1-2. Molingana na Salimo 34:8, kansi tingasimikizhyile tyani kuti Yehova ni wabwino?

 YELEKEZELANI kuti munthu muyakine wakupasani cakulya camene mukaliyolyapo. Kuti muziŵe mwacumvwikila cakulya ici, mungakonshe ŵanthu ayakine amene ecilyapo kale, kumvwa mwacununkhilila olo mungafune kuziŵa zinthu zeciseŵenzesha popika. Koma kuti musimikizhye kuti cakulya ici ni ciweme cendi, mungafunike kucilaŵa.

² Tingaziŵe zinyinji zokhuza mwamene Yehova odalisila atumiki ŵake mwa kuŵelenga Baibo na zofalisa zasu olo kumvwako madaliso yecilandila Akhristu ayakine. Koma kuti tisimikizhyile kuti Yehova odalisa cendi atumiki ŵake, tingafunike “kulaŵa” pa seo seka. (Ŵelengani Salimo 34:8.) Mwacisanzo, yelekezelani kuti mufuna kuyamba utumiki wanthawi zonse. Koma kuti mukwanilishe colinga ici, muona kuti mufunika kucinja zinthu ziyakine pa umoyo wanu. Payakine muiziŵa bwino lonjezo ya Yesu yakuti ngati tuika Ufumu wa Mulungu pa malo oyamba, Yehova akotipasa zonse zatufunikila. Koma mukaliyoona kukwanilishiwa kwa lonjezo iyi pa umoyo wanu. (Mat. 6:33) Cifukwa mukhulupilila lonjezo iyi, muganiza zocepeshako vinthu vamugula na nthawi yoseŵenza kuti mukocita zinyinji pa nchito yolalikila. Ngati mungacite izi, niye pamungaone kuti Yehova okwanilisha lonjezo yake yakuti akotipasa zonse zatufunikila pa umoyo wasu. Ndipo zunkhala monga “mwalaŵa” ubwino wake.

3. Molingana na Salimo 16:1, 2, kansi ni ŵanthu otyani ŵakudalisa ngako Yehova?

³ Yehova ocitila vinthu vabwino ŵanthu onse, kuyangizhyilapo na ŵala amene omuziŵa lini. (Sal. 145:9; Mat. 5:45) Koma odalisa ngako ŵala amene omukonda nomutumikila na mtima wonse. (Ŵelengani Salimo 16:1, 2.) Lomba, tiyeni tilaŵizhyane vinthu viyakine vawaticitila Yehova.

4. Kansi Yehova watiyavya tyani?

 ⁴ Nthawi zonse, tupindula ngako ngati tuseŵenzesha malangizo a Yehova mu umoyo wasu. Mwacisanzo, petephunzila za yove noyamba kumukonda, etiyavya kuti tileke kucita vinthu viipa. (Akol. 1:21) Ndipo petezipeleka nobatizika, etiyavya kuti tinkhale na cikumbumtima cituŵa. Izi zecitisha kuti tinkhale pa ushamwali wotang’a na yove.—1 Pet. 3:21.

5. Kansi Yehova otiyavya tyani tikankhala mu utumiki?

⁵ Yehova otionesha soti ubwino wake tikankhala mu utumiki. Kansi mwacibadwa nimwe wansoni? Ziŵani kuti muli lini mweka. Atumiki a Yehova anyinji nao ocita nsoni. Pemwenze mukaliyonkhala Mboni, payakine mwenzoona kuti mungakwanishe lini kulalikila munthu wamusaziŵa. Koma Yehova ekuyavyani kusilizhya wowa wemwenze nao ndipo lomba musangalala kucita nchito iyi. Mosakaikila, Yehova okuyavyani soti m’njila ziyakine. Mwacisanzo, okuyavyani kunkhala wodekha mukakumana na ŵanthu osusha mu utumiki. Okuyavyani soti kukumbukila lemba yamene ingakatizhyane na cosoŵa ca mwineco wa ng’anda. Ndipo okuyavyani kuti mupitilizhye kulalikila olo kuti ŵanthu omvwishila lini uthenga wanu.—Yer. 20:7-9.

