1-2. Ka kuya ka Samu 34:8, ki lika mañi zeluswanela kueza kuli luiponele bunde bwa Jehova?

LUUNGEÑI kuli mutu yomuñwi umifa sico semusikaca kale fateñi. Mukona kuziba zeñata ka za sico seo ka kusitalima, kuutwa munko wasona, kuziba zebeilwe mwateñi, kamba kubuza babañwi haiba basitabela. Nihakulicwalo, mukona feela kuziba haiba muka sitabela kamba kutokwa ka kuca kwateñi mina bañi.

² Nzila yeñwi yelukona kuziba ka yona kuli Jehova ki yomunde ki kubala Bibele ni lihatiso zaluna, ni kuteeleza kwa batu babañwi habatalusa mwabafuyaulezi Jehova. Kono kuli luutwisise kuli Jehova ki yomunde, luswanela ‘kulwaza’ bunde bwahae luna bañi. (Mubale Samu 34:8.) Halunyakisiseñi nzila yeñwi yelukona kueza cwalo ka yona. Luungeñi kuli lubata kuba paina wa kamita, kono lulemuha kuli lutokwa kunolofaza bupilo bwaluna kuli lupete sikonkwani seo. Mwendi selubalile ka za sepiso ya Jesu hañata kuli haiba lubeya za Mubuso mwa sibaka sapili, Jehova uka lutusa kufumana lika zelutokwa luli, kono mwendi ka butu halusika iponela taba yeo haiezahala ku luna. (Mat. 6:33) Bakeñisa kuli lusepile sepiso ya Jesu yeo, haluna kuleka-lekanga feela lika, lukaeza licinceho ka za nako yelutanda kwa mubeleko, mi lukaisa pilu kwa musebezi wa kukutaza. Kaniti, haiba lueza cwalo, lukaiponela kuli Jehova walubabalela luli. ‘Lukalwaza’ bunde bwa Jehova luna bañi.

3. Sina mokuboniselizwe kwa Samu 16:1, 2, ki bo mañi sihulu baezanga hande Jehova?

³ Jehova “ueza hande libupiwa zahae kaufela,” nihaiba batu babasa muzibi. (Samu 145:9; Mat. 5:45) Kono sihulu ufuyaulanga hahulu batu baba mulata ni kumusebeleza ka moyo wabona kaufela. (Mubale Samu 16:1, 2.) Mulemuhe linzila lisikai mwaboniseza Jehova kuli ki yomunde.

4. Jehova ubonisanga cwañi bunde bwahae kwa batu babasutelela ku yena?

 ⁴ Nako kaufela halusebelisa zalubulelela Jehova, lwatusehanga mwa bupilo bwaluna. Hane luitutile ka za hae ni kukala kumulata, naalutusize kutuhela kunahana ni kueza lika zesa mutabisi. (Makolo. 1:21) Mi hane luneezi bupilo bwaluna ku Jehova ni kukolobezwa, naalufile lika zende hahulu zecwale ka lizwalo lelinde ni silikani sesinde ni yena.—1 Pit. 3:21.

5. Jehova ulubonisanga cwañi bunde bwahae halueza musebezi wa kukutaza?

⁵ Luzwelangapili kuiponela bunde bwa Jehova halueza musebezi wa kukutaza. Kana mu batu babanani maswabi? Batanga ba Jehova babañata banani maswabi. Mwendi musikaba kale yomuñwi wa batanga ba Jehova, nemusika libelela kuli nemuka kona kupotela mutu yomusa zibi ni kuyo ngongota fa munyako wa ndu yahae kuikambota ni yena litaba za mwa Bibele zebasa tabeli batu babañata. Niteñi, kacenu muezanga cwalo nako ni nako. Mi mane Jehova umitusize kuikola hahulu musebezi wa kukutaza! Jehova umitusize mwa linzila zeñwi zeshutana-shutana. Umitusize kusahalifa hane mukopani ni mutu yanaa milwanisa. Hape naamitusize kuhupula liñolo leliswanela hane muambola ni mutu yatabela. Mi naamitusize kuzwelapili kukutaza, batu niha nebasa tabeli kuteeleza kwa lushango lwamina.—Jer. 20:7-9.

