1-2. Mungya Ñimbo ya Mitōto 34:8, i muswelo’ka otukokeja kuyuka buyampe bwa Yehova?

FWATAKANYA’PO bidi shi abakunena kudya kintu kyokwadile kashā. Ubwanya padi kuyuka mokikadile na kwikitala, kwikinunka, kuyuka bisombelwa bidi’mo, nansha kwipangula bakwabo mobekimwena. Inoko muswelo umo kete wa kuyuka mokikadile i kwikitompa abe mwine.

² Tubwanya kuyuka buyampe bwa Yehova na kutanga Bible ne mabuku etu, ne kwivwana pesambila bakwetu pa madyese ebesele Yehova. Inoko muswelo muyampe otubwanya kwivwanija buyampe bwa Yehova i na ‘kwibutompa’ batwe bene. (Tanga Ñimbo ya Mitōto 34:8.) Tulete kimfwa kilombola muswelo otubwanya kwibutompa. Fwatakanya’po bidi shi tusaka kushilula mwingilo kampanda wa kitatyi kyonso, inoko pa kufikila pa kino kitungo tukasakilwa kwisuminwa’ko bintu bimo mu būmi bwetu. Padi ketudi batange divule mulao wa Yesu wa amba, shi tutangidije tumweno twa Bulopwe kumeso, Yehova uketupa bintu bine byotusakilwa, ino ketwemwenine uno mulao ufikidila. (Mat. 6:33) Inoko byotukulupile mu mulao wa Yesu, tutyepejanga’ko lupeto lotulupula, ketu kaji, ne kuta mutyima bininge ku mwingilo wetu wa busapudi. Kitatyi kyotulonga namino, twimwenanga muswelo uvuija Yehova bisakibwa byetu. ‘Tutompanga’ batwe bene buyampe bwa Yehova.

3. Kukwatañana na Ñimbo ya Mitōto 16:1, 2, le i bāni bamwenanga mu buyampe bwa Yehova?

³ Yehova i “muyampe ku bonso,” enka ne ku boba kebamuyukilepo bene. (Ñim. 145:9; Mat. 5:45) Nakampata Yehova weselanga bininge boba bamusenswe ne bamwingidila na muya  wabo onso. (Tanga Ñimbo ya Mitōto 16:1, 2.) Shi ke pano, tutalei miswelo imoimo yotumwenanga mu buyampe bwa Yehova.

4. Le i muswelo’ka ulombolanga Yehova buyampe bwandi ku boba bashilula kumufwena?

⁴ Kitatyi kyonso kyotwingidija byobya bitufundija Yehova, twimwenanga bintu biyampe mu bwetu būmi. Potwefundile myanda yandi ne kumusanswa, wetukweshe tuleke milangwe ne bilongwa byadi bitupalula kwadi. (Kol. 1:21) Kadi potwepēne kudi Yehova ne kubatyijibwa, twemwenine buyampe bwandi bininge paetupele mutyima wa mundamunda muyampe ne kwitukwasha tupwane nandi bininge.​—1 Pe. 3:21.

5. Le i muswelo’ka otwimwenanga buyampe bwa Yehova mu busapudi?

⁵ Twendelelanga kwimwena buyampe bwa Yehova kitatyi kyotusapula. Lelo wi muntu wa bumvu? Bantu bavule ba Yehova badi na bumvu. Padi kumeso kwa kwikala mwingidi wa Yehova, kwadipo ufwatakanya’mba ubwanya kukokola ku njibo ya muntu okuyukilepo ne kumusapwila musapu wa mu Bible. Ino pano kosapulanga kyaba ne kyaba. Kadi Yehova i mukukwashe usanswe mwingilo wa busapudi! Wamwene amba Yehova wakukwatakenye mu miswelo mivule. Wakukweshe wikale talala kitatyi kyobadi bakupangapanga. Kadi wakukweshe uvuluke kisonekwa kiyampe kya kutangila muntu usangela musapu. Wakupele bukomo bwa kwendelela kusapula kitatyi kyobadi bapela musapu mu wenu mwaba.​—Yel. 20:7-9.

