1-2. Skont Salm 34:8, kif nistgħu nitgħallmu dwar l-​affarijiet tajbin li jagħtina Ġeħova?

IMMAĠINA li xi ħadd jgħidlek biex idduq xi ħaġa li inti qatt ma pprovajt qabel. Forsi qabel idduqha, inti tħares lejha, ixxommha, tistaqsi kif saret, u jaf tistaqsi wkoll lil oħrajn biex tara jekk togħġobhomx. Imma l-​uniku mod kif tkun taf jekk togħġbokx hu billi dduqha.

² Aħna nitgħallmu kemm Ġeħova hu tajjeb billi naqraw il-​Bibbja u l-​pubblikazzjonijiet tagħna, kif ukoll billi nisimgħu lil oħrajn jitkellmu dwar l-​affarijiet tajbin li Ġeħova għamel magħhom. Imma se nifhmu kemm Ġeħova hu tajjeb meta aħna ‘nduqu’ l-​affarijiet tajbin tiegħu. (Aqra Salm 34:8.) Ejja nieħdu eżempju wieħed taʼ dan. Immaġina li trid taqdi lil Ġeħova full-​time. Biex tilħaq din il-​mira se jkollok tgħix ħajja sempliċi. Forsi kemm-​il darba qrajt dwar il-​wegħda taʼ Ġesù li jekk tpoġġi s-​Saltna l-​ewwel, Ġeħova se jipprovdilek dak kollu li jkollok bżonn. Imma forsi għadek qatt ma rajt lil Ġeħova jagħmel dan għalik. (Mt. 6:33) Imma għax tafda fil-​wegħda taʼ Ġesù, inti tnaqqas l-​ispejjeż, tagħmel bidliet fl-​iskeda tax-​xogħol tiegħek, u anka tipprova żżid fl-​ippritkar. Meta int tagħmel dan se tara li Ġeħova vera jagħtik dak li għandek bżonn. Imbagħad int se ‘dduq’ l-​affarijiet tajbin taʼ Ġeħova.

3. Fi qbil maʼ Salm 16:1, 2, min jirċievi affarijiet tajbin mingħand Ġeħova?

³ Ġeħova hu “tajjeb maʼ kulħadd,” anki maʼ dawk li ma jafuhx. (Salm 145:9; Mt. 5:45) Imma hu jagħmel ħafna affarijiet tajbin għal dawk li jħobbuh u li jagħmlu dak kollu li jistgħu biex jaqduh. (Aqra Salm 16:1, 2.) Issa ejja naraw xi ftit mill-​affarijiet tajbin li Ġeħova għamel għalina.

4. Lil dawk li jsiru l-​ħbieb tiegħu, Ġeħova x’affarijiet tajbin jagħtihom?

 ⁴ Kull darba li napplikaw dak li nitgħallmu minn Ġeħova, aħna naraw kif dan jgħinna fil-​ħajja tagħna. Pereżempju, meta aħna tgħallimna dwaru u bdejna nħobbuh, hu għenna biex ma nibqgħux naħsbu dwar affarijiet ħżiena u nagħmlu affarijiet li jobgħod hu. (Kol. 1:21) U meta ddedikajna ħajjitna lil Ġeħova u tgħammidna, hu tana iktar affarijiet tajbin, bħal pereżempju kuxjenza nadifa u ħbiberija mill-​qrib miegħu.—1 Pt. 3:21.

5. Waqt il-​ministeru x’affarijiet tajbin nirċievu mingħand Ġeħova?

⁵ Aħna nkomplu nirċievu affarijiet tajbin mingħand Ġeħova meta nieħdu sehem fl-​ippritkar. Int persuna mistħija? Ħafna mix-​Xhieda taʼ Ġeħova hekk iħossuhom. Forsi qabel sirt Xhud taʼ Ġeħova, qatt ma ħsibt li se tmur tħabbat il-​bieb taʼ xi ħadd li ma tafux u titkellem miegħu dwar il-​Bibbja. Imma bl-​għajnuna taʼ Ġeħova, illum int tagħmel dan b’mod regulari. U mhux hekk biss, imma tieħu pjaċir tipprietka! Ġeħova għenek ukoll b’modi oħrajn. Hu għenek tibqaʼ kalm meta xi ħadd fuq il-​ministeru kien arroganti miegħek. Hu għenek ukoll biex tiftakar l-​iskritturi li kellek bżonn meta int kont qed titkellem maʼ xi ħadd interessat. Ukoll, hu tak is-​saħħa biex tibqaʼ tipprietka minkejja li xi nies ma ridux jisimgħu.—Ġer. 20:7-​9.

