1, 2. Псалом 34:8 куд финст ӕй, уомӕ гӕсгӕ нӕ ци кӕнун гъӕуй, цӕмӕй ӕй фӕууинӕн, Йеговӕ куд хуарз ӕй, уой?

ДӔ ЦӔСТИТӔБӔЛ рауайун кӕнӕ, цума, ке некӕдма хуардтай, уӕхӕн хуӕруйнаг дӕ равзарун фӕндуй. Дзӕбӕх имӕ ку ӕркӕсай, ку имӕ басмотай, куд ӕй искодтонцӕ, уобӕл ку рафӕрсай ӕма иннети зӕрдӕмӕ фӕццудӕй ӕви нӕ, уой ку базонай, уӕд ӕй, ӕвӕдзи, еу минкъий балӕдӕрдзӕнӕ, ци адӕ кӕндзӕй, уой. Фал ин цӕмӕй е ’цӕг адӕ балӕдӕрай, уой туххӕй ба си гъӕуама дӕхуӕдӕг равзарай.

² Йеговӕ куд хуарз ӕй, уой туххӕй нӕ бон цидӕртӕ ӕй базонун Библи ӕма нӕ публикацитӕ кӕсгӕй, удта хуӕртӕ ӕма ӕнсувӕрти хабӕрттӕмӕ игъосгӕй. Фал ӕцӕгӕй куд хуарз ӕй, уой ба базондзиан, нӕхуӕдтӕ ’й ку бавзарӕн, уӕд. (Бакӕсӕ Псалом 34:8.) Зӕгъӕн, фӕндуй дӕ пионерӕй лӕггадӕ кӕнун, ӕма ’й лӕдӕрис, уой туххӕй дӕ дӕ цард фӕххумӕтӕгдӕр кӕнун ке гъӕуй. Йесо зӕрдӕ байвардта, Паддзахади гъуддаг фиццаг бунати кӕмӕн уа, уонӕбӕл Йеговӕ ке батухсдзӕй. Еци дзурдтӕ, ӕвӕдзи, еу ӕма дууӕ хатти нӕ кастӕ, фал сӕ дӕхебӕл ба нӕма бавзурстай (Матф. 6:33). Фал Киристей дзурдтӕбӕл дӕ зӕрдӕ даргӕй дӕ хӕрзтӕ фӕмминкъийдӕр кодтай, дӕ кусти график раййивтай ӕма фулдӕр лӕггадӕ кӕнун райдӕдтай. Ӕма ’й нур дӕхе цӕститӕй уинис, Йеговӕ дин куд ӕнхус кӕнуй, уой. Ӕндӕр загъдӕй ӕй бавзурстай ӕма фӕууидтай, Йеговӕ куд хуарз ӕй, уой.

3. Псалом 16:1, 2 куд финст ӕй, уомӕ гӕсгӕ Йеговӕ уӕлдай хуарздзийнӕдтӕ кӕмӕн кӕнуй?

³ «Йеговӕ хуарз ӕй алкӕмӕндӕр», ка ’й нӕ зонуй, уонӕн дӕр ма (Пс. 145:9; Матф. 5:45). Фал ӕй ка уарзуй ӕма ин ка лӕггадӕ кӕнуй, уони ба уӕлдай хуарздзийнӕдтӕй исхайгин кӕнуй. (Бакӕсӕ Псалом 16:1, 2.) Гъӕйдӕ еци хуарздзийнӕдтӕй цалдӕремӕ ӕркӕсӕн.

4. Йеговӕ цӕхуӕн хуарздзийнӕдтӕ искӕнуй, хӕстӕг кӕнун имӕ ка райдайуй, уонӕн?

