1-2. Tintwari na Mikunga 34:8, bwe tulendi longokela mu zaba mbote ya ku mutima ya Yehova?

BANZA’ETI, ngano nti sa tala ti bakuheni tima ti weka lembo dia. Mu zaba tio, lendi toko tia taluzula, tia nukuta, lendi yula ka bwe balambiri tio, peleko lendi yula mabanza ma bantu bakaka bazebi tio. Kâ, mpila ya yimosi yi zabila tala ti tia zololo, ni mu bimba tio.

² Tulendi longoka ti Yehova wa mbote wena, bu tutangaka Bibila na mikanda mieto na bu tuwirikilaka bantu bazonzelaka tusakumunu tu babaka twatûka kwe Yehova. Kâ mbo tukwizi tomo bakula ka bwe Yehova kena tala ti ‘tubimbiri’ mbote’andi ya mutima beto beni. (Tanga Mikunga 34:8.) Tazonzeleno tifwani titusongela ka ntia mpila tufweti sila bo. Kampe tuzololo tasarila Yehova mu tisalu tia ntangu zazansoni, kâ mu lungisa kani dio, wufwanakane tahombesa bima biakaka. Kampe tweka tanga kani dia Yezu ditâka ti tala ti tutûriri Timfumu tia Nzambi ha tibuka tia ntete, Yehova mbo katuhana bima biabiansoni bie neto nsatu, kâ beto beni kani kabwe ka tweka’eti mona mpila yi lungananaka kani dio ko. (Mat. 6:33) Bu tubâka na timinu mu kani dia Yezu, ka tukwenda sumbi bima sumba buna ko, ka tuyôkesaka ntangu yayingi ku tisalu ko, mpe mbo tutûlaka mabanza meto mu tisalu tia samuna. Bu tusilaka bo, mbo tumonaka beto beni ti Yehova nsatu zeto za kakipaka. Mbo tubimbaka mbote ya ku mutima ya Yehova beto beni.

3. Tintwari na Mikunga 16:1, 2, nani bakaka mbote ya ku mutima ya Yehova?

³ Yehova wa mbote wena kwe bantu babansoni, ni bu sa ti kwe bantu balembolo mu zaba. (Mik. 145:9; Mat. 5:45) Kâ, nsungula bantu bô bazololo Yehova, mpe bamusarilaka mu tilundi  tiawu tiatiansoni, mbo babakaka tusakumunu twatwingi tutûkaka kwe Yandi. (Tanga Mikunga 16:1, 2.) Tazonzeleno mpila zakaka zi tulendi mwina mbote ya ku mutima ya Yehova.

4. Ngano Yehova bwe kasongelaka mbote’andi ya ku mutima kwe bô babatikaka mu pusana kwe Yandi?

⁴ Ntangu zazansoni zi tusarilaka misamu mi tulongokaka mu Yehova, mbo tumonaka ndandu za zibote mu luzingu lweto. Bu talongoka mu mu zaba na mu mu zolo, watubakisa mu telamana mabanza na nsalulu zeri tu hambasaka na Yandi. (Kol. 1:21) Bu tatihana kwe Yandi, mpe bu tabatusu tayizi mona mbote’andi ya ku mutima, wayizi tu hana ngindu ya mbote, mpe wasa ti tabâ na tindiku tia ngolo na Yandi.​—1 Pi. 3:21.

5. Bwe tulendi mwina mbote ya ku mutima ya Yehova mu tisalu tia samuna?

⁵ Mbo tutatamanaka mu mona mbote ya ku mutima ya Yehova, bu tusalaka tisalu tia samuna. Ngano nge muntu wa yembama wena? Bisari bia Yehova biabingi bie bia yembama. Kampe ntete wabâ tisari tia Yehova, ka weri’â banzaka ko ti mbo waketi kwe konkota ha mwelo wa muntu wu walembo zaba mu mu zonzela nsangu zi lembo tambulaka bantu babingi. Kâ, lumbu ti ni bo vulu saka. Na lubakusu lwa Yehova, wayizi zolo tisalu tia samuna! Yehova wayizi ku bakisa mpe mu mpila zakaka. Wakubakisa mu bâ na tidzunu mu ntangu muntu weri ku telamanaka. Wakubakisa mu bambukila verse ya mbote mu zonzela yo kwe muntu wazolo mu ku wirikila. Mpe wakuhana ngolo mu tatamana mu samuna, mu ntangu bantu yi beri lembo zoloko mu wâ nsangu zaku.​—Yer. 20:7-9.