6. Le bufundiji bwitufundija Yehova bulombolanga namani buyampe bwandi?

⁶ Kadi Yehova witulombolanga buyampe bwandi na kwitufundija mwa kusapwila. (Yoa. 6:45) Ku kupwila kwetu kwa mu bukata bwa yenga, twivwananga’ko misapwilo miyampe ya kulondela’po, kadi betukankamikanga’ko twiingidije mu busapudi. Dibajinji, tubwanya kwikala na moyo wa kushilula musapwilo mupya, ino shi tubeushilula tubwanya kumona’mba wendekanga biyampe ku bantu ba mu wetu mwaba. Kadi ku kupwila ne ku bitango byetu, betukankamikanga’ko kwingidija misapwilo yoketwatompele kashā. Shako tubwanya kwivwana luzakalo, ino shi tulonge namino, Yehova uketwesela. Twisambilei bidi pa madyese amoamo obetweselanga kitatyi kyotwingidija miswelo mipya ya kupa Yehova biyampe byotudi nabyo pampikwa kubanga ngikadilo yotudi’mo. Kupwa tusa kwisambila pa miswelo yotubwanya kutandabula mwingilo wetu.

7. Le i madyese’ka otweselwanga kitatyi kyotulonga bukomo bwa kutandabula mwingilo wetu?

⁷ Tufwenanga Yehova bininge. Twisambilei pa mukulumpe umo Samuel, * wingilanga na wandi mukaji mu Kolombi. Bano ba mulume ne mukaji badi bengila bu bapania mu kyabo kipwilo, inoko badi basaka kutandabula mwingilo wabo na kukakwasha kipwilo kyadi kisakilwa basapudi bavule. Pa kufikila pa kino kitungo, badi bafwaninwe kwisuminwa bintu bimo mu bwabo būmi. Samuel unena’mba, “twalondele madingi adi mu Mateo 6:33, ebiya twaleka kupota bintu byampikwa mvubu. Inoko kintu kyadi kikomo i kuviluka mu njibo yetu. Yadi myubakwe motwadi tusakila, kadi ketwaapwilepo mapu pa kwiyubaka.” Pobaendele mu kipwilo kipya, bano ba mulume ne mukaji bamwene amba kebadipo basakilwa lupeto luvule lwa kwikwatakanya nalo na lobadi basakilwa dibajinji. Samuel unena’mba, “twamwene mwadi mwituludikila  Yehova ne kulondolola milombelo yetu. Twamwene amba Yehova witusangedile kadi witusenswe mu miswelo yotwadi ketwemwenine kashā.” Lelo ubwanya kutandabula mwingilo obe mu muswelo kampanda? Shi i amo, ubwanya kukulupila’mba ukafwena Yehova bininge ne amba aye ukavuija bisakibwa byobe.​—Ñim. 18:25.

8. Le i ñeni’ka yowaboila ku byanenene ba Ivan ne Viktoria?

⁸ Tutananga nsangaji mu mwingilo wetu. Tulangulukilei pa byanenene ba Ivan ne Viktoria, ba mulume ne mukaji bengila bu bapania mu Kirighizista. Besuminwe bintu bimo mu būmi mwanda wa kukwasha ku mwingilo o-onso, kubadila’mo ne wa lūbako. Ivan unena’mba: “Twadi twingila bininge mu mwingilo o-onso obadi betupa. Nansha byotwadi tukōka ku mfulo kwa difuku, twadi na ndoe ne nsangaji, mwanda twadi tuyukile amba tubaingidija bukomo bwetu mu mwingilo wa Bulopwe. Kadi twasangele bininge mwanda twasokwele balunda bavule bayampe, ne kwimwena myanda mivule isangaja.”​—Mako 10:29, 30.

