NKHANI YOPFUNZIRA 34
‘Lawani’ ubwino wa Yahova—Mungalawe tani?
‘Lawani ndipo wonani kuti Yahova ni wabwino. Wodala ni munthu yemwe wathawira kwa iye.’—SAL. 34:8.
NYIMBO NA. 117 Ubwino wa Yehova
VOMWE TIPFUNZIRE *
1-2. Mobverana na Salimo 34:8, ko tingapfunzire tani ubwino wa Yahova?
GANIZIRANI kuti mwapasiwa chakudya chomwe mwenze mukanati kuchidyako. Koma imwepo mungachidziwe bwino ndawa yakuti munkuching’anisisa, kubva kununkhira kwake, kudziwa kuti achiphikatani panango kubvunza wanthu womwe adachidyako kale. Koma njira ibodzi yomwe mungachidziwire bwino maninge ni kuchilawa.
2 Tingapfunzire ubwino wa Yahova mwa kulewenga Baibolo, mabukhu yathu na kubvesera anango akambafotokoza vomwe Yahova wawachitira. Koma kuti tifikane pakumudziwa bwino Yahova, tingafunikire ‘kulawa’ tekha ubwino wake. (Lewengani Salimo 34:8.) Kuti tibvese momwe tingachitire vimwivi naboni tilinganize tene. Panango tinkufuna kuchita utumiki wa nthawe zose, koma kuti tikwanilise cholinga chathu, tichadekana kukhala moyo wosafuna vizinji. Panango takhala tinkulewenga kwa nthawe itali polomisi yomwe Yesu adanena yakuti tikaikha va Ufumu pa malo yakuyamba, Yahova adzatipase vofunika pamoyo wathu. Koma tikanati tayesako kuti tiwone peno Yahova angatichitiredi vimwivi. (Mat. 6:33) Koma tikakhulupirira vomwe Yesu adatipolomisa, tingachepese vogulagula, kuchepesa nthawe yophata basa nkuikhira nzeru maninge pa utumiki. Tikachita teno, tingachite kuwona tekha kuti Yahova ankutithandizadi pa vosowa vathu. Apo ndiye kuti ‘tinkulawa’ tekha ubwino wa Yahova.
3. Mobverana na Salimo 16:1, 2, ko ni mbani yemwe achatambira ubwino wa Yahova?
3 Yahova ni ‘wabwino kwa tose,’ podiya kwa wale womwe achamudziwalini. (Sal. 145:9; Mat. 5:45) Koma wale womwe achatumikira Yahova na moyo wawo wose adalisiwa maninge. (Lewengani Salimo 16:1, 2.) Wonankoni njira zinango za momwe tichaphindulira na ubwino wa Yahova.
4. Ko Yahova achawonesa tani ubwino wake kwa wale womwe ayamba kukhala naye paushamwali?
4 Nthawe zose tikambaphatisira basa vomwe tapfunzira kwa Yahova, vinthu vitifambira bwino pa moyo wathu. Patidapfunzira va iye nkuyamba kumukonda, iye wakhala ankutithandiza kugwebana na vinthu vomwe vidakatisiyanisa na iye. (Akol. 1:21) Ndipo patidadzipereka kwa iye nkubatizika, tawona momwe ubwino wa Yahova watithandizira kukhala na chikumbumtima chabwino ndipo ushamwali wathu na iye walimba maninge.—1 Pet. 3:21.
5. Ko tingachitetani kuti timbaphindule na ubwino wa Yahova mu umboni?
5 Tingapitirize kuphindula na ubwino wa Yahova tikambaingizira utumiki wathu. Ko imwepo ndimwe wamanyazi? Atumiki wa Yahova azinji anayo. Panango imwepo mukanati kukhala ntumiki wa Yahova mungaganizakolini kuti mungadzayende muyi na muyi kumbakalalikira wanthu ntontholo wabwino. Koma ntsiku zino, imwepo mulalikira nthawe na nthawe. Ndipo Yahova wakhala ankukuthandizani kuti mumbakondwe na basa yolalikira. Iye achakuthandizani pomwe kukumbukira malemba yofika pamoyo yomwe mungamuwerengere munichiro muyi. Ndipo achakupasani mphanvu kuti mupitirize kulalikira olo mudera yomwe wanthu achabveseralini.—Yer. 20:7-9.
