1-2. Moloʼö Sinunö 34:8, hadia zinangea tafalua enaʼö aboto ba dödöda wa si sökhi tödö Yehowa andrö?

KHALAIGÖ na so samösa niha sameʼe khöu gö si lö irai öʼa ba zilalö. Enaʼö tola ökhalaigö hewisa raso gö daʼö, moguna önehegö ia, öʼago huania, öbaso hewisa wamazökhi yaʼia, mazui ösofu ba niha böʼö hewisa rasonia. Hizaʼi, enaʼö öʼila hadia ami khöu gö daʼö mazui löʼö, moguna ötandra samösa rasonia.

² Tola tafahaʼö ita sanandrösa ba waʼasökhi dödö Yehowa na tabaso Zura Niʼamoniʼö hegöi publikasida, ba tafondrondrongo nidunö-dunö niha böʼö sanandrösa ba howu-howu nitemara moroi khö Yehowa. Hizaʼi, enaʼö sindruhu-ndruhu aboto ba dödöda hawaʼasökhi dödö Yehowa, moguna ’tatandra’ samösa waʼasökhi dödönia andrö. (Baso Zinunö 34:8.) Hewisa lalada wamalua daʼö? Datatutunö sambua duma-dumania. Enaʼö tola takhamö gohitö dödöda ba wangai halöwö safönu inötö, moguna taʼöna-önaiʼö waʼaurida. Sindruhu sa, no asese tabaso mbuʼusa li Yesu wa hasambalö ibönökhi zoguna khöda Yehowa na taʼofönaiʼö Wamatörönia ba waʼaurida. Hizaʼi, tola manö lö nirasoida samösa waʼalua mbuʼusa linia andrö. (Mat. 6:33) Hewaʼae simanö, lö tebulö mamati ita ba mbuʼusa li nibeʼe Yesu. Börö daʼö, taʼalösi waʼoya gefe niʼogunaʼöda, taʼalösi göi ginötöda ba wohalöwö, ba taʼosambuaʼö dödöda ba wanuriaigö. Na tafalua daʼö, tola tarasoi samösa wa sindruhu-ndruhu ibönökhi zoguna khöda Yehowa. Mazui tola tawaʼö, no ’tatandra’ samösa waʼasökhi dödö Yehowa.

3. Moloʼö Sinunö 16:1, 2, haniha zanema faʼasökhi dödö Yehowa?

³ ”Sökhi dödö Yehowa ba niha fefu”, farahu ba daʼö niha si lö mangokhögö faʼaboto ba dödö sanandrösa khönia. (Si. 145:9;  Mat. 5:45) Hizaʼi, abölö oya howu-howu nibeʼenia ba niha sangomasiʼö ba samosumange yaʼia soroi ba dödö. (Baso Zinunö 16:1, 2.) Datatutunö hadia manö zi sökhi nifalua Yehowa khöda.

4. Hewisa wangoromaʼö Yehowa faʼasökhi dödö ba niha sawena mamahaʼö yaʼira sanandrösa khönia?

⁴ Ero na tafalua hadia niʼandrö Yehowa khöda, tola tarasoi samösa mbuania ba waʼaurida. Duma-dumania, me tafahaʼö ita sanandrösa khö Yehowa ba ibörögö taʼomasiʼö ia, itolo ita ba wanimbagö lala wangera-ngera hegöi amuata si lö tefaudu ba zomasi ia. (Kol. 1:21) Aefa daʼö, me talulu waʼaurida khönia ba tebayagö ita idanö, tola itugu tarasoi waʼasökhi dödö Yehowa. Duma-dumania, ibeʼe khöda dödö side-ide si lö sinegu ba ibaliʼö ita si fahuwu khönia.​—1 Fe. 3:21.

