1-2. Bilondeshile Misambu 34:8, mmushindu kayi utudi mua kumanya ne: Yehowa mmuimpe?

FUANYIKIJABI ne: badi bakupesha tshiakudia tshiutu katshia kuyi muanji kudia to. Udi mua kumanya tshiakudia atshi bimpe paudi utshikenketa, utshinunkila, umanya mutubu batshilamba, anyi webeja bakuabu ni batu batshinange. Kadi kulabula tshiakudia atshi ke mushindu umuepele wa wewe kumanya ni ntshimpe anyi tshibi.

² Tudi tumanya ne: Yehowa mmuimpe patudi tubala Bible ne mikanda yetu, nansha patudi tumvua bakuabu balonda mudiye mubabeneshe. Kadi netufike ku dimanya bimpe menemene ne: Yehowa mmuimpe patudi ‘tulabula’ tuetu nkayetu buimpe buende. (Bala Misambu 34:8.) Tuangate tshilejilu etshi bua kumanya mutudi mua kuenza nanku. Fuanyikijabi ne: tudi tujinga kuditua mu mudimu wa ku dîba ne ku dîba, kadi bua tuetu kukumbaja tshipatshila atshi, mbimpe tukepeshe malu mu nsombelu wetu. Kudi misangu ya bungi itukadi babale mulayi wa Yezu wa ne: tuetu bateke malu a Bukalenge pa muaba wa kumpala, Yehowa neatupeshe bitudi nabi dijinga menemene, kadi pamuapa katutu banji kudimuenena dikumbana diawu mu nsombelu wetu to. (Mat. 6:33) Nansha nanku, bu mutudi tuitabuja mulayi wa Yezu au, tudi tudienzeja bua kukepesha bungi bua makuta atutu tutula, tuakaja programe wetu wa mudimu wa bianza ne tudifila bikole mu mudimu wa buambi. Tuetu benze nanku, netumone ne etu abidi mudi Yehowa utukumbajila majinga etu. Tudi ‘tudilabuila’ buimpe bua Yehowa.

3. Anu mudibi bileja mu Misambu 16:1, 2, mbanganyi badi Yehowa uleja buimpe buende?

³ Yehowa udi “muimpe kudi bantu bonso,” nansha kudi badi kabayi bamumanye. (Mis. 145:9; Mat. 5:45) Kadi udi nangananga wenzela bantu badi bamunange ne bamuenzela mudimu ne muoyo mujima malu mimpe a bungi. (Bala Misambu 16:1, 2.)  Tuakulayi mpindieu bua malu mimpe ndambu akadiye mutuenzele.

4. Mmunyi mudi Yehowa uleja bantu badi batuadija kusemena pabuipi nende buimpe buende?

⁴ Dîba dionso ditudi tutumikila malu adi Yehowa utulongesha, tudi tumona mudiwu atuambuluisha. Tshilejilu, patudi tulonga malu ende ne tutuadija kumunanga, udi utuambuluisha bua kulekela kuela meji a malu adiye kayi wanyisha ne kuakina. (Kolos. 1:21) Patudi tudilambula kudi Yehowa ne tubatijibua, tudi tudimuenena kabidi buimpe buende bikole padiye utupesha kondo ka muoyo kimpe ne tudia nende bulunda bukole.​—1 Pet. 3:21.

5. Mmushindu kayi utudi tudimuenena buimpe bua Yehowa patudi tuyisha?

⁵ Tudi tutungunuka ne kudimuenena buimpe bua Yehowa patudi tuditua mu mudimu wa buambi. Utu muena lumamamama anyi? Bantu ba Yehowa ba bungi batu ne lumamamama. Pamuapa kumpala kua wewe kulua mutendeledi wa Yehowa, kuvua mua kuela meji ne: dimue dituku udi mua kukokola ku tshiibi tshia muntu uudi kuyi mumanye bua kuyukila nende malu a mu Bible nansha. Kadi lelu eu, udi wenza nanku pa tshibidilu. Bualu bukuabu, Yehowa mmukuambuluishe bua kuanyisha mudimu wa kuyisha. Udi mumone mudiye mukukuatshishe mu mishindu mikuabu. Mmukuambuluishe bua kuikala kutukija padibu bakuamba anyi bakuenzela malu mabi mu mudimu wa buambi. Mmukuambuluishe kabidi bua kuvuluka mvese uudi mua kubadila muntu udi witaba bulelela. Mmukupeshe bukole bua kutungunuka ne kuyisha nansha padi bantu kabayi bakuteleja mu teritware muudi uyisha.​—Yel. 20:7-9.