9. Le i bika byalongele kaka umo wadi na makambakano pa kutandabula mwingilo wandi, ne kwalupukile bika?

⁹ Tutananga nsangaji mu mwingilo wa Yehova nansha ke kitatyi kyotwikonda na makambakano. Kimfwa, Mirreh mununu umo wa kishala ushikatanga mu Afrika wa Kushika, walombele pasho ku kaji kandi ka kiñanga, ebiya washilula kwingila bu pania. Mirreh udi na misanshi mikatampe mu nungilo ya mikupa, o mwanda ubwanya kusapula nsá umo kete mu busapudi bwa ku njibo ne njibo. Ino ubwanyanga kusapula kitatyi kilampe mu busapudi bwa mu bantu bavule. Udi na kujokela’mo ne bifundwa bya Bible bivule, bamo wifundanga nabo ku telefone. Le i bika byalengeje Mirreh asapule bininge? Unena’mba, “nsenswe bininge ba Yehova ne Kidishitu Yesu. Kadi nombanga Yehova kyaba kyonso ankwashe nonge bivule mu mwingilo wandi.”​—Mat. 22:36, 37.

10. Mungya 1 Petelo 5:10, le Yehova weselanga namani boba batandabula mwingilo wabo?

¹⁰ Yehova witufundijanga bufundiji bukwabo. Kenny, pania umo wingilanga mu Morise wemwenine uno mwanda. Paefundile bubine, walekele masomo a iniveleshite, wabatyijibwa, kupwa washilula mwingilo wa kitatyi kyonso. Unena’mba, “noñanga bukomo bwa kulonda binenwa bya mupolofeto Isaya, wānenene amba: ‘Ami uno! Ntume!’” (Isa. 6:8) Kenny waingile ku ngubako mivule, kadi wakweshe ku kwalamuna mabuku esambila pa Bible mu lwabo ludimi. Kenny unena’mba, “baumfundije kwikala na bwino bonsakilwa pa kuvuija mingilo yami.” Inoko bamufundije bintu bivule ke enkapo’tu kwingila uno mwingilo. Ubweja’ko amba, “nefundile amba kudi bintu byonkibwanyapo kulonga, ne amba nsakilwa kutamija ngikadila kampanda pa kwikala mwingidi muyampe wa Yehova. (Tanga 1 Petelo 5:10.) Ubulwepo kubandaula ngikadilo yodi’mo ne kumona shi kudi posakilwa kushinta mwanda wa Yehova akufundije bufundiji bukwabo?

11. Le i bukomo’ka bwalongele bakaka ba mu Korea wa Kunshi mwanda wa kusapula, ne i bika byalupukile’ko? (Tala kifwatulo pa kibalu.)

¹¹ Enka ne Batumoni ba bwino nabo bafundijibwanga shi abashilula mwingilo mupya. Mu kitatyi kya kipupo kya COVID-19, bakulumpe ba mu kipwilo kya Korea wa Kunshi balembele amba: “Banabetu bamo badi balanga’mba kebabwanyapo kusapula kutyina bakasambukilwa na misongo, pano basapulanga ku video besamba bemwene. Bakaka basatu ba myaka 80 ne musubu befundile kwingidija  bingidilwa bipya bya busendwe, kadi pano ke basapulanga difuku ne difuku.” (Ñim. 92:14, 15) Le ubulwepo nobe kutandabula mwingilo obe bininge ne kutompa buyampe bwa Yehova? Tala bintu bimobimo bibwanya kukukwasha ufikile pa kino kitungo.

