1-2. Kweseka naSamu 34:8, tunahase kumona ngachilihi ngwetu Yehova apwa wamwaza?

ACHISHINGANYEKENU vanamihane vyakulya vize kanda muchilyengaho lyehi. Munahase kutachikiza numba nge vyamwaza chipwe vyavipi hakuvitala, nahakuvihumba, nahakutachikiza mwakuvitelekela chipwe kuhulisako vaze vavilyaho lyehi. Chipwe ngocho, hakusaka mutachikize numba nge vyamwaza, mwatela kuvimakila enu vavene.

² Munahase kutachikiza ngwenu Yehova apwa wamwaza hakutanga Mbimbiliya, namikanda yetu nahakuhulisa vandumbwenu vamilweze vyuma vyamwaza navalingila Yehova. Chipwe ngocho, hakusaka tumone chikupu ngwetu Yehova apwa wamwaza, twatela ‘kumakila’ etu vavene tumone ngwetu apwa wamwaza. (Tangenu Samu 34:8.) Tutalenu jila yimwe tunahase kulingilamo ngocho. Chakutalilaho, nge tunalitomena kuzata upayiniya kaha twatela kwashiwisako chiyoyelo chetu numba tutesemo kuzata mulimo kana. Pamo tunatangenga mazu aYesu akwamba ngwavo kachi nge natutondanga chatete Wangana, kaha Yehova mwatuhana vyuma vyosena vyasakiwa, oloze pamo kanda tumonengaho lyehi Yehova mwatulingila vyuma kana. (Mateu 6:33) Chipwe ngocho, nge natufwelela mazu ahanjikile Yesu, kaha natuzachisa kanawa jimbongo jetu, nakukehesako makumbi akuzata milimo yetu yakumujimba, nakuzata chikuma mulimo wakwambulula. Nge natulinga ngocho, kaha natulimwena chikupu ngwetu Yehova eji kutuzakamanga. Chikupu vene twatela ‘kumakila’ tumone ngwetu Yehova apwa wamwaza.

3. Kweseka naSamu 31:19, vatu muka vaze Yehova eji kulingilanga vyuma vyamwaza?

³ Yehova apwa “ wamwaza kuvyuma vyakuyoya vyosena,” kuhakilako vene navatu vaze kavamutachikizako. (Samu 145:9; Mateu 5: 45) Oloze Yehova eji kukisulanga vaze vamuzanga chikuma nakumuzachila namwono wavo wosena. (Tangenu Samu 31:19.) Tutalenu havyuma vimwe vyamwaza vize Yehova eji kutulingilanga.

4. Yehova eji kusololanga ngachilihi ngwenyi apwa wamwaza kuli vaze navapandama kuli ikiye?

⁴ Nge natukavangizanga vyuma tweji kulinangulanga kuli Yehova, kaha navitukafwa mukuyoya chetu. Chakutalilaho, omu twalinangwile vyavivulu hali ikiye nakuputuka kumuzanga, atukafwile tuhonese vishinganyeka vyavipi nakulihenda kukulinga vyuma vize ahunga. (Kolo. 1:21) Kaha nawa omu twalihanyine kuli Yehova nakutumbapachisa, twamwene ngwetu Yehova apwa wamwaza omu atukafwile tupwenga nachivezu chamwaza nakupwa nausoko wakukola naikiye.—Petu. 1, 3:21.

