1-2. Ngoko kisakire omo Esyonyimbo 34:8, twangakolaki tutoke eriyilangirira obubuya bwa Yehova?

TERILENGEKANIA omundu inyakuha akalyo ako ute wataghonzako. Wanganaminya hake ngoko kali omwisamalirako, eryowa ekikumbo kyako, eribulya ngoko kakahukawa, kutse eribulya abandi nga banatsemereko. Nomo byangabya bitya, enzira eyilengire esyosi ey’eriminya kwenene nga wangananzako, ly’erighonza kuko iwuwene-wene.

² Twangan’igha myatsi milebe y’oko bubuya bwa Yehova omw’isoma eBiblia n’ebitsapo byetu, kutse omw’ihulikirira abandi bakakania oko bibuya ebyo Yehova abiribakolera. Aliwe, tukaminya ndeke-ndeke ngoko Yehova ni mubuya omughulu ‘tukalenga’ kutse eripima itwibene-bene tutoke eriyilangirira obubuya bwa Yehova. (Soma Esyonyimbo 34:8.) Tuterilebya ngoko twangakola tutya. Tubughe tuti wanzire iwakola omubírí mulebe w’omughulu wosi, aliwe eribugha uti utoke eritsuka omubírí oyo, kyanganatolera iwatsuka eriyibegherya amaisa w’eritsemera ebindu bike. Kwa muhwa unabeghere erisoma ebinywa bya Yesu eby’akalaghamo ati twamabihira emyatsi y’oBwami y’embere, Yehova inyakendituha ebyo tulaghireko. Kwa muhwa wanganabya isiwuliwatayilangirira Yehova kw’akaberereraya omulaghe oyo (Mat. 6:33) Aliwe kundi wikirye omulaghe wa Yesu, wamayikasa eribya ukakolesya esyofranga nge, wamakehya esyondambi esyo ukalabaya oko mubírí utoke erikola ngoko wangatoka omo mubírí w’eritulira. Omughulu tukakola tutya, tukayilangirira itwibene-bene kwenene-kwenene ngoko Yehova akatuha ebyo tulaghireko. Tukabya itwamalenga obubuya bwa Yehova.

3. Ngoko kisakire omo Esyonyimbo 16:1, 2, abo Yehova akakolera ebibuya ni bahi?

³ Yehova ni “mwenge oko bosi,” nibya n’oko batamwasi. (Esy. 145:9; Mat. 5:45) Aliwe kutsibu-tsibu, abandu abanzire Yehova n’abakamukolera n’omutima wosi, akabaha miyisa mingyi. (Soma Esyonyimbo 16:1, 2.) Tuterikania oko myatsi milebe mibuya eyo Yehova abirituha.

4. Yehova akakanganaya ati obubuya bwiwe oko bosi abakatsuka eriyitunda hakuhi naye?

 ⁴ Omughulu tukakolesaya ebyo Yehova akatwighisaya, tukalangira obubuya bwiwe b’omo ngebe yetu. Omughulu twigha erimuminya n’erimwanza, mwatuwatikya eriyighula oko malengekania n’emikolere mibi eyitemutsemesaya. (Kol. 1:21) Kandi n’omughulu twayiherera okwiye n’eribatisibwa, mutwayilangirira obubuya bwiwe nibya kutsibu-kutsibu mwatuha ebindu ebyuwene ng’obunya-mutima obuwene n’erituhira omo obwira obuwene haghuma naye.​—1 Pet. 3:21.

