1-2. Salamo 34:8 ena hereva heḡereḡerena, edena dalai Iehova ena kara namodia baita dibadia?

MANI a laloa, oi na ta ese guna so mamia toho anianina ta e henimumu. Oi ese una aniani bo itaiamu, bo bonaiamu, ena resepi bo abiamu, o haida bo nanadaidiamu bema idia ese e ura heniamu, unu amo ḡau ta bo dibaiamu. To, oi sibomu ese ba mamia toho unu amo bo dibamu una aniani be o ura heniamu o lasi.

² Ita ese Baibul bona eda pablikeisin baita duahimu, bona haida ese Iehova amo e abi hahenamodia e herevalaimu baita kamonaimu neganai, Iehova ena kara namodia baita dibamu. To siboda ese Iehova ena kara namodia baita ‘mamidia tohomu’ neganai, Iehova ena namo baita lalopararalaia namonamomu. (Salamo 34:8 ba duahia.) Una baita karaia dalana ta mani aita herevalaia. Reana ita na ta uramu fultaim hesiai ḡaukara baita karaia, to una baita haḡuḡurua totona namona na eda mauri ai ḡau haida baita haidau. Reana nega momo Iesu ena gwauhamata ta duahiamu, e gwa bema Basileia baita tahua gunamu, Iehova ese eda dabu ḡaudia be henimu, to reana ita ese una gwauhamata e ḡuḡuru mamina na do asita abia. (Mat. 6:33) To, Iesu ena gwauhamata ta abidadama heniamu dainai, ḡau momo asita hoimu, eda moni ḡaukara horadia ta hamaraḡimu, bona haroro ḡaukara ta laloa badamu. Unu baita kara tomamu neganai, siboda ese baita mamiamu Iehova ese eda dabu ḡaudia na e havaramu. Iehova ena kara namodia baita ‘mamidiamu.’

3. Salamo 16:1, 2 ena hereva heḡereḡerena, daidia be Iehova ena kara namodia amo namo e davarimu?

³ Iehova ese taunimanima iboudiai, ia asie dibaia taudia  danu e “kara namo henidiamu.” (Sal. 145:9; Mat. 5:45) To Iehova e lalokau heniamu bona edia mauri ibounai lalonai ia e hesiai heniamu taudia na Ia amo hahenamo momo e abimu. (Salamo 16:1, 2 ba duahi.) Mani Iehova ese ita daidai e kara ḡau namodia haida aita herevalai.

4. Iehova ese ia e raka henia kahimu taudia be edena dalai e kara namo henidiamu?

⁴ Iehova amo ta dibamu ḡaudia ta badinamu negadia ta ta ai, ita e durudamu daladia ta itamu. Heḡereḡere, ia ta dibaia bona ta lalokau henia matama neganai, ia ese e duruda se ura henimu lalohadaidia bona karadia ta dadarai. (Kol. 1:21) Bona eda mauri na Iehova enai ta gwauhamatalai bona ta bapatiso neganai, ia ese ḡau namodia momo e henida, heḡereḡere lalomamina ḡoevana bona hetura karana namona ia ida.​—1 Pet. 3:21.

5. Edena dalai haroro ḡaukara ai Iehova ena kara namodia ta mamimu?

⁵ Haroro ḡaukara ta karaiamu negadiai Iehova ena kara namodia na dounu ta mamimu. Oi be hemarai tauna, a? Iehova ena taunimanima momo na unu bamona. Iehova ena hesiai tauna ta ai do sola neganai, reana o laloava idau tauna ta ena ruma na basio laomu bona ia enai Baibul na basio herevalaiamu. To hari, una na o karaia hanaihanaimu. Bona Iehova ese e durumu dainai haroro ḡaukara na o moalelaiamu! Iehova ese na dala ma haida ai danu e durumumu. Heḡereḡere, haroro ḡaukara ai ta ese e hereva auka henimu neganai Iehova ese e durumu o haheauka. Danu Iena heduru dainai kamonai tauna enai siri maorona o ḡaukaralaia. Bona ia ese goada e henimu haroro ḡaukara ba karaia hanaihanai ena be taunimanima na asie kamonaimu.​—Ier. 20:7-9.