6. Yehowa mmutuleje buimpe buende padiye utulongesha. Fila bijadiki.

⁶ Yehowa mmutuleje kabidi buimpe buende padiye utulongesha mua kuyisha. (Yone 6:45) Mu tshisangilu tshia munkatshi mua lumingu, tutu tuteleja ngenyi mimpe ya mua kuyukila ne bantu, ne batu batukankamija bua kuyitumikila patudi tuyisha. Tudi mua kuanji kumvua kabuôwa ka kuyisha ne ngenyi mipiamipia ayi, kadi patudi tuyitumikila tudi mua kumona bantu ba mu teritware wetu batuteleja bimpe menemene. Mu bisangilu ne mu mpuilu, batu batukankamija kabidi bua kuteta mishindu mishilangane ya kuyisha itudi pamuapa katuyi banji kuteta. Apu kabidi bidi mua kulomba bua tumbuke muaba utuvua basombe bimpe, kadi patudi tuenza nanku Yehowa neatubeneshe. Tumonayi amue mabenesha atudi tupeta patudi tuyisha mu mishindu mikuabu bua kudifila muetu muonso mu mudimu wa Yehowa, nansha tuetu mu nsombelu kayi. Pashishe netuakule bua mishindu itudi mua kualabaja mudimu wetu wa buambi.

7. Mmabenesha kayi atudi tupeta patudi tuenza muetu muonso bua kuvudija mudimu wetu wa buambi?

⁷ Tudi tusemena pabuipi menemene ne Yehowa. Tuangate tshilejilu tshia mukulu mukuabu diende Samuel. * Yeye ne mukajende badi bayisha mu Colombie. Bana betu aba bavua banange kuenza bumpanda-njila mu tshisumbu tshiabu, kadi bu muvuabu basue kuvudija mudimu wabu wa kuyisha, bakaya kuambuluisha mu tshisumbu tshikuabu muvuabu dijinga ne bamanyishi. Bua bobu kukumbaja tshipatshila atshi, bavua ne bua kudipangisha malu makuabu. Samuel udi wamba ne: “Tuakatumikila mêyi adi mu Matayi 6:33, tuetu kulekela disumba bintu bituvua katuyi nabi dijinga menemene. Kadi kushiya nzubu wetu ke bualu buvua butambe kutukolela. Bavua bamuibake anu mutuvua basue, katuvua nansha basombe makuta bua kumuibakisha to.” Pakayabu mu tshisumbu tshipiatshipia, bavua dijinga anu ne makuta makese patupu bua kudikumbajila majinga abu kupita kumpala. Samuel udi wamba  kabidi ne: “Tudi bamone mudi Yehowa utulombola ne wandamuna masambila etu. Bamone kabidi ne: udi utuanyisha ne mutunange bikole kupita kumpala.” Udi mua kuvudija pebe mudimu webe wa kuyisha mu mushindu kampanda anyi? Biobi nanku, ikala mutuishibue ne: neusemene pabuipi menemene ne Yehowa ne neakupeshe biudi nabi dijinga.​—Mis. 18:25.

8. Malu adi Ivan ne mukajende Viktoria bambe adi akulongesha tshinyi?

⁸ Tudi tupeta disanka mu mudimu wetu. Mona tshidi Ivan ne mukajende Viktoria badi bampanda-njila mu ditunga dia Kirghizstan bamba. Bakakepesha malu mu nsombelu wabu bua bamone mua kuambuluisha mu mudimu kayi wonso bu bena budisuile, nansha mu midimu ya luibaku. Ivan udi wamba ne: “Tuvua tuenza mudimu wonso ne muoyo wetu mujima. Nansha mutuvua batshioke ku ndekelu kua dituku dionso, tuvua tumvua disanka batuishibue ne: tuvua badifile ne makanda etu mu mudimu wa Bukalenge. Tuakumvua kabidi disanka dia bungi bua mutuvua bapete balunda bapiabapia ba bungi ne malu mimpe mavule.”​—Mâko 10:29, 30.

9. Ntshinyi tshivua muanetu wa bakaji uvua mu lutatu muenze bua kuvudija mudimu wende wa buambi? Mbipeta kayi biakamueneka?

