1, 2. Salmo 34:8 wilacushganno, Jehová cuyaycalämashganchega, ¿imanotaj ricacämunga?

IMARAJ canman imaypis mana micushganchi cajta pipis maliycunapaj nimaptinchi. Manachi ricapashganchilachu, musquipashganchilachu o pitapis chay micuypita tapupashganchilachu ali canga, imano cashganta rasunpa musyanapäga maliycushganchipitarämi canga.

² Chaynolami Jehová cuyacoj cashgantapis musyashun Bibliatawan publicaciunninchicunata leir o waquincuna wilapämäshganchita wiyarpis. Pero rasunpa cuyacoj cashgantaga ricashun cawayninchicunachomi (leiriy Salmo 34:8). Mä tantiarcushun, Diosninchita lapan tiempunchiwan sirvinapäga waquincunaga charashganlawan cawapäcunanpämi calpachacärin. Maynachi wiyashcanchi Jesús wilacamushganta, payga nergan Diospa Gobiernunta puntaman churarga Jehová imayca bendiciuncunata gomänanchipaj. Ichanga maygalanchipis ricashcanchirächu chayno Jehová bendicimashganchita (Mat. 6:33). Chayno captinpis yaracuycanchila Jesús aunicushganman; tiempunchita camacächir, walcalawan cawacunchi y predicaciuncho yanapacunapaj calpachacunchi. Cay lapanchomi ricanchi Taytalanchi Jehová yanapaycalämashganchita; micuyta maliycushganchi japuymi Jehová bendicimashganchicunata maliycunchi.

3. ¿Picunatataj Jehová cuyapashpan bendiciunninta goycunga Salmo 16:1, 2 texto wilacushganno?

³ Taytalanchi Jehovaga “pï-maypäpis allimi” payta mana adurajcunatapis cuyapanshi (Sal. 145:9; Mat. 5:45). Ichanga  cuyapashpan ali nawilanwanga rican, paylata adurajcunatami (leiriy Salmo 16:1, 2). Noganchiraycur imacunata Jehová rurashganta canan ricärishun.

4. ¿Imanotaj Jehová cuyapashpan ali nawilanwan rican payta sirvir galaycojcunata?

⁴ Diosninchi imano cashganpita yachacurga, quiquinchicuna imano cashganchipis aliyarcunmi. Paypita yachacurga cuyarna galaycurganchi, chaymi yanapämäshcanchi juc yarpayniyojna canapaj y ali cajlatana imaypis ruranapaj (Col. 1:21). Y paylapäna cawanapaj aunishganchi wichan y bautizacushganchi wichanga masraj ricargunchi cuyapämashpanchi perdunamashganchita y wamrantano ricamashganchita (1 Ped. 3:21).

5. ¿Imanotaj Jehová yanapaycalämanchi predicaciuncho caycaptinchi?

⁵ Predicaciuncho caycarpis, Jehová cuyaycalämashganchega ricacämunmi. Öraga achcajmi manchacunchi puncun puncun yachachicoj aywarga, Diosta sirvir manaraj galaycurga ichanga yarpaylapis yarpashcanchichu jäpa runacunapa puncuncunata tacacur caycänapaj. Canan ichanga mana manchacuypana Jehovapa jutincho yachachicoj aywacunchi y nircur cushi cushila cuticamunchi. Jinamanpis predicaciunchoga Jehová yanapaycalämanchi pipis ofendimaptinchi mana piñacuylapa parlapänapaj. Y pilatapis Bibliapita yachachiycashganchi hora amanu maygan textulatapis tariycurga; o runacuna wiyayta mana munaptinpis yachachicuycarga, ¿pitaj yanapämashcanchi?, Jehovami yanapaycalämashcanchi (Jer. 20:7-9).

6. Yachaycachilämashganchicunachoga, ¿imanotaj ricacämun Jehová cuyacoj cashgan?

⁶ Jina cuyapämashpanchimi Jehovaga ali yachachicoj canapaj yachaycachilämashcanchi (Juan 6:45). Pulan semana reuniuncunachomi ali yachachicoj canapaj demostraciuncuna ruracämun. Öraga manchacushwanmi reuniuncho yachacushganchinola marcanchicho predicanapaj, pero alimi canga calpachacuptinchega. Reuniuncunachopis, asambleacunachopis yarpächimanchimi jucnopapis Diospita yachachicunapaj. Ichanga nishwanmi ‘nogaga yachacashcäna caynola Diospita yachachicunäpaj’, pero jucnopapis Diospita yachachicurga payga bendicimäshunmi. Canan yachacushun, imaycacunapa pasarpis y Diosta cushichishganchiraycur ima alicunatataj paypita chasquishcanchi. Nircur yachacushun imatataj rurashwan Diosta sirvir maslata ruranapaj.