6. Edena dalai Iehova e henimu treinin ese iena kara namodia e hahedinaraimu?

⁶ Iehova ese ena kara namodia ita edai e hahedinaraiamu dalana ta na, haroro ḡaukara dainai treinin e henidamu. (Ioa. 6:45) Eda wiki heboudiai, e heḡaeḡaelai haroro daladia ta itamu, bona e hagoadadamu haroro ḡaukara ai baita ḡaukaralai. Matamanai, reana baita garimu dala matamatadia baita ḡaukaralai, to bema baita badinadiamu, baita itaiamu eda teritori ai anina namona be varamu. Hebou maraḡidia bona badadia ai e hagoadadamu haroro daladia matamatadia baita tohodia. Ini ibadinadia danu reana baita garimu, to bema baita badinadiamu, Iehova ese be hanamodamu. Ena be eda noho daladia na ede bamodia, to bema Iehova baita abidadama heniamu bona baita ḡaukara goadamu dala matamatadia baita badinadiamu Iehova ese be henidamu ḡau namodia ma haida mani aita herevalai. Bena eda haroro ḡaukara baita habadaia daladia haida baita riviulai.

7. Baita hekwarahimu eda haroro ḡaukara baita habadaiamu neganai dahaka hahenamo baita abimu?

⁷ Iehova ihetura henina karana baita hagoadaia. Mani elda ta ladana Samuel * aita laloa, ia na adavana ida Colombia ai e painiamu. Idia ese edia kongrigeisin ai painia ḡaukara na e moalelaiava, to edia hesiai ḡaukara bae habadaia totona idia na e ura pablisa dia momo kongrigeisin ta bae durua. Una ura bae haḡuḡurua totona, e ura henimu ḡaudia haida na bae dadarai. Samuel na e gwa: “Ai ese Mataio 6:33 a badinaia bona basia ḡaukaralai diba ḡaudia ihoidia karana a hadokoa. To emai apatmen irakatanina na e auka, badina emai ura dalanai e haginia bona davana ibounai a heni.” Samuel na adavana ida ela edia kongrigeisin matamatana neganai, unuseniai  na moni bada se negeva dia guna heḡereḡerena. Samuel na eto: “Iehova ese e narimaiva bona emai ḡuriḡuri e haerelaia daladia na a ita. Ai ese Iehova ena lalonamo bona lalokau na a mamia dia guna a mamia heḡereḡerena.” Oi be dala haida ai emu haroro ḡaukara ba habadaia diba, a? Bema unu bo kara tomamu, bo diba momokanimu emu hetura karana Iehova ida na be goadamu bona ia ese be narimumu.​—Sal. 18:25.

8. Ivan bona Viktoria edia hereva amo dahaka o dibamu?

⁸ Eda hesiai ḡaukara ai baita moale. Mani Ivan bona Viktoria edia hereva aita laloa, idia raruosi na Kyrgyzstan ai e painiamu. Edia mauri ai ḡau haida e haidau unu amo asainmen idauidau, bona konstraksen projek ai bae volantia. Ivan na e gwa: “Ai na projek ta ta ai a ḡaukara goadava. Ena be ḡaukara muridiai tauanimai na e hesikuva, to a moaleva badina dibamai emai goada na Iehova dainai a ḡaukaralaia. Bona danu a moale badina tura matamatadia momo bona ekspiriens namodia momo a davari.”​—Mar. 10:29, 30.