6. Ko mapfunziro yomwe Yahova achatipasa yachawonesatani ubwino wake?
6 Yahova achawonesa pomwe ubwino wake pakutipfunzisa kuti timbalalikire bwino. (Yoh. 6:45) Misonkhano yomwe tichakhala nayo nkati mwa sondo, tichabva vitsanzo va ulaliki vabwino vomwe vichatithandiza maninge mu umboni. Pakuyambirira vingakhale voshupa kuphatisira basa njira inyowani, koma tikandoti taiphatisira basa tichawona kuti niyothandiza maninge mu gawo yathu. M’misonkhano yathu ya mpingu na yakulu-yakulu tichalimbikisiwa kuphatisa basa njira zosiyanasiyana zolalikilira zomwe panango tenze tikanati kuziphatisira basa. Nthawe zinango, tingafunike kusiya malo yathu yabwino, ndipo vimwevi vingachitise Yahova kutidalisa. Tikambirane madaliso yanango yomwe yangabwere ndawa yakuchita vomwe tingakwanise kwa Yahova mobverana na momwe vinthu viliri pamoyo wathu. Tikambirane pomwe njira zomwe tingaingizirire utumiki wathu.
YAHOVA ACHADALISA WANTHU WOMWE ACHAMUTHEMBA
7. Ko tingadalisiwe tani peno tinkuyesesa kuingizira utumiki wathu?
7 Tichamufenderera maninge Yahova. Wonani chitsanzo cha nkulu munango dzina yake Samuel, * yemwe ankutumikira ku Colômbia pabodzi na nkazi wake. Banja mweyi imbakondwa kuchita upainiya mu mpingu wa kumuyi kwawo, koma adawona kuti vingakhale bwino kuingizira utumiki wawo mwa kuyenda kumalo yomwe kuchadekana olalikira azinji. Kuti akwanilise cholinga chimwichi, iwo angadekana kuimisa basa zinango zomwe angaphata. Samuel adati: ‘Tidaphatisa basa lemba ya Mateyu 6:33 ndipo tidaima kumbandokhalira kugulagula vinthu. Koma chinthu chomwe chenze choshupa maninge ni kusiya nyumba yathu. Yenze idakonzewa momwe ise timbafuniradi ndipo tenze tidamaliza kulipira vose.’ Padafulukira mumpingu unyowani, ambapagali kobiri zing’onong’ono pa nyumba yomwe ambakhala. Samuel adati: ‘Tidachita kuwona tekha momwe Yahova ambatitsogolelera na momwe ambadawirira mapemphero yathu. Timbatsimikiza kuti Yahova ankukondwa nase ndipo timbawona chikondi chake munjira yakuti chikhaliro tenze tikanati kuwonako.’ Ko ndimwe wokonzeka kuingizira utumiki wanu? Peno mwadawira kuti inde, dziwani kuti mukateno mudzakhale pa ushamwali wolimba na Yahova ndipo iye adzakusamalireni.—Sal. 18:25.
8. Ko mwapfunzira chani pa vomwe Ivan na Viktoria adafotokoza?
8 Tichagumana chimwemwe pa utumiki wathu. Bvani vomwe Ivan na Viktoria womwe ankukhala ku Kyrgyzstan adafotokoza. Iwo adapitiriza kukhala moyo wosafuna vizinji kuti akwanise kudzipereka pa utumiki uliwose kuphatanidzapo kuyenda ku chimango. Ivan adati: ‘Timbaphata basa mwakhama pa utumiki uliwose womwe tingapasiwe. Podiya kuti pakufika mawulo timbakhala woneta, timbakhala wokondwa na wokhutira pakudziwa kuti taphatisa basa mphanvu zathu pa basa ya Ufumu. Tidakondwa kukhala na azishamwali azinji ndipo tidakondwa pomwe na vochita vizinji vosayebweka.’—Maliko 10:29, 30.
9. Ko mulongo yemwe ankugumana na mabvuto adachita viponi kuti aingizire utumiki wake, ndipo adadalisiwa tani?
9 Tichagumana chimwemwe pakutumikira Yahova podiya kuti vinthu ni voshupa pamoyo wathu. Mwakulinganiza, Mirreh ni mulongo wamasiye na wokalamba wa ku África. Pomwe iye adapuma pa basa yake adayamba kuchita upainiya. Mirreh ambadwala matenda yomwe yadamuchitisa kuti ambandokwanisa kulalikira ora ibodzi pantsiku. Koma iye wenze wokonzeka kuchita vizinji mu umboni. Iye ambachitisa mapfunziro yazinji ya Baibolo, mawulendo yobwereza yazinji ndipo wanthu anango ambawalalikirira pafoni. Ko ni chani chidamulimbikisa Mirreh kuti ayambe upainiya? Iye adati: ‘Inepano nikonda maninge Yahova na Yesu Khrisitu. Ndipo nipemphera kwa Yahova nthawe na nthawe kuti anithandize kuchita vose vaningakwanise pakumutumikira.’—Mat. 22:36, 37.
