1-2. Go ya ka Psalme 34:8, re ka dira’ng gore re bone gore Jehofa o lokile?

NAGANA motho yo mongwe a go fa selo se sengwe seo o sa kago wa se ja gore o se je. O ka ithuta se sengwe ka go bona gore se bogega bjang, se nkga bjang, se apeilwe bjang, se dirilwe bjang goba gore batho ba bangwe ba reng ka sona. Eupša e le gore o tsebe ge e ba o a se rata, o swanetše go se ja.

² Re ka ithuta se sengwe ka go loka ga Jehofa ge re bala Beibele, ge re bala dikgatišo tšeo di theilwego Beibeleng le ge re ekwa ba bangwe ba bolela ka ditšhegofatšo tšeo Jehofa a ba filego tšona. Eupša re tlo kwešiša gabotse gore Jehofa o lokile ge re “latswa” seo ka borena. (Bala Psalme 34:8.) A re boneng mohlala wa gore re ka dira seo bjang. A re re re nyaka go tsenela tirelo ya nako e tletšego. E le gore re fihlelele pakane yeo, re swanetše go nolofatša bophelo bja rena. Mohlomongwe re ka ba re badile gantši ka tshepišo ya Jesu ya gore ge re etiša Mmušo wa Modimo pele, Jehofa o tlo re fa dilo tše dingwe tšeo re di hlokago eupša ga se ra ka ra bona seo ka borena. (Mat. 6:33) Ge re na le tumelo tshepišong ya Jesu, re tlo nolofatša bophelo bja rena, ra fokotša nako yeo re e fetšago re le mošomong ke moka ra fetša nako e ntši re botša batho ditaba tše dibotse. Ge re dira bjalo, re tlo bona gore ruri Jehofa o hlokomela dinyakwa tša rena. Re tlo latswa go loka ga Jehofa ka borena.

3. Go ya ka Psalme 16:1, 2, ke bomang bao Jehofa a ba direlago dilo tše dibotse?

³ Jehofa o bontšha gore o ‘lokile go bohle,’ gaešita le go batho bao ba sa mo tsebego. (Ps. 145:9; Mat. 5:45) Eupša dilo tše dibotse o di direla kudu bao ba mo ratago e bile ba dirago sohle gore ba mo hlankele. (Bala Psalme 16:1, 2.) A re boledišaneng ka dilo tše dingwe tše dibotse tšeo Jehofa a re direlago tšona.

4. Jehofa o bontšha bjang batho bao ba thomago go ba le segwera le yena gore o lokile?

⁴ Nako e nngwe le e nngwe ge re diriša seo re ithutago sona ka  Jehofa, re kgona go bona kamoo se re holago ka gona. Ge re be re ithuta ka yena e bile re thoma go mo rata, o ile a re thuša gore re tlogele go nagana le go dira dilo tšeo di bego di dira gore re se ke ra gwerana le yena. (Bakol. 1:21) Le gona ge re be re ineela go Jehofa e bile re kolobetšwa, re ile ra kgona go bona kudu gore o lokile, ge a be a re nea letswalo le lebotse e bile a dira gore re be le segwera se sebotse le yena.—1 Pet. 3:21.

5. Re bona bjang go loka ga Jehofa ge re le tšhemong?

⁵ Re dula re bona go loka ga Jehofa ge re le tšhemong. Na o na le dihlong? Bahlanka ba Jehofa ba bantši ba na le tšona. Mohlomongwe pele o e ba Hlatse ya Jehofa, ga se wa ka wa ipona o kokota lapeng la motho yo o sa mo tsebego o bolela le yena ka molaetša wa ka Beibeleng. Eupša lehono o dira seo mo e ka bago letšatši le lengwe le le lengwe. Jehofa o go thušitše gore o thabele go boledišana le batho ka Beibele. Le gona o go thušitše ka ditsela tše dingwe tše dintši. O go thušitše gore o dule o išitše maswafo fase ge motho yo mongwe a go ganetša ge o le tšhemong le gore o gopole lengwalo leo le sepedišanago le maemo a mong wa ntlo. Le gona o go thušitše gore o be le matla a go tšwela pele o bolela ditaba tše dibotse le ge batho ba sa nyake go theetša molaetša woo o ba botšago ona.—Jer. 20:7-9.