9. Hekwakwanai haida e davari taihu ta be dahaka e kara ena hesiai ḡaukara baine habadaia, bona dahaka namo e davari?

⁹ Iehova ena hesiai ḡaukara na baita moalelaia diba ena be hekwakwanai idauidau ta davarimu. Heḡereḡere, West Africa ai vabu iahuna ta ladana Mirreh na dokta ta, ia na ena moni ḡaukara amo e ritaea neganai painia ḡaukarana e hamatamaia. Mirreh na arthritis gorerena e abia dainai, ruma-ta-ruma-ta haroro ḡaukara ai na hora tamona mo baine ḡaukara diba. To pablik haroro ḡaukara ai be hora momo e ḡaukarava. Bona iena lou henia bona Baibul stadi na momo, idia haida na telefon amo e hereva henidiamu. Mirreh be dahaka ese e durua dainai ena haroro ḡaukara e habadaia? Ia na eto: “Lau na mai lalogu idoinai ida Iehova bona Keriso Iesu na lalokau henidiamu. Bona hanaihanai Iehova na ḡuriḡuri heniamu baine durugu iena hesiai ḡaukara baina goadalaia.”​—Mat. 22:36, 37.

10. 1 Petro 5:10 heḡereḡerena, edia haroro ḡaukara e habadamu taudia be Iehova amo dahaka hahenamo e abimu?

¹⁰ Iehova amo treinin ma haida ta abimu. Mauritius ai painia ta ladana Kenny, enai una na e momokani. Ia ese hereva momokani e dibaia neganai, iunivesiti e rakatania, e bapatiso bona fultaim hesiai ḡaukara ai e vareai. Ia na ini e gwau toma: “Launa na ura peroveta tauna Isaia ena hereva baina badinaia, eto: ‘Lau o ina, a siaigu.’” (Isa. 6:8) Kenny na konstraksen projek idauidau ai e ḡaukarava, bona ena gado ai eda pablikeisin ihahanaina ḡaukarana e duruava. Kenny na e gwa: “Na abia asainmen ese e durugu egu asainmen baina haḡuḡurudia totona.” To ia na dia unu ḡaukara ikaradia daladia mo e diba. Ia na ma eto: “Lau ese egu goada hetoana bona Iehova ena hesiai tauna namona ai bainala totona baina hahedinarai kara namodia na dibadia.” (1 Petro 5:10 ba duahia.) Reana oi danu emu mauri ai ḡau haida ba haidau diba, unu amo Iehova ese dala ma haida amo treinin baine henimu.

11. South Korea ai taihu haida be dahaka e kara haroro ḡaukara bae karaia totona, bona dahaka namo e vara? (Rau 1 laulauna ba itaia.)

¹¹ Hereva momokani ai e noho daudau taudia danu treinin bae abi na namo bema e uramu haroro daladia matamatadia bae tohodia. COVID-19 pandemic lalonai, South Korea ai kongrigeisin ena elda taudia na e gwa: “Matamanai haida na gorere dainai e laloava haroro ḡaukara na basie karaia dibamu, to hari na videoconferencing amo haroro ḡaukara e karaiamu. Laḡanidia 80 taihudia tatoi na kompiuta iḡaukaralaina dalana e dibaia bona hari idia na una dala amo haroro ḡaukarana e karaia hanaihanaimu.”  (Sal. 92:14, 15) Oi be o uramu emu hesiai ḡaukara ba habadaia bona Iehova ena kara namodia ba mamidia, a? Unu ba kara toma totona, bae durumu diba daladia haida mani aita herevalai.

12. Iehova ena gwauhamata be dahaka ia enai e tabekaumu taudia ediai?

¹² Iehova enai baita tabekau. Ia na e gwauhamata bema ia baita abidadama heniamu bona mai kudouda ibounai ida baita hesiai heniamu, ia ese be hanamodamu. (Mal. 3:10) Colombia ai taihu ta ladana Fabiola na Iehova ese una gwauhamata ienai e haḡuḡurua dalana na e itaia. Ia na e bapatiso murinai e ura regula painia ḡaukara baine karaia. To, ia na moni ḡaukara e karaiava ena ruma bese baine durua totona. Una dainai moni ḡaukara amo e ritaea neganai, Iehova ena heduru e noia. Ia na e gwa: “Nega momo taunimanima na nega daudau e narimu murinai edia pension monina e abiamu, to lau be hua ta murinai egu pension monina na abia. Una na hoa ḡauna ta!” Ia na hua rua muridiai painia ḡaukara e hamatamaia. Hari ia laḡanina na 70 lalodiai bona laḡani 20 mai kahana painia ḡaukara vada e karaia. Ia ese taunimanima 8 e durudia ela bona e bapatiso. Ia na e gwa: “Ena be nega haida na manokamu, to Iehova ese dina ta ta e durugumu painia ḡaukara baina karaia hanaihanai totona.”

