1, 2. Salmos 34:8 nisqanman hinaqa, ¿imataq yanapawachwan Jehova Dios kuyakuq kasqanmanta yachanapaq?

MANA mikusqanchik mikuyta pipas qaraykuwaptinchikqa, ¿muskiykuspa, qawaykuspa utaq pitapas tapuspallachu yachachwan gustawasqanchikta utaq mana gustawasqanchikta? Manam. Yachananchikpaqqa malliykunanchikraqmi.

² Yaqa chaynatam Jehova Diospa kuyakuq kasqanmantapas yachachwan bibliata hinaspa qillqanchikkunata ñawinchaspa chaynataq iñiqmasinchikkunata imayna yanapasqanmanta willakusqankuta uyarispa. Chaywanpas, astawanqa yachasun kikinchikta imayna yanapawasqanchikwanmi (qaway Salmos 34:8). Kaypi piensarisun: Ichapas tantiakuruwaq precursor kaspa Diosmanta astawan willakunaykipaq. Chaypaqqa wakin punchawkunallapiñachá llamkapakunayki kanqa, ichaqa yuyaymanayta qallaykuwaq: “Imaypas pisipuwaptinqa, ¡imaynaraq kasaq!”, nispa. Jesusmi nirqa: “Hinallayá puntata maskaychik Diospa munaychakuynintawan paypa munasqan allin ruwayta, hinaptinqa qusunkichikmi imam pisipususqaykichiktaqa”, nispa (Mat. 6:33). Chayna nisqanmanta mana iskayrayaspayki precursor kayta chaynataq kapuqllaykiwanña kawsakuyta qallaykuspaykim cuentata qukunki ima pisipusuqnikitapas Jehova Diosqa qususqaykita. Kikikita yanapasusqaykiwanmi yachankiqa Dios ancha kuyakuq kasqanmantaqa.

3. Salmos 31:19 nisqanman hinaqa, ¿pikunatam Jehova Diosqa astawan yanapan?

³ Jehova Diospa “kuyakuyninqa llapallan runakunapaqmi”. Payqa mana yupaychaqninkunatapas llakipayanmi (Sal. 145:9; Mat. 5:45). Ichaqa astawanmi yanapaykun tukuy sunqunwan yupaychaqninkunataqa (qaway Salmos 31:19). ¿Imakunapitaq payqa yanapawarqanchik? Qatiqninpiyá chaykunamanta yachasun.

4. ¿Imaynatataq Jehova Diosqa yanapawarqanchik payman asuykunanchikpaq?

 ⁴ Bibliata ñawinchaspanchikmi Jehova Dios kasukuyta qallaykurqanchik. Paymanta astawan yachasqanchikman hinam yanapawarqanchik mana allin piensayninchikta hinaspa mana allin kawsakuyninchikta saqinapaq. Yanapawarqanchiktaqmi payman asuykunapaqpas (Col. 1:21). Chaymantañataqmi payllapaqña kawsakuyta munasqanchikrayku bautizakurqanchik. Jehova Diosqa kuyakuq kasqanraykum hawka servinanchikpaq yanapawanchik (1 Ped. 3:21).

5. ¿Imaynatam Jehova Diosqa yanapawanchik paymanta willakusqanchikpi?

⁵ Jehova Diosqa kuyawasqanchikraykum yanapawanchik paymanta willakusqanchikpipas, ¿imaynata? Wakiqninchikqa hukkunapa qayllanpi rimaytam pinqakunchik. Jehova Diospa testigon manaraq kaspanchikqa manapaschá piensayllapas-piensarqanchikchu wasin-wasin rispa runakunaman willaytaqa. Kunanmi ichaqa Dios yanapawaptinchik mana manchakuspa willakunchik. Yanapawanchiktaqmi pipas kamiwaptinchik mana kutipakuspa hawkalla hinaspa kusisqa hinalla willakunapaqpas. Chaymantapas, qunqarusqanchik textokunata yuyarinanchikpaqmi yanapawanchik uyariwaqninchik runakunaman allinta yachachinapaq. Kallpanchawanchiktaqmi runakuna mana uyariwaptinchikpas mana amiruspa hinalla willakunanchikpaq (Jer. 20:7-9).

