1-2. Ha gutadila Ngimbo 34:8, itshi tuajiya gutshita ha gumona khadilo dia Yehowa dia guhana?

TANGIZA egi muthu mumoshi wa guhana ima ya gudia uvi khenji uyidile gale ndo. Itshi wajiya gutshita? Wajiya guyitala muabonga, guyinukha, gutanga ndaga jiko jiatadila ima yene nga guhula athu ako gula ana suanguluga nayo. Uvi hagula ujiye gula wajiya gusuanguluga nu ima yene nga ndo, aye hakhaye udi naye guyilola.

² Tuajiya gulonguga ndaga jiavula jiatadila khadilo dia Yehowa dia guhana, gula tudi mutanga Biblia nu mikanda yetu nu gulandula ba diskur adi muzuela ndaga jiabonga Yehowa wakalegele aphangi’etu. Uvi mbatukotelesa diago egi Yehowa udi wabonga, gula esue hakhetu ‘tualola’ khadilo dienji dia guhana. (Tanga Ngimbo 34:8.) Tuzulenu gifezegeselo gimoshi gidi mumonesa luholo tuajiya guyikalagala. Tangiza egi, udi mutshigina gukalegela Yehowa mudimo wa tangua diagasue, uvi ha gutaganesa felela diene, udi naye gusombegesa ndaga jiko mu monyo waye. Yajiya gukhala egi wana tanga ndaga jiazuelele Yesu egi gula tuahaga Ufumu wa Nzambi ha fundo dia thomo, Yehowa mbawutuhana ima tudi nayo funu. Uvi aye hakhaye khenji wamonele gale ndo gutagenesewa gua laji diene. (Mat. 6:33) Uvi gutshigina guetu mu ndaga jiatulayele Yesu guana gutukuatesa ha gutuna gukalagala ba depanse avula-vula nu ha gusombegesa programe ya mudimo wetu ha gudihana muavula mu mudimo wa gulongesa. Gutshita ngenyi mbagutukuatesa ha gumona luholo Yehowa wana gutuhana ima tudi nayo funu nu ha ‘gulola’ hakhetu khadilo dienji dia guhana.

3. Ha gutadila Ngimbo 16:1, 2, akuatshi Yehowa wana hana ima yabonga?

³ Yehowa wakhala ‘wabonga gudi athu agasue,’ ikhale gudi athu anyi anago gumujiya. (Ngi. 145:9; Mat. 5:45) Uvi wana hana ima yabonga  yavula gudi athu ana gumuzumba nu ana gumukalegela nu mutshima wawo wagasue. (Tanga Ngimbo 16:1, 2.) Henyaha tutadilenu ndaga jiko jiabonga Yehowa wana gutukalegela.

4. Luholo lutshi Yehowa wana monesa khadilo dienji dia guhana gudi athu ana kuata ufuta nenji?

⁴ Tangua tuana kalegela ndaga tuana longuga gudi Yehowa, tuana mona luholo ndaga jiene jiana gutukuatesa mu monyo wetu. Ha gufezegesa, tangua tualongugile ndaga jiavula jiamutadila nu tuasendesele gumuzumba, watukuatesele ha gubemba gutangiza nga gukalagala ndaga jinyi jianago gumusuanguluisa. (Kol. 1:21) Gungima, tangua tuadihanele gudi Yehowa nu tuabatijiwe, watuhanele ima iko yavula gifua, mutshima waphelegeta nu ufuta wakola nenji.—1 Phet. 3:21.