 ⁴ Йегови унаффитӕй ку испайда кӕнӕн, уӕд ӕй алли хатт дӕр фӕууинӕн, нӕ цард хуӕздӕрӕрдӕмӕ куд раййевуй, уой. Йегови куд хуӕздӕр зонгӕ цудан, уотӕ ’й уарзгӕ дӕр хъӕбӕрдӕр кодтан, ӕма нин ӕнхус кодта, цӕмӕй, ӕ зӕрдӕмӕ ка нӕ цӕуй, уӕхӕн сагъӕстӕ ӕма гъуддӕгтӕй исуӕгъдӕ адтайанӕ (Кол. 1:21). Нӕ цард ин ку иснивонд кодтан ӕма донаргъуд ку райстан, уӕдта ин ӕ хуарздзийнӕдтӕ никки хуӕздӕр фӕууидтан, уомӕн ӕма ни алкӕмӕндӕр равардта кӕдзос цӕсгон ӕма барӕ, цӕмӕй е ’мбӕлттӕ уӕн (1 Пет. 3:21).

5. Йегови хуарздзийнадӕ нӕхебӕл игъосун кӕнгӕй куд бавзарӕн?

⁵ Йегови хуарздзийнадӕ ма нӕхебӕл бавзарӕн игъосун кӕнгӕй дӕр. Йегови Ӕвдесӕнти астӕу ӕфсӕрмигӕнагӕ адӕн берӕ ес. Йеговӕн лӕггадӕ кӕнун ку нӕма райдӕдтай, уӕд, ӕвӕдзи, дӕуӕй дӕр не ’руагӕс кодта, ескӕд ӕнӕзонгӕ адӕймагмӕ ке бацӕудзӕнӕ ӕма ин Библий туххӕй ке дзордзӕнӕ. Фал нур ба ӕнӕ уомӕй дӕ цард федаугӕ дӕр нӕбал кӕнуй. Йегови фӕрци ма еци гъуддаг уарзгӕ дӕр бакодтай! Фал Йегови ӕнхус уобӕл нӕ фӕцӕй. Зӕгъӕн, адӕймаг дӕбӕл гъӕр кӕнун ку райдайидӕ, уӕд дин хъауритӕ лӕвардта, цӕмӕй сабур уай. Кенӕ ба дӕмӕ адӕймаг дзӕбӕх ку байгъосидӕ, уӕд дин гъӕугӕ стих ӕргъуди кӕнунмӕ дӕр банхус кӕнидӕ. Удта Йегови ӕнхуси фӕрци идарддӕр лӕггадӕ кӕнис, кӕд дӕмӕ фулдӕр адӕн нӕ фегъосунцӕ, уӕддӕр (Йер. 20:7–9).

6. Йеговӕ нӕ игъосун кӕнунбӕл ке ахур кӕнуй, е ӕ хуарздзийнӕдтӕмӕ цӕмӕн хауй?

⁶ Йегови хуарздзийнадӕ ма бӕрӕг ӕй, игъосун кӕнун куд гъӕуй, уобӕл нӕ ке ахур кӕнуй, уомӕй дӕр (Иоан. 6:45). Къуӕрей астӕу нӕмӕ ци фембӕлд фӕууй, уоми фӕууинӕн, адӕймаги хӕццӕ дзубанди кӕнӕн куд ес, уой туххӕй видеороликтӕ. Еци видеороликти фӕууй берӕ хуарз гъудитӕ, ӕма си нӕ бон ӕй нӕ лӕггади испайда кӕнун. Ка ’й зонуй нӕмӕ фиццаг ӕнахур фӕккӕсонцӕ, фал си ку испайда кӕнӕн, уӕд ӕй фӕууиндзиан, адӕн нӕмӕ хуӕздӕр ке игъосунцӕ. Ӕмбурдти ӕма нӕ конгрессти дӕр арӕх фӕрразӕнгард кӕнунцӕ игъосун кӕнунмӕ нӕуӕг мадзӕлттӕ агорун. Фиццӕгти нин, ӕвӕдзи, ӕнцон нӕ уодзӕй, фал нӕхецӕн еци зин ку бакӕнӕн, уӕд нин Йеговӕ дӕр арфӕ кӕндзӕй. Гъӕйдӕ нур ба ӕркӕсӕн, Йеговӕн цийфӕнди уавӕрти дӕр, хуӕздӕрӕй нӕмӕ ци ес, уой ку дӕттӕн, уӕд нӕ цӕхуӕн арфӕдзийнӕдтӕй исхайгин кӕндзӕй, уомӕ. Уой фӕсте ба ма базондзиан, ци нин банхус кӕндзӕй, цӕмӕй нӕ нисӕнттӕ нӕ къохи ӕфтуйонцӕ.