6. ¿Imaynatam Jehova Diosqa paymanta allinta willakunapaq yachachiwanchik?

⁶ Jehova Diosqa kuyawasqanchikraykum paymanta allinta willakunanchikpaq yachachiwanchik (Juan 6:45). Allin yachachiq kanapaq huñunakuyninchikpim yachachiwanchik imaynata willakunanchikpaq. Chay yachachikuyman hina willakuytaqa manchapakunchikpaschá, ichaqa chayman hina willakunanchikpaq kallpanchakuptinchikqa Jehova Diosmi yanapawasun allinta willakunapaq. Chaymantapas, huñunakuyninchikkunapim kallpanchawanchik achka runakunapa purisqan lawkunapi willakunapaq hinaspa cartata qillqaspa chaynataq telefonowan qayaspa willakunapaq. Qatiqninpim qawasun Diospa yachachiwasqanchikman hina ruwaptinchik imakunapi bendeciwasqanchikmanta chaynataq yanapawasqanchikmanta. Chaymantapas, yachasunmi imapi yanapakunapaq tantiakusqanchikman hina imakunata ruwanamanta.

7. ¿Imapaqmi yanapawanchik Diospaq astawan ruwanapaq tantiakusqanchikqa?

⁷ Jehova Diospim astawan hapipakusun. Yachaykusunchik iñiqkunapi punta apaq Samuelmanta. * Payqa Colombia nacionpim warmichanpiwan precursor karqaku, ichaqa huk llaqtachakunaman rispanku Diosmanta willakuytam munarqaku. Samuelmi nirqa: “Mateo 6:33 nisqanta yachasqaykuraykum manaña imatapas yanqaqa rantiqñachu kaniku. Chaymantapas, saqinaykum karqa munasqaykuman hina ruwachikusqayku wasiykuta, chayqa sasam karqa”, nispa. Paykunaqa huklawman astakuruspankum as qullqillawanña kawsakurqaku. Samuelqa nirqataqmi: “Manam iskayrayanikuchu mañakusqaykuman hina Jehova Dios yanapawanankumantaqa. Ñuqaykuqa paypa kuyasqan chaynataq yanapasqanmi tarikuniku”, nispa. ¿Ñuqanchikpas atichwanchu chay iñiqmasinchikkuna hina Diospaq astawan ruwayta? Chaypaq tantiakuspanchikqa Jehova Diosmanmi astawan asuykusun, paypim hapipakusun,  quykuwasuntaqmi ima pisipuwaqninchiktapas (Sal. 18:25).

8. ¿Imaynam tarikurqaku Ivanwan Viktoriaqa? ¿Imapaqtaq kallpanchasunki paykunapa willakusqanqa?

⁸ Jehova Diospaq imatapas astawan ruwaspaqa kusisqam kasun. Iñiqmasinchik Ivanwan warmichan Viktoriam precursor kanku Kirguistan nacionpi. Paykunam tantiakururqaku kapuqllankuwan kawsakuspa ima ruwaypipas astawan yanapakunankupaq, astawanqa munarqaku huñunakuna wasikunata ruwaypi yanapakuytam. Ivanmi nin: “Chay ruwaypiqa sapa punchawmi allinta llamkanaykupaq kallpanchakurqaniku. Pisipasqam tarikurqaniku, ichaqa Diospa munaynin ruwasqa kananpaq kallpanchakuspayku hinaspa achka iñiqmasinchikkunawan riqsinakuspaykum kusisqa tarikurqaniku”, nispa (Mar. 10:29, 30).

9. ¿Imapaqmi huk iñiqmasinchik kallpanchakurqa sasachakuyniyuq kaspanpas? ¿Imaynam tarikun?

⁹ Yuyaqña kaspanchikpas utaq imawan sasachakuspanchikpas Jehova Diospa munayninta astawan ruwaspaqa kusisqam tarikusun. Africa Occidental lawmanta Mirreh sutiyuq iñiqmasinchikmi yuyaqña kaspan doctora kayta saqirurqa, hinaspanmi precursora kayta qallaykurqa. Payqa viudam hinaspapas tullu nanaywanmi unqullan. Wasin-wasin rispanqa huk horallatam willakuyta atin. Chaymi kallpanchakun runakunapa kasqanpi tiyaykuspan Diosmanta willakunanpaq. Chaymantapas, achka runakunamanñam Diosmanta yachachichkan, wakintaqa celularwan qayaspallanmi yachachin. ¿Imanasqataq payqa anchata kallpanchakun? Paymi nin: “Tukuy sunquywanmi Jehova Diosta hinaspa Jesusta kuyani, chaymi Jehova Diosta sapa punchaw mañakuni paypa munayninta hinalla ruwanaypaq kallpata quwananpaq”, nispa (Mat. 22:36, 37).