5. Tukayilangirira tuti obubuya bwa Yehova omo mubírí w’eritulira?

⁵ Tukayilangirira obubuya bwa Yehova omughulu tukayiherera omo mubírí w’eritulira. Ukakwa abandu b’esisoni? Abimiri ba Yehova bangyi nabo bali batya. Kwa muhwa embere ubye Mwimiri wa Yehova isiwangatalengekania nga wanganatoka erikongota oko lukyo l’omundu oyo utasi kandi iwatoka erikania naye oko mwatsi w’eBiblia. Nomo byanabya bitya, lino ukakola omubírí w’eritulira wo butsirileka. Kandi Yehova abirikuwatikya eryanza omubírí w’eritulira, nibya wabiriyilangirira obuwatikya bwa Yehova omo nzira nyingyi! Akakuwatikaya eritulera omughulu wamahindana omo mubírí w’eritulira m’omundu oyukakukaramira. Kandi akakuwatikaya eryibuka erisako eritolere ery’eriha oyo wanzire erikuhulikirira. Abirikuha n’akaghala k’eriyitsinga eritulira n’omo wangahindana n’abandu ab’omo kiharo kyaghu abatanzire erikuhulikirira.​—Yer. 20:7-9.

6. Eribegheribwa eryo Yehova akatuha likatuwatikaya liti eriyilangirira obubuya bwiwe?

⁶ Eyindi nzira eyo Yehova abiritukanganirya m’obubuya bwiwe ly’eritubegherya omo mubírí w’eritulira. (Yoa. 6:45) Oko mihindano yetu y’omo kati-kati k’eyenga tukakwama eby’erilangirirako ebyuwene ebyo twangakolesya omo mubírí wetu w’eritulira. Okw’itsuka, twanganubaha erikolesya enzira nyihya-nyihya, aliwe omughulu tukakolesaya amahano ayo, twanganalangira enzira nyihya eyo ngoko yo yitolere oko bandu b’omo kiharo kyetu. Kandi oko mihindano y’endeko n’oko mihindano minene-minene, tukahirawa m’omuhwa w’erikolesya esyonzira mbiriri-mbiriri esyo tute twatakolesya embere. Esyonzira esyo nasyo syanganatubahisya, aliwe omughulu tukayikasa erikolesya emyatsi mihya eyo Yehova akatuha emiyisa. Tukanaye oko miyisa milebe eyo Yehova akatukaha omughulu tukakanganaya ngoko tuyiketere iye tukayikasa erikolesya esyonzira nyihya-nyihya tutoke eriha Yehova y’ekyuwene kundu nomo twangabya omo mibere yiri yiti. Tulebaye esyonzira esyangatuwatikya erikola bingyi omo mubírí w’eritulira.

7. Ni muyisa wahi owo tukabana omughulu tukayikasa erikola bingyi omo mubírí wa Yehova?

⁷ Tukayitunda hakuhi na Yehova. Tukanaye oko ky’erileberyako ky’omusyakulu w’endeko mughuma oyukahulamo Samuel. * Iye haghuma na mukali wiwe bakakolera Yehova y’omo kihugho kye Kolombi. Ibo babiri ibanzire erikola omubírí w’obupania omo ndeko yabo, aliwe mubayisogha erikola bingyi omo mubírí w’eritulira omwiyawatikya endeko eyirimo obwagha bw’abatuliri. Eriberererya eriyisogha lyabo, mulyabasaba eritendisyabya bakakola emyatsi mirebe eyo babya batsemere kera. Samuel akabugha ati: “Mutwakolesya akanuni akali omo Matayo 6:33 neryo twamaleka eribya tukaghula ebindu ebyo tutalaghireko. Akabugha ati ekyatukalako kutsibu ly’erisigha enyumba yetu. Yabya iyihimbire ngoko twanzire, kandi isituli m’omwinda wosi-wosi busana nayo. Mutwabya twabihumira omo ndeko nyihya-nyihya eyo, mutwabya tukakolesya esyofranga nge kutsibu okw’ilingirirania n’esyotwabya tukakolesya eyotwalua. Akatasyabugha ati, mutwayilangirira ngoko Yehova akatusondola kandi ngoko akasubiraya oko misabe yetu. Mutwayowa omo mitima ngoko Yehova akatutsemera  kandi mutwayilangirira olwanzo lwiwe omo syonzira nyingyi kulenga embere.” Naghu wanganatoka erikola bingyi omo nzira nyilebe omo mubírí wa Yehova? Byamabya iko biri bitya, wikiriraye ngoko ukendiyitunda hakuhi na Yehova kandi ngoko akendikuha ebyo ulaghireko.​—Esy. 18:25.