5. Luholo lutshi Yehowa wana gutukuatesa mu mudimo wa gulongesa?

⁵ Yehowa wana landula gutuhana ima yabonga tangua tuana gudihana muavula mu mudimo wa gulongesa. Wakhala muenya sonyi ba? Akombeledi avula a Yehowa ana gudivua nji ngenyi. Yajiya gukhala egi gutuama egi ubue Temue wa Yehowa, wakhalelego mutangiza egi gudi nu lusugu mbawuya mukokola gu mufulo wa muthu ushigo mujiya ha gumulongesa lukuma luabonga. Uvi mangino, yene ndaga wana kalagala tangua diagasue. Yehowa wagukuatesele diago ha gukhala nu gusuanguluga mu mudimo wa gulongesa! Wagukuatesele nji mu maluholo avula. Ha gufezegesa, wagukuatesele ha guhena tedie tangua wataganele nu umbalagaji. Yehowa wagukuatesele nji ha guwunguluga verse yabonga watangele muthu watshiginyile gugutegelela. Waguhanele ngolo jia gulandula gulongesa tangua athu ako atunyile gugutelela mu mudimo wa gulongesa.—Yel. 20:7-9.

6. Luholo lutshi formasio tuana heta gudi Yehowa yana monesa khadilo dienji dia guhana?

⁶ Yehowa wana monesa nji khadilo dia guhana luholo ana gutuhana formasio mukunda nu mudimo wa gulongesa. (Yone 6:45) Tuana longuga luholo tuajiya guta mata nu athu mu mudimo wa gulongesa mu gudibungisa gua mukatshi dia phoso. Ngenyi tuana kalegela maluholo ene tangua tudi mu mudimo wa gulongesa. Yajiya gukhala egi matangua ako tuana guvua woma ha gukalegela ba metode ahe-ahe mu mudimo wa gulongesa, uvi gula tuaakalegela, tuajiya gumona egi ba metode ene adi abonga diago. Gudibungisa gua mu hungu nu ba asamble, ana gutukuatesa ha gukalegela ba metode ako a gulongesa anyi adi khenji tuaakalegele gale ndo mu mudimo wa gulongesa. Ba metode ene ajiya nji gutuhana woma, uvi gula tuaakalegela, Yehowa mbawutushimbiga. Henyaha tutadilenu ima yabonga Yehowa mbawutuhana gula tudi mukalegela ba metode ahe-ahe a gulongesa ha gumuhana ima yetu ya gubalega ndando, ikhale tudi mutagana nu ndaga jia luholo lutshi. Gungima tuza gumona luholo tuajiya gutaganesa mafelela ene.

7. Ndaga itshi yabonga mbatuheta gula tudi mutshita yagasue ha gudihana muavula mu mudimo wa gulongesa?

⁷ Tuana kuata ufuta wakola nu Yehowa. Tutadilenu gifezegeselo gia phangi Samuel * udi mukulu, wana kalagala mudimo wa gulongesa nu mukaji’enji gu Colombie. Akhalele mukalagala mudimo wa avundji a njila mu hungu diawo. Luholo akhalele mutshigina gukalagala muavula mudimo wa gulongesa, azudile desizio dia guya mu hungu dinyi diakhalele nu funu ya ukuateshi. Ha gutaganesa felela diene, asombegesele ndaga jiko mu monyo wawo. Phangi Samuel udi muzuela egi: “Tuakalegele longo didi mu mukanda wa Matayo 6:33, tuabembele nji gusumba ima yinyi tuakhalelego nayo funu. Uvi yakhalele lamba ha gumbemba inzo yetu. Inzo yene yatungiwe mu luholo tuakhalele mu luholo tuakhalele mutshigina, tuasombelego nji makuta gudi muthu ha guyitunga.” Tangua phangi muene nu mukaji’enji ayile mu hungu diene, akotelesele egi akhalelego luko mukalagala ba depanse avula gifua luholo akhalele  mukalagala gumbo diawo. Udi muzuela egi: “Tuamonele diago luholo Yehowa wakhalele gutukuatesa mu ba desizio agasue tuakhalele muzula nu luholo akhalele muhana mvutu gu isambu yetu. Tuana jiya egi wana suanguluga nu ndaga tuana kalagala nu tuana mona guzumba guenji mu maluholo avula gubalega.” Aye nji wajiya gudihana muavula mu mudimo wa gulongesa ba? Gula idi ngenyi, wajiya gusha mutshima egi mbawukolesa diago ufuta waye nu Yehowa. Mbawuguhana nji ima yagasue udi nayo funu.—Ngi. 18:25.

