1-2. Olsem Sams 34:8 talem, wanem nao iumi need for duim for lukim hao Jehovah hem gud tumas?

SAPOS samwan talem iumi for kaikaim kaikai wea iumi no traem bifor, hao nao bae iumi savve sapos iumi laekem? Maet iumi lukluk lo hem firstaem, smelem, askem wat nao olketa wakem lo hem, or askem narawan sapos hem laekem datfala kaikai. Bat best wei for savve sapos iumi bae laekem datfala kaikai hem for iumiseleva mas teistim.

² Olsem tu, iumi savve readim lo Bible and olketa pablikeson hao Jehovah hem gud. And tu, iumi herem experience blo olketa narawan abaotem olketa gud samting wea Jehovah duim for olketa. Bat for barava minim hao Jehovah hem gud, iumiseleva need for experiencem datwan. (Readim Sams 34:8.) Olsem example, maet iumi laek for kamap regular pioneer, bat for kasem datfala goal iumi need for katdaon lo waka for selen and changem olketa nara samting lo laef. Maet staka taem iumi readim hao Jesus sei Jehovah bae provaedem wanem iumi needim taem Kingdom hem first samting lo laef blo iumi, bat hem firstaem for iumi mas barava trustim datwan. (Matt. 6:33) Nomata olsem, iumi katdaon lo waka and selen iumi spendem, and iumi busy lo ministry. From datwan bae iumi experiencem hao Jehovah barava lukaftarem iumi and provaedem wanem iumi needim, and iumi barava lukim hao Jehovah hem gud tumas.

3. Olsem Sams 16:1, 2 storyim, hu nao Jehovah barava lukaftarem?

³ Jehovah hem “gud tumas long yumi evriwan,” nomata pipol wea no savve lo hem. (Sams 145:9; Matt. 5:45) Bat  Jehovah barava lukaftarem gud olketa wea lovem and worshipim hem. (Readim Sams 16:1, 2.) Bae iumi storyim samfala gud samting wea Jehovah duim for pipol blo hem.

4. Wanem gud samting nao Jehovah duim for olketa wea laek for worshipim hem?

⁴ Evritaem iumi followim wanem iumi lanem from Jehovah, iumi kasem gud samting. Taem iumi start for lane abaotem Jehovah and laek for worshipim hem, Jehovah helpem iumi for changem samfala wei blo iumi. (Col. 1:21) And then bihaen iumi dedicate lo Jehovah and baptaes, hem givim iumi gudfala konsens, and iumi fit for barava fren witim hem.​—1 Pet. 3:21.

5. Hao nao Jehovah helpem iumi lo ministry?

⁵ Jehovah helpem iumi for duim ministry tu. Staka brata and sista garem wei for shame, and maet iu olsem. Maet bifor iu kamap Witness, iu tingse from iu savve shame, bae hard for iu noknok lo haos blo samwan wea iu no savve lo hem, and then for preach lo hem. Nomata olsem, distaem iu no savve misstim preaching waka, and iu barava lukim hao Jehovah helpem iu for enjoyim ministry blo iu! Jehovah helpem iu taem iu preach tu. Olsem example, hem helpem iu for no fraet taem haosholder no kaen lo iu, hem helpem iu for tingim scripture wea barava fitim haosholder wea interest, and hem strongim iu for gohed preach nomata staka lo territory no interest.​—Jeremaea 20:7-9.

6. Hao nao Jehovah trainim iumi for duim ministry?

⁶ Nara gud samting Jehovah duim, hem trainim iumi for duim ministry. (John 6:45) Lo datfala midol week meeting iumi savve lukim olketa demonstration lo hao for duim ministry, and iumi savve followim olketa idea hia. Maet firstaem iumi hol bak for followim, bat taem iumi traem iumi lukim pipol lo territory interest lo story blo iumi. Lo olketa meeting and convention, olketa encouragem iumi for traem olketa difren wei for preach wea maet iumi no duim bifor. Maet iumi fraet for traem olketa samting hia, bat taem iumi traem Jehovah bae blessim iumi. Distaem bae iumi storyim olketa blessing wea iumi bae kasem sapos iumi trae for duim moa samting for Jehovah. Then bae iumi storyim hao iumi savve duim moa samting lo ministry.