8. Ebyo mughala wetu Ivan na mukali wiwe Viktoria babugha byamatwighisyaki?

⁸ Tukabana obutseme b’omo mubírí wetu. Talebaya ebyo mughala wetu Ivan na mukali wiwe Viktoria abapainia omo muyi we Kyrgyzstan bakabugha. Mubayikasa eribya n’engebe y’eritendibya n’ebindu bingyi batoke eriyiherera erikola omubírí wosi-wosi erihirako n’emibírí y’obuhimbe. Mughala wetu Ivan akabugha ati: “Itukayikasa erikola ebyosi ebyo twangatoka omo buli mubírí. Nomo twanabya tukahika omw’igholo itwabiriluha, itukatsema eriminya ngoko tulyakolesaya akaghala ako k’omo mubírí w’oBwami. Ekindi ekyabya kikatuletera obutseme ly’eriyira abira bahya-bahya bangyi kandi mutwalola oko myatsi mibuya mingyi.”​—Mar. 10:29, 30.

9. Inyane omo mibere eyikalire, mwali wetu mulebe mwakolaki atoke erikola bingyi omo mubírí wa Yehova, kandi mwabana miyisa yahi?

⁹ Tukabana obutseme omo mubírí wa Yehova nibya n’omughulu tuli omo mibere eyikalire. Eky’erileberyako, mwali wetu Mirreh oyukekeluhire kandi omukwirwa w’omo Afrika y’eyikalengera eryuba, abya munganga. Omughulu aleka omubírí wiwe w’obunganga, mwatsuka omubírí w’obupainia. Mirreh abya akwire obukoni obukalire obukaleka inyatatoka erighenda bweghu-bweghu, neryo inyakalabaya saha nguma nyisa akatulira lukyo kwa lukyo. Aliwe akatoka erilabya endambi nyingyi eritulira ahali abandu bangyi. Kandi awite abandu bangyi abakakanaya nabo ngendo-ngendo n’erisondolya amafunzo mangyi, abalebe ba kubo akakanaya nabo oko telefone. Ekyakuna mwali wetu Mirreh eryanza erikola bingyi omo mubírí wa Yehova niki? Akabugha ati; “Omutima waghe ali n’olwanzo lunene oko Yehova na Yesu Kristo, ebiro byosi ngasaba Yehova anyiwatikaye erikola bingyi omo mubírí wiwe ngoko nangatoka”​—Mat. 22:36, 37.

10. Ngoko kisakire omo 1 Petero 5:10, abakayisogha erikolera Yehova yo bingyi bakabana miyisa yahi?

¹⁰ Yehova akatwighisaya n’eritubegherya emyatsi mihya-mihya. Mughala wetu Kenny omupainia oyukakolera omo kisanga ky’eMaurice, abirilangira ngoko eyo ni kwenene. Omughulu igha ekwenene mwaleka erisoma akalasi kanene, amabatisibwa neryo amatsuka omubírí w’omughulu wosi. Akabugha ati: “Munayikasa erikolesya ebinywa by’omuminyereri Isaya ebikabugha biti: ‘Ingye yono hano. Unyitume!” (Isa. 6:8) Mughala wetu Kenny mwakola oko mibírí mingyi y’obuhimbe, kandi mwawatikya oko mubírí w’eribindula ebitsapo byetu by’omo mubughe wabo. Akatasyabugha ati: “Munahabwa amakangirirya n’eribegheribwa ebyaniha obutoki obo nilaghireko nitoke erikola omubírí waghe wo ndeke. Aliwe munatigha erikola omubírí lisa, munigha n’eriminya emyatsi eyo nite nangatoka erikola kandi munaminya emibere mibuya eyo litolere inakulya nitoke eribya mughombe wa Yehova oyuwene.” (Soma 1 Petero 5:10.) Kwa muhwa naghu wanganakola esyombinduka sy’omo ngebe yaghu utoke erikangiriribwa n’eribegheribwa na Yehova omo nzira nyingyi.