5. Uno Yehova eji kutulingilanga vyuma muka vyamwaza nge tuli nakwambulula mujimbu?

⁵ Yehova eji kutulingilanga vyuma vyamwaza omu tweji kwazananga mumulimo wakwambulula. Uno mwatwama nasonyi tahi? Vangamba jaYehova vavavulu vatwama nasonyi. Shimbu kanda mupwenga muvangamba jaYehova, pamo mwashinganyekele ngwenu kamweshi kuhasa kuhamuka kuya hembo lyamutu uze kamwatachikizako nakumwambulila mujimbu wamwazako. Oloze oholyapwa muli nakuzata jino ou mulimo chakuzeneka woma. Kaha nawa Yehova namikafwe mulivwise kuwaha kuzata mulimo wakwambulula. Namikafwe nawa mujijila jakulisezaseza. Chakutalilaho, eji kumikafwanga muunde muchima nge mutu muli nakwambulila mwamyamba mazu amapi. Eji kumikafwanga nawa mwanuke chisoneka mwatela kushimutwila namutu uze nawahilila. Kaha nawa eji kumikafwanga mutwaleho lika kwambulula numba tuhu vatu navakana kumivwilila.—Yele. 20:7-9.

6. Uno vyuma eji kutunangulanga Yehova vyasolola ngachilihi nge apwa wamwaza?

⁶ Yehova asolola nawa ngwenyi apwa wamwaza kuli etu hakutunangula mwakuzachila mulimo wakwambulula. (Yowa. 6:45) Kukukunguluka chamukachi kachalumingo, tweji kutalanga jivindiyo jakusolola jijila jakushimutwilamo navatu, kaha veji kutukolezezanga tuzachise jijila kana mumulimo wakwambulula. Hakavanga, chinahase kutukaluhwila kuzachisa jila yayihya hakwambulula, oloze kutwala muze tunahase jino kumona ngwetu jila kana yamwaza, kaha yili nakutukafwa tuhete vatu vamungalila yetu kumuchima. Kaha nawa kukukunguluka chachikungulwilo nachangalila, veji kutukolezezanga tuzachise jijila jakulisezaseza jize kanda tuzachisengaho lyehi hakwambulula. Hakavanga chinahase kutukaluhwila kuzachisa jijila kana oloze nge natulihakilako, kaha Yehova mwatukisula. Tushimutwilenu havyuma vimwe vyamwaza mwatulingila Yehova nge natulisuula kumuzachila kuzachisa jijila jajihya chamokomoko nachiyoyelo chetu. Kufumaho natushimutwila havyuma twatela kulinga mangana tutohwese mulimo wetu wakwambulula.

7. Vyuma muka vyamwaza vinahase kufumamo kachi nge namufwila kutohwesako mulimo wenu wakwambulula?

⁷ Tweji kupandamanga chikuma kuli Yehova. Tutalenu hachakutalilaho chakalama umwe walijina lyaSamuel napuwenyi vaze vatwama mulifuchi lyaColombia. * Ava valunga napwevo vapwile nakuzata upayiniya muchikungulwilo chavo, oloze vasakile kutohwesako mulimo wavo wakwambulula hakuya nakukafwa chikungulwilo chize chapwile nakusakiwa vaka-kukafwa. Hakusaka vatesemo chuma valitomenene, valisuwile kwalumununako vyuma vimwe mukuyoya chavo. Ndumbwetu Samuel ambile ngwenyi: “Twakavangijile mazu ahali Mateu 6:33, kaha twakeheseleko vyakulandalanda. Oloze chatukaluhwilile kuseza zuvo yetu yize vatungile mujila yamwaza.” Oloze omu vayile nakuzachila kuchikungulwilo cheka, vamwene jino ngwavo vapwile nakusakiwa kaha jimbongo jajindende jakulikafwa najo.  Samuel ambile ngwenyi: “Tunamono jino omwo Yehova ali nakutukafwa nakukumbulula kulomba chetu. Tunamono ngwetu Yehova ali nakutwivwila kuwaha nakutusolwela zangi mujijila jize katwashinganyekeleko.” Kutala nayenu munahase kutohwesako mulimo wenu wakwambulula tahi? Nge mukiko, kaha tachikizenu ngwenu munahase kupandama chikuma kuli Yehova kaha nawa mwamizakama.—Samu 18:25.

