1, 2. Ik tzeʼn in tzaj tqʼamaʼn Salmo 34:8, ¿tiʼ jaku bʼant quʼn tuʼn tel qnikʼ tiʼj qa tbʼanel te Jehová tmod?

QO XIMEN tiʼj qa in tzaj tqʼamaʼn jun xjal qe tuʼn t-xi qwaʼn jun wabʼj naʼmx t-xi qnikʼbʼeʼn. Jakulo tzʼel qnikʼ tiʼj qa kʼokʼj aj tok qkeʼyin, aj t-xi qsqoʼn, aj tkanet receta quʼn tiʼj moqa aj t-xi qqanin te juntl. Pero oʼkx jaku tzʼel qnikʼ tiʼj qa qgan aj t-xi qwaʼn.

² Ax jlu jaku bʼaj qiʼj. Jakulo tzʼel qnikʼ tiʼj qa tbʼanel tmod Jehová aj tjaw quʼjin Tyol, qe uʼj in che etz tuʼn ttnam moqa aj tok qbʼiʼn kyiʼj junjuntl erman tzeʼn in che tzaj kʼiwlaʼn tuʼn Jehová. Pero oʼkx jaku tzʼel qnikʼ tiʼj qa tbʼanel te Jehová qa qiʼj in kubʼ tyekʼin tbʼanel tmod (kjawil uʼjit Salmo 34:8). Qo ximen tiʼj qa qaj tuʼn qajbʼen te Jehová toj tkyaqil ambʼil, pero il tiʼj tuʼn qnaqʼet tuʼn qanqʼin kyukʼil nya nim tiʼchaq. Bʼalo nim maj o jaw quʼjin aju tqʼama Jesús qa kxqʼuqil Jehová qiʼj qa tnejel ma qo jyon tiʼj Tkawbʼil. Pero naʼmxlo tok qqʼoʼn qwitz tiʼj tziybʼil lu toj qanqʼibʼil (Mat. 6:33). Maske ikju, tuʼnju qʼuqli qkʼuʼj kyiʼj yol tqʼama Jesús, mintiʼ in tzaj qlaqʼoʼn nim tiʼchaq ex ya mintiʼ in qo aqʼunan nim ambʼil tuʼntzun tok qqʼoʼn qwiʼ tiʼj pakbʼabʼil. Aj tbʼant jlu quʼn, in nel qnikʼ tiʼj qa ax tok in xqʼuqin Jehová qiʼj. Iktzun tten in nel qnikʼ tiʼj qa tbʼanel te Jehová tmod.

3. Ik tzeʼn in tzaj tqʼamaʼn Salmo 16:1 ex 2, ¿alqiʼj in kubʼ tyekʼin Jehová tbʼanel tmod?

³ Tbʼanel te Jehová tmod kyukʼil kykyaqil, axpe ik kyukʼil qeju naʼmx tel kynikʼ tiʼj (Sal. 145:9; Mat. 5:45). Pero mas  in che tzaj tkʼiwlaʼn qeju in nok tilil kyuʼn tuʼn kyajbʼen te ex in nok kykʼujlaʼn tuʼn tkyaqil kyanmi (kjawil uʼjit Salmo 16:1, 2). Qo xnaqʼtzan kyiʼj junjun tiʼchaq tbʼanel o bʼant tuʼn Jehová qiʼj.

4. ¿Alkye tten in kubʼ tyekʼin Jehová tbʼanel tmod kyiʼj qeju in che ok laqʼeʼ ttxlaj?

⁴ Aj tok tilil quʼn tuʼn tkubʼ qbʼinchaʼn aju in tzaj tqʼamaʼn Jehová, in nel qnikʼ tiʼj qa mas tbʼanel in nok qanqʼibʼil. Tej tel qnikʼ tiʼj Jehová ex tej tok qkʼujlaʼn, onin qiʼj tuʼn tchʼexpaj qximbʼetz nya toj tumel ex junjuntl tiʼchaq nya bʼaʼn in nela toj twitz (Col. 1:21). Ex tej t-xi qqʼamaʼn te tuʼn qajbʼen te ex tej qbautisarin, mas kubʼ tyekʼin tbʼanel tmod qukʼil tuʼnju tzaj tqʼoʼn ambʼil qe tuʼn tten qximbʼetz toj txubʼtxaj ex tuʼn tten jun tbʼanel qamiwbʼil tukʼil (1 Ped. 3:21).