13-14. Ededia haheitalai ese be durudamu Iehova baita abidadama henia bona eda hesiai ḡaukara baita habadaia?

¹³ Iehova e abidadama henia taudia edia haheitalai amo diba baita abi. Baibul lalonai  Iehova ena hesiai ḡaukara e goadalaiava taudia sivaraidia na momo. Nega momo, unu hesiai taudia na Iehova enai edia abidadama e hahedinaraiava murinai Iehova ese hanamodiava. Heḡereḡere, Abraham na “ede bainela na asi dibana” to ena hanua e rakatania murinai, Iehova ese e hanamoa. (Heb. 11:8) Iakob na aneru ta ida e heatu murinai hahenamo badana ta e abia. (Gen. 32:24-30) Bona Israel besena na Gwauhamata Tanona ai do asie vareai neganai, hahelaḡa taudia aedia na Ioridane Sinavai ranuna ai e turu dobi, una murinai taunimanima na e raka hanai.​—Ios. 3:14-16.

¹⁴ Hari ina negai danu, Iehova e abidadama heniamu bona edia hesiai ḡaukara e habadamu tadikaka taihu edia haheitalai amo diba bavabi. Heḡereḡere, tadikaka ta ladana Payton bona adavana, Diana, ese Iehova ena hesiai ḡaukara e habadaiava tadikaka taihu edia sivarai iduahidia na e moalelaiava, unu sivarai haida na ina series ladana “They Offered Themselves Willingly” ai e herevalai. * Payton na e gwa: “Edia ekspiriens a duahiva neganai, a mamia vaitani ta na aniani namona e moalelaiava bona ai be ia a raraiava. Ia a itaiava neganai ai danu a urava baia ‘mamia toho, bena baia diba Iehova na namo.’” Gabeai, Payton bona Diana na pablisa dia momo gabuna ta ela. Oi ese una series o duahia, a? Bona jw.org ai ini vidio Witnessing in Isolated Territory​—Australia bona Witnessing in Isolated Territory​—Ireland vada o itadia, a? Unu ese be durumumu emu haroro ḡaukara ihabadana daladia ba tahu.

15. Tura maorodia ese ita be ede be duruda tomamu?

¹⁵ Tura maorodia baita abi hidi. Guna asita ania anianina na una aniani e manadalaia taudia ida baita ania heboumu neganai, baita moalelaiamu. Una heḡereḡerena, bema edia mauri lalonai Iehova e atoa gunamu taudia baita bamodiamu neganai, baita uramu dala baita tahu Dirava ihesiai henina ḡaukarana baita habadaia. Kent bona adavana Veronica ediai una na e vara. Kent na e gwa: “Turamai bona emai famili ese e hagoadamaiva hesiai ḡaukara idauidau baia tohodia. A laloparara Basileia e atoa gunamu taudia baia bamodiamu neganai, una ese be hagoadamaimu dala matamatadia baia tohodia.” Hari, Kent bona Veronica na Serbia ai spesol painia ḡaukara e karaiamu.

16. Luka 12:16-21 ai Iesu ese e gwauraia parabolena heḡereḡerena, dahaka dainai mai eda ura ida ḡau haida baita dadarai na namo?

