1-2. Faso ke zonzak’ yawu Nkunga 34:8, wa’ faso beto lendá zaba faso ke ntima ya mbote ya Yehova?

KANISA na kifwani yayi: muntu me pesa nge kima yina nabunu nge kudya. Nge lenda baka ntangu ya kutala kima yango, ya kuwa nsunga ya yawu, ya kuzaba faso ba ke lambilak’ yawu to nge lenda yufula na bantu ya nkaka faso kima yango kele. Kasi, faso ya kulutila mbote ya kuzaba yawu, ni ya kumeka yawu nge mosi.

² Beto lenda longoka kuzaba ntima ya mbote ya Yehova si beto tanga Biblia, mikanda ya beto to si beto kuwa masolo ya bampangi yina talá ntima ya mbote ya Yehova na luzingu ya bawu. Kasi, nge ke zaba mbote-mbote faso ke ntima ya mbote ya Yehova si nge mosi “meka” yawu. (Tanga Nkunga 34:8.) Beto kanisa na ekzample mosi yina ke na lakisá faso ya kusala yawu. Mpangi mosi ke na nsatu ya kukuma pionye ya ntangu nyonso. Kasi, yandi zaba ti samu na kulungisa dikanisi ya yandi, yandi zolá bika kulanda mbongo na bimvwama. Bambala mingi, yandi ke tangá na Biblia ti si yandi tula Kimfumu ya Nzambi na plase ya ntete na luzingu ya yandi, Yehova ke pesa yandi yina yandi ke na yawu nsatu. Kasi, nabunu yandi me tala bamambu yayi kulunganá na luzingu ya yandi. (Mat. 6:33) Samu yandi ke na kiminu na bamambu yayi, yandi me sala bachanjema na luzingu ya yandi. Na kifwani, yandi ke na sumbá dyaka ve bima kidi-kidi samu mbongo ya yandi manisa ve na mbangu, yandi mase sosa kisalu yina ke baka ve yandi ntangu mingi, mpe yandi mase lutisa ntangu mingi na kisalu ya predikasion. Ntangu yandi ke na salá babima yayi, yandi mase tala na meso ya yandi mosi, faso Yehova ke na kipe bansatu ya yandi. Yandi me “meka” mpe yandi me tala faso ke ntima ya mbote ya Yehova.

3. Faso ke zonzak’ yawu Nkunga 16:1, 2, na banani Yehova ke lutilá kulakisa ntima ya mbote?

 ³ Yehova ke lakisá ntima ya ‘mbote na bantu nyonso,’ ata na ba yina zaba ve yandi. (Nku. 145:9; Mat. 5:45) Kasi, ni ba yina ke zolá Yehova mpe ke sadilak’ yandi na ntima ya bawu nyonso ke kuzwá bambote ya kulutila. (Tanga Nkunga 16:1, 2.) Beto zonzila mwa bafaso yina beto lenda tala ntima ya mbote ya Yehova.

4. Wa’ faso Yehova ke lakisá ntima ya mbote na ba yina ke bandá kuzaba yandi?

⁴ Bambala nyonso yina beto ke sadilá bamambu yina Yehova ke zonzá na beto, beto ke talá faso ya ke bongisá luzingu ya beto. Na kifwani, ntangu beto longoká kuzaba mpe kuzola Yehova, yandi sadisá beto na kukatula makanisi mpe bifu ya yimbi yina vandá na beto. (Kol. 1:21) Na manima, ntangu beto kuzwá bateme, yandi lutilá dyaka kulakisa beto ntima ya mbote. Yandi pesá beto kizunu ya ntima mpe beto tungá kikamarade ya mbote na yandi.—1 Pi. 3:21.

5. Wa’ faso beto ke talá ntima ya mbote ya Yehova na kisalu ya predikasion?

⁵ Ntima ya mbote ya Yehova ke talaná mpe na faso yandi ke sadisá beto na kisalu ya predikasion. Nge ke kwandi muntu ya nsoni? Bisadi mingi ya Yehova ke bantu ya nsoni. Bantangu ya nkaka, avan nge kuma Temwe ya Yehova, nge vandá kanisa ata fioti ve ti nge ke lenda kukwenda na mantwala ya yinzo ya muntu mpe kubanda kuzonzila yandi mambu ya Nzambi. Kasi bubu yayi, nge ke salá yawu ntangu nyonso. Nge me suka kaka ve na kusala yawu, kasi Yehova me sadisa mpe nge na kuvanda na kilengi ya kusala yawu. Nge me tala mpe diboko ya Yehova na bafaso ya nkaka. Yandi me sadisa nge na kuzaba kuvanda swi na mantwala ya muntu yina ke na fingá nge. Yandi ke sadisá mpe nge na kuzaba verse ya mbote yina lenda simba ntima ya muntu. Dyaka, yandi me pesa nge ngolo samu nge lemba ve na kati ya teritware yina bantu ke zolá ve kuwa mambu ya Nzambi.—Yer. 20:7-9.

