1-2. Sâm 34:8-a sawi angin, engtin nge Jehova ṭhatzia chu kan hriat theih?

I LA ei ngai miah loh thil eng emaw pêk i ni angah han inchan teh. Chu ei tûr chungchâng chu a lan dân te, a rim te, an siamna bâwlhlo te, leh mi dangte hnêna an tui tih zawng a nih leh nih loh zawhna aṭangin i hre thei a. Mahse, i ngainat zâwng a nih leh nih loh hriat i duh chuan, nangmah ngeiin i tem chhin a ngai a ni.

² Bible leh kan thu leh hla chhuahte chhiarna aṭang leh mi dangte’n Jehova malsâwmna an dawn dân chungchâng an sawite ngaihthlâkna aṭangin Jehova ṭhatzia chu kan hre thei a. Mahse, keimahni ngeiin kan “tem chhin” hunah chauh, Jehova ṭhatzia chu kan hre thiam tak tak thei ang. (Sâm 34:8 chhiar rawh.) Chutianga kan tih theih dân chu heti hian entîrna han pe ta ila. Hunbi kima rawngbâwlna pêng pakhatah inhman i duh a; mahse, chutianga ti tûr chuan i nun i tihsamkhai a ngai pawh a ni thei. Kan nuna Lalram kan dah hmasak chuan, kan mamawh tak takte chu Jehova’n min pe ang tih Isua thusawi chu kan hre fo va; mahse, a mi mal takin chu thutiam thlen famkimna chu kan la tawng lo pawh a ni thei bawk. (Mt. 6:33) Chuti chung pawhin, Isua thutiam chu ring tlatin kan sum hman zâtte leh kan hnathawh hunte chu kan titlêmin, rawngbâwlnaah kan inhmang a ni. Chutianga tihna aṭangin, Jehova chuan kan mamawhte chu min ngaihsak tak zet tih mahni ngeiin kan tawng a. A mi mal takin A ṭhatzia chu kan “tem chhin” a ni.

3. Sâm 16:1, 2-na nêna inmilin, tute’n nge Jehova ṭhatna dawng?

³ Jehova chu amah hre lotute pawh tiamin, “engkim chungah pawh a ṭha a.” (Sâm 145:9; Mt. 5:45) A bîk takin, amah  hmangaihtute leh thinlung zawng zawnga a rawngbâwltute chuan a malsâwmna tam tak an dawng a ni. (Sâm 16:1, 2 chhiar rawh.) Jehova ṭhatna kan hlâwkpui dân kawng ṭhenkhat hi lo chhinchhiah ang che.

4. Jehova’n amah hnaih tlattute hnênah engtin nge a ṭhatzia a lantîr?

⁴ Jehova hnên aṭanga kan thil zirte kan nunpui apiangin kan nunah a ṭha lama nghawng a neih dân kan hmu a. A chanchin kan zir a, amah hmangaihna kan neih chhoh hian, a duh loh zâwng thilte ngaihtuah leh tih chu bânsan tûrin min ṭanpui a ni. (Kol. 1:21, 22) Jehova hnêna inpumpêka bapatisma kan chan hian, chhia leh ṭha hriatna thiang tak min pêk bâkah, amah nêna inlaichînna ṭha tak kan neih avângin a ṭhatzia chu kan hre chiang lehzual a ni.—1 Pet. 3:21.

5. Engtin nge Jehova ṭhatzia chu rawngbâwlnaa i tawn?

⁵ Rawngbâwlnaa kan inhman hian Jehova ṭhatzia kan tawng zawm zêl a ni. Mi zakzum tak i ni em? Jehova mite zînga tam tak pawh mi zakzum takte an ni. Jehova Thuhretu i nih hma chuan, i hriat ngai miah lohte kawngka va kik a, Bible chungchâng sawipui chu i ngaihtuah ngai lo pawh a ni thei. Mahse, tûnah chuan tih ṭhanah i nei tawh a. Chu mai ni lovin, Jehova rawngbâwlnaa tel chu nuam i ti tawh hle! Jehova ṭanpuina chu kawng tam takin i dawng bawk. Ani chuan dodâlna i hmachhawn huna muang taka awm tûrin a ṭanpui che a. Tuina lantîrtu in neitu mamawh tak Bible chângte hre chhuak tûrin a ṭanpui che a. Chu bâkah, mite’n kan thuchah ken an ngaihthlâk duh loh hunah pawh rawngbâwlnaa tel zawm zêl tûra i mamawh chakna a pe bawk che a ni.—Jer. 20:7-9.

