1, 2. Extëm jyënaˈanyë Salmo 34:8, ¿ti mbäät nduˈunëm parë nnijäˈäwëm ko Jyobaa oyjyaˈay?

NˈOKWINMÄˈÄYËM ko pën xyˈanmäˈäyëm ets ti njëˈxëm diˈib kyajnëm ndimjäˈäwëm wiˈix jyawë. Per mbäät nwinmäˈäyëm naa wiˈix jyawë ko jeˈeyë nˈijxëm, nxuukˈäjtëm, ko nnijäˈäwëm wiˈix të yˈoyë o ko nyajtëˈëwëmë wiink jäˈäy pën të txuˈkxjawë. Per ¿wiˈix mbäät mas niˈigyë nnijäˈäwëm wiˈix jyawë? Jaˈko njëˈxmäjtsëm.

² Nenduˈun jyaty mëdë Jyobaa, mbäät jeˈeyë nbawinmäˈäyëm wiˈix yˈoyjyaˈayëty ko ngäjpxëmë Biiblyë, ëxpëjkpajn o ko nmëdoowˈijtëm wiˈixë nmëguˈukˈäjtëm tnigäjpx tnimaytyäˈäktë wiˈixënë Jyobaa kyunuˈkxëdë. Per jaanëm mbäät yajxon njaygyujkëm wiˈixënë Jyobaa yˈoyjyaˈayëty ko këˈëm ndimˈijxëm ets ndimjäˈäwëm (käjpxë Salmo 34:8). * Okpawinmay ko mdunäˈäny prekursoor, per parë duˈun mdunët, tsojkëp adëyë xyajnëjkxëdë mjukyˈäjtën. Waˈan kanäkˈok të ngäjpxëm wiˈixë Jesus jyënaˈany, ko pën nbëjtakëm jëjpˈamë Diosë tyuunk, Jyobaa xymyoˈoyäˈänëm tijaty nyajtëgoyˈäjtëm. Per waˈan ninäˈänëm ngaˈijxëm wiˈix tyëyˈäjtëndëkë extëmë Jesus jyënany (Mat. 6:33). Pën nmëbëjkëm extëmë Jesus twandaky, ta kyaj nëgoo meeny sentääbë etsë xëëw tiempë nyajtunäˈänëm mä ja tuunk ayoˈon, niˈigyë nbëjtäˈägäˈänëm ja winmäˈäny mä nˈëwäˈkx ngäjpxwäˈkxëm. Ko duˈun nduˈunëm, ta këˈëm ndimˈixäˈänëm wiˈixë Jyobaa xyˈijxˈijt xykyuentëˈäjtëm. Ets këˈëm ndimjäˈäwëm wiˈixë Jyobaa yˈoyjyaˈayëty.

3. Extëm jyënaˈanyë Salmo 16:1, 2, ¿pënaty tyukˈoyˈäjttëbë Jyobaa yˈoyjyaˈayˈäjtën?

³ Jyobaa “oyjyaˈay mët niˈamukë” jäˈäy axtë pënaty kyaj yˈixyˈatyëty (Sal. 145:9; Mat. 5:45). Per pënaty mas niˈigyë kyunuˈkxypy, yëˈë pënaty tsojkëp ets mëduunëp amumduˈukjot (käjpxë  Salmo 16:1, 2). * Min nˈokˈijxëm tuk pëky majtsk pëky tijaty oyˈäjtënë Jyobaa xytyukmëduˈunëm.

4. ¿Wiˈixë Jyobaa ttukˈixyë yˈoyjyaˈayˈäjtën pënaty mëwingoonëp?

⁴ Tëgok tëgok nguytyuˈunëm tijatyë Jyobaa xytyukniˈˈijxëm, ta nbëjkëmë kuentë wiˈix xypyudëjkëm mä jukyˈäjtën. Ko niˈigyë të nˈixyˈäjtëmë Jyobaa ets ntsojkëm, yëˈë të xypyudëjkëm parë të nyajtëgäjtsëm ja jot winmäˈäny etsë tuˈun käjpxën diˈib kyaj ttukjotkëdaˈaky (Kol. 1:21). Ets ko të ndukëdëjkëmë jukyˈäjtën ets të nnëbajtëm, ta niˈigyë të xytyukˈijxëm ja yˈoyjyaˈayˈäjtën ets tyam, mbäädë net nmëdäjtëm wäˈätsë jot winmäˈäny ets mëët nnaymyaˈayëm (1 Peed. 3:21).