8. Vyuma muka natulinangula kumazu ahanjikile Ivan napuwenyi Viktoria?

⁸ Natulivwisa kuwaha kuzachila Yehova. Twivwenu mazu ahanjikile Ivan napuwenyi Viktoria, vaze veji kuzatanga upayiniya mulifuchi lyaKyrgyzstan. Vashiwishileko chiyoyelo chavo mangana valisuule kuzata kala milimo yamuliuka kuhakilako vene namilimo yakutungatunga. Ndumbwetu Ivan ambile ngwenyi: “Twazachilenga nangolo mumilimo yosena yize vatuhanyinenga. Numba tuhu twazeyelenga hanyima yakuzata, oloze twawahilililenga hakutachikiza ngwetu twapwile nakuzachila Yehova. Kaha nawa twapwile vakuwahilila mwomwo twatungile masepa vavahya nakwanuka nawa vyuma yamwaza vize twaliwanyinenga navyo.”—Mako 10:29, 30.

9. Vyuma muka nalingi ndumbwetu uze aviza mangana atohweseko mulimo wenyi wakwambulula, kaha vyuma muka vyamwaza vinafumumo?

⁹ Tunahase kulivwisa kuwaha kuzachila Yehova numba tuhu tuli nakumona ukalu. Tutalenu chakutalilaho chandumbwetu wakashinakaji Mirreh, wakuWest Africa uze apwa tuliwe. Ou ndumbwetu apwile ndotolo. Kahomu atambwile litayamende, aputukile kuzata upayiniya. Ndumbwetu Mirreh aviza musongo wamuvifuwa, ngocho eji kuzatanga kaha ola yimwe hakwambulwila kuzuvo hizuvo. Oloze eji kuzatanga jola jajivulu hakwambulwila kuvihela vyasanga. Atwama namaungeji akukindulukila amavulu navilongesa vyaMbimbiliya vyavivulu, kaha vamwe eji kuvambulilanga kuzachisa shinga. Vyuma muka vyeji kukafwanga ndumbwetu Mirreh azachile Yehova? Ambile ngwenyi: “Mwomwo ngwazanga chikuma Yehova naKulishitu Yesu. Kaha nawa ngweji kulombanga Yehova angukafwe ngumuzachile noho hakumina ngolo jami.”—Mateu 22:36, 37.

10. Kweseka namazu ahali WaPetulu 1, 5:10, vyuma muka navanganyala vatu vaze navafwila kuzachila chikuma Yehova?

¹⁰ Yehova eji kutunangulanga milimo yakulisezaseza. Ndumbwetu Kenny, uze apwa payiniya mulifuchi lyaMauritius, etavilile chishina kana. Omu alinangwile muchano, afumine hayunivesiti, kaha vamumbapachishile, kutwala muze aputukile kuzata upayiniya. Ambile ngwenyi, “Ngwasakile kulondezeza kapolofweto Isaya uze ambile ngwenyi: ‘Yami uno. Ngutume.’” (Isa. 6:8) Ndumbwetu Kenny nazate milimo yakutungatunga yamuliuka yayivulu, kaha nawa nazatenga mulimo wakwalumuna mikanda yahanjika haMbimbiliya mulilimi lyenyi. Ambile ngwenyi: “Vandumbwami vangunangwile vyuma vyavivulu vize vyangukafwile nguzate kanawa milimo yami.” Oloze ngwalinangwile nawa vyuma vyeka. Ambile nawa ngwenyi: “Ngwalinangwile vyuma vize kangwatachikijileko nakupwa nawa navilinga vize vyangukafwile nguzachile kanawa Yehova.” (Tangenu WaPetulu 1, 5:10.) Nayenu nawa munahase kwashiwisako chiyoyelo chenu mangana Yehova aminangule milimo yakulisezaseza.

11. Chuma muka valingile vandumbwetu vamapwevo vamuSouth Korea mangana vazane mumulimo wakwambulula, kaha chuma muka chinafumumo? (Talenu muvwimbimbi wahalipapilo lyahelu.)

