1, 2. Itech tlen kijtoua Salmo 34:8, ¿tlenon noneki tikchiuaskej niman ijkon tikmatiskej ika Jehová “sanoyej kuajli iyojlo” kipiya?

MATIKONNEMILIKAN ika yakaj techijlia matijkuakan itlaj tlen xkeman tijkuayaj. Uelis tiknemiliskej kenon uelik tla tikitaj, tikijnekuij, titetlajtoltiaj kenon nochijchiua noso tla tiktlajtoltiaj yakaj tla kuelilia. San ika, san uelis tikitaskej tla tikueliliaj, tla tikmatij yejon tlakuajli.

² Noijki ijkon, ijkuak tejuamej tikamapouaj Biblia, toamatlajkuiloluan niman tijkakij kenon oksekimej yokinteochiuj Jehová, tikitaj ika yejua “sanoyej kuajli iyojlo” kipiya. San ika, tla tokojtiliaj chikauak tiktekichiuiliskej Jehová, san no tejuamej tikmatiskej kenon yejua “sanoyej kuajli iyojlo” kipiya (xpoua Salmo 34:8). Matikonnemilikan ika tiknekij más chikauak tiktekichiuiliskej Jehová. San ika, tla tiknekij ijkon tikchiuaskej, nonekis tikpatlaskej tonemilis. Kanaj miyekpa yotikpoujkaj kampa Jesús okijto ika akin nokojtiliskiaj chikauak kitekichiuiliskej iTajtsin, Jehová kinmakas nochi tlen kinpoloua. San ika, kanaj xkeman tikitaj kenon Jehová kichiua yejuin (Mat. 6:33). Pampa tikneltokaj tlen Jesús okijto, tokojtiliaj san ika achijtsin tinemiskej, xok sajnoye titekitij niman tokojtiliaj más titenojnotsaskej. Ijkuak ijkon tikchiuaj, kuajli tikitaj kenon Jehová techtlajpiya. Ijkon, san no tejuamej tikmatij kenon Jehová “sanoyej kuajli iyojlo” kipiya.

3. Itech tlen kijtoua Salmo 16:1, 2, ¿akinomej kimititia Jehová ika kipiya kuajli iyojlo?

³ Jehová nochimej kimititia ika yejua kipiya kuajli iyojlo, hasta akin xkixmatij (Sal. 145:9; Mat. 5:45). San ika, yejua  más kinteochiua akin kitlasojtlaj niman kitekichiuiliaj ika nochi inyojlo (xpoua Salmo 16:1, 2). Matikitakan seki tlen Jehová yokichiuj topampa.

4. ¿Kenon Jehová kimititia ika kipiya kuajli iyojlo akin kemach peuaj itech nonisiuiyaj?

⁴ Ijkuak tikchiuaj tlen tiuelij itech Jehová, tikitaj kenon melak tepaleui tlen techijlia. Ijkuak otikixmatstiajkej niman opeuj tiktlasojtlaj, otechpaleui matikpatlakan ken titlanemiliayaj niman matijkajkauakan nochi tlen yejua xkuelita (Col. 1:21). Jehová noijki otechititi ika kipiya kuajli iyojlo ijkuak itech otosentemakakej niman otoapolaktijkej, pampa otechpaleui matikpiyakan chipauak totlamachilis niman iuan matouikakan (1 Ped. 3:21, TNM).

5. ¿Kenon yotikitakej ika Jehová techpaleuiya ijkuak titenojnotsaj?

⁵ Ijkuak titenojnotsaj, kuajli tikitaj kenon Jehová techpaleuiya. ¿Kemantika tejua timomojtia? Miyekej itekipanojkauan Jehová ijkon nomachilianij. Ijkuak xitikixmatiya Jehová, kanaj xkeman otiknemili ika tiknojnotsaskia itech Biblia yakaj akin nion xtikixmati. San ika, aman miyekpa titenojnotsa. Jehová yomitspaleui xyolpaki ijkuak titenojnotsa, niman tikmatstokej ika xsan ijkuakon yomitspaleui. Yejua yomitspaleui maka xkualani ijkuak akin tiknojnotsa mitstlauelnankilia niman yomitspaleui xkilnamiki tlen texto tikpouas ijkuak itlaj mitstlajtoltiaj. Noijki, yomitspaleui maka xmoyolkoko pampa kampa titenojnotsa xakaj mitskakisneki (Jer. 20:7-9).