5. ¿Wixaty nˈijxëmë Jyobaa yˈoyjyaˈayˈäjtën mä nˈëwäˈkx ngäjpxwäˈkxëm?

⁵ Mä nˈëwäˈkx ngäjpxwäˈkxëm, nan nˈijxëm wiˈixë Jyobaa yˈoyjyaˈaytyaˈaky. ¿Waˈan mijts mwintsoytyuˈunëty? Mayë Dios mëduumbëty jantsy wintsoytyuˈunëty. Mä nety xykyanijawënëm ja tëyˈäjtën, kyaj mdimwinmääy mnëjkxët ëwäˈkx käjpxwäˈkxpë winjëën windëjk. Per tyam, xëmë duˈun xytyuny, etsë Jyobaa mbudëjkëp parë xytyukxondäˈägët mä mˈëwaˈkxy mgäjpxwaˈkxy, pes të xyˈixy ko wiˈixëm mbudëkëty. Extëm nˈokpëjtakëm, ko jäˈäy mwingajpxy mjëjpkajpxyëty kyaj mjotˈambëky. Ets nan yëˈë Jyobaa mbudëjkëp parë xyjyamyatsët tuˈugë tekstë mä jäˈäy xymyëtmaytyaˈaky diˈib yˈoymyëdoobyë Diosë yˈayuk. Nan yëˈë mmooyëbë jot mëjääw parë duˈunyëm xymyëduunˈadëˈëtsët, oyë jäˈäy tkatsojkënyëˈaty mä mˈëwäˈkx ngäjpxwaˈkxy (Jer. 20:7-9).

6. ¿Wiˈixë Jyobaa dyajnigëxëˈëgyë yˈoyjyaˈayˈäjtën ko xytyukniˈˈijxëm wiˈix nduˈunëm ja tyuunk?

⁶ Jyobaa nan të dyajnigëxëˈëgyë yˈoyjyaˈayˈäjtën ko xytyukniˈˈijxëm wiˈix mbäät nˈëwäˈkx ngäjpxwäˈkxëm (Fwank 6:45). Mä reunyonk jap nyajtukniˈˈijxëm wiˈix mbäädë jäˈäy nmëtmaytyaktsoˈonëm, ta net duˈun nduˈunëm ko nëjkxëm käjpxwäˈkxpë. Tuktëjkëbë tsëˈëgë, per ko duˈun nduˈunëm, ta nˈijxëm ko jantsy oy wyimbëtsëmy mä ngäjpxwäˈkxëm. Mä reunyonk ets mä asamblee, nan yajtukniˈˈijxëm wiˈix mbäät nˈëwäˈkx ngäjpxwäˈkxëm extëmë nety ninäˈänëm duˈun ngatuˈunëm. Ets mbäädë net njëjptsëˈk njëjpjäˈäwëm mët ko kyajnëmë nety duˈun ndimtuˈunëm. Perë Jyobaa xykyunuˈkxëm mëjwiin kajaa ko duˈun nduˈunëm. Minë net nˈokˈijxëm tuk pëky majtsk pëky wiˈixënë Jyobaa dyajnigëxëˈëgyë yˈoyjyaˈayˈäjtën ko nduˈunëm diˈib kyajnëm ndimtuˈunëm oy wiˈix nyaˈijx nyajpatëm. Ta nenduˈun nˈixäˈänëm wiˈix mbäät nyajmëjwiin nyajkaajëmë Diosë tyuunk.

7. ¿Ti kunuˈkxën nˈaxäjëm ko niˈigyë nyajmëjwindëjkëmë Diosë tyuunk?