6. Tlwaetšo yeo Jehofa a re fago yona e bontšha bjang gore o lokile?

⁶ Jehofa o re bontšhitše gape gore o lokile ka gore a re tlwaetše go bolela ditaba tše dibotse. (Joh. 6:45) Dibokeng tša gare ga beke re theetša dipoledišano tša mohlala, gomme re kgothaletšwa gore re diriše mehlala yeo ge re botša batho ditaba tše dibotse. Mathomong re ka ikwa re tšhaba go diriša mehlala ye eupša ge re ka thoma go e diriša, mohlomongwe e ka kgoma dipelo tša batho bao re bolelago le bona. Le gona dibokeng le dikopanong re kgothaletšwa gore ge re bolela le batho ditaba tše dibotse re diriše mekgwa ya go fapafapana yeo re sa kago ra e leka. Le yona mekgwa ye e ka dira gore re ikwe re tšhoga. Eupša ge re ka leka go e diriša, Jehofa o tla re šegofatša. Ga bjale a re kweng tše dingwe tša dilo tše dibotse tšeo Jehofa a tlago go re direla tšona ge e ba re leka ka thata go diriša mekgwa yeo re bego re sa e diriše. O tla re direla dilo tšeo go sa šetšwe maemo a rena. Ke moka re tlo kwa gore re ka dira eng gore re fihlelele dipakane tša rena.

7. Re hwetša ditšhegofatšo dife ge e ba re dira sohle seo re ka se kgonago go oketša nako yeo re e fetšago re hlankela Jehofa?

⁷ Re ba le segwera se sebotse kudu le Jehofa. Nagana ka mohlala wa Samuel * yo e lego mogolo yoo a hlankelago le mosadi wa gagwe kua Colombia. Banyalani ba ba be ba thabela go bula madibogo phuthegong ya gabo bona. Eupša ba be ba nyaka go oketša nako yeo ba bego ba e fetša ba hlankela Jehofa ka go thuša phuthego e nngwe yeo e bego e na le tlhokagalo e kgolo. E le gore ba fihlelele pakane yeo ba ile ba swanelwa ke go tlogela go dira tše dingwe tša dilo tšeo ba bego ba di rata. Samuel o re: “Re ile ra diriša Mateo 6:33 gomme ra tlogela go reka dilo tšeo re bego re sa di hloke. Eupša selo se sethata kudu e be e le go tšwa ka ntlong ya rena. E be e agilwe ka tsela yeo re bego re nyaka ka yona e bile re be re sa patele rente.” Ge banyalani bao ba be ba fihla phuthegong yeo ba bego ba hudugetše go yona, ba ile ba bona gore ba be ba hloka tšhelete e nyenyane kudu gore ba kgone go itlhokomela. Samuel o re: “Re bone kamoo Jehofa a re hlahlago ka gona le go araba dithapelo tša rena. Gona bjale re kgona go bona go feta le ge e le neng pele gore Jehofa o a re amogela e bile o a re rata.” Na o ka kgona go oketša nako yeo o e fetšago o hlankela Jehofa? Ge e ba go le bjalo, kgodišega gore o tlo ba le segwera  sa kgauswi kudu le yena e bile o tlo go hlokomela.—Ps. 18:25.

8. O ithuta’ng go seo se boletšwego ke Ivan le Viktoria?

⁸ Re thabišwa ke go hlankela Jehofa. A re kweng seo se boletšwego ke Ivan le Viktoria, e lego banyalani bao ba bulago madibogo kua Kyrgyzstan. Ba ile ba nolofatša maphelo a bona gore ba ithaopele kabelo e nngwe le e nngwe go akaretše le go aga meago ya mokgatlo. Ivan o re: “Re be re dula re šoma ka thata kabelong e nngwe le e nngwe. Le ge re be re lapile mafelelong a letšatši, re be re na le khutšo e bile re thabile ka ge re tseba gore re dirišitše matla a rena tirelong ya Jehofa. Le gona re thabišitšwe kudu ke gore re hweditše bagwera ba bafsa le gore re dirile dilo tše di kgahlišago le bona.”—Mar. 10:29, 30.

9. Kgaetšedi yo a nago le mathata a magolo o ile a dira’ng gore a oketše nako yeo a e fetšago a hlankela Jehofa, gona mafelelo e bile afe?

