1-2. Kweelana a Kulumbaisha 34:8, ino nshiinshi nsheenga twaciita kwaamba ayi tushibe ayi Yehova ngumubotu?

 AMUYEEYE ayi bamupa shakulya nshemutana kulyaawo kale. Inga mwashiba shiinji pashakulya isho kwiinda mukushilangilisha, kushinunsha, kushiba mboshitelekwa alimwi akwiipushako bamwi na balishisuni. Nacibi boobo, nshila yomwibo mbweenga mwashiiba na nshibotu, nkwiinda mukweelesha kulyaako.

² Inga tweeya pabubotu bwakwe Yehova kwiinda mukubelenga Baibo, mabuku esu alimwi akukutika kubamwi ndyebatokwaamba pashibotu nshaakabacitila. Sombi inga twanyumfwishabo bubotu bwakwe Yehova, na tweelesha bubotu bwakwe sobeene. (Amubelenge Kulumbaisha 34:8.) Amuleke tubandike cakubonenaako ceenga catucafwa kushiba mbweenga twacita boobo. Mpashi tulisuni kusebensela Yehova muncito yaciindi coonse. Ano kwaamba ayi tucite boobo, inga twayandika kuceeshako shakucita mubuumi. Mpashi liinji twabelenga cishomesho ncaakaamba Yesu cakwaamba ayi na twabika sha Bwaami panembo, Yehova alaakutupa shintu nshetuyandika. Sombi Yehova taakwe kutucitilaawo kale boobo. (Mate. 6:33) Ano mukwiinga tulashoma mucishomesho ncaakaamba Yesu, tulacileka kuula shintu shimwi, kuceeshako ciindi cakusebensa ncito yakumubili alimwi akubikila maano kuncito yakushimikila. Na twacita boobo, tulaakubona ayi ncakwiila Yehova alatupa nshetuyandika. Alimwi ‘tulaakwelesha’ akubona bubotu bwakwe Yehova sobeene.

3. Kweelana a Kulumbaisha 31:19, ino mbaani Yehova mbwaacitila shintu shibotu?

³ Yehova ‘ngumubotu kubantu boonse,’ kwiilikaawo akubaabo batamushiwo. (Kulu. 145:9; Mate. 5:45) Sombi Yehova alapa shoolwe shiinji bunene bunene kubaabo bamusuni alimwi bamusebensela abuumi bwabo boonse. (Amubelenge Kulumbaisha 31:19.) Amuleke tubandike pashintu shimwi shibotu Yehova nshaakatucitila.

4. Ino Yehova alatondesha buyani bubotu bwakwe kubaabo batalika kuyumya bushicibusa bwabo anguwe?

 ⁴ Lyoonse na twakonkela Yehova nshatwiisha, tulabona shibotu shiswaamo. Kucakubonenaako, ndyetwakeeya shiinji pali nguwe, alimwi akutalika kumusuna wakatucafwa kucileka kuyeeya akucita shintu nshaapatite. (Kolo. 1:21) Alimwi ndyetwakalyaaba kuli Yehova akubombekwa, wakatupa shintu shibotu shiinji abuumbi mbuli kuba anjeelacaamba isalalite alimwi akuba abushicibusa buyumu anguwe.—1 Pit. 3:21.

5. Ino nshibotu nshi Yehova nshaatucitila muncito yakushimikila?

⁵ Tulatolelela kubona bubotu bwakwe Yehova ndyetutokwaabanaamo lubasu muncito yakushimikila. Sa muli muntu ucite nsoni? Bantu bakwe Yehova baanji mbobabete. Mpashi kamutana kuba musebenshi wakwe Yehova, tamwakalinga kuyeeyawo ayi inga mwaya paŋanda ya muntu ngomuteshiwo akutalika kumulwiita makani amu Baibo. Sombi pacecino ciindi, mulacita boobo lyoonse. Alimwi Yehova wamucafwa kusuna ncito yakushimikila! Mwabona Yehova mbwaamucafwa munshila shipusenepusene. Wamucafwa kunokalika moyo na muntu umwi watalika kumupikisha muncito yakushimikila. Alimwi wakamucafwawo kwiibaluka lilembo lyeelete kwaamba ayi mulwiiteeko muntu wakalinga kusuni kwiiya. Alimwi wakamupa nkusu kwaamba ayi mutolelele kushimikila nabi bantu ndyebatasuni kukutika.—Jele. 20:7-9.

