1-2. Kuliza nEpisarome 34:8, yisinke natu rugana yipo tu limonene uwa waJehova?

TU TANTE asi gumwe ta ku pe nondya edi wa dira kulya rumwe. Ove kuvhura o dive nondya odo pokuditara, pokufumbwira edumba lyado, pokutara eyi va di ruganesa ntani nokupura ko vamwe nsene nawo va di hara. Nye mokuninka o divilise nawa-nawa nsene asi wa di hara, ntudi wa hepa kudimakera nyamoge.

² Nsene tuna hara kudiva asi Jehova muwa, ntudi twa hepa kuresa Bibeli noyimbapiratjangwa yetu ntani nokupurakena koyihonena yavamwe ava ava simwitire omu Jehova ga va ruganena yininke yoyiwa. Nye mokukwata egano nawa-nawa omu Jehova ga wapa, ntudi twa hepa ku mu ‘heteka’ nyamwetu tu li monene uwa wendi. (Resa Episarome 34:8.) Tu zeni tu ka tare nkedi zimwe omu natu yi rugana. Tu tante asi twa hara kukarera Jehova mosirugana sosiruwo nasinye, nye mokuninka asi tu sikise mo sitambo oso, ntudi twa hepa kurerupika eparu lyetu. Nampo twa resa etumbwidiro lyaJesus asi nsene tu tura Uhompa muhowo, Jehova nga tu pa nayinye eyi twa hepa. Nye nampili ngoso, nampo kapi twa limonena simpe usili wononkango odo. (Mat. 6:33) Nye morwa twa kara nepuro momatumbwidiro gaJesus, ose kuhetekera ko kuruganesa yimaliwa yoyisesu nokusesupika siruwo setu esi atu ruganesa koyirugana ntani nokudemenena kosirugana sokuzuvhisa. Nsene tu yi rugana ngoso, ose ngatu dimburura asi Jehova kutupakera mbili. Monkedi zangoso, ose ngatu limonena nyamwetu uwa waJehova.

3. Kuliza nEpisarome 31:19, wolye ava limonene uwa waJehova?

³ Jehova kuruganena uwa nkenye ogu, nampili ava va dira kumudiva. (Epis. 145:9; Mat. 5:45) Nye unene po age kugava yininke yoyiwa yoyinzi kwava va mu hara ntani ava ava mu karere  nomutjima nagunye. (Resa Episarome 31:19.) Tu zeni tu ka zogere yininke yimwe yoyiwa eyi ga tu ruganena Jehova.

4. Ngapi omu Jehova a likida uwa wendi kwava ava muhedere pepi?

⁴ Nkenye apa atu tura pasirugana eyi atu rongo Jehova, ose kulimonena omu Jehova a tu vatere. Pasihonena, apa atu lirongo kumuhamena ntani nokutameka kumuhara, age kutuvatera tu nyokere po magazaro gomadona ntani noyininke yoyidona eyi ayi dili kumuhafesa. (Koros. 1:21) Apa twa ligeve kwaJehova nokugwana ekuho, ose twa limonena mauwa gomanzi aga ga tu ruganena Jehova. Pasihonena, ose twa kara nezwi lyewa lyokomutjima ntani ga tu vatera tu kare vakaume vendi wovanene.—1 Pet. 3:21.

5. Ngapi atu limonene uwa waJehova mosirugana sokuzuvhisa?

⁵ Nsene tu lihameka mosirugana sokuzuvhisa, ose ngatu limonena uwa waJehova. Ove muntu gonomuga ndi? Sinzi sovakareli vaJehova, nawo nomuga. Nampo komeho oya kare Mbangi zaJehova, ove kapi wa gazarere asi ezuva limwe ngo zuvhisira vantu ava wa dira kudiva nokuvaronga kuhamena Bibeli. Nye ngesi, ove kuyirugana nkenye apa ntani Jehova ga ku vatera o hafere sirugana sokuzuvhisa. Jehova kwa ku vatera hena mononkedi dimwe. Age ga ku vaterere o liture apa gumwe ga ku rwanesere. Age kwa ku vaterere o gwane etjangwa eli wa ruganesere komuntu ogu ga likidire elituromo. Ntani age kwa ku pere nonkondo o twikire nosirugana sokuzuvhisa apa vantu va dilire kuhara kukupurakena.—Jer. 20:7-9.