6. Wapi faso ya nkaka Yehova ke lakisá beto ntima ya mbote?

⁶ Yehova ke lakisá mpe ntima ya mbote ntangu yandi ke sadisá beto na kubongisa faso ya beto ya kupreche. (Yoa. 6:45) Na balukutakanu, ba ke lakisá beto faso ya mbote ya kuzonzila mambu ya Nzambi na bantu. Na kubanda, ya lenda vanda mpasi na beto na kusadila mambu ya malu-malu yina ba ke zonzilá beto. Kasi, si beto meka yawu, beto lenda tala ti ya ke na simbá na teritware ya beto. Na balukutakanu ya kimvuka mpe ya nene, beto ke longoká bafaso ya kupreche yina nabunu beto meka. Ntangu beto me mesana na faso mosi ya kusala bamambu, ya lenda vanda mpasi na beto na kumeka bafaso ya nkaka. Kasi, si beto ndima kumeka bafaso ya malu-malu ya kusala, beto ke kuzwa bima ya mbote. Beto zonzila mwa bima yango. Na manima, beto ke tala wa’ faso beto lenda sala dyaka ya kulutila na kisalu ya Yehova.

7. Wapi bambote beto lenda kuzwa si beto sosa kusala ya kulutila na kisalu ya Yehova?

⁷ Beto ke kuma dyaka pene-pene na Yehova. Beto zonzila ekzample ya kuluntu mosi na nkumbu ya Samuel. * Yandi na kento ya yandi ke salá mingi na kisalu ya Yehova na Colombie. Ba vandá bapionye na kimvuka ya bawu, kasi ba vandá na nsatu na kusala dyaka ya kulutila. Dikanisi ya bawu vandá ya kukwenda na kimvuka mosi yina vandá na nsatu ba sadisa bawu. Samu na kulungisa yawu, ba zolá sala basakrifise. Samuel me zonza: “Beto sadilá Matayi 6:33 mpe beto vandá basisa dyaka ve mbongo kidi-kidi samu na kusumba bima. Kasi, kima yina lutilá mpasi na beto vandá ni kubika yinzo ya beto. Ya vandá yinzo yina beto mosi tungá, mpe beto vandá zola yawu mingi.” Kote ba kwendá, ba kwizá tala ti ba vandá kaka na nsatu ya mwa  mbongo fioti samu na kukipe banzutu ya bawu. Samuel me zonza: “Beto vandá tala faso Yehova vandá kuwa balusambu ya beto mpe kulakisa beto yinki ya kusala. Bubu yayi, beto ke na talá luzolo ya Yehova na bafaso yina beto vandá tala ve yawu na ntama.” Nge mpe lenda sala ya kulutila samu na Yehova? Zaba ti, si nge sala yawu, nge ke kuma pene-pene na Yehova mpe yandi ke kipe bansatu ya nge.—Nku. 18:25.

8. Yinki beto lenda longoka na bamambu yina zonzá Ivan na Viktoria?

⁸ Kilengi ya beto ke kula. Ivan na kento ya yandi Viktoria, ke bapionye na Kirghizistan. Ba vandá sosa ve bima mingi na luzingu ya bawu. Na yawu, ba vandá na ntangu ya kulunga samu na kundima kisalu ni kisalu yina ba ke pesa bawu na organizasion ya Yehova, ata kisalu ya kutunga bayinzo. Ivan me zonza: “Beto vandá tulá bangolo ya beto nyonso na kisalu ni kisalu yina ba vandá pesa beto. Ata beto vandá ya kulemba na nsuka ya kilumbu, kasi, beto vandá na kizunu ya ntima mpe kilengi ya kuzaba ti beto me lutisa ntangu ya beto nyonso na kisalu ya Kimfumu. Beto ke mpe na kilengi na yina beto lutisá bantangu ya kitoko mpe beto kuzwá bakamarade mingi.”—Mrk. 10:29, 30.