10. Ninge mwinkufotokozera lemba ya 1 Petulo 5:10, ko wanthu womwe ankuyesesa kuingizira utumiki adalisiwa tani na Yahova?
10 Yahova achatipfunzisa kuti tiphate bwino basa yake. Kenny yemwe ankuchita upainiya ku Mauritius adachita kuwona yekha kuti Yahova atipfunzisadi. Pomwe iye adapfunzira chowonadi, adasiya mapfunziro ya ku universidade, adabatizika ndipo adayambiratu utumiki wa nthawe zose. Iye adati: ‘Nimbafuna kuchitambo ninge mneneri Yesaya yemwe adati: ‘Ine nilipo! Nitumizeni!’’ (Yes. 6:8) Kenny adathandizira basa yomanga nyumba zizinji, ndipo adathandizira pomwe kutsumbudzulira mabukhu yofotokoza Baibolo mu chiseweredwe chake chobadwa nacho. Iye adati: ‘Nidatambira thereni yomwe idanichitisa kuti nikhale wabuya pa utumiki wangu.’ Koma iye adapfunzira vizinji osati kundodziwa chabe mwangaphatire basa. Iye adati: ‘Nidapfunzira kuti pali vomwe ningakwaniselini kuchita ndipo nidazindikira makhalidwe yomwe ninkufunika kuyesesa kuyakulisa kuti nikhale ntumiki wabwino wa Yahova.’ (Lewengani 1 Petulo 5:10.) Vingakhalembo bwino kwa imwepo kuganizira momwe vinthu viliri pamoyo wanu kuti Yahova akupfunziseni munjira zinango.
Banja inkulalikira kudera komwe kuchadekana olalikira va Ufumu azinji; mulongo wachitsikana ankuthandiza kuchimango cha Nyumba ya Ufumu; banja yachikulire inkuchita ulaliki wa pafoni.Wose mwawa ni wokondwa pa utumiki wawo (Onani ndime 11)
11. Ko alongo atatu waku Coreia do Sul adayesesa tani kuingizira utumiki, ndipo adaphindula tani? (Onani foto ya pakhava.)
11 Olo wanthu womwe akhala Mboni kwa nthawe itali, peno ankufuna kuchita utumiki unyowani afunikana kupfunzisiwa basi. Nkati mwa nthenda ya koronaviru, akulu wa mumpingu wa ku Coreia do Sul adati: ‘Wanthu womwe poyamba ambaganiza kuti angakwaniselini kulalikira ndawa ya thanzi, manje ankukwanisa kulalikira pa vidiyokonferensiya. Alongo atatu wa magole 80 adapfunzira mwangaphatisire basa kompiyuta pakulalikira ntsiku iliyose.’ (Sal. 92:14, 15) Ko mungafune kuingizira utumiki wanu kuti mulawe na kuphindula maninge na ubwino wa Yahova? Wonani vinthu vinango vomwe vingakuthandizeni kukwanirisa cholinga chanu.
MOMWE MUNGAKWANILISIRE CHOLINGA CHANU
12. Ko Yahova ankuwapolomisa chani wanthu womwe achamuthemba?
12 Pfunzirani kuthemba Yahova. Iye ankupolomisa kuti adzatidalise maninge tikamuthemba pakuchita vose vatingakwanise. (Mal. 3:10) Mulongo Fabiola wa ku Colômbia adachita kuwona yekha Yahova ankukwanirisa polomisi mweyi. Iye angada kuyamba upainiya wokhazikika padandoti wabatizika. Koma mwamuna wake na wana wake atatu ambathemba iye kuti awasamalire. Panthawe yomwe iye adapuma pa basa yake, adapemphera maninge kwa Yahova kuti amuthandize. Iye adati: ‘Kazinji-kazinji vitenga nthawe kuti munthu abvumiziwe kupuma pa basa, koma ine nidabvumiziwa paudandomala mwezi ubodzi basi. Venze vodabwisa maninge.’ Minyezi yawiri patsogolo pake, iye adayambiratu upainiya. Iye manje anamagole ya m’ma 70 ndipo wachita upainiya kwa magole 20. Panthawe yose mweyi, iye wathandiza wanthu wokwana 8 mpakana kufika pobatizika. Iye adati: ‘Podiya kuti nthawe zinango nifika poneta, Yahova achanithandiza kuti nipitirize kuchita upainiya.’