6. Kansi maphunzilo yakutipasa Yehova yoonesha tyani kuti ni wabwino?

⁶ Yehova wationesha soti ubwino wake mwa kutiphunzisa zatingacite kuti ulaliki wasu ukofwika ŵanthu pa mtima. (Yoh. 6:45) Pa misonkhano ya mkati mwa wiki, tunkhala na mwai womvwishila visanzo va ulaliki. Ndipo tulimbikishiwa kuseŵenzesha visanzo vamene ivi mu utumiki. Nthawi ziyakine tingoona monga tingakwanishe lini kuseŵenzesha njila zalomba mu utumiki. Koma ngati tingacite khama kuseŵenzesha njila izi, niye patingaone kuti ni zoyavya ngako m’gao yasu. Pa misonkhano yasu, tulimbikishiwa kuyesako njila zosiyanasiyana za ulaliki. Izi zingayangizhyilepo kuyotumikila ku malo kwamene kufunika ofalisa anyinji. Olo kuti tingafunike kucinja zinthu ziyakine pa umoyo kuti tikwanishe kucita izi, Yehova angatidalise ngako. Lomba, tiyeni tilaŵizhyane madaliso yatingapeze ngati tuyesayesa kuseŵenzesha njila zalomba za ulaliki mosasamala kanthu kuti zinthu zili tyani pa umoyo wasu. Pavuli pake, tilaŵizhyane zatingacite kuti tiyangizhyile utumiki wasu.

7. Kansi tingapeze madaliso otyani ngati tingayangizhyile utumiki wasu?

⁷ Tunkhala pa ushamwali wotang’a na Yehova. Ganizilani cisanzo ca mkwasu Samuel, * wamene ni mkulu ndipo otumikila ku Colombia pamozi na mkazi wake. Ove enzosangalala kucita upainiya mumpingo mwao. Koma eganizila zoyangizhyila utumiki wao mwa kuyotumikila ku mpingo kwamene kufunika ofalisa anyinji. Kuti akwanilishe colinga ici, enzofunikila kucinja zinthu ziyakine pa umoyo. Mkwasu Samuel elaŵila kuti: “Pofuna kuseŵenzesha malangizo a pa Mateyu 6:33, tegwilizana kuti tileke kugula zinthu zamene tenzoona kuti zenze lini zofunika ngako. Koma cenze covuta kuti tisiye ng’anda yasu cifukwa tenzoikonda ndipo yenze yemangiwa m’njila yetenzofuna.” Peciluta kuyotumikila ku mpingo kwamene kwenzofunika ofalisa anyinji, edabwa kuona kuti enzoseŵenzesha ndalama zitontho polinganizhya na zeenzoseŵenzesha peenze akali ku mpingo kwao. Mkwasu uyu epitilizhya kulaŵila kuti: “Taona mwamene Yehova otisogolelela noyankha mapemphelo ŵasu. Taona soti umboni wakuti otikonda ngako ndipo oticilikiza m’njila yamene tenzoiyembekezela lini.” Kansi namwe mungakwanishe kucinja zinthu pa umoyo wanu kuti muyangizhyile utumiki wanu? Ngati mungacite izi, munkhale pa  ushamwali wotang’a na Yehova ndipo akokupasani zofunikila pa umoyo.—Sal. 18:25.

8. Kansi mwaphunzilapo cinji pa cisanzo ca mkwasu Ivan na kalongosi Viktoria?

⁸ Tupeza cimwemwe pa utumiki wasu. Ganizilani cisanzo ca mkwasu Ivan na mkazi wake Viktoria amene otumikila monga apainiya ku Kyrgyzstan. Monga banja, eganiza zonkhala umoyo wosalila zinyinji kuti aciteko mautumiki ayakine, kuyangizhyilapo nchito za cimango. Mkwasu Ivan elaŵila kuti: “Tenzoseŵenza mwakhama nchito iliyonse yatapasiwa. Olo kuti tenzoŵeŵa pavuli poseŵenza kwa siku yonse, tenzonkhala acimwemwe koma soti okhutila poziŵa kuti taseŵenzesha mphamvu na nthawi yasu potumikila Yehova. Kuyangizhyila apo, tesangalala ngako cifukwa tepeza ashamwali anyinji koma soti zokumana nazo zosaluŵika.”—Mko. 10:29, 30.

9. Kansi kalongosi muyakine ecitanji kuti ayangizhyile utumiki olo kuti okumana na mavuto, ndipo pankhala zofumapo zotyani?