9. Mpangi mosi ya kento me lenda kusala yinki ata luzingu ya yandi ke mpasi, mpe yinki yandi kuzwá?

⁹ Beto lenda kuzwa kilengi na kisalu ya Yehova ata luzingu ya beto ke mpasi. Na kifwani, beto zonzila Mirreh, mpangi mosi ya kento yina ke vandá na Afrique de l’Ouest. Mirreh me nuná mpe bakala ya yandi kufwá. Na ntama, yandi vandá doktere. Ntangu yandi kwendá na retraite, yandi banda kisalu ya pionye. Mirreh ke na maladi mosi ya ngolo yina ke salá ti ya ke mpasi na yandi na kutambula. Na yawu, yandi lenda sala kaka ntangu fioti na predikasion ya yinzo na yinzo. Kasi, yandi ke lendá kulutisa ntangu mingi na prezantware. Yandi ke na bantu mingi yina ke sololá na yandi mpe yina yandi ke longá mambu ya Biblia. Na kati ya bawu, ya ke na ba yina ke longoká na yandi na telefone. Samu na yinki Mirreh salá nyonso yayi? Yandi me zonza: “Ntima ya munu ke ya kufuluka na luzolo samu na Yehova mpe Yesu. Bambala mingi mu ke sambilá Yehova sadisa munu na kusala nyonso yina mu ke na ngolo ya kusala samu na yandi.”—Mat. 22:36, 37.

10. Faso ke lakisak’ yawu 1 Piere 5:10, yinki ke kuzwa ba yina ke sosá kusala mingi samu na Yehova?

¹⁰ Beto ke kuzwa formasion samu na kulungisa kisalu ya beto. Kenny, mpangi mosi ya pionye yina ke vandá na Île Maurice kwizá tala ti mambu yayi ke vrai. Ntangu ba longak’ yandi mambu ya Nzambi, yandi biká kulongoka na université, kuzwá bateme mpe bandá kisalu ya pionye ya ntangu nyonso. Yandi me zonza: “Na luzingu ya munu, mu ke sosá kuvanda faso profete Izaya yina zonzá: ‘Munu yandi yayi! Filisa munu!’” (Iza. 6:8) Kenny tulá diboko na bisalu mingi ya kutunga bayinzo ya organizasion. Yandi vandá tulá mpe diboko na kisalu ya traduksion yina ke salamá na ndinga ya yandi. Kenny me zonza: “Mu me kuzwa formasion yina mu vandá na yawu nsatu samu na kulungisa bisalu yina mu vandá sala.’’ Kasi, yandi suká ve kaka na kulongoka faso ya kusala kisalu yina ba pesak’ yandi. Yandi me bwela: “Mu kwizá zaba bima yina lenda vanda mpasi na munu na kusala. Mpe, mu longoká faso ya kukulisa bifu ya mbote yina ke sepelisa Yehova.” (Tanga 1 Piere 5:10.) Nge mpe lenda tala faso ya kuyidika luzingu ya nge samu na kuzwa ntangu ya mingi ya kusala samu na Yehova mpe kuzwa formasion ya yandi.

11. Wapi bangolo salá bampangi ya kento na Corée ya Sud, mpe yinki ba kuzwá? (Tala foto ya kuverture.)

¹¹ Ata ba yina ke sadilá Yehova depwi ntama ke na nsatu ya formasion samu na kumeka bima ya malu-malu. Na kati ya maladi ya coronavirus, bakuluntu ya kimvuka mosi ya Corée ya Sud, soniká mambu yayi: “Bampangi yina vandá lenda ve kusala mingi na predikasion samu ba ke ve na  sante ya mbote, bubu yayi, ba mase salá mingi na nzila ya vidéoconférence. Bampangi ya kento tatu yina me luta bamvula 80 me longoka kusadila ba-ordinatere mpe bubu yayi ba ke sadilá yawu mingi samu na kupreche.” (Nku. 92:14, 15) Nge mpe ke na nsatu ya kusala dyaka ya kulutila samu na Yehova mpe kumeka ntima ya mbote ya yandi? Tala yina nge me bonga kusala samu na kulungisa dikanisi ya nge.

