1-2. Kwesekesa na mukanda wa Myaso 34:8, twasa kuzibuka bati ngwetu Yehova wapwa wamubwa?

ACISINGANYEKENI ngweni munu umo amyana byakulya bije kanda mulyeho laja. Mwasa kuzibuka obyo byakulya nga mubitala, kuziba bweko bwabyo, kwihula mubakabitelekela nambe kwihula munu uje wabilyaho laja. Oloni mwasa kuzibuka lika indi bitobala nga mubimakela.

² Mu ngila imolika, twasa kuzibuka ngwetu Yehova wapwa wamubwa nga tutanda Mbimbiliya na mabulu etu nambe omwo tuziba bakwetu bendeka bibezikiso byanabana. Oloni nga tushaka ngwetu tulimwene mwamubwa bubwa bwa Yehova, tunapande kumakela. (Tandeni Myaso 34:8.) Cakumwenako cinatako cimwesa mutwasa kulingila ngoco. Hamo tukashungwiya kupanga cipangi ca simbu yoshe, oloni tunapande tahi kwasiwisa buyoye bwetu asina twase kulinga ngoco. Hamo munatanda lwalwingi majwi a Yesu aje amwesa ngwawo nga tutwameka bya Bumwene, co Yehova atwana bitutonda, oloni kanda mulimwene busunga bwa awa majwi mu kuyoya kweni. (Mateo 6:33) Nameme ngoco, munasa kutepulula ku byuma bimukalanda na simbu imukakala ku bipangi mangana mwake manene mbunge ku cipangi ca kwambulula mwafwa mwakulahela ngweni majwi a Yesu apwa a busunga. Omwo mulinga ngoco, mulimwena ngweni Yehova akanyungu bangamba bendi. Ngeci mumakela bubwa bwa Yehova.

3. Kwesekesa na mukanda wa Myaso 16:1, 2, Yehova akamwesa bubwa bwendi kuli beya?

³ Yehova “wapwa wamubwa kuli boshe,” kwambateselela na baje kubamuzibuka. (Myaso 145:9; Mateo 5:45) Oloni akamwesa manene bubwa kuli baje bamuzema na kumupangela na bimbunge byabo byoshe. (Tandeni Myaso 16:1, 2.) Tusimutwiyeniko byuma bimo byabibwa byanatulingila Yehova.

4. Yehova akamwesa bati bubwa bwendi kuli baje bashwenya kuyehi nendi?

 ⁴ Simbu yoshe itupangesa bitulilongesa kuli Yehova tulimwena bubwa butundamo. Omwo twalilongesele byendi na kumuzema, Yehova watukwasele twecele kusinganyeka na kulinga byuma bije byazinda. (Kolo 1:21) Co lalo, omwo twalikundikile kuli ikeye na kutumbwitika, twalimwenenene manene bubwa bwendi omwo watukwasele tukale na citakutaku ca kujela na kutukwasa kulikuta busamba nendi.—1 Petu 3:21.

5. Tukalimwena bati bubwa bwa Yehova mu cipangi ca kwambulula?

⁵ Mutukambulula tukatwalelelaho kulimwena bubwa bwa Yehova. Mwakala na shwamwa ndi? Bandolome na bandokazi babangi bakala na shwamwa. Simbu kanda mupwe Bakaleho ba Yehova, hamo kumwasinganyekele ngweni tangwa mukambulwila ku njibo na njibo na kusimutwiya na banu kumuzibuka. Oloni ano matangwa mukalingi ngoco kushwa kumo, co lalo mukalikuu cipangi ca kwambulula. Munalimwena mwanamikwasela Yehova mu bingila bya kuliseza-seza. Cakumwenako, wamikwasele mukwate mbunge omwo munu umo wamikumbulwile mwamubi. Wamikwasele lalo mwanuke mukanda uje weta ku mbunge ya babenya njibo. Co lalo, wamikwasele mutwaleleleho kwambulula nameme banu bamo kubamitolililile.—Njele 20:7-9.