¹¹ Vandumbwetu vaze vanazachila Yehova hamyaka yayivulu navakiko vanahase kunganyala nge navalinangulako jila yayihya hakuzata milimo yaYehova. Chakutalilaho, omu kuli musongo waCOVID-19, tulama vamuchikungulwilo chamulifuchi lyaSouth Korea vasonekele ngwavo: “Vandumbwetu vamwe vaze vashinganyekele ngwavo kaveshi kuhasa kwambulila vatu mwomwo yakuviza, vali jino nakwambulila vatu kuzachisa polongalamu yahalikina yakuhanjika navatu oku tuli nakulimona. Vandumbwetu vamapwevo vatatu vamyaka yakuhambakana 80 valinangwile kuzachisa polongalamu kana nakuputuka kwazana  mumulimo wakwambulula hakumbi.” (Samu 92:14, 15) Kutala nayenu munahase kutohwesako mulimo wenu wakwambulula nakumakila mangana mumone ngwenu Yehova apwa wamwaza tahi? Tutalenu havyuma vimwe mwatela kulinga vize navimikafwa mangana mutesemo kulinga chuma kana.

12. Yehova afwelelesa vyuma muka vaze vapendamina hali ikiye?

¹² Pendaminenunga hali Yehova. Yehova atufwelelesa ngwenyi mwatukisula kachi nge natumufwelela nakumuzachila nangolo jetu josena. (Mala. 3:10) Ndumbwetu wapwevo Fabiola wamulifuchi lyaColombia amwene omu Yehova ateselemo chuma kana kuli ikiye. Afwililile kuzata upayiniya washimbu yosena hanyima yakumumbapachisa. Oloze hakuwana nge ikiye kaha apwile hamilimo, ngocho akafwilenga lunga lyenyi kuzakama tanga. Kahomu apwile kwakamwihi nakutambula litayamende, alombele chikuma kuli Yehova amukafwe. Ambile ngwenyi: “Kakavulu jimbongo jalitayamende jeji kushimbulanga, oloze jimbongo jami vanguhanyinejo omu mwahichile kaha kakweji umwe kufuma haze ngwatambwile litayamende. Chuma kana chapwile chakukomwesa.” Omu mwahichile tukweji vavali, alisonekesele upayiniya washimbu yosena. Oholyapwa jino ali namyaka yakuhambakana 70, kaha nazate mulimo waupayiniya hamyaka yakuhambakana 20. Mumyaka kaneyi, nakafwe vatu 8 valinangule muchano nakuvambapachisa. Ambile ngwenyi: “Shimbu jimwe ngweji kuzeyanga, oloze Yehova eji kungukafwanga hakumbi hakumbi ngutwaleho lika kuzata mulimo wami waupayiniya.”

13-14. Vyakutalilaho muka vinahase kutukafwa tufwelele Yehova nakutesemo vyuma natulitomena kulinga?

 ¹³ Linangulenu kuvatu vaze vapendaminyinenga hali Yehova. MuMbimbiliya mwatwama mijimbu yavatu vaze vazachilililenga Yehova nangolo javo josena. Kakavulu ava vangamba jaYehova valingilengako chuma chimwe shimbu kanda Yehova avakisule. Chakutalilaho, Apalahama vamukiswile kuli Yehova hanyima yakuseza lifuchi lyenyi ‘nakuya kuchihela kuze katachikijileko.’ (Hepe. 11:8) Yakova nawa vamukiswile hanyima yakulipika nakangelo. (Kupu. 32:24-30) Kaha nawa omu vaIsalele vapwile kwakamwihi nakwingila muLifuchi lyaLushiko, vatu vahashile kuzauka kalwiji Yotau omu vapilishitu valyachile mahinji avo muKalwiji Yotau.—Yoshu. 3:14-16.