5. Hewisa worasoida faʼasökhi dödö Yehowa ba halöwö fanuriaigö?

⁵ Ba wanuriaigö, lö tebulö tarasoi waʼasökhi dödö Yehowa. Duma-dumania, hadia niha saila-aila ndraʼugö? Ato nono mbanua Yehowa sorasoi simane daʼö. Fatua lö si tobali ndraʼugö Samaduhuʼö Yehowa, te lö irai ökhalaigö wa ötoko mbawandruhö nomo niha si lö faʼila khöu ba öfaʼema khönia duria si lö irai irongo. Hizaʼi iadaʼa, no toʼölö ndraʼugö wamalua daʼö. Sabölö tohude, börö wanolo moroi khö Yehowa, örasoi waʼowua-wua dödö ba wamalua halöwö fanuriaigö! Itolo ndraʼugö Yehowa enaʼö lö khöu faʼataʼu na so zanaisi yaʼugö ba wanuriaigö, ifasugi ba dödöu ayati si tefaudu si tola öfaʼema ba niha somasi mamondrongo, ba ibeʼe khöu waʼabölö enaʼö lö tebulö öfalua halöwö fanuriaigö hewaʼae na lö adöni dödö niha ba duria nifaʼemau.​—Yer. 20:7-9.

6. Hewisa wa tola oroma waʼasökhi dödö Yehowa me ifomaha ita ba wamalua halöwö fanuriaigö?

⁶ Iforomaʼö göi khöda waʼasökhi dödönia Yehowa me ifomaha ita ba wamalua halöwö fanuriaigö. (Yoh. 6:45) Ba gangowuloa barö migu, so duma-duma wahuhuosa si tola taʼogunaʼö ba wanuriaigö. Ba wamobörö, tola manö abua khöda wangogunaʼö lala si bohou andrö. Hizaʼi, na no taʼoʼö wanuturu lala andrö, tola manö adöni dödö niha si so ba mbanua si toröi yaʼita. Ba gangowuloa hegöi angowuloa sebua, lafarou dödöda ba wamalua lala wanuriaigö si lö irai tafalua ba zilalö. Sakali tö, tola manö abua khöda wamalua si lö toʼölö tafalua. Hizaʼi, na no tatandraigö, hulö no tabeʼe ginötö khö Yehowa ba wamahowuʼö yaʼita. Iadaʼa, datatutunö hadia manö howu-howu nitemada na tafaduhusi tödö Yehowa, ba tatandraigö wamalua lala si bohou ba wameʼe khönia fondrege zi sökhi gofu hewisa zalua ba waʼaurida. Aefa daʼö, tatutunö göi hewisa enaʼö tola tadouʼö wamalua halöwö fanuriaigö.

7. Hadia manö howu-howu nitemada na tadouʼö wamalua halöwö fanuriaigö?

⁷ Itugu ahatö ita khö Yehowa. Nehegö duma-duma zi samösa satua sokubaloi sotöi Samuel * hegöi foʼomonia, sangai halöwö ba Kolombia. Omuso dödö zi sambua fongambatö andrö ba wangai halöwö tobali perintis ba mbanua niha Keriso si farahu yaʼira. Hizaʼi, börö me omasi ira ladouʼö wamalua halöwö fanuriaigö, möi ira latolo mbanua niha Keriso si lö ato sanuriaigö. Enaʼö alua gohitö dödöra andrö, so ösa zinangea latehegö. Imane Samuel, ”Mafalua niwaʼö ba Mataiʼo 6:33, ba maböhöli wowöli gama-gama si lö moguna. Hizaʼi, sabölö abua khöma yaʼia daʼö ba wondröi apartemen niʼokhögöma. Tefaudu sibai wamazökhi apartemen daʼö ba zomasi-masi dödöma, ba no ahori mabuʼa mbölinia.”  Ba mbanua niha Keriso si bohou, lö ebua gefe niʼogunaʼöra ba wowöli soguna khöra, tenga simane ba zilalö. Imane Samuel, ”No maʼila samösa hewisa wameʼe Yehowa khöma fanuturu lala hegöi fanema li moroi ba wangandröma. Aboto ba dödöma wa omuso dödö Yehowa ba nifaluama, ba iforomaʼö khöma waʼomasinia ba lala si lö irai marasoi ba zilalö.” Hadia tola göi ödouʼö wamalua halöwö fanuriaigö? Na tola, yafaduhu dödöu wa hasambalö itugu ahatö ndraʼugö khö Yehowa ba ibönökhi zoguna khöu.​—Si. 18:25.

