1, 2. Salmos 34:8 nisqanman jina, ¿imatan ruwananchis Jehová Dios may munakuq kasqanta rikunanchispaq?

MANA reqsisqanchis mijuna imayna saborniyoq kasqanta yachanapaqqa, chay mijuna mijuqkunatan tapusunman, wayk’uqtapas tapusunmanmi imakunatachus churasqanta. Ichaqa imaynapunichus sabornin kasqanta yachanapaqqa noqanchispunin chay mijunata malliykunanchis.

² Chhaynallataqmi Jehová Diosta reqsinapaqqa Bibliatapas qelqanchiskunatapas leenanchis, jujkunatapas tapusunmanmi imaynatachus yanapasqanta. Ichaqa Jehová Dios may munakuqchus kasqanta allinta yachanapaqqa reparananchismi vidanchispi yanapawasqanchista (leey Salmos 34:8). Kaypi piensasun, yaqapaschá tukuy tiemponchiswan Dios serviyta munashanchis, chaypaqmi ichaqa wakin ruwaykunata saqepunanchis. Askha kutitachá leeranchis Jesuspa nisqantaqa, paymi niran: “Diospa gobiernonta chanin kaynintawan ñaupaqtaqa maskhaychis, jinan payqa tukuy chaykunata qosunkichis”, nispa (Mat. 6:33). Ichaqa manapaschá jayk’aqpas chaytaqa vidanchispi rikuranchischu. Chhaynaña kaqtinpas, Jesuspa nisqanpi confiaspan gastonchista pisiyachispa pisillataña llank’anchis, jinaspa Diosmanta astawan runakunaman yachachimunchis. Chayta ruwasqanchisraykun noqanchispuni rikunchis Jehová Dios cuidawasqanchista.

3. Salmos 16:1, 2 nisqanman jina, ¿pikunatan Jehová Dios astawan yanapan?

³ Jehová Diosqa llapa runamanmi imaymanata qowanchis, payta serviqmanpas mana serviqmanpas (Sal. 145:9; Mat. 5:45). Ichaqa payta tukuy sonqowan serviqninkunatan  astawanqa yanapan (leey Salmos 16:1, 2). Kaypin yachasunchis imakunatachus noqanchisrayku Jehová Dios ruwasqanta.

4. ¿Imaynatan Jehová Dios paymanta astawan yachay munaqkunata yanapan?

⁴ Sichus Jehová Diosta allinta reqsisunchis, nisqanman jinataq kausasunchis chayqa allintan kausasun. Bibliata leespan Jehová Diosta astawan reqsiranchis, jinaspan mana allin piensasqanchista mana allin ruwasqanchiskunatapas saqepuranchis (Col. 1:21). Payta servinapaq bautizakuqtinchisqa astawanraqmi Diosqa munakuwaranchis, jinan yanapawaranchis allin concienciayoq kananchispaq, paywan allinpi kausananchispaqpas (1 Ped. 3:21).

5. ¿Imaynatan Jehová Dios yanapawaranchis paymanta runakunaman willananchispaq?

⁵ Jehová Diosqa yanapawanchismi paymanta runakunaman willaqtinchispas. Yaqapaschá manchakunki jujkunaman Diosmanta willayta, ichaqa manan qanllachu manchakunki askha hermanokunan manchakunku. Manapaschá jayk’aqpas piensarankichu mana reqsisqayki runakunaman Diosmanta willaytaqa. Kunanmi ichaqa Jehová Diospa yanapayninwan kusisqa runakunaman willamushanki. Chaymantapas Diosqa yanaparasunkin runakunaña k’amishasuqtiykipas willashanallaykipaq, Bibliamanta textokunata yuyarinaykipaqpas. Askha runaña mana uyarikuqtinkupas Diosqa yanaparasunkin willashanallaykipaq (Jer. 20:7-9).

6. ¿Imaynatan Jehová Dios yanapawanchis paymanta willashanallanchispaq?