8. Ndaga jiazuelele phangi Ivan nu mukaji’enji Viktoria jidi gutulongesa itshi?

⁸ Tuana khala nu gusuanguluga mu mudimo wetu wa gulongesa. Tala ndaga jiazuelele phangi Ivan nu mukaji’enji Viktoria, adi avundji a njila gu Kirghizistan. Asombegesele ndaga jiavula mu monyo wawo hagula ajiya gukhala ba volontere mu midimo yavula ikhale mu mudimo wa gutunga. Phangi Ivan udi muzuela egi: “Tuakhalele gudihana muavula mu mudimo wagasua akhalele gututoga ha gukalagala. Tuakhalele muhuila mu ngueze, uvi tuakhalele nu gusuanguluga handaga tuakhalele mujiya egi tuakhalele mukalegela ngolo jietu mu mudimo wa Yehowa. Tuakhalele nji nu gusuanguluga handaga tuahetele mafuta avula nu ba eksperiance avula mu mudimo wene.”—Mako 10:29, 30.

9. Ndaga jitshi phangi mumoshi wana kalagala ha gudihana muavula mudimo wa gulongesa, ikhale wana tagana nu malamba? Mbuto itshi ana heta?

⁹ Tuana khala nu gusuanguluga mu mudimo wa Yehowa ikhale tangua tuana tagana nu malamba. Ha gufezegesa, phangi Mirreh udi mukhetu wa gafunda wa gukola gu gifutshi gimoshi gu Afrique de l’Ouest. Wakhalele docteur, uvi tangua abembele gukalagala mudimo wene, wabuile muvundji wa njila. Phangi Mirreh wakhalele mukata misongo yakola, hene yakhalele lamba gudi muene ha guwenda muabonga. Wakhalele mukalagala phamba tangua dimoshi mu mudimo wa inzo nu inzo. Uvi wana longesa muavula mu mafundo a athu avula. Wakhala nu athu avula wana vutugila nu wana longesa Biblia, ako mukatshi diawo wana gualongesa mu telefone. Mukunda natshi phangi Mirreh wana tshigina gukalagala muavula mu mudimo wa Yehowa? Udi muzuela egi: “Ngana zumba Yehowa nu Yesu Klisto nu mutshima wami wagasue. Ngana kombelela Yehowa tangua diagasue ha gungukuatesa ha gukalagaIa muavula mudimo wenji.”—Mat. 22:36, 37.

10. Ha gutadila 1 Phetelo 5:10, itshi Yehowa wana hana athu ana kalagala muavula mudimo wenji?

¹⁰ Yehowa wana gutuhana nji formasio iko. Phangi Kenny udi muvundji wa njila gu Île Maurice, wamonele diago giamatshidia gia ndaga eyi. Tangua alongugile giamatshidia, wabembele guya gu université, wabatijiwe, gungima wasendesele mudimo wa tangua diagasue. Udi muzuela egi: “Ngakhalele mutshigina gukhala gifua profete Yeshaya yonu wazuelele egi: ‘Ame owu! Ngutume!’” (Yesh. 6:8) Phangi Kenny wakalegele mudimo wa gutunga mu mafundo avula, wakuatesele nji mu mudimo wa gubalumuna mikanda mu muzuelelo diawo. Udi muzuela egi: “Ngahetele formasio yakhalele gungumonesa ndaga ngakhalele naye gukalagala ha gutagenesa muabonga inemo yami.” Uvi alongugilego phamba ndaga jiatadila mudimo wenji. Walongugile nji ndaga jiko. Udi muzuela luko egi: “Ngakotelesele egi gudi nu ndaga jinyi ngajiyilego gutshita. Ngalongugile nji makalegelo abonga ngajiya gukudisa ha gukhala mukombeledi wabonga wa Yehowa.” (Tanga 1 Phetelo 5:10.) Aye nji wajiya gusombegesa ndaga jiko mu monyo waye hagula Yehowa aguhane formasio mu maluholo ako ba?