6. Engtin nge Jehova min zirtîrnate chuan a ṭhatzia a târ lan?

⁶ Jehova chuan rawngbâwlna atâna min zirtîrin, kan chungah a ṭhatzia a lantîr bawk a. (Joh. 6:45) Chawlhkâr chhûng inkhâwmahte chuan ṭha taka buatsaih thusawi dân tûr entîrnate kan ngaithla a, chûngte chu rawngbâwlnaa hmang tûra fuih kan ni. Tih dân thar hman chu a tîrah hreh deuh mah ila, kan han hman chhin hnu chuan kan rawngbâwlna bialah rah ṭha tak a chhuah tih kan hmu pawh a ni thei. Inkhâwmahte leh inkhâwmpuiahte chuan kan la tel ngai miah lohna rawngbâwlna pêng danga tel tûra fuih kan ni bawk. Chu pawh chuan min tizâm mai thei; mahse, chutianga kan ti a nih chuan Jehova’n mal min sâwm ang. Kan dinhmun chu eng pawh ni se, Jehova kan rinchhan a, theih tâwp chhuaha rawngbâwlna pêng danga kan inhman huna kan dawn tûr malsâwmnate chu i lo sawiho vang u. Chumi zawhah, kan rawngbâwlna kan zauh theih dân pawh kan sawiho bawk ang.

7. Kan rawngbâwlna kan zauh hian eng malsâwmnate nge kan dawn?

⁷Jehova kan hnaih lehzual. Colombia rama a nupui nêna rawngbâwla awm kohhran upa Samuel-a * thiltawn hi han ngaihtuah teh. An lawina kohhrana pioneer thawh chu nuam an ti hle a; mahse, an rawngbâwlna zauh va, mamawh zualna kohhrana rawngbâwl chu an duh a ni. Chutianga ti tûr chuan thil ṭhenkhat an chân a ngai a. Unau Samuel-a chuan: “Matthaia 6:33 hi nunpuiin, kan mamawh tak takte chauh kan lei a. Mahse, a harsa ber chu kan in chhuahsan hi a ni. Sum pûk belh miah lova kan duh ang taka kan sak a ni,” tiin a sawi. An rawngbâwlna hmun tharah chuan, chu nupa tuak chuan tûn hmaa an sum lâk luh ṭhin hmun ruk a ṭhena hmun khat chauh ring pawhin an khawsa thei tih an hre ta a. Unau  Samuel-a chuan: “Jehova min kaihhruai dân leh kan ṭawngṭainate a chhan dân chu kan hmu a. Kan la tawn ngai loh dân kawngin, a pawm hlawh leh min hmangaih nia inhriatna kan nei a ni,” tiin a sawi. Kawng eng emaw takin i rawngbâwlna i zauh ve thei ang em? Chutianga i zauh chuan, Jehova i hnaih lehzualin, i mamawhte a pe ang che tih i ring tlat thei a ni.—Sâm 18:25.

8. Ivan-a leh Viktoria-i te thusawi aṭangin eng nge i zir?

⁸Kan rawngbâwlnaah hlimna kan nei. Kyrgyzstan rama pioneer nia rawngbâwl nupa tuak khat Ivan-a leh Viktoria-i te thusawi hi lo chhinchhiah teh. Biakna atâna hman in sakna lam pawh tiamin, eng chanvo pawh an thawh theih nân an nun an tisamkhai a. Ivan-a chuan: “Kan chanvo dawn apiangah theih tâwp kan chhuah a. Chau hle ṭhîn mah ila, kan tha leh zungte chu Lalram rawngbâwlna atâna kan hmang tih hriatna chuan hahdamna leh lungawina min pe a ni. Ṭhian thar tam tak kan neih bâkah, thiltawn ṭha tak takte kan neih avângin kan hlim hle bawk,” tiin a sawi.—Mk. 10:29, 30.