6. It-​trejning li nirċievu għall-​ministeru, għala hu wieħed mir-​rigali li nirċievu mingħand Ġeħova?

⁶ It-​trejning li ningħataw għal fuq il-​ministeru hu wieħed mill-​affarijiet tajbin li jagħtina Ġeħova. (Ġw. 6:45) Fil-​laqgħa taʼ fost il-​ġimgħa, aħna naraw eżempji taʼ konversazzjonijiet taʼ kif nistgħu nippritkaw lin-​nies. Għall-​ewwel forsi nsibuha ftit diffiċli biex nipprovaw xi ħaġa ġdida, imma meta nagħmlu hekk, se jkollna riżultati tajbin. Waqt il-​laqgħat u l-​konvenzjonijiet, aħna niġu inkuraġġiti biex nipprovaw metodi differenti taʼ ppritkar li forsi qatt ma nkunu pprovajniehom. Dan ukoll jistaʼ jġegħelna nibżgħu ftit, imma meta nipprovawhom, Ġeħova se jbierek l-​isforzi tagħna. Issa se nitgħallmu dwar xi affarijiet tajbin li Ġeħova jagħtina meta nafdawh u nipprovaw modi ġodda biex nagħmlu iktar għalih, huma x’inhuma ċ-​ċirkustanzi tagħna. Imbagħad se naraw kif aħna nistgħu nilħqu l-​miri tagħna.

7. Liema barkiet se nirċievu meta nagħmlu l-​almu tagħna biex nagħmlu iktar għal Ġeħova?

⁷ Nersqu eqreb lejn Ġeħova. Ikkunsidra l-​eżempju taʼ anzjan jismu Samuel, * li jaqdi flimkien mal-​mara tiegħu fil-​Kolombja. Din il-​koppja kienu jieħdu pjaċir jaqdu bħala pijunieri fil-​kongregazzjoni tagħhom, imma huma riedu jagħmlu iktar billi jmorru jgħinu fejn hemm il-​bżonn. Biex jilħqu din il-​mira, huma kellhom jieqfu jagħmlu xi affarijiet li kienu jħobbu jagħmlu. Samuel jgħid: “Aħna applikajna Mattew 6:33, u għalhekk ma bqajniex nixtru affarijiet li ma kellniex bżonn. Imma l-​iktar ħaġa diffiċli kienet li nitilqu d-​dar li kellna. Kienet kif xtaqnieha aħna, u ma kellniex dejn fuqha.” Meta marru jgħinu fil-​kongregazzjoni l-​oħra, huma kellhom bżonn inqas flus biex jgħixu. Samuel ikompli jgħid: “Aħna rajna kif Ġeħova ggwidana u semaʼ t-​talb tagħna.  Inħossu li hu kuntent bina, u qed inħossu l-​imħabba tiegħu b’mod li qatt ma esperjenzajna qabel.” Inti tistaʼ tagħmel iktar għal Ġeħova? Jekk iva, ibqaʼ ċert li dan se jgħinek biex tersaq eqreb lejn Ġeħova u hu se jipprovdilek dak li jkollok bżonn.—Salm 18:25.

8. X’titgħallem minn dak li qalu Ivan u Viktoria?

⁸ Nieħdu pjaċir fix-​xogħol taʼ Ġeħova. Innota x’qalu Ivan u Viktoria, koppja miżżewġa li jaqdu bħala pijunieri fil-​Kirgiżistan. Huma għexu ħajja sempliċi biex ikunu jistgħu jgħinu bħala volontiera fejn hemm il-​bżonn, anki fi proġetti taʼ kostruzzjoni. Ivan jgħid: “Ħdimna iebes f’kull inkarigu li kellna. Għalkemm konna nkunu għajjenin fl-​aħħar tal-​ġurnata, xorta konna nkunu ferħanin għax konna nafu li użajna saħħitna għal Ġeħova. Aħna ferħanin ukoll għax għamilna ħafna ħbieb ġodda u għandna ħafna memorji sbieħ.”—Mk. 10:29, 30.

