1-2. Kuliya na Visamo 34:8, vati tu hasa ku tantekeya vucili vua Yehova?

ACI SINGANIEKENU nga va na mi hana vimo via ku-lia via viha linga mu makaleko. Mu hasa ku tantekeya vuino via ku-lia viaco mu ku vi tala, ku ivua vueko vuavio, ku tantekeya vati va na vi vuahesa, ni ku ihula vaze va vi makela laza. Vunoni njila imo lika i mu hasa ku kelamo na vusunga nga mu vi lema ni kuahi, noho mu ku vi makela enu vavene.

² Na vuno vene, tu hasa ku lilongesa via Yehova mu ku tanda Mbimbiliya na mikanda yetu, kaha na ku ivua mizimbu ya vakuetu va tambula vivezikiso mu ku pangela Yehova. Vunoni tu kevuisisa lika vuino-vuino vucili vua Yehova mu ku vu makela. (Tandenu Visamo 34:8.) Tu talenu vati tu hasa ku lingamo. Aci singaniekenu nga tu tonda ku kovela mu cimo cipanga ca ntsimbu yose, vunoni linga tu puisemo cizango caco tua pande ku asiuisa muono uetu. Kaha halumo tua tanda cikulaheso ca Yesu ca muesa ngecize nga tu tuameka Vuangana, Yehova a ka tu hana viuma vikuavo viose via tu kambela. (Mat. 6:33) Vunoni kanda tu ci limuene mpundu vati Yehova ue ku lingamo. Vutuhu ngoco, mu ku linga tua tsiliela mu cikulaheso ca Yesu, tu tepulula ku viuma via ku landa-landa na ku ntsimbu ya vipanga linga tu tuale mana ku cipanga ca ku ambulula. Omo tu lingamo, tu ka heta ha ku limuena mpundu etu vavene ngecize, cili vene, Yehova ue ku tu hana vize via tu kambela ni nguetu “tu ka limakelela” etu vavene vucili vua Yehova.

3. Kuliya na Visamo 16:1, 2, veya ve ku tambula vucili vua Yehova?

³ Yehova ue ku linga “ngozi na vose,” cipue vene kuli vaze ka va mu tantekeya. (Visa. 145:9; Mat. 5:45) Vunoni vaze va mu lema na ku mu pangela, vakevo ve ku tambula vivezikiso via vingi cikuma-kuma kuli Ikeye. (Tandenu Visamo 16:1, 2.) Tu hilulenu  lika vimo vinjila via vindende via muesa vati vucili vua Yehova vue ku tu kuasa.

4. Vati Yehova ue ku muesa vucili kuli vaze ve ku putuka ku likuata neni vusamba?

⁴ Mu tue ku lihakela kapandi ka ku pangesa vize vi tue ku lilongesa kuli Yehova, muono uetu ue ku vuaha. Ca ku muenako, mu tua putukile ku lilongesa via vingi ku tuala hali Ikeye na ku mu lema, ua tu kuasele ku vula visinganieka na vilinga vize via kele na ku tu sondolola kuli Ikeye. (Kolo. 1:21) Kaha mu tua lihanene kuli ikeye na ku tu mbatiza, tua muene vucili vueni, muomu ua tu hele mutima ua ku lela, kaha na ku tu tava ku pua vavusamba veni.—1 Pet. 3:21.

5. Vati tue ku limuena vucili vua Yehova mu cipanga ca ku ambulula?

⁵ Kaha tue ku tualelelaho ku mona vucili vua Yehova mu tue kuya na ku ambulula. Ca ku muenako, mua pua mu va muekulu ni? Cingi ca vangamba va Yehova va pua va muekulu. Halumo tele kanda mu ci pue ngamba ya Yehova, mua kele na ku singanieka nguenu, ‘Yange nji ka ngongote ku ndzivo ya mbala mu ku ambuluila vantu ka nji tantekeya, ka nji vi hasa vayaya. Vunoni lelo vikevio vi mue ku linga ku-sua kumo. Kaha kati ovio lika, vunoni Yehova ua mi kuasa naua ku lema cipanga ca ku ambulula! Cikuavo naua mua limuena Yehova a mi kuasa mu vinjila via ku liseza-seza. Ue ku mi kuasa ku simpa mutima nga vali na mi pindisa kuli vakua ku luisa vusunga. Ue ku mi kuasa ku vuluka vinimbu vie ku litombola mpundu na vihula via vantu va mue ku ambuluila. Kaha ue ku mi hana ndzili ya ku kolesa nga mu ambuluila ku vihela kua lana vakua sembulule.—Yele. 20:7-9.