7. Йеговӕ нин куд райарфӕ кӕндзӕй, фулдӕр лӕггадӕ кӕнунбӕл ку архайӕн, уӕд?

⁷ Йегови хӕццӕ нин уодзӕй федар лимӕндзийнадӕ. Ӕркӕсӕн Колумбийӕй еу хестӕр нӕлгоймаг Самуэли * хабармӕ. Ӕ бийнойнаги хӕццӕ пионертӕ адтӕнцӕ. Фал сӕ фӕндадтӕй Йеговӕн фулдӕр лӕггадӕ кӕнун ӕма игъосунгӕнгутӕ кӕми нӕ фагӕ кӕнуй, уордӕмӕ рандӕ ун. Уой туххӕй сӕ гъудӕй сӕ цард фӕххумӕтӕгдӕр кӕнун. Самуэль зӕгъуй: «Матфеййи 6:33 ци унаффӕ ес, уомӕ гӕсгӕ архайун райдӕдтан ӕма ӕнӕгъӕугӕ дзаумӕуттӕ нӕбал ӕлхӕдтан. Фал нин тӕккӕ зиндӕр адтӕй нӕ квартирӕ ниууадзун. Нӕ зӕрдӕмӕ хъӕбӕр цудӕй, удта нин ибӕл федун дӕр нӕбал гъудӕй». Сӕ нӕуӕг бунати Самуэль ӕма ӕ бийнойнаг балӕдӕрдтӕнцӕ, нур сӕ цӕрунмӕ ӕхсӕз хатти минкъийдӕр ӕхца ке гъӕуй. «Уидтан ӕй, Йеговӕ нин нӕ над куд аразуй ӕма нин нӕ кувдтитӕбӕл дзуапп куд дӕттуй, уой»,– зӕгъуй Самуэль. Кӕд дӕу дӕр фӕндуй Йеговӕн фулдӕр  лӕггадӕ кӕнун, уӕд расагъӕс кӕнӕ, дӕ бон раййевун ци ӕй, уобӕл. Йеговӕ дӕбӕл ӕнӕмӕнгӕй батухсдзӕй ӕма имӕ никки хӕстӕгдӕр исуодзӕнӕ (Пс. 18:25).

8. Иван ӕма Викторий хабарӕй цӕбӕл ахур кӕнӕн?

⁸ Нӕ лӕггадӕ нин фулдӕр цийнӕ хӕсдзӕй. Нур ба ӕркӕсӕн, Киргизий пионертӕй ка лӕггадӕ кӕнуй, уӕхӕн бийнонтӕ, Иван ӕма Викторий, хабармӕ. Етӕ хумӕтӕг цард кӕнунцӕ, цӕмӕй багъӕуаги сӕ бон уа нӕ организаций аллихузи гъуддӕгти фӕккӕсун, зӕгъӕн, арӕзтадон гъуддӕгти. Иван зӕгъуй: «Ести нӕуӕг гъуддаг нин ку баихӕс кӕнунцӕ, уӕд имӕ алли хатт дӕр зӕрдиагӕй равналӕн. Изӕрмӕ хъӕбӕр бафӕллайӕн, фал ӕй фӕллӕдӕрӕн, нӕ хъауритӕ ӕгасӕйдӕр Йеговӕн ке дӕттӕн, ӕма нин е устур цийнӕ хӕссуй. Удта ма нӕхецӕн нӕуӕг ӕмбӕлттӕ иссерӕн ӕма нӕбӕл берӕ дзӕбӕх хабӕрттӕ ӕрцӕуй» (Мар. 10:29, 30).