7. Olketa wanem blessing nao olketa wea duim moa samting lo ministry savve kasem?

⁷ Iumi fren gud witim Jehovah. Tingim example blo Samuel, * wanfala elder, and waef blo hem wea stap lo Columbia. Samuel and waef blo hem hapi for duim pioneer waka lo kongregeson blo tufala, bat tufala laek for duim moa samting lo ministry and laek for muv go lo ples wea kongregeson garem need. For kasem datfala goal, tufala mas mekem samfala big change lo laef blo olketa. Samuel sei: “Mifala followim advaes lo Matthew 6:33 and stop for baem olketa samting wea mifala no needim. And tu, for muv go lo datfala ples mifala mas muv aot from haos wea mifala laekem tumas and wea mifala peim bak loan finis.” Bat gud samting happen for tufala lo niu assignment bikos olketa samting lo ples wea olketa muv go lo hem no expensive tumas, so tufala savve gohed pioneer lo there. Samuel  sei: “Mitufala lukim hao Jehovah barava helpem mitufala. Mitufala luksavve Jehovah hapi lo mifala and lovem mifala.” Waswe, iu tu fit for duim moa samting lo ministry blo iu? Sapos olsem, iu savve sure Jehovah bae lukaftarem iu and provaedem wanem iu needim.​—Sams 18:25.

8. Wanem nao iumi lanem from Ivan and Viktoria?

⁸ Iumi hapi. Ivan and Viktoria, wanfala hasband and waef from Kyrgyzstan wea pioneer disaed for no garem staka material samting, mekem tufala free for duim eni assignment, olsem construction. Ivan sei: “Mitufala barava waka hard lo each assignment wea mifala kasem. Bihaen waka mifala savve taed, bat mifala hapi and satisfae from mifala iusim strong blo mifala for duim Kingdom waka. And tu, mifala hapi for garem olketa gud fren and olketa naes memory from olketa assignment mifala duim.”​—Mark 10:29, 30.

9. Wanem nao helpem Sista Mirreh for duim moa samting lo ministry, nomata hem garem arthritis?

⁹ Iumi savve hapi lo waka blo Jehovah nomata iumi feisim hard samting lo laef. Tingim example blo Mirreh, wanfala widow lo West Africa wea hem doctor. Bihaen hem retire, hem start for pioneer. Bat Mirreh garem arthritis wea mekem body for pain, so hem savve duim nomoa wan hour lo haos tu haos. Nomata olsem, hem fit for duim trolley witnessing and hem garem staka return visit and olketa Bible study. Samfala lo olketa hia hem ringim lo telephone. Why nao Mirreh laek duim staka samting for Jehovah? Mirreh sei: “Mi duim olsem bikos mi barava lovem Jehovah and mi tinghae lo Jesus. And mi evritaem askem Jehovah for helpem mi for duim moa samting lo ministry.”​—Matt. 22:36, 37.

10. Olsem 1 Peter 5:10 storyim, wanem nao olketa wea duim waka for organization savve kasem?

¹⁰ Iumi bae kasem moa training from organization blo Jehovah. Kenny, wanfala pioneer lo Mauritius kasem training for duim olketa assignment blo hem. Bihaen hem lanem truth, hem stop for skul lo university, hem baptaes, and start for pioneer. Hem sei, “Mi laek for olsem profet Isaiah wea sei: ‘!Mi long hia! !Yu sendem mi!’” (Aesaea 6:8) Kenny waka lo tu-thri difren construction project, and tu, hem garem chance for transleitim samfala pablikeson lo hom languis blo hem. Kenny sei: “Mi kasem training wea helpem mi for duim olketa waka hia.” Bat Kenny lanem olketa nara samting tu. Hem sei moa, “Mi lanem mi need for waka lo samfala wei blo mi mekem mi kamap mature Christian.” (Readim 1 Peter 5:10.) Waswe, iu fit for duim eni waka wea bae mekem iu savve kasem training from organization blo Jehovah tu?