6. Ino Yehova nshatwiisha shilatondesha buyani ayi ngumubotu?

⁶ Alimwi Yehova wakatutondesha bubotu bwakwe kwiinda mukutwiisha mbweenga twasebensa ncito yakushimikila. (Joni 6:45) Ndyetuli kumabungano amukati kansondo, tulakutika kushakubonenaako shibotu sha nsheenga twaamba ndyetutoshimikila alimwi tulayuminishikwa kusebensesha nshila ishi ndyetuli muncito yakushimikila. Pakutaanguna mpashi inga twaloonda kweelesha kusebensesha nshila shipya, sombi na tweelesha kucita boobo tulesa mukucana kwaamba ayi nshila isho shilasebensa kabotu. Alimwi ndyetuli kumabungano ansondo ansondo akukubungana kunene tulayuminishikwa kusebensesha nshila shipya shakushimikila nshetutana kusebenseshaawo kale. Ici acalo inga catupa kuloonda, sombi na tweelesha kucita boobo Yehova alaakutupa shoolwe. Amuleke tubandike pashoolwe nsheenga twacaana na tweelesha kusebensesha nshila shipya kwaamba ayi tusebensele Yehova kushika peela nkusu shesu, nabi tube mubukaalo buli buyani. Lyalo tutobandika mbweenga twakumanisha nshetwasala kucita.

7. Ino ncoolwe nshi ncetucana na tweelesha kucita shiinji muncito yakushimikila?

⁷ Bushicibusa bwesu a Yehova bulayuminaako. Amuyeeye cakubonenaako camunene mulibungano waliina lya Samuel, * usebensela kucishi ca Colombia amukaakwe. Beebene aba bakalinga kusangalala kusebensa bupainiya mulibungano linemishaabo, sombi bakalinga kusuni kucita shiinji muncito yakushimikila kwiinda mukucafwa libungano lyakalinga kubulishite abuumbi. Kwaamba ayi bacite boobo bakalinga kuyandika kucileka kucita shintu shimwi nshebasuni. Ba Samuel bakaamba ayi: “Twakakonkela shaamba lilembo lya Mateyo 6:33 akucileka kuula shintu shatakalinga kuyandika. Ano cintu cakalinga ciyumu abuumbi nkushiya ŋanda yesu. Yakayakwabo kweelana ambotwakalinga kusuni alimwi tatwakalinga kucitewo nkongole iliyoonse paŋanda iyo.” Ndyebakalongela kulibungano lipya, bakalinga kusebenseshabo maali aniini kwiinda ngobakalinga kusebensesha kabatana kulonga. Ba Samuel bakaamba ayi: “Twabona Yehova mbwaatutanjilila alimwi akukumbula mipailo yesu. Tulabona ayi Yehova alikondetwe andiswe alimwi tulabona ayi alitusuni kwiinda mushintu nshaatucitila.” Sa inga mwacikonsha kucitaako shiinji muncito yakushimikila? Na mukacite  boobo inga mwashoma cakutatonsha kwaamba ayi mulaakuyumya bushicibusa bwanu a Yehova alimwi alaakunoomupa nshemuyandika.—Kulu. 18:25.