Ko Abulahamu na Sara, Yakobo na wantsembe wale womwe adayambuka Yorodano adawonesa tani kuti ambathemba Yahova? (Onani ndime 13)
13-14. Ko ni vitsanzo viponi va wanthu womwe adathemba Yahova na kuingizira utumiki wawo?
13 Vomwe tinkupfunzira kwa wanthu womwe adathemba Yahova. Baibolo ichafotokoza vitsanzo vizinji va wanthu womwe adadzipereka maninge pa basa ya Yahova. Nthawe zizinji Yahova ambadalisa atumiki mwawa pokhapokha peno achita chinthu chowonesa kuti ankumuthemba. Mwakulinganiza, kuti Yahova adalise Abulahamu, adayamba wawona kuti iye wasiya nyumba yake ‘podiya kuti ambadziwalini komwe ankuyenda.’ (Aheb. 11:8) Yakobo adayamba walimbana na mngelo kuti adalisiwe bwino. (Gen. 32:24-30) Pomwe ntundu wa Aizirayeli ungayenda kukangena mu Dziko yopolomisiwa, wantsembe adayamba angena mu kamadzi ka Yorodano kuti gulu ipitepo bwino.—Yos. 3:14-16.
14 Mungaphindule pomwe na vitsanzo va Mboni za ntsiku zino zomwe zidathemba Yahova kuti zikwanilise volinga. Mwakulinganiza, m’bale Payton na nkazi wake Diana, adaphindula maninge na kulewenga nkhani za abale na alongo womwe adaingizira utumiki wawo ninge zogumanika pakuti: ‘Anadzipereka ndi Mtima Wonse.’ * M’bale Payton adati: ‘Patidawerenga nkhani zimwezi, tidadzibva ninge tinkunyang’anira munthu yemwe ankudya chakudya chabwino. Pomwe nthawe imbapita tikundomunyang’ana, timbakhumbira mpaka kufunambo ‘kulawa nkuwona kuti Yahova ni wabwino.’’ Payton na Diana adafulukira kudera yomwe kumbafunika olalikira azinji. Ko imwepo mudawerengako kale nkhani mwizi? Ko mudanyang’anirako kale mavidiyo yakuti: Kulalikira M’dera Lakutali—Australia na yakuti Kulalikira M’dera Lakutali—Ireland yomwe yali pa jw.org? Mavidiyo mwaya yangakuthandizeni kuwona njira zomwe mungaingizirire utumiki wanu.
15. Ko kukhala na azishamwali wabwino kuchatithandiza tani?
15 Salulani azishamwali wabwino. Isepo tizowowera kudya chakudya cha khaindi inango tikakhala nthawe itali na munthu yemwe akonda kudya chakudya mwicho. Nchibodzibodzimbo na vomwe vichachitika tikambakhala nthawe itali na wanthu womwe achapereka moyo wawo pakutumikira Yahova. Isembo tidzakhale na shungu yakuda kuingizira utumiki wathu. Banja ya m’bale Kent na mulongo Veronica adawona kuti vimwevi nishuwadi. Kent adati: ‘Azishamwali na azibale wathu adatilimbikisa kuti tiyeseko njira zinyowani za utumiki. Tidadziwa kuti kubverana maninge na wanthu womwe achafaga Ufumu chakuyamba kuchathandiza kuti tichitembo vizinji.’ Kent na Veronica manjeuno ankuchita upainiya wapadera ku Sérvia.