10. 1 Pedro 5:10 nisqanman hinaqa, ¿imaynatam Diosqa yanapan paypaq astawan ruway munaqkunata?

¹⁰ Jehova Diosqa yachachiwanchikmi ima ruwayninchiktapas allinta ruwanapaq. Mauricio nacionpi yachaq iñiqmasinchik Kenym biblia estudiayta qallaykuspan universidadpi estudiasqanta saqirurqa, hinaspanmi bautizakuruspan precursor kayta qallaykurqa. Paymi nin: “Diosmanta willakuq Isaiasta qatipakunaypaqmi kallpanchakuni. Paymi nirqa: ‘Kayqaya ñuqa kaypi kachkani, ñuqatayá kachaway’”, nispa (Is. 6:8). Kenyqa huñunakuna wasikunata hinaspa rimayninpi qillqanchikkunata ruwaypim yanapakurqa. Paymi nin: “Ima ruwaypipas allinta yanapakunaypaqmi yachachisqa karqani”, nispa. Ichaqa, ¿chayllatachu yacharurqa? Manam. Kikinmi nin: “Yacharurqanitaqmi llampu sunqu kayta, mana hatun tukuq kayta chaynataq pacienciakuq kaytapas. Chayqa yanapawarqam Jehova Diospa munayninta aswan allintaraq ruwanaypaq”, nispa (qaway 1 Pedro 5:10). Ima ruwaypipas yanapakunaykipaq tantiakuspaykiqa qampas allinta yanapakunaykipaqmi yachachisqa kanki.

11. ¿Imata ruwanankupaqmi yuyaqña iñiqmasinchikkuna kallpanchakurqaku? (Qaway qaranpi kaq dibujota).

¹¹ Jehova Diosta unay wataña yupaychaq iñiqmasinchikkunapas yachachisqam kanku paymanta aswan allinta willakunankupaq. Coronavirus unquy rikuriruptinmi Corea del Sur lawpi iñiqkunapi wakin punta apaqkuna nirqaku: “Ñawpaqtaqa wakin iñiqmasinchikkunam unqusqankurayku utaq yuyaqña kasqankurayku Diosmanta willakunankupaq sasachakurqaku. Kunanqa internetta servichikuspankum runakunaman Diosmanta willakuchkanku. 80 watanpiña kaq kimsa iñiqmasinchikkunam chayta allinta servichikuyta yacharunku, hinaspam semanapi  achka kutitaña Diosmanta willakuchkanku”, nispa (Sal. 92:14, 15). ¿Qampas munawaqchu Jehova Diospaq astawan ruwayta? Qatiqninpi yachachikuykunam chaypaq yanapasunki.

12. ¿Ima nintaq Dios paypi hapipakuqkunata?

¹² Amayá iskayrayaychu Jehova Dios yanapasunaykimantaqa. Kikinmi niwanchik paypi hapipakuspa munayninta ruwanapaq kallpanchakuptinchikqa tukuy imapi yanapawananchikmanta (Mal. 3:10). Chaynatam yanapaykurqa Colombia nacionmanta Fabiola sutiyuq iñiqmasinchikta. Payqa bautizakusqanmanta qipallatam precursora kayta munarqa, ichaqa qusantawan wawankunata yanapananpaqmi llamkapakurqa. Jubilakunanpaqña kaspanmi Jehova Diosta tukuy sunqunwan mañakurqa yanapaykunanpaq, hinaspanmi jubilakunanpaq papelninkunata ruwarqa. Pipas jubilacionninmanta qullqita chaskinanpaqqa unaytam suyan. Paymi ichaqa huk killallamanta chaskikurqaña. Chaywanmi nirqa: “Chayqa Diospa yanapakuyninwanmi karqa”, nispa. Jubilakusqanmanta iskay killa pasayllatam precursora kayta qallaykurqa. Kunanqa 70 watanpiñam kachkan. Payqa 20 watañam precursora, hinaspam pusaq runakunata yanaparun Jehova Diosta yupaychanankupaq. Payqa nintaqmi: “Wakinpiqa manaña kallpayuqmi tarikuni, chaymi Jehova Diosta mañakuni paymanta willakuypi sapa punchaw yanapawananpaq”, nispa.