11. Ndaga jitshi aphangi a akhetu a gu Corée du Sud ana kalagala ha gudigana muavula mu mudimo wa gulongesa? Mbuto jitshi ana heta? (Tala gifuanesa holu dia gizula.)

¹¹ Matemue a Yehowa anyi ana gumukombelela sendese mualeha, ana khala nji nu funu ya formasio gula a ahana mudimo uko uhe-uhe wa gukalagala. Mu sungi wa misongo ya Coronavirus, akulu a mu hungu dimoshi gu Corée du Sud asonegele egi: “Aphangi anyi akhalele mutangiza egi ajiyilego  gukalagala mudimo wa gulongesa mukunda nu ukhashi, henyaha adi mulongesa mu njila ya vidéoconférence. Aphangi a akhetu thathu adi nu ivo gubalega 80, alongugile luholo lua gukalegela ordinater ha gukalagala muabonga mudimo wa gulongesa. Henyaha adi mulongesa lusugu nu lusugu.” (Ngi. 92:14, 15) Wana tshigina gudihana muavula mu mudimo wa gulongesa ha gulola khadilo dia Yehowa dia guhana ba? Tutadile ndaga wajiya gutshita ha gutaganesa felela diaye.

12. Ndaga itshi Yehowa wana gulaya gudi athu ana gumushila mutshima?

¹² Khala mushila Yehowa mutshima. Yehowa wana gutulaya egi mbawutuhana ima yavula yabonga gula tuamushila mutshima nu tuamuhana ima yetu ya gubalega ndando. (Mal. 3:10) Phangi Fabiola wana khala gu Colombie wamonele nji luholo Yehowa wataganesele felela edi mu monyo wenji. Wakhalele mutshigina gubua muvundji wa njila wa tangua diagasue gula wabatijiwa. Uvi muene wakhalele mukalagala mudimo ha gukuatesa mulumi’enji nu an’enji thathu. Hene, tangua akhalele mutshigina gubemba mudimo wene, wakombelele Yehowa muavula hagula amukuatese. Udi muzuela egi: “Athu ana gunengena masugu avula hagula asendese gufutshiwa mbongo jia pansio. Uvi ame tangua ngabembele mudimo, ngasendesele gufutshiwa mbongo gungima dia mbeji imoshi. Yakhalele diago ndaga ya gushimana!” Gungima dia mbeji mbadi, wabuile muvundji wa njila. Henyaha udi nu ivo gubalega 70, wakalagala gale ivo gubalega 20 mu mudimo wa tangua diagasue. Wakuatesele gale nji athu 8 ha gubatijiwa. Udi muzuela luko egi: “Matangua ako muila wana gunguleba, uvi Yehowa wana gungukuatesa lusugu nu lusugu ha gulandula gulongesa.”

13-14. Ifezegeselo itshi yajiya gugukuatesa ha gushila Yehowa mutshima nu ha gudihana muavula mu mudimo wa gulongesa?

 ¹³ Zula malongo mu ifezegeselo ya athu akhalele mushila Yehowa mutshima. Biblia udi nu ifezegeselo yavula ya athu adihanele muavula mu mudimo wa Yehowa. Ifezegeselo yavula yana monesa egi, Yehowa washimbigile akombeledi’enji avula tangua akalegele ndaga jiakhalele mumonesa egi ana gumushila mutshima. Ha gufezegesa, Yehowa washimbigile Abalahama, phamba tangua abembele inzo yenji ‘ngatshima gakhalelego mujiya fundo gakhalele muya.’ (Heb. 11:8) Yakobo nji wahetele gishimbigo gia ndando gungima dia gulua nu muanjelo. (Gis. 32:24-30) Tangua enya Isalele akhalele hehi ha gungina mu Mavu a Gutendelela, azawugile Muta wa Yordani phamba tangua nganga-nzambi jiadiatele mu meya.—Yosh. 3:14-16.

