1, 2. Ijkon ken kijtoua Salmo 34:8, ¿tlen moneki tikchiuaskej para tikitaskej Jehová melauak yolkuali?

MA TIKIJTOKAN ikaj kineki techmakas itlaj tlen amo keman tikkuaj. Uelis timokuayejyekoskej uelik tla tikitaskej, tikijneuiskej noso titlajtlaniskej ken okichijkej noso tiktlajtlaniskej akin kipaktia. Pero tla tiknekij tikmatiskej tla techpaktis non tlakuali, moneki tikyekoskej.

² Ijkon panoua ijkuak tiknekij tikmatiskej Jehová yolkuali, ijkuak tiktlajtoltiaj Biblia uan amatlajkuilolmej. Noijki ijkuak tikkakij ken sekimej yokinteochi. Pero okachi tikajsikamatiskej Jehová yolkuali tla tejuan ‘tikyejyekouajʼ (xiktlajtolti Salmo 34:8). Ma tikitakan ken uelis tikchiuaskej. Ma tikijtokan okachi tiknekij tiktekichiuiliskej Jehová pero para ijkon tikchiuaskej ayakmo moneki tikpiaskej miak tlamantli. Xamo yotiktlajtoltijkej miak uelta tlen Jesús okijto, tla achto tiktekichiuiliaj Jehová, ye techpaleuis ma tikpiakan tlen ika timopanoltiskej pero xamo ayamo ijkon techpanoua (Mat. 6:33). Pero tikneltokaj tlen Jesús okijto, ik non, ayakmo tikkouaj miak tlamantli, ayakmo okachi titekipanouaj uan okachi titetlapouiaj. Ijkuak ijkon tikchiuaj tikitaj ken Jehová melauak techpaleuia. Uan ijkon ‘tikyejyekouaj’ ye yolkuali.

3. Ijkon ken kijtoua Salmo 16:1, 2, ¿iuan akinmej yolkuali Jehová?

³ Jehová yolkuali iuan nochtin maski miakej amo kixmatij (Sal. 145:9; Mat. 5:45). Pero kinteochiua akinmej kitlasojtlaj uan kitekichiuiliaj ika nochi inyolo (xiktlajtolti Salmo 16:1, 2). Ma tikitakan ken yotechpaleui Jehová.

4. ¿Ken kinmititia Jehová yolkuali akinmej peuaj kixmatij?

⁴ Ijkuak tikchiuaj tlen Jehová techmachtia, tikitaj ye techpaleuia. Ijkuak okachi otimomachtijkej ken kipia  iyelis, otiktlasojtlakej, opejki iuan timouikaj porque otechpaleui ma timokuayejyekokan uan ma tikchiuakan ken ye (Col. 1:21). Ijkuak ixpan otimotemakakej uan otimoapolaktijkej okachi otechititi yolkuali; otechpaleui ma tikpiakan chipauak totlalnamikilis uan okachi iuan ma timouikakan (1 Ped. 3:21).

5. ¿Ken yotikitakej Jehová yolkuali ijkuak titetlapouia?

⁵ Ijkuak titetlapouiaj yotikitakej ken Jehová yolkuali. ¿Tejuatsin tipinaua ijkuak titetlapouia? Miakej iTlaixpantijkauan Jehová kema pinauaj. Xamo ijkuak ayamo otikixmatiaya Jehová amo keman otimokuayejyeko tikintlapouis tlen kijtoua Biblia akinmej amo tikinmixmati. Pero axkan nochipa titetlapouia. Jehová mitspaleuia xiyolpaki ijkuak titetlapouia uan yomitspaleui itech okseki tlamantli. Xamo yomitspaleui amo xikualani ijkuak ikaj otiktlapouito uan amo kuali omitsnankili. Noijki yomitspaleui xikilnamiki se texto uan ijkon ueli otikititi akin okachi okinekiaya kimatis. Noijki mitspaleuia xitetlapoui maski oksekimej amo kinekij mitskakiskej (Jer. 20:7-9).