⁹ Re thabela go hlankela Jehofa le ge re na le mathata a magolo. Ka mohlala, Mirreh yoo e lego mohlologadi wa kua Bodikela bja Afrika e be e le ngaka, gomme ka morago ga gore a tšwe phenšene o ile a thoma go bula madibogo. O na le bolwetši bja marapo bjoo bo mo dirago gore a thatafalelwe ke go sepela, gomme ge a le tšhemong ka ntlo le ntlo o kgona go šoma iri e tee feela. Eupša o kgona go šoma nako e telele ge a ruta batho ditaba tše dibotse a diriša teroli. O na le batho ba bantši bao a ithutago Beibele le bona le go boela go bona, gomme ba bangwe ba bona o ithuta le bona ka founo. Ke’ng seo se ilego sa dira gore Mirreh a nyake go oketša nako yeo a e fetšago a hlankela Jehofa? O re: “Ke rata Jehofa le Kriste Jesu kudu. Ke dula ke rapela Jehofa gore a nthuše gore ke dire sohle seo nka se kgonago go mo hlankela.”—Mat. 22:36, 37.

10. Go ya ka Petro wa Pele 5:10, Jehofa o tla nea eng bao ba oketšago nako yeo ba e fetšago ba mo hlankela?

¹⁰ Re hwetša tlwaetšo e oketšegilego ka mokgatlong wa Jehofa. Kenny yoo e lego mmulamadibogo kua Mauritius o ile a bona gore seo ke nnete. Ka morago ga gore a ithute therešo, o ile a tlogela go tsena yunibesithi, a kolobetšwa ke moka a thoma go ba mmulamadibogo wa ka mehla. O re: “Ke leka go ekiša mantšu a moporofeta Jesaya yoo a ilego a re: ‘Ke nna yo! Roma nna!’” (Jes. 6:8) Kenny o šomile mafelong a mmalwa moo go bego go agiwa meago ya mokgatlo. Le gona o thušitše go fetolela dikgatišo tšeo di theilwego Beibeleng ka segagabo. Kenny o re: “Ke ile ka hwetša tlwaetšo ya go nthuta go ba le bokgoni bjoo ke bego ke bo hloka gore ke kgone go dira dikabelo tša ka.” Eupša ga se a no ithuta feela go dira mešomo yeo. O re: “Ke ile ka ithuta le gore ke dilo dife tšeo ke sa kgonego go di dira le gore ke dika dife tšeo ke swanetšego go ba le tšona e le gore ke kgone go hlankela Jehofa gakaone.” (Bala 1 Petro 5:10.) Ke ka baka la’ng o sa lebeledišiše maemo a gago go bona ge e ba o ka kgona go hwetša tlwaetšo e oketšegilego ka mokgatlong wa Jehofa?

11. Dikgaetšedi tše dingwe tša kua Korea Borwa di ile tša dira maiteko afe e le gore di kgone go botša batho ditaba tše dibotse, gona di bile le mafelelo afe? (Bona seswantšho sa letlakala la ka ntle.)

¹¹ Batho bao e lego kgale e le Dihlatse tša Jehofa le bona ba a holega ge ba tlwaetšwa go diriša mekgwa e mefsa ya go bolela ditaba tše dibotse. Nakong ya bolwetši bja Corona, bagolo ba phuthego e nngwe ya kua Korea Borwa ba ngwadile gore: “Batho bao ba bego ba sa kgone go ya tšhemong gantši ka baka la ge ba babja, gona bjale ba founela batho ka mehla ka bidio gore ba ba botše ditaba tše dibotse. Dikgaetšedi tše tharo tšeo di nago le mengwaga ya ka godimo ga e 80 di ithutile go diriša khomphutha e bile di ba gona tšhemong mo e ka bago letšatši le lengwe le le lengwe.” (Ps. 92:14, 15) Na o ka rata go oketša nako yeo o e fetšago o hlankela Jehofa gomme o latswe go loka ga Jehofa ka mo go oketšegilego? A re boneng tše dingwe  tša dilo tšeo di ka go thušago gore o fihlelele pakane yeo.

12. Ke’ng seo Jehofa a se tshepišago bao ba ithekgago ka yena?

¹² Ithute go ithekga ka Jehofa. O re tshepiša gore o tlo re direla dilo tše dintši tše dibotse ge e ba re mo tshepa le go dira sohle seo re ka se kgonago gore re mo hlankele. (Mal. 3:10) Kgaetšedi Fabiola wa kua Colombia le yena o ile a bona Jehofa a mo direla dilo tše dintši tše dibotse. O be a nyaka go ba mmulamadibogo wa ka mehla ka morago ga gore a kolobetšwe. Eupša o be a swanelwa ke gore a šome e le gore a kgone go thuša monna wa gagwe go hlokomela bana ba bona ba bararo. Le gona ge a be a le kgauswi le go tšwa phenšene o ile a rapela Jehofa gore a mo thuše. O re: “Gantši batho ba swanelwa ke go ema nako e telele gore ba tle ba thome go hwetša tšhelete ya bona ya phenšene, eupša nna ke thomile go e hwetša ka morago ga kgwedi feela. Ruri woo e be e le mohlolo!” Ka morago ga dikgwedi tše pedi o ile a thoma go bula madibogo. Ga bjale o na le mengwaga ya ka godimo ga e 70 e bile o na le mengwaga e fetago e 20 a bula madibogo. Ga e sa le go tloga a thomile go bula madibogo, o thušitše batho ba seswai gore ba feleletše ba kolobeditšwe. O re: “Le ge ka dinako tše dingwe ke fela ke ikwa ke se na matla, Jehofa o dula a nthuša gore ke tšwele pele ke bula madibogo.”