9. Minkejja l-​isfidi li ffaċċjat l-​oħt, x’għamlet u x’riżultat kellha?

⁹ Aħna nistgħu nkunu ferħanin fix-​xogħol taʼ Ġeħova anki meta jkollna sitwazzjonijiet diffiċli. Pereżempju, Mirreh, oħt li hi armla u li tgħix fl-​Afrika tal-​Punent, irtirat mix-​xogħol bħala tabiba u bdiet taqdi bħala pijuniera. Minħabba li hi kbira fl-​età u tbati ħafna bl-​artrite, ma tistax iddum iktar minn siegħa tipprietka minn dar għal dar. Imma hi tistaʼ tqattaʼ iktar ħin fl-​ippritkar permezz tat-​trolley. Mirreh għandha ħafna żjajjar lura u studji tal-​Bibbja, li xi wħud minnhom tagħmilhom permezz tat-​telefown. X’ġiegħel lil Mirreh tagħmel iktar għal Ġeħova? Hi tgħid: “Jien inħobbhom ħafna lil Ġeħova u lil Kristu Ġesù. Spiss nitlob lil Ġeħova biex jgħinni ħalli nkun nistaʼ nagħmel dak kollu li nistaʼ fix-​xogħol tiegħu.”—Mt. 22:36, 37.

10. Kif jurina l-​1 Pietru 5:10, dawk li jagħmlu iżjed għal Ġeħova x’jirċievu?

¹⁰ Nirċievu iżjed trejning mingħand Ġeħova. Kenny, pijunier li jaqdi f’Mauritius, ra kemm dan hu veru. Meta tgħallem il-​verità, hu telaq mill-​università, tgħammed, u beda jaqdi lil Ġeħova fis-​servizz full-​time. Hu jgħid: “Nipprova nkun bħall-​profeta Isaija, li qal: ‘Hawn jien! Ibgħat lili.’” (Is. 6:8) Kenny ħadem fuq diversi proġetti taʼ kostruzzjoni, u hu għen ukoll biex issir traduzzjoni taʼ pubblikazzjonijiet ibbażati fuq il-​Bibbja fil-​lingwa tiegħu. Hu jgħid: “Jien irċivejt it-​trejning li kelli bżonn biex inkun nistaʼ nagħmel l-​assignments tiegħi.” Imma hu ma tgħallimx biss kif jagħmel ix-​xogħol. Hu kompla jgħid: “Jien tgħallimt ukoll kif nagħmel affarijiet li ma kontx naf nagħmel u dwar il-​kwalitajiet li kelli naħdem fuqhom biex insir qaddej aħjar taʼ Ġeħova.” (Aqra l-​1 Pietru 5:10.) Inti tistaʼ tagħmel xi bidliet, bħalma għamel Kenny, biex Ġeħova jkun jistaʼ jtik iżjed trejning?

11. Aħwa nisa fil-​Korea t’Isfel xi sforz għamlu biex ikunu jistgħu jippritkaw, u x’riżultat kellhom? (Ara l-​istampa tal-​qoxra.)

¹¹ Anki dawk li jkunu ilhom jaqdu lil Ġeħova għal ħafna snin ikollhom bżonn it-​trejning meta jkunu se jippritkaw b’mod ġdid. Matul il-​pandemija tal-​COVID-​19, l-​anzjani taʼ kongregazzjoni fil-​Korea t’Isfel kitbu: “Xi wħud mill-​aħwa li ma setgħux jippritkaw minħabba s-​saħħa batuta li għandhom, issa qed jirnexxilhom permezz tal-​videoconference. Tliet aħwa nisa, li għandhom madwar 80 sena, tgħallmu kif jużaw il-​kompjuter biex jagħmlu dan, u issa qegħdin ikunu fuq il-​ministeru  kważi kuljum.” (Salm 92:14, 15) Tixtieq tagħmel iktar għal Ġeħova u tirċievi iktar affarijiet tajbin mingħandu? Ejja naraw xi modi taʼ kif inti tistaʼ tagħmel dan.

12. Ġeħova xi jwegħedhom lil dawk li jistrieħu fuqu?

¹² Tgħallem strieħ fuq Ġeħova. Hu jwegħedna li se jagħtina ħafna affarijiet tajbin jekk aħna nafdaw fih u nagħtuh l-​aħjar li nistgħu. (Mal. 3:10) Oħt mill-​Kolombja, li jisimha Fabiola, esperjenzat din il-​wegħda f’ħajjitha. Hi xtaqet tibda taqdi bħala pijuniera regulari wara li tgħammdet. Imma kellha tibqaʼ taħdem biex tkun tistaʼ tipprovdi l-​bżonnijiet għall-​familja tagħha. Għalhekk, meta rtirat mix-​xogħol, hi talbet ħafna lil Ġeħova biex jgħinha. Fabiola tgħid: “Spiss, in-​nies idumu jistennew biex jibdew jirċievu l-​pensjoni, imma jien irċivejtha wara xahar. Għalija dan kien miraklu!” Xahrejn wara, hi bdiet taqdi bħala pijuniera regulari. Issa Fabiola għandha ’l fuq minn 70 sena u ilha pijuniera għal iktar minn 20 sena. Matul dan iż-​żmien, hi għenet tmien persuni biex jaslu għall-​magħmudija. Hi tgħid: “Għalkemm kultant inħossni negħja malajr, Ġeħova kuljum jgħinni biex inkun nistaʼ nkompli nipprietka.”