¹⁴ Wajiya guzula malongo mu ifezegeselo ya akombeledi’enji a Yehowa a mu tangua dietu anyi ashile mutshima gudi muene nu akalegele muavula mudimo wenji. Ha gufezegesa, phangi Payton nu mukaji’enji Diana, akhalele musuanguluga gutanga mene jia aphangi ana kalagala muavula mudimo wa Yehowa, gifua mene ana zuelala mu longo “Ils se sont offerts volontairement.” * Phangi Payton udi muzuela egi: “Tangua tuakhalele mutanga mene jia aphangi, tukhalele gudivua gifua tudi mutala muthu udi mudia ima yawaha. Gutshita ngenyi guana gutuhana zala ya ‘gulola ha gumona egi Yehowa udi wabonga.’” Gungima phangi Payton nu mukaji’enji Diana ayile mukalagala mudimo fundo diakhalele nu funu ya alongeshi avula. Watangele gale longo diene ba? Watalele gale nji video yana zuela egi: Prédication dans des régions isolées: Australie nu video Prédication dans des régions isolées: Irlande jidi mu jw.org ba? Ikadigilo eyi yajiya gugukuatesa ha gumona maluholo wajiya gudihana muavula mu mudimo wa gulongesa.

15. Luholo lutshi mafuta abonga ajiya gutukuatesa?

¹⁵ Khala mutomba mafuta abonga. Gula tudi mubalegesa tangua nu athu adi mudia ima inyi khenji tuayidile ndo, tuajiya gusendesa guzumba ima yene. Luholo lumoshi nji, gula tudi mubalegesa tangua nu athu anyi ana haga Yehowa ha fundo dia thomo mu monyo wawo, mbayitukutesa ha gukamba nji maluholo tuajiya gukalagala muavula mudimo wa Nzambi. Yene ndaga yakalegele phangi Kent nu mukaji’enji Veronica. Udi muzuela egi: “Mafut’etu nu enya fami yetu atukolesele ha gulongesa mu maluholo ako. Tuakotelese egi luholo tuakuatele ufuta nu athu akhalele muhaga Ufumu wa Nzambi ha fundo dia thomo, yatukuatesele ha gukalagala mudimo wa gulongesa mu luholo luko.” Mangino phangi Kent nu mukaji’enji Veronica adi ba pionye spesiale gu Serbie.

16. Ha gutadila gifezegeselo gia Yesu gidi mu Luka 12:16-21, mukunda natshi tudi naye gusombegesa ndaga jiko mu monyo wetu?

¹⁶ Kalagala usombegeshi mukunda nu Yehowa. Yehowa ana gututoga ndo ha gubemba ima yetu yagasue tudi nayo ha gumusuanguluisa. (Mulo. 5:19, 20) Uvi gula tuatuna gudihana muavula mu mudimo wa Yehowa handaga tushigo mutshigina gubemba ima yetu tuana zumba, tuajiya gubua gifua muthu munu Yesu wazuelele mu gifezegeselo gienji. Muthu muene wakhalele mukalagala mudimo wakola hagula akhale nu ima yavula diago, uvi wabuitshile Nzambi mutshima. (Tanga Luka 12:16-21.) Phangi Christian wana jinga gu France, udi muzuela egi: “Ngakhalelego mubalegesa tangua nu enya fami yami, ngakhalelego nji gudihana muavula mu mudimo wa Yehowa.” Muene nu mukaji’enji azudile desizio dia gubua avundji a njila. Uvi ha gutaganesa felela diawo, akhalele naye gubemba midimo yawo. Ha guheta ima akhalele nayo funu, asendesele gukalagala mudimo wa guweva ima ya athu, akhalele nji musuanguluga nu makuta azonda akhalele muheta. Phangi Christian nu mukaji’enji adi nu gusuanguluga  luholo abembele ima yawo iko ha gubua avundji a njila ba? Udi muzuela egi: “Henyaha tudi nu gusuanguluga luholo tuana gudihana muavula mu mudimo wa gulongesa. Tuana khala nji nu gusuanguluga, tangua tuana mona athu tuana longesa Biblia nu athu tuana guvutugila mulonguga ndaga jiatadila Yehowa.”

