1-2. Base ed Salmo 34:8, antoy gawaen tayo pian talagan natalosan tayoy kamaongan nen Jehova?

IMADYIN mo pa ya walay kaarom ya nanluto na putahe ya agmo nin balot atawayan. Seguro nawalaan kay ideya no antoy taway to no nengnengen mo, angoben mo, amtaen mo ray ingredients, odino tepetan mo ray akataway la ed satan. Pero naamtaan mo labat no kasin labay mo o andi no tawayan mon mismo.

² Mipara itan ed kamaongan nen Jehova. Nawalaan tayoy ideya ed kamaongan to kada no manbasa tayoy Biblia tan saray publikasyon tayo, tan no narerengel tayoy istorya na arum no panon iran bebendisyonan nen Jehova. Balet pian natalosan tayon talagay kamaongan nen Jehova, kaukolan tayon “tawayan” ya mismo itan. (Basaen so Salmo 34:8.) Niay sakey ya alimbawa to ’tan. Singa bilang, labay moy manpayunir. Pero pian nagawaan mo itan, kaukolan mon pasimplien so bilay mo. Seguro kabisadom imay insipan nen Jesus diad Mateo 6:33 ya no iyuna tayod bilay tayo so Panarian, itarya nen Jehova so amin ya pankaukolan tayo. Pero agmo nin balot itan naeksperiensya. Nen nantiwala ka balet ed sipan nen Jesus, apakiwas ka ya bawasan so gastos mo, inuman moy eskedyul na trabahom, tan nampokus ka ed ministeryom. Nen nampayunir ka, agkan balot pinaulyanan nen Jehova. Talagan “atawayan” mon mismo so kamaongan to!

3. Base ed Salmo 16:1, 2, siopa ray papanengnengan nen Jehova na kamaongan to?

³ Si Jehova et “maomaong ed amin,” anggan diad saramay agmandadayew ed sikato. (Sal. 145:9; Mat. 5:45) Pero say talagan labalabay ton bendisyonan et saramay mangaaro tan  manlilingkor ed sikato diad interon puso. (Basaen so Salmo 16:1, 2.) Pantongtongan tayo pa so pigaran paraan ya ipapanengneng nen Jehova so kamaongan to.

4. Panon ya ipapanengneng nen Jehova so kamaongan to ed saramay mikakaaro ed sikato?

⁴ Say sakey ya pakanengnengan ya maomaong si Jehova et say pangibabangat tod sikatayo, tan parad pankaabigan tayo lanlamang itan. Manlapu la nen akabat tan naar-aro tayoy Jehova, tinulongan to tayo pian nauman tayoy panagnonot tayo tan nitunda tayo ray kagagawa ya agto labay. (Col. 1:21) Nen indedika tayoy sarili tayo ed sikato tan nampabautismo tayo, lalo tayon anengneng so kamaongan to ta inikdan to tayo na malinis a konsiensia tan inmelet so pikakaaro tayod sikato.—1 Ped. 3:21.

5. Panon tayon nalilikna so kamaongan nen Jehova diad pampupulong tayo?

⁵ Nalilikna tayo met so kamaongan nen Jehova diad pampupulong tayo. Kasin mabaing ka? Diad tua, dakel ya lingkor nen Jehova so mabaing. Seguro antis kan nagmaliw ya Tasi, ompan agmon balot naimadyin so sarilim ya ontotoktok ed abung na agmo kabat tan ipapasabim so mensahe ya posiblin agto labay ya dengelen. Pero natan, lanang mo la itan ya gagawaen. Tan diad tulong nen Aman Jehova, nai-enjoy mo lay manpulong! Naliliknam so suporta to. No walay kontran unabung, tutulongan to ka pian mansiansia kan kalmado. Ontan met, ipapanonot tod sika so dugarugan teksto ya ipabasam ed sakey ya interesado. Tan papabiskegen toy liknaan mo pian agka ontabang ya manpulong anggano ag-ondengel iray totoo.—Jer. 20:7-9.

6. Akin ya say pangipapasal nen Jehova ed sikatayo et ebidensya na kamaongan to?

⁶ Ipapanengneng met nen Jehova so kamaongan tod sikatayo diad pangipapasal tod sikatayo ed ministeryo. (Juan 6:45) Diad aral ed midweek, nababantayan tayo ray video na pangaligan a presentasyon, tan napapaseseg tayon aligen iratan diad ministeryo. Diad unaan, ompan manaalangan tayo pero nen sinali tayo, epektibo manaya. Napapaseseg tayo met diad saray aral tan kombension ya salien tayoy nanduruman paraan na panagpulong ya ompan agtayo nin balot asali. Ompan diad gapo et singa mairap itan ya gawaen, pero no salien tayo, iikdan tayoy Jehova na rason pian bendisyonan to itayo. Pantongtongan tayo so pigara ed saray bendisyon ya iter nen Jehova ed sikatayo no mannonot tayo ni ray paraan pian niiter tayod sikato so ‘the best’ tayo antokaman so situasyon tayo. Insan tayo pantongtongan no panon tayon nagawaan itan.