9. Радзорӕ, зин уавӕрти ка ӕй, еу уӕхӕн хуӕрӕ зингзӕрдӕй цӕй фӕрци лӕггадӕ кӕнуй ӕма ин ци ӕнтӕсуй.

⁹ Нӕ уавӕртӕ хуӕрзтӕй ку нӕ уонцӕ, уӕддӕр нӕ бон ӕй цийнӕгӕнгӕй лӕггадӕ кӕнун. Е бӕрӕг ӕй еу каргун идӕдзӕ хуӕрӕ Миреййи хабарӕй. Мирей цӕруй Нигулӕн Африки. Раздӕр дохтирӕй куста, фал пенсимӕ ку рацудӕй, уӕдта пионерӕй лӕггадӕ кӕнун райдӕдта. Мирей артритӕй сӕйуй, ӕма ин зин цӕуӕн ӕй. Участокки дӕр еу сахаттӕй ӕндӕр нӕ фӕффӕразуй. Фал стенди хӕццӕ ба ӕ бон ӕй фулдӕр лӕггадӕ кӕнун. Дуккаг бацудтӕ ӕма ин Библий ахуртӕ берӕ ес, кӕцидӕртӕ си телефонӕй дӕр фӕууадзуй. Цума уотӕ зингзӕрдӕй цӕмӕн лӕггадӕ кӕнуй? Мирей зӕгъуй: «Йегови ӕма Киристей берӕ уарзун. Удта Йеговӕй арӕх фӕккорун, цӕмӕй ин мӕ бон уа фулдӕр лӕггадӕ кӕнун» (Матф. 22:36, 37).

10. 1 Петури 5:10 куд финст ӕй, уомӕ гӕсгӕ Йеговӕн фулдӕр лӕггадӕ кӕнун ке фӕндуй, уонӕмӕ ци ӕнгъӕлмӕ кӕсуй?

¹⁰ Йеговӕ нӕ нӕуӕг цӕбӕлдӕрти ахур кӕндзӕй. Уой ӕхебӕл бавзурста, Маврикий ка лӕггадӕ кӕнуй, еу уӕхӕн пионер ӕнсувӕр Кенни. Рӕстдзийнадӕ ку базудта, уӕд университети ахур ниууагъта, донаргъуд райста ӕма пионерӕй лӕггадӕ кӕнун райдӕдта. Кенни зӕгъуй: «Фӕндуй мӕ, цӕмӕй мӕ разӕнгард кӕнонцӕ пахампар Исаййи дзурдтӕ: „Мӕнӕ ӕз! Мӕн рарветӕ“» (Ис. 6:8). Кенни нӕ организаций арӕзтадон гъуддӕгти цалдӕр хатти архайдта, удта нӕ литературӕ дӕр ӕхе ӕвзагмӕ тӕлмац кӕнунмӕ ӕнхус кодта. «Ӕнсувӕртӕ мин ести ку баихӕс кӕниуонцӕ, уӕд мӕ ахур дӕр кодтонцӕ, цӕмӕй мӕ ихӕстӕ, куд ӕмбӕлуй, уотӕ ӕнхӕст кӕнон»,– зӕгъуй Кенни. Фал айдагъ цӕхуӕндӕр куститӕбӕл не ’сахур ӕй. Уотӕ дӕр ма загъта: «Мӕ бон ци ӕй ӕма ци нӕй, уой хуӕздӕр балӕдӕрдтӕн. Удта ’й фӕууидтон, фӕххуӕздӕр кӕнун ма мӕ ци гъӕуй, цӕмӕй Йегови зӕрдӕ хъӕбӕрдӕр рохс кӕнон». (Бакӕсӕ 1 Петури 5:10.) Дӕу бон дӕр ӕй дӕ уавӕртӕбӕл расагъӕс кӕнун. Ка ’й зонуй, дӕ царди цидӕртӕ ку раййевай, уӕд дӕу бон дӕр исуодзӕй Йеговӕй нӕуӕг цӕбӕлдӕрти исахур ун.