11. Wanem training nao thrifala olo sista lo South Korea kasem, and wanem nao kamaot from datwan? (Lukim piksa lo front page.)

¹¹ Olketa brata and sista wea willing for traem olketa difren wei for preach savve kasem training tu. Lo taem blo coronavirus, olketa elder lo wanfala kongregeson lo South Korea sei: “Samfala wea garem health problem and faendem hem hard for go lo haos tu haos, distaem olketa iusim technology for preach. Thrifala sista wea winim 80 years lanem hao for iusim computer for preach and klosap evriday olketa duim datkaen preaching.” (Sams 92:14, 15) Waswe, iu savve duim moa samting lo ministry mekem iu lukim hao Jehovah bae barava helpem iu? Bae iumi storyim samfala samting wea savve helpem iumi for kasem datfala goal.

12. Wanem nao Jehovah promis for duim for olketa wea depend lo hem?

¹² Depend lo Jehovah. Sapos iumi trustim Jehovah and duim best blo iumi lo waka blo hem, hem promis for blessim iumi. (Malakae 3:10) Fabiola, wanfala marit sista lo Colombia experiencem datwan. Bihaen Fabiola baptaes, hem laek for regular pioneer. Bat hem mas waka tu for help sapotim famili blo hem. So gogo taem hem redi for retire, hem prea lo Jehovah and sei hem laek for pioneer bat hem needim selen. Hem sei: “Lo kantri blo mifala olketa wea retire mas weit longtaem bifor olketa savve kasem selen from gavman, bat mi barava sapraes mi kasem bihaen wan month nomoa. Hem olsem wanfala mirakol!” Then bihaen nara tufala month Fabiola start for regular pioneer. Distaem hem winim 70 years, and hem pioneer finis for samting olsem 20 year. Insaed lo datfala taem hem helpem eitfala for kam insaed lo truth. Hem sei: “Nomata samfala taem mi no strong, evriday Jehovah helpem mi for followim schedule wea mi markem.”

13-14. Olketa wanem example nao savve helpem iumi for duim moa samting lo ministry and for depend lo Jehovah?

¹³ Followim example blo olketa wea depend lo Jehovah. Bible storyim staka example blo olketa wea mas duim samting firstaem bifor olketa kasem blessing from Jehovah. Olsem example, Abraham mas  lusim hom blo hem for go lo ples wea hem no savve, and then Jehovah blessim hem. (Hebrew 11:8) And tu, Jacob mas stragol witim wanfala angel firstaem bifor Jehovah blessim hem. (Jenesis 32:24-30) Nara example, hem olketa Israelite wea redi for go insaed lo Promis Land. Olketa priest mas firstaem step insaed Jordan River bifor olketa Israelite savve akrosim river for go lo narasaed.​—Josua 3:14-16.

¹⁴ Iumi savve followim tu example blo olketa brata and sista distaem, wea olketa duim moa samting lo ministry and wea depend lo Jehovah for helpem olketa. Olsem example, Payton and waef blo hem Diana, evritaem laek for readim story blo olketa brata and sista wea duim moa samting lo ministry, olsem lo olketa article wea garem title “Barava Willing for Go.” * Payton sei: “Taem mifala readim olketa story hia hem mekem mifala laek for duim moa samting lo ministry tu. Hem olsem mifala lukim samwan wea kaikaim naes kaikai and mifala laekem tu.” Gogo, Payton and Diana muv go lo ples wea needim help. Waswe, iu readim finis olketa article hia? Tufala naes video for lukim tu hem Witnessing in Isolated Territory​—Australia and Witnessing in Isolated Territory​—Ireland, wea stap lo jw.org. Olketa article and video hia maet helpem iu for savve hao iu savve duim moa samting lo ministry.