9. Dinhmun harsa tak hmachhawn unaunu chuan a rawngbâwlna zauh tûrin eng nge a tih a, chu chuan eng rah nge a chhuah?

⁹ Dinhmun harsa tak takte hmachhawn ṭhîn mah ila, Jehova rawngbâwlnaah hlimna kan nei a ni. Entîr nân, Africa Thlang lama awm hmeithai kum upa tawh tak Mirreh-i chu doctor a ni a. A hna aṭanga a chawlh hnu chuan pioneer a thawk a ni. Mirreh-i chu tha nâ a neih avângin in tin kal rawngbâwlnaah hun rei lo te chhûng chauh a tel thei ṭhîn a. Mahse, vântlâng hmuna thu hrilhnaah hun rei zâwk a tel thei a ni. Chu bâkah, tlawhkîr leh Bible zirpui tam tak a nei a, chûng zînga ṭhenkhat chu phone hmanga a zirpuite an ni. Chutianga a rawngbâwlna zauh tûrin engin nge chêttîr? Ani chuan, “Ka thinlung hi Pathian Jehova leh Isua Krista hmangaihnain a khat liam a. Chu bâkah, Pathian Jehova hnênah a rawngbâwlnaa ka phâk ang tâwka ka tel theih nân a ṭanpuina dîlin ka ṭawngṭai ziah a ni,” tiin a sawi.—Mt. 22:35-37.

10. Isaia 54:13-a târ lan angin, an rawngbâwlna zauhtute chuan Jehova hnên aṭangin eng nge an dawn?

¹⁰Jehova hnên aṭangin zirtîrna hrang hrang kan dawng. Mauritius rama pioneer nia rawngbâwl Unau Kenny-a chuan chumi dikzia chu a takin a tawng a. Thutak a han zir chuan, university kal chu chawlhsanin baptisma a chang a, hunbi kimin rawng a bâwl a ni. Ani chuan, “Zâwlnei Isaia thusawi: ‘Heta hi ka awm, mi tîr ta che,’ tih hi nunpui ka tum tlat,” tiin a sawi. (Is. 6:9) Unau Kenny-a chuan biakna atâna hman in sakna tam tak a ṭanpui bâkah, anmahni ṭawnga tihchhuah thu leh hla chhuahte lehlinnaah pawh a ṭanpui bawk a ni. Ani chuan, “Ka chanvo dawnte hlen thei tûra ka mamawh thiamna ka neih theih nân zirtîrna ka dawng a ni,” tiin a sawi. Mahse, a chanvo dawnte thawh dân mai aia tam a zir a. “Theih chin tâwk ka nei tih leh Jehova rawngbâwltu ṭha lehzual ni tûra ka neih ngai mizia pawh ka hre bawk,” tiin a sawi belh a ni. (Isaia 54:13 chhiar rawh.) Engvângin nge i dinhmunte enfiah a, Jehova hnên aṭanga zirtîrna hrang hrang i dawn belh theih dâwn leh dâwn loh hre tûra i inendik loh vang?

11. South Korea rama unaunute chuan rawngbâwlnaa an tel theih nân eng nge an tih a, chu chuan eng rah nge a chhuah? (A kâwma milem en rawh.)

¹¹ Thiltawn ngah Thuhretute pawhin rawngbâwlna pêng thara an inhman hian, zirtîrna an dawnte chu an hlâwkpui a. COVID-19 hripui lên chhûng hian, South Korea rama kohhran pakhata upate chuan: “Taksa hrisêl lohna avânga tûn hmaa thuhrilh rawngbâwlnaa tel thei lo tûra inngaite pawh, tûnah chuan videoconferencing hmangin an tel thei  tawh a. Kum 80 chuang tawh unaunu pathumte chuan tûn lai thiamna hman dân an zir a, anni chu nî tin deuhthaw rawngbâwlnaah an tel ṭhîn,” tiin an sawi. (Sâm 92:14, 15) I rawngbâwlna zauh va, Jehova ṭhatzia tam lehzuala tem chhin chu i châk em? Chumi atâna nangmah ṭanpui theitu rahbi ṭhenkhat i lo sawiho vang u.

