1-2. Ka luwore gi Zaburi 34:8, ere kaka wan wawegi wanyalo puonjore e wi ber mar Jehova?

PARIE ni osiepni moro omiyi chiemo moro ma pok nibiloga nyaka nene. Inyalo fwenyo gik mopogore opogore kuom chiemono kokalo kuom ng’iye, ng’ueye, somo kaka otede, kata penjo paro ma jomamoko nigo kuom chiemono. Kata kamano, yo achiel kende ma nyalo konyi ng’eyo mitne en bile in iwuon.

² Wanyalo puonjore e wi ber mar Jehova kokalo kuom somo Muma kod bugewa ma lero Muma, kaachiel gi sama wawinjo ka Jokristo wetewa wuoyo kuom gik mabeyo ma Jehova osetimonegi. Kata kamano, mondo wane kaka Jehova ber, nyaka wan wawegi wabil berne. (Som Zaburi 34:8.) Wati ane gi ranyisi moro mondo wane kaka wanyalo timo mano. Nyalo bedo ni wagombo tiyo ne Jehova gi thuolowa duto e migawo moro makende. Mondo wachop e migawono, nyalo dwarore ni wadag e ngima mayot. Samoro wasesomo nyadinwoya singo ma Yesu nochiwo ni ka waketo Pinyruoth obedo mokwongo, to Jehova biro miyowa gik moko duto ma wachando. Kata kamano, nyalo bedo ni wan wawegi to pok waneno ka singono chopo e ngimawa. (Mat. 6:33) To nikech wan gi yie kuom singo ma Yesu nochiwono, wabiro temo kar nyalowa mondo kik wang’iewre gi gik ma ok ochuno, watim lokruoge moko e tijewa mag andika, kendo wamed thuolo ma watiyogo e tij lendo. Sama watimo kamano, wabiro chako neno wan wawegi kaka Jehova miyowa gik ma wachando, to mano miyo ‘wabilo ber mar Jehova.’

3. Ka luwore gi Zaburi 16:1, 2, gin jomage ma Jehova timonegiga gik mabeyo miwuoro?

³ ‘Jehova timo maber ne ji duto,’ moriwo nyaka joma ok  ong’eye. (Zab. 145:9; Mat. 5:45) Kata kamano, otimoga gik mabeyo miwuoro ne joma ohere kendo ma tiyone gi chunygi duto. (Som Zaburi 16:1, 2.) Wane ane moko kuom gik mabeyo ma Jehova osetimonwa.

4. Ere kaka Jehova nyisoga berne ne joma ochako sudo machiegni kode?

⁴ Sa asaya ma watiyo gi puonj mabeyo ma wayudo kuom Jehova, wanenoga kaka puonjgo konyowa. Kuom ranyisi, e kinde ma ne wahango puonjore wechene kendo wachako here, ne okonyowa golo paro kod timbe ma ne nyalo miyo obed mabor kodwa. (Kol. 1:21) Kendo e kinde ma ne wachiwone ngimawa mi obatiswa, ne omiyowa gik mabeyo momedore, kuom ranyisi chuny maler. Bende, noywayowa ire mondo wabed osiepene.​—1 Pet. 3:21.

5. Ere kaka wanenoga ber mar Jehova e tijwa mar lendo?

⁵ Wanenoga ber mar Jehova bende sama watimo tij lendo. Dibed ni in ng’at ma luor-luor? Nitie jotich Jehova mang’eny ma bende luor-luorga. Nyalo bedo ni ka ne pok ibedo Janeno mar Jehova, ne ok iparga ni chieng’ moro ninyalo chung’ e dhood ng’at mikia kipuonje wach ma pok nowinjoga. Kata kamano, tinde to itimoga mano nyading’eny. Jehova bende osekonyi ma tinde ihero tij lendo ahinya. Bende, iseneno kaka Jehova siri e yore mamoko mang’eny. Osekonyi bedo gi chir sama iromo gi ng’at ma kwedo wach ma ilando. Bende, osekonyi paro ndiko mowinjore isom ne ng’at moyie winjo wach milando, kendo osemiyi teko mar dhi nyime lendo kata mana e alwora ma ji ok rwakie wach.​—Jer. 20:7-9.

