1, 2. Salmo 34:8-pi nishca shinaca ¿Jehová Dios alli cajta yachangapajca imatataj rurana canchij?

¿MANA nunca micushca micuna mishqui cashcata yachangapajca imatataj rurana canchij? Chaita yachangapaj ricushpalla, ashnachishpalla, shujtajcunata tapushpallaca mana saquirinachu canchij. Ashtahuanpish ñucanchijllataj chai micuna ima shina cashcata probashpami mishqui cashcata yachashun.

² Chashnallatajmi Jehová Dios cuidaj, ayudaj cashcataca Bibliata liyishpa, publicacioncunata liyishpa, huauqui panicunata Yayitu Dios ima shina bendiciashcata yachashpa paimanta yachai tucunchij. Pero Jehová Dios ñucanchijta cuidaj cashcata alli intindingapajca shuj micunitata probacuj shina Yayitu Dios ñucanchij causaipi ima shina cuidashcata, ayudashcatami ñucanchijllataj ricuna canchij (Salmo 34:8-ta liyipai). Caipi yuyashun. Jehová Diostaca tiempo completotachari sirvisha ninchij. Pero chaipajca ñucanchij causaipichari huaquin cambiocunata rurana tucunga. Tal vez Mateo 6:33-pi Jesús nishcataca achca cutinmi liyishcanchij. Chaipica Yayitu Diosta punta lugarpi churajpi paillataj ñucanchijman minishtirishca cosascunata cunamantami yachachin. Pero ñucanchijllatajca Yayitu Dios ima shina cuidashcataca manachari ricushcanchij. Chashna cashpapish Jesús nishcacunapi confiashpaca menos horascunallata trabajashpa, minishtirishca cosascunallahuanmi causai callarinchij. Chashnami Jehovamanta predicanataca punta lugarpi churanchij. Chaita rurajpica Jehová Diosllatajmi ñucanchijmanca minishtirishca cosascunata cushpa cuidanga. Pai ñucanchijta cuidajta ricushpami Yayitu Dios alli cajtaca ñucanchijllataj cuentata cushun.

3. Salmo 16:1, 2-pi nishca shinaca ¿Jehová Diosca picunatataj bendician?

³ Jehová Diosca tucuicunapaj allita ruraj Diosmi can (Salmo  145:9; Mateo 5:45). Pero paica paita sirvijcunatami ashtahuantajca cꞌuyan, paicunata bendician (Salmo 16:1, 2-ta liyipai). Cunanca Yayitu Dios paita sirvijcunata ayudangapaj imallata rurashcata ricushun.

4. ¿Jehová Diosca paimanta yachai callarijcunataca ima shinataj ayudan?

⁴ Yayitu Diospaj mandashcacunata ñucanchij causaipi pajtachishpaca allimi causanchij. Jehová Diosmanta yachai callarishpa paita cꞌuyajpica paillatajmi ñucanchij yuyaita, ñucanchij ruraicunata cambiachun ayudashca (Colosenses 1:21). Yayitu Diosman mañashpa paiman mingarijpi, bautizarijpicarin Jehová Diosmi ñucanchijmanca ashtahuan cꞌuyaita ricuchishca. Shinallataj alli concienciata charichun, paihuan alli apanacuchunpishmi ayudashca (1 Pedro 3:21).

5. ¿Jehová Diosca alli predicangapajca ima shinataj ayudashca?

⁵ Jehová Diosca alli predicangapajmi ayudashca. Achca huauqui panicunaca manchaita charishpapish Jehová Dios ayudajpimi huillashpa catishcacuna. Por ejemplo, canpish Diosta manaraj rijsishpaca mana rijsishca gentecunaman huasin huasin huillanataca manachari yuyashcangui. Pero Jehová Dios ayudajpimi cunanca cushilla huillashpa caticungui. Shinallataj gentecuna mana alli tratajpipish, mana uyasha nijpipish tranquilo sintirichun, cushilla huillashpa catichunmi Yayitu Diosca ayudacushca (Jeremías 20:7-9). Ashtahuancarin gentecunaman predicangapaj versocunata de memoria yuyarichunpishmi ayudashpa caticushca.