8. Hadia wamahaʼö si tola öhalö moroi ba zalua khö Ivan hegöi Viktoria?

⁸ Omuso dödöda wamalua halöwö ba wamati. Nehegö atö zalua khö Ivan hegöi Viktoria, sambua fongambatö sangai halöwö tobali perintis ba Kyrgyzstan. Lö tebulö laʼöna-önaiʼö waʼaurira enaʼö tola tobali ira relawan gofu hadia halöwö nibeʼe khöra, farahu ba daʼö halöwö famazökhi tomosa. Imane Ivan, ”Mafalua wondrege zi sökhi ba ngawalö halöwö nibeʼe khöma. Hewaʼae na erege sibai dödöma wohalöwö, omuso dödöma börö me maʼila wa no maʼogunaʼö waʼabölöma ba wangai halöwö khö Yehowa. Omuso göi dödöma börö me ato zi fahuwu khöma si bohou, ba oya ngawalö zi sökhi salua khöma.”​—Mrk. 10:29, 30.

9. Hadia nifalua zi samösa talifusöda ba wondrouʼö halöwö ba wamati hewaʼae na so daha-taha nitaögönia, ba hadia mbuania?

⁹ Tola tarasoi waʼomuso dödö ba wamosumange Yehowa hewaʼae na so daha-taha nitaögöda. Duma-dumania, nehegö zalua khö dalifusöda ira alawe sotöi Mirreh, samösa lakha mbanua si no alawa döfi si toröi ba Afrika Barat. Me no fasiu ia moroi ba halöwönia tobali doto, ibörögö ihalö halöwö tobali perintis. Börö me no göna ia fökhö mbuʼu sabölö-bölö, ha sambua za tola fao ia wanuriaigö ba nomo-omo misa. Hizaʼi, tola ifalua wanuriaigö ba nahia sato niha mato hauga za faʼara. Ato niha nifalukhaisinia mangawuli hegöi nifahaʼönia ba Zura Niʼamoniʼö, ba itaria iʼogunaʼö telefo ba wahuhuosa khöra. Hadia zamarou tödönia wamalua daʼö? Imane Mirreh, ”Uʼomasiʼö sibai Yehowa hegöi Keriso Yesu. Asese ulau mangandrö khö Yehowa enaʼö itolo ndraʼo ba wameʼe fondrege zi sökhi ba wamalua halöwö ba wamati.”​—Mat. 22:36, 37.

10. Simane nitutunö ba 1 Fetero 5:10, hadia nitema niha somasi mondrouʼö halöwö khö Yehowa?

¹⁰ Tatema wamomaha moroi khö Yehowa. Daʼö nirasoi Kenny, samösa perintis sangai halöwö ba Mauritius. Me no ifahaʼö ia ba zindruhu, iböhöli kuliahnia, ibayagö ia idanö, ba ihalö halöwö safönu inötö. Imane Kenny, ”Omasido ufalua zimane nifalua Yesaya samaʼeleʼö, me imane, ’Yaʼe ndraʼo! Fatenge ndraʼo!’” (Yes. 6:8) No hauga kali fao Kenny ba halöwö famazökhi tomosa, ba fao göi ia ba wamoʼeluaha publikasida ba li niʼogunaʼönia. Imane, ”Lafomaha ndraʼo ba nekhe-nekhe danga si tobali fanolo khögu ba wamalua halöwö nibeʼe khögu.” Hizaʼi, tenga ha daʼö manö nitemania. Imane Kenny, ”Ibörögö aboto ba dödögu hezo ndrohu-ndrohu zi tola ufalua ba hadia manö mbua-bua sinangea udouʼö enaʼö itugu sökhi wamaluagu halöwö khö Yehowa.” (Baso 1 Fetero 5:10.) Hadia omasiʼö göi öfaudugö waʼaurimö enaʼö tola ötema wamomaha moroi khö Yehowa ba lala si faböʼö-böʼö?