⁹ Tudi tupeta disanka mu mudimu wa Yehowa nansha patudi mu nsombelu mikole. Tuangate tshilejilu tshia Mirreh muanetu wa bakaji mukuabu mukamba ukadi mukulakaje wa mu Afrike wa ku Ouest. Pakapetaye pansio ku mudimu wende wa bumunganga wakatuadija bumpanda-njila. Udi usama binyoka ne udi mua kuenza anu dîba dimuepele mu buambi bua ku nzubu ne ku nzubu. Kadi udi ne mushindu wa kuenza mêba a bungi padiye uyisha muaba udi bantu ba bungi. Udi ne bantu ba bungi ba kupinganyina ne ba kulonga nabu Bible. Utu uyishila bamue ba kudibu ku telefone. Ntshinyi tshitu tshimusaka bua kuenzela Yehowa mudimu bikole? Udi wamba ne: “Ndi munange Yehowa ne Yezu Kristo bikole mu muoyo wanyi. Misangu yonso ntu ndomba Yehowa angambuluishe bua ngenze tshindi mua kukokesha mu mudimu wende.”​—Mat. 22:36, 37.

10. Anu mudi 1 Petelo 5:10 uleja, ntshinyi tshidi Yehowa wenzela bantu badi balabaja mudimu wabu?

¹⁰ Yehowa udi utulongesha mu mishindu mikuabu. Kenny muanetu wa balume udi mpanda-njila mu tshidiila tshia Maurice mmudimuenene bualu ebu ne ende abidi. Pakalongaye bulelela, wakalekela kulonga ku iniversite, yeye kubatijibua ne kutuadijaye mudimu wa ku dîba ne ku dîba. Udi wamba ne: “Ntu ndienzeja bua kuenza malu anu bu muprofete Yeshaya wakamba ne: ‘Mmeme eu! Untume!’” (Yesh. 6:8) Kenny mmuenze mudimu wa luibaku miaba ya bungi, mmuambuluishe kabidi bua kukudimuna mikanda yetu mu muakulu wende wa ku dibele. Udi wamba ne: “Mbandongeshe malu avua akengela bua meme kukumbaja mudimu wonso uvuabu bampesha bimpe.” Kadi wakalonga kabidi malu makuabu, pa kumbusha avua atangila mudimu wende au. Udi wamba kabidi ne: “Ndi mufike ku dimanya bindi mua kuenza ne bindi tshiyi mua kuenza to. Ndi mulonge kabidi mua kuikala ne ngikadilu milenga bua meme kulua mutendeledi wa Yehowa muimpe.” (Bala 1 Petelo 5:10.) Pamuapa udi mua kuakaja pebe malu ebe bua Yehowa akulongeshe mu mishindu mikuabu.

11. Mmushindu kayi uvua bana betu ba bakaji basatu ba mu Corée du Sud badienzeje bua kuditua mu mudimu wa buambi? Mbipeta kayi biakamueneka? (Tangila tshimfuanyi tshia pa tshizubu.)

¹¹ Nansha Bantemu ba Yehowa bakadi ne bidimu bia bungi batu babalongesha pabu padibu bateta mudimu kampanda mupiamupia. Mu tshikondo tshia tshipupu tshia korona, bakulu ba mu tshisumbu kampanda tshia mu Corée du Sud bavua bafunde bamba ne: “Bana betu bakuabu bavua badiambila kumpala ne:  kabavua mua kuyisha bua masama adibu nawu bakadi mpindieu bayisha bantu bamuenenangana nabu ku biamu. Bana betu ba bakaji basatu badi ne bidimu bipite pa 80 mbalonge mua kuyisha ne biamu bipiabipia, mpindieu bakadi bayisha dituku dionso.” (Mis. 92:14, 15) Udi musue pebe kuvudija mudimu wa buambi bua udilabuile buimpe bua Yehowa anyi? Mona malu ndambu audi mua kuenza akuambuluishe bua kukumbaja tshipatshila atshi.

12. Ntshinyi tshidi Yehowa mulaye badi bamueyemena?

¹² Longa mua kueyemena Yehowa. Mmulaye bua kutulokeshila mabenesha bu mvula patudi tumueyemena ne tumuenzela mudimu ne muetu muonso. (Mal. 3:10) Muanetu wa bakaji wa mu ditunga dia Colombie diende Fabiola wakadimuena muvua Yehowa mumukumbajile mulayi au mu nsombelu wende. Uvua musue kulua mpanda-njila wa pa tshibidilu anu matuku makese yeye mumane kubatijibua. Kadi bayende ne bana bende basatu bavua bamutekemene anu yeye bua kupeta tshiakudia. Nunku pakapetaye pansio wakasambila Yehowa bikole bua amuambuluishe. Udi wamba ne: “Pa tshibidilu bitu biangata bidimu bia bungi menemene bua muntu kupetaye pansio, kadi bakangitabila meme anu panyima pa ngondo umuepele tshianana meme mumane kuenza dilomba. Bivua anu bu tshishima!” Ngondo ibidi pashishe wakatuadija bumpanda-njila. Mpindieu ukadi ne bidimu 70 ne bia mu njila ne udi mpanda-njila kukadi bidimu bipite pa 20. Tshikondo tshionso atshi, mmuambuluishe bantu muanda mukulu bua kubatijibuabu. Udi wamba ne: “Nansha muntu ngumvua misangu mikuabu tshiyi ne bukole, Yehowa utu  ungambuluisha dituku dionso bua ntungunuke ne bumpanda-njila buanyi.”