11. Хонсар Корейи каргун хуӕртӕн ци бантӕстӕй? (Кӕсӕ ма хузӕмӕ ӕндаг цъарӕбӕл.)

¹¹ Фӕлтӕрдгун игъосунгӕнгути дӕр фӕгъгъӕуй нӕуӕг мадзӕлттӕбӕл ахур кӕнун. Хонсар Корейи хестӕр нӕлгоймӕгтӕ радзурдтонцӕ, COVID-19 пандемийи рӕстӕг се ’мбурдӕн игъосун кӕнуни гъуддаги ци бантӕстӕй, уой: «Е ’нӕнездзийнади туххӕй хӕдзарӕй-хӕдзарӕмӕ игъосун кӕнун ке бон нӕй, етӕ нур видеосвязи фӕрци игъосун кӕнунцӕ. 80 анземӕй фулдӕр кӕбӕл цӕуй, ӕртӕ уӕхӕн хуӕри нӕмӕ компьютерӕй пайда кӕнун базудтонцӕ, ӕма нур алли бон дӕр игъосун кӕнунцӕ» (Пс. 92:14, 15). Ду дӕр игъосун кӕнуни гъуддаги фулдӕр ку архайай, уӕд ӕй дӕхебӕл фӕууиндзӕнӕ, Йеговӕ куд хуарз ӕй, уой. Гъӕйдӕ мадта ӕркӕсӕн, нӕ бон ци ӕй кӕнун, цӕмӕй еци гъуддаг нӕ къохи бафтуйа.

12. Йеговӕ зӕрдӕ цӕмӕй ӕвӕруй, ӕ зӕрдӕ ибӕл ка даруй, уонӕн?

¹² Дӕхе ахур кӕнӕ Йеговӕбӕл дӕ зӕрдӕ дарун. Хуцаубӕл нӕ зӕрдӕ ку дарӕн ӕма нӕмӕ хуӕздӕрӕй ци ес, уой ин ку дӕттӕн, уӕд нин рӕдауӕй райарфӕ кӕндзӕй (Мал. 3:10). Е бӕрӕг ӕй Колумбийӕй еу хуӕрӕ Фабиоли хабарӕй. Донаргъуди фӕсте ӕй фӕндадтӕй пионерӕй лӕггадӕ кӕнун. Фал ин ӕртӕ сувӕллони адтӕй ӕма ’й ӕ лӕгӕн ӕнхус кӕнун гъудӕй бийнонтӕ дарунмӕ. Косун дӕр ӕма пионерӕй лӕггадӕ кӕнун дӕр ба ӕ бон не ’ссайдӕ. Гъема Фабиолӕн пенсимӕ рацӕуни рӕстӕг ку ӕрхъӕрдтӕй, уӕд Йеговӕмӕ ковун райдӕдта. Фабиолӕ загъта: «Ӕной пенси искӕнунбӕл берӕ рӕстӕг рандӕ уй. Ӕз ба еунӕг мӕйӕмӕ рарӕвдзӕ дӕн. Е устур дессаг адтӕй!» Гъема дууӕ мӕйей фӕсте ӕ фӕндӕ ӕ къохи бафтудӕй. Нур ибӕл 70 анземӕй фулдӕр цӕуй, 20 анземӕй фулдӕр ба пионерӕй лӕггадӕй кӕнуй. Ӕма нури уӕнгӕ 8 силгоймагемӕн банхус кодта рӕстдзийнади надбӕл ӕрлӕуунмӕ. Фабиолӕ ма загъта: «Хъӕбӕр ӕнӕхъаурӕ исдӕн, фал мин уӕддӕр Йеговӕ алли бон дӕр ӕнхус кӕнуй, цӕмӕй мӕ бон уа идарддӕр дӕр пионерӕй лӕггадӕ кӕнун».