6. Lituto zalufanga Jehova libonisa cwañi bunde bwahae?

⁶ Jehova hape ulubonisize bunde bwahae ka kululuta molukona kuezeza musebezi wa kukutaza. (Joa. 6:45) Kwa mikopano ya mwahalaa sunda, lubuhanga mavidio alukisizwe hande a liakalezo za mwakuambolisanela ni batu, mi lususuezwanga kuitusisa liakalezo zeo mwa bukombwa. Kwa makalelo, lukona kuikalelwa kuli mwendi haluna kukona kuitusisa mukutalezo omunca, kono haiba lulika mukutalezo wo, batu bolukutaza ku bona mwendi bakatabela lushango lwaluna. Hape kwa mikopano yaluna ya puteho ni mikopano yemituna, lususuezwanga kuitusisa mikutalezo yeshutana-shutana yelusika itusisa kale. Lukona kuikalelwa kueza cwalo, kono haiba lulika mikutalezo yeo, Jehova uka lufuyaula. Halunyakisiseñi limbuyoti zeñwi zelukona kuba ni zona haiba luikataza kueza lika zenca mwa sebelezo yaluna ku Jehova kusina taba ni miinelo yeluli ku yona. Hasamulaho, lukanyakisisa molukona kuekeleza kwa bukombwa bwaluna.

7. Ki mbuyoti mañi yelukaba ni yona haiba luekeza kwa bukombwa bwaluna?

⁷ Lukasutelela hahulu ku Jehova. Halunyakisiseñi mutala wa muuna-muhulu mwa puteho yabizwa Samuel, * ili yo yena ni musalaa hae basebeleza kwa Colombia. Bo mutu ni musalaa hae bao nebaikola hahulu kueza bupaina mwa puteho yabona, kono nebabata kuekeza kwa bukombwa bwabona ka kutusa puteho yeneli mwa butokwi. Niteñi, kuli bakwanise sikonkwani seo, nebatokwa kueza licinceho zeñwi mwa bupilo bwabona. Bo Samuel batalusa kuli: “Nelusebelisize sikuka sesi kwa Mateu 6:33, mi lwatuhela kuleka-leka lika zene lusatokwi. Kono nekuli taata hahulu kututa mwa ndu mone lupila. Neiyahilwe hande ka mone lubatela mi nelufelize kulifa sikoloti sayona.” Hane batutezi kwa puteho yeneli mwa butokwi, balemuha kuli nebasa tokwi kuitusisa masheleñi amañata sina sapili. Bo Samuel batalusa kuli: “Luiponezi mo Jehova aluetelezi ni kualaba litapelo zaluna. Luikutwa kuli zelueza litabisa Jehova mi lulemuhile mo aboniselize kuli walulata mwa linzila zeshutana-shutana.” Kana mwakona kueza zeñata mwa bukombwa  bwamina? Haiba mueza cwalo, silikani samina ni Jehova sikatiya mi ukazwelapili kumibabalela.—Samu 18:25.

8. Muitutañi ku zene babulezi bo Ivan ni bo Viktoria?

⁸ Lukaba ni tabo mwa sebelezo yaluna. Halunyakisiseñi zene babulezi bo mutu ni musalaa hae, bo Ivan ni bo Viktoria babasebeza sina mapaina kwa Kyrgyzstan. Nebanolofalize bupilo bwabona ilikuli bakone kuba ni nako yeñata ya kutusa mwa musebezi ufi kamba ufi wa kopano, kukopanyeleza cwalo ni musebezi wa buyahi. Bo Ivan batalusa kuli: “Nelusebelize ka taata mwa musebezi kaufela one lufilwe. Nihaike kuli nelukatalanga hahulu lizazi haliyo likela, nelubanga ni tabo ni kozo ya mwa munahano ka kuziba kuli neluitusisize maata aluna kuzwisezapili Mubuso. Hape nelutabile hahulu bakeñisa balikani babanca bane lubile ni bona ni lika zende zene luikozi.”—Mare. 10:29, 30.

9. Ki lika mañi zaezize kaizeli yomuñwi yakopana ni miinelo yetaata kuli aekeze kwa bukombwa bwahae, mi kueza cwalo kumutusize cwañi?

