1-2. Mokatijana na Salimo 34:8, kansi tingachite tyani kuti tilaule ubwino wa Yehova?

YELEKEZELANI kuti munthu muyakine wakupasani chakulya chamene mukaliye chilyapo. Mwewo mungakwanishe kuziŵa vinyinji vokhuza chakulya chamene icho mwa kungochilola, kuchinunsha, kuziŵa vinthu viyakine vaikako komasoti kukonsha ŵanthu ayakine amene ochiziŵa. Koma njila iweme yoziŵila mwachuwamila chakulya chamene icho ni kuchilaula mphela.

² Molingana na vamene ivi, tingakwanishe kuphunzila za ubwino wa Yehova poŵelenga Baibolo, mabuku ŵasu olosoti pomvwishila ŵanthu ayakine pakufotokoza madaliso ŵapasiwa na Yehova. Olo n’tetyo, tumvwisha ubwino wa Yehova ‘tikalaula’ seka ubwino wake wamene uyo. (Ŵelengani Salimo 34:8.) Tiyeni tonse tiwone chisanzo cha mwatingachitile vamene ivi. Tiyelekezele kuti tufuna kuchita utumiki uyakine wa nthawe zonse, koma kuti tikwanilishe cholinga chamene ichi tufunika kuchinja vinthu viyakine pa moyo wasu. Vingachitike kuti tankhala tuŵelengapo vokhuza lonjezo ya Yesu yakuti keno tuika vinthu vokhuza Ufumu pa malo oyamba, Yehova azatipase vatufunikila. (Mt. 6:33) Koma sewo paseka, tikaliyewonapo kukwanilishiwa kwa lonjezo yamene iyi. Olo n’tetyo, pokhulupilila lonjezo ya Yesu yamene iyi, tachefya vinthu vatugula komasoti nthawe yatukata ntchito na cholinga chakuti tikochita vinyinji pa ntchito yolalikila. Patuchita vamene ivi tufwika powona seka kuti Yehova otipasa chendi vinthu vatufunikila. Vikachitika tetyo tunkhala kuti ‘talaula’ seka ubwino wa Yehova.

3. Mokatijana na Salimo 16:1, 2, kansi niŵani osangalala na ubwino wa Yehova?

³ Yehova ni muweme, kapena kuti, “owamila ntima aliyense” kupamikijapo ŵala asamuziŵa. (Sal. 145:9; Mt. 5:45) Olo n’tetyo, yove opeleka madaliso anyinji kuli ŵanthu amene omukonda komasoti  kumutumikila na ntima wonse. (Ŵelengani Salimo 16:1, 2.) Tiyeni tiwone vinthu viyakine viweme vakutichitila Yehova.

4. Kansi Yehova owonesha tyani ubwino wake kuli ŵanthu amene ayamba kunkhala naye pa ushamwali?

⁴ Nthawe iliyonse yataphunzila komasoti kukatishila ntchito vataphunzila vokhuza Yehova, tuwona ubwino wa vamene ivo pa moyo wasu. Petiyamba kuphunzia vokhuza yove komasoti kumukonda etiyavya kusiya maganizo ophoniyeka komasoti minkhalidwe yasakondwela nayo. (Akol. 1:21) Ndipo petilipeleka nobatiziwa, tiyamba kuwona ubwino wake moyangijilika pechitipasa chikumbuntima chiweme komasoti kutiyavya kuti tinkhale naye pa ushamwali wotang’a.—1 Pet. 3:21.

5. Kansi tuuwona tyani ubwino wa Yehova tikokata ntchito yolalikila?

⁵ Tupitilija kuwona ubwino wa Yehova tikokata ntchito yolalikila. Kansi mwewo nimwe munthu wa nsoni? Atumiki ayakinesoti anyinji a Yehova ni a nsoni. Payakine mukaliyenkhala ntumiki wa Yehova, mwenzeganizilakolini kuti nsiku iyakine mukagogoze pamulyango wa munthu wamusaziŵa nomufotokozela uthenga wa m’Baibolo. Koma masiku ŵano muchita vamene ivi nthawe zonse. Ndipo Yehova wakuyavyani kuti mukosangalala ngako pamukata ntchito yolalikila. Payakine mwawona kuti yove wakuyavyanisoti mu njila ziyakine. Wakuyavyani kuti mukoukata ntima mukakumana na oshusha, mukokumbukila lemba yoyenelela yakuti mukambilane na munthu wamene wawonesha chidwi komasoti wakupasani mphamvu kuti mupitilije mphela kulalikila, olo pa nthawe yamwakumana na ŵanthu amene ofunalini kumvwishila.—Yer. 20:7-9.

