1-2. Dapre Psom 34:8, ki nou bizin fer pou ‘gout’ bonte Zeova?

MAZINE ki enn kikenn donn twa enn manze ki zame to’nn goute avan. To kapav aprann kitsoz lor manze-la kan to get li, to santi li, to gagn reset-la, ouswa kan to demann lezot zot lopinion lor manze-la. Me sel fason pou to kone si to pou kontan manze-la, se kan to gout li tomem.

² Nou kapav aprann plis lor bonte Zeova kan nou lir Labib ek bann piblikasion, ek kan nou ekout lezot rakonte kouma Zeova inn beni zot. Me pou nou vremem trouve ki kantite Zeova Li bon, nou bizin ‘gout’ so bonte par noumem. (Lir Psom 34:8.) Anou gete kouma nou kapav fer sa. Fer koumadir nou anvi servi Zeova aplintan. Alor, nou pou bizin sinplifie nou lavi pou nou kapav realiz nou lobzektif. Sirman souvan nou’nn lir promes Zezi ki dir ki si nou met Rwayom Bondie an premie dan nou lavi, Zeova pou donn nou tou seki nou vremem bizin. Selman, kitfwa zame nou pa finn trouv Zeova fer sa pou nou. (Mat. 6:33) Me parski nou ena lafwa dan promes Zezi, nou koumans diminie nou depans, nou travay mwins, ek nou fer nou maximum dan nou minister. Kan nou fer sa, nou koumans trouve par noumem ki Zeova vremem donn nou seki nou bizin. Se koumsa ki nou ‘gout’ bonte Zeova personelman.

3. Dapre Psom 16:1, 2, anver kisannla Zeova montre so bonte?

³ Zeova “ena labonte pou tou dimoun,” mem pou bann dimounn ki pa konn Li. (Ps. 145:9; Mat. 5:45) Me Zeova sirtou montre so bonte anver so bann serviter ki kontan Li ek ki servi Li avek tou zot leker. (Lir Psom 16:1, 2.) Anou get bann bon kitsoz ki Zeova inn fer pou nou.

4. Kouma Zeova montre so bonte anver bann dimounn ki vinn pros ar Li?

 ⁴ Sak fwa ki nou aplik seki nou aprann lor Zeova, nou trouve kouma sa ena enn linflians lor nou lavi. Par exanp, kan nou’nn aprann plis lor Zeova ek nou’nn koumans kontan Li, Li’nn ed nou pou rezet bann panse ek bann pratik ki Li pa kontan. (Kol. 1:21) Ek kan nou’nn vwe nou lavi ar Li ek nou’nn pran batem, nou’nn plis trouv so bonte ankor parski Li’nn donn nou enn bon konsians ek Li’nn fer nou vinn so kamarad.​—1 Pier 3:21.

5. Kouma nou kapav trouv bonte Zeova dan nou minister?

⁵ Nou kontign trouv bonte Zeova dan nou minister. Eski to timid? Boukou serviter Zeova timid. Avan ki to vinn enn Temwin Zeova, kitfwa zame to ti pou panse ki to ti pou kapav tap laport enn dimounn ki to pa kone, pou koz lor Labib avek li. Me azordi, to fer sa regilierman. Anplis, avek led Zeova, to’nn aprann pou kontan predikasion! Zeova ed twa dan lezot fason osi. Li ed twa pou gard to kalm kan enn kikenn dan predikasion koz brit ar twa. Li osi ed twa pou rapel bann verse ki pou tous leker bann dimounn ki interese. Ek Li donn twa lafors pou kontign prese dan bann teritwar kot bann dimounn pa interese ar to mesaz.​—Zer. 20:7-9.

6. Kouma nou kapav trouv bonte Zeova dan formasion ki Li donn nou?

⁶ Zeova montre nou so bonte kan Li form nou pou prese. (Zan 6:45) Dan nou renion lasemenn, nou gagn bann model konversasion ki montre nou seki nou kapav dir kan nou prese, ek nou kapav servi sa bann lide-la dan nou minister. O-koumansman, kitfwa nou ti inpe ezite pou pres dan enn nouvo fason, me kan nou’nn fer sa, nou’nn trouve ki sa nouvo fason prese la efikas. Dan bann renion ek bann lasanble, nou gagn lankourazman pou sey bann nouvo metod prese, ki kitfwa zame nou pa’nn seye. Kitfwa nou ezite pou fer sa osi, me kan nou esey sa bann nouvo metod-la, Zeova beni nou. Asterla, dan ninport ki sitiasion nou ete, anou gete ki benediksion nou gagne kan nou fer Zeova konfians ek nou fer nou best pou servi Li. Apre sa, nou pou gete kouma nou kapav fer plis dan nou minister.