5. ¿Tzeʼn o kubʼ tyekʼin Jehová tbʼanel tmod qiʼj aj in qo pakbʼan?

⁵ In nok qkeʼyin tbʼanel tmod Jehová aj in qo pakbʼan. ¿In tzajpe xobʼa aj in pakbʼana? Ateʼ nim erman in bʼaj jlu kyiʼj. Tej naʼmxtoq tel qnikʼ tiʼj Jehová, bʼalo mintiʼ kubʼ qximen tuʼn tok qtokʼchaʼn ttzi tja jun xjal ex tuʼn qyolin tukʼil tiʼj Tyol Dios. Atzun jaʼlo, ya o qo naqʼet tiʼj. Noq tuʼn tonbʼil Jehová, in kubʼ qnaʼn tzalajbʼil aj in qo pakbʼan. Ax ikx, olo tzʼok qqʼoʼn qwitz tiʼj tzeʼn in nonin Jehová qiʼj toj junxichaq tten. Jun techel, in nonin qiʼj tuʼn miʼn ttzaj qqʼoj aj ttzaj tqʼoj jun xjal qiʼj toj pakbʼabʼil. Ax ikx, in nonin qiʼj tuʼn ttzaj qnaʼn jun tbʼanel texto aj qyolin tukʼil jun xjal taj tuʼn tok tbʼiʼn tbʼanel tqanil. Ex o tzaj tqʼoʼn qipumal tuʼn kukx qpakbʼan maske mintiʼ in qo ok bʼiʼn kyuʼn xjal (Jer. 20:7-9).

6. ¿Tzeʼn in tzaj tyekʼin Jehová tbʼanel tmod aj in tzaj tqʼoʼn xnaqʼtzbʼil qe tuʼn tbʼant qpakbʼan?

⁶ Ax ikx, o kubʼ tyekʼin Jehová tbʼanel tmod qiʼj aj in tzaj tqʼoʼn xnaqʼtzbʼil tuʼn tbʼant qpakbʼan (Juan 6:45). Kyoj chmabʼil in che ok txolekxi qʼij, in che etz yekʼin tbʼanel video tiʼj tzeʼn tuʼn t-xi tzyet tuʼn qyolin ex in tzaj qʼamaʼn qe tuʼn kyajbʼen quʼn toj pakbʼabʼil. Aj tok tilil quʼn tuʼn t-xi qbʼinchaʼn jun tiʼ, jakulo qo tzaj xobʼ. Pero aj in xi qbʼinchaʼn, in nel qnikʼ tiʼj qa atzun mas tbʼanel jaku txi qbʼinchaʼn jatumel in qo pakbʼan. Ax ikx, in tzaj qʼamaʼn kyoj chmabʼil ex kyoj nimaq chmabʼil qa bʼaʼn tuʼn qpakbʼan kyoj junxichaq tten ex nyalo naqʼli qoʼ tiʼj. Tuʼn tbʼant jlu quʼn, bʼalo il tiʼj tuʼn qxiʼ pakbʼal toj juntl lugar. Qa ma bʼant jlu quʼn, in xi qqʼoʼn ambʼil te Jehová tuʼn ttzaj tkʼiwlaʼn qaqʼun. Atzun jaʼlo, qo xnaqʼtzan kyiʼj junjun tbʼanel kʼiwlabʼil in tzaj tqʼoʼn Jehová qe aj in nok tilil quʼn tuʼn t-xi qqʼoʼn aju mas tbʼanel te ex noq tiʼxku in nikʼ toj qanqʼibʼil. Ex te mankbʼil, kʼelel qnikʼ tiʼj tiʼ jaku bʼant quʼn tuʼn tjapun twi qximbʼetz.

7. ¿Tiʼ kʼiwlabʼil in tzaj qkʼamoʼn aj in nel qpaʼn mas ambʼil tuʼn qajbʼen te Jehová?

