1-2. Waut kjenn wie no Psalm 34:9 no doonen, om to seenen, woo goot Jehova es?

STAL die väa, die beet wäa Äten aun, waut du noch nienich jeschmakjt hast. Woo wurscht du rutfinjen kjennen, aus du daut jleichst? Du wurscht die daut kjennen beseenen, daut rikjen, no daut Rezapt froagen ooda aundre froagen, woo see äwa dit Äten denkjen. Oba de eensja Wajch, woo du rutfinjen kaust, aus du daut jleichen woascht, es, wan du daut selfst schmakjst.

² Woo kjenn wie biejlikj rutfinjen, woo goot Jehova es? Daut kjenn wie, wan wie de Bibel un onse Bieekja läsen un wan aundre ons vetalen, waut Jehova fa an jedonen haft. Oba om werkjlich uttofinjen, woo goot Jehova es, mott wie daut selfst beläwen (läs Psalm 34:9). See wie mol, woo wie daut doonen kjennen. Stal die väa, du west met dän Voltietdeenst aunfangen. Oba daut du daut doonen kaust, motst du dien Läwen eefacha moaken. Veleicht hab wie Jesus sien Vespräakjen aul foaken jeläst, daut Jehova fa deejanje sorjen woat, waut sien Kjennichrikj aun de ieeschte Städ stalen. Oba wie selfst haben daut veleicht noch nienich beläft (Mat. 6:33). Oba wiels wie ons opp Jesus sien Vespräakjen veloten, proow wie weinja Jelt to vebrucken, weinja to schaufen un soo väl aus mäajlich to prädjen. Wan wie daut doonen, dan beläw wie selfst, daut Jehova werkjlich fa ons sorcht. Wie finjen selfst ut, woo goot Jehova es.

3. Wäm deit Jehova goots no Psalm 16:1-2 no?

³ Jehova es “to aulem goot”, mau rajcht to soone, waut am nich mol kjanen (Psa. 145:9; Mat. 5:45). Un hee deit besonda deejanje väl goots, waut am leewen un väl fa am doonen (läs Psalm 16:1-2). Räd wie nu mol äwa eenjet, waut Jehova fa ons aul jedonen haft.

4. Waut fa goodet deit Jehova fa dee, waut am wellen noda komen?

 ⁴ Jiedatsmol, wan wie daut nokomen, waut wie von Jehova lieren, see wie, woo ons daut halpt. Aus wie mea von am lieeden un aunfungen am to leewen, holp hee ons, nich mea soo to denkjen ooda soont to doonen, waut am nich jefelt (Kol. 1:21). Un aus wie ons am hanjeewen un deepen leeten, deed hee noch mea goodet fa ons, biejlikj jeef hee ons een reinet Jewessen un holp ons, siene Frind to woaren (1. Pet. 3:21).

5. Woo beläw wie em Deenst, daut Jehova goot to ons es?

⁵ Wie beläwen uk, woo goot Jehova to ons es, wan wie em Deenst sent. Best du bleed? Väle von ons sent. Ea du eent von Jehova siene Deena wortst, hast du die daut veleicht kjeenmol kunt väastalen, daut du noch mol wurscht aun wiltframde Menschen äare Däa putren un met dee äwa de Schreft räden. Oba vondoag dän Dach deist du daut mau rajcht räajelmässich un met Jehova siene Help jeit die daut soogoa scheen! Du hast Jehova siene Help noch opp veschiedne aundre Wäaj jespäat. Hee haft die jeholpen ruich to bliewen, wan du em Deenst met eenen Jäajna rädsd. Hee holp die uk, daut die de rajchte Bibelvarzhen biefollen, wan du met wäm rädsd, waut intressieet wia. Un hee jeef die uk de Krauft wiedatoprädjen, wan de Menschen nich horchen wullen (Jer. 20:7-9).

6. Woo deit Jehova ons goots, doaderch daut hee ons utlieet?

⁶ Wiels Jehova goot es, lieet hee ons uk fa dän Deenst ut (Joh. 6:45). En de Toopkomes enne Wäakj see wie biejlikj feine Iedeeen toom prädjen un woo wie dee dan em Deenst brucken kjennen. Aum Aunfank sent wie veleicht een bät nerwees, wan wie waut nieet proowen. Oba wan wie daut doonen, dan woa wie enwoaren, daut daut werkjlich fein schauft. Bie onse Toopkomes un Kongressen woat ons uk toojerot, daut wie proowen, opp soone Wäaj to prädjen, waut wie noch nich ea haben. Un dan sent wie veleicht wada een bätje nerwees. Oba wan wie daut doonen, dan woat Jehova ons doafäa säajnen. See wie nu mol, woo Jehova ons säajent, wan wie waut nieet proowen, om am ons bastet to jäwen, endoont en waut vonne Omstend wie sent. Un wie woaren uk seenen, woo wie noch mea fa Jehova doonen kjennen.