6. Ere kaka yore ma Jehova tiegowagago nyisowa berne?

⁶ Yo machielo ma Jehova osenyisowago berne en tiegowa ne tij lendo. (Joh. 6:45) E chokruogewa ma kor juma, wajaneno yore ma wanyalo chako wuoyogo gi ji, kendo ijiwowaga mondo wati kodgi sama walendo. Mokwongo okwongo, wanyalo bedo maluor tiyo gi yo moro manyien e lendo, to sama watemo tiyo gi yorno, wayudoga nyak mang’eny. Bende, e chokruogewa mag kanyakla kod chokruogewa madongo, ojajiwwa ni watem tiyo gi yore manyien mag lendo ma ne pok watiyogago. Mano nyalo dwaro ni wawere gi yore ma wasebedo ka watiyogo. To sama watimo kamano, Jehova guedhowaga ahinya. Koro, wadwaro neno moko kuom yore ma Jehova biro guedhowago sama wanyiso ni wagene kuom tiyo gi yore manyien mag lendo, kata bed mana ni wan e chal mane. Kae to wabiro neno yore mamoko ma wanyalo medo tiyonego Jehova e okang’ momedore.

7. Gin gueth mage ma wayudoga sama watimo kinda mondo wati ne Jehova kuom thuolo momedore?

⁷ Wamedo sudo machiegni ahinya gi Jehova. Ne ane ranyisi mar jaduong’-kanyakla moro miluongo ni Samuel * modak gi jaode e piny Colombia. Ne gin jopainia e kanyaklagi, kata kamano, ne gidwaro timo momedore e tij lendo kuom konyo kanyakla machielo ma ne jolendo dwaroree moloyo. Mondo gitim kamano, ne dwarore ni gituonre gik moko ma ne gihero ahinya. Samuel wacho kama: “Ne watiyo gi puonj ma yudore e Mathayo 6:33 kendo ne waweyo ng’iewo gik ma ok ochuno. Kata kamano, gima ne ok yotnwa weyo ne en odwa ma ne wahero nikech ne wagere kaka ne wadwaro, kendo ne waonge gi gowi moro amora mar odno.” Ka ne gidar ma gidhi e migawogi manyienno, ne gifwenyo ni ne ginyalo dak gi pesa matin ahinya ka gipimo gi ma ne gitiyogo ka ne pok gidar. Samuel wacho kama:  “Waseneno wawegi kaka Jehova tayowa kod kaka odwoko lamowa. Waneno kaka Jehova mor kodwa, kendo kaka osebedo konyisowa herane e yore ma ne pok wanenoga.” Be in bende inyalo manyo yore mag tiyo ne Jehova e okang’ momedore? Ka en kamano, bed gadier ni ibiro sudo machiegni gi Jehova kendo obiro riti.​—Zab. 18:25.

8. En ang’o mipuonjori kuom Ivan gi Viktoria?

⁸ Wabedo mamor sama watiyo ne Nyasaye. Ne ane ranyisi mar Owadwa Ivan kod Viktoria chiege ma gin jopainia e piny Kyrgyzstan. Ne giyiero ni gibiro dak e ngima mayot mondo giyud thuolo mar chiwore tiyo e migawo moro amora, moriwo nyaka mar gero utewa mag lamo. Ivan wacho kama: “Ne watimoga kinda e migawo moro amora mar gedo ma nomiwa. Kata obedo ni ne wabedoga mool ahinya e giko odiechieng’, ne wawinjoga ka wan gi chuny mokue kendo wamor, nikech ne wang’eyo ni watiyo gi tekowa e tij Pinyruoth. Gima chielo ma ne miyowaga mor en ni ne wayudoga thuolo mar ng’ere gi owete gi nyimine mang’eny, kendo ne wabedoga gi kinde mag mor kodgi.”​—Mar. 10:29, 30.