11. Bali betu abe Korea y’Endina mobayikasa eriyira bati batoke eritulira kandi mubabana bighuma byahi? (Lebaya epitsa eyiri oko kijalada.)

¹¹ Nibya n’Abimiri ba Yehova ababirimukolera oko myaka mingyi, banganigha n’eribegheribwa emyatsi mihya bamayikasa erikolesya enzira nyihya-nyihya ey’erikolamo omubírí wiwe. Omo mughulu w’ekorona ono abasyakulu b’omo ndeko ye Korea y’Endina mubahandika bati: “Ababya bakalengekania bati sibangatoka erikola oko mubírí w’eritulira busana n’eribula akaghala k’ekinya-mubiri, banemutulira omo nzira ye Enternete. Bali betu basatu abali n’emyaka kwilaba 80 babirigha erikolesya e ordinatere, neryo lino banemusangira oko mubírí w’eritulira hakuhi obuli kiro.” (Esy. 92:14, 15) Unanzire erikola  bingyi omo mubírí w’eritulira n’erilangira obubuya bwa Yehova bo kutsibu? Tukanaye oko myatsi milebe eyo wangakola eyangakuwatikya erikola utya.

12. Yehova abirilagha erikolera abakayiketera iye boki?

¹² Wighe eriyiketera Yehova. Abirilagha eritukolera ebindu bibuya bingyi omughulu tukayiketera iye n’omughulu tukayikasa erimuha ekyuwene kulenga ebyosi. (Mal. 3:10) Mwali wetu w’eKolombi oyukahulawamo Fabiola mwayilangirira omo ngebe yiwe ngoko Yehova akaberereraya endaghane yiwe eyo. Mwayitsutsa eribya mupainia w’omughulu wosi abinabatisibwa. Aliwe lyabya litolere iniakola omubírí wiwe n’omuhwa busana n’eriwatikya omulume wiwe n’abana biwe basatu. Neryo omughulu abana epasio, mwasaba Yehova amuwatikaye. Akabugha ati: “Hakalaba mughulu muli abandu bangyi bakalindirira erihabwa epasio, aliwe ingye munatsuka eribya ngahabwayo enyuma sy’omwisi mughuma musa. Ekyo mukyabya nga kitiko-tiko!” Emisi ibiri enyuma syaho, mwatsuka omubírí w’obupainia. Lino awite emyaka 70. Amabibugha omo bupainia mw’emyaka 20. Erilwa omughulu atsuka obupainia abiriwatikya abandu munane erihikira okw’ibatisibwa. Akabugha ati: “Nomo hakanabya omughulu inayowa nga sinikiwite akaghala, Yehova akanyiwatikaya obuli kiro nitoke erikwama eprograme yaghe.”

13-14. Ni by’erileberyako byahi ebyangakuwatikya eriyiketera Yehova n’erihikira ebyo twabiriyitsutsa erikola?

¹³ Wighe eby’erileberyako by’abandu abayiketera Yehova. EBiblia yiswiremo eby’erileberyako by’abandu abakola kutsibu omo mubírí wa Yehova. Abangyi ba kubo Yehova abya  akabaha emiyisa babitsuka bakola omwatsi mulebe owakakanganaya ngoko bayiketere iye. Eky’erileberyako, Yehova mwatsumula Abrahamu enyuma sy’erisighania enyumba yiwe “n’erigenda isyasi eyakaya.” (Ebr. 11:8) Yehova mwaha Yakobo y’omuyisa w’embaghane enyuma sy’erilwa n’omumalaika. (Enz. 32:24-30) Omughulu ekihanda kye Israeli kyabya hakuhi n’eringira omo kihugho eky’endaghane, mukyatokekana erisoka omo lusi lwe Yorodani olwabya ilwabiribwagha enyuma sy’abahereri erilyata omo lusi.​—Yos. 3:14-16.