6. ¿Kenon noijki techititia Jehová ika kipiya kuajli iyojlo?

⁶ Jehová noijki techititia ika kipiya kuajli iyojlo pampa techmachtia kenon más kuajli titenojnotsaskej (Juan 6:45). Ipan tlanechikojli tlen tikpiyaj itlajkotian semana, techititiaj kenon más kuajli titenojnotsaskej niman techyolchikauaj ijkon matikchiuakan. Kanaj achijtsin tomojtiaj ijkuak tiknemiliaj ika nonekis tikchiuaskej itlaj tlen xkeman tikchiuayaj. San ika, ijkuak tikchiuaj ijkon ken technauatiaj, tikitaj ika melak techpaleuiya kampa titenojnotsaj. Ipan totlanechikoluan niman toueyitlanechikoluan techyolchikauaj matikpapatlakan ken titenojnotsaj. Yejon techpaleuis maka nochipa san no yejua matikijtokan. Tla ijkon tikchiuaj, Jehová techteochiuas. Aman matikitakan kenon techteochiua Jehová ijkuak tokojtiliaj chikauak tiktekichiuiliskej maski tikixnamiktokej itlaj tlen ouijtika. Sakin tikitaskej tlenon uelis tikchiuaskej niman ijkon más chikauak tiktekichiuiliskej Jehová.

7. ¿Kenon techteochiua Jehová ijkuak tokojtiliaj más chikauak tiktekichiuiliskej?

⁷ Más tonisiuiyaj itech Jehová. Matikitakan tlenon ipan onochiuj se tokniuj tlayekanketl akin itoka Samuel, * akin tlapaleuijtika iuan isiuauj ne Colombia. Maski yejuamej itlapaleuijtoyaj ken precursores ipan intlanechikol, kinekiyaj más chikauak kitekichiuiliskej Jehová. Yejua ika, okinemilijkej yaskej ipan se tlanechikojli kampa nonekiyaj más tenojnotskej. Ijkon okichiujkej maski ononek kikauaskej miyek tlemach tlen kipiayaj. Samuel kijtoua: “Otikchiujkej tlen kijtoua Mateo 6:33 niman xok otijkoujkej tlen xnonekiya. San ika, melak ouijtika otikitakej tijkauaskej tokal tlen melak tikuelitayaj niman tlen yotitlankaj tiktlaxtlauaj”. Ijkuak oksekan otlapaleuitoj, okitakej ika san achijtsin tomin nonekiya para nopanoltiskej. Samuel oksejpa kijtoua: “Yotikitakej kenon Jehová techteochiua  niman kinnankilia toteoyouan. Aman más tikitaj kenon Jehová techtlasojtla”. ¿Tejua noijki uelis más chikauak tiktekichiuilis Jehová? Tla kema, kuajli xmatsto ika más tiknisiuis Jehová niman ika yejua mitstlajpiyas (Sal. 18:25).

8. ¿Tlenon tiueli itech tlen kijtouaj Iván niman Viktoria?

⁸ Tiyolpakij ijkuak chikauak tiktekichiuiliaj Jehová. Matikitakan tlenon kijtouaj tokniuan Iván niman Viktoria, akin tekititokej ken precursores ne Kirguistán. Yejuamej okinemilijkej san ika achijtsin tomin nopanoltiskej niman ijkon ueliskiaj yaskiaj kampa komintitlaniskiaj, ken kampa kinchijchiuaj kaltin kampa tikueyichiuaj Jehová. Iván kijtoua: “Nochipa tokojtiliayaj chikauak titekitiskej. Maski melak tisiauiyaj ijkuak titlamiyaj totekiyo, ika toyojlo tomachiliayaj pampa kuajli tikmatstoyaj ika nochi tokojtilis tikmakatoyaj Jehová. Melak tiyolpakij pampa otikinnextijkej miyekej tokniuan akin imiuan touikaj niman pampa miyek otiuelkej” (Mar. 10:29, 30).

9. ¿Kenon tokniuj Mirreh chikauak kitekichiuilijtok Jehová maski kixnamiktika tlen ouijtika, niman kenon nomachilia?