17. Mukunda natshi yajiya gukhala lamba gudi esue ha gukalegela ba metode ahe-ahe mu mudimo wa gulongesa?

¹⁷ Khala hehi ha gukalegela ba metode ahe-ahe a gulongesela. (Makal. 17:16, 17; 20:20, 21) Phangi Shirley udi muvundji wa njila gu États-Unis. Wakhalele naye nji gusombegesa ba metode a gulongesa mu tangua dia misongo ya Coronavirus. Uvi wakhalele muvua woma ha gulongesa mu telefone. Gungima tangua mutadi muwendji wajile gutala hungu diawo, wahetele formasio ya luholo lua gukalegela telefone mu mudimo wa gulongesa. Henyaha wana longesa muavula mu telefone. Udi muzuela egi: “Thomo ngakhalele muvua woma, uvi henyaha gudi nu gusuanguluga diago ha gulongesa mu telefone. Tuana longesa athu athu avula mu telefone gubalega tangua tuakhalele mulongesa inzo nu inzo!”

18. Itshi yajiya gutukuatesa ha gukalagala muavula mudimo wa gulongesa ikhale tudi mutagana nu malamba?

¹⁸ Londega programe nu kalagala yagasue ha guyitaganesa. Tangua tuana tagana nu malamba, tuana kombelela Yehowa ha gutukuatesa nu tuana tangiza muabonga ndaga tudi naye gukalagala. (Ish. 3:21) Phangi Sonia udi muvundji wa njila wa tangua diagasue mu hunji dimoshi dia zuelelo dia Romani gu Europe. Udi muzuela egi: “Ngana sonega ndaga ngudi mutshigina gukalaga gu papie, gungima ngana haga papie yene ha fundo ngajiya gukhala guyitala tangua diagasue. Ngana khala nu dessin dimoshi ha mesa ami didi mumonesa njila mbadi jidi muya gu khanda jia gudisha. Gula gudi mutshigina guzula desizio, ngana tala njila jiene mbadi, gungima ngana tangiza gula desizio diene mbadingukuatesa ha gutagenesa mafelela ami nga ndo.” Phangi Sonia wana kalagala yagasue ha gutadila malamba enji mu luholo luabonga. Udi muzuela luko egi: “Ngazudile desizio dia gutadila malamba agasue adi gungubuila gifua muta udi gungukanga njila ha gutaganesa felela diami nga ndo gifua pont idi gungukuatesa ha gutaganesa felela diene.”

19. Desizio ditshi tudi naye guzula?

¹⁹ Yehowa wana gutumonesela khadilo dia guhana mu maluholo avula. Tuajiya gumonesa egi tuana guhana Yehowa mersi mukunda nu ima wana gutuhana gula tudi mukalagala yagasue ha gumutumbuisa. (Heb. 13:15) Tuajiya nji gudihana mu maluholo agudisha mu mudimo wenji. Ngenyi Yehowa wajiya gutuhana ima yavula gubalega. Hene, lusugu nu lusugu, tukambenu maluholo tuajiya ‘gulola ha gumona egi Yehowa udi wabonga.’ Ngenyi mbatuzuela gifua Yesu egi: ‘Ima yami ya gudia idi gukalagala gutshigina gua Tata wangutumine nu gumanesela mudimo wenji.’—Yone 4:34.