6. ¿Ken tikitaj Jehová yolkuali?

⁶ Jehová noijki kiteititia yolkuali porque techmachtia ken titetlapouiskej (Juan 6:45). Ijkuak timonechikouaj tlajko semana techititiaj ken uelis titetlapouiskej uan techyoleuaj ijkon ma tikchiuakan. Ijkuak tipeuaj titetlapouiaj ika okse tlamantli, xamo timomojtiaj. Pero ijkuak ijkon tikchiuaj, tikitaj non techpaleuia kanin titetlapouiaj. Noijki itech uejueyij nechikolmej uan ijkuak timonechikouaj techititiaj tlatlamantli ma titetlapouikan, xamo amo keman otimokuayejyekojkej ijkon tikchiuaskej Xamo non uelis kichiuas ma timomojtikan pero tla titetlapouiaj, Jehová techteochiuas. Axkan tikitaskej ken techpaleuis Jehová tla timokuayejyekouaj ken okachi tiktekichiuiliskej maski san tlen tlamantli techpanotok. Noijki tikitaskej tlen techpaleuis ma tikchiuakan tlen otimokuayejyekojkej.

7. ¿Ken techteochiua toTajtsin Dios ijkuak tiktekichiuiliaj?

⁷ Okachi timouikaj iuan Jehová. Ma tikitakan tlen okipanok se tokni tlen itoka Samuel, * ye uan isiua kitekichiuiliaj Jehová ompa Colombia. Oyolpakiayaj yetoskej precursores ompa inmialtepe pero okinekiayaj okachi kitechiuiliskej Jehová uan okinekiayaj tetlapouitiuij kanin okachi omonekiaya. Para uelis ijkon kichiuaskiaj okikajtejkej seki tlamantli. Samuel okijto: “Otikchijkej tlen kijtoua Mateo 6:33 uan ayakmo otikojkej tlen amo omonekiaya. Pero otikitakej oui tikajteuaskej tokal porque kualtsin otikchijchijkej uan yikin otiktlaxtlajkej”. Kanin ochantitoj okitakej amo omonekiaya kipiaskej miak tlamantli para ika mopanoltiskiaj. Samuel okijto: “Yotikitakej ken Jehová techyekana uan technankilia ijkuak tiktlatlaujtiaj. Okachi yotikitakej ye techtlasojtla uan techpaleuia”. ¿Tejuatsin uelis okachi tiktekichiuilis Jehová? Tla ijkon tikchiuas, okachi iuan timouikas uan ye mitsmaluis (Sal. 18:25).

8. ¿Tlen mitsmachtia tlen okijtojkej Iván uan Viktoria?

⁸ Tiyolpakij tiktekichiuiliaj Jehová. Ma  timokuayejyekokan tlen okijtojkej Iván uan Viktoria, yejuan precursores ompa Kirguistán. Yejuan okijtojkej ayakmo kipiaskiaj miak tlamantli para uelis okachi kitekichiuiliskej Jehová uan tlapaleuiskej kanin kinchijchiuaj kalmej para kiueyichiuaskej. Iván okijto: “Sapanoua otitlapaleuiayaj maski ijkuak otlamiayaj tonal otisotlauayaj. Otiyolpakiayaj uan kuali otimomachiliayaj porque otikmatiayaj otiktekichiuilijtokaj toTajtsin Dios. Otikinmixmatkej oksekimej tokniuan tlen omochijkej toyolikniuan uan noijki tikilnamikij okseki tlamantli tlen otechpanok uan non kichiua ma tiyolpakikan” (Mar. 10:29, 30).

9. ¿Tlen okichi se tokni para okachi kitekichiuiliskej Jehová maski sapanoua tlajyouia?

