1-2. Mowiwanana ni Salmo 34:8, enahoweleya nere ddi wihina noone opama wa Yehova?

KUBUWELA onoovahiwa yojha wahinajhegiwe. Mbwenye woona wi kunajhege, we podi osugwa ni woona makalelo enanukweliwa obe omukoha muliba apiyile yoojha ela, podi wuhudhiha ethu-sithu. Mbwenye makalelo apama okanna ebaribari akala yoojha ela yere wudhivela obe naari, fulawiha ni nlumi nawo.

² Mwebaribarene iyo podi woona wi Yehova dapama wodhela omwileri Bibliya, malivuru ehu, ni wavuruwana addibila makalelo yawakenliwa mareeliho a Yehova. Mbwenye iyo nnere wonelamo nannya wihina Yehova dapama, ‘namulawiha’ wihina noone opama waye. (Omwileri Salmo 34:8.) Kasugwa yotajhiha, makalelo eyo enafuniwa wereya. Kubuwela oganna efunelo yowihina ginafuna gaparege mabasa amudhidhi wamutene. Wihina yoluba yawo yakwanele, enohoweleya ojajaliha egumi yawo. Podi wera onorajhihaga wileri mpaganyo wa Yesu asorihiliye egi, napweha mburo wobajha Omwene wa Mulugu, Yehova anere onivaha dhatedhene nnahowelihu. Mbwenye naari dhigarive ndo, podi wera iyo kannonege mpaganyo ola wakwanelaga mwigumini mwehu. (Mat. 6:33) Naari dhigarive ndo, ororomela ni murima wehu watene mpaganyo wa Yesu, eyo podi ovugula makalelo ononga korowa dhehu ebewene, ovugula mudhidhi nnalabihu, ni waaja makalelo owapara mabasa oolaleya. Weragana ndo, onere woona wamwinyo wihina Yehova ohunona dhithu nnahowelihu. We wamwinyo onere ‘omulawiha’ Yehova ni onere okanna ebaribari wihina oliye dapama.

3. Mowiwanana ni Salmo 16:1, 2, anavahiwa dhithu dhapama ni Yehova baani?

 ³ Yehova ‘dapama waathu atene’ teto dapama naleya ehimunonne. (Sal. 145:9; Mat. 5:45) Mbwenye ale enamulabela Yehova enowawakela mareeliho avayekiwa. (Omwileri Salmo 16:1, 2.) Kasugwa dhithu dhimodha dhapama Yehova ananereliye.

4. Dhithu baani dhapama Yehova anavahiye ale enambela onfiyera oliye?

⁴ Iyo naparihedhaga mabasa ndhe Yehova ananivahiye, egumihu enowedda pama. Motajhiha, iyo nuwambela omuhudhera Bibliya ni omudhivela Yehova, oliye onikavihera ogonjhiha mubuwelo ni dhilemelelo dhabure dhafiyere onlapeliha nuliye. (Col. 1:21) Vano iyo nuwipeleka mmadani mwa Yehova ni obaddiziwa, oliye onivaha dhithu dhimodha dhapama ninga: Mubuwelo wohinyemela ni wandana wapama nuliye. — 1 Ped. 3:21.

5. Mabasa oolaleya enanikavihera addi woona wi Yehova dapama?

⁵ Naparaga mabasa oolaleya, kinasitheya woona wi Yehova dapama. We oli muthu owoova? Owinjhiva wahiyo niri ndo. Podi wera nihinakale Anamona a Yehova, iyo nubuwelesa negi: Miyo kaginadha ganda ogogodda musiwo wamuthu gahimunonnimi, thabwathabwa akala museluya ginafunimi omwaddela onakuma mBibliyani. Mbwenye peeno we onowedha werana ndo malabo amatene. Nnikavihero na Yehova, we onodhiveliwa olaleya! Ohiya eyo, walaleyaga, onowoona nikavihero na Yehova mwamakalelo ohiyana-iyana. Motajhiha, wanfwanya muthu ahinafuna orumedha muthenga onalaleyiwe, Yehova onowukavihera okala oomaleyene. Mbwenye wanfwanya muthu anafuna ovuruwana muthenga onalaleyiwe, Yehova onowubusedha dholebela onafuniwe omutonyihedha. Naarive athu amurudda onalaleyiwe yahifunaga ovuruwana muthengaya, Yehova onowuvaha kopolo wihina wahiselele olaleya. — Jer. 20:7-9.