13, 14. ¿Pikunamanta yachaytaq yanapawasun Diospi hapipakunapaq hinaspa munayninta astawan ruwanapaq?

 ¹³ Jehova Diospi hapipakuqkunata qatipakuy. Bibliapim willawanchik Diospa munayninta ruwanankupaq astawan kallpanchakuq achka runakunamanta. Ichaqa puntatam Diospi hapipakunanku karqa pay yanapananpaqqa. Yachaykusun Abrahanmanta. Abrahanqa ‘manam yacharqachu mayman rinantapas’, ichaqa Diospi hapipakuspanmi ‘llaqtanmanta lluqsirqa’ (Heb. 11:8). Lluqsiruptinñam Jehova Diosqa yanapaykurqa. Jacobpas angelwan tukuy tuta atipanakusqan qipatañam Diospa bendecisqan karqa (Gen. 32:24-30). Israelpa miraynin runakunapas Diospa prometesqan allpaman chimpaytaqa atirqaku huntay-huntay riq Jordan mayuman sacerdotekuna yaykuruptinkuñam (Jos. 3:14-16).

¹⁴ Kunan tiempopipas kanmi Diospi hapipakuspa paypa munayninta astawan ruwaq iñiqmasinchikkuna. Rimarisun iñiqmasinchik Paytonmanta hinaspa warmichan Dianamanta. Paykunam ñawincharqaku huklaw llaqtachakunaman rispanku iñiqmasinchikkuna Diosmanta willakuypi yanapakusqankumanta. * Paytonmi nirqa: “Chay willakusqankuta ñawinchaspaykuqa miski mikuy mikusqankuta munapayachkaymankupas hinam tarikurqaniku. Chaykunam kallpanchawarqaku Jehova Diospa munayninta astawan ruwanaykupaq”, nispa. Chaymantam Paytonwan warmichanqa huk llaqtachaman astakururqaku Diosmanta willakuypi yanapakunankupaq. ¿Ñuqanchikpas munachwanchu huklaw llaqtachakunaman rispa Diosmanta astawan willakuyta? Chaypaqqa yanapawachwanmi Predicación en lugares apartados: Australia hinaspa Predicación en lugares apartados: Irlanda niq videokunata qawayninchik. Chayqa kachkan jw.org nisqapim. Chaykunata qawayninchikqa yanapawasunmi Diospa munayninta astawan ruwanapaq.

15. ¿Imaynatam yanapawanchik Diospa munayninta astawan ruwaqkunawan hukllawakuyninchik?

¹⁵ Diospa munayninta astawan ruwaqkunawan hukllawakuy. Mana haykapipas mikusqanchik mikuytaqa mallichwan chay mikuyta mikuqkunawan hukllawakuspam. Chaynallataqmi Diosman sunqu kaqkunawan hukllawakuspaqa kallpanchasqa kasun Diosmanta astawan willakunapaq. Chayna kallpanchasqam tarikurqaku Kentwan Veronicapas. Kentmi nin: “Riqsinakusqayku iñiqmasinchikkunawan aylluykum kallpanchawaqku Jehova Diosmanta astawan willakunaykupaq. Paykunawan hukllawakusqaykum yanapawarqaku ñuqaykupas Diospi hapipakuspa munayninta puntata ruwanaykupaq”, nispa. Kunanqa Kentwan Veronicaqa Serbia nacionpim precursor especial kachkanku.