7. Anton bendisyon so awaten tayo no pausar tayod si Jehova diad arum nin paraan?

⁷Lalon onelet so pikakaarom ed si Jehova. Imanoen so eksperiensya na elder ya si Samuel * tan say asawa to, ya taga rad Colombia. Nai-enjoy day pampapayunir dad kongregasyon da, pero labay day ontulong ed sakey ya kongregasyon ya mankaukolan. Pian nagawaan da itan, wala ray kaukolan dan isakripisyo. “Inyaplika mi so Mateo 6:33 tan agkami la mangasaliw na agmi met kaukolan,” so kuan nen Samuel. “Pero say sankairapan, amay taynanan mi may abung mi. Nipundar mi iman, tan sikamin mismoy nan-design.” Nen inmalis irad samay kongregasyon ya mankaukolan na tulong, a-realize da ya sarag da manayay manbilay anggano say aalmoen da et halos 20 percent labat na datin income da. “Alikna mi so panangigiya nen Jehova tan inebatan to ray pikakasi mi,” so kuan nen Samuel. “Amta mi  ya naliliketan si Jehova ed sikami tan mas nalilikna mi natan so panangaro to.” Sika ey, sarag mo met kasi manpausar ed si Jehova diad arum nin paraan? No on, makapantiwala ka ya asikasoen to ka tan seguradon lalon onelet so pikakaarom ed sikato.—Sal. 18:25.

8. Antoy naaralan mo ed eksperiensya nen Ivan tan Viktoria?

⁸Mas naliknam so liket ed panaglingkor. Imanoen so eksperiensya nen Ivan tan Viktoria, ya sanasawan payunir ed Kyrgyzstan. Pinasimpli day bilay da pian makapanboluntaryo ira ed anggan anton asainmin, pati diad saray construction project. Oniay imbaga nen Ivan: “Papasyaen mi mankimey ed kada project. Anggano makapabanal so trabaho, malikeliket kami tan mareen so nonot mi ta amta min inusar mi biskeg mi parad Panarian. Naaruman met so kakaaro mi tan dakel so balibalin eksperiensya mi.”—Mar. 10:29, 30.

9. Antoy ginawa na sakey ya sister pian napalaknab toy ministeryo to anggano mairap so situasyon to, tan antoy resulta?

⁹ Anggano mairap so situasyon mo, napalaknab mo nin siansia so ministeryom tan seguradon naliknam so liket. Imanoen so eksperiensya nen Mirreh, sakey ya abalo tan maedad lan sister ed West Africa. Sikatoy nampayunir kayari ton nan-retire bilang doktor. Grabe lay arthritis nen Mirreh kanian sakey oras labat ya makakapanpulong ed kaabungan. Pero ombabawi ed cart witnessing, kanian dakel so return visit tan Bible study to. Say arum ed sikara et papawilen tan iyaaralan to panamegley na telepono. Antoy rason akin et nampayunir si Mirreh anggano mairap so situasyon to? Oniay imbaga to: “Manleppuan maong ed pusok so panangarok ed si Jehova tan ed si Kristo-Jesus. Lanang kon ipipikasi ed si Jehova ya tulongan to ak pian mas dakel ni nagawaan ko parad sikato.”—Mat. 22:36, 37.

10. Base ed 1 Pedro 5:10, antoy iiter nen Jehova ed saramay labay da ni mas manpausar ed sikato?

¹⁰Ikdan ka nen Jehova na kaaruman ya training o panangipasal. Naeksperiensya itan nen Brother Kenny, ya payunir ed Mauritius. Nen naamtaan toy katuaan, intunda to lay panaaral tod college, insan la nampabautismo tan nampayunir. Imbaga to: “Say prinsipyok ed bilay et amay imbaga nen propetan Isaias ya: ‘Wadia ak! Ibaki mo ak!’” (Isa. 6:8) Asali nen Kenny so namboluntaryo ed nanduruman construction project, tan tinmulong met ed pangi-translate na saray publikasyon tayo diad lenguahe to. “In-train da ak ta pian nagawaan ko irayan nanduruman asainmin,” so kuan nen Kenny. Satan ya panangipasal et aglabat akatulong pian magmaliw ya marunong ed trabaho to. Imbaga to: “Naaralan ko met so manpaabeba tan ipanengneng so arum ni ran maabig ya ugali pian diad ontan et magmaliw ak ya mausar ed si Jehova tan mas napanlingkoran ko ray agagi.” (Basaen so 1 Pedro 5:10.) Sika ey, anto ray sarag mo met ya umanen ed bilay mo pian mas nai-train tan naipasal ka ni nen Jehova?