6. Ngapi edeuro eli atu gwana kwaJehova ali likida uwa wendi?

⁶ Jehova kutulikida hena uwa wendi apa a tu deura komapongo omu natu zuvhisa. (Joh. 6:45) Mepongo lyomokatji kosivike, ose kulironga nonkedi omu natu zuvhisa ntani kutukorangeda tu ruganese magano ogo mokuzuvhisa. Pomuhowo kuvhura tu kare nowoma kuruganesa nonkedi odo donompe mokuzuvhisa. Nye apa atu tura pasirugana magano ogo, ayo kututompoka nawa mokuzuvhisa. Komapongo nokoyigongi kutukorangeda hena tu heteke kuruganesa nonkedi dokulisiga-siga edi twa dira kuruganesa rumwe mokuzuvhisa. Eyi nayo kuvhura kutuninkisa tu kare nowoma. Nye apa atu yi heteke, Jehova kutuvatera. Tu zeni tu ka tare yininke yimwe yoyiwa eyi atu gwana apa atu hetekere ko kutura pasirugana nonkedi donompe, yipo tu ruganene Jehova paapa twa hulira kuliza noukaro wetu. Ano konyima natu ka zogera omu natu tamununa sirugana setu sokuzuvhisa.

7. Mauwa musinke atu gwanene mo apa atu hetekere ko kutamununa sirugana setu?

⁷ Ose kuhedera unene pepi Jehova. Tu zeni tu tare sihonena somukuronambunga gumwe gedina Samuel, ogu ga tunga moColombia namukadendi. * Valikwali owo ngava hafere uzuvhisi wokukarerera mombungakriste zawo, nye awo kwa here kutamununa sirugana sawo yipo va ka vatere mombungakriste zapeke oku kwa hepere evatero. Mokuninka asi yi va tompoke oyo, awo va hepere kutura po malizambero. Samuel kwa uyunga asi: “Ose kwa tulire pasirugana etjangwa lyaMateusa 6:33 ntani twa ya hagekere kurandanga yininke eyi twa dilire kuhepa. Nye ayo kwa tu digoperere kusiga embo lyetu. Morwa alyo kwa lidikire moomu twa li harerere. Ntani kapi twa kere nomakongo galyo.” Apa valikwali owo va ka sikire mosirugana sawo sosipe kombungakriste zompe, awo kwa ka dimbwilire asi kapi va hepere yimaliwa yoyinzi. Samuel kwa tanta asi:  “Ose twa yi limonena omu Jehova ga tu vatera ntani nomu ga limburura makanderero getu. Ose ngesi kulimonena eharo lyaJehova mononkedi dokulisiga-siga.” Kuvhura o tamunune sirugana soge sokuzuvhisa ndi? Nsene o yi rugana, ove ngo hedera unene pepi Jehova ntani nga ku pa eyi wa hepa.—Epis. 18:25.

8. Yisinke ono lirongere ko kweyi ga uyungire Ivan naViktoria?

⁸ Sirugana setu kutuhafesa. Tu tareni nonkango edi ga uyunga Ivan naViktoria, valikwali ava ava rugana uzuvhisi wokukarerera moKyrgyzstan. Awo kwa rerupikire eparu lyawo yipo valizambere mwankenye sirugana esi vava pere kukwatera mo sirugana sokutunga matungo. Ivan kwa tanta asi: “Ose kwa litulire mo unene mwankenye sirugana esi va tu pere. Nampili ngomu ngatu lizuvhu eroroko, ose kwa kere noruhafo morwa twa ruganesere nonkondo detu mosirugana soUhompa. Ose hena kwa hefe morwa twa tulisire po vakaume wovape ntani twa haferere yininke eyi ngatu rugana kumwe.”—Mar. 10:29, 30.

9. Yisinke va rugana vanavazinyetu vamwe ava va kara nomaudigu yipo va tamunune sirugana sawo ntani yitundwamo musinke va limonena?