⁷Niˈigyë Jyobaa nmëwingoˈonëm. Min nˈokˈijxëm wiˈix yajnimaytyaˈaky tuˈugë nmëguˈukˈäjtëm diˈib xyëwˈäjtypy Samuel * ets tyuny ansianë. Mëdë kyudëjk, jap tyundë Colombia. Jyantsy tyukxondaktëbë nety ko tyundë prekursoor mä kyongregasionk, per ta ojts nyaygyäjpxëdë ko niˈigyë dyajmëjwindëkëyäˈändë Diosë tyuunk ko nyëjkxäˈändë mä tyëgoyˈatyë naybyudëkë. Parë duˈun ttundët, ta tmastuttë tijatyë nety tsyojkënyëˈäjttëp. Samuel jyënaˈany: “Yëˈëts nguytyuundë extëm jyënaˈanyë Matewʉ 6:33 ets kyajts nëgoo tijaty nekyjyuuy nekykyëbajttë diˈib nety kyaj tyimjëjpˈamëty. Per diˈibëts niˈigyë ojts xytsyiptakxëdë, yëˈëts nmastuˈuttët ja njëën ndëjk diˈibëts nety të nyaˈoˈoyëtyaˈaytyë parëts nduktsëënëyäˈändë ets tëtsë nety ngujuuytyaaynyëdë”. Ko ojts nyëjkxtë tuumbë mä wiinkpë kongregasionk, ta tpëjktë kuentë ko tim waanëdëmë nety ja meeny sentääbë  tsyokyëty diˈib mëët ja xyëëw tiempë dyajnaxtët. Samuel yˈakjënaˈany: “Tëts nˈixtë wiˈixëtsë Jyobaa xynyëˈëmoˈoy xytyuˈumoˈoytyë ets wiˈix tˈatsoowëmbity kots nmënuˈkxtäˈäktë, nˈijxtëbëts ko tyukjotkëdakypy tijatyëts nduundëp ets ko xytsyojktëbëts, kyajnëmtsë nety duˈun ndimnayjawëdë”. ¿Mbäät xyˈixy wiˈix niˈigyë xyajmëjwindëkë Diosë tyuunk? Pën duˈun, mbäät mˈity seguurë ko mas niˈigyë Jyobaa xymyëwingonäˈäny ets ko yëˈë diˈib mˈijxˈitan mguentëˈatanëp (Sal. 18:25).

8. ¿Ti xytyukniˈˈijxëm extëm jyënaˈanyë Iván mëdë Viktoria?

⁸Jotkujk xyajnayjyäˈäwëm ko nmëduˈunëmë Jyobaa. Min nˈokˈijxëm wiˈix jyënäˈändë Iván mëdë Viktoria, yëˈë tuˈugë kasäädë jäˈäy diˈib tuundëp prekursoor jap Kirguistán. Yëˈëjëty ojts ttuknibëjtäägëdë dyajnëjkxäˈändë jyukyˈäjtën adëyë parë oy ti tuunk yajtuknipëktët, extëm mä yajkojˈyë jëën tëjk. Iván jyënaˈany: “Mëkëts njantsy tyuundë mä tuˈuk tuˈuk ja tuunk diˈibëts yajtuknipëjktë. Oyëtsë nety nuˈun të njantsy yˈanuˈkxëdë mäts tuk xëëwˈam të ndundë, agujk jotkujkëts njantsy nyayjyäˈäwëdë mët ko jamëtsë nety nxëëw ndiempë të nyajtundë mä Diosë tyuunk. Ets jantsy jotkujkëts nnayjyawëdë kots të nbäättë nmëtnaymyaayëbëty ets kots njamyatstë tijatyëts mëët nduundë” (Mar. 10:29, 30).

9. ¿Wiˈix tuˈugë nmëguˈukˈäjtëm të dyajmëjwindëkë Diosë tyuunk oy pyeky yˈixyëty, ets wiˈix të wyimbëtsëmy?

⁹ Ko nmëduˈunëmë Jyobaa mbäät agujk jotkujk xyajnayjyäˈäwëm oyë nety wiˈix nyaˈijx nyajpatëm. Extëm nˈokpëjtakëm, tuˈugë nmëguˈukˈäjtëm diˈib xyëwˈäjtypy Mirreh, tsyëënë África Occidental, ojts kyuˈoˈknë ets doktoora nety tyuny. Ko ojts tyuumbëtsëëmnë, ta tyuundëjkë prekursoora. Myëdäjtypy tuˈugë päˈäm diˈib xyëwˈäjtypy artritis ets jeˈeyë mbäät nyijkxy tuk oorë ëwäˈkx käjpxwäˈkxpë winjëën windëjk. Per mä ja karruˈunk yajwindanë, mbäät jam mas jeky yˈëwaˈkxy kyäjpxwaˈkxy. Nan mayë jäˈäy dyaˈëxpëky ets nääk tmëgajpxy mä telefënë. ¿Ti pudëjkë parë niˈigyë Jyobaa tmëduny? Yëˈë jyënaˈany: “Yëˈkots niˈigyë ntsokyë Jyobaa etsë Jesukristë. Xëmëts nˈanëëmë Jyobaa parëts xypyudëkët etsëts nduunëdë tyuunk nuˈunëts nmadaˈaky” (Mat. 22:36, 37).