⁹ Ijkuak chikauak tiktekichiuiliaj Jehová, tiyolpakij maski tikixnamikij tlen ouijtika. San matontlanemilikan itech tokniuj Mirreh, akin yokaualtik niman iueyi. Yejua chanti África Occidental niman otekit ken doctora. Ijkuak okitlamilti itekiyo, onochiuj precursora. Pampa yejua kipiya artritis san se hora kixikoua tenojnotsas techajchan. San ika, más uejkaui tenojnotsa kampa kitlaliaj carrito. Noijki, kinpiya miyekej revisitas niman akin kinmachtia, sekimej itech yejuamej kinmachtia ika teléfono. ¿Tlenon okipaleui chikauak makitekichiuili Jehová? Yejua kijtoua: “Melak niktlasojtla Jehová niman Jesucristo. Nochipa niktlajtlanilia Jehová manechpaleui más chikauak maniktekichiuili” (Mat. 22:36, 37).

10. Itech tlen kijtoua 1 Pedro 5:10, ¿tlenon kinmaka Jehová akin nokojtiliaj más chikauak kitekichiuiliskej?

¹⁰ Jehová nochipa techmachtijtika. Kenny, se precursor akin tlapaleuiya ne Mauricio, yokitak ika yejon melauak. Ijkuak ouel itech Biblia, okikajkauj universidad, onoapolakti niman opeuj chikauak kitekichiuilia Jehová. Yejua kijtoua: “Ninokojtilijtika nikchiuas ijkon ken teotlajtoketl Isaías, akin okijto: ‘Nikan ninemi, nejua xnechtitlani’” (Is. 6:8). Kenny miyekpa yotlapaleui kampa kinchijchiuaj kaltin kampa tikueyichiuaj Jehová niman kampa kintlajtolkuepaj toamatlajkuiloluan ika itlajtol. Yejua kijtoua: “Tlen yonechmachti ikalpan Jehová yonechpaleui más kuajli manikchiua notekiyo”. San ika, yejua xsan ouel kenon más kuajli kichiuas itekiyo. Kenny kijtoua: “Onikasikamat ika xnochi ueli nikchiua niman onikitak ika ok noneki ninokojtilis más kuajli niktekichiuilis Jehová” (xpoua 1 Pedro 5:10). ¿Tejua noijki uelis timokauilis más mamitsmachti Jehová?

11. ¿Tlenon yokichiujkej sekimej tokniuan de Corea del Sur niman ijkon más chikauak tenojnotsaskej, niman kenon yokinpaleui yejon? (Xkita tlaixkopinajli tlen onka ixpan yejuin revista).

¹¹ Tlen Jehová techmachtia noijki kinpaleuiya más kuajli matenojnotsakan tokniuan akin youejkaujkej ipan ikalpan. Ijkuak opeuj COVID-19, sekimej tlayekankej de Corea del Sur okijkuilojkej: “Sekimej tokniuan akin achto kinemiliayaj ika xmás ueliskia tenojnotsaskiaj pampa kualoj, aman tenojnotsaj ipan videoconferencia. Yeyimej tokniuan siuamej akin ikipiyaj ipantsin 80 xiuitl onomajmachtijkej kenon kitekitiltiskej yejuin tecnología, niman aman miyekpa tenojnotsaj ipan se semana” (Sal. 92:14, 15). ¿Tikuelitaskia más tiktekichiuilis Jehová niman ijkon tikitas kenon  “sanoyej kuajli iyojlo” kipiya? Tlen amantsin tikitaskej mitspaleuis ijkon xchiua.

12. ¿Tlenon yokimijli Jehová akin itech tlaneltokaj?

¹² Nochipa xtlaneltoka itech Jehová. Tla itech titlaneltokaj niman chikauak tiktekichiuiliaj, yejua techijlia ika melak techteochiuas (Mal. 3:10). Tokniuj Fabiola, akin chanti Colombia, okitak kenon Jehová okiteochiuj. Desde ijkuak onoapolakti yejua kinekiya nochiuas precursora regular. San ika, chikauak tekitiya pampa nonekiya kipaleuis iueuentsin niman yeyimej ikoneuan. Yejua ika, ijkuak iueliskia kikajkauas itekiyo okitlajtlanili Jehová makipaleui. Yejua kijtoua: “Ijkuak se kitlajtlani makikauilikan makikajkaua itekiyo, melak uejkaui ika kinankiliaj. San ika, nejua onechnankilijkej san ipan se metstli. Onikitak kentla se milagro”. Ome metstli sakin, yejua onochiuj precursora. Aman ikipiya ipantsin 70 xiuitl niman youejkauj ipantsin 20 xiuitl ken precursora. Ipan nochi yejon tiempo yejua yokinpaleui chikueyi akin kinmachtia para manoapolaktikan. Yejua kijtoua: “Kemantika nikmachilia ika xok nikojtik. San ika, Jehová nechpaleuiya manikchiua itekiyo”.