⁹ Maski titlajyouiskej uelis tiyolpakiskej tiktekichiuiliskej Jehová. Ma tikitakan ken uelis tikchiuaskej. Se tokni tlen itoka Mirreh chanti África Occidental, ye okatka doctora, satepan ayakmo otekipanouaya, ik non, omochi precursora. Kipia se kokolistli tlen kitlajyouiltia ijkuak nejnemi, ik non, san kixikoua tetlapouis tekalijtik san se hora. Pero ueli okachi tetlapouia ika carrito. Miakej oksepa kintlapouia ika Biblia, miakej kinmachtia uan oksekimej kinnotsa itech teléfono para kinmachits. ¿Tlen okiyolini okachi kitekichiuilis Jehová? Ye okijto: “Sapanoua niktlasojtla Jehová uan Jesucristo. Nochipa nikiluia Jehová ma nechpaleui para okachi niktekichiuilis” (Mat. 22:36, 37).

10. Ijkon ken kijtoua 1 Pedro 5:10, ¿tlen kinmaka Jehová akinmej okachi kitekichiuiliaj?

¹⁰ Jehová techmachtia. Se precursor tlen itoka Kenny uan chanti altepetl Mauricio okajsikamatki ken Jehová techmachtia. Ijkuak opejki momachtia Biblia ayakmo omomachti universidad, omoapolakti uan opejki kitechiuilia Jehová. Ye okijto: “Nimochijchikaua nikchiua ken profeta Isaías ijkuak okijto: ‘¡Nikan nika! Techtitlani’” (Is. 6:8). Kenny yotlapaleui kanin kinchijchiuaj kalmej para kiueyichiuaskej Jehová, noijki ika itlajtol yotlapaleui kanin kintlajtolkopaj amatlajkuilolmej. Ye okijto: “Onechmachtijkej miak tlamantli para uelis nitlapaleuiskia kanin onechtlalijkej”. Pero amo san omomachti ken kichiuaskia tekitl kanin okitlalijkej. Ye okijto: “Onimomachti seki tekitl tlen okatka oui uan onikitak omonekiaya nikchiuas ken Jehová kineki” (xiktlajtolti 1 Pedro 5:10). Tla tejuatsin tiueli, okachi xiktekichiuili Jehová uan xikita ken okachi mitsmachtia.

11. ¿Tlen okichijkej sekimej tokniuan siuamej ompa Corea del Sur uan ijkon okachi otetlapouijkej? (Xikita dibujo itech página 1).

¹¹ Noijki miakej iTlaixpantijkauan Jehová maski yikipiaj miak xiuitl kitekichiuilijtokej noijki moneki kinmachtiskej ijkuak okse tlamantli peuaj kitekichiuiliaj. Ijkuak opejki kokolistli COVID-19, tlayekankej tlen katej itech se tlanechikol ompa Corea del Sur okijkuilojkej: “Sekimej tokniuan tlen okijtouayaj amo uelis tetlapouiskiaj porque mokokouaj, axkan tetlapouiaj ika videoconferencia. Eyi tokniuan tlen kipiaj kanaj 80 xiuitl omomachtijkej ijkon tetlapouiskej uan axkan mojmostla tetlapouiaj” (Sal. 92:14, 15). ¿Mitspaktiskia okachi titetlapouis uan tikitas ken yolkuali Jehová? Tikitaskej seki tlamantli tlen techpaleuis ijkon ma tikchiuakan.

12. ¿Tlen kinmiluia Jehová kichiuas akinmej kineltokaj kinpaleuis?

¹² Ma tikneltokakan Jehová techpaleuis. Tla ijkon tikchiuaj uan kuali tiktekichiuiliaj, ye yotechilui techteochiuas (Mal. 3:10). Se tokni tlen itoka Fabiola uan chanti Colombia okitak ken Jehová okiteochi. Ijkuak omoapolakti okinekiaya yetos precursora pero tomin tlen okitlaniaya ika okinpaleuiaya inamik uan ikoneuan. Pero ayakmo tekipanoskia ik non, okitlatlaujti Jehová ma kipaleui. Ye okijto: “Miakej tlen ayakmo tekipanouaj uejkauaj para kinmakaskej pensión pero ijkuak ne oniktlajtlanki notomin, san opanok se metstli uan opejkej nechmakaj, ¡sapanoua onimotlajtlachialti!”. Opanok ome metstli uan omochi precursora. Axkan yikipia 70 xiuitl uan yikipia 20 xiuitl precursora. Yokinpaleui chikueyi ma moapolaktikan. Ye okijto: “Ualeua sapanoua nisotlaua pero Jehová nochipa nechpaleuia ma niyeto precursora”.