6. Dhithu dhimodha dhinatonyihedha wi Yehova dapama sivi?

⁶ Makalelo mamodha Yehova ananitonyihedhiye wi oliye dapama funixagiha naaparaga mabasa oolaleya. (João 6:45) Motajhiha, mutugumano dha vaari vasumana, nnohudhera makalelo maxa oolaleya. Omambelelowene podi wera nnodheliwa woova vang’no negi nixixe makalelo ala. Mbwenye naxixa makalelo ala maxa murudda nnalaleyihu nnowoona wi makalelo apama. Ohiya eyo, mutugumano ni musonkano dhehu dhinonikongomedha oxixa makalelo ohiyana-iyana oolaleya. Naarive eyo ehoweleyaga otama murudda nibaliwihu. Mbwenye nerana ndo, nnavaha ofuru Yehova wihina anreelihe. Vano nnafuna nawoone mareeliho baani nnafunihu wawakela mwaha woxixa makalelo maxa omparela mabasa Yehova, naarive nifwanyiwaga makathamiho ohiyana-iyana. Namala nnere woona makalelo owakwanihedha dholuba dhehu.

7. Mareeliho baani nnawakelihu nilibihera wihina napare mabasa oolaleya?

⁷ Wandana wehu ni Yehova winoliba. Kasugwa yotajhiha yanamaholela anithaniwa Samuel. * Oliye ni mwariye enalaba oKolombiya. Aabilene, mmulogoni mwewa yalabesa ninga mapiyonero, mbwenye yahikanna efunelo yowawenjhedhedha mabasiwa oolaleya. Vano aliwa othoma wihina etamele mulogo mmodha wahoweleya nikavihero. Otama wula wohoweleya ovugula dhithu dhimodha. Samuel onosoriha: “Iyo niharile mubuwelo onasorihiwa va Mateus 6:33 iyo oselela ogula dhithu nahihowelihu. Mbwenye ethu yathabwile onirusa fuhiya nyumba yehu. Nyumba  ela yaamagiwe mwamakalelo nafunihu.” Mbwenye nuwakela mutholo muxa, anamatelana ala woona wi korowa yakeliwa omabasani dhahivuguliwa. Samuel onosoriha: “Iyo nihoona nlada na Yehova nneddihaga ni awakulaga malobelo ehu. Nihonelamo wi Yehova ahihagalala, vano makalelo anidhiveliye noona ni moonelo mmodha.” Onowawubuwela makalelo mamodha owawenjhedhedha mabasa oolaleya? Akala onowedha, okanne ebaribari wihina wandana wawo ni Yehova onere oliba ni anere okabelela dhithu onahoweliwe. — Sal. 18:25.

8. Ohudhere ddi ni yotajhiha ya Ivan ni Vitoria?

⁸ Iyo nnothabwa ohagalala. Ivan ni Vitoria enalaba ninga mapiyonero elabo yoKirgistawu. Aliwa ehithoma ojajaliha egumi yewa, mwaha yerege owedha wakela mutholo bumutholo yavahiwigiwa, ninga omaga Nyumba dhomwene. Ivan onosoriha egi: “Iyo kanaali amangonya niithaniwa wihina namage Nyumba dhomwene. Mbwenye naaweruwaga, nakalesa oogomeene, teto mudhidhi mmodhave nakala ohagalalene mwaha nahinona wi nlabihedhe kopolo dhehu wihina napare mabasa oOmwene. Ohiya eyo, nihandana ni addibila owinjhiva. Nawubuwela addibila ala nnakala emwerumweruve ni nnohagalala vanlubale. Dhatedhene dhendho nubuwela, ohagalala kunamala.” — Mar. 10:29, 30.