7. Ki benediksion nou gagne kan nou fer zefor pou fer plis dan nou minister?

⁷ Nou vinn pli pros ar Zeova. Anou get lexanp enn ansien ki apel Samuel * ek ki pe servi kouma pionie avek so madam dan Kolonbi. Sa koup-la ti pe fer pionie dan zot lasanble, me zot ti anvi fer plis dan zot minister, ek zot ti anvi al ede dan enn lasanble kot bizin plis proklamater. Pou realiz sa lobzektif-la, zot ti bizin fer bann sakrifis. Samuel dir: “Nou ti aplik Matie 6:33 ek nou’nn aret fer bann depans initil. Me seki ti pli difisil se kit nou lapartman, parski nou ti fini pey li ek nou ti bien kontan li.” Kan zot ti al dan zot nouvo lasanble, zot ti trouve ki zot pa ti bizin sa kantite larzan-la pou viv. Samuel dir: “Nou’nn trouve kouma Zeova inn diriz nou ek inn reponn nou bann lapriyer. Nou kone ki Zeova kontan seki nou pe fer, ek nou resanti so lamour dan bann nouvo fason.” Eski to kapav fer plis dan to minister? Si wi, to kapav  sir ki to pou vinn pli pros ar Zeova ek ki Li pou pran twa swin.​—Ps. 18:25.

8. Ki nou kapav aprann ar seki Ivan ek Viktoria inn dir?

⁸ Nou gagn lazwa dan nou servis. Anou get lexanp Ivan ek Viktoria, enn koup ki pe servi kouma pionie dan Kirzikstan. Zot ti viv enn lavi sinp pou ki zot kapav servi kouma volonter dan ninport ki afektasion zot gagne, mem lor bann proze konstriksion. Ivan dir: “Nou ti fer nou best dan sak afektasion ki nou ti gagne. Mem si nou ti fatige lafin lazourne, nou ti ere parski nou ti kone ki nou ti pe travay dir pou Zeova. Nou ti gagn boukou lazwa osi parski nou ti gagn bann nouvo kamarad ek nou ti fer bann zoli lexperyans.”​—Mark 10:29, 30.

9. Kouma enn ser inn fer plis dan so minister malgre so bann difikilte, ek ki rezilta li’nn gagne?

⁹ Nou kapav gagn lazwa dan nou servis pou Zeova mem si nou sitiasion difisil. Anou get lexanp Mirreh, enn ser ki vev ek aze, ek ki res dan Lwes Lafrik. Li ti enn dokter, ek kan li ti pran so retret, li ti koumans fer pionie. Mirreh ti ena lartrit ek li ti gagn boukou douler kan li ti marse. Li ti kapav pres lakaz-lakaz zis enn er-t-an par zour, me li ti kapav pas plis letan pou prese an piblik. Li ti osi ena boukou vizit ek letid, ek li ti fer sertin parmi zot par telefonn. Kifer Mirreh ti anvi fer plis pou Zeova? Li dir: “Mo leker ranpli ar lamour pou Zeova ek Zezi Kris. Ek souvan mo demann Zeova pou ed mwa pou fer mo maximum pou Li.”​—Mat. 22:36, 37.

10. Dapre 1 Pier 5:10, ki Zeova fer pou enn kikenn ki fer plis pou servi Li?

¹⁰ Zeova donn nou bann lezot formasion. Kenny, enn pionie ki servi lil Moris, finn fer sa lexperyans-la. Kan li’nn konn laverite, li’nn kit liniversite, li’nn pran batem, ek li’nn koumans servi Zeova aplintan. Kenny dir: “Mo ti anvi fer parey kouma profet Izai, ki ti dir: ‘Ala mo la! Avoy mwa!’” (Iza. 6:8) Kenny inn travay lor plizir proze konstriksion, ek li’nn osi ede pou tradir bann piblikasion dan so lang. Kenny dir: “Mo ti gagn bann formasion ki mo bizin pou ki mo vinn efikas dan mo lafektasion.” Me li pa ti zis aprann kouma pou fer bann travay ki’nn donn li. Kenny dir: “Mo ti aprann osi lor bann limit ki mo ena ek lor bann kalite ki mo bizin devlope pou vinn enn pli bon serviter Zeova.” (Lir 1 Pier 5:10, NW. *) Eski twa osi to kapav fer sertin sanzman dan to lavi pou ki Zeova donn twa bann lezot formasion?