10. Extëm jyënaˈanyë 1 Pedro 5:10, ¿wiˈixë Jyobaa tkunuˈkxy pënaty niˈigyë mëduunëp?

¹⁰Jyobaa xytyukniˈˈijxëm wiˈix nduˈunëm ja tyuunk. Min nˈokˈijxëm wiˈixë Kenny, tuˈugë prekursoor diˈib tuump jap Mauricio, ojts dyajtëyˈäjtëndëkë ko Jyobaa xyjyantsy yaˈëxpëjkëm. Ko tˈixyˈajtyë Dios, ta ojts tmastuˈutyë unibersidad, ta nyëbejty ets tyuundëjkë prekursoor regulaar. Yëˈë jyënaˈany: “Nduumbyëtsë mëjääw parëts nbanëjkxë yˈijxpajtën ja kugajpxy Isaías, diˈib jënan: ‘¡Tyamëts ëjts! Kajxkëts’” (Is. 6:8). Kenny kanäk jëmëjt të tyuuny mä konstruksionk ets nan të tpudëkë myëguˈuktëjk mä yaˈëwnaxy yajkäjpxnaxyë ëxpëjkpajn diˈib mä yˈayuk. Yëˈë jyënaˈany: “Yajtukniˈˈijxëts wiˈixëts ndunët ja tuunk diˈibëts yajtuknipëjk”. Perë tyääbë nmëguˈukˈäjtëm kyaj jeˈeyë tjäjty ttunët ja tuunk. Yëˈë yˈakjënaˈany: “Nan nnijäˈäwëts tijatyëts mbäät nmëmadaˈaky ets tijaty kyaj, ets njäjtëts wiˈixëts oy njäˈäyˈatët parëts niˈigyë Jyobaa nmëdunët” (käjpxë 1 Pedro 5:10, TNM). * Pääty, oyxyëp ko nˈijxëm wiˈix niduˈuk niduˈuk nyaˈijx nyajpatëm parë nmëduˈunëmë Jyobaa, ja ko yëˈë xytyukniˈˈixëyäˈänëm wiˈix nduˈunëm ja tyuunk.

11. ¿Tijaty tyuundë näägë nmëguˈukˈäjtëm diˈib Corea del Sur parë niˈigyë dyajmëjwindëjkëdë Diosë tyuunk, ets wiˈix të wyimbëtsëmy? (Ixë dibujë diˈib miimp mä rebistë nyiˈak).

¹¹ Axtë pënaty jeky kujk Dios mëduunëp, nan yaˈˈawij yaˈˈagajëdëbë Jyobaa ko tyam yˈëwäˈkx kyäjpxwäˈkxtë extëmë nety kyaj duˈun ttimtundë. Extëm nˈokpëjtakëm mä jyaˈˈatyë päˈäm  COVID-19, ja mëjjäˈäytyëjkëty diˈib tuundëp jap Corea del Sur, duˈun tkujäˈäyëdë: “Näägë nmëguˈukˈäjtëm diˈibë nety jënandëp ko kyaj mbäät yˈëwäˈkx kyäjpxwäˈkxtë mët ko pyëk yˈixëdë, tyam mbäät duˈun ttundë mä bideoyamaadë. Nidëgëëgë nmëguˈukˈäjtëm diˈibë jyëmëjt 80 naxy të ttukjattë dyajtundëdë komputadoorë ets tyam xëmë yˈëwäˈkx kyäjpxwäˈkxtë” (Sal. 92:14, 15). ¿Myajmëjwindëkëyaampy niˈigyë Diosë tyuunk ets mˈixaampy ko Jyobaa jantsy oyjyaˈay? Min nˈokˈijxëm ti mbäät mbudëkëty parë duˈun xytyunët.

12. ¿Ti Jyobaa tyukwandakypy pënaty tukˈijxpajtëp?