9. Athu amodhaya enna makathamiho orusa ewedhile addi wenjhedhedha mabasiwa oolaleya, ki mareeliho baani yawakenliwa?

⁹ Iyo podi okanna ohagalala naaparaga mabasa a Yehova naari nifwanyiwaga makathamiho orusa. Motajhiha, Mirreh, ali maamukwele anakala elabo ya oeste wAfrika, mbwenye alabesa ninga medika. Oliye nufuluwa mabasa ala wambela olaba ninga piyonera. Mirreh ohukanna oredda wogurumela. Oliye alaleyaga nyumba ni nyumba, anawedha omala woora modha baani, mbwenye olaleya ni karinya onowedha omala mudhidhi wowinjhivene. Oliye ohukanna olenddo dhohogolowelawo ni ohukanna anamahudhera owinjhiva. Anamahudhera amodhaya anaahudhihesa ni telefoni. Enamuthukulela Mirreh wapara mabasa a Yehova nuviheya ddi? Oliye onosoriha egi: “Mwaha odhivela ginnimina ni Yehova vamodha ni Yesu Kiristu. Miyo ginoolobela wa Yehova gimulobaga wihina agikavihere wapara mabasa ala mwamakalelo ginawedhimi.” — Mat. 22:36, 37.

10. Mowiwanana ni 1 Pedro 5:10, Yehova anavaha ddi ale enafuna omparela mabasa oliye?

¹⁰ Yehova kanadha ahiya onxagiha. Kenny, piyonero analaba oMawurisiyo, onowedha woona ni mento aye. Oliye nuuhudhera ebaribari, ahifiyera omuhiya universidade waaparaga mabasa amudhidhi wamutene. Oliye anihina: “Miyo ginoxixa okanna ekalelo emodhave ya namavuhulela Isaías: ‘Gili vala! Girumeni!’” (Isa. 6:8) Kenny onorajhihaga olaba mabasa ohiyana-iyana omaga Nyumba dhomwene ni onorajhihaga okavihera mabasa otapulela ni ewogelo yaye abaliwiyena. Oliye onowoga egi: “Miyo gihixagihiwa vanlubale wihina giwedhe wapara mabasa githomeliwimi.” Mbwenye Kenny kere oxagihiwave, baahi makalelo owapara mabasaye. Oliye onowenjhedhedha egi: “Miyo gihudhera dhithu ginawedhimi ni dhithu gihinawedhimi, ohiya eyo gihenjhedhedha mabasa ginamparelimi Yehova.” (Omwileri 1 Pedro 5:10.) Ki we onowedha wivahedhela wihina oxagihiwe waparege mabasa a Yehova?

11. Arogola oKoreya du Sul yilibihere addi mmabasani oolaleya, ki mareeliho baani yawakenliwa? (Osugwe fotu yavakapani.)

¹¹ Naarive anamalaleya yaxagele mabasiwa oolaleya, aliwa enohowela oxagihiwa. Mudhidhi ola wa koronaviru, anamaholela oKoreya do  Sul ehileba yegi: “Addibila amodha yubuwela wihina kiyawedhe wapara mabasa ala oolaleya. Mbwenye vano aliwa enowedha, elabihedhaga vidiyukonferensiya. Arogola araru enna yaka okwaranya 80, ehihudhera omulabana komputadori. Peeno aliwa enowedha olaleya Malabo amatene.” (Sal. 92:14, 15) Onofuna wenjhedhedha mabasa awo oolaleya wihina olawihe opama wa Yehova? Akala were hee, kasugwa thalo baani enukavihere wakwaniha yoluba yawo.

12. Yehova anapaganya ddi ale enamuroromela?

¹² Ohudhere omuroromela Yehova. Naamuroromelaga oliye ni naalabaga ni kopolo dhehu dhatedhene, Yehova onopaganya onivaha mareeliho owinjhiva. (Mal. 3:10) Fabiola, murogola anakala elabo yoKolombiya, uhona mpaganyo ola wa Yehova wakwanelaga mwigumini mwaaye. Oliye afunesa wihina abaddiziwa alabege ninga piyonera. Mbwenye mamune ni anaaye araru yamuroromela oliyeene wihina aajhihege. Nuufiya mudhidhi wihina akelege korowa okaratene vaade, olobela wa Yehova amulobaga nikavihero. Fabiola onosoriha egi: “Mwebaribarene, wihina dhikume korowa dha muthu anaakela okaratene kahiyo ethu yamasika, mbwenye epaddi yaaga dhereyile muwari mwa mweri mmodha baahi. Ala yaali matikiniho manlubale!” Nuuvira mweri minli, Fabiola wambela olaba ninga piyonera. Peeno oliye ohukanna yaka dhokwaranya 70 ni onolaba okwaranya yaka 20 ninga piyonera. Muwari mwa mudhidhi ola, oliye ohakavihera athu atanu natharu ofiyera obaddiziwa.  Fabiola onosoriha egi: “Naarive nganna makathamiho mwigumini mwaaga, ginomuloba Yehova malabo amatene wihina agikaviherege omuhara porogarama aaga.”