13-14. Mbilejilu kayi bidi mua kutuambuluisha bua kueyemena Yehowa ne kualabaja mudimu wetu?

¹³ Longa mua kuidikija bilejilu bia bantu bavua beyemene Yehowa. Mu Bible mudi bilejilu bia bungi bia bantu bavua benzele Yehowa mudimu bikole. Misangu ya bungi Yehowa uvua ubabenesha pavuabu benza bualu kampanda bua kuleja ne: mbamueyemene. Tshilejilu, Abalahama wakumbuka kuende “nansha muvuaye kayi mumanye kuvuaye uya,” nunku Yehowa wakamubenesha anu pakumbukaye. (Eb. 11:8) Yakoba pende wakabeneshibua anu panyima pa yeye mumane kuluangana mvita ne muanjelu. (Gen. 32:24-30) Pakavua tshisamba tshia Isalele pa kubuela mu Buloba Bulaya, bantu bakasabuka anu pakimana bakuidi mu Musulu wa Yadene.​—Yosh. 3:14-16.

¹⁴ Bilejilu bia Bantemu ba Yehowa ba matuku etu aa badi beyemene Yehowa ne balabaje mudimu wabu bidi mua kukuambuluisha pebe. Tshilejilu, muanetu Payton ne mukajende Diana bavua banange kubala malu a bana betu bavua balabaje mudimu uvuabu benzela Yehowa. Bavua babala malu bu mudi a badibu bakuila mu tshitupa tshia ne: “Bakadifila ku budisuile.” * Payton udi wamba ne: “Patuvua tubala malu abu au, tuvua tumvua anu bu ne: tuvua tuenda tumona muntu udia biakudia bishême. Patuvua tutungunuka ne kubala malu a bana betu abu, bivua bitusaka bikole bua ‘kulabula, ne kumona ne: Yehowa mmuimpe.’” Ndekelu wa bionso, Payton ne mukajende Diana bakaya muaba uvuabu dijinga ne bamanyishi ba bungi. Ukadi pebe mubale tshitupa atshi anyi? Ukadi mutangile filme wa Diyisha miaba ya kule: Mu Australie ne wa Diyisha miaba ya kule: Mu Irlande idi mu jw.org anyi? Malu aa adi mua kukuambuluisha bua kukeba mishindu iudi mua kualabaja mudimu webe.

15. Balunda bimpe badi mua kutuambuluisha mushindu kayi?

¹⁵ Sungula balunda bimpe. Mbipepele bua tuetu kudia biakudia bitutu katuyi banji kudia patudi tusomba ne bantu batu babinange. Bia muomumue, tuetu tusomba ne bantu badi bateka Yehowa pa muaba wa kumpala mu nsombelu wabu, bidi mua kutusaka petu bua kukeba mishindu itudi mua kualabaja mudimu utudi tuenzela Nzambi. Ke tshivua tshifikile muanetu Kent ne mukajende Veronica. Kent udi wamba ne: “Balunda betu ne bena mu dîku dietu bavua batukankamija bua kuteta mishindu mipiamipia ya mudimu wetu. Tuakafika ku dimona ne: bu mutuvua tusomba ne bantu bavua bakeba tshia kumpala Bukalenge, biakatusaka bua kuteta mushindu mukuabu wa mudimu wetu.” Yeye ne mukajende bakadi mpindieu bampanda-njila ba pa buabu mu ditunga dia Serbie.

16. Anu mudi tshilejilu tshia Yezu tshidi mu Luka 12:16-21 tshileja, bua tshinyi mbimpe tuitabe bua kudipangisha amue malu?