13, 14. Йеговӕбӕл нӕ зӕрдӕ дарунмӕ ӕма нӕуӕг нисӕнттӕ ӕвӕрунмӕ нин ке хабӕрттӕ банхус кӕндзӕнцӕ?

¹³ Йеговӕбӕл ӕ зӕрдӕ ка дардта, етӕ дин фӕнзуйнаг уӕнтӕ. Йеговӕн зӕрдиагӕй ка лӕггадӕ кодта, уӕхӕн адӕни хабӕрттӕ Библий берӕ ес. Цӕмӕй син Йеговӕ райарфӕ кодтайдӕ, уой туххӕй бал сӕ сӕхе фӕгъгъӕуидӕ фиццаг къахдзӕф искӕнун. Зӕгъӕн,  кӕд Авраам, «кумӕ цӕуй, уой зонгӕ дӕр нӕ кодта», уӕддӕр ӕ хӕдзарӕ ниууагъта ӕма ин Хуцау кумӕ загъта, уордӕмӕ рандӕ ’й, ӕма ин уой фӕсте Йеговӕ райарфӕ кодта (Дзиуит. 11:8). Кенӕ ма Иакови дӕр уӕлдай хуарздзийнадӕй исхайгин кодта, ӕгас ӕхсӕвӕ изӕди хӕццӕ гъӕбесӕй ку фӕххуӕстӕй, уой фӕсте (Райд. 32:24–30). Израилӕгтӕ ба Иордани сӕрти Зӕрдӕвӕрд зӕнхӕмӕ бацудӕнцӕ, саугинтӕ донмӕ ку бакъахдзӕф кодтонцӕ, ӕрмӕстдӕр уой фӕсте (Йес. Н. 3:14–16).

¹⁴ Фӕнзуйнаг ма нин ӕнцӕ, нӕ рӕстӕги Йеговӕбӕл ӕ зӕрдӕ ка даруй ӕма нӕуӕг нисӕнттӕмӕ ка тундзуй, уӕхӕн лӕггадгӕнгутӕ дӕр. Уӕхӕн хуӕртӕ ӕма ӕнсувӕрти туххӕй финст фӕууй статьяти «Етӕ адтӕнцӕ цӕттӕ» *. Пейтон ӕма ӕ бийнойнаг Дайани зӕрдӕмӕ еци статьятӕ хъӕбӕр цӕунцӕ, ӕма зӕгъунцӕ: «Еци статьяти ци хуӕртӕ ӕма ӕнсувӕрти кой фӕццӕуй, уонӕмӕ ӕрхицӕ кӕнӕн, цума адгин хуӕрд ка кӕнуй, уӕхӕн адӕни рази бадӕн. Куд фулдӕр сӕмӕ кӕсай, уотӕ дӕхе дӕр хъӕбӕрдӕр фӕффӕндуй бавзарун, ӕма фӕууинун, Йеговӕ куд хуарз ӕй, уой». Фӕстӕдӕр Пейтон ӕма Дайанӕ дӕр рандӕ ’нцӕ, фулдӕр игъосунгӕнгутӕ кӕми гъудӕй, уордӕмӕ. Ду ба еци статьятӕ кастӕ? Дӕ бон ма ӕй бакӕсун видеороликтӕмӕ «Проповедь в отдалённых районах. Австралия» ӕма «Проповедь в отдалённых районах. Ирландия» сайти jw.org. Уӕхӕн ӕрмӕги фӕрци ’й фӕууиндзӕнӕ, дӕ бон ци ӕй бакӕнун, цӕмӕй Йеговӕн никки фулдӕр лӕггадӕ кӕнай.

15. Ӕмбӕлттӕ ӕвзаргӕй зундӕй цӕмӕн гъӕуама архайӕн?