¹²Tukˈijxpatë Jyobaa. Pën ndukˈijxpajtëm ets pën nyajtuˈunëmë xëëw tiempë mä mëduˈunëm, xykyunuˈkxäˈänëm mëjwiin kajaa (Mal. 3:10). Fabiola, tuˈugë nmëguˈukˈäjtëm diˈib tsënaapy Colombia ojts tˈixy ko Jyobaa kyuytyuumbyë wyandakën. Ko nyëbajtääy, ta jyatuundëkëyany prekursoora regulaar, per yëˈë nety diˈib yˈijxypyë fyamilyë. Päätyë Jyobaa tjantsy myënuˈkxtaky parë pyudëkëdët ko nety ja nyeky dyajtëkëyaˈany mä yajjubilaratäˈäny. Yëˈë tnimaytyaˈaky: “Jeky xëmë jäˈäy tˈawxittë parë yajjubilarattët, per ëjts, jeˈeyëts nˈawxijty tuk poˈo, tats nyajjubilaräjty. Kyajts nmëbëkany”. Kyum majtsk poˈo, ta tyuundëjkë prekursoora. Fabiola ja tyamë jyëmëjt 70 naxy ets ja kujk tyuny 20 jëmëjt prekursoora. Nuˈun kujk duˈun tyuny, ja jäˈäy të tpudëkë niduktujk parë nyëbattë. Yëˈë jyënaˈany: “Näˈätyëts nnayjyawëty ko kyajts ti njot nmëjääwnë, perë Jyobaa yëˈëts diˈib xypyudëjkëm parëts nyajkaˈpxy ja nˈoorë”.

13, 14. ¿Pënatyë yˈijxpajtën mbäät xypyudëjkëm parë ndukˈijxpajtëmë Jyobaa ets nyajmëjwiin nyajkajaajëmë tyuunk?

 ¹³Nˈokpanëjkxëmë yˈijxpajtën pënaty ojts ttukˈijxpattë Jyobaa. Mä Biiblyë yajmaytyakpë Dios mëduumbëty diˈib jyotmooytyë Diosë tyuunk. Ets parë tˈijxtë wiˈixë Jyobaa kyunuˈkxëdë, jawyiin ojts ttukˈijxpattë. Extëm nˈokpëjtakëm, Dios kyunuˈkxë Abrahán ko tnikeky ja jyëën tyëjk oyë nety “tkanijawë mä nyejxy” (Eb. 11:8). Etsë Jacob, jawyiin yˈoktsiptuuny mët tuˈugë anklës, taanëmë net ojts yajkunuˈkxy mëjwiin kajaa (Gén. 32:24-30). Ko nety ja israelitëty tyëkëyanëdë mä ja Nax diˈib Yajtukwandaktë, jawyiin nyëguwäˈktë ja saserdotëty mä ja Jordán mëjnëë, taanëmë net ja nax käjpn pyanäjxëdë (Jos. 3:14-16).

¹⁴ Nan mbäät mëjwiin kajaa mbudëkëdë yˈijxpajtënë nmëguˈukˈäjtëm diˈib tyam tyukˈijxpajttëbë Jyobaa ets tˈëxtäˈäytyë winmäˈäny wiˈix mbäät mas niˈigyë ttuunëdë ja tyuunk. Extëm nˈokpëjtakëm, tuˈugë kasäädë jäˈäy, Payton mëdë Diana, jyantsy tyukxondaktëp ijty ko tkäjpxtë mä yajnimaytyäˈäktë nmëguˈukˈäjtëm diˈib yajmëjwindëjkëdëbë Diosë tyuunk. Payton tnimaytyaˈaky: “Kots ojts ngäjpxtë eksperiensyë, duˈunxyëp extëmtsë jäˈäy njantsy yˈijxkay njantsy yˈijxˈuuktë. Kots mas niˈigyë nˈijxtë, tats niˈigyë njawëyandë ets nˈixandë ja Jyobaa yˈoyjyaˈayˈäjtën”. Ko tiempë nyajxy, tyääbë kasäädë jäˈäy, ta ojts nyëjkxtë mä tyëgoyˈatyë naybyudëkë. Të ¿xyˈokˈijxpë bideo Kyaj jyaˈˈatyë jukyˈäjtënë mas oybyë ets Ngäjpxwäˈkxëm mä tukëˈëyë naxwinyëdë, diˈib yajpatp mä jw.org? * Tyääbë bideo mbäät mbudëkëty parë niˈigyë xyajmëjwiin xyajkajaajëdë Diosë tyuunk.