12. Wapi promese Yehova pesá na ba yina ke tula ntima na yandi?

¹² Tula ntima na Yehova. Yehova pesá promese ti yandi ke sala bima mingi ya mbote samu na beto, si beto tula ntima na yandi mpe sala bangolo ya beto nyonso na kisalu ya yandi. (Mal. 3:10) Fabiola, mpangi mosi ya kento na Colombie talá faso mambu yayi lunganá na luzingu ya yandi. Yandi vandá na nsatu ya kukuma pionye ya ntangu nyonso na manima ya bateme ya yandi. Kasi, ni yandi vandá nata mbongo na yinzo samu na kukipe bakala ya yandi na bana tatu yina vandá na bawu. Na yawu, ntangu yandi kwendá na retraite, yandi sambilá mingi Yehova sadisa yandi. Yandi me zonza: “Ya ke baká ntangu mingi na ba yina ke kwendá na retraite na kuzwa pension ya bawu. Kasi ya munu baká kaka ngonda mosi mpe mu bandá kuzwa yawu. Mambu ya faso yayi ke salamá ve!” Bangonda zole na manima, mpangi ya beto kumá pionye. Bubu yayi, yandi me luta bamvula 70, mpe yandi ke pionye depwi bamvula kuluta 20. Na kati ya kisalu ya yandi ya pionye, yandi me sadisa bantu 8 na kukwenda tii na bateme. Fabiola me zonza: “Ata bantangu ya nkaka mu ke vandá ya  kulemba, Yehova ke sadisá munu bilumbu nyonso na kubika ve kisalu ya pionye.”

13-14. Wapi ekzample lenda sadisa beto na kutula ntima na Yehova mpe na kusala mingi na kisalu ya yandi?

¹³ Longoka na ba-ekzample ya ba yina tulá ntima na Yehova. Biblia ke zonzilá bantu mingi yina salá bangolo na kisalu ya Yehova. Mingi ya bawu kuzwá bima ya mbote na Yehova kaka na manima ya kulakisa ti ba vandá tula ntima na yandi. Na kifwani, Yehova kwizá pesa bima ya mbote na Abraham kaka na manima ntangu yandi biká bwala ya yandi, “ata kuzaba [kisika] yina yandi [vandá] kwenda.” (Ebr. 11:8) Jacob kuzwá kima mosi ya nene na Yehova kaka na manima ya kunwana na ange. (Kub. 32:24-30) Ntangu bana ya Izraele vandá kwenda na bwala yina Yehova zolá pesa bawu, ba lendá kuluta masa ya Jourdain kaka ntangu bapretre tulá makulu ya bawu na kati ya maza yango.—Yos. 3:14-16.

¹⁴ Bubu yayi, beto lenda longoka mpe na ba-ekzample ya bampangi ya beto yina lendá kusala mingi na kisalu ya Yehova samu ba tulá ntima na yandi. Na kifwani, mpangi mosi na nkumbu ya Payton mpe kento ya yandi Diana vandá zolá kutanga masolo ya bampangi yina vandá sala mingi samu na Yehova. Masolo yango ya nkaka ke na kati ya seri yina ba ke bokilá “ Ils se sont offerts volontairement. ” * Payton me zonza: “Ntangu beto vandá tangá masolo ya bampangi yina, ya vandá nete beto ke na talá muntu ke na dyá madya ya kitoko. Kutanga mingi masolo yina vandá pesa beto nsatu ya ‘kumeka mpe kutala ti Yehova ke mbote.’” Na manima, Payton na Diana kwendá na teritware yina bantu mingi vandá na nsatu ya kuwa mambu ya Nzambi. Nge me tangá deja baseri yayi? Nge me talá bavideo Prédication dans des régions isolées : Australie mpe Prédication dans des régions isolées : Irlande, yina ke na site ya beto jw.org? Bima nyonso yayi lenda sadisa nge na kuzaba faso nge lenda sala dyaka ya kulutila samu na Yehova.

15. Wa’ faso bandiku ya mbote lenda sadisa beto?

¹⁵ Sola bandiku ya mbote. Ya ke vandá ve mpasi na beto na kumeka madya yina nabunu beto me kudya si beto ke vandá na bantu yina ke sepelá na kudya yawu. Faso mosi mpe, si beto lutisa ntangu mingi na ba yina ke tulá kisalu ya Yehova na plase ya ntete na luzingu ya bawu, ya ke vanda ve mpasi na beto na kusala mpe mingi samu na Yehova. Veronica, na bakala ya yandi Kent talá mpe mambu yayi na luzingu ya bawu. Kent me zonza: “Bandiku ya beto na bantu ya famiye ya beto pesá beto ngolo ya kusala dyaka ya kulutila samu na Yehova. Beto kwizá tala ti kulutisa ntangu na ba yina ke tulá Kimfumu na plase ya ntete sadisá beto na kuvanda ve na boma ya kusala mingi faso bawu.” Bubu yayi, Kent na Veronica ke bapionye spesiale na Serbie.