6. Bwe mpila Yehova yi katukubikilaka yisongelaka mbote’andi ya ku mutima?

⁶ Yehova mbo katusongelaka mpe nsayi’andi ya ku mutima, bu katukubikaka mu tisalu tia samuna. (Za 6:45) Ku lukutakanu, mbo batuhanaka bifwani bia mbote bisongelaka mpila yi tulendi sila bimoko bu tusamunaka, mpe mbo batutindisaka mu sarila bio mu tisalu tia samuna. Ku mbatukulu, kampe mbo tubâka na bunkuta mu yêla mpila ya môna, kâ bu tukwizi yêlaka, mbo tukwizi monaka ti mpila ya mbote yena mu bungu dia bantu ba mu teritware. Ku tukutakanu twa timvuka na twa tunene, mbo batutindisaka tasarila mpila zakaka za swaswana zi talembo toko sarila. Musamu wo mpe wulendi tutâ bunkuta, kâ bu tuyêla mu sarila mpila zo, Yehova mbo katusakumuna. Tataluzuleno tusakumunu tu tubakaka tutûka kwe Yehova mu ntangu yi tusarilaka mpila za môna na ngolo zeto zazansoni ntono misamu mieto. Ha manima, mbo tuzonzela mpila yi tulendi lungisila makani meto.

7. Ntia tusakumunu tubakaka mu ntangu yi tukurisaka tisalu tieto tia samuna?

⁷ Mbo tutomo pusanaka kwe Yehova. Tataleno tifwani tia Samuel, * we mukuluntu ku Colombie na mukento’andi. Bantu bo ba kwelana nsayi yayingi yeri nawu mu timvuka tiawu bu beri mipasuri-nzila, kâ weri nawu bakurisa tisalu tiawu tia samuna bu baketi kwe bakisa timvuka timosi tieri dinganaka bisamuni. Mu lungisa kani dio, bayizi hombesa bima biawu biakaka. Samuel têle ti: “Tayizi sarila mabanza ma Matie 6:33 mpe tayizi bika mu sumba bima bilembolo salu. Kâ musamu wa nguria wa mpasi ni mu sisa nzo’eto yi batunga mu mpila yi tweri zoloko, mpe ka tweri’â na mfuka ko mu bungu dia nzo yo.” Bu beri mu timvuka tiawu tia môna, bayizi bakula ti ka beri’â na nsatu mbongo zazingi  ko ntiana mu ntama. Samuel têle ti: “Tayizi mona ka bwe Yehova katutwarisilaka, mpe kahaninaka mvutu mu tusambulu tweto. Mbo tumonaka ti beto katambulaka, mpe mbo tumonaka luzolo lwandi mu mpila yi talembo toko lwa mwina.” Ngano lendi kurisa tisalu tiaku tia samuna mu mpila yo peleko mu mpila zakaka? Tala ti ni bo, lendi bâ na lukwikulu ti mbo kwizi bâ penepene na Yehova, mpe mbo kakukipa.​—Mik. 18:25.

8. Nti ta longoka mu misamu mi têle Ivan na Viktoria?

⁸ Mbo tumonaka nsayi mu tisalu tieto. Tataleno misamu mia tâ Ivan na Viktoria, bê ba kwelana, mpe bê mipasuri-nzila ku Kyrgyzstan. Batatamana mu bâ na luzingu lulembolo na nkaka ngatu batihana mu tisalu ni tisalu, ni bu sa ti mu tisalu tia ntungulu ya Nzo za Nsambululu. Ivan têle ti: “Mbo tweri tomo tihanaka mu bisalu biabiansoni bi beri tu hanaka. Tidzunu na nsayi yeri neto mu bungu ti mbo tweri bakulaka ti ntangu na ngolo zeto tusariri mu tisalu tia Timfumu. Tayizi baka mpe nsayi mu bindiku bia mbote na mu misamu mia mbote mi tayôkesa.”​—Mak 10:29, 30.

9. Bwe mpangi yimosi ya yikento ye na misamu mia mpasi kasa mu kurisa tisalu tiandi tia samuna, mpe ntia ndandu zamoneka?