12. Le Yehova i mulaye boba bamukulupile bika?

¹² Kulupila mudi Yehova. Aye i mulaye kwitwesela bininge shi tumukulupile ne kumupa bintu bilumbuluke byotudi nabyo. (Mal. 3:10) Fabiola, kaka umo wa mu Kolombi wemwenine kufikidila kwa uno mulao wa Yehova. Wadi usaka kwingila bu pania wa lonso pa kupwa’tu kubatyijibwa. Inoko i aye wadi ukwatakanya wandi mulume ne bandi bana basatu. O mwanda paadi ukimba kulomba pasho, walombēle bininge Yehova amukwashe. Unena’mba: “Divule dine pa kupebwa pasho bilombanga kitatyi kilampe, ino ami baumpele’yo kweji’tu umo na ponalombele. Byadi’nka bwa kingelengele!” Myeji ibidi pa kupita’po washilula kwingila bu pania. Pano udi na myaka 70 ne kupita, kadi ke mwingile bu pania myaka 20 ne musubu. Mu ino myaka yaingile bu pania, ke mukwashe bantu mwānda bafike ku kubatyijibwa. Unena’mba: “Nansha kyaba kimo byonkōkanga, Yehova unkwashanga difuku ne difuku ñendeleje na mwingilo wami.”

13-14. Le i bimfwa’ka bibwanya kwitukwasha tukulupile mudi Yehova ne kutandabula mwingilo wetu?

¹³ Boila ñeni ku bimfwa bya boba bādi bakulupile mudi Yehova. Mu Bible i muyule bimfwa bya bantu bāingidile Yehova na  bukankamane. Mu bitatyi bivule, bano bengidi ba Yehova bādi bidi banenwe kulonga’po kintu kumeso kwa kweselwa na Yehova. Kimfwa, i enka pātalukile Abalahama mu yabo ntanda—“nansha byakādipo uyukile kwaenda”—pāmwesele Yehova. (Bah. 11:8) I enka pālwile Yakoba na mwikeulu, pobāmwesele madyese a pa bula. (Ngo. 32:24-30) Kitatyi kyādi kekikatwela muzo wa Isalela mu Ntanda ya Mulao, bantu bābwanye kwabuka, enka pāpwile babitobo kutyampa mu Munonga wa Yodano.​—Yos. 3:14-16.

¹⁴ Ukokeja ne kuboila ñeni ku bimfwa bya Batumoni ba mu ano etu mafuku, bakulupile mudi Yehova ne kutandabula mwingilo wabo. Kimfwa, tutu Payton ne wandi mukaji Diana, badi batanga myanda ya batutu ne bakaka batandabwile mwingilo obadi bengidila Yehova, pamo bwa yoya ilembelwe mu bishinte binena’mba “Bepēne Abo Bene na Mutyima Tō.” * Payton unena’mba: “Potwatangile yabo myanda, twemwene’nka na batwe batala muntu udya byakudya bya munsonso. Potwadi tutanga’nka kutanga yabo myanda, twaivwene buya bwa ‘kutompa ne kumona’mba Yehova i muyampe.’” Mwenda mafuku ba Payton ne Diana bavilukila kokwa kusakilwa basapudi bavule. Le kodi mutange bino bishinte? Ne kodi mutale mavideo Prédication dans des régions isolées—Australie ne Prédication dans des régions isolées—Irlande alupwilwe pa jw.org? Myanda idi’mo ibwanya kukukwasha ukimbe miswelo yobwanya kutandabula mwingilo obe.

15. Le kupwana na balunda bayampe kubwanya kwitukwasha namani?

¹⁵ Pwana na balunda bayampe. Divule dine tufulanga ku kudya byakudya byoketwadile shi tushikete na bantu bebidya. Muswelo umo onka, shi tupwene na bantu batangidije mwingilo wa Yehova kumeso mu būmi bwabo, tukakimba miswelo ya kutandabula mwingilo otwingidila Leza. Ba Kent ne Veronica, ba mulume ne mukaji, bemwenine uno mwanda. Kent unena’mba, “balunda netu ne kyetu kisaka badi betukankamika tutompe’ko mingilo mipya. Twajingulwile amba, twabwenye kutompa mwingilo mupya mwanda twadi tupwene na boba bakimba bidi Bulopwe.” Pano ba Kent ne Veronica i bapania ba pa bula mu Serbi.

16. Monka mokilombwedilwe mu kyelekejo kya Yesu kidi mu Luka 12:16-21, mwanda waka tufwaninwe kwitabija kwisuminwa bintu bimo mu būmi?