11. Antoy ginawa na pigaran sister ed South Korea pian napalaknab day ministeryo ra, tan antoy resulta? (Nengnengen met so litrato ed apis.)

¹¹ Anggan saramay abayag lan Tasi et makakaawat met na panangipasal pian nasali da so arum ya paraan na panagpulong. Legan na COVID-19 pandemic, oniay insulat na saray elder ed sakey ya kongregasyon ed South Korea: “Wala ray kakongregasyon mi ya say amta ra et agla ra makapanpulong lapud makapuy so laman da, pero natan makakapanpulong la ra panamegley na video-call. Walay taloran sister ya masulok lan 80 so edad da ya inaral day mangusar na gadyet. Natan et halos inagew-agew la ran manpupulong.” (Sal. 92:14, 15) Sika ey, labay mo met ya palaknaben  so ministeryom pian mas natawayan moy kamaongan nen Jehova? Panon mon nagawaan itan?

12. Antoy insipan nen Jehova ya gawaen to parad saramay mantitiwala ed sikato?

¹²Mantiwala ka ed si Jehova. Insipan to ya ikalbo toy “dakerakel a bendisyon” no mantiwala tayod sikato tan no iter tayoy ‘the best’ tayo. (Mal. 3:10) Asalin mismo itan nen Sister Fabiola ya taga Colombia. Kayari ton abautismoan, labay to la komoy man-regular payunir. Pero kaukolan toy mantrabaho pian nasuportaan toy pamilya to. Kanian nen sarag to lay man-retire, nampikasin maong ed si Jehova ya komon et makapanpayunir la. Imbaga to: “Mabayag so manlakad na pension ed lugar mi, pero amay siak, sakey bulan labat et inaprobaan da lan tampol. Agak makapanisia!” Kalabas na duay bulan, nampayunir ya tampol si Sister Fabiola. Natan et masulok lan 70 so edad to tan masulok met lan 20 taon ya payunir. Walora lay atulongan to ya magmaliw ya lingkor nen Jehova. Imbaga to: “Diad tua, no maminsan et makapkapuy ak, pero inagew-agew ak ya tutulongan nen Jehova pian nitultuloy koy pampapayunir ko.”

13-14. Antoy aralen tayo ya ontulong ed sikatayon mantiwala ed si Jehova tan mamakiwas ed sikatayon palaknaben so ministeryo tayo?

¹³Aral moy alimbawa na saramay nantiwala ed si Jehova. Dakel so nabasam ed Biblia ya lingkor nen Jehova ya ginawa day anggaay nayarian da parad sikato. Maslak et iikdan nen Jehova na espisyal ya bendisyon iray  lingkor to no wala lay ginawa da ya pakapatnagan ya baleg so tiwala dad sikato. Singa bilang, benendisyonan nen Jehova si Abraham nen tinaynan to la so abung to—“anggano agto amta no iner so laen to.” (Heb. 11:8) Inikdan nen Jehova na espisyal ya bendisyon si Jacob kayari ton akibalsakan ed sakey ya anghel. (Gen. 32:24-30) Nen asingger lan onloob so nasyon na Israel ed Insipan ya Dalin, pinatunda labat nen Jehova so maksil ya agus na Ilog Jordan nen dinmakat lad danum iray saserdote kanian akabaliw iray Israelita.—Jos. 3:14-16.

¹⁴ Maabig no aralen mo met so alimbawa na saray agagi tayo natan ya nanmatalek met ed si Jehova tan pinalaknab day ministeryo da. Singa bilang, si Payton tan say asawa ton si Diana et labalabay dan basaen iray eksperiensya ya walad saray artikulon “Mabulbulos Dan Inyapay so Inkasikara.” * Oniay imbaga nen Payton: “Kada no basaen mi irayan eksperiensya, singa mi babantayan so sakey a too ya nai-enjoy toy mangan ta masarap so kakanen to. Kanian lalo kamin nalalagyat ya ‘tawayan tan nengnengen so kamaongan nen Jehova.’” Ag-abayag, namboluntaryo si Payton tan Diana ed lugar ya mas baleg so pankaukolan. Abasam la iratan ya artikulo? Tan kasin abantayan mo la so video ya Witnessing in Isolated Territory—Australia tan Witnessing in Isolated Territory—Ireland ya walad jw.org? Makatulong iratan pian napakiwas kan palaknaben met so ministeryom.