13, 14. ¿Tlenon uelis techpaleuis más matitlaneltokakan itech Jehová niman más chikauak matiktekichiuilikan?

¹³ Xmomachti intech akin otlaneltokakej itech Jehová. Biblia tlajtoua itech miyekej akin chikauak okitekichiuilijkej toTajtsin. San ika, yejuamej achto ononek itlaj kichiuaskej para Jehová kinteochiuas. San matontlanemilikan itech Abrahán, toTajtsin okiteochiuj sakin ika “yejua okis ne kampa chantiya  niman oyaj, maski xkimatiya kanon yaya” (Heb. 11:8). Jacob okiteochiujkej sakin ika yonouijsoka iuan se ángel (Gén. 32:24-30). Niman ijkuak israelitas ikalakiskiaj ipan tlajli tlen toTajtsin yokimijlika kinmakas, yejuamej san ouel okipanauijkej atentli Jordán sakin ika teopixkej yokalakkaj ijtik atentli (Jos. 3:14-16).

¹⁴ Noijki uelis tomachtiskej intech tokniuan akin kuajli yokiteititijkej ika tlaneltokaj itech Jehová niman nokojtiliaj más chikauak kitekichiuiliskej. Matontlanemilikan itech tokniuj Payton niman isiuauj, Diana. Yejuamej melak kuelitayaj kinamapouaskej toamatlajkuiloluan kampa tlajtouaj intech tokniuan akin nokojtiliaj chikauak kitekichiuiliskej Jehová, ken on tlamachtiltin tlen uajlauej ipan serie “Se ofrecieron para ayudar”. * Payton kijtoua: “Ijkuak tikinamapouayaj yejuin tlamachtiltin, tikmachiliayaj kentla tikitstoskiaj kenon yakaj kikuajtika se tlakuajli tlen melak uelik. Ijkuak más tikinamapouayaj, más tiknekiyaj tikmatiskej niman tikitaskej kenon Jehová ‘sanoyej kuajli iyojlo’”. Sakin, yejuin tokniuan otlapaleuitoj kampa nonekiyaj akin tenojnotsaj. ¿Tejua yotikinpouj tlamachtiltin tlen onkatij ipan yejuin serie? ¿Yotikimitak videos Predicación en lugares apartados: Australia niman Titenojnotsaj kampa melak uejka ipan tlaltikpaktli, tlen onkatij ipan jw.org? Nochi yejuin mitspaleuis para más chikauak xtekichiuili toTajtsin.

15. ¿Kenon techpaleuis tla touikaj imiuan akin chikauak kitekichiuiliaj Jehová?

¹⁵ Xmouika imiuan akin mitspaleuiskej. Más tiknekiskej tijkuaskej se tlakuajli tlen xkeman tijkuaj, tla touikaj imiuan akin kueliliaj yejon tlakuajli. Noijki ijkon, tla touikaj imiuan akin kuelitaj chikauak kitekichiuiliskej Jehová, tejuamej noijki tiknekiskej chikauak tiktekichiuiliskej. Yejon tlen inpan onochiuj Kent niman Verónica. Kent kijtoua: “Akin imiuan touikaj niman tochanejkauan nochipa techyolchikauayaj oksekan matitlapaleuitij. Otikitakej ika pampa tosentlaliaj imiuan akin kuelitaj chikauak kitekichiuiliskej Jehová, otechpaleui para tejuamej noijki matiknekikan chikauak tiktekichiuiliskej”. Aman yejuamej tlapaleuijtokej ken precursores especiales ne Serbia.