11. Hadia nifalua ndra talifusöda ira alawe si so ba Korea Selatan enaʼö tola fao ira ba wanuriaigö, ba hadia mbuania? (Faigi gambara ba guli majalah.)

¹¹ Hewaʼae na no ara tobali ita Samaduhuʼö Yehowa, moguna göi tafomaha ita ba lala wanuriaigö si bohou. Duma-dumania, sagötö pandemi COVID-19, lamane ira satua sokubaloi moroi ba Korea Selatan, ”So ösa ndra talifusöda sangumaʼö wa tebai fao ira ba halöwö  fanuriaigö börö me no göna ira fökhö. Hizaʼi iadaʼa, tola lafalua daʼö ba konferensi video. So datölu ndra talifusöda ira alawe si töra 80 fakhe samomaha yaʼira ba wangogunaʼö komputer, ba iadaʼa arakhagö ero maʼökhö fao ira ba halöwö fanuriaigö.” (Si. 92:14, 15) Hadia omasiʼö ödouʼö wamalua halöwö ba wamati enaʼö itugu örasoi waʼasökhi dödö Yehowa? Datatutunö hadia manö zinangea öfalua.

12. Hadia nifabuʼu Yehowa ba niha sangodaligö yaʼia?

¹² Odaligö Yehowa. No ifabuʼu khöda wa hasambalö ifahowuʼö ita na tafaduhusi tödö ia ba tabeʼe khönia wondrege zi sökhi. (Mal. 3:10) No irasoi si samösa talifusöda ira alawe sotöi Fabiola si toröi ba Kolombia wa sindruhu-ndruhu ifalua mbuʼusa linia andrö Yehowa. Omasi ia tobali perintis biasa na no tebayagö ia idanö. Hizaʼi, tebai ifalua daʼö börö me moguna iforege wohalöwö ba wangalui soguna khö woʼomonia hegöi iraononia si datölu. Ba gafuriata, me no tola saʼae fasiu ia, iʼandrö wanolo moroi khö Yehowa soroi ba dödö. Imane, ”Si toʼölönia, moguna tabaloi mato hauga waŵa fatua lö tatema gazi fasiu. Hizaʼi, utema daʼö ha sara waŵa me no fasiu ndraʼo. Hulö dandra sahöli-höli dödö daʼö worasoigu!” Dua waŵa aefa daʼö, ibörögö mangai halöwö ia tobali perintis. Iadaʼa, no töra 70 fakhe ndröfinia. Sagötö merintis ia ba zi töra 20 fakhe faʼara, so dawalu niha nitolonia irege tebayagö idanö. Imane, ”Hewaʼae itaria erege dödögu, lö tebulö itolo ndraʼo Yehowa ero maʼökhö enaʼö lö uböhöli merintis.”

13-14. Hadia manö duma-duma sanolo yaʼita ba wangodaligö Yehowa hegöi ba wondrouʼö halöwö ba wamati?