6. Vati vilongesa via ku vueza ku vutongue vie ku tu hana Yehova, via muesa vucili vueni?

⁶ Yehova ua tu muesa naua vucili vueni, mu ku tu longesa ku kala na vutongue mu cipanga ca ku ambulula. (Yoa. 6:45) Ku viuano vietu via mu kati ka simano, tue ku limuena vimueso via mu ku ambulula via vutongue, kaha vie ku tu kaniamesa nga tuli mu ku ambulula. Ha katete tu hasa ku likanuuela ku seteka ambuluisi ya iha, vunoni nga tu i seteka citava tu ka mona ngecize ili na kuya vantu ku mutima. Kaha viuano via vindende na via kama, vie ku tu kaniamesa ku ambulula mu cifua ca ciha, cize halumo kanda tu ci ci seteke. Evi vi hasa ku tu lingisa ku lisosomua, vunoni mu tue ku viseteka, Yehova ue ku tu vezikisa. Hano honi tu hilulenu vimo viuma via cili, via ka tu hana Yehova nga tu mu kulahela na ku seteka vinjila via viha via ku mu pangela na ndzili yetu yose, ambe nga tua kala na vimo vitanga. Tu hilulenu vimo vinjila vi tu hasa ku puisilamo vimo vizango via mu lutsilielo.

7. Vivezikiso vika tue ku tambula mu tue ku lihakela kapandi ka ku vueza ku cipanga cetu ca ku ambulula?

⁷Tue ku suena cikuma-kuma kuli Yehova. Tu hilulenu lungano lua muanetu Samuel, * ua pua mukuluntu ku Colombia. Muanetu Samuel na mpueyeni va puile vapioneiro mu cikungulukilo cavo, vunoni va tondele ku vueza ku vipanga viavo via ku ambulula mu ku kuasa ku cikungulukilo ceka ca tondekele cikuma vukuasi. Kaha linga va puisamo cizango cavo, va pandele ku alulula vimo mu muono. Muanetu Samuel ngueni: “Tua kavele citume ca ku Mateo 6:33 na ku likela ku landa-landa ngoco viuma. Vunoni cuma ca tu kaluuilile cikuma, ca puile ku seza ndzivo yetu. Muomu kaya puile ya ku lukala, ya puile yetu mpundu kaha tua i tungisile mu cifua ci tua lemene.” Mu va nungulukilile ku cikungulukilo ca ciha, vaze vampuevo na yala va muene ngecize nkuma ve ku hasele ku hitukila ha kambongo kakandende ku hiana vize via laza. Ua vuezeleko naua ngueni, “Tua limuena vati Yehova ue ku endesa vinanga vietu na  ku kumbulula vivundilo vietu. Tue ku livua ngecize Yehova ua viukilila netu kaha tue ku ivua cilemo ceni mu vinjila ka tua ci vuile laza. Vuno nenu kuli mumo mu mu hasa ku vuezela ku cipanga cenu ca ku ambulula ni? Nga mu lingamo, kalenu na vusunga ngecize mu ka likuata vusamba vua kama na Yehova kaha a ka mi niunga.—Visa. 18:25.

8. Vika mua lilongesa ku mezi a handekele muanetu Ivan na mpueyeni Viktoria?

⁸Tue ku uana ndzolela mu cipanga cetu. Halakanenu vi va handekele vamuanetu Ivan na ndumbuetu Viktoria, va pua vapioneiro ku Quirgistão. Va asiuisile muono uavo, linga va hase ku lihana mu vipanga via vingi hamo lika na via ku tunga. Ava vamuanetu nguavo: “Tua kele na ku lihaka na ndzili yetu yose mu nkala cipanga ci tua tambuile. Vutuhu ku ntsongo ya nkala litangua tua kele na ku ivua ku hona, vunoni tua kele na ku ivua ndzolela na ciyulo, omo lia ku tantekeya ngecize tu na pangesa ndzili yetu mu vipanga via Vuangana. Vikuavo via tu vuisile ndzolela via puile vusamba vua vuha vu tua likuatele na vamuanetu kaha na vimona via cili vi tua kele navio.”—Mako 10:29, 30.