6. Byuma byakatulongesa Yehova bimwesa bati ngwabyo wapwa wamubwa?

⁶ Yehova natumwesa lalo bubwa bwendi omwo natulongesa mwakulingila mwamubwa cipangi ca kwambulula. (Yowa 6:45) Ku biwano byetu bya mukati ka calumingo, tukatolilila ku biñanda bije bimwesa bingila byabibwa bya kwendekelamo, co bakatushongangeya tupangese bitunalilongesa omwo twambulula. Simbu imo kunasa kutukaluwila kupangesa ngila yaiha ya kwendekelamo, oloni hamo oyo ngila ikeyo yeta ku bimbunge bya banu ba mu citingitingi cetu. Co lalo, ku biwano bya cikungulukilo na biwano bya mutambela bakatushongangeya kupangesa bingila byabiha bya kwambulwilamo bije kanda tupangeseho. Hamo kunasa kutukaluwila kupangesa ebi bingila, oloni nga tubipangesa co Yehova atubezikisa. Tusimutwiyeniko ha bibezikiso bituwana nga tupangesa bingila byabiha bya kwambulwilamo byali na kutulongesa Yehova nameme kutukaluwila kulinga ngoco. Co lalo, tusimutwiya ha byuma bitunasa kulinga mangana tupange byabingi mu cipangi ca kwambulula.

7. Bibezikiso muka bituwana nga tutwalelelaho kulinga byabingi mu cipangi ca kwambulula?

⁷ Tushwenya manene kuyehi nendi. Tusimutwiyeni hali mukulunu wa lizina lya Samuel * uje ali na kupangela ku Colombia hamolika na mwebwendi. Ou ndolome na munakazi wendi bakele na kulikuwa kulinga bupainiya mu cikungulukilo cabo, oloni bashakele kukakwasa cikungulukilo cije cakele mu bujene. Co bapandele kwecela kulinga byuma bimo na kuseza byuma bimo bibashakele. Samuel ngwendi: “Twapangesele cinangulo cili ku mukanda wa Mateo 6:33, co twecelele kulanda byuma bimo bije keti bya seho manene. Oloni cuma capwile cacikalu manene capwile kuseza njibo yetu. Baitungile mu ngila yaibwa manene, co lalo kutwapangesele bimbongo bya kukongola mutwaitungile.” Oloni mubajalukilile ku cikungulukilo ceka, banangukile ngwabo kwatondekele lika bimbongo byabindondo bya kulanda byuma bya kulikwasesa. Samuel wendekele lalo ngwendi: “Twalimwena omwo Yehova ali na kukumbulwilamo malombelo etu na kututwamenena. Tuli na kuliziba ngwetu tuli na kuzibisa Yehova kubwaha ku mbunge, co lalo busamba  bwetu nendi bunakanyama manene kutubakana kunima.” Kuma mwasa kulinga byabingi mu cipangi ca kwambulula ndi? Nga mukemwo, co zibukeni ngweni kulinga ngoco kumikwasa mushwenye manene kuyehi na Yehova, co amikwasa kuwana bimutonda.—Myaso 18:25.

8. Bika bimulilongesa ku majwi a Ivan na Viktoria?

⁸ Tupwa ba kubwahelela omwo tumupangela. Tusimutwiyeni hali Ivan na Viktoria baje bapwa bapainiya ku Kyrgyzstan. Basiwisile buyoye bwabo mangana balyane kutambula bipangi byoshe-byoshe bya mu munga kwambateselela na bipangi bya kutunga. Ivan ngwendi: “Twapangele na nzili cipangi coshe-coshe cibatwanene. Nameme twakele na kujuka ku mamaneselelo a litangwa, twapwile ba kushubuluka mwafwa twazibukile ngwetu tunapangesa nzili yetu ku bipangi bya Bumwene. Twabwahelelele manene mwafwa twawanene babusamba babaha babangi, co lalo twaliwanene na byuma byabibwa byabingi.”—Mako 10:29, 30.

9. Bika byanalingi ndokazi uje ali na kulifwita na bukalu mangana alinge byabingi mu cipangi ca kwambulula, co bubwa muka bunatundumo?