15. ¿Wiˈix xypyudëjkëm ko nnaymyaˈayëm mëdë nmëguˈukˈäjtëm diˈib niˈigyë yajmëjwindëjkëdëbë Diosë tyuunk?

¹⁵Naymyayëdë mëdë nmëguˈukˈäjtëm diˈib mbäät mbudëkëty. Kyaj tsyiptaˈaky njäˈäwgyajpëm ja käˈäy ukën diˈibë nety ninäˈänëm ngajëˈxëm ko nyajpatëmë mëdë jäˈäy diˈib jyantsy jyëˈxandëp. Nenduˈun jyaty mä Diosë tyuunk, pën nyajnäjxëmë xëëw tiempë mëdë nmëguˈukˈäjtëm diˈib myëduundëbë Jyobaa, kyaj nëjkx xytsyiptakxëm nyajmëjwindëjkëm ja Diosë tyuunk. Duˈun jyajtyë Kent mëdë Verónica. Kent tnimaytyaˈaky: “Yëˈëtsë nfamilyë etsëtsë nmëtnaymyaayëbëty diˈibëts xymyëjääwmooytyë parëts nˈokˈijxmatstët ndundëdë Jyobaa tyuunk extëmtsë nety kyajnëm ndimtundë. Nbëjktëtsë kuentë ko pën nyajnäjxëmë tiempë mëdë nmëguˈukˈäjtëm diˈib jëjpˈam pyëjtaktëbë Diosë tyuunk, xypyudëjkëm parë nduˈunëm diˈib ninäˈänëm ngatuˈunëm”. Tyäˈädë kasäädë jäˈäy, ja tyam tyuundë prekursoor espesial, jap Serbia.

16. Extëm jyënaˈanyë Lukʉs 12:16-21, ¿tiko yˈoyëty niˈigyë nnayojxëm parë Jyobaa nmëduˈunëm?

¹⁶Nayoxëdë parë niˈigyë Jyobaa xymyëdunët. Parë Jyobaa ttukjotkëdäˈägët tijaty nduˈunëm, kyaj yëˈë tˈandijy nmastutäˈäyëm tëgokyë tijaty nmëdäjtëm (Ecl. 5:19, 20). Mbäät kyaj nyajmëjwindëjkëmë Diosë tyuunk mët ko kyaj nmastuˈudäˈänëm tijaty ëtsäjtëm ntsojkënyëˈäjtëm, pes duˈunë nety nˈadëtsëm extëm ja yetyëjk diˈibë Jesus myaytyak, diˈib mëk jyantsy tyuuny jyantsy yˈayooy parë tijaty tˈijxy tpaty, per jyaˈaytyëgooyë Dios (käjpxë Lukʉs 12:16-21). Christian, tuˈugë nmëguˈukˈäjtëm diˈib tsënaapy Francia, jyënaˈany: “Kyajtsë nety jamë nxëëw ndiempë nyajtuny ni mä Jyobaa ets ni mätsë nfamilyë”. Tyäˈädë nmëguˈukˈäjtëm mëdë kyudëjk, ta ttukniwinmäˈäyëdë tyunäˈändë prekursoor, per parë duˈun tyundët, tsojkëbë nety ja tyuunk nmastuˈuttët. Ets parë ja myeeny syentääbë tpäättët, yëˈë tyuunkˈäjttë mä dyajwäˈätstë jäˈäyë jyëën tyëjk, agujk jotkujk nyayjyäˈäwëdë oyë nety kyaj nëgoo tnekypyäättë meeny sentääbë. ¿Wiˈixëdaa nyayjyäˈäwëdë ko tmastuttë ja tyuunk ets tyuundëjkëdë prekursoor? Yëˈë jyënaˈany: “Niˈigyëts njantsy tyukxondaktë kots ojts nˈëwäˈkx ngäjpxwäˈkxtë  ets kots nˈijxtë wiˈix niˈigyë tmëwingondë Jyobaa pënatyëts nyaˈëxpëjktëp”.

17. ¿Ti pudëjkë tuˈugë nmëguˈukˈäjtëm parë ttuny diˈibë nety kyajnëm ttimtuny?