9. Vika ua linga umo ndumbuetu ua kala na vimo vitanga mangana a vueze ku cipanga ceni ca ku ambulula kaha vika viezamo?

⁹ Tue ku ivua ndzolela mu ku pangela Yehova ambe nga tua kala na visoti mu muono. Ca ku muenako, halakanenu muzimbu ua ndumbuetu Mirreh ua pua kasinakazi kaha ntuluue, ku cihava ca Afrika. Mu va mu lembuile ha cipanga ca vundotolo ua putukile vupioneiro. Ndumbuetu Mirreh ua sua laza ku vavala mikono, kaha ue ku hasa lika ku enda ola imo lika mu cipanga ca ku ndzivo na ndzivo. Vunoni ue ku hasa ku kala mu ntsimbu ya kama mu cipanga ca ku ambuluila ku mbunga. Ua kala na mangendzi a ku hilukila a engi na vilongesa via Mbimbiliya, vamo ue ku simutuila navo ku telefone. Vika via kuasele ndumbuetu Mirreh ku vueza ku cipanga ceni ca ku ambulula? Ivene ngueni: “Nja lema cikuma-kuma Yehova na Yesu Kilistu. Ngeci nje ku vundila ku sua kumo linga Yehova a nji hane ndzili ya ku linga viose vi nji hasa mu vipanga vieni.”—Mat. 22:36, 37.

10. Ngue muya muesa 1 Petulu 5:10, vika ve ku tambula vaze ve ku lihakela kapandi mu vipanga via Yehova?

¹⁰Tue ku tambula vilongesa vikuavo via ku vueza ku vutongue, kuli Yehova. Muanetu Kenny, ua pua pioneiro ku Ilhas Maurícias ua limuenenene vusunga vuaco. Mua lilongesele vusunga, ua sile sikola ya kama, va mu mbatizile na ku kovela mu cipanga ca ntsimbu yose. Ivene ngueni: “Nje ku seteka ku yoya muaya mezi a kapolofeto Isaya, uze ua handekele ngueni: “Yange uno; nji tume ange.” (Isaya 6:8) Muanetu Kenny ua kuasa ku vipanga via vingi via ku tunga, kaha ua kuasa naua ku ku langulula mikanda yetu ku tuala mu lilimi liavo. Muanetu Kenny naua ngueni: “Nja tambuile vilongesa via ku vueza ku vutongue vize vi nja tondekele linga nji puisemo vipanga viange.” Vunoni ka lilongesele lika vutongue vua ngoco. Ngeci ua vuezeleko naua ngueni: “Nja lilongesele ku tantekeya ha lengela ngolo yange, kaha na ku lilongesa vifua via mu lutsilielo vi nja pandele ku lihakela kapandi ka ku muesa.” (Tandenu 1 Petulu 5:10.) Ngeci mukemuo, hilulenu cifua ca muono uenu na ku mona nga kuli mumo mu mu hasa ku lingila mangana mu tambule vilongesa via ku vueza ku vutongue kuli Yehova.

11. Kapandi kaka va lihakele vandumbuetu ku Korea linga va hase ku ambulula, kaha vika viezilemo? (Talenu cikupulo ca helu lia Vutala.)

¹¹ Cipue vene Vakaleho va laza, navo ve ku lilongesa via vingi nga va seteka cifua ca ciha ca ku ambuluilamo. Mu ntsimbu ya musongo ua COVID-19, vakuluntu va ku Korea do Sul va sonekele nguavo: “Vamo vamuanetu va singaniekele nguavo ka va hasa ku tuhuka mu liha omo  lia cihindu cavo, lelo lino ve ku ambulula honi ku hitila mu vivideo conferencia. Vamo vandumbuetu vatatu, vutuhu vendela ku miaka 80, vunoni va lilongesele eci cifua ca ciha ca ku ambuluilamo kaha ve ku ambulula kampe matangua ose.” (Visa. 92:14, 15) Vuno nenu mu tonda ku vueza ku cipanga cenu ca ku ambulula linga mu makele mu vukama ku vucili vua Yehova ni? Tu hilulenu vimo vinanga via tondeka linga mu hase ku puisamo cizango caco.