9. En ang’o ma nyaminwa moro ma tuore osetimo mondo omed thuolo motiyogo e tij lendo, to mano osekelo nyak mage?

⁹ Wabedoga mamor e tij Jehova kata sama waromo gi pek moko. Kuom ranyisi, Mirreh ma en chi liel modak e piny moro e West Africa nobedo painia bang’ ka noseritaya e tije mar laktar. Mirreh nigi tuo mar arthritis ma ramoga choke mag del ahinya. Mano miyo ok onyal wuotho ahinya nikech rem ma en-go. Omiyo, onyaloga mana lendo ot ka ot mana kuom sa achiel kende e odiechieng’. Kata kamano, onyaloga lendo kuom seche mang’eny e troli kata mesa, kendo en gi jopuonjre mang’eny kod jomamoko molimoga, ma moko kuomgi otayoga gi simu. Ang’o ma nojiwo Mirreh mondo otim momedore ne Jehova? Owacho kama: “Ahero Jehova kod Yesu Kristo ahinya, kendo alamoga Jehova pile ka akwaye mondo omiya teko mondo atim duto ma anyalo e tije.”​—Mat. 22:36, 37.

10. Ka luwore 1 Petro 5:10, joma yiega mondo Jehova otieggi yudoga ang’o?

¹⁰ Jehova miyowaga tiegruok momedore. Kenny ma en painia modak e piny Mauritius noneno adier mar wechego. Ka ne opuonjore adiera, noweyo sombe mar yunivasiti, mobatise, kendo nochako tiyo ne Nyasaye kuom thuolone duto. Owacho kama: “Agomboga ahinya mondo ngimana ochal gi mar janabi Isaya ma nowacho niya: ‘An ka! Ora!’” (Isa. 6:8) Kenny osetimo tije mopogore opogore mag gero ute mag siro lamo madier. Bende, osekonyo e tij loko buge ma lero Muma e dhoggi. Owacho kama: “Nayudo tiegruok ma nokonya bedo gi lony ma ne dwarore e migawo moro amora ma nomiya.” To tiegruok e timo tijego kende ne ok oromo. Omedo wacho kama: “Ne opuonja bende fwenyo kuonde ma naremie kaachiel gi kido mabeyo ma nonego abedgo mondo amor Jehova.” (Som 1 Petro 5:10.) Donge inyalo nonori mondo ine ka in bende inyalo yudo tiegruok momedore ma Jehova chiwo?

11. Gin kinda mage momedore ma nyimine moko e piny South Korea notimo mondo gilendi, to mano nokelo ber mage? (Ne picha manie nyim gaset.)

¹¹ Kata mana joma osetiyo ne Jehova kuom higni mang’eny bende yudoga ber sama giyudo tiegruok e yo manyien mar timo gik moko. E kinde mag korona, jodong-kanyakla e kanyakla moro man South Korea nondiko kama: “Jolendo moko ma chon ne paro ni ok ginyal tiyo tij lendo nikech ne gituore, sani lendo ne ji e yor vidio (videoconferencing). Nyiminewa moko adek ma hikgi osekalo 80 nochako tiyo  gi yorno, kendo tinde gilendo pile .” (Zab. 92:14, 15) Donge inyalo medo thuolo mitiyogo e tij lendo mondo in bende ibilie ber mar Jehova e yo momedore? Ne ane moko kuom okenge ma nyalo konyi timo kamano.

12. En ang’o ma Jehova singo ne joma ogene?

¹² Puonjri keto geno mari kuom Jehova. Osingonwa ni obiro olonwa gueth mang’eny ka wagene kendo ka watiyone gi chunywa duto. (Mal. 3:10) Nyaminwa moro miluongo ni Fabiola e piny Colombia noneno gi wang’e kaka Jehova nochopo singono e ngimane owuon. Nogombo bedo painia mapile bang’ ka nosebatise. Kata kamano, ne dwarore ni oti mondo orit joode. Omiyo, ka ne ochiegni ritaya, nokwayo Jehova gi kinda mondo okonye. Owacho kama: “Thothne bang’ ka ng’ato oseritaya, kinde malach kaloga ka pok opwodh penson modhi yudo. An to mara nopwodh mana bang’ dwe achiel kende. Ne chalo mana ka hono!” Bang’ dweche ariyo nobedo painia. Sani ojahigni 70 gi wiye, kendo osebedo japainia kuom higni mokalo 20. Chakre nobed painia, osekonyo ji aboro mochiwo ngimagi ne Jehova mobatisgi. Owacho kama: “Kata obedo ni kinde moko awinjoga ka aonge teko, Jehova konyaga pile ka pile mondo amakra gi chenrona.”