⁷ Mas in qo ok laqʼeʼ ttxlaj Jehová. Qo xnaqʼtzan tiʼjju bʼaj tiʼj jun ansyan Samuel tbʼi. * In najbʼen ermano lu tukʼil t-xuʼjil atz Colombia. In che ajbʼentoq te precursor toj tnam jatumel e jaw chʼiy ex in che tzalajtoq. Noqtzun tuʼnj, kyajtoq tuʼn kyajbʼen toj juntl kʼloj okslal jatumel kyaj erman onbʼil toj pakbʼabʼil. Tuʼn tjapun twi kyximbʼetz, iltoq tiʼj tuʼn tbʼant junjun chʼixpubʼil kyuʼn. In tzaj tqʼamaʼn Samuel jlu: «Xi qbʼiʼne aju in tzaj tqʼamaʼn Mateo 6:33 ex ya mintiʼ tzaj qlaqʼoʼne junjun tiʼchaq mintiʼxix kyajbʼen qeye. Pero aju mas kwest ela toj qwitze, aju tuʼn tkyaj  qtzaqpiʼne qjaye tuʼnju cabalx otoq bʼaj bʼinchaʼn te qeye ex mintiʼtoq in xi qchjoʼne». Tej kypon ajbʼel toj juntl kʼloj okslal, el kynikʼ tiʼj qa nya iltoq tiʼj tuʼn tten nim kypwaq ik tzeʼn nej. Tqʼamatl Samuel jlu: «O tzʼok qkeʼyine tzeʼn in tzaj tyekʼin Jehová qbʼeye ex tzeʼn in tzaj ttzaqʼweʼn qe qnaʼj Diose. In kubʼ qnaʼne qa in tzalaj qiʼje, qa kʼujlaʼn qoʼye tuʼn ex naʼmxtoq tkubʼ qnaʼne jlu jun maj». ¿Jakupe tzʼel tpaʼna mas ambʼil tuʼn tajbʼena te Jehová? Qa ikju, jaku tzʼok qeʼ tkʼuʼja tiʼj qa kʼonil jlu tiʼja tuʼn tok laqʼeʼya mas ttxlaj Jehová ex qa kxqʼuqil tiʼja (Sal. 18:25).

8. ¿Tiʼ xnaqʼtzbʼil in nel qiʼn tiʼjju in tzaj tqʼamaʼn Iván ex Viktoria?

⁸ In qo tzalaj aj in qo ajbʼen te Jehová. Qo ximen tiʼjju in tzaj tqʼamaʼn Iván ex Viktoria, jun mejebʼleʼn in najbʼen atz Kirguistán. Kubʼ kyximen tuʼn kyanqʼin tukʼil nya nim tiʼchaq tuʼntzun kyajbʼen mas te Jehová, ik tzeʼn tuʼn kyxiʼ onil aj in che jaw bʼinchet ja. In tzaj tqʼamaʼn Iván jlu: «Ok tilil quʼne tuʼn qaqʼunane. Maske o sikte tej tex junjun qʼij, kubʼ qnaʼne nim tzalajbʼil tej tajbʼen qipumale quʼne tuʼn qonine tiʼj Tkawbʼil Dios. Ax ikx in qo tzalaje tuʼnju e kanet tbʼanel qamiwe ex in tzaj qnaʼne junjun tbʼanel ambʼil» (Mar. 10:29, 30).

9. ¿Tiʼ o bʼant tuʼn jun ermana tuʼn tpakbʼan mas ambʼil maske in nok weʼ twitz junjun nya bʼaʼn ex tiʼ o tzaj tuʼn jlu?

⁹ Aj qajbʼen te Jehová, in nonin jlu qiʼj tuʼn kukx qtzalaj maske in qo ok weʼ kywitz junjun tiʼchaq nya bʼaʼn. Jun techel, o kyim tchmil jun ermana Mirreh tbʼi te África Occidental ex in naqʼunantoq te doctora. Tej tetz toj taqʼun, ok te precursora. At artritis tiʼj ex oʼkx jun or in nikʼx tuʼn aj in pakbʼan kytziyele ja. Noqtzun tuʼnj, jaku pakbʼan mas ambʼil kyukʼil yekʼbʼil uʼj. Ax ikx, at nim trevisita ex in qʼon xnaqʼtzbʼil kye nim xjal, ex ateʼ junjun in chex tqʼoʼn toj teléfono. ¿Tiʼ onin tiʼj tuʼn tajbʼen mas te Jehová? In tzaj tqʼamaʼn jlu: «At nim nkʼujlabʼile tiʼj Jehová ex Jesús. Nim maj in xi nqanine te Jehová tuʼn tonin wiʼje tuʼn kukx wajbʼene te» (Mat. 22:36, 37).