¹⁵ Ӕмбӕлттӕ ӕвзаргӕй зундӕй архайӕ. Ести нӕуӕг хуӕруйнаг равзарун ӕнцондӕр фӕууй, еци хуӕруйнаг ке зӕрдӕмӕ цӕуй, уони хӕццӕ еу фингӕбӕл бадгӕй. Гъе уотӕ, Йеговӕн лӕггадӕ кӕнун ӕ царди фиццаг бунати кӕмӕн ӕй, уони хӕццӕ ку лимӕн кӕнӕн, уӕд нӕхе дӕр фулдӕр архайун фӕнддзӕй. Кент ӕма Вероникӕ уой сӕхецӕй зонунцӕ. Етӕ зӕгъунцӕ: «Хеуӕнттӕ ӕма ӕмбӕлттӕ нӕ разӕнгард кодтонцӕ игъосун кӕнунмӕ нӕуӕг мадзӕлттӕ агорун. Ба ’й лӕдӕрдтан, Хуцауи Паддзахади гъуддаг ӕ царди фиццаг бунати кӕмӕн ӕй, уони хӕццӕ дӕ рӕстӕг ку ӕрветай, уӕд нӕуӕг цидӕртӕ бавзарунмӕ нӕбал тӕрсдзӕнӕ». Нур Кент ӕма Вероникӕ Сербий сӕрмагонд пионертӕй лӕггадӕ кӕнунцӕ.

16. Лукай 12:16–21 ци хабар финст ес, уомӕ гӕсгӕ нӕхе цӕмӕйдӕрти фӕццох кӕнунмӕ цӕттӕ цӕмӕн гъӕуама уӕн?

¹⁶ Йегови туххӕй дӕхе цӕмӕйдӕрти фӕццох кӕнунмӕ цӕттӕ уо. Цӕмӕй ни Йегови зӕрдӕ рохс кӕна, уой туххӕй нӕ царди еугур хуарздзийнӕдтӕй нӕхе цох кӕнун нӕ гъӕуй (Еккл. 5:19, 20). Фал дзурд уобӕл цӕуй, ӕма еуӕй-еухатт адӕймагӕн фадуӕттӕ фӕууй фулдӕр лӕггадӕ кӕнунмӕ, фал ӕй ӕхе цӕмӕйдӕрти цох кӕнун ба нӕ фӕффӕндуй. Йесо дӕр ӕ фӕсномуг хабари уӕхӕн адӕймаги кой ракодта. Еци лӕг ӕрмӕстдӕр ӕхе мӕтӕ кодта, Хуцау си ци зӕгъдзӕй, е ба имӕ нимади дӕр н’ адтӕй. (Бакӕсӕ Лукай 12:16–21.) Францийӕй еу ӕнсувӕр Кристиан зӕгъуй, раздӕр Йегови гъуддӕгтӕн ӕма ӕ бийнонтӕн фагӕ рӕстӕг ке нӕ хецӕн кодта. Ӕма уой ку балӕдӕрдтӕй, уӕд ӕ бийнойнаги хӕццӕ пионертӕй лӕггадӕ кӕнун исфӕндӕ кодтонцӕ. Уой туххӕй сӕ раздӕриккон куст ниууагътонцӕ ӕма ӕфснайунмӕ ка ӕнхус кӕнуй, уӕхӕн минкъий фирмӕ райгон кодтонцӕ, удта минкъийдӕр хӕрзтӕ кӕнунбӕл дӕр исахур ӕнцӕ. Цума сӕ цард куд раййивта, уой туххӕй ци гъуди кӕнунцӕ? Кристиан зӕгъуй: «Нӕ лӕггадӕ нин уойбӕрцӕ цийнӕ некӕдма хаста! Удта нӕуӕгӕй кӕмӕ ӕрбацӕуӕн ӕма Библи ке хӕццӕ ахур кӕнӕн, етӕ Йегови туххӕй  фулдӕр ке базонунцӕ, уой уинун дӕр нин хъӕбӕр ӕхцӕуӕн фӕууй».

17. Хатгай нин нӕуӕг мадзӕлттӕбӕл исахур ун зин цӕмӕн фӕууй?