13-14. Liema eżempji jistgħu jgħinuna biex nafdaw f’Ġeħova u nagħmlu iżjed?

¹³ Tgħallem mill-​eżempji taʼ dawk li straħu fuq Ġeħova. Il-​Bibbja fiha ħafna eżempji taʼ wħud li ħadmu iebes għal Ġeħova.  Hu bierek lil dawn il-​qaddejja wara li huma wrew li jafdaw fih. Pereżempju, Ġeħova bierek lil Abraham wara li hu telaq mid-​dar tiegħu “għalkemm ma kienx jaf fejn kien sejjer.” (Ebr. 11:8) U kien wara li Ġakobb baqaʼ jissara mal-​anġlu li rċieva barka speċjali. (Ġen. 32:24-​30) U meta l-​Iżraelin kienu waslu biex jidħlu fl-​art imwiegħda, kien biss wara li l-​qassisin niżżlu saqajhom fix-​Xmara Ġordan li l-​ilma waqaf u n-​nies setgħu jaqsmu.—Ġoż. 3:14-​16.

¹⁴ Illum, int tistaʼ tibbenefika wkoll mill-​eżempji taʼ aħwa li straħu fuq Ġeħova biex jilħqu l-​mira tagħhom. Pereżempju, ħu jismu Payton u l-​mara tiegħu Diana kienu jieħdu pjaċir jaqraw dwar aħwa li għamlu mira biex jagħmlu iżjed għal Ġeħova, bħal pereżempju esperjenzi li nsibu fis-​serje “Offrew Lilhom Infushom minn Rajhom.” * Payton jgħid: “Meta konna naqraw dawn l-​esperjenzi, konna nħossuna qisna qed naraw lil xi ħadd jiekol ikla tajba. Iktar ma konna naqraw, iktar konna rridu ‘nduqu lil Ġeħova u naraw li hu tajjeb.’” Maż-​żmien, Payton u Diana marru jaqdu fejn kien hemm il-​bżonn. Inti qrajtha din is-​serje? U rajt il-​vidjows Witnessing in Isolated Territory—Australia u Witnessing in Isolated Territory—Ireland li ssibhom bl-​Ingliż fuq jw.org? Dawn jistgħu jgħinuna biex naraw kif nistgħu nagħmlu iżjed għal Ġeħova.

15. Kumpanija tajba kif tgħinna?

¹⁵ Agħżel kumpanija tajba. Huwa iktar faċli għalina biex nieklu xi ħaġa li qatt ma doqna meta nkunu maʼ xi ħadd li jkun iħobbha. Bl-​istess mod, meta aħna nqattgħu l-​ħin maʼ dawk li jpoġġu lil Ġeħova l-​ewwel fil-​ħajja tagħhom, se jkun iktar faċli għalina biex naraw kif nistgħu nagħmlu iktar għal Ġeħova. Kent u Veronica hekk ġralhom. Kent jgħid: “Il-​ħbieb u l-​familja tagħna inkuraġġewna biex nagħmlu xi ħaġa differenti għal Ġeħova. Indunajna li billi bdejna nkunu maʼ dawk li jpoġġu s-​Saltna l-​ewwel, aħna ma bżajniex nagħmlu xi ħaġa ġdida.” Illum, Kent u Veronica jaqdu bħala pijunieri speċjali fis-​Serbja.