⁶ Jehová Diosqa yachachiwanchismi runakunaman willamunanchispaq (Juan 6:45). Chaupi semana juñunakuypin sumaq yachachikuykunata yachanchis, niwanchistaqmi chayman jina yachachinanchispaq. Mosoq yachachikuykunaman jina yachachiyqa qallariypiqa sasapaschá karan, qhepamanmi ichaqa repararanchis chayman jina yachachiyqa allinpuni kasqanta. Asambleakunapipas kallpachawaranchismi telefononta cartanta runakunaman yachachinanchispaq. Qallariypiqa manchakusunpaschá chayman jina ruwayta, ichaqa kallpachakuqtinchisqa Jehová Diosmi bendeciwasun. ¿Imaynatan Jehová Dios bendeciwasun paypaq astawan llank’aqtinchis? ¿Imakunatan ruwananchis Dios serviyninchispi imachus munasqanchisman aypananchispaq? Chaykunamantan kunanqa qhawarisun.

7. ¿Ima bendicionkunatan chaskisunchis Jehová Diospaq astawan llank’aqtinchis?

⁷ Jehová Diosmanmi astawan achhuykusunchis. Rimasun Samuel sutiyoq umalliqmanta, * payqa Colombiapin esposanwan kuska tiyanku. Paykunaqa kusisqan precursor jina llank’asharanku iñiq t’aqankupi, ichaqa maypichus Diosmanta willaqkuna necesitakusqan iñiq t’aqamanmi astakuranku. Paymi nin: “Mateo 6:33 textopi nisqanta kasukuspan manaña comuntachu imatapas rantikurayku. Noqaykupaqqa sasan karan ñaupaqpi tiyasqayku wasiykuta saqeyqa, chay wasiqa munasqaykuman jinan ruwasqa kasharan”, nispa. Yanapakusqanku iñiq t’aqapiqa pisi qolqellawanmi kausaranku. Samuelmi nin: “Repararaykun Jehová Dios yanapawasqankuta, mañakusqaykuman kutichimusqantapas, ñaupaqpiqa manan chay jinaqa sientekuraykuchu”, nispa. Qanpas, ¿munawaqchu Diosta astawan serviyta? Chayta ruwanki chayqa, astawanmi  payman achhuykunki, jinan payqa sumaqta cuidasunki (Sal. 18:25).

8. ¿Imatan yachasunman Ivanpas Victoriapas willakusqankumanta?

⁸ Jehová Diosta serviyqa kusichiwanchismi. Kunanqa yachasun Ivanmanta Victoriamantawan, paykunaqa precursor jinan Kirguistán llaqtapi llank’ashanku. Pisi qolqellawan kausanankupaqtaqmi decidikuranku, chhaynapin listo kasharanku Diospa llaqtanpi yanapakunankupaq, chaymi juñunakuna wasikunata sayarichiypi yanapakuranku. Ivanmi nin: “Tukuy kallpaykuwanmi juñunakunanchis wasikunata sayarichiypiqa yanapakurayku. Ch’isiyaqta llank’asqaykumanta sayk’usqaña kasharayku chaypas, kusisqan kasharayku Diospaq llank’asqaykumanta. Chaymantapas askha hermanokunawanmi reqsinakurayku, tukuy chaykunata yuyarispaykun kusikuyku”, nispa (Mar. 10:29, 30).

9. ¿Imatan juj hermana ruwaran sasachakuypiña tarikuspapas Jehová Diosta astawan servinanpaq?

⁹ Ima llakipiña tarikusunman chaypas Jehová Diosta servispaqa kusisqan kasunchis. Yachasunchis kuraq hermananchis Mirianmanta, payqa África ladopin tiyan, doctorataqmi karanpas. Jubilakusqan qhepamanmi precursora kapuran. Payqa artritis onqoyniyoqmi kashan, chaymi juj horallata wasin-wasinta Diosmanta willan. Carretapin ichaqa unayta Diosmanta willan. Jinaspapas payqa askha runakunamanmi Bibliamanta yachachishan, wakintan telefononta yachachin. ¿Imanaqtinmi kallpachakun Jehová Diosta astawan servinanpaq? Paymi nin: “Noqaqa anchatan Jehová Diostapas Jesucristotapas munakuni. Sapa kutillanmi Diosmanta mañakuni paypaq tukuy atisqayta ruwanaypaq”, nispa (Mat. 22:36, 37).

10. ¿Imaynatan 1 Pedro 5:10 nisqanman jina Jehová Dios yanapan payta astawan serviyta munaqkunata?