11. Ki zefor bann ser dan Kore Disid inn fer pou ki zot kapav prese, ek ki rezilta zot inn gagne? (Get zimaz lor kouvertir.)

¹¹ Mem bann Temwin ki pe servi Zeova depi bien lontan bizin gagn formasion kan zot esey pres dan enn nouvo fason. Pandan pandemi COVID-19, bann ansien dan enn lasanble ki trouv dan Kore Disid ti ekrir: “Avan, akoz zot lasante, sertin proklamater ti panse ki zot pa kapav prese. Me asterla, zot pe reisi prese par video-konferans. Trwa ser, ki ena apepre 80 an, inn aprann kouma pou servi enn ordinater, ek asterla preske toulezour zot prese.” (Ps. 92:14, 15) Eski to ti pou kontan fer plis dan to minister ek ‘gout’ bonte Zeova ankor plis? Anou get sertin kitsoz ki to kapav fer pou realiz sa lobzektif-la.

12. Ki promes Zeova fer pou bann dimounn ki kont lor Li?

¹² Aprann kont lor Zeova. Zeova promet nou ki Li pou donn nou boukou benediksion si nou fer Li konfians ek nou donn Li nou best. (Mal. 3:10) Enn ser ki apel Fabiola ek ki res Kolonbi, ti trouv Zeova realiz sa promes-la. Li ti anvi servi kouma pionie permanan zis apre so batem. Me li ti bizin travay pou soutenir so mari ek so trwa zanfan. Alor, kan li ti gagn drwa pran so retret, li ti priye Zeova boukou pou ed li. Fabiola dir: “An prinsip, sa pran boukou letan avan ki enn kikenn gagn so pansion, me mwa mo ti koumans gagn mo pansion zis enn mwa apre ki mo ti fer mo demann. Sa ti enn vre mirak!” De mwa plitar, Fabiola ti koumans fer pionie. Azordi, li ena apepre 70 an ek li’nn fer pionie pandan plis ki 20 an. Anplis, li’nn ed wit dimounn pou pran batem. Fabiola dir: “Mem si parfwa mo santi mwa feb, Zeova ed mwa toulezour pou mo kapav kontign mo servis.”

13-14. Ki lexanp kapav ed nou pou fer Zeova konfians ek pou fer plis dan nou minister?

¹³ Aprann ar lexanp bann dimounn ki’nn kont lor Zeova. Dan Labib, ena lexanp boukou dimounn ki’nn fer boukou zefor pou servi Zeova. Ek boukou parmi zot ti gagn bann benediksion ar Zeova apre ki zot ti montre ki zot ti ena konfians an Li. Par exanp, se apre ki Abraam ti “kit so  prop pei san ki li kone kot li pe ale,” ki Zeova ti beni Li. (Ebre 11:8) Se apre ki Zakob ti lit avek enn anz, ki li ti gagn enn benediksion. (Zen. 32:24-30) Kan nasion Izrael ti pre pou rant dan later Promiz, se apre ki bann pret ti rant dan larivier Zourdin, ki bann Izraelit ti kapav travers larivier-la.​—Zozwe 3:14-16.

¹⁴ Nou kapav osi aprann ar lexanp bann Temwin dan nou lepok ki’nn kont lor Zeova ek ki’nn fer plis dan zot minister. Par exanp, enn frer ki apel Payton ek so madam, Diana, ti kontan lir bann lartik, kouma seri lartik « Ils se sont offerts volontairement » * ki koz lor bann frer ek ser ki’nn fer plis dan zot minister. Payton dir: “Kan nou lir zot bann lexperyans, se koumadir nou pe get enn kikenn manz enn bon manze. Plis nou ti get zot, plis nou ti anvi ‘goute e gete konbien Zeova li bon.’” Finalman, Payton ek Diana finn al servi kot bizin plis proklamater. Eski to’nn lir sa seri lartik-la? Ek eski to’nn get bann video: Prédication dans des régions isolées : Australie, ek Prédication dans des régions isolées : Irlande, ki lor nou sit jw.org? Sa bann video-la kapav ed twa pou trouv bann fason pou fer plis dan to minister.