⁹ Mbo tubakaka nsayi mu tisalu tia Yehova ni bu sa ti misamu mia mpasi mie neto. Tabongeno tifwani tia Mirreh, weri doktere, we mpangi ya nuna, mpe we mufwiri, bâka ku Afrique de l’ouest; bu kayizi bâ ku retraite wayizi bâ mupasuri-nzila. Mirreh timbevo tie nandi tia ngolo tisaka ti kamona mpasi mu kwe yende, mpe heure yimosi kwa kalendi yôkesa mu tisalu tia samuna tia nzo na nzo. Kâ, lenda die nandi dia yôkesa ntangu yayingi ha prezentware. Vizite na ndongokolo za Bibila zazingi ze nandi, bakaka mbo bamokaka mu telefone. Nti biatuma Mirreh mu sala tisalu tiatingi mu bungu dia Yehova? Têle ti: “Mutima’ani mbo wusampaka mu luzolo lwa Yehova na lwa Yezu Kristo. Mpe mbo nivulu sambilaka Yehova kakumbakisa mu sa miamiansoni mi nilenda mu tisalu tiandi.”​—Mat. 22:36, 37.

10. Ntiana bu songele wo 1 Piere 5:10, bantu basalaka tisalu tiatingi mu bungu dia Yehova nti babakaka?

¹⁰ Yehova mbo katukubikaka mu mpila zakaka. Kenny we mupasuri-nzila ku Île Maurice, mbo kamonaka ti musamu wo wa matieleka wena. Bu kayizi zaba matieleka, wakatuka ku universite, wayizi batusu, mpe wabatika mu sala tisalu tia ntangu zazansoni. Têle ti: “Mbo nisarilaka ngolo mu landa misamu mia tâ mbikuri Izaya, watâ ti: ‘Ewu ni meno! Kuntambika!’” (Iza. 6:8) Kenny wasala mu bisalu biabingi bia ntungulu, wabakisa mpe mu mbangululu ya mabuku masikamanaka mu Bibila mu zu diandi. Kenny têle ti: “Nayizi baka formasio mu bâ na lenda dia sala bisalu bi beri kunganaka.” Kâ ka longoka kwa mu sala bisalu bio ko. Vutulu tâ ti: “Nayizi longoka mu zaba ndiku zani na mu bâ na bifu bie nani nsatu ngatu nabâ tisari tia Yehova tia tibote.” (Tanga 1 Piere 5:10.) Ngano lendi sa nsobolo mu luzingu lwaku ngatu Yehova kakukubika mu mpila zakaka?

11. Ntia ngolo mpangi za zikento ze ku Corée du Sud zayizi sarila mu sala tisalu tia samuna, mpe ntia ndandu zamoneka? (Tala tifwani ha tinima tia ntete.)

¹¹ Bantu bê Mbangi za Yehova tûka mvula zazingi, mbo babakaka mpe formasio bu basalaka bisalu biakaka bia môna mu tisalu tia Yehova. Mu ntangu ya coronavirus, bakuluntu ba timvuka timosi ku Corée du Sud batsoneka ti: “Bantu bakaka beri banzaka ti ka baketi’â lenda ko mu sala tisalu tia samuna mu teritware mu bungu ti ka bena ba wasa ko, bwawu bu tia bata sala mu nzila ya vidéoconférence. Mpangi zitatu za zikento ze na mvula yôka 80, bayizi longoka mu sarila ordinateur, mpe bwawu bu mbo basalaka tisalu  tia samuna bilumbu biabiansoni.” (Mik. 92:14, 15) Ngano zololo wakurisa tisalu tiaku, mpe wavutu mona ti Yehova wa nguria wa mbote wena? Tataluzuleno mwa misamu mi lendi yirika mu lungisa kani dio.