¹⁰ Jehová Diosqa allintan yachachiwanchis payta servinanchispaq. Yachasun Kenny hermanonchismanta, payqa Mauricio nacionpin precursor jina yanapakushan. Payqa Biblia estudiayta qallarispan manaña universidadpi estudiaranchu, bautizakusqan qhepamantaq tukuy tiemponwan Jehová Diosta serviran. Paymi nin: “Profeta Isaías jina kanaypaqmi kallpachakuni, paymi niran: ‘Noqan kaypi kashani, noqata kachaway’, nispa” (Isa. 6:8). Kenny hermanonchisqa juñunakuna wasikunata ruwaypin yanapakuran, jinaspapas rimasqan simiman qelqakunata t’ijraspan yanapakullarantaq. Paymi nin: “Hermanokunaqa allintan capacitawaranku ruwanaykunata allinta junt’anaypaq. Chaypin yacharani imakunapichus cambianay kasqayta”, nispa (leey 1 Pedro 5:10). Yaqapaschá qanpas tiempoykita orqowaq Diospa llaqtanpi astawan yanapakunaykipaq, chhaynapi capacitasqa kanaykipaq.

11. ¿Imakunatan wakin iñiqmasikuna Corea del Sur nacionpi ruwashanku Diosmanta willanankupaq, ima bendicionkunatan chaskishanku? (Qhaway tapanpi kaq dibujota.)

¹¹ Unay watakunaña Jehová Diosta serviqkunapas allin capacitasqan kashanku jujniraymanta Diosmanta willamunankupaq. Coronavirus onqoy mast’arikusqan tiempopin Corea del Sur nacionmanta umalliqkuna niranku: “Wakin iñiqmasikunaqa kuraqña kapusqankuraykun manaña Diosmanta willayta atirankuchu, kunanmi ichaqa celularninkuq camaranta jap’ichispa runakunaman willashanku. 80 watayoq kinsa hermananchiskunan chayta ruwashanku, paykunaqa sapa p’unchaymi Diosmanta willashanku”, nispa (Sal. 92:14, 15). Sichus qanpas  Diosmanta astawan willanki chayqa, rikunkin Diospa yanapasqasuykita. Qatimuqpi yachasun imakunatachus ruwananchis Diospaq astawan llank’ananchispaq chayta.

12. ¿Imatan Jehová Dios prometen paypi confiaqkunaman?

¹² Jehová Diospin confiananchis. Sichus paypi confiaspa tukuy atisqanchisman jina paypaq llank’asun chayqa, payqa askhanpin bendeciwasun (Mal. 3:10). Colombia nacionmanta Fabiola hermananchismi rikuran Jehová Dios imaymanapi bendecisqanta. Bautizakusqan qhepamanmi precursora kayta munaran, ichaqa qosantawan kinsa wawankunatawanmi mantenenan karan. Chaymi jubilakusqan qhepaman Jehová Diosmanta mañakuran yanapananpaq. Paymi nin: “Unaypiraqmi jubilakunapaq tramitekunataqa ruwakun, noqan ichaqa juj killallapi jubilakurani, chayqa Diospa yanapayninwanmi karan”, nispa. Jinan iskay killa qhepaman precursora kapuran. Payqa 70 watanpiñan kashan, 20 watañataqmi precursora kashan. Kunankamaqa pusaq runakunatañan yanaparun bautizakunankupaq. Paymi nin: “Mayninpiqa kallpa wañun kani, Jehová Diosmi ichaqa sapa p’unchay yanapawan paymanta willashanallaypaq”, nispa.

13, 14. ¿Pikunamanta yachaymi yanapawasun Diospi confiananchispaq, astawan payta servinanchispaqpas?

¹³ Diospi confiaq runakunamanta yachasun. Bibliaqa willanmi tukuy sonqowan Diosta serviq runakunamanta. Paykunaqa Diospa bendicionninta chaskinankupaqmi tukuy  atisqankuta ruwaranku. Abrahantaqa Diosqa bendeciran llaqtanmanta lloqsipusqan qhepamanñan, manaña yacharanchu mayman rinanta chaypas (Heb. 11:8). Jacobpas Diospa bendicionnintaqa chaskiran juj angelwan maqanakusqan qhepamanñan (Gén. 32:24-30). Israel runakuna Jordán mayuta chimpanankupaqpas sacerdotekunan ñaupaqta unuta saruranku (Jos. 3:14-16).