12. Jehova’n amah rinchhantute tân eng nge a tiam?

¹²Jehova rinchhan dân zir rawh. Ani chuan amah kan rinchhan a, kan neih ṭhat ber kan pêk phawt chuan malsâwmna tam tak min pêk a tiam a. (Mal. 3:10) Colombia rama unaunu Fabiola-i chuan Jehova’n chu thutiam chu a chunga a thlenfamkimtîr dân a hmu a ni. Baptisma a han chan chuan, regular pioneer thawh nghâl mai a duh a. Mahse, a pasal leh a fa pathumte chu a thawh chhuah ringa khawsa an ni deuh ber a. Chuvângin, a hna aṭanga a pension hun a lo thlen chuan Jehova hnênah ṭanpuina dîlin tih tak zetin a ṭawngṭai a. Ani chuan: “Pension hlawh dawng tûr chuan hun rei tak chhûng nghah a ngai tlângpui ṭhîn; mahse, kei chu ka dîl aṭanga thla khat hnu lekah ka dawng nghâl a. Chu chu thil mak tak a ni,” tiin a sawi. Thla hnih hnuah pioneer a thawk ṭan a. Tûnah chuan kum 70 a chuang tawh a, kum 20 chuang pioneer a thawk tawh bawk a ni. Chutih chhûng zawng chuan baptisma chang tûrin mi pariat a ṭanpui bawk. Ani chuan: “Tisa lamah chak loh chângte nei ṭhîn mah ila, rawngbâwlnaa ka tel zêl theih nân Jehova’n nî tin min ṭanpui ṭhîn,” tiin a sawi.

13-14. Jehova rinchhana kan rawngbâwlna zauh tûra min ṭanpui theitute entawn tûr siamte chu engte nge ni?

 ¹³Jehova rinchhantute entawn tûr siam aṭangin inzir rawh. Bible hi Jehova rawngbâwlnaa theih tâwp chhuahtute entawn tûr siamin a khat a. Dinhmun tam takah chuan, chûng mite chuan kawng danglam taka Jehova malsâwmna dawng tûrin hma an lâk hmasak a ngai a ni. Entîr nân, Abrahama chuan ‘a kalna tûr lam pawh hre lova’ a chênna in a chhuahsan hnuah chauh Jehova malsâwmna a dawng a. (Heb. 11:8) Jakoba pawhin vântirhkoh a buan hnuah chauh malsâwmna danglam tak a dawng a ni. (Gen. 32:24-30) Israelte Ram Tiama an luh hma lawk pawh khân, puithiamte’n Jordan Lui vaukam tui a rah hnuah chauh mipuite’n lui chu an kân thei a ni.—Jos. 3:14-16.

¹⁴ Jehova rinchhana an rawngbâwlna zauhtu tûn laia entawntûr siamte aṭang pawhin hlâwkna i hmu thei a ni. Entîr nân, unau Payton-a leh a nupui Diana-i te chuan, “They Offered Themselves Willingly,” * tih ang chi thuziak inzawma Jehova rawng an bâwlna zauhtu unaute chanchin chhiar chu nuam an ti hle a. Unau Payton-a chuan: “Unaute thiltawn kan chhiar hian, tu emawin chaw tui tak a ei lai en ang mai ni hian kan inhria. Kan chhiar tam poh leh ‘LALPA ṭhatzia chu tem chhin’ kan châk lehzual a ni,” tiin a sawi. A tâwpah, Payton-a leh Diana-i chu mamawh zualna hmunah rawng an bâwl ta a ni. Chu thuziak inzawm chu i chhiar tawh em? A nih loh leh, kan website jw.org-a pho chhuah Witnessing in Isolated Territory—Australia tih leh Witnessing in Isolated Territory—Ireland tih video-te chu i en tawh em? Chûngte chuan i rawngbâwlna zauh theih dân kawng hre tûrin a ṭanpui thei che a ni.

15. Engtin nge ṭhian dik tak kawmna chuan min ṭanpui theih?

¹⁵Ṭhian dik tak thlang rawh. Kan thil ei ngai miah loh chu a ei ṭhîn leh tui ti êm êm tute bula kan awm hian ei kan châk lehzual ṭhîn. Chutiang bawkin, an nuna Jehova rawngbâwlna dah pawimawhtute kan kawm chuan, rawngbâwlna zauh duhna kan nei lehzual ang. Kent-a leh Veronica-i te nupa chuan chumi dikzia chu an tawng a. Unau Kent-a chuan: “Kan chhûngte leh ṭhiante chuan kawng danga kan rawngbâwlna zauh tûrin min fuih a. An nuna Lalram dah hmasatute kawmna chuan kawng danga kan rawngbâwlna zauh thei tûrin inrintâwkna min pe a ni,” tiin a sawi. Kent-a leh Veronica-i te chu Serbia ramah special pioneer niin rawng an bâwl mêk a ni.