12. Yehova nti kakanisini kwe bô bamusikirilaka?

¹² Longoka mu sikirilaka Yehova. Watukanisina mu tu sakumuna tala ti tumusikiriri, mpe tumuheni bima bieto bia mfunu. (Mal. 3:10) Mpangi ya yikento ye na nkumbu Fabiola, bâka ku Colombie wamona ti Yehova walungisa kani dio. Wazolo ti kabâ mupasuri-nzila ntangu fioti ha manima ma bateme’andi. Kâ, wafwanakana kasala mu bakisa kanda diandi. Ntiangu bu kayizi bâ retraitée, wayizi sambila Yehova mu baka lubakusu. Têle ti: “Ntangu yayingi yifwanakanaka ngatu bantu babaka pension’awu, kâ meno nabatika mu baka pension’ani ha manima ma ngonda mosi bu namana kotesa mikanda. Nkatika timangu tieri!” Ha manima ma ngonda zole, nayizi bâ mupasuri-nzila. Bwawu bu mvula yôka 70 ze nandi, mpe mupasuri-nzila wena tûka mvula 20. Tûka ntangu yo, bantu 8 keka bakisa mu batusu. Têle ti: “Ni bu sa ti ntangu zakaka ka nibâka na ngolo ko, Yehova mbo kakumbakisaka bilumbu biabiansoni mu zitisa programe’ani.”

13-14. Ntia bifwani bilendi tu bakisa mu sikirila Yehova na mu sala tisalu tiatingi?

 ¹³ Longoka mu bifwani bia bô basikirila Yehova. Bibila bifwani biabingi dizonzelaka bia bantu batihana mu tisalu tia Yehova. Bantu babingi babaka lusakumunu lwa Yehova, bu bamana sa tima tiasongela ti Yandi beri sikirilaka. Mu tifwani, Abrahame bu kamana sa sisa nzo’andi​—ni bu sa ti keri’â zabaka ko ka ntia kuma keri kwendaka​—ha manima Yehova wamusakumuna. (Ebr. 11:8) Yakobe bu kanwana na mbazi, ha manima wabaka lusakumunu lwa nzitukulu. (Mba. 32:24-30) Ni mu ntangu kwa Nganga za Nzambi bu zatûla malu mu nto ya Zurde, bala ba Israele babâ na lenda mu kota ku mutoto wa kani.​—Yos. 3:14-16.

¹⁴ Lendi mpe baka ndandu mu bifwani bia Mbangi za Yehova za lumbu ti zamusikirila, mpe zasala tisalu tiatingi mu bungu dia Yandi. Mu tifwani, mpangi ye na nkumbu Payton na mukento’andi, Diana, bazolo mu tangaka binsamu bia mpangi zakurisa tisalu tiawu mu bungu dia Yehova ntiana bô ba bazonzelaka mu bimoko bia “Ils se sont offerts volontairement.” * Payton têle ti: “Bu tutangaka binsamu biawu, mbo tumonaka ntiana beto tuta tala muntu wuta dia bidia bia toma. Bu tukwe tari, mbo tuzoloko mu ‘bimba, mpe mu mona ti Yehova wa mbote wena.’” Buna, Payton na Diana baduka mu kwe hana lubakusu mu mbuka yeri dinganaka bisamuni. Ngano bimoko bio bia weka tanga? Mpe ngano weka tala video ya Prédication dans les régions isolées​—Australie na Prédication dans les régions isolées​—Ireland ze mu jw.org? Bisalulu bio bilendi ku bakisa mu kurisa tisalu tiaku.

15. Bwe bindiku bia mbote bilendi tu bakisila?

¹⁵ Sola ndiku za zibote. Mbo tuzoloko mu bimba bidia bi tweka lembo dia tala ti na bantu bazololo bio twena. Mpila mosi mpe, tala ti tindiku tusaka na bantu badingaka mu sala tisalu tiatingi mu bungu dia Yehova, mbo tuzolo mpe mu dinga mu kurisa tisalu tieto mu bungu dia Nzambi. Kent na Veronica bê ba kwelana bamona ti musamu wango wa matieleka wena. Kent têle ti: “Ndiku zeto na kanda dieto batutindisa mu yêla mu sala bisalu bia môna. Tayizi bakula ti bu tusaka tindiku na bantu batoko tûlaka Timfumu tia Nzambi ku matu, mbo tukwizi bakaka lukwikulu lufwanakane mu yêla mu sa tima tia môna.” Bwawu bu, Kent na Veronica mipasuri-nzila mia minene miena ku Serbie.

16. Ntiana bu ta wa songela tifwani tia Yezu tie mu Like 12:16-21, mu bungu dia nti tufweti bâ ba kubama mu hombesa bima?