15. Antoy epektod sikatayo no lanang tayon kaulop iray agagin iyuuna dad bilay da so Panarian?

¹⁵Miulop ka ed saramay iyuuna dad bilay da so Panarian. Mas nalagyat tayon tawayan so sakey ya balon putahe no saray kaiba tayon mangan et labalabay da itan ya kanen. Kanian no labay tayon palaknaben so ministeryo tayo, dapat say lanang tayon kaulop et saramay iyuuna dad bilay da so panaglingkor ed si Jehova. Ontan so ginawa na sanasawan si Kent tan Veronica. “Pinaseseg kami na saray kakaaro tan kapamilya mi ya salien mi mandampot na saray pribilehyon lukas ed sikami,” so kuan nen Kent. “Nen unona, manaalangan kami pero kinmasil so liknaan mi nen nakakaiba min lanang iray agagi ya iyuuna dad bilay da so Panarian.” Si Kent tan Veronica et manlilingkor la natan bilang espisyal payunir diad Serbia.

16. Base ed samay ilustrasyon nen Jesus ya nabasad Lucas 12:16-21, akin et nepeg ya akaparaan tayon mansakripisyo parad si Jehova?

¹⁶Mansakripisyo ka parad si Jehova. Agto labay ya ibagan sibletan moy sarilim pian napaliket moy Jehova. (Ecl. 5:19, 20) Anggaman ontan, no say rason no akin ya manaalangan kan palaknaben so ministeryom et agmo labay so mansakripisyo, ompan naalig mo imay lingo na laki ed ilustrasyon nen Jesus ya nansagpot ya maong pian mainaway bilay to pero nilingwanan toy Dios. (Basaen so Lucas 12:16-21.) Oniay imbaga nen Brother Christian ya taga France: “Dati, kerakera labat ya panaon tan biskeg so iiter kod si Jehova tan ed pamilyak.” Sikato tan say asawa to et implano day manpayunir. Pero pian makapanpayunir ira, kaukolan day man-resign ed trabaho da. Say nagmaliw ya sideline da et manlinis na saray abung tan opisina. Nankontento la ra ed simplin bilay. Kasin sulit so sakripisyo da? Oniay imbaga nen Christian: “Mas nai-enjoy mi la natan so ministeryo tan malikeliket min tutulongan iray Bible study tan RV mi pian lalo dan nakabat si Jehova.”

17. Antoy akatulong ed sakey ya sister pian naaralan toy duman paraan na panagpulong?

 ¹⁷Salim so duman paraan na panagpulong. (Gawa 17:16, 17; 20:20, 21) Si Shirley, ya payunir ed United States, et kaukolan ton aralen so duman paraan na panagpulong legan na COVID-19 pandemic. Diad unaan, manaalangan ya man-telephone witnessing. Pero imbangat ira na manangasikaso na sirkito legan na bisita ed kongregasyon da. Kanian akaaral si Shirley tan natan et lanang lan mante-telephone witnessing. Imbaga to: “Makapanerbiyos diad gapo, pero nai-enjoy ko la natan. Mas dakel ingen so nakakatongtong mi komparad panagpulong ed kaabungan nensaman!”

18. Antoy makatulong no walay onlesan problema legan tayon aaboten iray goal tayo?

¹⁸Manplano tan onkiwas. No bilang ta wala ray onlesan problema legan mon aaboten iray goal mo, kerew moy tulong nen Jehova tan nonot mon maong no antoy sankaabigan ya gawaen mo. (Pro. 3:21) Oniay imbaga nen Sonia ya regular payunir ed Romany-language group diad Europe: “Isusulat ko ray planok, insan iiyan ko may papel ya angisulatan ko ed pasen ya lanang kon nanengneng. Diad lamisaan ko et walay inyan kon drowing na duaran karsada ya ompugtad mandumaan ya direksion. Kada no walay gawaen kon desisyon, onnengneng ak ed satan ya drowing tan iisipen ko no anton desisyon so makatulong pian naabot koy goal ko.” No walay subok ya dadalanen nen Sonia, agmanpopokus ed negatibo. Imbaga to: “No walay problema, akadepende ed siak no kasin ipasen ko itan ya singa padir ya makasagabal odino singa taytay ya ontulong pian makasabi ak ed goal ko.”

19. Panon tayon nipanengneng ya misalsalamat tayod si Jehova ed amin ya kamaongan to?

¹⁹ Dakel so bendisyon ya iiter nen Jehova ed sikatayo. Nipanengneng tayo ya misalsalamat tayo ed saratan ya bendisyon no gawaen tayoy anggaay nayarian tayo pian sikatoy nidayew tayo. (Heb. 13:15) No palaknaben tayo ni ministeryo tayo, lalo to tayon bendisyonan. Kanian komon ta kada agew et manisip tayoy paraan ya ‘natawayan tan nanengneng tayoy kamaongan nen Jehova.’ No gawaen tayo itan, nibaga tayo met imay imbaga nen Jesus ya: “Say kanen ko et say panggaway linawa na samay angibaki ed siak tan say panumpal ed kimey to.”—Juan 4:34.