7. Waut fa Säajnungen woa wie kjrieen, wan wie ons aunstrenjen, mea em Deenst to doonen?

⁷Wie komen Jehova noch noda. Räd wie mol äwa daut Biespel von Samuel, * eenen Eltesten, waut met siene Fru toop en Kolumbien deent. See wieren Pionieren en äare Vesaumlunk un wieren gaunz schaftich, oba see wullen mea em Deenst doonen un en soone Vesaumlunk methalpen, wua mea Help fäld. Daut dee daut kunnen, musten dee eenjet oppjäwen. Samuel sajcht: “Wie kjeemen daut no, waut et en Matäus 6:33 sajcht, un koften ons nich mea Sachen, waut ons nich werkjlich fälden. Oba daut schwanste wia fa ons, onse Woninj opptojäwen. Dee wia krakjt soo jebut, aus wie daut jleichten, un wie hauden dee gaunz betolt.” Aus dee dan en äare niee Vesaumlunk wieren, worden dee met väl weinja Jelt foadich aus ea. Samuel sajcht uk: “Wie haben jeseenen, woo  Jehova onse Jebäda beauntwuat haft un ons jeleit haft. Wie haben noch kjeenmol ea jespäat, daut Jehova ons soo sea leeft un soo tofräd es met ons aus nu.” Wurscht du uk kjennen mea em Deenst doonen? Wan jo, dan kaust du die secha sennen, daut Jehova fa die sorjen woat un daut du am noda komen woascht (Psa. 18:26).

8. Waut lia wie von Ivan un Viktoria äa Biespel?

⁸Wie haben Freid en Jehova sienen Deenst. Besee wie ons mol daut Biespel von Ivan un Viktoria, een Poa Lied, waut aus Pionieren en Kirgiesien deenen. Dee fieeden een eefachet Läwen, soo daut dee bie veschiednet em Deenst fa Jehova methalpen kunnen, mau rajcht biem Buwoakj. Ivan sajcht: “Wie deeden bie jieda Oppgow ons bastet. Wan wie aum Enj vom Dach uk gaunz meed wieren, feeld wie ons oba sea tofräd, wiels wie wisten, daut wie onse Krauft fa Jehova jebrukt hauden. Wie wieren uk sea tofräd, wäajen wie väl niee Frind kjrieejen un väl goode Erfoarungen hauden” (Mar. 10:29-30).

9. Waut deed eene Sesta, om mea em Deenst to doonen, wan dee uk Schwierichkjeiten haud, un waut kjeem doabie rut?

⁹ Wie haben mau rajcht Freid en Jehova sienen Deenst, wan wie uk Schwierichkjeiten haben. Mirreh, eene elre Wätfru en Wast-Afrika, schauft ea aus Doktafru. Aus see Auldpenschen kjrieech, funk see met dän Pioniadeenst aun. See haft sea Rietinj un kaun bloos eene Stund opp eemol von Hus to Hus prädjen. Oba biem effentlich Zeichnis jäwen kaun see lenja opp eemol. See haft väl Wadabesuchs un Bibelstudiums un met eenje von dee rät see äwa Fon. Wuarom wull Mirreh mea em Deenst fa Jehova doonen? See sajcht: “Ekj leew Jehova un Jesus Christus sea. Un ekj bäd foaken to Jehova, daut hee mie halpen saul, soo väl aus mäajlich en sienen Deenst to doonen” (Mat. 22:36-37).

10. Waut beläwen soone, waut mea fa Jehova doonen wellen, soo aus Jesaja 54:13 wiest?

¹⁰Jehova lieet ons fa veschiednet ut. Kenny, een Pionia, waut opp Maurizius deent, haft daut beläft. Aus hee de Woarheit kjanen lieed, hieed hee opp bie de Uniwersität to studieren, leet sikj deepen un funk met dän Voltietdeenst aun. Hee sajcht: “Ekj well soo sennen aus de Profeet Jesaja, waut säd: ‘Ekj sie hia. Du kaust mie schekjen’” (Jes. 6:8). Kenny haft opp veschiedne Städen biem buen metjeholpen un hee haft mau rajcht metjeholpen, biblische Bieekja opp siene Sproak to äwasaten. Hee sajcht: “Ekj wort utjelieet, om miene Oppgowen fein notokomen.” Oba hee lieed mea, aus bloos siene Oppgowen to doonen. Hee sajcht: “Ekj lieed uk, waut ekj nich kunn un aun waut vonne Ieejenschoften ekj noch schaufen must, om Jehova bäta to deenen” (läs Jesaja 54:13). Wurscht du die daut uk kjennen soo enrechten, daut Jehova die noch mea utlieren kunn?