12. Vika Yehova ua kulahesa kuli vaze va mu tsiliela?

¹²Lilongesenu ku kulahela muli Yehova. Yehova ua kulahesa ku tu zukuila vivezikiso nga tu mu kulahela na ku mu pangela na ndzili yetu yose. (Mal. 3:10) Ndumbuetu Fabiola ua ku Colombia ua limuenene Yehova a puisamo eci cikulaheso. Ndumbuetu uaco ua tondele ku kovela mu vupioneiro vua ntsimbu yose mu nima ya mbatizimu. Vunoni, ikeye naua ua keleko ha vipanga mu ku kuasa vusoko. Ngeci mukemuo, mua puisilemo miaka ya ku lembuka ha vipanga, ua vundilile cikuma kuli Yehova. Ivene ngueni: “Ku sonekesa mapapelo a ku lembuka ha vipanga na ku tambula vimbongo ce ku ambata ntsimbu ya kama, vunoni ange viose va vi tavele mu ngonde imo lika. Ca puile vene ngue cikomoueso kuli yange!” Mu nima ya vingonde vivali ua puile pioneiro. Lelo lino ndumbuetu Fabiola endela ku miaka 70 kaha ali mu vupioneiro miaka 20. Mu ntsimbu eyi, ua kuasa vantu va ku pua 8 va lilongese vusunga na ku mbatizimu. Kaha ua vuezeleko naua ngueni: “Vutuhu vintsimbu vimo nje ku ivua ku zeya, vunoni Yehova ue ku nji kuasa nkala litangua  nji puisemo programa yange ya ku ambulula i nja tumbika.”

13-14. Malungano aka a hasa ku tu kuasa ku kulahela muli Yehova na ku puisamo vizango vietu?

¹³Lilongesenu ku malungano a vaze va kulahelele muli Yehova. Mu Mbimbiliya mua sula mizimbu ya vantu va fuitanganene cikuma mu vipanga via Yehova. Kaha mu cingi ca mizimbu yaco, Yehova ua putukile ku vezikisa vangamba veni mu va hanene cinanga ca katete. Ca ku muenako, Yehova ua vezikisile lika Avilahama, mu nima ya Avilahama ku katuka vungendzi vutuhu “ka tantekeyele kulihi a ya.” (VaHe. 11:8) Kaha Yakomba ua tambuile lika civezikiso ca ku lifuila, mu nima ya ku lua na kangelo. (Njen. 32:24-30) Cikuavo naua vaIsaleli mu va lingilile ku zavuka ndonga Yondau, vantu va hasele lika ku zuvuka ndonga yaco, mu nima ya vasasendote ku liata mu mema, vutuhu mema aco a kele na ku lua mua kama.—Yeho. 3:14-16.

¹⁴ Mu hasa naua ku lilongesa ku malungano a Vakaleho va Yehova va ku matangua ano, vaze va kulahela muli Yehova na ku vueza ku vipanga viavo via ku ambulula. Ca ku muenako, muanetu Payton na mpueyeni Diana, va lilongesele via vingi kuli vamuanetu na vandumbuetu va vuezele ku vipanga viavo kuli Yehova, va ve ku tumbula mu mutamba “Eles se ofereceram.” * Muanetu Payton ngueni: “Ku tanda mizimbu yavo, ca puile ngue tuli na ku tala vantu vali na ku lia via-ku-lia via ku tovala. Mu tua kele na ku vuezelela ku ku tanda mizimbu yaco, na cizango cetu ca ku makela na ku mona vucili vua Yehova ca kele na ku livuezelela.” Mu nima ya ntsimbu muanetu Payton na mpueyeni Diana, va hasele ku nungulukila ku cihela kua tondekele vukuasi. Nenu mizimbu yaco mua i tandaho laza ni? Kaha mua tala laza video, Ku Ambuluila ku Vihela via ku Laako Membo a Kalitungile ku—Australia—na Pregação em Territórios Isolados—Irlanda via kala mu jw.org ni? Vimpande viaco vi hasa ku mi kuasa ku tonda vinjila via ku vuezelamo cipanga cenu ca ku ambulula.

15. Vati ku likata na vantu va cili ci hasa ku tu kuasa?

¹⁵Hangulenu vantu va cili va ku likata navo. Ca pua ca casi ku seteka via-ku-lia via viha nga tu likata na vaze va vi lema. Na vuno vene nga tu pua na ku likata na vaze va tuameka ku pangela Yehova, netu tu kevua cizango ca ku vueza ku vipanga vietu kuli Ikeye. Evi vikevio vi va limuenene vamuanetu Kent na mpueyeni Veronica. Muanetu Kent ngueni: “Vavusamba vetu na vavusoko, va tu kaniamesele ku eseka vinjila via viha via ku ambuluilamo. Tua nongonuene ngecize mu ku likata na vaze ve ku tuameka Vuangana, netu tua vuile cizango ca ku lingamo.” Ava vayala na mpuevo, lelo lino va pua vapioneiro va ku lifuila ku Servia.

16. Ngue mu ca muesa cisimo ca Yesu ca ku Luka 12:16-21, omo lia vika tua pande ku kala na cizango ca ku likela cipue ku seza vimo?