⁹ Lwakona kuba ni tabo mwa sebelezo yaluna ku Jehova niha lukopana ni miinelo yetaata. Ka mutala, kaizeli wa musupali yali mbelwa yabizwa Mirreh, yapila kwa West Africa naatuhezi musebezi wa budokota mi akala kueza bupaina. Bo Mirreh bakula butuku bwa mwa lingongo mi bakona feela kukutaza fa ndu ni ndu ka hora iliñwi. Kono bakona kukutaza ka nako yetelele mwa bukombwa bwa fa nyangela ka kuitusisa likalani za lihatiso. Banani misipili ya makutisezo ni lituto za Bibele zeñata, mi bakutazanga ku babañwi ba batu bao ka kuitusisa luwaile. Ki nto mañi yenesusuelize bo Mirreh kuekeza kwa bukombwa bwabona? Batalusa kuli: “Lilato laka lelituna ku Jehova ni Kreste Jesu linisusuelize kueza zeñata mwa sebelezo yaka. Mi hañata nalapelanga ku Jehova kuli anituse kueza monikonela kaufela mwa sebelezo yaka ku yena.”—Mat. 22:36, 37.

10. Ka kuya ka 1 Pitrosi 5:10, ki lika mañi zebafiwanga mizwale ni likaizeli babaikatulela kueza zeñata mwa sebelezo yabona ku Jehova?

¹⁰ Lufiwa lituto zeñata za butokwa ki Jehova. Muzwale yabizwa Kenny yali paina yasebeleza kwa Mauritius, naaiponezi buniti bwa taba yeo. Hanaaitutile niti, naatuhezi lituto zanaaituta fa yunivesiti, akolobezwa, mi akala kueza bupaina. Utalusa kuli: “Nilika kupila ka manzwi a mupolofita Isaya, yanaaize: ‘Ki na yo! Haku nilume!’” (Isa. 6:8) Bo Kenny sebatusize mwa misebezi yemiñata ya buyahi, ni kutusa mwa musebezi wa kutoloka lihatiso zetomile fa Bibele mwa puo yahabo bona. Bo Kenny batalusa kuli: “Niitutile lituto zeñata zenitusize kuba ni buikoneli bwa kueza misebezi yemiñwi.” Kono nebaitutile zeñata kwandaa kuziba feela mwakuezeza misebezi yeo. Baekeza kubulela kuli: “Nenilemuhile kuli kunani lika zeñwi zene nisakoni kueza ni kuli nenitokwa kuba ni tulemeno totuñwi ilikuli nikone kusebeleza hande Jehova ni mizwale baka.” (Mubale 1 Pitrosi 5:10.) Kana ni mina mwakona kulukisa miinelo yamina ilikuli mufiwe lituto zeñata za butokwa ki Jehova?

11. Ki buikatazo mañi bone baezize likaizeli babañwi kwa South Korea kuli bakutaze, mi kueza cwalo neku batusize cwañi? (Mubone siswaniso sesi fa kava.)

¹¹ Nihaiba batanga ba Jehova base bamusebelelize ka nako yetelele batokwa kulutiwa mwakuezeza misebezi yeminca. Ka nako ya butuku bobuyambukela bwa COVID-19, baana-bahulu mwa puteho yeñwi kwa South Korea nebañozi kuli: “Mizwale ni likaizeli babañwi bane basakoni kueza zeñata mwa bukombwa kabakala mapongo cwale sebakona kukutaza ka kuitusisa liprogilamu zekonahalisa kuli batu babonane. Likaizeli babalaalu babali mwa lilimo za ma 80, nebaitutile mwakuitusiseza lipangaliko mi cwale bakutazanga ibato ba zazi ni zazi.” (Samu 92:14, 15) Kana mwatabela kuekeza kwa bukombwa bwamina ni kuiponela  bunde bwa Jehova? Halunyakisisiseñi lika zeñwi zemukona kueza zeka mitusa kueza cwalo.

12. Jehova usepisañi batu babaitinga ku yena?

¹² Muitinge ku Jehova. Usepisa kuli uka lufuyaula hahulu haiba lumusepa ni kueza molukonela kaufela mwa sebelezo yaluna ku yena. (Mala. 3:10) Kaizeli yabizwa Fabiola, yapila kwa Colombia, naaiponezi mo Jehova naatalelelize sepiso yeo. Naabata kusebeza sina paina wa kamita hamulaho feela wa kukolobezwa. Nihakulicwalo, naatokwa kusebeza kakuli muunaa hae ni bana babona babalaalu nebaitingile kwa pene yanaaholanga kwa musebezi. Kacwalo, hanaakwanisize lilimo za kutuhela musebezi, alapela ka taata ku Jehova kuli amutuse. Utalusa kuli: “Hañata, kuunganga nako yetelele kuli mutu afiwe penshini yahae, kono na nenikalile kuamuhela penshini yaka hamulaho feela wa kweli iliñwi kuzwa fonituhelela musebezi. Nenikomokile hahulu kakuli nenisika libelela kuli nto yeo neika ezahala!” Hamulaho wa likweli zepeli kuzwa fo, akalisa kueza bupaina. Ka nako ya cwale, u mwa lilimo za ma 70 mi saabile paina ka lilimo zefitelela 20. Mwahalaa nako yeo, saatusize batu ba 8 kukolobezwa. Uli: “Nihaike kuli fokuñwi niikutwanga kufelelwa ki maata, Jehova unitusanga kuzwelapili kukutaza zazi ni zazi.”