¹⁴ Munahase nawa kulinangula kuli vandumbwetu vamakumbi ano vaze vanapendaminanga hali Yehova nakutesamo vyuma valitomenene. Chakutalilaho, ndumbwetu Payton napuwenyi Diana, valivwishilenga kuwaha kutanga mijimbu yavandumbwetu vaze vazachilililenga Yehova nangolo javo josena. Mijimbu yimwe vatangilenga shina yize yatwama havihande vyakwamba ngwavo “Valisuwile naMuchima Wosena.” * Ndumbwetu Payton ambile ngwenyi: “Omu twatangilenga mijimbu kana, twevwilenga kwijiva nge tuli nakumona mutu uze anakulya kulya chiyema. Kutanga chikuma mijimbu kana chatulingishile tufwile ‘kumakila mangana tumone ngwetu Yehova apwa wamwaza.’” Nakushimbula chiku, Payton napuwenyi Diana vayile nakuzachila kuze kwapwile nakusakiwa kukafwa. Kutala mwatangaho lyehi vihande vyakwamba ngwavo “Valisuwile naMuchima Wosena” tahi? Kaha nawa kutala mwatalaho lyehi jivindiyo jakwamba ngwavo Kwambulwila kuJingalila Jakwakusuku muAustralia, neyi yakwamba ngwavo Kwambulwila kuJingalila Jakwakusuku muIreland jize jatwama ha jw.org tahi? Vyuma tunavuluka vinahase kumikafwa muwane omwo munahase kutohwesako mulimo wenu.

15. Uno kulikata navatu vaze vahaka vyaWangana kulutwe nachitukafwa ngachilihi?

¹⁵ Likatenu navatu vaze vahaka vyaWangana kulutwe. Chapwa chachashi kulya vyakulya vize kanda tulyengangaho lyehi kachi nge tuli navatu vaze vavizanga. Chochimwe nawa, nge natulikatanga navatu vaze vazanga kuzachila Yehova, kaha nachitukafwa nayetu tuwane jijila jakulisezaseza jize najitukafwa tuzachile chikuma Kalunga. Kahomu mukiko chapwile kuli ndumbwetu Kent napuwenyi Veronica. Kent ambile ngwenyi: “Masepa jetu navausoko wetu vatukolezezelenga tweseke kuzachisa jijila jakulisezaseza hakuzachila Yehova. Kaha nawa twamwene ngwetu kulikata navaze vatondelenga chatete Wangana chatulingishile tufwile kuzachisa jijila jajihya.” Oholyapwa, ndumbwetu Kent napuwenyi Veronica vali nakuzata upayiniya wakulipwila mulifuchi lyaSerbia.

16. Kweseka nachifwanyisa ahanjikile Yesu chatwama hali Luka 12:16-21, mwomwo ika twatela kulisuula kulingako vyuma vimwe?

¹⁶ Lisuulenu kuzachila Yehova. Kwivwisa kuwaha Yehova kachalumbununa nge twatela kulitwamina kulinga vyuma vyosena vize twazangako. (Kwambu. 5:19, 20) Oloze kachi nge natulitwamina kuzachila chikuma Yehova mwomwo yakuhona kwecha vyuma vimwe vize twazanga, kaha tunahase kulimbenja ngana muze alimbenjele uze lunga ahanjikile Yesu muchifwanyisa, uze alilunjikilile luheto nakuvulyama Kalunga. (Tangenu Luka 12:16-21.) Ndumbwetu umwe walunga walijina lyaChristian, uze atwama muFrance ambile ngwenyi, “Kangwazachishilenga kanawa lwola lwami nangolo jami hakuzachila Yehova nahakuzakama tanga yamiko.” Ndumbwetu Christian napuwenyi vashinganyekele kuzata upayiniya. Oloze hakusaka vatesemo kuzata upayiniya, vechele milimo. Hakusaka vawane vyakulikafwa navyo, vaputukile kuzata mulimo wakukombakomba nakusuuluka najimbongo vapwile najo. Uno  vawahililile nachuma valisuuwile kulinga tahi? Ndumbwetu Christian ambile ngwenyi, “Tweji kuwahililanga chikuma kuzata mulimo wakwambulula nakumona nawa vilongesa vyaMbimbiliya navatu vaze tweji kukindulukilangako navalinangula vyaYehova.”