13-14. Ke mehlala efe yeo e ka re thušago go tshepa Jehofa le go oketša nako yeo re e fetšago re mo hlankela?

¹³ Ithute mehlaleng ya bao ba ilego ba ithekga ka Jehofa. Ka Beibeleng go na le mehlala ya batho ba bantši bao ba ilego ba šoma ka thata go  hlankela Jehofa. Gantši bahlanka bao ba Jehofa ba ile ba swanelwa ke go dira selo se itšego pele a ka ba šegofatša. Ka mohlala, Jehofa o ile a šegofatša Aborahama feela ka morago ga gore a tloge legaeng la gagwe “le ge a be a sa tsebe moo a yago gona.” (Baheb. 11:8) Jakobo le yena o ile a šegofatšwa feela ka morago ga gore a lwe le morongwa. (Gen. 32:24-30) Le gona ge Baisiraele ba be ba le kgauswi le go tsena nageng ya kholofetšo, ba ile ba kgona go tshela noka ya Jorodane feela ka morago ga gore baperisita ba tsene ka gare ga noka yeo.—Josh. 3:14-16.

¹⁴ Le gona o ka ithuta dilo tše dintši mehlaleng ya Bakriste ba lehono bao ba ilego ba ithekga ka Jehofa gomme ba fetša nako e ntši ba mo hlankela. Ka mohlala, ngwanabo rena Payton le mosadi wa gagwe Diana, ba be ba rata go bala ka bana babo rena le dikgaetšedi bao ba ilego ba oketša nako yeo ba e fetšago ba hlankela Jehofa ba bjalo ka bao go bolelwago ka bona dihlogong tša “Ba Ile ba Hlankela Modimo ka go Rata.” * Payton o re: “Ge re be re bala ka diphihlelo tša bona, re be re ikwa eka re bogetše motho yoo a jago dijo tše dibose kudu. Go dira seo go ile gwa dira gore re nyake go ‘latswa gomme re bone gore Jehofa o lokile.’” Mafelelong, Payton le Diana ba ile ba ya tlhokagalong. Na o badile dihlogo tšeo? Le gona na o bogetše bidio yeo e rego Go Nea Bohlatse Tšhemong yeo e Lego Lekatana—Australia le yeo e rego Witnessing in Isolated Territory—Ireland tšeo di lego go jw.org? Dilo tše ka moka di ka go thuša go hwetša ditsela tšeo o ka oketšago nako yeo o e fetšago o hlankela Jehofa.

15. Go fetša nako le batho bao ba etišago Jehofa pele go ka re thuša bjang?

¹⁵ Fetša nako le batho bao ba etišago Jehofa pele. Go bonolo gore re kwe tatso ya dijo tšeo re sa kago ra di ja ge e ba re fetša nako le batho bao ba di ratago. Ka mo go swanago, ge e ba re fetša nako le batho bao ba etišago Jehofa pele maphelong a bona le rena re tla nyaka go oketša nako yeo re e fetšago re mo hlankela. Se se ile sa diragalela Kent le Veronica. Kent o re: “Bagwera ba rena le batho ba gabo rena ba ile ba re kgothaletša gore re leke ditsela tše dingwe tša go hlankela Jehofa. Re ile ra bona gore ge re fetša nako re na le batho bao ba etišago Mmušo wa Modimo pele, le rena re nyaka go oketša nako yeo re e fetšago re hlankela Jehofa.” Gona bjale Kent le Veronica ke babulamadibogo ba ba kgethegilego kua Serbia.