11. Waut deeden eenje Sestren en Sied-Korea, daut see mea em Deenst doonen kunnen, un waut kjeem doabie rut? (See uk daut Bilt oppe väaschte Sied.)

¹¹ Mau rajcht erfoarne Vekjindja motten utjelieet, wan dee em Deenst fa Jehova waut nieet proowen. En de Tiet von de COVID-19-Krankheit schreewen Eltestasch von eene Vesaumlunk en Sied-Korea: “Eenje dochten, daut see nich mea em Deenst gonen kunnen wäajen äare Jesuntheit. Oba nu prädjen dee äwa Internet. Dree Sestren, waut aul enne 80 sent, haben sikj daut jelieet, un nu prädjen dee meist jieda Dach” (Psa. 92:15-16). Wurscht du jleichen mea em Deenst to doonen un noch opp aundre Wäaj uttofinjen,  woo goot Jehova es? Hia es eenjet, waut du wurscht doonen kjennen.

12. Waut vesprakjt Jehova deejanje, waut sikj opp am veloten?

¹²Lia opp Jehova to vetruen. Hee vesprakjt ons väl Säajnungen, wan wie opp am vetruen un am ons bastet jäwen (Mal. 3:10). Fabiola, eene Sesta en Kolumbien, haft krakjt daut beläft. See wull soo schwind aus mäajlich Pionia sennen, nodäm aus see sikj haud deepen loten. Oba see un äa Maun musten beid schaufen, om fa äare dree Kjinja to sorjen. Un aus see dan daut Ella haud, daut see Auldpenschen kjrieen kunn, bäd see iernstlich to Jehova om Help. See sajcht: “Jeweenlich dieet daut lang, bat eena de Auldpenschen kjricht, oba bie mie dieed daut mau eene Moonat, nodäm daut ekj mie haud aunjejäft. Daut wia soo aus een Wunda!” Twee Moonat lota wort see dan Pionia. Nu es see aul enne 70 un es aul mea aus 20 Joa em Pioniadeenst. En dee Tiet haft sea acht Menschen jeholpen, sikj deepen to loten. See sajcht: “Wan ekj mie uk eenjemol schwak feel, halpt Jehova mie oba jieda Dach, daut ekj wieda Pionia sennen kaun.”

13-14. Waut vonne Biespels kjennen ons halpen, opp Jehova to vetruen un mea fa am to doonen?

¹³Lia von dee, waut opp Jehova vetruden. En de Schreft jeft daut väle Biespels von soone, waut sikj en Jehova sienen Deenst sea aunstrenjden. Un välmol jeef Jehova sienen Säajen ieescht dan, wan  dee bewäsen hauden, daut dee opp am vetruden. Biejlikj säajend Jehova Abraham ieescht dan, aus hee von sien Tus veloten haud, “onen to weeten, wua hee han sull” (Heb. 11:8). Jakob kjrieech ieescht dan eenen besondren Säajen, nodäm daut hee met dän Enjel jeresselt haud (1. Mo. 32:25-31). Un aus de Israeliten bat doa wieren, en daut vesproakne Launt nentogonen, kunnen dee ieescht dan derch dän Jordan-Riefa gonen, nodäm aus de Priesta en dän vollen Riefa nenstaupten (Jos. 3:14-16).

¹⁴ Du kaust uk von Jehova siene Deena en de vondoagsche Tiet lieren, waut sikj opp am veleeten un mea fa am deeden. Payton un siene Fru Diana jleichten daut biejlikj sea, Erfoarungen von Breeda to läsen, waut mea em Deenst fa Jehova deeden, soo aus de Artikjels “Dee wieren wellich reed toom halpen”. * Payton sajcht: “Aus wie dee läsden, wia daut fa ons soo, aus wan wie wäm wudden tookjikjen, waut eene scheene Moltiet eet. Je lenja wie tookjikjten, je dolla jankad ons daut, selfst uttofinjen, woo goot Jehova es.” Met de Tiet trocken Payton un Diana dan doahan, wua daut aun mea Help fäld. Hast du dise Artikjels mol jeläst? Un hast du de Videos opp jw.org mol jekjikjt “Äwa de gaunze Welt” prädjen un Waut junge Menschen sajen – Daut baste Läwen? Dit kaun die opp Jedanken brinjen, daut du uk mea em Deenst doonen west.