10. Ik tzeʼn in tzaj tyekʼin 1 Pedro 5:10, ¿tiʼ in tzaj tqʼoʼn Jehová kye qeju in nok tilil kyuʼn tuʼn kyajbʼen te?

¹⁰ In tzaj tqʼoʼn Jehová xnaqʼtzbʼil qe. El tnikʼ Kenny tiʼj qa ax tok jlu, jun precursor in najbʼen toj tnam Mauricio. Tej tel tnikʼ tiʼj axix tok, kyaj ttzaqpiʼn universidad, bautisarin ex xi tzyet tuʼn tajbʼen te Jehová toj tkyaqil ambʼil. Tqʼama jlu: «In nok tilil wuʼne tuʼn woke ik tzeʼn te profeta Isaías tej tqʼama jlu: ‹Lu qine lu, chin t-samanxa›» (Is. 6:8). O tzʼonin Kenny tiʼj aqʼuntl tuʼn kyjaw bʼinchet ja tuʼn ttnam Jehová ex o tzʼonin tuʼn kykubʼ traducirit uʼj toj tex tyol. Tqʼamatl jlu: «Tzaj qʼoʼn xnaqʼtzbʼil weye, aju onin wiʼje tuʼn kybʼant woklene». Pero nya oʼkx el tnikʼ tiʼj tzeʼn tuʼn kybʼant taqʼun. Ax ikx, tqʼamatl jlu: «El nnikʼe tiʼj alkyeqe tiʼchaq mlay che bʼant wuʼne ex alkyeqe nmode il tiʼj tuʼn tten tuʼn kukx wajbʼene te Jehová» (kjawil uʼjit 1 Pedro 5:10). ¿Jakupe tzʼel tpaʼn teya mas ambʼil tuʼn ttzaj tkʼamoʼna mas xnaqʼtzbʼil tuʼn ttnam Jehová?

11. ¿Tiʼ bʼant kyuʼn junjun ermana te Corea del Sur tuʼn kukx kypakbʼan ex tiʼ tzaj tuʼn jlu? (Qʼonka twitza tiʼj tilbʼilal tok tiʼj t-xkʼomil).

¹¹ Ax ikx, in nonin xnaqʼtzbʼil in tzaj tqʼoʼn Jehová kyiʼj qeju ma bʼet ambʼil in che ajbʼen te aj kypakbʼan toj junjuntl tten. Akux at yabʼil COVID-19, tzaj kytzʼibʼin junjun ansyan te Corea del Sur jlu: «Kubʼ kyximen junjun erman qa mlaytoq bʼant tuʼn kypakbʼan tuʼnju at yabʼil kyiʼj, atzun  jaʼlo in che pakbʼan toj videoconferencia. Ex ateʼ oxe ermana qʼiʼn mas te 80 abʼqʼi kyuʼn o tzʼel kynikʼ tiʼj tzeʼn tuʼn tajbʼen computadora kyuʼn, atzun jaʼlo, chʼixmi tkyaqil qʼij in che pakbʼan» (Sal. 92:14, 15). Yajtzun teya, ¿taja tuʼn tpakbʼana mas ambʼil ex tuʼn tok tkeʼyina qa tbʼanel te Jehová tmod? Qo xnaqʼtzan kyiʼj junjun nabʼil jaku che onin tiʼja tuʼntzun tjapun twi t-ximbʼetza.

12. ¿Tiʼ in tzaj ttziyen Jehová kye qeju in nok qeʼ kykʼuʼj tiʼj?