⁹ Tingapeze cimwemwe mu utumiki wasu olo kuti tukumana na mavuto osiyanasiyana. Ganizilani cisanzo ca kalongosi Mirreh wamene ni wacikulile ndipo onkhala ku West Africa. Yove enzoseŵenza nchito ya udokota ndipo eyamba upainiya pavuli pakuti wacita lithaya. Kalongosi uyu ali na vuto ya mendo cakuti okwanisha tyala kucita ulaliki wa ng’anda na ng’anda kwa ola imozi. Koma okwanisha kucita ulaliki wa patuŵa kwa maola anyinji. Ndipo ocita maulwendo owelelako nosogoza maphunzilo poseŵenzesha foni. Kansi n’cinji cemulimbikisha kuti akocita zinyinji potumikila Yehova? Yove elaŵila kuti: “Nukonda ngako Yehova na Yesu. Ndipo nthawi zonse nusenga Yehova kuti akoniyavya kucita zinyinji pomutumikila.”—Mat. 22:36, 37.

10. Molingana na 1 Petulo 5:10, kansi ŵala amene oyesayesa kuyangizhyila utumiki olandila madaliso otyani?

¹⁰ Tulandila maphunzilo oyangizhyilika kufumila kwa Yehova. Mkwasu Kenny wamene otumikila monga mpainiya ku Mauritius eona umboni wakuti mfundo iyi ni yacendi. Peciphunzila cendi, eleka maphunzilo a ku yuniveziti. Pavuli pake ebatizika noyamba utumiki wanthawi zonse. Yove elaŵila kuti, “Nuyesayesa kutolela mzimu wozipeleka wa mneneli Yesaya, wamene elaŵila kuti: ‘Neo nilipo. Nitumeni.’” (Yes. 6:8) Mkwasu Kenny eyavyako pa nchito za cimango zosiyanasiyana koma soti pa nchito yomasulila zofalisa m’cilaŵilo cao. Yove elaŵila kuti: “Maphunzilo yenelandila yeniyavya kuti nikwanilishe mautumiki ŵangu.” Koma ephunzila zinyinji kuyangizhyila pa zeenzofunika kucita kuti akwanilishe utumiki wake. Yove epitilizhya kulaŵila kuti: “Nezindikila kuti pali zinthu ziyakine zamene ningakwanishe lini kucita na kuti nenzofunikila kukulisha minkhalidwe iyakine kuti nikokondwelesha Yehova.” (Ŵelengani 1 Petulo 5:10.) Payakine namwe mungacinjeko mbali ziyakine pa umoyo wanu nozipeleka kuti Yehova akupaseni maphunzilo oyangizhyilika.

11. Kansi azilongosi ayakine a ku South Korea ecitanji kuti akotolako mbali pa nchito yolalikila, ndipo penkhala zofumapo zotyani? (Onani cithunzithunzi pacikuto.)

¹¹ Olo ŵala amene atumikila Yehova kwa nthawi itali angafunike kuphunzila mocitila njila iyakine ya ulaliki. Pa nthawi ya mlili wa COVID-19, akulu a mumpingo uyakine wa ku South Korea elaŵila kuti: “Ofalisa ayakine amene enzoona monga angakwanishe lini kutolako mbali pa nchito yolalikila cifukwa ca thanzi, lomba olalikila kupitila pa mavidyokonfalensi. Azilongosi atatu a m’vyaka va m’ma 80, aphunzila mwaangacitile ulaliki uyu poseŵenzesha kompyuta ndipo ocita izi pafupifupi siku iliyonse.” (Sal. 92:14, 15) Kansi mungakonde kuyangizhyila utumiki kuti muone ubwino wa Yehova? Onani ziyakine mwa zinthu zamungacite kuti mukwanilishe colinga ici.

12. Kansi Yehova oŵalonjeza cinji ŵala amene omudalila?

¹² Mukodalila Yehova. Yove otilonjeza kuti atidalise ngati tumudalila nocita zonse zatingakwanishe pomutumikila. (Mal. 3:10) Kalongosi Fabiola wa ku Colombia eona kukwanilishiwa kwa lonjezo iyi. Pavuli pakuti wabatizika, enzofuna kuyamba upainiya wanthawi zonse. Koma enzofunikila kuseŵenza kuti akopeza zofunikila za banja yake. Peenze pafupi kucita lithaya, epemphela kwa Yehova kuti amuyavye. Yove elaŵila kuti: “Kanyinji-kanyinji zutola nthawi itali kuti munthu ayambe kulandila ndalama za penshoni. Koma neo neyamba kulandila pavuli tyala pa mwezi umozi kufumila penecita lithaya. Nenzoyembekezela lini kuti zingankhale tetyo.” Pavuli pa miyezi iŵili eyamba kucita upainiya wanthawi zonse. Lomba ali na vyaka va m’ma 70 ndipo wankhala ocita upainiya kwa vyaka vopitilila 20. Kufumila peciyamba upainiya, wayavya ŵanthu okwanila 8 kuphunzila cendi nobatizika. Yove elaŵila kuti: “Olo kuti nthawi ziyakine nukumvwa kufooka, Yehova oniyavya kuti nipitilizhye kucita upainiya.”