15. Wanem nao olketa fren blo iumi savve helpem iumi for duim?

¹⁵ Fren witim olketa wea bae encouragem iu for duim moa samting. Bae iumi laek for kaikaim kaikai wea iumi no traem bifor taem iumi lukim olketa fren blo iumi kaikaim and enjoyim datwan. Olsem tu, sapos iumi fren witim olketa wea busy lo waka blo Jehovah, datwan maet mekem iumi interest tu for duim moa samting lo ministry. Hem nao wanem hem happen lo Kent and Veronica, wanfala hasband and waef. Kent sei: “Olketa fren and famili encouragem mitufala for no hol bak for traem niu samting. Mitufala luksavve from mifala associate witim pipol wea busy lo waka blo Jehovah mifala kasem encouragement for traem samting wea mifala no duim bifor.” Distaem Kent and Veronica spesol pioneer lo Serbia.

16. Hao nao tokpiksa blo Jesus lo Luke 12:16-21 helpem iumi for no hol bak for duim moa samting for Jehovah?

¹⁶ No hol bak for duim moa samting for Jehovah. Nomata iumi busy lo ministry, iumi savve enjoyim laef. (Eklesiastes 5:19, 20) Maet iumi hol bak for duim moa samting for Jehovah from iumi tingim nogud iumi mas lusim olketa material samting. Bat iumi no laek for duim sem mistek olsem man lo tokpiksa blo Jesus wea hipimap staka material samting, bat hem no tingim God. (Readim Luke 12:16-21.) Christian, wanfala brata wea stap lo France sei, “Mi busy tumas so mi no garem staka taem for waef blo mi or for Jehovah.” Gogo, hem and waef disaed for pioneer, bat for kasem datfala goal tufala mas lusim waka blo tufala. Tufala startim smol bisnis for duim klining waka and lane for satisfae witim wanem tufala garem. Waswe, tufala enjoyim niu laef blo tufala? Christian sei, “Mifala barava enjoyim preaching waka and hapi  for teachim olketa return visit and Bible study abaotem Jehovah.”

17. Why nao maet iumi hol bak for traem olketa difren wei for preach?

¹⁷ Willing for traem olketa difren wei for preach. (Acts 17:16, 17; 20:20, 21) Shirley, wanfala pioneer lo United States mas duim telephone witnessing bikos lo coronavirus. Firstaem hem hol bak for traem datwan. Bat hem kasem training lo hao for duim telephone witnessing taem circuit overseer visitim kongregeson, and bihaen datwan hem duim nao. Shirley sei: “Firstaem mi fraet fogud, bat distaem mi barava enjoyim. Mifala story witim staka pipol winim taem mifala go from haos tu haos!”

18. Wanem nao iumi savve duim mekem no eniting stopem iumi for duim moa samting lo ministry?

¹⁸ No letem eni samting stopem iumi for kasem goal blo iumi. Sapos iumi laek for duim moa samting lo ministry bat problem kamap, wakemaot hao for deal witim datwan. (Provebs 3:21) Sonia, wanfala regular pioneer wea joinim Romany languis grup lo Europe sei hem savve raetem olketa goal blo hem lo pepa and putim lo wall. Taem hem mas disaedem samting, hem ting raonem gud wanem hem bae duim mekem datwan no affectim olketa goal blo hem. Sonia trae for no letem olketa problem mekem hem wikdaon. Hem sei: “Taem problem kamap, mi no laekem datwan for olsem wanfala wall wea stopem mi for kasem olketa goal blo mi, bat mi laekem datwan for olsem bridge wea bae helpem mi for kasem olketa goal hia.”

19. Hao nao iumi savve showimaot iumi tinghae lo olketa blessing from Jehovah?

¹⁹ Iumi kasem staka blessing from Jehovah. Iumi savve showimaot iumi tinghae lo olketa blessing hia taem iumi duim wanem iumi fit for duim for mekhae lo Jehovah. (Heb. 13:15) Maet iumi fit for duim moa samting lo ministry, and taem iumi duim datwan bae iumi lukim Jehovah blessim iumi. Evriday tingim wanem iumi savve duim for Jehovah, then iumi savve talem sem samting olsem Jesus wea sei: “Kaikai bilong mi hem for duim waka wea man wea sendem mi kam hem laekem mi for duim and for finisim datfala waka.”​—John 4:34.