¹² Bʼaʼn tuʼn tok qeʼ tkʼuʼja tiʼj Jehová. Qa ma tzʼok qeʼ qkʼuʼj tiʼj ex qa ma txi qqʼoʼn aju mas tbʼanel te, in tzaj ttziyen qe qa tzul tqʼoʼn nim kʼiwlabʼil qe (Mal. 3:10). Ok tkeʼyin jun ermana te Colombia aju Fabiola tbʼi tzeʼn japun twi tyol Jehová lu. Tajtoq tuʼn tok te precursora tej tbautisarin, pero in nonin tukʼil pwaq tuʼn kywan qe toj tja. Tuʼntzunju, tej tpon ambʼil tuʼn tjubilarin, kubʼsan twitz Jehová tuʼn tonin tiʼj. Tqʼama jlu: «Chʼixmi tkyaqil maj, in xi tiʼn ambʼil tuʼn ttzaj qʼoʼn kypwaq xjal aj in che jubilarin, atzun weye, noq jun xjaw xi tiʼn tuʼn ttzaj qʼoʼn npwaqe. Ok jlu ik tzeʼn jun milagr». Tej tikʼ kabʼetl xjaw, xi tzyet tuʼn tajbʼen te precursora. Atzun jaʼlo, qʼiʼn mas te 70 abʼqʼi tuʼn ex ya ma tzikʼ mas te 20 abʼqʼi in najbʼen te precursora. Kyoj abʼqʼi lu, o tzʼonin kyiʼj wajxaq xjal tuʼn kybautisarin. Tqʼamatl jlu: «At maj in kubʼ nnaʼne qa mintiʼ wipune, pero in nonin Jehová wiʼje tuʼn tjapun tajlal or wuʼne».

13, 14. ¿Alkyeqe techel jaku che onin qiʼj tuʼn tok qeʼ qkʼuʼj tiʼj Jehová ex tuʼn qajbʼen mas te?

 ¹³ Kanoʼmila kyiʼj junjuntl xjal ok qeʼ kykʼuʼj tiʼj Jehová. In yolin Tyol Dios kyiʼj nim xjal ok tilil kyuʼn tuʼn kyajbʼen te Jehová. Pero naʼmxtoq ttzaj kykʼamoʼn kʼiwlabʼil, tnejel kubʼ kyyekʼin qʼuqbʼil kykʼuʼj. Jun techel, tzaj kʼiwlaʼn Abrahán tuʼn Jehová tej otoqxi kyaj ttzaqpiʼn tja maske «mintiʼ bʼaʼn tuʼn jatum tuʼn tpon» (Heb. 11:8). Ax ikx te Jacob, tzaj kʼiwlaʼn tuʼn Jehová tej otoqxi tzʼok tilil tuʼn tuʼn tqʼojin tukʼil jun anjel (Gén. 32:24-30). Ex tej chʼixtoq kyokx aj Israel toj Txʼotxʼ Tziyen maj, oʼkx e ikʼx xjal toj nim aʼ Jordán tej otoqxi kux kyqʼoʼn pal kyqan toj aʼ (Jos. 3:14-16).

¹⁴ Ax ikx, jaku tzʼel tkanoʼna tiʼj techel in kubʼ kyqʼoʼn nim erman toj ambʼil jaʼlo tuʼnju in nok qeʼ kykʼuʼj tiʼj Jehová ex in xi kyjyoʼn tumel tuʼn kyajbʼen mas te. Jun techel, tgantoq ermano Payton tukʼil Diana, aju t-xuʼjil tuʼn tjaw kyuʼjin aju in bʼant kyuʼn junjuntl erman tuʼn kyajbʼen mas te Jehová, ik tzeʼn qeju kʼloj xnaqʼtzbʼil «Tuʼn tkyaqil kykʼuʼj i eʼx ajbʼel». * In tzaj tqʼamaʼn Payton jlu: «Tej kyjaw quʼjine qe xnaqʼtzbʼil lu, ok ik tzeʼn in qo keʼyine tiʼj jun xjal in waʼn tiʼj jun tbʼanel wabʼj. Qa mas in qo ximane tiʼj tzalajbʼil in kubʼ kynaʼn erman, mas qajtoqe tuʼn tok qkeʼyine qa tbʼanel te Jehová tmod». Tej tikʼ ambʼil, xiʼ mejebʼleʼn lu ajbʼel toj jun lugar jatumel kyaj erman onbʼil. ¿Ope jaw tuʼjin teya qe kʼloj xnaqʼtzbʼil lu? Ex ¿ope tzʼok tkeʼyina video In qo pakbʼan «tuj tkyaqil twitz txʼotxʼ» ex Aju in tzaj kyqʼamaʼn junjuntl kuʼxun: Mintiʼ juntl anqʼibʼil mas tbʼanel, aqeju in che kanet quʼn toj jw.org? Tkyaqil jlu jaku tzʼonin tiʼja tuʼn tajbʼena mas te Jehová.