17. Mwomwo ika chinahase kutukaluhwila kuzachisa jila yayihya hakwambulula?

¹⁷ Fwilenu kuzachisa jijila jajihya hakwambulula. (Vili. 17:16, 17; 20:20, 21) Ndumbwetu Shirley, uze apwa payiniya muUnited States, nalumunako jila yakwambulwilamo omu kuli musongo waCOVID-19. Hakavanga, evwilenga uli wakwambulula kuzachisa shinga. Kahomu kalama wakujinguluka atambukilile chikungulwilo chavo, vamunangwile mwakwambulwila kuzachisa shinga. Ngocho lwola lwosena aputukile kuzachisa jila kana hakwambulula. Ambile ngwenyi: “Hakavanga, ngwevwilenga woma kuzachisa shinga hakwambulula, oloze oholyapwa jino nguli nakulivwisa kuwaha kuzachisa jila kana. Tuli nakwambulila vatu vavavulu kuhambakana muze twalingilenga hakwambulwila kuzuvo hizuvo.”

18. Vyuma muka navitukafwa nge kuli vyuma vimwe vize navituhonesa kutohwesa mulimo wetu wakwambulula?

¹⁸ Litomenenu kulinga chuma nakuchitesamo. Kachi nge tuli muukalu, twatela kulomba Yehova atukafwe tushinganyeka vyuma twatela kulinga kutalisa kuukalu kana. (Vishi. 3:21) Ndumbwetu wapwevo Sonia, uze apwa payiniya washimbu yosena mulizavu lize lyazachisa lilimi lyaRomany muEurope, ambile ngwenyi: “Ngwasaka kusoneka vyuma nangulitomena halipapilo nakulihaka haze ngunahase kulimona kala lwola. Kaha nawa ngwafunjikile jijila jivali halipapilo likwavo jize jayile kuvihela vivali vyakulihandununa nakulihaka hamesa. Shikaho nge nguli nakusaka kulinga vyuma vimwe, ngweji kutalanga hali jize jijila ngunafunjika nakumona numba nge vyuma ngunasakula kulinga navingukafwa ngutesemo vyuma ngwalitomena nyi chiku. “ Ndumbwetu Sonia kasaka kwechelela ukalu wenyi umuhombeseko. Ambile ngwenyi: “Chapwile kuli yami ivene kwechelele ukalu unguhonese kutesamo vyuma ngwalitomena chipwe kulingako vyuma vize navingukafwa ngutesemo vyuma ngwalitomena.”

19. Chuma muka twatela kufwila kulinga?

¹⁹ Yehova eji kutukisulanga mujijila jakulisezaseza. Natusolola ngwetu twasakwilila Yehova havyuma vyosena eji kutulingilanga hakumuzachila kweseka noho hakumina ngolo jetu. (Hepe. 13:15) Twatela kuzachisa jijila jakulisezaseza mangana tutohwese mulimo wetu wakwambulula. Nge natulinga ngocho, kaha Yehova mwatukisula chikuma. Shikaho hakumbi hakumbi, tufwilenunga kuwana jijila jize najitukafwa ‘tumakile nakumona ngwetu Yehova apwa wamwaza.’ Nge natulinga ngocho, kaha natupwa ngana mwaYesu, uze ambile ngwenyi : “Kulya chami shina kulinga mwaya muchima wayauze angutumine nakukumisa mulimo wenyi.”—Yowa. 4:34.