⁹ Twasa kupangela Yehova mu kubwahelela nameme tuli na kulifwita na bukalu. Cakumwenako, fwile wa kakulukazi wa lizina lya Mirreh uje wakala ku muyatangwa wa Africa, washangumukile kulinga bupainiya omwo walikelele cipangi ca bundotolo. Mirreh wabinja mendi, ngeci asa lika kwambulwila ku njibo na njibo ha ola imo. Oloni mwakambulwila ku mbunga, akapanga simbu yailaha. Co lalo, ali na mangenzi a kwilukila amangi na bilongesa bya Mbimbiliya byabingi. Bamo akalilongesa nabo kupangesa foni. Bika byashongangeyeye Mirreh ashake kulinga byabingi? Wendekele ngwendi: “Njazema manene Yehova na Kilistu Yesu. Co njikalombo Yehova ngwange anjikwase kulinga byabingi mu cipangi cendi.”—Mateo 22:36, 37.

10. Kwesekesa na mukanda wa 1 Petulu 5:10, Yehova akalingi bika kuli baje bakalyana?

¹⁰ Yehova atulongesa. Kenny uje wapwa painiya ku Mauritius walimwenenene busunga bwa awa majwi. Omwo walilongesele busunga, watundile ha yuniveziti, bamumbwitikile, co washangumukile cipangi ca simbu yoshe. Wendekele ngwendi: “Njishaka kutembwinina kapolofweto Isaya uje wendekele ngwendi: ‘Yange unoye njitumeni.’” (Isaya 6:8) Kenny nakwasa mu bipangi bya kutunga bya kuliseza-seza, co lalo nakwasa mu kunungulula mabulu a kukundama ku Mbimbiliya mu ndaka yabo. Kenny wendekele ngwendi: “Banjilongesele mwakulingila mwamubwa bipangi bibanjanene.” Oloni walilongesele byabingi keti mwakulingila lika bipangi embwe. Wendekele ngwendi: “Njalilongesele ngwange kuli bipangi bimo bije kunjasa kulinga, co lalo njalilongesele bifwa binjinapande kukala nabyo mangana njipangele mwamubwa Yehova.” (Tandeni 1 Petulu 5:10.) Kuma neni mwasa kutengululako bimo mu kuyoya mangana Yehova amilongese bipangi bya kuliseza-seza ndi?

11. Bandokazi bamo ba ku South Korea balingile bika mangana base kwambulula, co bika binatundumo? (Taleni cikupulo cili ha liputa lya kulibanga.)

¹¹ Nameme baka-kwambulula baje banapangela Yehova ha simbu yailaha bakalilongesako bimo mubakapangesa bingila byabiha bya kwambulwilamo. Ha simbu ya mushongo wa COVID-19, bakulunu ba ku South Korea basonekele ngwabo: “Baka-kwambulula bamo baje basinganyekele ngwabo kubasa kwambulula mwafwa ya kubinja, bali na kwambulula kupangesa makina. Cakumwenako, bandokazi batatu baje bali na myaka ya kutubakana 80 banalilongesa mwakupangesela makina, co bali na kwambulula simbu yoshe.” (Myaso 92:14, 15) Kuma mushaka kulinga byabingi mu cipangi ca kwambulula mangana mulimwene manene bubwa bwa Yehova ndi? Tusimutwiyeni ha  byuma bimo bimwasa kulinga mangana mushulisilile eci cilengo.

12. Yehova nakulahesa bika baje bamukulahela?

¹² Kulaheleni Yehova. Yehova nakulahesa ngwendi atubezikisa manene nga tumukulahela na kumupangela na mbunge yetu yoshe. (Mala 3:10) Ndokazi Fabiola wa ku Colombia walimwenene busunga bwa awa majwi. Washakele kupwa painiya wa simbu yoshe munima lika ya kumumbwitika. Oloni wapandele kutwalelelaho kupanga mangana anyunge muka-limbo lyendi na bana babo batatu. Co simbu yendi ya kwecela bipangi muyetele, walombelele manene kuli Yehova mangana amukwase. Wendekele ngwendi: “Kuketi simbu yailaha mangana munu bamwane penshini, oloni yange banjaneneyo munima ya ngonde imolika. Cije capwile cikomokeso.” Munima ya bingonde bibali washangumukile kulinga bupainiya. Ha simbu ino ali na myaka ya kutubakana 70, co nalingi bupainiya ha myaka ya kutubakana 20. Co lalo, nakwasa banu ba kupwa 8 bete ha kubambwitika. Wendekele ngwendi: “Nameme njikazeye bisimbu bimo, Yehova ali na kunjikwasa njitwaleleleho kulinga bupainiya.”