6. ¿Jehová Diosca ñucanchij alli predicashpa catichunca ima shinallataj yachachishpa ayudan?

⁶ Jehová Diosca ñucanchijta ima shina predicanata yachachishpami ayudacushca (Juan 6:45). Chaupi semana tandanacuipica gentecunaman ima shina predicanata valishca yuyaicunatami yachanchij. Maipica chai yuyaicunata pajtachingapajca asha manchaitami charinchij. Pero manchaita mishashpa, chai yuyaicunata pajtachishpaca allimi huillashun. Tandanacuicunapi, jatun tandanacuicunapipish ima shina telefonomanta cayashpa huillachun, cartacunata quillcashpa huillachun, carritocunahuan huillachunmi animancuna. Chaicunata pajtachishpaca cushillami predicashpa catishun. Diospaj bendiciontapishmi chasquishun. Cunanca Jehová Diosta ashtahuan sirvingapaj esforzarijpi pai ima shina ñucanchijta ayudashcata, bendiciashcatami yachashun. Qꞌuipaca ñucanchij metacunata pajtachingapaj imata ruranatapishmi yachashun.

7. ¿Diosta ashtahuan sirvijpica paica ima shinataj bendicianga?

⁷ Jehová Diosta ashtahuan sirvishpaca paipajmanmi ashtahuan cꞌuchuyashun. Pushaj anciano Samuelpi * yuyashun. Paica paipaj huarmihuanmi Colombiapi precursores carcacuna. Paicuna maipimi Diosta sirvi callarircacuna, chai congregacionpimi Yayitu Diosta cushilla sirvicurcacuna. Pero maipimi ashtahuan huillana minishtirin lugarpimi paicunaca Yayitu Diosta ashtahuan sirvisha nircacuna. Chaipajca huaquin cambiocunatami rurana carcacuna. Samuelca: “Mateo 6:33-pi ima nishcata pajtachingapajmi mana minishtirishca cosascunata randinata saquircanchij. Pero ñucanchijca propio huasitami charircanchij. Chai huasica alajami carca. Chaita saquinami sinchi carca. Pero qꞌuipaca minishtirishca cosascunallahuan, menos cullquihuan causai tucushcatami cuentata curcanchij. Jehová Diosta ayudachun mañajpica paica siempremi ñucanchij mañashcacunataca uyashpa cutichirca.  Cunanmi de verastij Yayitu Dios ñucanchijta ima shina ayudashcata, cuidashcataca cuentata cunchij” ninmi. ¿Canpish Yayitu Diostaca ashtahuanchu sirvisha ningui? Chaita rurashpaca canpish Jehová Diospajmanmi ashtahuan cꞌuchuyangui. Y paica canta cuidanataca manataj saquingachu (Salmo 18:25).

8. ¿Huauqui Iván, pani Viktoria parlashcamantaca imatataj yachanchij?

⁸ Jehová Diosta ashtahuan sirvishpaca cushillami sintirishun. Huauqui Ivanca paipaj huarmi Viktoriahuanmi Kirguistanpi precursorescuna cancuna. Paicunaca Diosta ashtahuan sirvingapaj, construccionpi ayudangapajmi minishtirishca cosascunallahuan causanata decidircacuna. Huauqui Ivanca: “Tandanacuna Huasicunata shayachingapajca tucui pudishcatami rurarcanchij. Maipica shaicushcami sintirircanchij. Pero Jehová Diospaj obrata apoyashcamantami yallitaj cushilla sintirircanchij. Shinallataj huauqui panicunahuan alli amigos tucushcamanta, paicunahuan alajata pasashcata yuyarishpami cushilla sintirinchij” ninmi (Marcos 10:29, 30).

9. ¿Shuj panica llaquicunata charishpapish Diosta ashtahuan sirvingapajca imatataj rurashca?