13-14. Ki mitala mañi yekona kulutusa kusepa Jehova ni kueza zeñata mwa sebelezo yaluna ku yena?

¹³ Muitute kwa mutala wa batu bane baitingile ku Jehova. Mwa Bibele kunani mitala ya batu babañata bane baezize mone bakonela kaufela  mwa sebelezo yabona ku Jehova. Hañata, batanga ba Jehova bao nebatokwa kuunga mihato yenebonisa kuli bamusepile pili asika bafuyaula kale. Ka mutala, Jehova naafuyauzi feela Abrahama, Abrahama hanaatutile mwa naha yahabo kuya kwa naha isili, “nihaike kuli naasazibi kwanaaya.” (Maheb. 11:8) Jakobo naakonile feela kufuyaulwa hamulaho wa kumangana ni lingeloi. (Gen. 32:24-30) Maisilaele hane batuha bakena mwa Naha ya Sepiso, nebakonile feela kusila Nuka ya Jordani baprisita hase bahatile mwa mezi a nuka yeo yenebuba ka maata.—Josh. 3:14-16.

¹⁴ Hape mwakona kuituta kwa mitala ya Bakreste ba mwa linako zaluna bane basepile Jehova ni kueza zeñata mwa sebelezo yabona ku yena. Ka mutala, muzwale yabizwa Payton ni musalaa hae Diana, nebaikolanga hahulu kubala litaba za mizwale ni likaizeli bane baezize zeñata mwa sebelezo yabona ku Jehova, inge cwalo bababulezwi mwa litaba zeli, “Nebaifanile ka Kuitatela.” * Bo Payton batalusa kuli: “Hane lubalanga litaba zabona, neluikutwanga feela inge bababuha mutu yasweli kuikola kuca lico zetabusa. Hane lunze luzwelapili kubala litaba zeo, ni luna lwabata ‘kulwaza ni kuiponela kuli Jehova ki yomunde.’” Hasamulaho, bo Payton ni bo Diana, batutela kwa sibaka kone kutokwahala hahulu bakutazi. Kana mubalile litaba zeo ni mina? Kana mubuhile mavidio a fa jw.org abonisa mizwale ni likaizeli bane baizo sebeleza kwa libaka kokutokwahala hahulu bakutazi? Litaba zeo zakona kumitusa kuziba zemukona kueza kuli muekeze kwa bukombwa bwamina.

15. Kueza siango ni batu babanani likonkwani zende kukona kulutusa cwañi?

¹⁵ Mueze siango ni batu babaka mitusa kueza zeñata mwa sebelezo yamina ku Jehova. Kukona kulubela bunolo kukala kuca lico zeñwi zelusikaca kale fateñi haiba luswalisana ni batu babatabela lico zeo. Ka nzila yeswana, haiba lueza siango ni batu bababeya zabata Jehova mwa sibaka sapili, ni luna lwakona kuba ni takazo ya kubata kueza zeñata mwa sebelezo yaluna ku Mulimu. Bo mutu ni musalaa hae, bo Kent ni bo Veronica, nebaiponezi buniti bwa taba yeo. Bo Kent batalusa kuli: “Balikani baluna ni ba lubasi lwaluna neba lususuelize kubata linzila zenca za mwakuekeleza ka zona kwa bukombwa bwaluna. Nelulemuhile kuli kueza siango ni bababeya za Mubuso mwa sibaka sapili neku lutusize kubata linzila zenca za kuekeza kwa sebelezo yaluna ku Jehova.” Bo Kent ni bo Veronica cwale sebasebeza sina mapaina babaipitezi kwa Serbia.

16. Sina mokuboniselizwe mwa swanisezo yanaafile Jesu ye kwa Luka 12:16-21, ki kabakalañi haluswanela kutabela kuitombola lika zeñwi?