¹⁶ Tambula mu hombesa bima mu bungu dia Yehova. Ka twena na nsatu ko ya hombesa bima bieto biabiansoni bitutâka nsayi mu yangirika Yehova. (Ekl. 5:19, 20) Kâ, tala ti ka tuta zolo ko mu sala bwabwingi mu tisalu tia Nzambi, mu bungu ti ka tuta zolo ko mu hombesa bima, mbo tubâ ntiana muntu wazonzela Yezu weri sarilaka ngolo zandi mu baka bima biabingi bia mbote, kâ weri yambirikaka Nzambi. (Tanga Like 12:16-21.) Mpangi ya yibakala ye na nkumbu Christian, bâka ku France, têle ti: “Ntangu’ani yayîngi na ngolo zani ka ndieri’â ya hanaka kwe Yehova ko na kwe kanda diani.” Yandi na mukento’andi bayizi bonga nzengolo ya bâ mipasuri-nzila. Kâ, mu lungisa kani dio, bafweti bika bisalu biawu. Mu lungisa nsatu zawu, babatika mu sala tisalu tia fioti tia kwe se bunkete, mpe balongoka mu yangalala mu mbongo za fioti. Ngano mu nsayi bena mu bungu ti bahombesa bima biakaka mu bâ mipasuri-nzila? Christian têle ti: “Mbo tuyangalalaka mu tisalu tieto tia samuna, mpe mbo tutomo yangalalaka bu tumonaka milongoki mia Bibila na bantu ba tuvutu kwe talaka bata longoka misamu mitariri Yehova.”

17. Mu bungu dia nti wulendi bâ musamu wa mpasi kwe beto mu yêla mpila za samunina za môna?

 ¹⁷ Bâ wa kubama mu yêla mpila za môna za samunina. (Bis. 17:16, 17; 20:20, 21) Shirley, we mupasuri-nzila ku États-Unis, wafwanakana kadelakasa tisalu tiandi tia samuna mu ntangu ya coronavirus. Ha mbatukulu, mbo keri tînaka mu samuna mu telefone. Ha manima, mu ntangu munkengi wa tizunga kayizi tala timvuka, wabaka formasio, mpe wabatika mu samunaka mu nzila ya telefone ntangu zazansoni. Têle ti: “Ku mbatukulu, ka weri’â musamu wa fioti ko, kâ bwawsu bu, mu nsayi ndiena. Mbo tubakaka bantu babingi yôka bô ba tubwabanaka na bo mu tisalu tia nzo na nzo!”

18. Ngano nti bilendi tu bakisa mu telamana misamu mia mpasi mu ntangu yi tudingaka mu kurisa tisalu tieto?

¹⁸ Bâ na makani, mpe yêla mu lungisa mo. Bu tubwabanaka na misamu, mbo tusambilaka mu baka lubakusu, mpe mbo tubanzaka mu mpila yi tulendi mia yirikila. (Bin. 3:21) Sonia, we mupasuri-nzila wa ntangu zazansoni, mpe yikaka moko mu tikunku (groupe) tia zu dia Roumain ku Europe, têle ti: “Mbo nizoloko mu tsoneka makani mani mu papier, mpe mbo nitûlaka yo ha tibuka ti ndendi ya mwina. Ha table’ani, nzila zole badesena za swaswana. Mu ntangu yi nibongaka nzengolo, mbo nitalaka nzila zo za zole, mpe mbo nibanzaka ka bwe nzengolo’ani yilendi kumbakisila mu lungisa kani diani peleko kâni.” Sonia mbo katatamanaka mu bâ na mabanza ma delakana mu misamu mia mpasi mi kabwabanaka na mio. Têle ti: “Nayizi bonga nzengolo ya mona ti nsobolo ya misamu yilendi kunkabakasa peleko yilendi kunziburila nzila yikumbakisa mu lungisa kani diani.”

19. Bwe tulendi tondela Yehova mu bungu dia tusakumunu tu katuhanaka?

¹⁹ Yehova mbo katusakumunaka mu mpila zazingi. Tulendi songela ti tusakumunu to twa tuzoloko bu tusa miamiansoni mi tulenda mu mu tâ nsayi. (Ebr. 13:15) Tulendi bâ na lenda dia yirika misamu miamingi mu sarila Yehova, mpe Yandi mbo kavutu tomo tu sakumuna. Bilumbu biabiansoni, tadingaka mpila yi tulendi ‘bimbila’ mpe mu ‘mona ti Yehova wa mbote wena.’ Buna mbo tubâ ntiana Yezu watâ ti: ‘Bidia biani ni mu sarila luzolo lwa wô wakuntambikiri, mpe mu manisa tisalu tiandi.’​—Za 4:34.