13, 14. ¿Tlen kichiuas ma tikneltokakan Jehová techpaleuis uan okachi ma tiktekichiuilikan?

¹³ Ma tikchiuakan ken oksekimej tlen okineltokakej Jehová kinpaleuiskia. Itech Biblia ijkuilitok miakej tlen sapanoua okitekichiuilijkej Jehová uan ye okinteochi porque okineltokakej kinpaleuiskia. Ma tikitakan tlen okichi Abrahán. Jehová okiteochi pero achto Abrahán okikajte ialtepe maski “amo okimatia kan oyaya” (Heb. 11:8). Jehová noijki okiteochi  Jacob pero achto ye omoteui iuan se ángel (Gén. 32:24-30). Ijkuak israelitas kalakiskiaj itech tlali tlen Jehová okinmilui kinmakaskia, okipanouijkej aueyatl Jordán pero teopixkej achto okalakej itech aueyatl maski ueyi okatka (Jos. 3:14-16).

¹⁴ Noijki uelis timomachtiskej seki tlamantli tlen axkan yokichijkej iTlaixpantijkauan Jehová. Yejuan kineltokaj kinpaleuis, ik non, kitaj ken okachi kitekichiuiliskej. Ijkon okichijkej tokniuan tlen intoka Payton uan isiua tlen itoka Diana, okinpaktiaya kitlajtoltiskej tlamachtilmej kanin kiteititia ken sekimej tokniuan opejkej okachi kitekichiuiliaj Jehová, ken serie “Ika nochi inyolo otetlapouitoj”. * Payton okijto: “Ijkuak otikintlajtoltiayaj yetoskia ken otikitayaj ikaj uelik otlakuajtoka. Ijkuak okachi otikitayaj okachi otiknekiayaj tikyejyekoskej Jehová yolkuali”. Satepan nonmej tokniuan otetlapouitoj kanin okachi moneki. ¿Yotikintlajtoltijkej nonmej tlamachtilmej? ¿Yotikitakej videos Predicación en lugares apartados: Australia uan Predicación en lugares apartados: Irlanda, tlen katej itech jw.org? Nochi non uelis techpaleuis ken okachi uelis tiktekichiuiliskej Jehová.

15. ¿Ken techpaleuiskej akinmej inmiuan timouikaj?

¹⁵ Ma tikitakan iuan akinmej timouikaskej. Okachi amo oui itlaj tikkuaskej tla tikatej iuan akinmej kinpaktia kikuaskej. Noijki ijkon panos tla tikatej iuan akinmej kipatioitaj kitekichiuiliskej Jehová, tejuan noijki okachi tiknekiskej tiktekichiuiliskej. Ijkon okipanok Kent uan Veronica. Kent okijto: “Toyolikniuan uan tofamilia otechyoleuayaj okachi ma tiktekichiuilikan Jehová. Otikitakej ijkuak otimouikayaj iuan akinmej okitekichiuiliayaj Jehová non otechpaleui ma tiknekikan tikchiuaskej okseki tlamantli para titetlapouiskej”. Yejuan axkan precursores especiales ompa Serbia.