7. ¿Ima bendiciuncunatataj tarishun Diosta sirvir maslata yanapacuptinchi?

⁷ Jehovamanmi más guelicushun. Ancianuno yanapacoj Samuel * wauguipita parlarcushun. Payga Colombia naciunchomi warminwan yanapacun. Ishcanpis precursormi caycargan congregaciunnincho, pero maslata yanapacuyta munarmi juc marcapa aywacärergan. Puntata imata rurapäcushganpita Samuel cayno nin: “Mateo 6:33 textuman yarparmi imacunatapis alapa rantipacamushganchinachu. Ichanga sasami cargan wasëcho imaycäcunata jaguirir aywacärinapaj”. Juc laduchona caycarnash cuentata gocärergan walcalawanpis cawayta puedipäcushganta. Caytapis Samuel ninmi: “Jehovaga pushaycalämanchimi y mañacushganchitapis wiyaycalämanchimi. Cananga wiyarcaycämi ‘gamcunawanmi caycä y cuyayculämi’ Jehová niycalämashganchita”.  ¿Gampis chaynola yanapacamunquimanchuraj? Chayno captenga Jehovamanmi guelicunqui y payga chaparcushunquimi (Sal. 18:25).

8. ¿Imatataj yachacunqui Ivanwan Viktoria imata rurashgancunapita?

⁸ Jehovata sirvir-rämi cushi cushila cawacunchi. Kirguistán naciuncho precursorcunano yanapacoj Iván y Viktoria matrimoniupita parlarcushun. Paycunaga tiempuntash camacächergan imacunachopis yanapacunanpaj. Localninchicunata sharcachiycho yanapacamushganpita Iván cayno nin: “Waran waranmi calpachacärergä. Trabajo ushaycho uticashga caycarpis cushi cushilami carcaycargä, musyapäcurgämi lapanpis Diospaj cashganta. Waquincunawan arur reguinacushgäcunataga imaypis gongaycärishächu” (Mar. 10:29, 30).

9. ¿Imatataj juc pani rurashga Diospita yachachicur maslata rurapacunanpaj y chayno rurashganpita imanotaj carcaycan?

⁹ Imacunapa pasarpis Diosninchita sirvirga cushi cushilami caycäshun. África Occidental nishgancho juc viuda paninchipita parlarcushun. Doctorano arushganpita witicurshi precursoraman ticrargan. Artritis gueshyawan nacarshi puncun puncun aywarga achca tiempupa ichirashgala caycanmanchu; chaymi predicaciuncho más horacunata rurananpäga jucnopapis yachachicunshi. Revisitancunaga caycanshi, waquincunatapis Bibliapita yachaycächin y telefunulapapis yachachicunshi. ¿Imanirtaj panilanchi chayno calpachacun? Paymi cayno nin: “Imanomi Jehovatawan Jesustapis alapa cuyayculä. Waran waran Taytalä Diosta ruwacö payta sirvir maslata ruranäpaj” (Mat. 22:36, 37).

10. 1 Pedro 5:10 texto wilacushganno, ¿imanotaj Jehová yanapaycun payta sirvinanpaj calpachacojcunata?

¹⁰ Mastapis Jehová yachaycachilämanchimi. Mauricio marcacho precursorno yanapacoj Kenny wauguipita parlarcushun. Diospita yachacuycashgan wichanshi universidäninta jaguiriycurgan y bautizacurna, lapan tiempunwan Diosta sirvir galaycurgan. Paymi cayno nin: “Isaías profetanomi cayta munä, paymi nergan: ‘Caycho noga caycä. Nogata cachaycamay ari’” (Is. 6:8). Kenny wauguinchega localcunata sharcachirshi arurgan y parlashgan rimaycho publicaciuncunata traducirpis. Paymi nin: “Puntalapitanami yachachipäcamargan imacunalachopis yanapacuptë shumaj arunäpaj”. Pero manash yachacurganchu imano arunalanpäga. Caytapis payga ninmi: “Yachacurgämi imano runa cashgächo aliyarcunäpaj chaynopa Jehovata sirvir cushichinapaj” (leiriy 1 Pedro 5:10). ¿Gampis Jehovata maslata sirvinayquipaj yachaycachiläshushgayquita jaguinquimanchuraj?