13-14. Byakumwenako muka byasa kutukwasa tukulahele Yehova na kushulisilila bilengo byetu?

¹³ Lilongeseniko bimo kuli baje bakulahelele Yehova. Mu Mbimbiliya muli myanja ya banu baje bapangelele Yehova na nzili. Co ha bisimbu byabingi, Yehova wakele na kubabezikisa munima ya kulinga byuma bije byamwesele ngwabyo banamukulahela. Cakumwenako, Yehova wabezikisile Abilahama omwo watundile mu  nganda yabo nameme “kazibukile kuje kwaile.” (Heve 11:8) Yakomba bamubezikisile munima ya kulwa na kangelo. (Kusha 32:24-30) Baisalele mubashakele kukobela mu lifuti lya cikulaheso basele lika kujabuka Ndonga ya Yondau omwo tupilistu bakobelelemo.—Yosh 3:14-16.

¹⁴ Mwasa lalo kulilongesako bimo kuli bangamba ba Yehova ba matangwa ano baje banamukulahela na kushulisilila bilengo byabo. Cakumwenako, ndolome Payton na mwebwendi Diana bakele na kulikuwa kutanda mizimbu ya bandolome na bandokazi baje balyangwilile kulinga byabingi mu cipangi ca kwambulula ba kufwa ngwe baje babanendeka mu biñanda bya mutwe wa “Balyanene na Bimbunge Byabo Byoshe.” * Payton ngwendi: “Mutwakele na kutanda ije mizimbu, twakele na kuliziba ngwe baje bali na kukenga munu uje ali na kulya byakulya bya kutobala. Omwo twatwaleleho kutanda ije mizimbu, twashakele kubatembwinina mangana tumakele na kulimwena bubwa bwa Yehova.” Mu kwita kwa simbu, Payton na Diana baile na kupangela kuje kwakele bujene. Neni mukatanda eyi mizimbu ndi? Kuma mwakengaho laja vidio ya Ingilishi ya Kwambulwila ku Mutambela wa kulako mu Australia neyi ya Kwambulwila ku Mutambela wa kulako mu Ireland aje ali ha jw.org ndi? Eyi mizimbu na mavidio byasa kumikwasa kuwana bingila mumwasa kushulisilila bilengo byeni.

15. Kwangula mwamubwa babusamba kutukwasa bati?

¹⁵ Anguleni mwamubwa babusamba. Kwakwasi kumakela byakulya bije kanda tulyeho laja nga tulikwatasana na baje bakabili. Mu ngila imolika, nga tulikwatasana na banu baje banaka bya Bumwene mu mutamba wa kulibanga, co tukala na lishungu lya kulinga byabingi mu munga ya Yehova. Ndolome Kent na mwebwendi Veronica balimwenenene busunga bwa awa majwi. Kent wendekele ngwendi: “Babushoko bwetu na babusamba betu bakele na kutushongangeya tulinge byabingi mu munga ya Yehova. Kulikwatasana na baje banaka bya Bumwene mu mutamba wa kulibanga kwatukwasele tulyakele bilengo byabiha.” Ndolome Kent na ndokazi Veronica banapu bapainiya ba kulitila, co bali na kupangela ku Serbia.