13-14. Kansi ni visanzo votyani vamene vingatiyavye kudalila Yehova noyangizhyila utumiki?

¹³ Mukophunzilapo kanthu pa visanzo va ŵanthu amene edalila Yehova. M’Baibo muli visanzo vinyinji va ŵanthu amene ezipeleka potumikila Yehova. Visanzo ivi vuonesha kuti Yehova eŵadalisa pavuli pakuti ove aonesha kuti omudalila. Mwacisanzo, Yehova edalisa Abulahamu pavuli pakuti wacoka mumzinda wa Uri “olo kuti enzoziŵa lini kweenzokuya.” (Aheb. 11:8) Yakobo elandila madaliso  apadela pavuli pakuti walimbana na mngelo. (Gen. 32:24-30) Aisiraeli peenze pafupi kuloŵa m’calo colonjezewa, ekwanisha kutauka m’mana wa Yorodano pavuli pakuti ansembe akanda manzi a mu m’mana wamene uyu.—Yos. 3:14-16.

¹⁴ Tingaphunzile soti zinyinji kufumila kuli Akhristu a masiku ŵano amene oonesha kuti odalila Yehova mwa kuyangizhyila utumiki wao. Mwacisanzo, mkwasu Payton na mkazi wake Diana enzosangalala kuŵelenga visanzo va akwasu na azilongosi amene eyangizhyila utumiki wao. Nkhani izi zupezeka pa mbali yakuti “Anadzipereka ndi Mtima Wonse.” * Mkwasu Payton elaŵila kuti: “Petenzoŵelenga nkhani izi, zenze monga tuona munthu wamene akulya cakulya ciweme. Kuŵelenga nkhani izi kwenzoticitisha kufuna kuti ‘tilaŵe noona kuti Yehova ni wabwino.’” Pavuli pake, mkwasu Payton na kalongosi Diana eciyotumikila kudela kwamene kufunika ofalisa anyinji. Kansi mweŵelengako kale nkhani izi olo kuonelelako mavidyo ya Cizungu yakuti Witnessing in Isolated Territory—Australia na yakuti Witnessing in Isolated Territory—Ireland yamene yopezeka pa jw.org? Nkhani izi na mavidyo aŵa zingakuyavyeni kuti muyangizhyile utumiki wanu.

15. Kansi kunkhala na ashamwali aweme kungatiyavye tyani?

¹⁵ Mukosankha ashamwali aweme. N’zosavuta kuyamba kulya cakulya camene tikaliyolyapo ngati tukondana na ŵanthu amene ocikonda. Molingana na izi, ngati tukatizhyana na ŵanthu amene oika Yehova pa malo oyamba mu umoyo wao, zingatiyavye kuti tiyangizhyile utumiki wasu. Izi niye zecitika kuli mkwasu Kent na mkazi wake Veronica. Mkwasu Kent elaŵila kuti: “Abanja ŵasu na ayasu enzotilimbikisha kuti tiyangizhyile utumiki wasu. Tezindikila kuti ngati tukatizhyana na ŵanthu amene oika Ufumu wa Mulungu pamalo oyamba, zingaticitishe kucita cimozimozi.” Lomba mkwasu Kent na mkazi wake otumikila monga apainiya apadela ku Serbia.

16. Molingana na fanizo ya Yesu yopezeka pa Luka 12:16-21, ndaŵa yanji tufunika kunkhala okonzeka kuzitana vinthu viyakine?