¹⁶ Muitombole lika zeñwi kuli musebeleze Jehova. Jehova haatokwi kuli luitobohe lika zaluna kaufela zelutabela kuli lumusebeleze. (Muek. 5:19, 20) Kono haiba lupalelwa kueza zeñata mwa sebelezo yaluna ku Mulimu kabakala kuli halutabeli kuitombola lika zeñwi, lukaeza mafosisa aswana anaaezize muuna yabulezwi mwa swanisezo ya Jesu yanaaikubukanyelize sifumu kono naasika isa pilu ku zanaabata Mulimu. (Mubale Luka 12:16-21.) Muzwale yabizwa Christian, yapila kwa France, utalusa kuli: “Nenisa itusisi nako yaka yeñata ni maata aka kuli nisebeleze Jehova ni kutusa musalaaka.” Muzwale yo ni musalaa hae baikatulela kueza bupaina. Kono kuli baeze cwalo, nebatokwa kutuhela musebezi one baeza. Kuli bafumane lika zene batokwa, bakala kueza musebezi wa kukenisa liofisi mi nebasa batangi lika zeñata mwa bupilo. Baikutwa cwañi kabakala buitomboli bone baezize? Bo Christian batalusa kuli: “Cwale seluikola hahulu bukombwa mi lubanga ni tabo kubona baituti baluna ba Bibele  ni batu bolukutazanga ku bona habaituta ka za Jehova.”

17. Ki nto mañi yekona kulupaleliswa kuitusisa mukutalezo omunca?

¹⁷ Mutabele kuituta lika zenca mwa sebelezo yamina ku Jehova. (Lik. 17:16, 17; 20:20, 21) Kaizeli yali paina yabizwa Shirley yapila kwa America, naatokwa kucinca mukutalezo wahae ka nako ya butuku bobuyambukela bwa COVID-19. Sapili, naazina-zinanga kulika mukutalezo wa kuitusisa foni. Kono hasaalutilwe mwakuezeza cwalo ka nako yanaapota muokameli wa mupotoloho, akala kukutazanga hahulu ka kuitusisa foni. Utalusa kuli: “Kwa makalelo, nenisabanga kukutaza ka nzila yeo, kono ka nako ya cwale seniikola hahulu kueza cwalo. Cwale selukutazanga kwa batu babañata kufita mone luezeza hane lukutazanga fa ndu ni ndu!”

18. Ki lika mañi zekona kulutusa kutiyela miinelo yetaata yelukopana ni yona halunze lulika kuekeza kwa bukombwa bwaluna?

¹⁸ Muitomele sikonkwani mi mueze momukonela kaufela kusipeta. Halukopana ni miinelo yetaata, lwalapelanga kuli lufiwe butali ilikuli luzibe mwakutatululela butata boluli ku bona. (Liprov. 3:21) Kaizeli yali paina wa kamita yabizwa Sonia, yaswalisana ni sikwata sesiitusisa puo ya Siromani kwa Europe, utalusa kuli: “Niñolanga fa pepa lika zenibata kueza, mi nibeyanga pepa yeo fonikona kuibona. Fa tafule, niswanisize siswaniso sa mikwakwa yemibeli yeto kopanela fa manganandila. Hanibata kueza katulo yeñwi, nitalimanga fa mikwakwa yemibeli yeo ni kuipuza ka za haiba katulo yenibata kueza ika nitusa kupeta sikonkwani saka kamba kutokwa.” Bo Sonia balikanga ka taata kuba ni mubonelo oswanela ka za miinelo yetaata yebakopana ni yona. Batalusa kuli: “Nako kaufela hanikopana ni miinelo yeminca mwa bupilo, niikupulisanga kuli kuitingile ku na kuunga miinelo yeo sina limota leli nipaleliswa kupeta likonkwani zaka kamba sina mbilici yenitusa kupeta likonkwani zeo.”

19. Luswanela kuikatulela kuezañi?

¹⁹ Jehova ulufuyaulanga mwa linzila zeshutana-shutana. Lukona kubonisa kuli lwaitebuha limbuyoti zalufa ka kueza molukonela kaufela kumulumbeka. (Maheb. 13:15) Taba yeo ikopanyeleza kubata linzila zenca zelukona kuekeza ka zona kwa bukombwa bwaluna, ili nto yekatahisa kuli lufuyaulwe hahulu. Haike zazi ni zazi lubatange linzila zeka lutusa ‘kulwaza ni kuiponela kuli Jehova ki yomunde.’ Haiba lueza cwalo, lukaikutwa sina Jesu yanaaize: “Sico saka ki kueza tato ya yena yanilumile ni kufeleleza musebezi wahae.”—Joa. 4:34.