6. Kansi maphunzilo ŵakutipasa Yehova owonesha tyani kuti yove ni muweme?

⁶ Yehova otiwoneshasoti ubwino wake potiphunzisa mwatingakatile ntchito yolalikila. (Yoh. 6:45) Pamisonkhano ya nkati mwa sondo tumvwishila visanzo va ulaliki vokonzewa luweme ndipo tulimbikisiwa kuvikatishila ntchito tikolalikila. Poyamba payakine tingochita wowa kuti tiyeselele vinthu vanyowani. Koma tikokatishila ntchito malangizo amene awo, tingayambe kuwona kuti uthenga wasu uŵafwika pantima ŵanthu am’gawo yasu. Pamisonkhano ya mpingo komasoti yachigawo, tulimbikisiwasoti kuti tukoyeja-yeja kukatishila ntchito njila ziyakine zolalikilila zamene tikaliye ziyesapo. Vamene ivisoti vingatichitishe kunkhala na nkhaŵa. Olo n’tetyo, keno tuvichita, Yehova otidalisa. Lomba tiyeni tikambilane ayakine mwa madaliso ŵatufwana chifukwa choyeja kukatishila ntchito njila zanyowani potumikila Yehova, viliyekanthu kuti vinthu vili tyani pa moyo wasu. Pavuli pake tikambilane njila ziyakinesoti zatingayangijilile utumiki wasu.

7. Kansi tufwana madaliso otyani tikochita khama poyangijila utumiki wasu?

⁷ Tunkhala pa ushamwali wotang’a ngako na Yehova. Ganizilani vichitikila nkulu muyakine zina yake Samuel, * wamene otumikila ku Colombia pamozi na nkazi wake. Banja yamene iyi yenzesangalala kuchita upainiya mumpingo wakwawo. Olo n’tetyo, ove enzefuna kuyangijila utumiki wawo mwa kuyayavya mpingo uyakine kwamene kwenzefunikila ofalisa anyinji. Kuti akwanilishe cholinga chamene ichi, ove enzefunikila kuchinja vinthu viyakine pa moyo wawo. Samuel enena kuti: “Poganizila mawu ali pa Mateyu 6:33, tileka kugula vinthu viyakine vosafunika. Koma chovuta ngako chenze kufuluka m’ng’anda yasu. Ng’anda yamene iyi tenzeikonda chifukwa imangiwa mu njila yetenzefuna sewo ndipo tenzeve nkhongole iliyonse yokhuza ng’anda yamene iyi.” Ove pechiyamba utumiki wanyowani wamene uyu, ewona kuti enzekatishila ntchito ndalama zitontho ngako polinganija na zenzekatishila ntchito kuvuli. Samuel  enenasoti kuti: “Tawona Yehova otisogolela komasoti kuyankha mapemphelo ŵasu. Palipano taziŵa kuti Yehova otikonda ngako kupambana mwetenzewonela kuvuli. Kansi mwewo namwe mungayangijile vochita pa utumiki wanu? Keno n’tetyo, ziŵani kuti munkhale pa ushamwali wotang’a ngako na Yehova ndipo yove akusamalileni.—Sal. 18:25.

8. Kansi tingaphunzilepo chinji pa vechinena Ivan na Viktoria?

⁸ Tusangalala na utumiki wasu. Onani vechinena Ivan na Viktoria, banja yamene yuchita upainiya ku Kyrgyzstan. Ove echinja vinthu viyakine pa moyo wawo na cholinga chakuti alipeleke pochita utumiki uliwonse, kupamikijapo wa zomanga-manga. Ivan enena kuti: “Tenzekata ntchito iliyonse mwakhama. Olo kuti tenzenkhala oŵeŵa kumapeto kwa nsiku, tenzenkhala na ntendele wamuntima komasoti okhutila poziŵa kuti takatishila ntchito mphamvu zasu pa ntchito za Ufumu. Tenzesangalalasoti chifukwa tifwana ayasu anyowani ndipo tenze na vinthu vinyinji viweme vamene tenzevikumbukila.”—Mk. 10:29, 30.

9. Kansi mulongo muyakine wamene ekumana na mavuto osiyana-siyana echita chinji kuti ayangijile utumiki wake, ndipo enkhala na vokonkhapo votyani?