13-14. Gin ranyisi kaka mage ma nyalo konyowa keto genowa kuom Jehova mondo wamed thuolo ma watiyonego?

¹³ Puonjri kuom joma nogeno Jehova. Muma oting’o ranyisi mag joma notimo kinda ahinya  e tij Jehova. Thothne, jotich Jehovago e ma ne nyaka kaw okang’ mokwongo ka ne pok giyudo migepe momedore moa kuom Jehova. Kuom ranyisi, Jehova noguedho Ibrahim mana bang’ ka Ibrahim noseweyo dalane mi ochako wuoth kodhi ‘ka ma ne ok ong’eyo.’ (Hib. 11:8) Jakobo noyudo gueth makende mana bang’ ka nosekedo gi malaika. (Cha. 32:24-30) Ka ne oganda mar Israel chiegni donjo e Piny ma Nosingi, pi aora Jordan nochung’ mana bang’ ka jodolo nosenyono pigno, kendo mano nomiyi ji ong’ado aorano.​—Jos. 3:14-16.

¹⁴ In bende inyalo yudo ber mang’eny ka inono ranyisi mag Joneno me kindegi moseketo genogi kuom Jehova ma gichiwore mondo giti ne Jehova kuom thuolo momedore. Kuom ranyisi, owadwa moro miluongo ni Payton kod Diana jaode noheroga somo sula ma wuoyo kuom owete gi nyimine ma osechiwore mondo giti ne Jehova kuom thuolo momedore, kuom ranyisi, sula mag “Ne Gichiwore Giwegi ma Onge Achune.” * Payton wacho kama: “Sama ne wasomo sulago, ne wachalo mana ka joma ng’icho sama ng’ato chamo chiemo moro mamit. Kaka ne wamedo ng’icho, e kaka wan bende ne wagombo ‘bilo mondo wane kaka Jehova ber.’” Gikone, Payton gi Diana nodar modhi e alwora ma jolendo dwaroree ahinya. Be in bende isesomoga sulago? To be iseneno vidio mar Kuhubiri Katika Eneo la Mbali​—Australia kod Kuhubiri Katika Eneo la Mbali​—Ireland ma yudore e websaitwa mar jw.org/sw? Vidio kod sula kaka mago bende nyalo konyi neno yore minyalo tiyonego Jehova kuom thuolo momedore.

15. Ere kaka osiepe mabeyo nyalo konyowa?

¹⁵ Yier osiepe mabeyo. Yot mondo wachak hero chiemo moro ka osiepewa ohero chiemono. Kamano bende, ka wamako osiep gi joma oketo tij Jehova mokwongo e ngimagi, mano biro jiwowa mondo wan bende wamany yore ma wanyalo medogo thuolo ma watiyonego Jehova. Mano e gima notimore ne owadwa miluongo ni Kent kod Veronica jaode. Kent wacho kama: “Osiepewa kod joodwa ne jiwowaga mondo wamany yore ma ne wanyalo tiyonego Jehova kuom thuolo momedore. Ne wafwenyo ni mako osiep gi joma oketo Pinyruoth mokwongo e ngimagi ne miyowa chir mondo wan bende wachiwre ne Jehova e okang’ momedore.” Sani Kent gi Veronica gin jopainia makende e piny Serbia.

16. Ka luwore gi ngero ma ne Yesu ogoyo e Luka 12:16-21, ang’o momiyo dwarore ni wayie tuonore gik mwahero mondo wati ne Jehova?