¹⁴ Kandi wanganigha eby’erileberyako by’abandu ba munabwire abayiketera Yehova n’erihika okw’ihabwa ebyo babya ibabiriyitsutsa erikola. Eky’erileberyako, mughala wetu oyukahulawa mo Payton na mukali wiwe Diana babya ibakatsemera erisoma emyatsi eyikakanaya oko baghala n’abali betu abakola bingyi omo mubírí wa Yehova ng’emyatsi eyikanibweko omo kitswe “Mubayiherera okwanzisibwa lyabo.” * Mughala wetu Payton akabugha ati: “Omughulu tukasoma oko ebyo balolako tukabya nga tukasamalira omundu oyukalya akalyo akasihire. Omughulu twabya tukasoma mutwanza ‘erilenga n’erilangira obubuya bwa Yehova.’” Enyuma syaho mughala wetu Payton na mukali wiwe Diana mubahumira eyiri obwagha bw’abatuliri. Naghu wanabirisoma oko myatsi eyo? Wanabirilebya esyo video esiri n’omutwe Kuhubiri Katika Eneo la Mbali—Australia na Kuhubiri katika Eneo la Mbali—Irelande esiri oko jw.org? Esyovideo esyo syanganakuwatikya erilangira ngoko wangakola bingyi omo mubírí w’eritulira.

15. Abira abuwene bangatuwatikya bati?

¹⁵ Usombole abira abuwene. Erighonza oko kalyo ako tutetwatalyako likoloba twamabibya tukasiba n’abanzireko. Netu kutya, twamabibya tukalabya endambi n’abanzire erikola bingyi omo mubírí wa Yehova, itwanganasondya akanya k’erikola bingyi omo mubírí w’oMungu. Mughala wetu Kent na mukali wiwe Veronica mubayilangirira omwatsi oyo. Mughala wetu Kent akabugha ati: “Abira betu n’abomo kihanda kyetu mubatuhiramo omuhwa w’erikola omubírí w’oMungu omo syonzira nyingyi. Mutwalangira ngoko eribya tukasiba n’abandu abakahira emyatsi y’oBwami y’embere omo ngebe yabo mulyatuwatikya eriyiketera ngoko twanganatoka erikolesya enzira nyihya-nyihya omo mubírí w’oMungu.” Lino mughala wetu Kent na mukali wiwe Veronica ni bapainia b’embaghane omo Serbia.

16. Ngoko kisakire omo musyo wa Yesu owali omo Luka 12:16-21, busanaki kyanganatolera itwayiherera okw’iyanzira lyetu erileka emyatsi milebe eyo twanzire?

¹⁶ Uyiherere busana na Yehova. Sibughambu litolere obuli mughulu itwasigha obuli kindu ekyo twanzire busana n’eritsemesya Yehova. (Omug. 5:19, 20) Nomo bite bitya, kyamatuhikira erisombola eritendikola bingyi omo mubírí wa Yehova kusangwa sitwanzire erisighania ebindu birebe ebyo twanzire, itukendibya ng’omulume oyo Yesu akanayako omo musyo wiwe oyo wakolesaya akaghala kiwe busana n’eriyira bindu bingyi neryo isyatsomene oMungu. (Soma Luka 12:16-21.) Mughala wetu oyukahulawamo Christian ow’omo kihugho ky’eFrance akabugha ati: “Nabya isinirikolesaya akaghala n’endambi yaghe byo deke kutsibu busana n’erikolera Yehova n’eriwatikya ekihanda kyaghe.” Neryo iye na mukali wiwe mubayisogha eribya bapainia. Aliwe lyabya litolere ibaleka esyokasi syabo imubatoka eribya bapainia. Neryo eritoka eribana ebiyitawa byabo mubabya bakakola oko mubírí w’obusafi, kandi mubigha eritsemera engebe y’eribya n’esyofranga nyike. Erisigha ebindu ebyo babya bawite busana n’eribya bapainia muryanabaletera obutseme? Mughala wetu Christian akabugha ati “Tuli n’obutseme bw’erikola bingyi omo mubírí wa Yehova kandi tukatsema erilangira abandu abo tukigha nabo eBiblia, n’abo tukalenderera ngendo-ngendo bakigha eriminya Yehova.”