⁹ Tingonkhala osangalala potumikila Yehova olo kuti tukumana na mavuto. Mwachisanzo, mulongo muyakine wachikulile komasoti wamasiye waku West Africa, zina yake Mirreh, eyamba upainiya pechipumula pa ntchito yake ya udokota. Palipano Mirreh ovutika na nyamakazi ndipo akungolalikila tyala kwa ola imozi akolalikila ku ng’anda na ng’anda. Komalomba, yove okwanisha kulalikila kwa nthawe itali akolalikila mmalo opezeka ŵanthu anyinji. Yove ali na maulwendo oweleja komasoti maphunzilo anyinji ndipo ayakine mwa ŵanthu amene awo okambilana nawo kupitila pa foni. Kansi n’chinji chimutang’isha Mirreh kuti akochita vinyinji potumikila Yehova? Yove enena kuti: “Newo nukonda ngako Yehova pamozi na Khilisitu Yesu ndipo nthawe zonse nusenga Yehova kuti akoniyavya kuchita vinyinji pomutumikila.”—Mt. 22:36, 37.

10. Mokatijana na lemba ya 1 Petulo 5:10, kansi Yehova oŵachitila votyani ŵanthu amene oyangijila vochita pomutumikila?

¹⁰ Tulondela maphunzilo oyangijilika kufumila kwa Yehova. Kenny, wamene ni mpainiya ku Mauritius, ewona kuti vamene ivi ni vachendi. Pechiphunzila choonadi eleka maphunzilo aku yunivesiti nobatiziŵa ndipo pavuli pake eyamba utumiki wa nthawe zonse. Yove enena kuti, “Nuyeja-yeja kutolela chisanzo cha mneneri Yesaya, wamene enena kuti: ‘Newo nilipo! Nitumijeni.’” (Yes. 6:8) Yove wayavyako pa ntchito zosiyana-siyana zomanga-manga komasoti kumasulila mabuku ofotokoza Baibolo mu chilaŵilo chake. Kenny enena kuti: “Newo nilondela maphunzilo amene eniyavya kunkhala na luso yenenzefunikila pa mautumiki osiyana-siyana.” Koma yove ephunzila vinyinji osati tyala luso yokatila ntchito zamene izi. Yove enenasoti kuti: “Naziŵa vaningakwanishe na vaningalekekwanisha komasoti minkhaliwe yanufunikila kukulisha na cholinga chakuti ninkhale ntumiki muweme wa Yehova.” (Ŵelengani 1 Petulo 5:10.) Kansi muwona tyani kuganizilako mwavilili vinthu pa moyo wanu nowona keno mungalipeleke kuti mulondele maphunzilo oyangijilika kufumila kwa Yehova?

11. Kansi alongo ayakine aku South Korea echita chinji kuti akolalikila, ndipo vokonkhapo vake venze votyani? (Onani chithunzi chapachikuto.)

¹¹ A Mboni amene ankhala otumikila Yehova kwa nthawe itali, opindulasoti na maphunzilo ŵakupasiwa akoyeja kuchita utumiki wanyowani. Pa nthawe ya mulili wa COVID-19, akulu a mumpingo uyakine ku South Korea elemba kuti: “Ŵanthu ayakine amene poyamba enzeganiza kuti angakwanishelini kulalikila chifukwa cha thanzi yawo, pano patunena olalikila kupitila pa videoconference. Alongo atatu a vyaka vam’ma 80 ephunzila kukatishila ntchito vipangizo vamakono ndipo eyamba kulalikila pafupi-fupi nsiku iliyonse.” (Sal. 92:14, 15) Kansi mwewo namwe  mungakonde kuyangijila utumiki wanu kuti mulaule ubwino wa Yehova moyangijilika? Tiyeni tiwone vinthu viyakine vamungachite kuti mukwanilishe cholinga chanu.

12. Kansi Yehova olonjeza chinji kuli ŵanthu amene omudalila?

¹² Mukodalila Yehova. Yove olonjeza kuti akotipasa madaliso anyinji keno tumudalila komasoti keno tuchita vonse vatingakwanishe pomutumikila. (Mal. 3:10) Mulongo muyakine waku Colombia zina yake Fabiola, ewona mwamene Yehova mwechikwanilishila lonjezo yamene iyi pa moyo wake. Yove pechibatiziwa enzefunishisha kuchita upainiya wonkhazikika. Koma enzefunikila kukata ntchito kuti akosamalila mwanalume wake komasoti ŵana ŵake okwana atatu. Tetyo, peifwika nthawe yakuti lomba angapumule pa ntchito, epemphela ngako kwa Yehova kuti amuyavye. Yove enena kuti: “Nthawe zinyinji potola nthawe itali kuti munthu ayambe kulondela ndalama za penshoni. Koma newo niyamba kulondela ndalama zamene izi pavuli pakuti papita mwezi umozi tyala. Vamene ivi venze vodabwisa ngako! Papita miyezi iŵili, yove eyamba upainiya. Palipano yove ali na vyaka vam’ma 70 ndipo wankhala ochita upainiya kwa vyaka vopitilila 20. Pa nthawe yamene iyi, mulongo wamene uyu wayavya ŵanthu okwana 8 kuti abatiziwe. Yove enena kuti: “Olo kuti nthawe ziyakine nufoka, Yehova oniyavya nsiku zonse kuti nipitilije mphela kuchita upainiya.”

