosi na bankumbu ya Kent mpe Veronica monaka ti diambu yango kele kedika. Kent metuba: “Bankundi mpe dibuta na beto kindisaka beto ti beto meka mutindu yankaka ya kusala mingi samu na Nzambi, beto monaka ti kusala kinkundi na bantu yina ketulaka Kimfumu ya Nzambi na kisika ya ntete, kindisaka beto beto meka diambu yankaka ya yimpa.” Bubu yayi, Kent mpe Veronica kena kusala lokola bampasudi nzila ya nene na Serbie.

16. Mutindu kifuani ya Yesu yina kele na Luka 12:16-21 memonisa yau, samu na yinki beto fueti vuanda pene ya kukiyimina?

¹⁶ Kukiyimina mambu yankaka samu na Yehova. Yakevuandaka mpasi kubika luzingu ya mbote yina beto kesepelaka na yau samu na kusepedisa Yehova. (Lon. 5:19, 20) Nzokande, kana beto kena kumanga kusala mingi na kisalu ya Nzambi, kaka samu beto memanga kubika bima yina beto kesepelaka na yau, beto lenda sala nzimbala ya mutindu mosi na ya muntu yina Yesu tubilaka na kifuani na yandi salaka kisalu ya ngolo samu na kubaka bima mingi ya mbote kasi yandi zimbakanaka Nzambi. (Tanga Luka 12:16-21.) Mpangi mosi ya bakala na nkumbu ya Christian, yina kezingaka na France, metuba: “Munu vuandaka pesa ve ntangu mingi mpe ngolo na munu samu na Yehova mpe dibuta na munu.” Yandi mpe nketo na yandi, babakaka nzengolo ya kukuma bampasudi nzila. Kasi samu na kukokisa lukanu yango, yalombaka babika bisalu na bau. Samu na kukokisa bansatu na bau ya kinsuni, bazibulaka mua konpani ya fioti ya kusukula bayinzo mpe babiro mpe balongukaka kusepela na mua mbongo fioti yina bavuandaka baka. Bakele na kiese samu na  mambu nionso yina basalaka samu na kukiyimina? Christian metuba: “Beto kele na kiese samu na kisalu na beto ya kusamuna mpe beto kele na kiese ya kumona mutindu banlonguki ya Biblia mpe bantu yina beto kevutukilaka kena kulonguka Yehova.”

17. Samu na yinki yalenda vuanda mpasi samu na beto kumeka mutindu mosi ya yimpa ya kisalu ya kusamuna?

¹⁷ Vuanda pene ya kumeka mitindu ya yimpa ya kisalu ya kusamuna. (Bis. 17:16, 17; 20:20, 21) Shirley, yina kele mpasudi nzila na États-Unis, bongisaka kisalu na yandi samu na Yehova na ntangu yayi ya maladi ya COVID-19. Na ebandeli, yandi vuandaka koka ve kusamuna na nzila ya telefone. Na manima, yandi bakaka formasion ntangu nkengi ya kizungidila kuizaka tala kimvuka na bau, na manima, yandi kumaka kusamuna mbala na mbala na nzila ya telefone. Yandi metuba: “Na ebandeli, yavuandaka bangisa, kasi bubu yayi mukena kusepela mpenza na yau. Beto kena kusolola na bantu mingi kuluta kutu kusamuna yinzo na yinzo!”

18. Yinki lenda sadisa beto beto nunga kana diambu mosi ya mpasi kena kupekisa beto beto sala diaka mingi na kisalu ya Yehova?

¹⁸ Kukitudila lukanu mpe meka kuzitisa yau. Ntangu beto kena kukutana na mambu ya mpasi, beto kesambilaka mingi samu na kusosa lusadusu mpe beto kekanisaka yina beto lenda sala samu na kununga yau. (Bin. 3:21) Sonia, yina kele mpasudi nzila ya ngonda na ngonda mpe yandi kepesaka maboko na mua kimvuka na ndinga ya Romani na Europe, yandi metuba: “Munu kesepelaka kusonika balukanu na munu na papie mpe munu kelundaka papie yango kisika mosi yina kele mpasi ve samu na kumona yau. Munu mesalaka desen na zulu ya meza na munu ya banzila zole yina mekuenda na bisika ya kusuasana. Kana munu kele na nzengolo mosi ya kubaka, muketalaka na desen yango mpe mukekanisaka kisika yina nzengolo na munu kenata munu.” Sonia kemekaka kutanina makanisi ya mbote ntangu yandi kena kukutana na mambu ya mpasi. Yandi metuba: “Konso diambu ya yimpa yina kekumina munu lenda vuanda lokola kibaka yina mekanga nzila to pon yina kesadisa munu—yaketadilaka kaka makanisi yina mukele na yau.”

19. Yinki nzengolo beto fueti baka?

¹⁹ Yehova kesakumunaka beto na mitindu mingi. Beto lenda monisa butondi na beto samu na balusakumunu yango na kusalaka yina beto lenda samu na kukumisa yandi. (Ebr 13:15) Yamesangisa kusosa mitindu ya yimpa samu na kusala diaka mingi kisalu na beto samu na Yehova, yina kesala ti beto baka diaka balusakumunu yankaka. Konso kilumbu, beto sosa mitindu ya ‘kumeka mpe kumona ti Yehova kele mbote.’ Mpe beto kevuanda lokola Yesu yina tubaka: ‘Madia na munu kele ya kusala luzolo ya muntu yina tindaka munu mpe kumanisa kisalu na yandi.’—Yoa. 4:34.