11. ¿Imatataj Corea del Sur naciuncho chacwanna caycarpis quimsa paninchicuna rurapäcushga? (Garancho caycaj fotuta ricay).

¹¹ Jucnopapis yachachicunmanmi achca watapana Diosta sirvejcunapis, paycunatapis Diosga yachaycachilangami. COVID-19 gueshya wichanmi, Corea del Sur nishgan naciunpita ancianucuna cayno wilacärergan: “Gueshyashganraycur waquincunaga yanapacaycämushgachu predicaciuncho, canan ichanga videulapa ali yanapacaycämun. Chacwanna caycarpis quimsa paninchicuna chayno videulapa yachachicuycan” (Sal. 92:14, 15). ¿Gampis imatataj ruranquiman Jehová cuyayculäshushgayquita ricänayquipaj? Gatejnin cajchona ima yanapäshunayquipaj ricärishun.

12. ¿Imatataj Jehová aunicun payman yaracojcunata?

¹² Jehovaman yaracuytaga yachacunquimanmi. Lapancho calpachacur Diosninchita sirvirga payga bendiciycalämäshunmi (Mal. 3:10). Colombia naciuncho cawaj Fabiola paninchega ricashgash Jehová imano bendicinganta. Bautizacurirlanash payga precursor regularno yanapacuyta munargan, pero runanpis y quimsa wamrancunapis wasicho ali cawapäcunanpäga pay arushganpitaräshi cargan. Chaynash trabajunpita witicunanpäna caycaptin, Jehovata alapa ruwacuycurgan yanapänanpaj. Cayno wilacun: “Arushgäraycur guellayta chasquinäpaj autoridäcunaman aywaycur papelnëcunata apargä. Öraga sasami canman autoridäcuna chasquishunayquipaj pero nogataga juc quillalachomi ali caycashganta nipäcamargan. Cay lapanpa guepanchoga Jehovami caycargan”. Chay wichanlachomi precursorno yanapacurgan. Cananga 70 watayojmi caycan y 20 watapana precursorno yanapacuycan. Pusaj runacunata bautizacärinanpaj yanapacushga. Paymi cayno nin: “Öraga calpaynajmi ricacö, pero Jehovami yanapaycaläman paypita yachachicur caycänapaj”.

13, 14. ¿Imacunataj yanapämäshun Jehovaman masraj yaracunapaj y payta sirvir maslata ruranapaj?

¹³ Jehovaman yaracoj runacunapita yachacuy. Bibliaga parlamunmi Diosta cuyaj achca runacunapaj. Öraga quiquincunami ali cajta rurar galaycärergan, y nircur-raj  Diosninchi bendiciunninta goycurgan. Abrahantaga Dios bendicirgan ‘mayman aywananpaj [...] mana musyaycar aywacuptinrämi’ (Heb. 11:8). Jacobpis bendiciunta chasquergan juc angelwan luchashga captinrämi (Gén. 32:24-30). Y israelitacuna Tierra Prometida nishganman chimpapäcunanpäga sacerdoticunarämi chaquincunata Jordán mayucho ushmachinan cargan (Jos. 3:14-16).

¹⁴ Canan wichan Testigucunapis Diosman yaracushpan alapa calpachacärin, paycunapitapis yachacushwanmi. Payton y Diana matrimoniupita parlarcushun, paycunaga “Se ofrecieron para ayudar” * nishgantash leipäcoj, waquin hermanucuna Diosta sirvinanpaj ima rurashganta musyapäcunanpaj. Runan cajmi cayno nin: “Imanomi pipis mishqui micuyta cushi cushila micucurcun, chaynomi leishgä hermanucunata ricargä. Imano Jehová paycunata cuyashpan yanapashganta”. Tiempuwanmi cay matrimonio juc marcapa aywacärergan. Alichi canman gampis waquincunapita yachacuptiqui y videucunatapis ricarcuptiqui. Ichanga cay videucuna canman Predicación en lugares apartados: Australia y Predicación en lugares apartados: Irlanda, cayga jw.org paginacho caycan. Cay lapanmi yanapäshunqui Diosta sirvir maslata ruranayquipaj.

15. ¿Imanotaj yanaparcamashwan Diosta cuyajcunawan juntacarga?