¹⁶ Wisuminwe pa mwanda wa Yehova. Ketunenwepo kwisuminwa bintu byonso byotusenswe pa kusangaja Yehova. (Mus. 5:19, 20) Inoko shi twikake kwingidila Leza bininge mwanda wa kutyina kwisuminwa bintu mu būmi, tukokeja kulonga kilubo kimo kyonka na kyālongele muntu wa mu kyelekejo kya Yesu, wāingile bininge mwanda wa kusokola bintu bivule wāilwa’ko Leza. (Tanga Luka 12:16-21.) Tutu Christian, ushikatanga mu Franse unena’mba, “nkyadipo mpa Yehova ne kisaka kyami kitatyi ne bukomo bwami.” Ebiya aye ne wandi mukaji bakwata butyibi bwa kwikala bapania. Inoko pa kwikala bu bapania, byadi bibalomba kuleka twabo twaji. Pa kwikwatakanya, bashilwile kwingila mwingilo wa kukundula ne kusangela bintu bityetye byobadi nabyo. Lelo badi na nsangaji nansha byobesuminwe bino bintu? Christian unena’mba, “pano tusangedile mwingilo wetu wa busapudi kadi tusangalanga pa kumona bantu botwifunda nabo Bible ne botujokela befunda myanda ya Yehova.”

17. Le i bika bikokeja kwitulengeja tukomenwe kutompa musapwilo mupya?

 ¹⁷ Itabija kutompa mwingilo mupya. (Bil. 17:16, 17; 20:20, 21) Shirley pania umo wa mu États-Unis, wadi unenwe kushinta musapwilo wandi mu kitatyi kya kipupo kya COVID-19. Dibajinji wadi wikaka kusapula busapudi bwa ku telefone. Ino pobamufundije mu bupempudi bwa mutadi wa kipindi, washilula kusapula ku telefone kitatyi ne kitatyi. Unena’mba: “Dibajinji nadi ngivwana moyo, ino pano nebusanswa. Pano tusapwilanga bantu bavule kupita botwadi tusapwilanga ku njibo ne njibo!”

18. Le i bika bibwanya kwitukwasha tūminine makambakano potulonga bukomo bwa kutandabula mwingilo wetu?

¹⁸ Witūdile’ko mpangiko ne kwiilonda. Kitatyi kyotutanwa na makambakano, tulombelanga betukwashe ne kulangulukila bininge pa byotusa kulonga’po. (Nki. 3:21) Sonia, wingilanga bu pania wa lonso mu kisumpi kya ludimi lwa Romany mu Bulaya, unena’mba: “Nsenswe kulemba mpangiko yami pa papye, namutūla pantu pamweka. Ngidi na kifwatulo kya mashinda abidi enda kuntu kwishile. Shi kenkwata butyibi, ntalanga kino kifwatulo kya mashinda abidi ne kulangulukila pa kwine kukantwala butyibi’bwa.” Sonia uloñanga bukomo bwa kwikala na mumweno muyampe pa makambakano amutana. Unena’mba, “ngikadilo mipya yongikala’mo, ibwanya kwikala pamo bwa lubumbu lunjikile nansha pamo bwa kilalo kinkwasha, kulondakana na muswelo oneimona.”

19. Le tufwaninwe kusumininwa kulonga bika?

¹⁹ Yehova witweselanga mu miswelo mivule. Tukalombola’mba tufwijanga’ko pa ano madyese na kulonga bukomo bwa kumutumbija. (Bah. 13:15) Tubwanya kulonga namino, na kwingidija miswelo mipya ya kutandabula mwingilo wetu, kintu kikalengeja Yehova etwesele bininge. Nanshi difuku ne difuku, tukimbei miswelo ya ‘kutompa ne kumona’mba Yehova i muyampe.’ Nabya tukekala pamo bwa Yesu, wānenene amba: “Byakudya byami i kulonga kiswa-mutyima kya yewa wantumine ne kupwa mwingilo wandi.”​—Yoa. 4:34.