¹⁶ Iehova ihamoalena totona ḡau haida baita dadarai. Anina na dia ta moalelaimu ḡaudia iboudiai baita dadarai. (Koh. 5:19, 20) To, bema Iehova ihesiai henina ḡaukarana asita habadaiamu badina asita uramu ta moalelaimu ḡaudia haida baita dadarai, ita na Iesu ese ena parabole ai e gwauraia tauna heḡereḡerena. Ia na ena kohu namodia momo e habou to Dirava na se laloa bada. (Luka 12:16-21 ba duahi.) France ai e nohomu tadikakana ta ladana Christian, na e gwa: “Lau ese egu nega bona goada na asina heniva Iehova bona egu famili ediai.” Ia bona adavana na lalodia e hadai bae painia. To una bae haḡuḡurua totona, idia ese edia moni ḡaukara bae rakatani. Tauani dalanai sibodia bae henari totona, idia ese cleaning bisnes maraḡina ta e hamatamaia, bona e abia daeva dekediai mimia ḡaudia na heḡereḡere. Bae painia totona ḡau haida e dadarai dainai idia e moale, a? Christian na e gwa: “Hari emai haroro ḡaukara na a moalelaia badamu bona Baibul stiuden bona lou henia a itadiamu Iehova e dibaiamu neganai a moalemu.”

17. Dahaka dainai eda haroro ḡaukara ai dala matamatadia baita tohodia na auka?

 ¹⁷ Mai eda ura ida haroro daladia matamatadia baita tohodia. (Apos. 17:16, 17; 20:20, 21) United States ai, painia ta ladana Shirley na COVID-19 pandemic dainai ena haroro daladia e haidau. Matamanai, ienai na e auka telefon amo baine haroro. To seket tauna ena vadivadi amo trenin e abi murinai, ia na telefon amo haroro ḡaukara e karaia hanaihanaimu. Ia na e gwa: “Matamanai na na gari, to hari na na moalelaiamu. Hari taunimanima momo na ta hereva henidiamu dia guna ruma-ta-ruma-ta ḡaukara ai ta karaiava heḡereḡerena!”

18. Bema ḡau haida daidiai eda haroro ḡaukara baita habadaia na auka, dahaka ese baine duruda diba?

¹⁸ Plen ta baita karaia bona baita haḡuḡurua. Hekwakwanai haida ta davarimu neganai, Iehova ena heduru baita noia bona hekwakwanai ihanaidia daladia baita lalodia namonamo. (Her. 3:21) Europe ai, Romany gado grup e duruamu regula painia ta ladana Sonia, na e gwa: “Launa na uramu egu plen na pepa ta ai baina toredia diho bona baina itaia diba gabuna ta ai baina kapaia. Egu teibolo ai na drawing ta, dala rua laulaudia. Na uramu abi hidi ta baina karaia neganai, unu dala rua na itadiamu bona na lalomu, lau ba karamu abi hidina ese be durugumu egu tahua ḡauna ba haḡuḡuruamu eiava lasi.” Sonia na e ura e davarimu hekwakwanaidia ai lalohadai maorona baine abia. Ia na e gwa: “Hekwakwanai ta ta lalodiai, egu kara be haba ta heḡereḡerena lau e kougumu egu tahua ḡauna basina haḡuḡurua, o nese ta heḡereḡerena lau e durugumu egu tahua ḡauna baina haḡuḡurua.”

19. Namona na laloda baita hadai dahaka baita kara?

¹⁹ Iehova ese dala momo ai e hanamodamu. E henida ḡaudia daidiai ia baita tenkiu henia dalana na, baita hekwarahi ia baita heatolaia. (Heb. 13:15) Bona dala matamatadiai eda hesiai ḡaukara baita habadaia, unu amo Iehova ese hahenamo ma haida baine henida. Namona na dina ta ta ai dala baita tahu, unu amo baita ‘mamia toho, bena baita diba, Iehova na namo.’ Bena Iesu heḡereḡerena, baita gwaumu: “Agu aniani binai: e siaigu Diravana ena ura baina karaia, iena ḡaukara baina haḡuḡurua.”​—Ioa. 4:34.