13-14. Yotajhiha baani yukavihere omuroromela Yehova ni ofuna wawenjhedhedha mabasa oolaleya?

¹³ Watajhihe ale emuroromele Yehova. MBibliyani mwikala athu owinjhiva yilibihere vanlubale wapara mabasa a Yehova. Dila dhowinjhivadhene aliwa yerilena thalo yobajha yahinawakele mareeliho avayekiwa a Yehova. Motajhiha, Abaraawu ‘kaanona wadhowiye.’ Naari dhigarive ndo, oliye awakele mareeliho a Yehova mudhidhi agamanle omaga olenddo nuvenyavo vaade vaye. (Heb. 11:8) Jako areelihiwe ni Yehova nuuwana ni mungero. (Gén. 32:24-30) Amwaana Ezarayeli yaajaga ovolowa elabo yothomeliwa, yawedhile wabuwa anamakutha nuwanyigala manjhe owumba amwihinjhe wa Jordawu. — Jos. 3:14-16.

¹⁴ Ehikalawo Anamona a Yehova amudhidhi wehu enamuroromela Yehova ni enilibihera wapara mabasa aye. Motajhiha, ddibila anithaniwa Payton ni mwariye Diana, yodhiveliwa wileri muselu dhaaddibila yaparile mabasa oolaleya, ninga ale enadha mmalivuruni mwehu “Eles se Ofereceram.” * Payton onosoriha egi: “Iyo nilerigi yotajhiha dhaaddibila ala, enakala ninga nnamuturumela muthu anapiya yoojha yodhiva. Naathabwaga wileri muselu ndha nnokanna munigwa ‘wolawiha ni woona opama wa Yehova.’” Nuuvira mudhidhi, Payton ni Diana otamela murudda wahoweleya anamalaleya. Onookannaga ofuru wowileri muselu ndha? Onorajhihaga woona vidiyu dhinna musolo: Pregação em Territórios Isolados — Austrália e Pregação em Territórios Isolados — Irlanda, dhinafwanyeya mu jw.org? Muselu ndha podi wukavihera ofwanya makalelo owenjhedhedha mabasa onampareliwe Yehova.

15. Ekalele ddi yapama wasakulela akwihu owaweddana?

¹⁵ Wasakulelege akwawo owaweddana. Nihikanna elemelelo yolawiha yoojha nahinajhegihu nakala naathu yaale enadhiveliwa yoojha ela. Ni makalelo mamodhave, enowereya akala nnodhiveliwa okala naathu enalabihedha egumi yewa yaparaga mabasa a Yehova, nihiyoya nnokanna efunelo yowawenjhedhedha mabasa a Yehova ni olaleya muthenga Womwene. Siyeyo yereye ni anamatelana Kent ni Veronica. Kent onosoriha egi: “Akwihu ni amudhihu ehinikongomedha oxixa makalelo mamodha oolaleya. Wandana naathu enapweha mburo wobajha Omwene wa Mulugu, ehinikavihera oxixa makalelo maxa oolaleya.” Peeno Kent ni Veronica enalaba ninga mapiyonero avayekiwa elabo yoServiya.

16. Mowiwanana ni nladdaniho awogile Yesu va Lucas 12:16-21, mwahaya bwaddi ekala yapama wilibihera werana dhatedhene nnawedhihu?