16. Cisimo ca Yesu cije cili ku mukanda wa Luka 12:16-21, cimwesa bati seho ya kulyana?

¹⁶ Lyaneni mangana mupangele Yehova mu kushula. Kuzibisa Yehova kubwaha kukutondeka kuseza byuma byoshe bitwashaka. (Kwambu 5:19, 20) Oloni nga twonowa kulinga byabingi mu munga ya Yehova mwafwa ya kushaka lika kutwalelelaho kulinga byuma bitwashaka, co tunalifu na munalume wa mu cisimo ca Yesu uje wonowele kupangela Njambi mwafwa ya kushaka kulikungulwila bufuko. (Tandeni Luka 12:16-21.) Ndolome Christian wendekele ngwendi: “Kunjakele na kuwana simbu yaingi ya kupangela Yehova na kukala na naanga yange.” Ou ndolome na mwebwendi bashangumukile kulinga bupainiya. Oloni bapandele tahi kulikela bipangi asinoni base kulinga bupainiya. Ngeci bashangumukile cipangi ca kujelesa binjibo na maofisi mangana bawane bimbongo bya kulikwasesa. Co lalo, bajaukile na byuma byabindondo bibakele nabyo. Kuma bali na kulibeya indi? Christian wendekele ngwendi: “Ha simbu ino tuli na kulikuwa manene cipangi ca kwambulula. Co lalo, tukabwahelela kumona banu batukalilongesa nabo Mbimbiliya na baje batukambulwila oku balilongesa bya Yehova.”

17. Mwafwa bika kunasa kutukaluwila kupangesa ngila yaiha ya kwambulwilamo?

¹⁷ Esekeni kupangesa bingila bya kuliseza-seza bya kwambulwilamo. (Vili 17:16, 17; 20:20, 21) Ndokazi Shirley uje wapwa painiya ku United States natengululako bingila byakambulwilamo ha simbu ya COVID-19. Ha kulibanga,  kakele na kwambulula kupangesa foni. Oloni omwo kanyungi wa kuzenguluka wabendelele, Shirley walilongesele mwakwambulwila kupangesa foni, co ha simbu ino akambulula kupangesa foni kushwa kumo. Wendekele ngwendi: “Ha kulibanga, njakele na kuziba lyoba kupangesa eyi ngila ya kwambulwilamo, oloni ha simbu ino njili na kulikuwa. Co lalo, tuli na kwambulwila banu babangi kutubakana mutwakele na kwambulwila ku njibo na njibo.”

18. Bika bitwasa kulinga nga tuliwana na bukalu buje bushaka kutwonowesa kushulisilila bilengo bitunalyakela?

¹⁸ Lyakeleni cilengo, co lingeniko bimo mangana mucishulisilile. Mutukaliwana na bukalu, tukalombo Yehova mangana atukwase, co tukasinganyekesesa mangana tuzibuke bitunapande kulinga. (Visi 3:21) Sonia wapwa painiya wa simbu yoshe, co ali na kupangela hamo na cibunga cikapangesa ndaka ya Romany ku Europe. Ou ndokazi wendekele ngwendi: “Njikasoneka bilengo byange ha lipapelo na kwaka lije lipapelo hanjasa kulimona. Ha mesa yange hali cikupulo cije cimwesa bingila bibali bije biya ku mitambela ya kuliseza. Co munjikashaka kwangula bya kulinga, njikatala haje ha cikupulo na kusinganyekesesa mangana njizibuke kubinjitwala byuma binjishaka kwangula.” Sonia akalingi mwoshe mwasela mangana amone bukalu bwanaliwana nabwo mu ngila yaibwa. Wendekele ngwendi: “Njasa kulyangwila kumona bukalu bunjili na kuliwana nabwo ngwe cibumbe cije cinjonowesa kushulisilila bilengo byange nambe kubumona ngwe cabu cije cinjikwasa njibishulisilile.”

19. Twasa kumwesa bati ngwetu twakandelela ku byuma byabibwa byali na kutulingila Yehova?

¹⁹ Yehova ali na kutubezikisa mu bingila bya kuliseza-seza. Tumwesa ngwetu twakandelela ku bibezikiso byali na kutwana nga tumushangazala. (Heve 13:15) Tumushangazala nga tulinga byabingi mu munga yendi, co kulinga ngoco kutulingisa tulikuwe bibezikiso byabingi. Ha litangwa na litangwa, tulingeni mwoshe mutwasela kumakela mangana tumone ngwetu ‘Yehova wapwa wamubwa.’ Nga tulinga ngoco, co tutembwinina Yesu uje wendekele ngwendi: “Byakulya byange binapu kwononoka cizango ca uje wanjitumine na kumanesa bipangi byanjanene ngeci njibilinge.”—Yowa 4:34.