8. Ino nshiinshi nshomweeya kuswa kushakaamba ba Ivan alimwi aba Viktoria?

⁸ Tulaba alusangalalo muncito yesu. Amunyumfwe shakaamba ba Ivan alimwi aba Viktoria, beebene basebensa mbuli bapainiya kucishi ca Kyrgyzstan. Bakasalawo kukala buumi bwakutalila shiinji kwaamba ayi inga bacafwilisha muncito iliyoonse kwiilikaawo anciito yakuyaka. Ba Ivan bakaamba ayi: “Twakalinga kusebensa cankusu muncito iliyoonse njetwapekwa. Nabi kwaamba ayi twakalinga kulema pakumana kwabushiku, twakalinga kusangalala mukwiinga twakalinga kucishi kwaamba ayi tutoosebensesha nkusu shesu kusebensa cankusu muncito yakwe Yehova. Alimwi twakalinga kusangalala kuba pomwi abeshicibusa besu alimwi akwiibaluka shintu shibotu shakatucitikila.”—Maako 10:29, 30.

9. Ino nshiinshi nankashi uli mubukaalo buyumu nshaacita kwaamba ayi acite shiinji muncito yakushimikila, alimwi ino nshiinshi shaswaamo?

⁹ Tulaba alusangalalo ndyetutosebensela Yehova nabi ndyetutokwiinda mubukaalo buyumu. Kucakubonenaako, nankashi Mirreh mukalubinje wacinene ukala ku West Africa, wakalinga Dokota. Ndyaakacileka ncito wakatalika kusebensa bupainiya. Ba Mirreh balaciswa bulwashi bucisa abuumbi, bupa kwaamba ayi kaciba ciyumu kweenda. Aboobo balasebensabo woola lyomwi muncito yakushimikila kuŋanda aŋanda. Sombi balacikonsha kusebensa kwaciindi cilaamfu muncito yakushimikila kwiinda mukusebensesha kakoci. Alimwi kuli bantu basuni kwiiya alimwi ambobaiisha Baibo baanji. Bamwi pabaabo balabashimikila kwiinda mukusebensesha fooni. Ino nceebonshi ba Mirreh balisuni kucita shiinji muncito yakwe Yehova? Bakaamba ayi: “Ndimusuni abuumbi Yehova alimwi a Yesu Klistu. Alimwi liinji ndapaila kuli Yehova kwaamba ayi ancaafwe kucita nsheenga ndacikonsha muncito yakwe.”—Mate. 22:36, 37.

10. Kweelana a Isaya 54:13, ino nshiinshi Yehova nshaapa baabo beelesha kucita shiinji muncito yakwe?

¹⁰ Tulatambula lwiiyo lupusenepusene kuswa kuli Yehova. Ba Kenny basebensa bupainiya kucishi ca Mauritius, bakabona ayi maswi aya ngancine. Ndyebakeeya cancine, bakaswako ku yunivesti, bakabombekwa akutalika kusebensa bupainiya bwaciindi coonse. Bakaamba ayi, “Ndeelesha kukonkela cakubonenaako ca mushinshimi Isaya, wakaamba ayi: ‘Mpoondi Nkambo, amuntuume!’” (Isa. 6:8) Ba Kenny bakasebensako ncito shakuyaka shipusenepusene alimwi bakacafwilishaako amuncito yakusansulula mabuku aamba shamu Baibo mumushobo winemishaabo. Ba Kenny bakaamba ayi: “Ndakatambula lwiiyo lwakancafwa kushiba bwakusebensa ncito njondakapekwa.” Sombi bakeeya shiinji kuteshibo bwakusebensa ncito iyo. Bakatolelela akwaamba ayi: “Ndakeeya shintu nsheenga nshicikoonshi kucita alimwi amibo njonjelete kubaayo kwaamba ayi nsebense kabotu muncito yakwe Yehova.” (Amubelenge Isaya 54:13.) Mpashi amwebo inga mwaalulaako shimwi mubuumi kwaamba ayi Yehova amwiishe munshila shiinji.

11. Ino nshiinshi benankashi baku South Korea nshebakacita kwaamba ayi banokwaabanamo lubasu muncito yakushimikila, alimwi ino nshiinshi shakaswaamo? (Amubone cikope cili papeeji yakutaanguna.)