15. ¿Tzeʼn jaku che onin tbʼanel qamiw qiʼj?

¹⁵ Jyonxa qe tbʼanel tamiwa. Mas nya kwest tuʼn t-xi qwaʼn jun akʼaj wabʼj qa ma tzʼel qpaʼn ambʼil tuʼn qten kyukʼil xjal kygan tuʼn kywan tiʼj wabʼj lu. Chʼixmi ax jlu jaku bʼaj qiʼj, qa ma qo ten kyukʼil qeju in nok kyqʼoʼn kywiʼ tiʼj kyajbʼebʼil te Jehová, mas nya kwest jaku tzʼela toj qwitz tuʼn qximen tiʼj tiʼ mas jaku bʼant quʼn. Atzun jlu bʼaj tiʼj Kent ex Verónica. In tzaj tqʼamaʼn Kent jlu: «In che onin qamiwe ex qe toj qjaye qiʼje tuʼn qximane tiʼj tzeʼn jaku qo ajbʼene mas te Jehová. El qnikʼe tiʼj qa mas ok qeʼ qkʼuʼje tiʼj tuʼn t-xi qbʼinchaʼne junjuntl tiʼchaq tej qtene kyukʼil erman in che jyon tnejel tiʼj Tkawbʼil Dios». Toj ambʼil jaʼlo, in che ajbʼen te precursor especial atz Serbia.

16. Ik tzeʼn in tzaj tqʼamaʼn Lucas 12:16 a 21, ¿tiquʼn il tiʼj tuʼn tkyaj qtzaqpiʼn junjun tiʼchaq at qe?

¹⁶ Bʼinchama junjun chʼixpubʼil noq tuʼn tajbʼena mas te Jehová. Tuʼn ttzalaj Jehová qiʼj, nya il tiʼj tuʼn tkyaj qtzaqpiʼn tkyaqil tiʼchaq at qe (Ecl. 5:19, 20). Pero qa mintiʼ in nok tilil quʼn tuʼn qajbʼen mas te Jehová noq tuʼnju nya qaj tuʼn tkyaj qtzaqpiʼn junjun tiʼchaq at qe, jaku qo ok ik tzeʼn te xjal oʼkx ximen tiʼj tuʼn ttzalaj ex ikʼ tnaʼl Jehová tuʼn (kjawil uʼjit Lucas 12:16-21). In tzaj tqʼamaʼn jun ermano te Francia jlu, aju Christian tbʼi: «Mintiʼtoq in najbʼen ambʼil wuʼne nix wipumale tuʼn wajbʼene te Jehová nix tuʼn ntene kyukʼil qe toj njaye». Kubʼ t-ximen Christian tukʼil t-xuʼjil tuʼn kyok te precursor. Tuʼn tbʼant jlu kyuʼn, iltoq tiʼj tuʼn tkyaj kytzaqpiʼn kyaqʼun. Tuʼn tkanet twi kywa, e ok ten aqʼunal tuʼn tbʼinchet limpieza ex e tzalaj  tiʼj chʼin kypwaq kanet. ¿Tiʼ tzaj tej tbʼant jlu kyuʼn? Tqʼamatl Christian jlu: «O tzalaje mas tiʼj pakbʼabʼil tej tok qkeʼyine qa el kynikʼ xjal tiʼj Jehová tej qmeltzʼaje kyukʼil ex tej t-xi qqʼoʼne xnaqʼtzbʼil kye».