¹⁷Tiko xykyaˈijxmatsy diˈibë nety kyajnëm xytyimtunynyëm (Apos. 17:16, 17; 20:20, 21). Shirley, tuˈugë prekursoora diˈib tsënaapy Estados Unidos ojts dyajtëgatsy wiˈixë nety yˈëwaˈkxy kyäjpxwaˈkxy mä jyaˈˈatyë päˈäm COVID-19. Tim ëgaˈany ojts tsyiptakxëty yˈëwäˈkx kyäjpxwäˈkxët mä telefënë. Per ko ojts kyuˈixëdë ja sirkuitë, ta tyukniˈˈijxëdë wiˈix mbäät ttundë. Ets desde jaa, ta ëgaˈany tyëjkë ëwäˈkx käjpxwäˈkxpë mä telefënë. Tyäˈädë nmëguˈukˈäjtëm tnimaytyaˈaky: “Ojtsëts tim ëgaˈany nˈoktsëˈëgë, per tyam njantsy myëtmaytyäˈägaambyëtsë jäˈäy mä telefënë. Mayëts kujkë jäˈäy nmëtmaytyaˈaky ets këdiinëm kotsë nety nëjkxy winjëën windëjk”.

18. ¿Ti mbäät xypyudëjkëm parë nwinguwäˈkëmë amay jotmay diˈib xyajtuˈuˈadujkëm parë kyaj nyajmëjwiinëmë Diosë tyuunk?

¹⁸Tuknibëjtäägë ti mdunaampy ets ta net xytyunët. Ko nbatëmë amay jotmay, ta nmënuˈkxtakëmë Jyobaa etsë net nwinmäˈäyëm wiˈix mbäät nˈokmëmadakëm (Prov. 3:21). Sonia, diˈib tuump prekursoora regulaar mä tuˈugë ayuk yajkajpxy romaní jap Europa, jyënaˈany: “Xëmëts ngujayë tijatyëts ndunaampy ets ngëxˈootsyëts mäts mbäät nˈixy. Mä tuˈugë meesë tamëts nmëdaty tuˈugë dibujë mä kyëxëˈëky majtskë tuˈu diˈib yajnëjkxp wiinktsoojaty. Ets kotsë net ti nduknibëjtäägë ndunäˈäny, tats nˈixy ja dibujë etsëts nwinmay mätsoojëts xyajnëjkxäˈäny diˈibëts ndunaampy”. Ko Sonia tpäätyë amay jotmay, tyuumbyë mëjääw parë kyaj yëˈëyë tmëmay tmëdäjy. Duˈun jyënaˈany: “Koogoo tyëgatsyëtsë njukyˈäjtën, tatsë net nwinmay wiˈixëts nˈixäˈäny, extëm tuˈugë potsy diˈibëts xyajtuˈuˈadujkp parëts kyaj ndunët tijatyëts të nduknibëjtäägë o extëm tuˈugë puentë diˈibëts xypyudëjkëp parëts ndunët tijatyëts të nduknibëjtäägë. Këˈëmëts mbäät nwinmay wiˈixëts nˈixäˈäny”.

19. ¿Wiˈix mbäät nyajnigëxëˈkëm ko nmëjjäˈäwëm tijatyë Jyobaa të xytyukmëduˈunëm?

¹⁹ Jyobaa wiˈixëm xykyunuˈkxëm. Ets mbäät nyajnigëxëˈkëm ko nmëjjäˈäwëm ko nduˈunëmë mëjääw parë nmëjkumäˈäyëm (Eb. 13:15). ¿Wiˈix mbäät nduˈunëm? Ko nˈëxtäˈäyëmë winmäˈäny wiˈix niˈigyë nyajmëjwindëjkëmë Diosë tyuunk. Pën nduˈunëm duˈun, Jyobaa mas niˈigyë xykyunuˈkxäˈänëm. Pääty, oy ko tuˈuk tuˈugë xëëw nˈijxëm ets njäˈäwëm ko Jyobaa oyjyaˈay. Duˈunë nety nbanëjkxëmë Jesusë yˈijxpajtën diˈib jënan: “Ja ngäˈäy nˈukënëts, yëˈë kots nduunët ja tsyojkën diˈibëts të xykyexy etsëts nyajjëjpkëxët ja tyuunk” (Juan 4:34, TNM).