⁹ Ose kugwana ruhafo mosirugana saJehova nampili ngomu atu ligwanekere nomaudigu. Pasihonena, mufisayendi gomukurupe gedina Mirreh, ogu ga tunga koutokero waAfrika, kwa hagekere sirugana sendi soundokotora nokutameka uzuvhisi wokukarerera. Mirreh kwa kara nouvera ou au muninkisa yi mu digopere kugenda ntani age kukara vili zimwe tupu mosirugana satunda embo zende embo. Nye age kuruganesa siruwo sendi sosinzi a zuvhise nositoroli ndi nositafura. Age ga kara nomatengwiroko gomanzi ntani novarongwa woBibeli ano vamwe kuzogera nawo kupitira koterefona. Yisinke ayi tumangeda Mirreh a liture mo unene mosirugana saJehova? Age kwa tanta asi: “Ame na hara unene Jehova naJesus Kristusa. Ame kukanderera nkenye apa kwaJehova yipo a vatere nge ni lihameke mo unene mosirugana sendi paapa na hulira.”—Mat. 22:36, 37.

10. Kuliza na-1 Peturusa 5:10, mauwa musinke ava gwana ava ava tamununa sirugana sawo?

¹⁰ Ose kugwana edeuro lyokutunda kwaJehova. Kenny muzuvhisi gokukarerera ga kara moMauritius, ga limonena nonkango odo asi usili. Apa ga lirongere usili, age kwa hagekere sure kounivesiti nokugwana ekuho ntani nokutameka sirugana sosiruwo nasinye. Age kwa tanta asi: “Ame ngani hetekere ko kuparuka ngwendi muporofete Jesaya ogu ga uyungire asi: ‘Nyame ogu, tuma nge!’” (Jes. 6:8) Kenny nga rugana yirugana yokulisiga-siga yokudika matungo ntani ga vaterere kutoroka yimbapiratjangwa meraka lyawo. Kenny kwa tanta asi: “Ame kwa gwene edeuro eli lya vatera nge nisikise mo yirugana yange.” Nye yinzi ga lirongere kupitakana tupu kudiva sirugana sendi. Age kwa tanta hena asi: “Ame naya dimbwilire yininke eyi nani dira kuvhura kusikisa mo ntani naya dimbwilire yikara eyi nani vhura kutunga po yipo nikare mukareli gwaJehova gomuwa.” (Resa 1 Peturusa 5:10.) Nove kuvhura o konakone ukaro woge o ture po malitjindjo yipo Jehova a ku deure unene.

11. Elizambero musinke va tulire po vanavazinyetu wovakadi womoKorea yipo va lihameke mokuzuvhisa ntani yitundwamo musinke ya kere? (Tara efano lyopontunda.)

¹¹ Nampili vanavazinyetu ava vazuvhisa siruwo sosire, nawo kugwanena mo uwa medeuro yipo va zuvhise mononkedi dokulisiga-siga donompe. Posiruwo souvera woCorona, vakuronambunga womombungakriste zaKorea kwa tjenge asi: “Vamwe ava va gazarere nare asi kapi tava vhuru kulihameka mokuzuvhisa morwa kuvera-vera, ngesi kuna kulihameka mo kupitira moyikwakonentu. Vanavazinyetu vatatu wovakadi wonomvhura dokupitakana po-80, kwa lironga omu nava ruganesa kompiuta  mokuzuvhisa. Ano awo ngesi kuzuvhisa hambara nkenye ezuva.” (Epis. 92:14, 15) Ono hara kutamununa sirugana soge sokuzuvhisa ntani noku limonena uwa waJehova momunene ndi? Tu zeni tu ka zogere yininke yimwe eyi wa hepa kurugana yipo o sikise mo sitambo oso.

12. Yisinke ga tumbwidira Jehova kwava ava huguvara mwendi?

¹² Huguvara mwaJehova. Age kwa tumbwidira asi ngatu ruganena yininke yoyiwa nsene tu huguvara mwendi ntani noku muruganena paapa twa hulira. (Mara. 3:10) Munazinyetu gomukadi Fabiola ogu ga tunga moColombia ga limonena omu Jehova ga sikisa mo etumbwidiro eli. Age kwa here kukara muzuvhisi gokukarerera konyima tupu zokugwana ekuho. Nye ga hepere kurugana yipo a rere epata lyendi omu mwa hamenene mugara gwendi novana vawo vatatu. Komeho a hageke yirugana, age kwa kanderere unene kwaJehova yipo a mu vatere. Age kwa tanta asi: “Rorunzi, yimaliwa yopensiyuni kugusa siruwo, nye yange ame kwa yi gwene konyima tupu zokwedi kumwe apa na tulire mo ehundiro. Ayo kwa kere sitetu sili.” Konyima zomakwedi gavali yipo ga tamekere uzuvhisi wokukarerera. Age kwa rugana uzuvhisi wokukarerera nomvhura dokupitakana po-20. Ano ngesi nomvhura dendi da pitakana po-70. Monomvhura nadinye odo, age kwa vatera vantu 8 va gwane ekuho. Age kwa tanta asi: “Nampili ngomu ani dili kukara nononkondo poyiruwo yimwe, Jehova kuvatera nge nkenye ezuva ni twikire nouzuvhisi wokukarerera.”