16. Ijkon ken kijtouaj Lucas 12:16-21, ¿tleka moneki timochijchikauaskej para tiktekichiuiliskej Jehová?

¹⁶ Okachi ma tiktekichiuilikan Jehová. Tikyolpaktiskej Jehová amo kijtosneki moneki tikkauaskej nochi tlen tikpiaj (Ecl. 5:19, 20). Tla amo tiknekij tiktekichiuiliskej Jehová porque amo tiknekij timochijchikauaskej, techpanos ken tlakatl tlen Jesús okijto, okipiaya miak tlamantli pero okilka toTajtsin Dios (xiktlajtolti Lucas 12:16-21). Se tokni tlen itoka Christian uan chanti Francia okijto: “Amo onikmakaya Jehová uan nofamilia tlen omonekiaya”. Ye uan isiua okijtojkej mochiuaskiaj precursores, para uelis ijkon kichiuaskiaj ayamo tekipanoskiaj kanin otekipanouayaj. Opejkej kinemakaj tlen ika tlachipauaj para kipiaskiaj tlen ika mopanoltiskiaj uan oyolpakiayaj maski amo okipiayaj miak tlamantli. ¿Okinpaleui tlen okichijkej? Ye okijto: “Tiyolpakij titetlapouiskej, tikitaj akinmej tikinmachtiaj uan akinmej oksepa tikintlapouitiuij peuaj okachi kixmatij Jehová”.

17. ¿Tleka sekimej amo mixeuiaj okse tlamantli tetlapouiskej?

¹⁷ Ma tikitakan ken okse tlamantli uelis tiktekichiuiliskej Jehová. (Hech. 17:16, 17; 20:20, 21). Se precursora tlen itoka Shirley uan chanti ompa Estados  Unidos okitak okse tlamantli tetlapouiskia ijkuak opejki COVID-19. Achto amo okinekiaya tetlapouis ika teléfono. Pero ijkuak okintlajpaloto tlayekanki itech circuito okimachtijkej ken uelis kichiuaskia. Ijkon opejki nochipa tetlapouia ika teléfono. Ye okijto: “Achto onimomojtiaya pero axkan sapanoua nechpaktia. Okachi tikinmajsij akinmej tikintlapouiskej uan amo ijkuak otiayaj inkalijtik”.

18. ¿Tlen techpaleuis tla titlajyouiaj uan tikitaj oui okachi tiktekichiuiliskej Jehová?

¹⁸ Ma timokuayejyekokan tlen tikchiuaskej uan ma timochijchikauakan ijkon tikchiuaskej. Ijkuak itlaj techtlajyouiltia tiktlatlaujtiaj Jehová ma techpaleui uan timokuayejyekouaj tlen uelis tikchiuaskej para tikixnamikiskej tlen techpanotok (Prov. 3:21). Se tokni tlen itoka Sonia precursora regular, chanti ompa Europa uan tlapaleuia itech se grupo tlen intlajtol romani, ye okijto: “Nechpaktia nikijkuilos tlen nimokuayejyekoua nikchiuas uan niktlalia kanin nikitas. Itech mesa nikpia se dibujo, ompa mota ome ojtli tlen tlatlamantli teuika. Ijkuak itlaj nikpejpena nikchiuas nikita non dibujo, nimokuayejyekoua tlen panos tla nikchiuas tlen nimokuayejyekojtok”. Ijkuak Sonia tlajyouia mokuayejyekoua tlen kipaleuis. Ye okijto: “Sejse tlamantli tlen nechpanoua ne moneki nikpejpenas ken nimokuayejyekos, ken se ueyi tepamitl tlen nechtsakuilia amo ma nikchiua tlen onimokuayejyeko noso ken se puente tlen nechpaleuia ma nikchiua tlen onimokuayejyeko”.

19. ¿Ken tiktlasojkamatiliskej Jehová porque yotechmakak miak tlamantli?

¹⁹ Jehová sapanoua techteochiua. Uelis tiktlasojkamatiliskej tla timochijchikauaj tikueyichiuaskej (Heb. 13:15). Ijkon uelis tikchiuaskej tla tikitaj ken okachi tiktekichiuiliskej. Tla ijkon tikchiuaj, ye okachi techteochiuas. Mojmostla ma timochijchikauakan ma tikyejyekokan uan ma tikitakan Jehová yolkuali. Ijkon tikchiuaskej ken Jesús okijto: “Notlakual ye manikchiwa tlan kipaktia Akin onech[u]altítlanki, iwa maniktlami iteki” (Juan 4:34).