¹⁷ Игъосун кӕнунмӕ нӕуӕг мадзӕлттӕ агорӕ (Гъуд. 17:16, 17; 20:20, 21). Еугонд Штаттӕй еу пионер хуӕрӕ Шеронӕн ӕнцон н’ адтӕй, COVID-19 пандемийи туххӕй нӕ игъосун кӕнуни мадзӕлттӕ ку раййивтонцӕ, уӕд. Фиццӕгти телефонӕй игъосун кӕнунмӕ ӕ нифс нӕ хаста. Фал ин фӕстӕдӕр ба районон цӕстӕдарӕг байамудта, куд архайгӕ ’й, уой, ӕма Шерон дӕр райдӕдта еци мадзалӕй пайда кӕнун. Шерон зӕгъуй: «Фиццаг хъӕбӕр тарстӕн, нур ба зӕрдидзӕбӕхӕн лӕггадӕ кӕнун. Хӕдзарӕй-хӕдзарӕмӕ ку игъосун кодтан, уӕд нин уойбӕрцӕ адӕни хӕццӕ радзорун нӕ бантӕсидӕ».

18. Зин уавӕрти дӕр нин ци банхус кӕндзӕй фулдӕр лӕггадӕ кӕнун?

¹⁸ Нисан исӕвӕрӕ ӕма архайӕ. Зин уавӕри ку бахауӕн, уӕд Йеговӕмӕ раковӕн ӕма куд бакӕнӕн, уобӕл лӕмбунӕг расагъӕс кӕнӕн (Ӕмб. 3:21). Цигайнаг къуари пионерӕй ка лӕггадӕ кӕнуй, еу уӕхӕн хуӕрӕ Соня зӕгъуй: «Куд архайдзӕн, уой гӕгъӕдибӕл рафинсун ӕма ’й ме ’стъолӕбӕл ниввӕрун. Уомӕй уӕлдай ма ме ’стъолӕбӕл дарун, дууӕ нади кӕми фӕххецӕн унцӕ, уӕхӕн хузӕ. Ести унаффӕ рахӕссуни размӕ еци хузӕмӕ фӕккӕсун ӕма расагъӕс кӕнун, мӕ унаффӕ мӕ цӕмӕ ӕркӕндзӕй, уобӕл». Соняй царди алци ӕхе куд фӕндуй, уотӕ ку нӕ рауайуй, уӕд дӕр ӕ нифс сӕттун нӕ уадзуй. «Мӕ уавӕртӕ ку раййевунцӕ, уӕд мин е къахкъуӕрӕн исуодзӕй ӕви хед, е мӕхецӕй кӕнгӕ ’й. Алцидӕр кӕнгӕ ’й уавӕрмӕ ци цӕстӕй фӕккӕсун, уомӕй».

19. Аци статья дӕ цӕмӕ баразӕнгард кодта?

¹⁹ Йеговӕ нин хъӕбӕр берӕ лӕвӕрттӕ искодта. Гъӕйдӕ мадта ин ӕ ном кадгин кӕнунбӕл архайӕн. Уотемӕй ин бавдесдзиан, боз си ке ан, уой (Дзиуит. 13:15). Игъосун кӕнунмӕ нин ци нӕуӕг мадзӕлттӕ ес, уонӕбӕл ахур кӕнтӕ, ӕма уин Йеговӕ никки фулдӕр арфӕ кӕндзӕй. «Ба ’й ӕвзаретӕ ӕма ’й фӕууинетӕ, Йеговӕ куд хуарз ӕй, уой» ӕма ин алли бон дӕр фадуӕттӕ дӕттетӕ, цӕмӕй уин хуарздзийнадӕ искӕна. Уӕд сумах бон дӕр уодзӕй Йесо Киристей хузӕн зӕгъун: «Мӕнӕн мӕ хуӕруйнаг ӕй, ка мӕ рарвиста, уомӕн ӕ фӕндон ӕнхӕст кӕнун» (Иоан. 4:34).