¹⁵ Piwan juntacashgayquita ricay. Waquincuna cushi cushila micurcaycajta ricarga noganchipis malircuyta munarishwanmi. Chaynolami Diosta cuyajcunawan juntacarga noganchipis Diosta sirvinapaj mastaraj calpachacuyta munashun. Mä Kent y Verónica matrimoniupita parlarcushun. Runan cajmi cayno nin:“Amigöcunawan familiäcunaga parlapämajmi Diosta jucnopapis sirvipäcunäpaj yarpachacärinäpaj. Diosta cuyajcunawan juntacashgämi yanapäcamargan Diosta sirvir mastaraj rurapäcunäpaj”. Cananga Serbia naciunchoshi ishcancuna precursor especialno yanapacurcaycan.

16. ¿Imacunacho calpachacunapätaj parlamun Lucas 12:16-21 texto?

¹⁶ Jehovapaj maslata ruranayquipaj calpachacuy. Pipis ninman ¿imaycäcunatarächuraj jaguiycushaj Diosta cushichinäpäga? (Ecl. 5:19, 20). Chayga canga imacunata cuyashganchipitami: Diosninchita o charashganchicunata. Jesús parlamurgan juc runapita, payga Diosta gongaycurshi charashgancunalata cuyargan (leiriy Lucas 12:16-21). Francia naciuncho cawaj Christian waugui cayno nin: “Jehovata sirvinäpaj calpachacuycargächu y familiäraycurpis alapa ruraycargächu”. Ishcancuna precursorno yanapacunanraycurshi trabajuncunata jaguiripäcurgan. Gastuncunapäga wasicunata pichapacurshi arupäcoj, chaynopa yachacärish walcalawan cawapäcunanpaj. Lapan calpachacärishganpitaga caytapis payga ninmi: “Cushicuypämi cargan predicaciuncho caycarga, Bibliapita yachacojcunapis y waquin runacunapis imano Diosta reguir galaycushganta ricarpis”.

17. Manchacuycarpis, ¿imatataj juc pani rurargan?

¹⁷ Jucnopapis yachachicunayquipaj camäpacuy (Hech. 17:16, 17; 20:20, 21). Estados Unidos naciuncho cawaj juc precursorano yanapacoj Shirley paninchega COVID-19 gueshyaraycurshi jucnopana yachachicur  galaycurgan. Payga manchacojshi telefunulapa yachachicuyta. Ichanga congregaciunta watucaj waugui chayaramuptinshi, yachacurgan imano chayta rurananpaj. Aumi, telefunulapana yachachicur galaycurgan. Paymi cayno nin: “Galaycunanlachoga manchacashgami caycargä. Canan ichanga cushi cushila caycä, puncun puncun aywaypitapis más runacunata cananga tariycunchi”.

18. ¿Imataj yanapämäshun Diosta sirviycashganchicho imacunapis ilajpita yurirircamuptin?

¹⁸ Diospaj maslata ruranayquipäga calpachacushgayquipitarämi canga. Imacunapapis pasarga Jehovatami mañacurinchi yanapämänanchipaj (Prov. 3:21). Europacho romaní rimaycho precursorano yanapacoj Sonia paninchimi cayno nin: “Ima ruranäpaj cajtaga guelgaycömi y maylamanpis lagaycömi ricacänanpaj. Ichic mesalächomi juc ichic dibujo amanu caycan. Chaychomi yurimun ishcay carreteracuna, caymi yarpachacächiman imata ruranäpaj acraptëga mayman chayachimänanpaj cajta”. Ima problemalapis captenga Soniaga manash alapa laquicunchu, caynomi nin: “Imacunapis ilajpita yurirircamuptenga quiquïpitami canga imano chayta vencinäpaj”.

19. ¿Imata rurartaj ricacämunga Diosninchi lapan gomashganchipita agradecido caycashganchi?

¹⁹ Imaycachopis Jehovaga bendiciycämanchimi, agradecido cashganchega ricacämunga payta alabanapaj calpachacuptinchimi. Y Jehovataga alabanchi paypita yachachicunapaj maslata rurarmi (Heb. 13:15). Chayno cashpanga masrächi bendiciunninta ricaycäshun. Chauras waran waran cuentata gocuycäshun imano Jehová cuyapamashpanchi ali nawilanwan ricaycalämashganchita. Jesusnola noganchipis nishun: ‘Nogapa micuynëga caycan cachamaj munashganta ruraymi y cumpliymi’ (Juan 4:34).