¹⁶Kalenu na cizango ca ku likela cipue ku seza vimo omo lia Yehova. Kuya Yehova ku mutima ka ca tondekele ku mbila kuti ni ku likela viose vi tua lema. (Ekel. 5:19, 20) Vunoni nga ka tue ku tuameka Vuangana vua Njambi muomu ka tu tondo ku seza ni ku likela vimo vi tua lema, kaha tuli na ku linga cisevuka ca lingile uze yala ya tumbuile Yesu mu cisimo ceni. Yala uaco ua tuamekele ku yoya vuino na ku mbila Njambi ku mukulo. (Tandenu Luka 12:16-21.) Umo muanetu ua lizina Christian, ua ku França ngueni: “Ka nja kele na ku hana mutamba ua kama ua ntsimbu na ndzili yange kuli Yehova na ku vusoko vuange.” Vunoni linga va puisemo ovu vutumbe va pandele ku seza vipanga viavo. Kaha linga va hase ku kala na via ku likuasa navio mu cipanga caco, va putukile kacipanga kakandende ka ku komba-komba. Na ku lilongesa  ku viukilila na via vindende. Vuno ve ku livua ngecize va lisina ngoco ni? Muanetu Christian ngueni: “Ano matangua ku ambulula ce ku tu tovala honi, kaha tua lema ku mona vandongesi va Mbimbiliya na mangendzi a ku hilukila va lilongesa via Yehova.”

17. Vika vi hasa ku tu vindika ku seteka viuma via viha mu cipanga cetu ca ku ambulula?

¹⁷Kalenu na cizango ca ku seteka vinjila via viha via ku ambuluilamo. (Vili. 17:16, 17; 20:20, 21) Ndumbuetu Shirley ua ku Estados Unidos, ua pandele ku alulula cifua ceni ca ku ambulula mu ntsimbu ya musongo ya COVID-19. Ha katete, ua likanuuelele ku seteka ku ambuluila ku telefone. Vunoni via lilongesele mu simano ya ku meneka ca kaniungi ua ku zinguluka, via mu lingisile ku putuka ku ambulula mu cifua eci ku sua kumo. Ivene ngueni: “Ha katete ku ambuluila ku telefone ca kele na ku vuisa liova, vunoni lelo lino nja ci lema. Tuli na ku hasa ku handeka na vantu vavengi ku hiana muze mu tua kele na kuya ku ndzivo na ndzivo!”

18. Vika vi hasa ku tu kuasa ku pinda na visoti omo tu vueza ku cipanga cetu ca ku ambulula?

¹⁸Lingenu vutumbe na ku vu seteka. Mu tue ku lua na vitanga, tue ku vundila na ku lihakela kapandi ka ku pangesa mana etu, tu tonde mua ku lingila. (Visi. 3:21) Ndumbuetu Sonia, ua pua pioneiro ua ntsimbu yose ua ku cimo civunga ca lilimi lia Romany ku Europa, ngueni: “Nja lema ku soneka matumbe ange ha lipapelo na ku lihaka haze ha nji hasa ku limuena. Nja soneka amo mankano a tapalo ha lipapelo na ku lihaka ha mesa ya mu hondo yange. Kaha mu nje ku heta ha ku linga cihangula, nje ku tala ha mankano aco na ku seteka ku mona kuiko cihangula caco ci nji talekesa.” Ndumbuetu Sonia, ue ku lihakela kapandi ka ku mona vitanga vie ku lihita navio mu njila ya cili. Ua handekele naua ngueni, “Nkala viuma vi nji seteka mu muono vi hasa ku pua ngue civumbe ci nji zikiliya ku hita ni cavu ci nji kuasa ku zavuka.”

19. Kapandi kaka tu lihakela?

¹⁹ Yehova ue ku tu vezikisa mu vinjila via vingi. Tu hasa ku muesa vukama vua ku santsela cetu ku vivezikiso viaco, mu ku linga cose linga tu mu zumbangeye. (VaHe. 13:15) Tu hasa ku lingamo mu ku tonda vinjila via vingi via ku vuezelamo cipanga cetu ca ku ambulula, cize ci ka tu lingisa tu tambule vivezikiso vikuavo. Nkala litangua, tu lihakelenu kapandi ka ku tonda vinjila via viha “via ku makela” na ku mona ngecize Yehova ua cili. Nga tu lingamo, tu ka tambuluisa Yesu uze ua handekele ngueni: “Ku linga cizango ca uze ua nji tumine na ku manesa vipanga vieni, vikevio vene via-ku-lia viange.”—Yoa. 4:34.