16. Kif naraw fit-​tixbiha taʼ Ġesù li nsibu f’​Luqa 12:16-​21, għala għandna nkunu lesti li nagħmlu sagrifiċċji?

¹⁶ Agħmel sagrifiċċji għal Ġeħova. M’hemmx għalfejn nitilqu dak kollu li nieħdu pjaċir nagħmlu biex nogħġbuh. (Ekk. 5:19, 20) Però, jekk dawn l-​affarijiet iżommuna lura milli nagħmlu iżjed għal Ġeħova, inkunu qed nagħmlu l-​istess żball li għamel ir-​raġel fit-​tixbiha taʼ Ġesù. Hu ħadem iebes biex ikollu ħafna affarijiet u ma tax kas lil Alla. (Aqra Luqa 12:16-​21.) Ħu li jismu Christian u jgħix fi Franza, jgħid, “Indunajt li stajt nagħti iktar mill-​ħin u l-​enerġija tiegħi lil Ġeħova u l-​familja tiegħi.” Hu u l-​mara tiegħu ddeċidew li jibdew jaqdu bħala pijunieri. Imma biex jilħqu din il-​mira, huma kellhom jitilqu x-​xogħol li kellhom. Biex ikollhom biżżejjed flus għall-​bżonnijiet tagħhom, bdew negozju żgħir tat-​tindif u huma tgħallmu jkunu kuntenti b’inqas flus. Iddispjaċiehom li telqu xi affarijiet biex ikunu jistgħu jaqdu bħala pijunieri? Christian jgħid, “Issa qed nieħdu pjaċir iżjed fil-​ministeru u nieħdu pjaċir naraw lill-​istudenti tal-​Bibbja u lil  dawk taż-​żjajjar lura jitgħallmu dwar Ġeħova.”

17. Għala jistaʼ jkun diffiċli għalina biex nipprovaw modi ġodda fl-​ippritkar?

¹⁷ Kun lest li tipprietka b’modi ġodda. (Atti 17:16, 17; 20:20, 21) Shirley, li hija pijuniera fl-​Istati Uniti, kellha tibda tipprietka b’mod differenti minħabba l-​pandemija tal-​COVID-​19. Għall-​ewwel bdiet tibżaʼ tipprietka bit-​telefown. Imma wara li ngħatat it-​trejning matul iż-​żjara tal-​indokratur li jżur il-​kongregazzjonijiet, hi bdiet tipprietka bit-​telefown b’mod regulari. Shirley tgħid: “Kont nibżaʼ ħafna, imma issa vera qed nieħu pjaċir. Issa qed insibu iktar nies milli meta konna nippritkaw minn dar għal dar!”

18. X’jistaʼ jgħinna nilħqu l-​mira tagħna meta niffaċċjaw xi sfida?

¹⁸ Agħmel mira u pprova ilħaqha. Meta niffaċċjaw l-​isfidi, aħna nitolbu lil Ġeħova u naħsbu sew x’nistgħu nagħmlu dwarhom. (Prov. 3:21) Sonia, li taqdi bħala pijuniera regulari fi grupp tar-​Rumen, tgħid: “Jien inħobb nikteb il-​miri tiegħi fuq karta u nħalliha fejn inkun nistaʼ naraha. Barra minn hekk, għandi karta li fuqha pinġejt żewġ toroq, u din inħalliha fuq il-​mejda. Meta jkolli nieħu xi deċiżjoni, inħares lejha u t-​tpinġija tgħinni nara jekk id-​deċiżjoni li nkun se nieħu hux se tgħinni nilħaq il-​mira tiegħi. Għalhekk, dan ifakkarni li rrid naħseb sew qabel nieħu deċiżjoni.” Ukoll, meta Sonia tiffaċċja xi sfida, hi tipprova tibqaʼ pożittiva. Hi tgħid: “Kull sfida li niffaċċja tistaʼ tkun bħal ħajt li jwaqqafni milli nilħaq il-​mira tiegħi, jew inkella bħal pont li jgħinni biex nilħaqha, jiddependi l-​mod kif jien inħares lejha.”

19. Aħna kif nuru li napprezzaw l-​affarijiet tajbin li jagħtina Ġeħova?

¹⁹ Ġeħova tana ħafna affarijiet tajbin. Aħna nuru li napprezzaw dawn l-​affarijiet billi nagħmlu dak kollu li nistgħu biex inġibu tifħir lilu. (Ebr. 13:15) Dan nistgħu nagħmluh ukoll billi nipprovaw modi ġodda biex naqdu lil Ġeħova. U meta nagħmlu hekk, Ġeħova se jkompli jberikna. Kull ġurnata, ejja nfittxu modi biex ‘induqu lil Ġeħova u naraw li hu tajjeb.’ Imbagħad se nħossuna bħal Ġesù, li qal: “L-​ikel tiegħi hu li nagħmel ir-​rieda taʼ dak li bagħatni u li ntemm xogħlu.”—Ġw. 4:34.