16. Itech tlen Jesús okijto ipan Lucas 12:16-21, ¿tleka noneki tiknektoskej tijkauaskej seki tlemach?

¹⁶ Xnekto tijkauas seki tlemach ipampa Jehová. Tla tiknekij tikyolpaktiskej Jehová, xnoneki tijkauaskej nochi tlen tikpiyaj (Ecl. 5:19, 20). San ika, tla xtiknekij más tiktekichiuiliskej Jehová san pampa xtiknekij tijkauaskej seki tlemach, ueliskia topopolojtoskiaj ijkon ken on tlakatl akin Jesús okiteneuj. Yejua okijto ika maski yejuin tlakatl nochi kipiaya, okilkauj toTajtsin (xpoua Lucas 12:16-21). Tokniuj Christian, akin chanti Francia, kijtoua: “Nikmatstoya ika xchikauak niktekichiuilijtoya Jehová nion xmás ninemiya imiuan nochanejkauan”. Yejua iuan isiuauj onochiujkej precursores, san ika, ononek kikauaskej intekiyo. Yejuamej opeuj kinemakaj tlen ika tlachipaualo niman maski xueyi tomin kitlaniyaj, yolpakiyaj. ¿Okinpaleui tlen okichiujkej? Yejua kijtoua: “Aman más ika toyojlo titenojnotsaj niman ueli tikitaj kenon akin tikinmachtiaj itech Biblia niman akin tikomintlajpalouaj más ueltiuej itech Jehová”.

17. ¿Tleka sekimej xkinekij kipatlaskej ken kitekichiuiliaj Jehová?

¹⁷ Maka xmomojti tikpatlas ken tiktekichiuilia Jehová (Hech. 17:16, 17; 20:20, 21). Tokniuj Shirley, se precursora akin chanti Estados  Unidos, ononek kipatlas ken tenojnotsa ipampa COVID-19. Kachtopa nomojtiaya tenojnotsas ika teléfono. San ika, ijkuak tlayekanketl ipan circuito okintlajpaloto, okimachtijkej kenon uelis kichiuas. Desde ijkuakon, aman yejua miyekpa tenojnotsa ika teléfono. Shirley kijtoua: “Kachtopa ninomojtiaya, san ika, aman melak nikuelita. Aman más miyekej tikinnojnotsaj, xijkon ken ijkuak tiayaj techajchan”.

18. ¿Tlenon uelis techpaleuis ijkuak tikixnamikiskej itlaj tlen xtechkauilis matiktekichiuilikan Jehová?

¹⁸ Xtlapejpeni tlenon tikchiuas niman xmokojtili ijkon xchiua. Ijkuak tikixnamikij itlaj tlen ouijtika, tikchiuiliaj teoyotl Jehová niman kuajli tiknemiliaj tlenon techpaleuis matitlaxikokan (Prov. 3:21). Sonia, se precursora regular akin tlapaleuijtika ne Europa ipan se tlanechikojli kampa tlajtouaj romaní, kijtoua: “Nikuelita nikijkuilos ipan se amatl tlen nikneki nikchiuas niman niktlalia kampa uelis nikitas. Kampa noespejo nikpiya se tlaixkopinajli de miyek ojtin. Ijkuak nikneki niktlapejpenis tlen nikchiuas, nikita on tlaixkopinajli niman niknemilia tla tlen niktlapejpenis nechpaleuis manikchiua ijkon ken yonikijto”. Ijkuak Sonia kixnamiki itlaj tlen ouijtika, nokojtilia tlanemilis itech tlen kipaleuis. Yejua kijtoua: “Nochi tlen nikixnamiki nikita ika uelis nochiuas kentla se tepantli tlen nechtsakuilis para maka manikchiua tlen yonikijto noso uelis nochiuas kentla se puente tlen nechpaleuis manikchiua ijkon ken yonikijto. San no nejua noneki niktlapejpenis tla nikitas ken se tepantli noso se puente”.

19. ¿Kenon uelis tikititiskej Jehová ika tiktlasojkamatij nochi tlen kichiua topampa?

¹⁹ Jehová melak techteochiua. Uelis tikititiskej ika tiktlasojkamatij nochi tlen kichiua topampa, tla tokojtiliaj kuajli tikueyichiuaskej (Heb. 13:15). Ijkon tikchiuaj ijkuak tiktejtemouaj kenon más chikauak tiktekichiuiliskej Jehová. Ijkuak ijkon tikchiuaj, yejua más techteochiua. Kuakon, nochipa matiktejtemojtokan kenon uelis tikitaskej niman tikmatiskej ika Jehová “sanoyej kuajli iyojlo” kipiya. Tla ijkon tikchiuaj, tikchiujtoskej ijkon ken Jesús, akin okijto: “Ijkon ken nemotlalnakayo kojtitikaj ijkuak nentlakuaj, no ijki noalma kojtitikaj ijkuak nikchiua tlen kineki on yejuan onechajtitlan para nitlamis itekiu” (Juan 4:34).