16. Go ya ka papišo ya Jesu yeo e lego go Luka 12:16-21, ke ka baka la’ng re swanetše go ikgafa gore re hlankele Jehofa?

¹⁶ Ikgafe gore o hlankele Jehofa. Ga go hlokagale gore re tlogele dilo ka moka tšeo re di ratago gore re thabiše Jehofa. (Mmo. 5:19, 20) Eupša ge e ba re kgetha go se nyake go oketša nako yeo re e fetšago re hlankela Jehofa ka gobane re sa nyake go tlogela dilo tšeo re di ratago, re ka feleletša re swana le monna yoo go bolelwago ka yena papišong ya Jesu yoo a ilego a kgetha go ipshina ka bophelo go e na le go hlankela Modimo. (Bala Luka 12:16-21.) Ngwanabo rena Christian yoo a dulago kua France o re: “Ke be ke sa fetše nako ya ka e ntši ke hlankela Jehofa le go ba le lapa la ka.” Ka gona yena le mosadi wa gagwe ba ile ba phetha ka gore e be babulamadibogo. Eupša e le gore ba fihlelele pakane yeo ya bona, ba ile ba swanelwa ke go tlogela mošomo. Ka baka leo ba ile ba thoma kgwebo e nyenyane ya go hlwekiša gore ba kgone go itlhokomela gomme ba ithuta le go kgotsofalela tšhelete e nyenyane yeo ba bego ba na le yona. Na ba a itshola gore ba ile ba tlogela mošomo gore ba kgone go bula madibogo? Christian o re: “Ga bjale re thabela go šoma tšhemo go feta peleng e bile re thabela go bona  batho bao re ithutago le bona Beibele le bao re boelago go bona ba ithuta ka Jehofa.”

17. Ke eng seo se thušitšego kgaetšedi yo mongwe go leka mokgwa o mongwe wa go bolela ditaba tše dibotse?

¹⁷ O se ke wa tšhaba go leka mekgwa e mengwe ya go bolela ditaba tše dibotse. (Dit. 17:16, 17; 20:20, 21) Nakong ya bolwetši bja Corona, Shirley e lego mmulamadibogo wa kua United States, o ile a swanelwa ke go fetoša tsela yeo a bego a bolela ditaba tše dibotse ka yona. Mathomong o be a tšhaba go go bolela ditaba tše dibotse a diriša founo. Eupša ka morago ga gore a hwetše tlwaetšo ge molebeledi wa tikologo a be a ba etetše, o ile a thoma go diriša founo gantšinyana ge a bolela ditaba tše dibotse. O re: “Mathomong ke be ke tšhoga, eupša gona bjale ke tloga ke thabela go founela batho. Ke kgona go bolela le batho ba bantši go feta ge re be re eya ka ntlo le ntlo!”

18. Re ka thušwa ke’ng ge re kopana le mathata ao a re šitišago go oketša nako yeo re e fetšago go hlankela Jehofa?

¹⁸ Ipeele pakane gomme o leke go e fihlelela. Ge re kopana le mathata re a rapela gomme ra dira sohle seo re ka se kgonago go lebeletšana le ona. (Die. 3:21) Sonia yoo e lego mmulamadibogo wa ka mehla e bile a lego sehlopheng sa batho ba go bolela leleme la Seromany kua Yuropa o re: “Ke rata go ngwala dipakane tša ka letlakaleng gomme ka di bea mo ke tlago go kgona go di bona. Tafoleng ya ka ke terowile seswantšho sa tsela yeo e aroganago ke moka ya tšwa ditsela tše pedi. Ge ke dira phetho, ke lebelela ditsela tšeo tše pedi gomme ka nagana gore ke efe yeo ke swanetšego go e tšea.” Sonia o leka go lebeletšana le mathata a gagwe ka tsela e botse. O re: “Ge ke welwa ke bothata, ke a lebelela gomme ka bona ge e ba bothata bjoo bo swana le leboto leo le nthibelago gore ke fihlelele pakane ya ka goba leporogo leo le nthušago gore ke e fihlelele.”

19. Re ka dira’ng go bontšha gore re leboga dilo tše dibotse tšeo Jehofa a re filego tšona?

¹⁹ Jehofa o re šireletša ka ditsela tše dintši. Re ka bontšha gore re leboga dilo tše dibotse tšeo a re direlago tšona ka go dira sohle seo re ka se kgonago gore leina la gagwe le retwe. (Heb. 13:15) Re ka dira seo ka gore re oketše nako yeo re mo hlankelago ka yona gomme yena o tla re šegofatša kudu. Eka letšatši le letšatši re ka nyaka ditsela tšeo di ka re thušago gore re ‘latswe gomme re bone gore Jehofa o lokile.’ Ke moka re tla swana le Jesu yoo a boletšego gore: “Dijo tša ka ke gore ke dire thato ya yo a nthomilego le go phetha modiro wa gagwe.”—Joh. 4:34.