16. Luka 12:16-21-a târ lan Isua tehkhin thua kan hmuh angin, engvângin nge inpêk duhna kan neih ang?

¹⁶Jehova tân inpe rawh. Jehova tilâwm tûrin kan nuam tih zâwngte chu kan kalsan vek a ngai kher lo. (Thur. 5:19, 20) Mahse, mi mal inpêkna neih kan hreh avânga tam lehzuala Jehova rawngbâwl theihna kan hnâwl a nih chuan, Isua tehkhin thua kan hmuh Pathian ngaihsak aia mahni nawmsak nâna inchhêk khâwltu ang kan ni ve thei a ni. (Luka 12:16-21 chhiar rawh.) France rama chêng unau Christian-a chuan, “Jehova leh ka chhûngkaw tân ka hun leh tha neih ṭha ber ka pe lo,” tiin a sawi. Tichuan, an nupaa pioneer thawh an tum ta a. Mahse, an thiltum hlen thei tûr chuan an eizawnna hna an chawlhsan a ngai dâwn a ni. Mahni inchâwm nân in leh office tihthianghlim hna an thawk a, sum tlêm zâwk hmanga hlim taka khawsak dân an zir bawk. Chutianga an inpêkna avâng chuan an inchhîr em? Christian-a chuan, “Rawngbâwlnaa  tel chu nuam kan ti lehzual tawhin, kan tlawhkîr leh Bible zirpuite’n Pathian Jehova chanchin an zir kan hmuh hian kan hlim hle a ni,” tiin a sawi.

17. Engvângin nge tih dân thar hmanga rawngbâwl chu harsa kan tih mai theih?

¹⁷Tih dân thar hmanga rawngbâwl duhna nei rawh. (Tirh. 17:16, 17; 20:20, 21) United States rama pioneer Unaunu Shirley-i chuan COVID-19 hripui lên chhûng hian a rawngbâwl dân a thlâk a ngai a. A tîr chuan phone hmanga thu hrilh chu a hreh deuh va. Mahse, bial kan kâr chhûnga zirtîrna a dawn hnu chuan, phone hmanga thu hrilhnaah a tel ziah tawh a ni. Ani chuan: “A tîr chuan ka zâm deuh va; mahse, tûnah chuan nuam ka ti tawh khawp mai. In tin kala rawngbâwl aiin mi tam lehzual hnênah thu kan hril thei bawk,” tiin a sawi a ni.

18. Kan rawngbâwlna kan zauh hunah harsatnate hmachhawn thei tûrin engin nge min ṭanpui thei?

¹⁸Thiltum insiam la, hlen tum rawh. Harsatnate kan hmachhawn hian, ṭawngṭaina nên ngun taka ngaihtuahin a chinfel dân tûr kan ngaihtuah ṭhîn a. (Thuf. 3:21) Europe khawmual, Romany ṭawng hmanna group-a regular pioneer nia rawngbâwl Unaunu Sonia-i chuan: “Ka thiltumte chu lehkha phêkah ziakin, hmuh mai awlsamna hmunah ka dah ṭhîn a. Ka dawhkânah chuan tum ram inang lo kawng pahnih lem hi ka dah a. Thu tlûkna ka siam a ngaih hunah chu milem chu enin, ka thu tlûkna siamin min hruaina lam tûr chu ka ngaihtuah ṭhîn a ni,” tiin a sawi. Sonia-i chuan a hmachhawn harsatnate chu a êng zâwnga thlîr a tum tlat a. “Dinhmun thar ka hmachhawn apiang hian, chu chu min dangtu bang angin nge, min ṭanpuitu lei dawh angin ka thlîr dâwn tih chu ka rilru put hmangah a innghat a ni,” tiin a sawi.

19. Eng nge tih kan tum tlat ang?

¹⁹ Jehova chuan kawng tam takin mal min sâwm a. Amah chawimawi tûra theih tâwp chhuahna hmangin kan lâwmzia kan lantîr thei a ni. (Heb. 13:15) Chutah chuan, malsâwmna tam lehzual kan dawn theih nâna kan rawngbâwlna zauh pawh a tel thei. Nî tin hian “LALPA ṭhatzia tem chhin” i tum ang u. Chutianga kan tih chuan: “Mitîrtu duh zâwng tih leh, a hna thawh zawh tûr hi ka chaw a ni,” tia sawitu Isua ang kan ni ang.—Joh. 4:34.