¹⁶ Weregena dhatedhene onawedhiwe mwaha wa Yehova. Iyo kanahowela ohiya dhokanna dhehu dhatedhene ninnihuna wihina nimuhagalase Yehova. (Ecl. 5:19, 20) Mbwenye naathabwaga woova wilibihera kannaawedhe wapara mabasa a Yehova, iyo podi ofiyera werana yoviriganiha emodhave ninga yereyile ni mulobwana amusorihile Yesu munladdanihoni. Mulobwana ole athabwa othuwathuwela egumi yaye, bumwahaya kaawedhile omulabela Mulugu. (Omweleri Lucas 12:16-21.) Christian, ddibila anakala elabo yoFransa, onosoriha: “Miyo kagilibihera newene kagalaba ni kopolo dhaaga dhatedhene wihina gimulabele Yehova newene amudhaga.” Miyo ni mwaraga iyo othoma okala mapiyonero. Mbwenye wihina nakwanihe mabasa ala opiyonero, yohoweleya wahiya mabasa ehu.  Mbwenye wihina nidhowegeve naaparaga mabasa ala, iyo waja wapara mabasa a mudhidhi vang’no vano nahihudhera ohagalala ni ndhe nannihuna. Nerege wilibihera wula waali weebewene? Christian onosoriha: “Vano mabasa oolaleya enonidhivela ni nnohagalala vanlubale nawoonaga anamahudherihu ni olenddo dhohogolowelawo ehudheraga wodhela Yehova.”

17. Ethu baani enanikathamihe oxixa makalelo maxa oolaleya?

¹⁷ Waaxixe makalelo mamodha oolaleya. (Atos 17:16, 17; 20:20, 21) Shirley, piyonera anakala elabo yoEstadu Unidu, ahifwanelela osaddula makalelo aye oolaleya mwaha wa koronaviru. Omambelelowene oliye owoova olaleya ni telefoni. Mbwenye nameeddela mulogo nupaada mulogo wewa Shirley oxagihiwa. Vano onowedha olaleya alabihedhaga makalelo yala. Shirley wera: “Omambelelowene gowova, mbwenye vano ginodhiveliwa olaleya ni telefoni. Ni telefoni nnowedha walaleya athu owinjhiva opitha mudhidhi nalaleyesihu nyumba ni nyumba!”

18. Enaanikavihere ddi namukunga porogarama ehu wihina nimulabele Yehova mbwenye nnofwanyiwa makathamiho?

¹⁸ Omukunge porogarama ni omuharege. Wafwanya makathamiho, olobele wa Yehova. Voharela, olabihedhe mubuwelo wawo wihina werena ethu-sithu. (Pro. 3:21) Soniya, analaba ninga piyonera akaviheraga mwana nikuru ni ewogelo ya eromani wEwuropa, onosoriha egi: “Miyo ginadhiveliwa omuleba porogarama aaga vapapelini. Gamala miyo ompweha mburo vinoneya. Varumariyoni vaaga gihilebavo mwana dezenyu enna dila bili. Gafunaga othoma ethu, ginosugwa dezenyu yele vano miyo wubuwela: ‘Dhendha vala ela githomilimi enagithukulela dila baani?’” Soniya onokanna monelo wapama afwanyiwaga makathamiho. Oliye onosoriha: “Kadda ethu enapadduwa enakala ninga txinga enafuga dila yaga obe ninga ponti enagithukulela dila emodha — dhatedhene dhendho dhinenyeye mwaha wa moonelo waaga.”

19. Nikome wihina nere ddi?

¹⁹ Yehova ononireeliha mwamakalelo ohiyana-iyana. Iyo podi otonyihedha wi nnotamalela kadda mareeliho oliye ananivahiye. Ni makalelo baani? Neragana dhatedhene wihina nthithimihe ndina naaye. (Heb. 13:15) Podi wera onowafwanya makalelo maxa owenjhedhedha mabasa awo wihina omulabele Yehova. Weragana ndo, we onere wawakela mareeliho mamodha a Yehova. Bumwahaya, wikome wihina malabo amatene ‘olawihe ni woone opama wa Yehova.’ Weragana ndala, we onere okala ninga Yesu asorihile egi: ‘Yojha yaaga fuwerana efunelo ya ole agirumile ni wamariha mabasa aye.’ — João 4:34.