¹¹ Nabibo Bakamboni basebensa kwamyaaka iinji, balayandika kwiishikwa ndyebatokweelesha kusebensesha nshila ipya muncito yakwe Yehova. Paciindi ca bulwashi bwa COVID-19, bamanene bamulibungano limwi lyaku South Korea bakalemba ayi: “Bamwi bakalinga kulinyumfwa ayi inga tabaciti shiinji muncito yakushimikila ceebo cakuciswa ciswa, pacecino ciindi batokwaabanamo lubasu muncito yakushimikila kwiinda mukusebensesha mapulogilamu apa Intaneti. Benankashi botatwe bacite myaaka yamuma 80 bakeeya bwakusebensesha shakupangapanga shaconoono alimwi liinji balaabanamo lubasu muncito yakushimikila.” (Kulu. 92:14, 15) Sa inga mwasuna kucitaako shiinji muncito yakushimikila kwaamba ayi mubone bubotu bwakwe Yehova? Amuleke  tubandike pashintu shimwi nsheenga mwaciita kwaamba ayi mucikoonshe kucita boobo.

12. Ino nshiinshi Yehova nshaakashomesha kupa baabo bacinka manungo muli nguwe?

¹² Amwiiye kucinka manungo muli Yehova. Wakashomesha kutupa shoolwe shiinji na twashoma muli nguwe akumusebensela kushika peela nkusu shesu. (Mala. 3:10) Nankashi waliina lya Fabiola ukala ku Colombia wakabona Yehova mbwaakakumanisha cishomesho ici kuli nguwe. Wakalinga kusuni kusebensa bupainiya bwaciindi coonse pesule lyakubombekwa. Sombi wakalinga kusebensa kwaamba ayi anoocafwa mukwashi wakwe lwakumubili. Aboobo ndyebakamusuminisha kucileka ncito, wakapaila abuumbi kuli Yehova kwaamba ayi amucaafwe. Wakaamba ayi: “Liinji paleenda ciindi cilaamfu kwaamba ayi muntu batalike kumupa maali a penshoni. Sombi nebo bakatalika kumpa maali ayo ndyepakeendabo mweenshi womwi. Cakalingabo anga ncaankamiko!” Ndyepakeenda myeenshi yobilo, wakatalika bupainiya. Pacecino ciindi alicite myaaka yamuma 70 alimwi wasebensa bupainiya kwamyaaka iindilila 20. Mumyaaka iyi, wacafwa bantu bali 8 kubombekwa. Wakaamba ayi: “Nabi ndalinyumfwa kubula nkusu cimwi ciindi, Yehova alancafwa lyoonse kwaamba ayi ntolelele kusebensa bupainiya.”

13-14. Ino nshakubonenaako nshi sheenga shatucafwa kucinka manungo muli Yehova alimwi akusuna kucita shiinji muncito yakwe?

¹³ Amwiiye kushakubonenaako shabaabo bakacinka manungo muli Yehova. Mu Baibo muli shakubonenaako shiinji shaamba pabantu bakasebensa cankusu muncito yakwe Yehova. Alimwi  mushakubonenaako shiinji, basebenshi bakwe Yehova aba bakalinga kuyandika kutaanguna kucitawo comwi kwaamba ayi batambule shoolwe shilibetele kuswa kuli Yehova. Kucakubonenaako, Abulaamu ndyaakaswa mucishi cinemishaabo “kaateshi ankwakalinga kuya,” Yehova ndyaakamupa shoolwe. (Ebu. 11:8) Pesule lyakwaamba ayi Jakobo watintana amunjelo, ndyaakatambula coolwe cilibetele. (Mata. 32:24-30) Bene Isilaeli ndyebakalinga pafwiifwi akunjila Mucishi Cakashomeshekwa, pesule lyakwaamba ayi bapailishi balyatabo mumaanshi akalinga kukunka pa Mulonga wa Joodani, maanshi akeemikana kukunka lyalo bantu ndyebakacikonsha kusubuka.—Joshu. 3:14-16.