⁹ Llaquicunata charishpapish Jehová Diosta sirvishpaca cushillami sintirishun. Por ejemplo, África llajtamanta pani Mirrehca viuda, mayorllami can. Paica chai llajtapica doctorami carca. Doctora canamanta jubilarishpaca precursorami tucurca. Paica artritis nishca ungüita charishcamantami huasin huasinca casi shuj horallata predican. Pero carritocunahuanmi ashtahuan tiempota huillan. Shinallataj revisitacunata, Bibliamanta yachacujcunatami charin. Huaquincunataca telefonomanta cayashpami yachachin. ¿Pani Mirrehca imamantataj Yayitu Diostaca ashtahuan sirvisha nin? Paica: “Ñucaca Jehová Diosta, Jesustaca shungumantami cꞌuyani. Chaimantami Jehová Diostaca canta sirvingapaj, tucui pudishcata rurangapaj ayudahuai nishpa mañani” ninmi (Mateo 22:36, 37).

10. 1 Pedro 5:10-pi nishca shinaca ¿Jehová Diosta ashtahuan sirvingapaj esforzarijpica paica ima shinataj yachachin?

¹⁰ Jehová Diosca paita alli sirvichunmi yachachin. Huauqui Kennyca Mauricio llajtapimi precursor can. Paica Jehová Diosta rijsishpaca universidadpi estudianatami saquirca. Qꞌuipaca bautizarishpami Yayitu Diostaca tiempo completota sirvi callarirca. Paica: “Ñucaca profeta Isaías shinami ‘caipimi cani, ñucata cachahuai’ nini” ninmi (Isaías 6:8). Huauqui Kennyca Tandanacuna Huasicunata shayachishpa, pai parlan shimipi publicacioncunata traducishpami ayudashca. Paica: “Ñucataca Jehová Diosca chꞌican chꞌican trabajocunata pajtachichunmi alli yachachishca. Shinallataj ñucalla imatapish mana tucuita rurai tucushcatami yachashcani. Ashtahuancarin alli cualidadcunata charina minishtirishca cashcatami cuentata curcani” ninmi (1 Pedro 5:10-ta liyipai). Canpish Yayitu Dios mingashcata pajtachingapajca tiempota surcushpami pai yachachichun saquina cangui.

11. ¿Quimsa mayorlla panicunaca ashtahuan huillangapajca imatataj rurarcacuna? (Página 1-pi tiyaj fotota ricui).

¹¹ Achca huatacunata Jehová Diosta sirvijpipish Jehová Diosca paita alli sirvishpa catichunmi yachachin. COVID-19 tiyai horasca Corea del Surmanta pushaj ancianocunaca cashna nishpami quillcarcacuna: “Huaquin huauqui panicunaca ñaupaca mana tanto alli saludta charishcamanta, mayorlla cashcamantami predicanapica mana tanto ayudai tucurcacuna. Pero cai tiempopica quimsa panicunaca 80 huatacunata charishpapish videoconferenciamanta cayashpami predicanata yachashcacuna. Cunanca casin tucui punllacunapishmi huillanaman llujshincuna” nircacunami  (Salmo 92:14, 15). ¿Canpish Jehová Diosta ashtahuan sirvingapajca imallatataj rurana cangui?

12. ¿Jehová Diospi confiajpica paica ima shinataj bendicianga?

¹² Jehová Diospi confianata yachashunchij. Jehová Diospi confiajpi, paita sirvinata manataj saquijpica Yayitu Diosca achcatami bendicianga (Malaquías 3:10). Colombia llajtamanta pani Fabiolaca Jehová Dios paita ima shina bendiciashcatami ricurca. Paica bautizarishca huashallami precursora canata munarca. Pero familiatami mantinina carca. Chaimantami paica trabajomanta jubilaringapajca Jehová Diosta ayudachun mañarca. Paica: “Jubilarishca qꞌuipaca achca tiempo huashami cullquita cuncuna. Pero ñucamanca jubilarishca shuj quilla qꞌuipallami cullquita cui callarircacuna. Chaimi Jehová Dios ima shina ñucata bendiciashcata cuentata curcani” ninmi. Pani Fabiolaca ishqui quilla huashaca precursora canatami decidirca. Cunanca paica 70 huatacuna yallitami charin. 20 huatacunata yallimi paica precursorapish can. Cai tucui tiempopica 8 gentecunatami Yayitu Diosman mingarishpa bautizarichun ayudashca. Paica: “Huaquinpica fuerza illajmi sintirini. Pero Jehová Diosmi ñucataca cada punlla paimanta predicashpa catichun ayudashca” ninmi.