13-14. Yihonena musinke nayi kuvatera o huguvare mwaJehova nokutamununa sirugana soge?

 ¹³ Lirongera ko koyihonena yava va huguvarere mwaJehova. MoBibeli mwa kara yihonena yavamwe ava ngava rugana unene mosirugana saJehova. Momaukaro gomanzi, vakareli vaJehova va hepere kurugana ko yuma komeho ava tungike. Pasihonena, Jehova kwa tungikire Abirahamu konyima zapa ga sigire embo lyendi aze kevango oku ga dilire “kudiva.” (Heb. 11:8) Jakopo kwa gwene etungiko konyima zapa ga likondjesere nomuengeli. (Gen. 32:24-30) Apa Vaisraeli va kere pepi nokuhwilira moSirongo sEtumbwidiro, awo kwa tagurukire mukuro gwaJorodana konyima tupu zapa vapristeli va tupikire nompadi dawo momukuro gwaJorodana.—Jos. 3:14-16.

¹⁴ Ove kuvhura hena o lirongere ko koyihonena yovakareli vaJehova womosiruwo setu ava va mu huguvara ntani ava va tamununa sirugana sawo sokuzuvhisa. Pasihonena, munazinyetu Payton namukadendi Diana ngava hafere kuresa yihorokwa yovanavazinyetu ava va tamwinine sirugana sawo, ava va simwitira koruha “Awo kwa ligeve vene.” * Payton kwa tanta asi: “Apa ngatu resa yihonena yawo, ose kwa lizuvhire ngwendi kuna kutarera muntu ogu ana kulya nondya doutovara. Ngomu twa yi resere siruwo sosire, yimo hena ya tu ninkisire tu kare neharo lyokuheteka tu ‘tare omu Jehova ga wapa.’” Ano konyima, Payton naDiana kwa dirukilire kosirongo oku va hepere vazuvhisi. Nove wa resa yirongwa oyo ya zogera kuhamena vanavazinyetu ndi? Nove wa tarera novidiyo dosiparatjangwa asi: Kuzuvhisira komukunda gokoure moAustralia ntani Witnessing in Isolated Territory Ireland edi da kara ko jw.org? Novidiyo edi kuvhura di kuvatere o dive omu no tamununa sirugana soge.

15. Ngapi kutulisa po vakaume wovawa ayi tu vatere?

¹⁵ Tulisa po ukaume nava va tura sirugana saJehova muhowo. Ayo ureru kulya nondya edi twa dira kulya rumwe, unene po nsene tu kara navamwe ava ava di hafere kudilya. Mokulifana, nsene tu tulisa po ukaume nava va tura muhowo sirugana saJehova meparu lyawo, ayo ngayi tu rerupira nose kutamununa sirugana setu. Munazinyetu Kent namukadendi Veronica kwa limonena usili wononkango odo. Kent kwa tanta asi: “Vakaume vetu novanekoro kutukorangeda tu heteke nonkedi dokulisiga-siga yipo tu tamunune sirugana setu. Ose kwa dimburura asi apa atu tulisa po ukaume nava ava tura Uhompa muhowo, kututumangeda tu heteke nonkedi donompe yipo tu tamunune sirugana setu.” Kent namukadendi Veronica, ngesi kuna kara vazuvhisi wosiruwo nasinye moSerbia.