¹⁶ Mukozitana vinthu viyakine kuti mutumikile Yehova. Izi zutanthauza lini kuti tufunika kupewa kunkhala na vinthu vilivonse vamene vingatipangishe kunkhala osangalala. (Mla. 5:19, 20) Koma ngati tingakangiwe kutumikila Yehova, tyala cifukwa cakuti tufuna lini kucinja zinthu ziyakine pa umoyo wasu, tingankhale monga munthu wa m’fanizo ya Yesu wamene ecita khama kupeza cuma, koma enyalanyaza kutumikila Mulungu. (Ŵelengani Luka 12:16-21.) Mkwasu Christian wamene onkhala ku France, elaŵila kuti: “Nenzocita lini zinyinji potumikila Yehova olo kusamalila banja yangu.” Pavuli pake, yove na mkazi wake eganiza zoyamba upainiya. Koma kuti akwanilishe colinga ici, onse aŵili enzofunikila kuleka nchito. Tetyo, kuti akopeza zofunikila za pa umoyo, eyamba kucita bizinesi ndipo enzonkhala okhutila na ndalama zitontho zeenzopeza. Kansi epeza madaliso otyani cifukwa cocinja zinthu ziyakine pa umoyo wao? Mkwasu Christian elaŵila kuti: “Lomba tusangalala ngako na utumiki kupambana mwetenzocitila kale. Ndipo n’zosangalasa ngako kuona cimwemwe cakuonesha ŵanthu ŵatuphunzila nao Baibo akaphunzila za Yehova.”

17. N’cinji cingatikangishe kuyesako njila zosiyanasiyana za ulaliki?

¹⁷ Mukoyesako njila zosiyanasiyana zolalikilila. (Mac. 17:16, 17; 20:20, 21) Cifukwa ca mlili wa COVID-19, kalongosi Shirley wamene ni mpainiya ku United States, enzofunika kucinja njila yolalikilila. Poyamba yove enzoona kuti angakwanishe lini kucita ulaliki wa  pa foni. Koma woyanganila dela pecitandalila mpingo wao, eŵaphunzisa mwangacitile ulaliki uyu. Yove elaŵila kuti: “Poyamba nenzoona monga ningakwanishe lini. Koma lomba nusangalala ngako pocita ulaliki uyu. Tulalikila ŵanthu anyinji kupambana mwetenzocitila petenzocita ulaliki wa ng’anda na ng’anda.”

18. Kansi n’cinji cingatiyavye kugonjesa mavuto yamene yangatikangishe kuyangizhyila utumiki wasu?

¹⁸ Mukopanga zolinga noyesayesa kuzikwanilisha. Ngati takumana na mavuto, tufunika kusenga Yehova kuti atiyavye noganizila zatingacite kuti tiyagonjese. (Miy. 3:21) Kalongosi Sonia wamene ni mpainiya wanthawi zonse, ndipo otumikila m’kagulu ka Ciromani ku Europe, elaŵila kuti: “Nulemba zolinga zangu pa pepa, ndipo nuika pepa yamene iyo pa malo oonekela. Pa thebo yangu neikapo cithunzithunzi camene cuonesha njila ziŵili zamene zukuya ku malo osiyana. Ngati nufuna kupanga cosankha, nulolesha pa njila zamene izi noganizila ngati cosankha caningapange, cinganiyavye kukwanilisha colinga cangu olo yai.” Kalongosi Sonia oyesayesa kuona mavuto yakukumana nayo moyenelela. Yove epitilizhya kulaŵila kuti: “Ngati nakumana na vuto, cili kuli neo kuona vuto yamene iyo monga ni cipupa camene cinganikangishe kukwanilisha colinga cangu, olo monga ni biliji yamene inganiyavye kuti nicikwanilishe.”

19. Kansi tingaoneshe tyani kuti tuyamikila madaliso yakutipasa Yehova?

¹⁹ Yehova otidalisa m’njila zosiyanasiyana. Tingaoneshe kuti tuyamikila madaliso yakutipasa mwa kucita ciliconse catingakwanishe pomutumikila. (Aheb. 13:15) Tingacite izi ngati tuyesayesa kuyangizhyila utumiki wasu mwa kuyesako njila zosiyanasiyana zocitila ulaliki. Izi zingacitishe kuti Yehova atidalise m’njila yamene tenzoiyembekezela lini. Tetyo, siku iliyonse tikoyesayesa kupeza njila zamene zingatiyavye kuti ‘tilaŵe noona kuti Yehova ni wabwino.’ Ngati tucita izi, tikotolela cisanzo ca Yesu wamene elaŵila kuti: “Cakulya cangu ni kucita cifunilo ca wala wamene enituma nosilizhya nchito yake.”—Yoh. 4:34.