¹⁴ Alimwi inga mweeya shiinji kuswa kushakubonenaako sha Bakamboni bakwe Yehova bamunshiku shino abo bakacinka manungo muli Yehova, akukumanisha nshobakasala. Kucakubonenaako, mukwesu waliina lya Payton a Diana mukaakwe, bakalinga kusangalala kubelenga shakubonenaako shabamakwesu abenankashi bakalyaaba kucita shiinji muncito yakwe Yehova, mbuli baabo baambwa mumitwi yaamba ayi “Bakalyaaba Beene Mukuliyandila.” * Ba Payton bakaamba ayi: “Na twabelenga shakacitika mubuumi bwabo, twakalinga kulinyumfwa anga tutokweebela muntu utoolya shakulya shibotu abuumbi. Kutolelela kubelenga makani aya kwakalinga kutupa kusuna ‘kweelesha akubona ayi Yehova ngumubotu.’” Mukuya kwaciindi, ba Payton aba Diana bakaya mukusebensela kumusena ubulishite. Sa mwakabelengawo kale makani acanika palubasu ulu? Alimwi sa mwakayeebelawo kale vidyo ya Kushimikila Kumusena Wakulaale—Australia alimwi aya Kushimikila Kumusena Wakulaale—Ireland, ayo acanika pa jw.org? Makani aya inga amucafwa kucana nshila mbweenga mwacita shiinji muncito yakwe Yehova.

15. Ino kucanika pomwi abaabo babika sha Bwaami panembo inga kwatucafwa buyani?

¹⁵ Munoocanika abaabo babika sha Bwaami panembo. Ncuubu kulya shakulya nshetutana kulyaawo kale na katucanika abaabo balya shakulya isho. Aswebo na katucanika abantu babika Yehova panembo mubuumi bwabo, tulaakwelesha kucana nshila mbweenga twacita shiinji muncito yakwe Lesa. Ishi nsheshakacitikila ba Kent alimwi aba Veronica. Ba Kent bakaamba ayi: “Beshicibusa alimwi abamumukwashi wesu bakalinga kutuyuminisha kweelesha kusebensesha nshila shipya muncito yakwe Lesa. Twakesa mukushiba kwaamba ayi kucanika pomwi abaabo babika sha Bwaami panembo, kwakatucafwa kutaloonda kweelesha kucita shintu shipya.” Pacecino ciindi ba Kent alimwi aba Veronica batosebensa mbuli bapainiya balibetele ku Serbia.

16. Kweelana acakubonenaako Yesu ncaakaamba ncetucana palilembo lya Luka 12:16-21, ino nceebonshi tulyeelete kulyaaba kucileka kucita shintu shimwi?

¹⁶ Amulyaabe kwaamba ayi mucite shiinji muncito yakwe Yehova. Inga tatuyandiki kucileka kucita shintu shoonse nshetusuni kwaamba ayi tusangalashe Yehova. (Shiku. 5:19, 20) Nacibi boobo, na twasalawo kutacita shiinji muncito yakwe Yehova ceebo cakwaamba ayi tatusuniiwo kucileka kucita shintu shimwi nshetusuni, inga twaciita cilubo ncaakacita musankwa Yesu ngwaakaambawo mucikoshanyo uyo wakasebensa cankusu kuba ashintu shiinji shakumubili sombi watakalinga kubikila maano kuli Lesa. (Amubelenge Luka 12:16-21.) Mukwesu waliina lya Christian ukala ku France wakaamba ayi, “Nshindakalinga kusebensesha bunene ciindi ankusu shangu muncito yakwe Yehova akukucafwa mukwashi.” Lakwe amukaakwe bakasalawo kutalika bupainiya. Sombi kwaamba ayi bacikoonshe kucita boobo, bakalinga kweelete kucileka ncito. Bakatalika kusebensa ncito yakubotesha kwaamba ayi banoolicafwilisha. Alimwi bakeeya kukwana a maali aniini ngobakalinga kucana. Ano sa kucileka kucita shintu shimwi kwaamba ayi batalike  bupainiya kwabapa kuba alusangalalo? Ba Christian bakaamba ayi, “Pacecino ciindi tulasangalala abuumbi muncito yakushimikila alimwi tulakondwa kubona beshikwiiya Baibo abantu mbotushimikila mbobasuni kwiiya pali Yehova.”