¹⁶ Yie tuonori gik mihero nikech Jehova. Ok ochuno ni wawe gik moko duto mwahero mondo wamor Jehova. (Ekl. 5:19, 20) Kata kamano, ka po ni ok wanyal tiyo ne Jehova kuom thuolo momedore mana nikech ok wadwar weyo gimoro mwahero ahinya, mano nyalo miyo wachal gi ng’at ma ne Yesu owacho e ngero moro, ni notimo kinda mondo obed gi gik mang’eny mabeyo to ne ok odewo Nyasaye. (Som Luka 12:16-21.) Owadwa moro miluongo ni Christian modak e piny France wacho kama: “Ne ok amiga Jehova kod jooda tekona kod thuolona kaka dwarore.” Omiyo, en gi jaode ne ging’ado ni ne gidhi bedo jopainia. Kata kamano, mondo gibed jopainia, ne dwarore ni giwe tijegi mag andika. Ne gichako ohala moro mar timo ler mondo giyud kaka ne ginyalo konyore, kendo ne gipuonjore dak gi gik matin. Be chiwruok ma ne gitimono ne okonyogi e yo moro  amora? Christian wacho kama: “Sani wayudo mor e tij lendo moloyo chon. Bende, wabedoga mamor ahinya sama wapuonjo ji Muma kendo limogi mondo wapuonjgi e wi Jehova.”

17. En ang’o ma nyalo monowa tiyo gi yore manyien mag lendo?

¹⁷ Tem tiyo gi yore manyien mag lendo. (Tich 17:16, 17; 20:20, 21) Nyaminwa Shirley modak e piny Amerka ne nyaka tim lokruok moko e tije mar lendo e kinde tuo mar korona. Ne oluor lendo gi simu. Kata kamano, bang’ ka nosetiege e kinde limbe mar jarit-alwora, nochako lendo gi simu pile. Owacho kama: “Ka nachako, naluor. Sani to ahero yor lendoni ahinya. Sani walendo ne ji mang’eny moloyo kaka ne walendonegiga ot ka ot!”

18. En ang’o ma nyalo konyowa kedo gi pek ma wanyalo romogo sama wang’ado ni wadwaro tiyo ne Nyasaye kuom thuolo momedore?

¹⁸ Los chenro mar gima idwaro timo, kendo itim kinda mar chopo e gino. Sama waromo gi pek moko, walemoga kendo manyo kaka wanyalo loyo pekgo. (Nge. 3:21) Sonia ma en painia mapile e grup moro miwachoe dho Romany e pinje mag Europe, wacho kama: “Ajandikoga gik ma daher timo e otas moro, kae to aketo otasno kama anyalo nenee. E mesana, an-ga gi picha mar nderni ariyo ma dhi kuonde ariyo mopogore. Sama adwaro timo yiero moro, ang’iyoga pichano, kae to apenjora ni, ‘Yiero ma adwa timoni biro miyo aluw ndara mane e kind nderni ariyogi?’” Sonia temoga ahinya mondo pek moromogo kik nyos chunye. Owacho kama: “Chandruok ka chandruok manyien ma aromogago nyalo chalo gi chiel ma geng’ona dhi kamoro, kata olalo ma konya chopo kamoro. Mano biro luwore gi kaka aneno chandruogno.”

19. En ang’o monego wang’ad e chunywa ni wabiro timo?

¹⁹ Jehova guedhowaga e yore mang’eny. Wanyalo nyiso ni wamor gi guethgo kuom timo duto mwanyalo mondo wapake. (Hib. 13:15) Mano nyalo riwo manyo yore mwanyalo medo tiyonego Jehova kuom thuolo momedore, mondo omed guedhowa. Odiechieng’ kodiechieng’, wamanyuru yore ma wanyalo medo ‘bilogo ber mar Jehova mondo wane kaka ober.’ Mano biro miyo wan bende wawach kaka Yesu, ma nowacho ni: “Chiemba en timo dwaro mar ng’at ma ne oora kendo mondo atiek tichne.”​—Joh. 4:34.