16. Lucas 12:16-21 nisqanman hinaqa, ¿imaynam kachwan tukuy imayuq kayllaman qukuruspaqa?

¹⁶ Jehova Diosta astawan servinaykipaqqa tantiakuwaqmi kapuqllaykiwan kawsakunaykipaq. Tukuy imayuq kayqa manam huchachu (Ecl. 5:19, 20). Ichaqa kapuqniyuq kayta munaspa Diospa munayninta mana ruwaspanchikqa Jesuspa willakusqan runa hinam kachwan. Chay runaqa tukuy imayuq kayta munaspanmi Diosta qunqarurqa (qaway Lucas 12:16-21). Francia nacionmanta iñiqmasinchik Cristianmi nin: “Cuentatam qukururqani Diospa munayninta ruwanaypaq hinaspa wasiypi kaqkunapaq mana tiempochakusqaymanta”, nispa. Cristianwan warmichanqa precursor kanankupaqmi tantiakururqaku. Chaypaqqa llamkapakuyninkutam  saqirurqaku, hinaspam wasikunata pichaypiña llamkarqaku. ¿Ñakakunkuchu chaypaq tantiakusqankumanta? Manam. Cristianmi nin: “Ancha kusisqam tarikuniku Diosmanta astawan willakusqaykuwan chaynataq bibliamanta achka runakunaman yachachisqaykuwan”, nispa.

17. ¿Imawan willakuytam wakin iñiqmasinchikkuna manchapakunku?

¹⁷ Kallpanchakuy telefonowan, cartawan hinaspa carretachakunawan Diosmanta willakunaykipaq (Hech. 17:16, 17; 20:20, 21). Estados Unidos nacionpi yachaq Shirleymi precursora. Ichaqa, coronavirus unquy rikuriramuptinmi Diosmanta wasin-wasin willakuytaqa manaña atirqachu. Telefonowan willakuyta manchapakusqanraykum llaqtan-llaqtan watukuq iñiqmasinchik watukusqanpi yacharachirqaku imaynata willakunanpaq. Shirleymi nin: “Kunanqa telefonowan willakuytaqa manañam manchakunichu. Wasin-wasin rispayqa manam achka runakunawanchu rimaq kani, telefonowan qayaspaymi ichaqa achkawan rimani”, nispa.

18. ¿Imaynatam atipachwan Diospa munayninta astawan ruwanapaq imapas sasachawaptinchikqa?

¹⁸ Tantiakuy Diospaq astawan ruwanaykipaq hinaspa chaypaq kallpanchakuy. Sasachakuypi kaspaqa imaynata atipananchikpaqmi Jehova Diospa yanapakuyninta mañakunanchik (Prov. 3:21). Iñiqmasinchik Soniam Europa lawpi Diosmanta willakun. Paymi nin: “Diospaq imapas ruway munasqayta papelchapi qillqaspaymi sutillata qawanaypaq laqani. Chaymantapas, pallqaq ñanta dibujaruspaymi mesaypi laqaruni. Imapaqpas tantiakusqayqa mayqan ñannintapas richkay hinam. Chaymi manaraq tantiakuchkaspay nikuni: ‘¿Kay tantiakusqay yanapawanqachu Diospaq astawan ruwanaypaq?’”, nispa. Soniaqa sasachakuykunapi kaspanqa chaykunawan mana hukmanyarunanpaqmi kallpanchakun. Payqa nintaqmi: “Imawanpas sasachakuyqa munasqanchikman chayanata harkawaqninchik pirqa hinam. Mana hukmanyaruspa hinalla kallpanchakuyninchikñataqmi munasqanchikman chayanapaq chaka hina”, nispa.

19. ¿Imakunata ruwaspam Jehova Diosta agradecekuchwan tukuy ima quwasqanchikmanta?

¹⁹ Jehova Diosqa tukuypim yanapawanchik. Agradecekuchwanmi paypa munayninta astawan ruwaspa chaynataq hatunchaspa (Heb. 13:15). Chaypaqmi kallpanchakuchwan paymanta astawan willakunapaq chaynataq ima ruwaypipas astawan yanapakunapaq. Chaynata ruwaptinchikqa paymi yanapawasun. Chaynaqa, sapa punchawyá qawasun Jehova Diosqa kuyawaspanchik imayna yanapawasqanchikta, chayta ruwaspaqa Jesus hinam nisun. Paymi nirqa: “Ñuqapa mikuyniyqa kachamuwaqniypa munayninta ruwaymi hinaspa kamachiwasqanta tukuymi”, nispa (Juan 4:34).