16. Faso ke lakisak’ yawu disolo ya Yesu na Luke 12:16-21, samu na yinki beto zolá ndima kusala basakrifise?

¹⁶ Ndima kusala basakrifise samu na Yehova. Kusala mingi samu na Yehova zola zonza ve kunata luzingu ya mpasi. (Lon. 5:19, 20) Kasi, si beto manga kusala mingi samu na kunata luzingu ya mbote, beto ke vanda faso bakala yina Yesu zonzá na disolo mosi. Bakala yina vandá sala bangolo mingi samu na kuzwa bima ya mbote, kasi yandi vandá kipe ve Nzambi. (Tanga Luke 12:16-21.) Christian, mpangi mosi yina ke vandá na France me zonza: “Mu vandá pesá kaka ntangu fioti mpe bangolo fioti na kisalu ya Yehova mpe na famiye ya munu.” Yandi na kento ya yandi kuzwá nsatu ya kukuma bapionye. Samu ba lenda kusala yawu, ba zolá katuka na kisalu ya bawu. Na kuzwa mwa mbongo, ba bandá kusala kisalu ya kusukula bayinzo mpe bisika ya nkaka. Mpe ba vandá sepelá  na fioti yina vandá na bawu. Sakrifise yina ba salá futá kwandi? Christian me zonza: “Beto ke na zwá kilengi mingi na kisalu ya Yehova. Kilengi ya kulongoka na bantu mpe ya kuzwa bantu yina ke solola na mambu ya Biblia na beto.”

17. Samu na yinki ya lenda vanda mwa mpasi na beto na kumeka bafaso ya malu-malu ya kupreche?

¹⁷ Meka bafaso ya malu-malu ya kusala bamambu. (Bis. 17:16, 17; 20:20, 21) Shirley, pionye mosi na États-Unis zolá sosa bafaso ya nkaka ya kupreche na kati ya maladi ya coronavirus. Na kubanda, yandi vandá na mwa boma ya kupreche na telefone. Kasi, yandi kuzwá formasion ntangu ntwadisi ya sirkonskription kwizá na kimvuka ya bawu. Bubu yayi, yandi mase preche mingi na telefone. Yandi me zonza: “Na kubanda, ya vanda pesa munu boma. Kasi bubu yayi, mu ke zolak’ yawu mingi. Beto ke na zwá bantu mingi kulutila yina beto vandá kuzwa na predikasion ya yinzo na yinzo!”

18. Yinki lenda sadisa beto na mantwala ya bima yina lenda kanga beto nzila ya kusala mingi samu na Yehova?

¹⁸ Kanisa na yina nge ke sala mpe lungisa dikanisi ya nge. Ntangu beto ke kutaná na bamambu ya mpasi, beto ke sambilá mpe ke kanisá na yina beto lenda sala samu na kuyidika yawu. (Bin. 3:21) Sonia, pionye mosi ya ntangu nyonso na ndinga ya Romani na grupe mosi ya Europe me zonza: “Mu ke zolá kusonika na papiye bamambu yina mu ke sala mpe mu ke tulak’ yawu na kote yina mu lenda tala yawu ntangu nyonso. Na table ya munu, mu salá dessin ya nzila mosi yina ke kabuká na banzila zole. Ntangu mu ke vandá na desizion ya kubaka, mu ke talá nete mu ke na mantwala ya banzila zole. Mpe mu ke kanisá na wapi nzila desizion ya munu lenda nata munu.” Bamambu ya mpasi yina Sonia ke kutaná na yawu ke lembisá ve yandi. Yandi me zonza: ‘‘Bamambu ya mpasi lendá vanda faso mur yina lenda kangá beto nzila to faso pont yina ke sadisá beto na kuluta. Ni munu zolá sola faso ya kutadila yawu.”

19. Yinki beto ke na nsatu ya kusala?

¹⁹ Yehova ke sakumuná beto na bafaso mingi. Beto lenda vutula yandi matondo ntangu beto ke salá nyonso samu na kutalisa yandi kilengi. (Ebr. 13:15) Na kuvutula yandi matondo, beto lenda sala dyaka ya kulutila na kisalu ya yandi, mpe yandi ke pesa dyaka beto bima mingi ya mbote. Bilumbu nyonso, beto sosa bafaso ya ‘kumeka mpe kutala ti Yehova ke mbote.’ Na yawu, beto ke zonza faso Yesu zonzak’ yawu: “Madya ya munu, ni kusala luzolo ya Nzambi yina [filisá] munu mpe kumanisa mbote kisalu ya yandi.”—Yoa 4:34.