13, 14. ¿Jehová Diospi ashtahuan confiangapaj, paita ashtahuan sirvingapajca ima ejemplocunamantataj yachana canchij?

¹³ Diospi confiajcunamanta yachashunchij. Bibliapica huaquincuna Diosta ashtahuan  sirvingapaj ima shina esforzarishcatami yachachin. Paicunaca puntaca Jehová Diospi confiashcatami ricuchircacuna. Chai qꞌuipami paicunataca Diosca bendiciarca. Por ejemplo, Abrahamca Dios cusha nishcacunapi confiashcamantami maiman rinata mana yachashpapish paipaj huasita saquirca (Hebreos 11:8). Chai qꞌuipami paica Yayitu Dios ima shina bendiciashcata ricurca. Shinallataj Jacobpish shuj angelhuan macanacushca qꞌuipami Diospaj bendicionta chasquirca (Génesis 32:24-30). Israelitacunapish sacerdotecunaraj río Jordanta chꞌimbajpimi Dios cusha nishca Allpaman chꞌimbai tucurcacuna (Josué 3:14-16).

¹⁴ Cunan punllacunapish huaquin huauqui panicunaca Yayitu Diosta ashtahuan sirvingapajmi decidishcacuna. Paicunamantami yachai tucunchij. Por ejemplo, huauqui Paytonca paipaj huarmi Dianahuanmi “Se ofrecieron para ayudar” * nishca huauqui panicunapaj experienciamanta yachanata munarcacuna. Huauqui Paytonca: “Huauqui panicuna Yayitu Diosta sirvingapaj cushilla sintirijta ricushpaca paicuna mishqui micunata micucushcata ricucuj shinallami carcanchij. Paicunamanta ashtahuan yachashpaca ñucanchijpish Yayitu Diosta ashtahuan sirvingapajmi cai mishqui micunata micungapaj esforzarisha nircanchij” ninmi. Tiempohuanca cai cusa huarmica maipimi huillana minishtirin lugarpi sirvinamanmi rircacuna. Canpish Yayitu Diosta ashtahuan sirvina munaita charingapajca huauqui panicunapaj experienciacunamantami yachai tucungui. Cai catij videocunatapishmi ricui tucungui: Caru lugarcunapi huillashca informe y ¿Norteamérica llajtapi huauqui panicunaca ima shinataj mana manchaj cashcata ricuchincuna?

15. ¿Diosta punta lugarpi churajcunahuan pasashpaca imatataj rurashun?

¹⁵ Diosta sirvinata punta lugarpi churaj huauqui panicunahuan tiempota pasashunchij. Maipica huaquincunaca paicuna munashca micunata micuchunmi invitancuna. Chashnallatajmi Diosta punta lugarpi churaj huauqui panicunaca chaillatataj rurachun animangacuna. Paicunahuan tiempota pasashpaca Diosta ashtahuan sirvina munaitami charishun. Huauqui Kent, paipaj huarmica: “Ñucanchij amigocuna, familiacunami Yayitu Diosta ashtahuan sirvichunca animarcacuna. Jehová Diosta sirvinata punta lugarpi churajcunahuan pasashpaca Diosta ashtahuan sirvinatami decidircanchij” ninmi. Cunan punllaca paicunaca Serbia llajtapimi precursores especiales cancuna.