16. Mobverana na fanizo ya Yesu yogumanika pa Luka 12:16-21, ndawa chani tichadekana kukhala wofunisisa kuchita vizinji?
16 Tumikirani Yahova mwakhama. Sikuti tingachite kudzimaniratu vinthu vose pakufuna kukondweresa Yahova. (Mla. 5:19, 20) Podiya vili tene, tikalekeratu kuchita vizinji pa basa ya Mulungu, tingalingane na munthu wa mufanizo ya Yesu yemwe adayesesa kukhala na vinthu vizinji koma angatumikiralini Mulungu. (Lewengani Luka 12:16-21.) M’bale munango dzina yake Christian wa ku França adati: ‘Nenze nilibe mpata wotumikira Yahova olo wokhalako pabodzi na banja yangu.’ Iye na nkazi wake adasaina kuti ayambe upainiya. Koma kuti akwanilise cholinga chawo mwechi, angadekana kusiya basa yawo. Kuti akwanise kudzisamalira adayamba basa yotsukatsuka vinthu ndipo iwo adapfunzira kukhala wokhutira. Ko iwo adakhala wokondwa kusiya vinthu vizinji kuti ayambe upainiya? Christian adati: ‘Manje tinkukondwa maninge na basa yolalikira ndipo vitikomedza kuwona kuti wanthu womwe tinkupfunzira nawo Baibolo ankudziwa Yahova.’
17. Nchani chingatithandize kuyesa njira zinyowani zolalikirira?
17 Khalani wokonzeka kuchita utumiki uliwose. (Mac. 17:16, 17; 20:20, 21) Shirley yemwe ni mpainiya ku Estados Unidos, angadekana kuchinja vinthu vinango ndawa ya nthenda ya koronaviru. Pakuyamba, iye ambazeza kuti ayambe kulalikira pafoni. Koma padapfunzisiwa na wonyang’anira dera pambachezera mpingu wawo, iye adayamba kulalikira pafoni nthawe zose. Iye adati: ‘Pakuyamba vimbanishupa, koma manje vinkunikomedza. Tinkukwanisa kucheza na wanthu azinji kuposha womwe tidakawagumana muyi na muyi.’
18. Ko nchani chingatithandize kugwebana na mabvuto yathu pomwe tinkuyesesa kuingizira utumiki wathu?
18 Khalani na cholinga ndipo yesesani kuchikwanirisa. Tikambagumana na mabvuto, tichayesesa kupemphera kwa Yahova kuti atithandize kuwona vatingachite. (Miy. 3:21) Sonia yemwe ni mpainiya wokhazika ndipo ankutumikira mu kagulu ka chiseweredwe cha manja ku Europa adati: ‘Nikonda maninge kunemba volinga vangu pa pepa nkuikha pa malo yowonekera. Pa meza pangu nidanembapo njira ziwiri zoyenda ku malo yosiyana. Nikafuna kusalula vochita, nichanyang’ana njira zire nkumbadzibvunza kuti nisalule viponi.’ Sonia achayesesa kuganiza bwino pa mabvuto yomwe ankugumana nayo. Iye adati: ‘Vilivose vomwe vinganichitikire, chiri kwa inepano kusankhula kuti ko niviwone ninge chipupa chomwe chinikangise kukwanirisa volinga vangu panango ninge biridji yomwe inithandize kuvikwanirisa.’
19. Ko tingawonese tani kuti tinkutembeja madaliso yomwe Yahova watipasa?
19 Yahova achatidalisa munjira zosiyanasiyana. Tingawonese kuti tinkutembeja madaliso mwaya mwakuchita vose vatingakwanise kuti timukondwerese. (Aheb. 13:15) Vimwevi vingaphatanidzepo kuwona njira zatingaingizirire utumiki wathu, ndipo Yahova angatidalise maninge. Ntsiku iliyose naboni timbayesese ‘kulawa kuti tiwone kuti Yahova ni wabwino.’ Tikateno tidzakhale ninge Yesu yemwe adati: ‘Chakudya changu ni kuchita vofuna va yemwe adanituma na kumaliza basa yake.’—Yoh. 4:34.
NYIMBO NA. 80 “Talawani Ndipo Muwona Kuti Yehova Ndi Wabwino”
^ ndi. 5 Yahova ndiye chimake cha ubwino. Iye achapereka vinthu vabwino olo kwa wanthu woipa. Koma iye vimukomedza maninge akambapasa vinthu vabwino atumiki wake. Munkhani ino, tikambirane momwe Yahova achawonesera khalidwe ya ubwino kwa atumiki wake. Tiwone pomwe kuti ko wale womwe achaingizira utumiki wawo achaphindula tani mwapadera na ubwino wa Yahova.
^ ndi. 7 Madzina yanango yachinjiwa.
^ ndi. 14 Nkhani zimwizi zidayamba kubula mu Nsanja ya Olonda ndipo manje zinkugumanika pa jw.org. Yendani pakuti ZOKHUDZA IFEYO > ZOCHITIKA PA MOYO WA A MBONI ZA YEHOVA > KUKWANIRITSA ZOLINGA ZAUZIMU.