 ¹³ Fahaʼö ndraʼugö moroi ba duma-duma niha sangodaligö Yehowa. Oya duma-duma ba Zura Niʼamoniʼö sanandrösa ba niha samorege ba wangai halöwö khö Yehowa. Moroi ba duma-dumara andrö, tola taʼila wa awena ifahowuʼö ira Yehowa na no laforomaʼö moroi ba nifaluara wa lafaduhusi tödö ia. Duma-dumania, me no iröi nomonia Aberahamo ”hewaʼae lö aboto ba dödönia hezo isawa”, awena ifahowuʼö ia Yehowa. (Heb. 11:8) Me no fasöndra Yakobo khö malaʼika, awena itema howu-howu si tohude. (1 Mo. 32:24-30) Simanö göi me edöna möi ndraono Gizaraʼeli ba Danö Amabuʼula. Me no lahundragö zinga Nungo Nidanö Yoridano ira ere, awena tebato nungo nidanö andrö irege tola laʼötö iraono Gizaraʼeli.​—Yos. 3:14-16.

¹⁴ Tola göi öfahaʼö ndraʼugö moroi ba duma-duma ndra Samaduhuʼö Yehowa ba götöda andre, sangodaligö Yehowa ba sondrouʼö halöwö ba wamati. Daʼö nifalua dalifusöda Payton hegöi foʼomonia sotöi Diana. Omasi sibai ira ba wombaso waö-waö waʼauri ndra talifusöda sondrouʼö halöwöra ba wamati, simane nitutunö ba seri ”Mereka Merelakan Diri”. * Imane Payton, ”Me mabaso waö-waö waʼaurira, marasoi wa hulö zamaigi-maigi niha si manga gö sami ndraʼaga. Itugu ara, itugu omasiga ’matandra ba mafaigi wa si sökhi tödö Yehowa andrö’.” Ba gafuriata, findra Payton hegöi Diana ba mbanua si lö ato sanuriaigö. Hadia no öbaso seri daʼa? Hadia no öfaigi video Menginjil di Daerah Terpencil​—Australia hegöi Menginjil di Daerah Terpencil​—Irlandia, si so ba jw.org? Mufaʼanö fefu daʼö enaʼö öʼila hewisa lala ba wondrouʼö halöwö ba wamati.

15. Hewisa wa tola möi fanoloda wariawösa si sökhi?

¹⁵ Fili wariawösa si sökhi. Si toʼölönia, aoha khöda wemanga gö si lö irai taʼa ba zilalö na asese fariawö ita ba niha sangumaʼö wa ami sibai gö daʼö. Simanö göi, na fariawö ita ba niha sangofönaiʼö Yehowa ba waʼaurira, tola manö adöni dödöda ba wondrouʼö halöwöda khö Lowalangi. Daʼö zalua khö Kent hegöi foʼomonia Veronica. Imane Kent, ”Lafarou dödöma ira si fahuwu khöma hegöi ösi nomoma enaʼö matandraigö mafalua lala wanuriaigö si bohou. Börö me fariawö ndraʼaga ba niha sangofönaiʼö Famatörö Lowalangi, lö aombö dödöma wamalua lala wanuriaigö si bohou.” Iadaʼa, mangai halöwö Kent hegöi Veronica tobali perintis istimewa ba Serbia.

16. Simane duma-duma nitutunö Yesu ba Luka 12:16-21, hana wa moguna tatehegö hadia ia niʼokhögöda?

¹⁶ Tehegö hadia ia niʼokhögöu ba wangomusoiʼö tödö Yehowa. Sindruhu sa, lö moguna taröi fefu zomasi-masi dödöda ba wangomusoiʼö tödö Yehowa. (Sango. 5:19, 20) Hizaʼi, na tataha-taha ita ba wondrouʼö halöwö khö Lowalangi ha börö me lö omasi ita tatehegö zomasi-masi dödöda, tola manö tafalua zala simane nifalua ndra matua ba duma-duma nitutunö Yesu. Iforege wohalöwö ba wangokhögö ngawalö zi sökhi, hizaʼi lö iʼameʼegö tödö Lowalangi. (Baso Luka 12:16-21.) Imane samösa talifusöda ira matua sotöi Christian, si toröi ba Prancis, ”Lö niforegegu ba wameʼe inötö ba faʼabölögu khö Yehowa hegöi ba nösi nomogu.” Ba gafuriata, lahalö gangetula darua ira foʼomonia ba wangai halöwö tobali perintis. Hizaʼi, enaʼö tola lakhamö gohitö dödöra andrö, moguna laröi halöwöra. Ba wombönökhi soguna khöra, tobali ira samözini omo hegöi gödo. Lafahaʼö göi ira ba wangokhögö faʼahono dödö hewaʼae na ide-ide gefera. Hadia omuso dödöra me no lafalua zimane  daʼö? Imane Christian, ”Iadaʼa, itugu omuso dödöma ba wamalua halöwö fanuriaigö, ba omuso göi dödöma me maʼila wa ibörögö laʼokhögö waʼaboto ba dödö sanandrösa khö Yehowa ira niha nifahaʼöma hegöi nifalukhaisima mangawuli.”