¹⁶ Dipangisha amue malu bua Yehowa. Kabiena bikengela tulekele bintu bionso bitudi banange bua tuetu kushisha kusankisha Yehowa to. (Muam. 5:19, 20) Kadi tuetu badilaminyine bua kudifila mu mudimu wa Nzambi anu bualu katuena basue kulekela bimue bintu bitudi banange, tudi mua kuenza tshilema tshia buena tshia muntu wa mu tshilejilu tshia Yezu. Uvua muenze mudimu mukole bua kupeta bintu bimpe bia bungi kadi kavua uditatshishe bua malu a Nzambi to. (Bala Luka 12:16-21.) Muanetu wa balume mukuabu udi musombele mu France diende Christian udi wamba ne: “Tshivua ndifila muanyi muonso mu mudimu wa Yehowa ne bua kuambuluisha dîku dianyi to.” Yeye ne mukajende bakapangadija bua kulua bampanda-njila. Kadi bua kukumbajabu  tshipatshila tshiabu atshi, bivua bikengela balekele midimu ivuabu benza. Bakatuadija kuenza kamudimu ka disukuilangana nzubu bua kukumbajabu majinga abu, ne bakalonga mua kusanka ne makuta makese avuabu bapeta. Badiku basanka bua muvuabu balekele bimue bintu bua kuluabu bampanda-njila anyi? Christian udi wamba ne: “Mudimu wetu wa buambi udi utusankisha bikole, ne patudi tumona balongi ba Bible ne bantu batudi tupinganyina balonga malu a Yehowa bidi bitusankisha kabidi bikole.”

17. Bua tshinyi bidi mua kutukolela bua kuteta mushindu mukuabu wa diyisha?

¹⁷ Diakaja bua kuteta mishindu mikuabu ya mudimu wetu. (Bien. 17:16, 17; 20:20, 21) Muanetu Shirley udi mpanda-njila mu États-Unis uvua ne bua kuakaja mushindu wende wa kuyisha mu tshikondo tshia tshipupu tshia korona. Wakanji kuelakana bua kuteta kuyishila ku telefone. Diakamue pakamuambuluishabu mu dikumbula dia mutangidi wa tshijengu, wakatuadija kuyisha ku telefone pa tshibidilu. Udi wamba ne: “Ku ntuadijilu mvua ne kabuôwa, kadi mpindieu kuyishila ku telefone kudi kunsankisha bikole. Ndi nyisha bantu ba bungi bikole kupita pamvua nyisha ku nzubu ne ku nzubu.”

18. Ntshinyi tshidi mua kutuambuluisha bua kutantamena ntatu idi itupangisha bua kualabaja mudimu wetu?

¹⁸ Difundila tshipatshila ne udienzeje bua kutshikumbaja. Patutu tupeta ntatu, tutu tusambila bua Nzambi atuambuluishe ne tunana lungenyi bua kumanya tshitudi mua kuenza bua kuyitantamena. (Nsu. 3:21) Sonia udi mpanda-njila wa pa tshibidilu mu kasumbu ka muakulu wa romani ku Mputu udi wamba ne: “Ntu musue kufunda bipatshila bianyi pa dibeji ne nteka dibeji adi muaba undi mua kuikala ndimona bimpe. Pa mêsa ndi muzole njila ibidi idi iya mu nseke mishilangane. Meme musue kuangata dipangadika, ntu ntangila njila ibidi ayi ne ngela meji bua kumanya bikala dipangadika adi mua kungambuluisha bua kukumbaja tshipatshila tshianyi atshi.” Sonia udi udienzeja bua kuikala anu ne mmuenenu muimpe wa malu padiye upeta ntatu. Udi wamba ne: “Nsombelu yonso mupiamupia utu anu bu tshimanu tshidi tshimpangisha bua kukumbaja bipatshila bianyi anyi bu tshilamba tshidi tshimfikisha ku dibikumbaja.”

19. Tudi ne bua kudisuika bua kuenza tshinyi?

¹⁹ Yehowa udi utubenesha mu mishindu ya bungi. Tudi mua kumuleja dianyisha dietu bua malu mimpe adiye utuenzela patudi tuenza tshionso tshitudi mua kuenza bua kumutumbisha. (Eb. 13:15) Netuikale ne mushindu wa kuenza malu a bungi mu mudimu utudi tuenzela Yehowa. Nanku neatuenzele malu mimpe a bungi. Dituku dionso, tukebayiku mishindu itudi mua ‘kulabula bua tumone ne: Yehowa mmuimpe.’ Dîba adi netuikale anu bu Yezu wakamba ne: “Biakudia bianyi nkuenza disua dia yeye udi muntume ne kujikija mudimu wende.”​—Yone 4:34.