17. Ino nciinshi cakacafwa nankashi umwi kweelesha kusebensesha nshila ipya muncito yakushimikila?

¹⁷ Amulyaabe kweelesha nshila shipya muncito yakwe Lesa. (Milimo 17:16, 17; 20:20, 21) Ba Shirley basebensa bupainiya ku United States, bakalinga kuyandika kwaalulako mbobasebensa ncito yakushimikila ceebo ca bulwashi bwa COVID-19. Pakutaanguna bakawayawaya kushimikila kwiinda mukusebensesha fooni. Nacibi boobo, pesule lyakwaamba ayi beeya mbweenga bacita boobo ndyekwakalinga kufwakasha kwa mutanjilili walubasu, bakatalika kushimikila lyoonse kwiinda mukusebensesha fooni. Bakaamba ayi: “Pakutaanguna ndakalinga kuloonda sombi pacecino ciindi ndanyumfwa kabotu kusebensesha nshila iyi. Alimwi pacecino ciindi tutoshimikila bantu baanji kwiinda mbotwakalinga kushimikila kuŋanda aŋanda!”

18. Ino nciinshi ceenga catucafwa na bukaalo bumwi butoopa kwaamba ayi cibe ciyumu kucita shiinji muncito yakushimikila?

¹⁸ Amusale cakucita akweelesha kucikumanisha. Na tutokwiinda mumapensho, tulapaila kusenga lucafwo alimwi akuyeeya cakubikila maano kwaamba ayi tushibe mbweenga twaciita pamapensho ayo. (Tus. 3:21) Ba Sonia basebensa mbuli painiya waciindi coonse mukakoto kasebensesha mushobo wa Ciromany ku Europe, bakaamba ayi: “Ndalemba nshonsuni kucita palipepa akulibika mpeenga caba cuubu kulibona. Patebulu yangu ndakalembaawo nshila shobilo shiya mumbasu shipusene. Na ndisuni kusala cakucita, ndalanga panshila shobilo ishi akweelesha kubona na cakucita ico cilaakuswitilila nabi sobwe.” Ba Sonia baleelesha kubona mapensho ngobeendaamo munshila yeelete. Bakaamba ayi, “Ndyeelete kusalawo na ndakunobona kwaaluka kwa bukaalo mbuli lubumbu lutonkasha kukumanisha cintu ncondakasala na biliji yeenga yancafwa kukumanisha cintu ico.”

19. Ino nciinshi ncotweelete kuba bashinishite kucita?

¹⁹ Yehova alatupa shoolwe munshila shiinji. Inga twatondesha ayi tulalumba Yehova pashintu shoonse nshaatupa, kwiinda mukucita shoonse nsheenga twacikonsha kwaamba ayi tumulumbaishe. (Ebu. 13:15) Ici inga ceelikaawo kucana nshila shipya mbweenga twacita shiinji muncito yakushimikila, ico ceenga capa kwaamba ayi tutambule shoolwe shiinji. Bushiku abushiku, amuleke tucane nshila mbweenga ‘tweelesha akubona ayi Yehova ngumubotu.’ Lyalo tulaakuba bweenka mbuli Yesu wakaamba ayi: “Cakulya cangu nkucita sheesho shiyanda wooyo wakantuma akumanisha ncito yakwe.”—Joni 4:34.