17. Hana wa abua khöda wamalua lala wanuriaigö si bohou?

¹⁷ Tandraigö wamalua lala wanuriaigö si bohou. (Hal. 17:16, 17; 20:20, 21) Sagötö pandemi COVID-19, ifaudugö lala wanuriaigönia si samösa talifusöda ira alawe sotöi Shirley, sangai halöwö tobali perintis ba Amerika Serikat. Ba wamobörö, aombö dödönia wangogunaʼö telefo ba wamalua halöwö fanuriaigö. Hizaʼi, me no itema wamomaha moroi khö zatua samasui, owölö-ölö ia ba wamalua daʼö. Imane, ”Ba wamobörö, ataʼu sibai ndraʼo. Hizaʼi iadaʼa, omuso dödögu wangogunaʼö telefo ba wanuriaigö. Abölö ato niha si tola matelefo moroi ba niha si tola mafalukhaisi ba nomo-omo misa!”

18. Hadia zanolo yaʼita na so daha-taha nitaögöda ba wondrouʼö halöwö ba wamati?

¹⁸ Tatugöi gohitö dödöu ba forege wogamö yaʼia. Na so daha-taha nitaögöda, moguna taʼandrö wanolo moroi khö Yehowa enaʼö tola taʼangeragö hadia zinangea tafalua. (Amd. 3:21) Imane samösa perintis sotöi Sonia, sangai halöwö ba kelompok sangogunaʼö li Romani si so ba Eropa, ”Usura gohitö dödögu ba zi sagörö karate, ba ufalemba daʼö ba nahia salio uʼila. Ba dete mezagu, no ugambaraini dombua lala sofeta ba nahia si faböʼö-böʼö. Na so gangetula sinangea uhalö, ufaigi gambara daʼö, ba uʼangeragö hadia tola möi fanologu gangetula andrö ba wogamö ohitö dödögu mazui löʼö.” Lö tebulö iʼokhögö lala wangera-ngera si tefaudu Sonia sanandrösa ba daha-taha nitaögönia. Imane, ”Na tebulö zalua khögu, moguna utatugöi hadia ubaliʼö daʼö towa sanaha yaʼo ba wogamö ohitö dödögu mazui soroso sanolo yaʼo ba wogamö yaʼia.”

19. Hadia zinangea tafalua?

¹⁹ Oya lala niʼogunaʼö Yehowa ba wamahowuʼö yaʼita. Tola taforomaʼö wa taʼandrö sibai saohagölö ba howu-howu nibeʼenia andrö na tafalua wondrege zi sökhi ba wamolakhömi yaʼia. (Heb. 13:15) Baero daʼö, na tadouʼö wamalua halöwö khö Yehowa, itugu oya göi howu-howu nibeʼenia khöda. Ero maʼökhö, ’datatandra ba tafaigi wa si sökhi tödö Yehowa andrö’. Buania, simane Yesu, tola tamane wangumaʼö, ”Daʼö gögu yaʼia wamalua somasi zamatenge yaʼo hegöi ba wangasiwai halöwö nibeʼenia khögu.”​—Yoh. 4:34.