16. Kuliza nosifanekeso saJesus esi sa kara mwaRukasa 12:16-21, morwasinke natu tulira po malizambero?

¹⁶ Tura po malizambero. Kuhafesa Jehova kapi ayi tanta asi twa hepa kusiga yininke nayinye eyi atu hafere. (Muud. 5:19, 20) Nye nsene tu dira kurugana unene mosirugana saJehova morwa kapi tuna hara kusiga yininke eyi atu hafere, ose ngatu kara ngwendi mugara gomosifanekeso saJesus ogu ga kere noyininke yoyinzi meparu nye kapi ga kere nosinka kuhamena Karunga. (Resa Rukasa 12:16-21.) Munazinyetu gomugara Christian ogu ga tunga moFransa kwa tanta asi: “Ame kapi na ruganesere siruwo sange sosinzi nononkondo dange paapa nahulira kwaJehova ntani kepata lyange.” Nage namukadendi kwa tokwere kutameka kurugana uzuvhisi wokukarerera. Nye mokusikisa mo sitambo oso, va hepere kuhageka yirugana yawo. Awo kwa tamekere ngesefa zokuzeresa yipo va lirere vene. Ntani yava gwanenene  po yimaliwa yoyisesu eyi ngava gwana. Elizambero eli va tulire po lyava reterere uwa ndi? Christian kwa tanta asi: “Ose kuhafera unene kuzuvhisa ntani kutuhafesa apa atu mono varongwa woBibeli nomatengwiropo kuna kulironga kuhamena Jehova.”

17. Yisinke ayi tu ninkisa tu dire kuheteka nkedi zompe zokuzuvhisa?

¹⁷ Kara neharo lyokuheteka nonkedi dapeke dokuzuvhisa. (Yirug. 17:16, 17; 20:20, 21) Muzuvhisi gokukarerera gedina Shirley ogu ga tunga moAmerika, ga hepere kurundurura nkedi zendi zokuzuvhisa posiruwo souvera woCorona. Pomuhowo age kwa kere nowoma wokuzuvhisira koterefona. Ano konyima zapa ga gwene edeuro komutareli gwawo gonombunga apa gaya va dingwire, age kwa tamekere kuzuvhisira koterefona nkenye apa. Age kwa tanta asi: “Pomuhowo, ame kwa kere nowoma, nye ngesi ame kuna kuhafera nkedi ezi. Ose ngesi kuna kuzuvhisira vantu wovanzi kupitakana vantu ava ngatu zuvhisire nare tunda embo zende embo!”

18. Yisinke nayi tu vatera nsene koyili yina kutukondera kutamununa sirugana setu sokuzuvhisa?

¹⁸ Litulira po sitambo ntani hetekera ko ku si sikisa mo. Apa atu ligwanekere nomaudigu, ose kukanderera yipo tu gwane evatero ntani nokugazadara ko eyi natu vhura kurugana. (Yis. 3:21) Muzuvhisi gokukarerera gedina Sonia ogu ga kara mombunga zoruRomany moEuropa kwa tanta asi: “Ame kwa hara kutjanga yitambo yange posipepa nokusitura poruzera, yipo yi karere nge ureru kusimona. Positafura sange kwa kara po karata ezi va faneka nonzira mbali edi da vyuka komaruha gokulisiga-siga. Apa ani hara kutura po etokoro lyongandi, ame kutara nonzira mbali odo nokugazadara ko nsene etokoro lyange nali vatera nge ni sikise mo sitambo sange ndi hawe.” Sonia kuhetekera ko kukara nomutaro gomuwa kuhamena maudigu aga a ligwanekere nago. Age kwa tanta asi: “Ame kutara nkenye ukaro woupe ou ani piti ngwendi ekuma eli nali konderange ni dire kusikisa mo sitambo sange ndi zangata ezi nazi vatera nge nisikise mo sitambo sange.”

19. Ngapi natu yi likida asi twa kara norupandu koyininke eyi ga tu ruganena Jehova?

¹⁹ Jehova kututungika mononkedi dokulisiga-siga. Ose kuvhura kulikida rupandu koyininke yoyiwa eyi a tu pe pokurugana paapa twa hulira tu mu yererepeke. (Heb. 13:15) Ose kuvhura tu rugane yininke yokulisiga-siga mokukarera Jehova. Ano konyima, age nga tu tungika. Nkenye ezuva, tu hetekeni nonkedi dokulisiga-siga yipo tu ‘tare omu Jehova ga wapa.’ Nsene tu yi rugana, ose ngatu kara ngwendi Jesus ogu ga uyungire asi: “Nondya dange dedi dokurugana mpango zogu ga tuma nge nedi dokusikisa mo sirugana sendi.”—Joh. 4:34.