13-14. Kansi ni visanzo votyani vamene vingatiyavye kuti tikodalila Yehova nochita vinyinji pomutumikila?

¹³ Mukophunzila kufumila kuli ŵanthu amene ewonesha kudalila Yehova. M’Baibolo muli  visanzo va ŵanthu anyinji amene echita khama pomutumikila. Nthawe zinyinji, atumiki a Yehova amene aŵa, poyamba enzefunika kuchita vinthu viyakine vowonesha kuti omudalila kuti yove aŵadalise. Mwachisanzo, penze pavuli pakuti Abulahamu wafuma kwawo—“olo aliyeziŵe kwenzekuya,”—pechimudalisa Yehova. (Ahe. 11:8) Yakobo elondelasoti madaliso apadela pavuli pakuti walimbana na mngelo. (Gen. 32:24-30) Komasoti Aisiraeli pechisala patontho kuloŵa m’chalo cholonjezewa, penze pavuli pakuti ansembe akanda mu m’Mana wa Yorodano pechikwanisha kutauka ŵanthu.—Yos. 3:14-16.

¹⁴ Mungaphunzilesoti vinyinji kufumila kuli a Mboni za Yehova a masiku ŵano, amene ewonesha kudalila Yehova nolipeleka kuti achite vinyinji pomutumikila. Mwachisanzo, m’bale muyakine zina yake Payton na nkazi wake Diana, enzesangalala kuŵelenga nkhani za abale na alongo amene eyangijila vochita potumikila Yehova, monga ni abale na alongo amene afotokozewa mu nkhani zakuti, “Anadzipereka Ndi Mtima Wonse.” * Payton enena kuti: “Tikoŵelenga nkhani zamene izi, venzekungonkhala monga tuwona munthu muyakine wamene akulya chakulya chiweme. Petenzeŵelenga nkhani zamene izi, niye petenzefunishishasoti ‘kulaula’ nowona kuti Yehova ni muweme.’” Pakaliyepita nthawe Payton na Diana efulukila ku dela kwamene kwenzefunikila ofalisa anyinji a Ufumu. Kansi mwewo namwe mwiŵelengapo nkhani zamene izi? Ndipo, kansi mwilolelapo mavidiyo akuti Kulalikira M’dera Lakutali—Australia komasoti Kulalikira M’dera Lakutali M’dziko la Ireland amene opezeka pa jw.org? Mavidiyo amene aŵa angakuyavyeni kuwona vamungachite kuti muyangijile utumiki wanu.

15. Kansi kusankha azishamwali aweme kungatiyavye tyani?

¹⁵ Mukosankha azishamwali aweme. Sewo taŵanthu tufunishisha kulya chakulya chiyakine keno tukonda kutandala na ŵanthu amene okonda chakulya chamene icho. Molingana na vamene ivi, keno tukonda kutandala na ŵanthu amene owona kuti kutumikila Yehova n’kofunika ngako, sewo nase tuyamba kusakila-sakila vatingachite kuti tiyangijile vochita potumikila Mulungu. Banja iyakine, Kent na Veronica, ewona kuti vamene ivi ni vachendi. Kent enena kuti: “Ayasu komasoti achibale ŵasu etilimbikisa kuti tiyeje kuchita utumiki wanyowani. Sewo tiziŵa kuti kutandala na ŵanthu amene oika pasogolo vinthu va Ufumu niye kwitiyavya kuwona kuti tingayagijile utumiki wasu.” Palipano Kent na Veronica otumikila monga apainiya ku Serbia.

16. Mokatijana na fanizo ya Yesu yamene ili pa Luka 12:16-21, ndaŵa yanji tufunika kulitana vinthu viyakine kuti titumikile Yehova?