16. Lucas 12:16 al 21-pi nishca shinaca ¿imamantataj Jehová Diosta sirvinataca punta lugarpi churana canchij?

¹⁶ Maipica Jehová Diosta ashtahuan sirvingapajca huaquin cosascunatami saquina tucunga. Pero chaica mana nisha ninchu tucuita saquina cashcata (Eclesiastés 5:19, 20). Shinapish charishca cosascunallapi yallitaj ocuparishpa, Diosta sirvingapaj mana esforzarishpaca Jesús parlashca runa layami tucushun. Cai runaca yallitaj charishca cosascunapi ocuparishpami Yayitu Diosta cungarirca (Lucas 12:16-21-ta liyipai). Francia llajtapi causaj huauqui Christianca: “Jehová Diosta punta lugarpi churangapaj, ñuca familiata cuidangapaj tiempota mana surcucushcatami cuentata curcani” ninmi. Qꞌuipaca paica paipaj huarmihuanmi precursores canata decidircacuna. Pero chaita rurangapajca paicunapaj trabajotami saquina carcacuna. Mantinirishpa causangapajca pꞌichashpa trabajana uchilla negociotami pascarcacuna. Huauqui Christianca: “Bibliamanta yachacujcunaman, gentecunaman Jehová Diosmanta ashtahuan yachachishpaca cushillami sintirinchij” ninmi.

17. ¿Maipica chꞌican chꞌican huillanacunapica imamantataj mana participanchij?

 ¹⁷ Chꞌican chꞌican laya predicanapi participashunchij (Hechos 17:16, 17; 20:20, 21). Estados Unidosmanta pani Shirleyca COVID-19 ungüi tiyai horasmi huillanapi huaquin cambiocunata rurana carca. Cai panica telefonomanta cayashpa predicanatami ashata manchaj carca. Pero huauqui superintendente de circuitomi huauqui panicunata telefonomanta cayashpa ima shina huillanata yachachirca. Chashna yachachishca horasmantami pani Shirleyca telefonomanta cayashpa predicanataca manataj saquishca. Paica: “Callaripica ñucaca telefonomanta cayashpa huillanataca manchajmi carcani. Pero cunanca chashna predicashpaca cushillami sintirini. Ñaupaca huasin huasin rishpaca ashalla gentecunamanmi predicaj carcani. Pero cunanca telefonomanta cayashpaca achca gentecunamanmi predicani” ninmi.

18. ¿Ñucanchij churashca metacunata pajtachingapajca imatataj rurana canchij?

¹⁸ Ima metacunata churashpaca chaita pajtachingapaj esforzarishunchij. Ima problemacunata charishpaca chai problemahuan chꞌimbapurangapajmi Jehová Diosta ayudachun mañana canchij (Proverbios 3:21). Romaní shimita parlaj congregacionpi sirvij pani Soniaca: “Ñucaca ima metata pajtachingapajca shuj papelpi anotashpami ricunallapi churani. Shinallataj ñuca mesa jahuapipish shuj papelpimi ishqui ñancunata dibujashpa churani. Ñuca metacunata pajtachingapajca chai ishqui ñancunata ricushpami ima decisionta agllana cashcataca alli ricuni. Maipica ñucanchij causaipimi ima cambiocuna tiyan. Chai cambiocunata shuj jatun jarcaj patata shina ricunapaj randica ñucanchij chayana lugarman apaj puenteta shinami ricuna canchij. Chashnami ñucanchij churashca metacunata pajtachingapajca imallata rurana cashcata cuentata cushun” ninmi.

19. ¿Jehová Dios tucuita cushcamantaca ima shinataj agradicishcata ricuchina canchij?

¹⁹ Jehová Diosca achcatami bendiciashca (Hebreos 13:15). Paita agradicishcata ricuchingapajca paita sirvingapajmi tucui pudishcata rurana canchij. Chaita rurajpica Jehová Diosca ñucanchijtami ashtahuan bendicianga. Shinallataj pai alli cajta, cꞌuyaj, cuidaj cajtami cuentata cushun. Chaimi ñucanchijpish Jesús shinallataj: “Ñuca micunaca ñucata cachaj Yayapaj munaita rurana, pai rurai nishcata pajtachinami” nishun (Juan 4:34).