17. Busanaki eritsuka erikolesya enzira nyihya y’omo mubírí w’eritulira kyanganakala?

 ¹⁷ Utsemere eribya ukakolesya esyonzira nyihya omo mubírí w’oMungu. (Emib. 17:16, 17; 20:20, 21) Kyabya kitolere mwali wetu Shirley omupania omo Amerika iniabindula emibere yiwe y’eritulira omo mughulu ono w’ekihunzo ky’ekorona. Okw’itsuka, mwabya n’eritika-tika nga syenditoka eritulira omo nzira y’etelefone. Enyuma syaho, mubakangiriribwa n’eribegheribwa omughulu balendererawa n’omulebya w’omutimbo, neryo mwatsuka eritulira oko telefone butsirileka. Akabugha ati: “Okw’itsuka kyabya ikikita obuba, aliwe lino nabiribeghera enzira eyo. Lino tukasunga abandu bangyi kulenga omughulu twabya tukatulira lukyo oko lukyo!”

18. Ekyangatuwatikya erikola bingyi omo mubírí w’oMungu niki nomo hangabya ekikatuletera amaligho?

¹⁸ Uyihirireho ebyo ukayitsutsa erikola neryo uyikase eribihikira. Omughulu amaligho akatuhikira tukasaba Yehova y’obuwatikya n’akandi tukalengekekanaya oko ebyo twangakola tutoke erisingagho (Emi. 3:21) Mwali wetu Sonia omupainia oyukakolera omo kikuto kike ky’omubughe we Romani omo Bulaya akabugha ati: “Ngahandika ebyo nanzire erikola by’oko karatasi n’eribikabyo aho nangalangirabyo luba. Oko mesa yaghe nabiridesako epitsa y’esyombalo ibiri esikalola obuli nguma oko luhande lwayo. Omughulu litolere inasombola eky’erikola, ongalebaya amasanganzira w’esyombalo ibiri esyo n’erilengekania erisombola lyaghe nga linemwendinyiwatikya erikola ebyo nabiriyisogha kutse iyehe.” Mwali wetu Sonia akayikasa eribya n’amalengekania awuwene oko maligho wiwe. Akabugha ati: “Obuli buligho bwanganabya ng’oluhimbo olukanyikakiraya, kutse ng’ekilalo ekikanyiwatikaya erisoka, neryo bikakwamana ngoko ngasombola erisondola obulengekania bwaghe.”

19. Wamayisogha erikolaki?

¹⁹ Yehova akatuha emiyisa y’omo nzira nyingyi. Twanganakangania ngoko tukatsemera emiyisa yiwe omwikola ekyosi-kyosi ekyo twangatoka erimuletera olukengerwa. (Ebr. 13:15) Twanganakangania erisima lyetu omwikolesya esyonzira nyihya-nyihya esyangaleka itwakola bingyi omo mubírí w’eritulira, neryo ekyo ikabya nzira eyo Yehova akatuha mw’emiyisa mingyi kutsibu. Obuli kiro tulengekanaye oko syonzira mbiriri-mbiriri esyangatuwatikya ‘erilenga n’eriyilangirira ngoko Yehova ni mubuya.’ Neryo itukendibya nga Yesu oyo wabugha ati: “Akalyo kage ly’erikola erisonda ly’oyo wanyituma n’eribuga omubírí owo amba.”​—Yoa. 4:34.