¹⁶ Mukololela kulitana vinthu viyakine kuti mutumikile Yehova. Tufunikalini kusiya vinthu vonse viweme kuti tikokondwelesha Yehova. (Mlal. 5:19, 20) Olo n’tetyo, keno tingakwanishelini kuchita vinyinji potumikila Yehova, payakine pofuna tyala kusalitana vinthu viyakine, tingokungophoniyesha vinthu monga ni munthu wamufanizo ya Yesu wamene echita khama kuti akonkhala na moyo wawofuwofu koma enzeganilalini za Mulungu. (Ŵelengani Luka 12:16-21.) M’bale muyakine zina yake Christian, wamene onkhala ku France, enena kuti, “Newo nenzechitalini vonse vaningakwanishe potumikila Yehova komasoti kuyavya banja yangu.” Yove na nkazi wake eganiza zoyamba upainiya. Koma kuti akwanilishe cholinga chawo chamene ichi, enzefunikila kusiya ntchito zawo. Kuti akofwana vinthu vofunika pa moyo, ove eyamba kantchito katontho kopyela m’maofesi na m’mang’anda a ŵanthu ndipo ephunzila kunkhala okhutila na vinthu vitontho venze navo. Kansi ove eyamba kusangalala chifukwa cha vamene ivo vechichita?  Christian enena kuti, “Tusangalala ngako na utumiki komasoti kuwona ophunzila Baibolo ŵasu na maulwendo oweleja ophunzila vokhuza Yehova.”

17. Kansi n’chinji chingatikangishe kuyesela njila zanyowani zolalikilila?

¹⁷ Mukonkhala ofunishisha kuyesela njila zanyowani zolalikilila. (Mac. 17:16, 17; 20:20, 21) Shirley, wamene ni mpainiya ku United States, enzefunikila kuchinja njila zolalikilila pa nthawe ya mulili wa COVID-19. Poyamba, yove enzewaya-waya kuti ayambe kulalikila pokatishila ntchito foni. Nthawe iyakine penze pa wiki yapadela, ephunzisiwa mwangachitile vamene ivi, ndipo yove eyamba kukatishila ntchito njila yamene iyi nthawe zonse. Shirley enena kuti: “Poyamba nenzechita wowa, koma palipano nusangalala kulalikila pa foni. Palipano tulalikila ŵanthu anyinji kupambana mwetenzechitila tikolalikila ku ng’anda na ng’anda!”

18. Kansi n’chinji chingatiyavye kulimbana na mavuto amene angatikangishe kuchita vinyinji pa utumiki wasu?

¹⁸ Mukoliikila cholinga noyeja-yeja kuchikwanilisha. Tikokumana na mavuto, tikosenga Yehova kuti atiyavye ndipo tikoyeja-yeja kuganizila vatingachite kuti tisilije mavuto ŵasu amene awo. (Miy. 3:21) Sonia, wamene ni mpainiya wonkhazikika ku kagulu ka chilaŵilo cha Chiromani ku Europe, enena kuti: “Newo nulemba volinga vangu pa pepa noisiya powonekela. Pa thebulu yangu nidjambulapo chithunzi cha misewu iŵili yamene yuloŵela kosiyana. Nikafuna kusankha vochita, nulolesha pa misewu yamene iyo iŵili noganizila kuti vaningasankhe vinifwikishe potyani.” Sonia oyeja-yeja kuŵawona moyenela mavuto ŵakukumana nawo. Yove enena kuti: “Chilichonse chachitika pa moyo wangu chingankhale monga ni chipupa chonichingilija kuti osati nikwanilishe volinga vangu olo payakine chingankhale monga ni bilidji yuniyavya—kuti nikwanilishe volinga vamene ivo. Vikungodalila tyala mwanuwonela vinthu.”

19. Kansi tingawoneshe tyani kuti tutembeja vinthu viweme vatipasa Yehova?

¹⁹ Yehova otidalisa mu njila zinyinji. Tingawoneshe kuti tutembeja ngako vakutichitila, pochita vonse vatingakwanishe pomutamanda. (Ahe. 13:15) Vamene ivi vupamikijapo kufwana njila zanyowani zoyangijilila utumiki wasu zamene zuchitishasoti kuti Yehova atidalise ngako. Nsiku iliyonse, tiyeni tikoyeja-yeja kufwana njila zingatiyavye kuti ‘tilaule nowona kuti Yehova ni muweme.’ Tikochita vamene ivi, tingalingane na Yesu wamene enena kuti: “Chakulya changu ni kuchita chifunilo cha wala wamene enituma nosilija ntchito yake.”—Yoh. 4:34.