15. Kouma bann bon frekantasion kapav ed nou?

¹⁵ Swazir bann bon frekantasion. Kan nou pas letan avek bann dimounn ki kontan manz enn manze ki zame nou’nn goute avan, li pli fasil pou nou manz sa manze-la. Dan mem fason, si nou frekant bann frer ek ser ki met Zeova an premie dan zot lavi, nou osi nou pou anvi fer plis dan nou servis pou Bondie. Enn koup Temwin, Kent ek Veronica, finn fer sa lexperyans-la. Kent dir: “Nou bann kamarad ek nou fami ti ankouraz nou pou esey enn nouvo form servis. Nou ti realize ki, kan nou ti frekant bann frer ek ser ki met Rwayom Bondie an premie, nou ti gagn plis kouraz pou esey bann nouvo kitsoz.” Asterla, Kent ek Veronica pe servi kouma pionie spesial dan Serbi.

16. Dapre parabol Zezi ki trouv dan Lik 12:16-21, kifer nou bizin pre pou fer bann sakrifis?

¹⁶ Fer bann sakrifis pou Zeova. Li pa neseser ki nou abandonn tou seki nou kontan pou nou fer Zeova plezir. (Ekle. 5:19, 20) Me si nou swazir pou pa fer plis pou Zeova, zis parski nou pa anvi abandonn bann kitsoz ki nou kontan, nou kapav fer mem erer ki sa zom ris dan parabol Zezi la. Li ti travay dir pou ena enn lavi konfortab, me li pa ti pran Bondie kont. (Lir Lik 12:16-21.) Enn frer ki apel Christian ek ki res Lafrans dir: “Mo pa ti donn Zeova ek mo fami kantite letan ek lenerzi ki mo ti bizin done.” Lerla, Christian ek so madam ti desid pou fer pionie. Me pou ki zot reisi realiz sa lobzektif-la, zot ti bizin kit zot travay. Pou ki zot kapav viv, zot ti mont enn ti biznes netwayaz ek zot ti kontant zot ar sa tigit kas ki zot ti pe gagne la. Eski li ti vo lapenn ki zot fer sa bann sakrifis-la? Christian dir: “Aster, nou plis kontan prese, ek nou kontan pou trouv nou bann etidian Labib ek nou bann vizit aprann konn Zeova.”

17. Kifer li kapav difisil pou nou esey bann nouvo fason prese?

¹⁷ Ena dezir pou esey enn nouvo fason prese. (Zist. 17:16, 17; 20:20, 21) Shirley, enn pionie ki res Letazini, ti bizin sanz fason ki li prese akoz pandemi COVID-19.  O-koumansman, li ti ezite pou prese par telefonn. Me apre ki li ti gagn enn formasion pandan vizit responsab sirkonskripsion, li ti koumans prese par telefonn regilierman. Li dir: “O-koumansman, mo ti per, me asterla mo vremem kontan fer li. Nou zwenn pli boukou dimounn ki kan nou ti pe prese lakaz-lakaz!”

18. Kan nou pe esey fer plis dan nou minister, ki kitsoz kapav ed nou pou fer fas ar bann sitiasion difisil?

¹⁸ Fixe enn lobzektif ek esey realiz li. Kan nou gagn enn problem, nou demann led Zeova ek nou reflesi bien kouma nou kapav sirmont sa problem-la. (Prov. 3:21) Sonia, ki pe servi kouma pionie permanan dan enn group lang Romani dan Lerop, dir: “Mo kontan ekrir mo bann lobzektif lor enn papie ek mo met papie-la enn plas kot mo kapav trouv li bien. Lor mo latab, mo ena enn desin kot ena de semin ki al dan de diferan direksion. Kan mo ena pou pran enn desizion, mo get sa desin-la ek mo reflesi si mo desizion pou ed mwa realiz mo lobzektif ouswa non.” Sonia esey gard enn bon latitid kan li fer fas ar bann difikilte. Li dir: “Mo bizin deside si mo pou trouv sak nouvo sitiasion kouma enn miray ki anpes mwa avanse, ouswa kouma enn pon ki kapav ed mwa pou realiz mo lobzektif.”

19. Kouma nou kapav montre nou rekonesans pou bann bon kitsoz ki Zeova donn nou?

¹⁹ Zeova beni nou dan boukou fason. Nou kapav montre nou rekonesans pou bann bon kitsoz ki Li’nn donn nou, kan nou fer tou seki nou kapav pou donn Li laglwar. (Ebre 13:15) Kitfwa nou kapav fer diferan kitsoz pou servi Zeova, ek lerla Zeova kapav beni nou ankor plis. Sak zour, anou rod bann mwayin pou ‘goute e gete konbien Zeova li bon.’ Lerla, nou pou kouma Zezi, ki ti dir: “Mwa, mo manze, se fer volonte ek fini travay Sa-Enn ki finn avoy mwa la.”​—Zan 4:34.