15. Woo kaun ons daut halpen, wan wie ons de rajchte Frind sieekjen?

¹⁵Sieekj die de rajchte Frind. Ons jankat daut ea, waut to äten, waut wie noch kjeenmol jeschmakjt haben, wan wie met soone toop sent, waut daut jleichen. Krakjt soo jankat ons daut, mea fa Jehova to doonen, wan wie met soone toop sent, waut Jehova aun de ieeschte Städ stalen. Kent un Veronica, een Poa Lied, haben krakjt daut beläft. Kent sajcht: “Onse Frind un Famielje rooden ons too, niee Sachen em Deenst to proowen. Wie worden en, daut wie ons daut ea wuagen, waut nieet to proowen, wan wie met soone toop wieren, waut daut ieeschte no Gott sien Rikj sochten.” Nu deenen Kent un Veronica aus Sondapionieren en Serbien.

16. Wuarom sell wie reed sennen fa Jehova waut opptojäwen, soo aus daut Jlikjnis en Lukas 12:16-21 wiest?

¹⁶Sie reed fa Jehova waut opptojäwen. Wie brucken fa Jehova nich aules oppjäwen, waut ons scheen jeit (Liera 5:18-19). Oba wan wie nich reed sent Sachen opptojäwen, om mea fa Jehova to doonen, dan kjenn wie dänselwjen Fäla moaken aus de Maun en Jesus sien Jlikjnis. Dee schauft väl, om een makeljet Läwen to haben, oba jeef nuscht om Gott rom (läs Lukas 12:16-21). Christian, een Brooda, waut en Frankreich wont, sajcht: “Ekj jeef Jehova un miene Famielje nich de Tiet un Krauft, waut ekj wudd haben kunt.” Hee un siene Fru worden sikj dan eenich Pionia to woaren. Oba om daut to doonen, musten dee äare Oabeit aufsajen. Om fa äa Läwen to sorjen, fungen dee aun fa aundre reintomoaken. Un dee lieeden daut, met weinja Jelt foadich to woaren. Haft sikj daut werkjlich jeloont? Christian sajcht: “Ons Deenst helt nu mea en un wie haben väl Freid doabie to seenen, woo Bibelstudiums un Wadabesuchs mea von Jehova lieren.”

17. Wuarom kaun daut fa ons schwoa sennen, niee Sachen em Deenst to proowen?

 ¹⁷Sie reed opp aundre Wäaj to prädjen (Apj. 17:16-17; 20:20-21). Shirley, eene Pioniasesta en de Stäts, must en de Tiet von de COVID-19-Krankheit waut bie äaren Deenst endren. Aum Aunfank jankad ar daut nich sea, äwa Fon to prädjen. Aus se ar dan en de Deenstwäakj weesen, woo daut schauft, funk see aun, daut räajelmässich to doonen. See sajcht: “Aum Aunfank haud ekj een bät Angst, oba nu jeit mie daut scheen. Nu kjenn wie met mea Menschen vetalen aus ea von Hus to Hus!”

18. Waut kaun ons halpen met Trubbels foadich to woaren, wan wie mea em Deenst doonen wellen?

¹⁸Nemm die waut väa un proow daut notokomen. Wan doa dan Trubbels oppkomen, dan bäd wie om Help un kjikjen doano, woo wie met dee omgonen kjennen (Spr. 3:21). Sonia, waut aus Pionia en eene Grupp en Europa deent, wua Romani jerät woat, sajcht: “Ekj jleich daut emma, miene Plons opp Papia opptoschriewen un daut doa hantodoonen, wua ekj daut leicht seenen kaun. Ekj hab opp mienen Desch een Bilt met eenen Kjriezwajch. Wan ekj mie fa waut entscheiden mott, kjikj ekj emma opp daut Bilt un denkj doaräwa no, wua miene Entscheidunk hanfieet.” Sonia prooft, rajcht äwa äare Schwierichkjeiten to denkjen. See sajcht: “Jieda niee Loag, waut doa oppkjemt, kaun entwäda soo sennen aus eene Waunt, waut mie em Stich es, ooda eene Brigj, waut mie halpt, doa hantokomen, waut ekj mie väajenomen hab. Daut es gaunz doano, woo miene Enstalunk es.”

19. To waut sell wie ons eenich sennen?

¹⁹ Jehova säajent ons opp veschiedne Wäaj. Wie kjennen am wiesen, woo väl wie am räakjnen, wan wie ons bastet doonen, om am to lowen (Heb. 13:15). Wie kjennen biejlikj proowen, noch mea em Deenst to doonen, daut hee ons noch dolla säajnen kaun. Well wie jieda Dach utfinjen, “woo goot de HAR es”. Dan woa wie soo sennen aus Jesus, waut säd: “Mien äten es daut, daut ekj däm sienen Wellen doo, dee mie jeschekjt haft, un sien Woakj verechten doo” (Joh. 4:34).