17. ¿Tiquʼn mintiʼ in xi kyjyoʼn junjun erman junjuntl tumel tuʼn kypakbʼan?

¹⁷ Jyonxa junjuntl tumel tzeʼn tuʼn tpakbʼana (Hech. 17:16, 17; 20:20, 21). Bʼant junjun chʼixpubʼil toj pakbʼabʼil tuʼn jun precursora te Estados Unidos, aju Shirley tbʼi tej ttzaj yabʼil COVID-19. Tnejel, in xobʼtoq tuʼn tpakbʼan toj teléfono. Pero tej tpon ansyan in bʼet kyojele Ja te Chmabʼil, xi yekʼin te tzeʼn jakutoq bʼant tuʼn. Atxix toj ambʼil aju, mas ok tilil tuʼn tuʼn tpakbʼan toj teléfono. Tqʼama ermana jlu: «Tnejel, in chin xobʼtoqe tuʼn npakbʼane toj teléfono, atzun jaʼlo, atzun mas ngane. Mas nim xjal in qo yoline kyukʼil twitzju tej in qo pakbʼane kytziyele ja».

18. ¿Tiʼ jaku tzʼonin qiʼj tuʼn qex kywitz nya bʼaʼn aj tok tilil quʼn tuʼn qajbʼen mas te Jehová?

¹⁸ Ximinkuya tuʼn tbʼant juntl tiʼ tuʼna ex qʼonka tilil tuʼn tjapun twi t-ximbʼetza. Aj qok weʼ kywitz nya bʼaʼn, in qo naʼn Dios te Jehová ex in qo ximen tiʼj tzeʼn tuʼn qex kywitz (Prov. 3:21). In tzaj tqʼamaʼn Sonia jlu, jun precursora in najbʼen toj yol romaní atz Europa: «Ngane tuʼn tkubʼ ntzʼibʼine aju waje tuʼn t-xi nbʼinchaʼne ex in kubʼ nqʼoʼne toj jun lugar jatumel jaku tzʼok nkeʼyine. O bʼant jun dibujo wuʼne jatumel tkubʼ nim bʼe ex o tzʼok nqʼoʼne tiʼj jun mueble jatumel kykubʼ qe ncremaye. Aj tkubʼ nximane tuʼn tbʼant jun tiʼ wuʼne, in nok nkeʼyine dibujo tuʼn tel nnikʼe tiʼj tiʼ jaku tzaj tuʼnju kxel nbʼinchaʼne». Ex aj in nok weʼ Sonia twitz jun nya bʼaʼn, in nok tilil tuʼn tuʼn tten tbʼanel t-ximbʼetz. Tqʼamatl jlu: «Aj in chʼexpaj jun tiʼ toj wanqʼibʼile, jaku kubʼ nximane qa kʼokel ik tzeʼn jun muro tuʼn miʼn tjapun twi nximbʼetze moqa kʼokel ik tzeʼn jun puente, aju in nonin wiʼje tuʼn t-xi nbʼinchaʼne aju otoq kubʼ nximane».

19. ¿Tzeʼn jaku kubʼ qyekʼin qa in xi qqʼoʼn chjonte te Jehová tiʼj tkyaqil tiʼchaq in tzaj tqʼoʼn qe?

¹⁹ In qo tzaj tkʼiwlaʼn Jehová kyoj junxichaq tten. Jaku kubʼ qyekʼin qa in xi qqʼoʼn chjonte te aj tok tilil quʼn tuʼn tjaw qnimsaʼn (Heb. 13:15). Jaku bʼant jlu quʼn aj t-xi qjyoʼn junjuntl tumel tuʼn qajbʼen te. Qa ma bʼant jlu quʼn, mas qo tzajel tkʼiwlaʼn Jehová. Tuʼntzunju, tkyaqil qʼij qjyonx tumel tuʼn tel qnikʼ tiʼj qa tbʼanel te Jehová. Iktzun tten jaku tzʼel qkanoʼn tiʼj Jesús tej tqʼama jlu: «We nwa, atzunju tuʼn nbʼinchanteye aju tajbʼil ju tzaj samante weye, ex tuʼn tbʼaj bʼant taqʼun wuʼne» (Juan 4:34).