¹⁴ Yachallasunmantaqmi kunan tiempopi Dios serviqkunamanta, paykunaqa Diospi confiaspan listo kasharanku Diosta astawan servinankupaq. Pedro sutiyoq hermanonchismi esposan Dianawan leellaqkupuni tukuy tiemponkuwan Diosta serviqkunamanta experienciakunata, chayqa lloqsimuran “Yanapakunankupaqmi listo kasharanku” nisqa yachachikuypin. * Hermanonchismi nin: “Chay experienciakunata leespaykun repararayku Diosta kusisqa servisqankuta. Astawan leespataq noqaykupas munarayku paykuna jina Diosta serviyta”, nispa. Tiempowanmi paykunapas juj iñiq t’aqaman yanapakuq riranku. Qanri, ¿leerankichu chay revistakunapi lloqsimuq experienciakunata? ¿Rikurankichu Hawa llaqtakunapi predicakusqan: Australiapi; Jawa llaqtakunapi predicakusqan: Irlandapi nisqa videokunata? Chay videokunaqa jw.org paginapin kashan. Chaykunata yachayqa yanapawasunmi Diosta astawan servinanchispaq.

15. ¿Imaynatan yanapawasunman Diosta astawan serviqkunawan juñukusqanchis?

¹⁵ Astawan Diosta serviqkunawan amigontin kay. Mana reqsisqanchis mijunataqa astawanqa mijusunman waj llaqtayoq runakunawan kashaspan. Chhaynallataqmi Diosta tukuy tiemponkuwan serviqkunawan amigontin kasun chayqa, paykunan yanapawasun Diospa llaqtanpi astawan yanapakunanchispaq. Chaymi pasaran Kent hermanonchiswan esposan Veronicawanpas. Hermanonchismi nin: “Amigoykupas familiaykupas niwaqkun imaymanapi Diospa llaqtanpi yanapakunaykupaq. Sapa kutilla paykunawan parlasqaykuraykun astawan yanapakurayku”, nispa. Paykunaqa Serbia nacionpin kunanqa precursor especial jina yanapakushanku.

16. Lucas 12:16-21 nisqaman jina, ¿imanaqtinmi Diosta servinanchispaq pisillawan kausananchispaq listo kashananchis?

¹⁶ Liston kashananchis Jehová Diosninchisrayku imatapas ruwananchispaq. Jehová Diosta kusichinanchispaqqa manan llapa kaqninchiskunataraqchu saqenanchis (Ecl. 5:19, 20). Ichaqa sichus mana munasunmanchu wakin kaqninchiskunata saqeyta otaq pisillataña llank’ayta chayqa, Jesuspa willasqan runa jinan kasunman, chay runaqa allinta kausananraykun Diosta qonqapuran (leey Lucas 12:16-21). Francia nacionmanta Cristian hermanonchismi nin: “Noqaqa pisillatan tiempoyta t’aqasharani Jehová Diosta servinaypaqpas familiaywan kanaypaqpas”, nispa. Chaymi paypas esposanpas decidiranku precursor kanankupaq, chaypaqmi ichaqa llank’anankuta saqepuranku. Mantenekunankupaqtaq juch’uy negociota ruwaranku, pisillataña ganaranku chaypas kusisqan kashanku. ¿Ima bendicionkunatan chaskiranku chayta ruwasqankumanta? Hermanonchismi nin: “Kusisqan kashayku Diosmanta astawan willaspayku, askha runakunatataqmi yachachishayku”, nispa.

17. ¿Imanaqtinmi wakin iñiqmasinchiskuna mana munankuchu jujniraymanta Diosmanta willayta?

 ¹⁷ Kallpachakuy jujniraymanta willanaykipaq (Hech. 17:16, 17; 20:20, 21). Estados Unidosmanta Shirley hermananchismi coronavirus kasqanrayku telefononta Diosmanta willayta yachanan karan. Qallariypiqa manchakuranmi telefononta willayta. Ichaqa watukuq umallin iñiq t’aqanta visitaspa telefononta willanankupaq yachachiran. Chaymantapachan hermananchisqa sapa kutilla telefononta runakunaman Diosmanta willan. Paymi nin: “Qallariypiqa manchasqan kasharani, kunanmi ichaqa kusisqa Diosmanta willani. Wasin-wasinta rispa willasqaymantaqa kunanmi aswan askha runakunawan rimashani”, nispa.

18. ¿Iman yanapawasunman sasachakuyninchista atipaspa Diosmanta astawan willananchispaq?

¹⁸ Kallpachakuy imatas ruwayta munashanki chayman aypanaykipaq. Sasachakuypi tarikuspaqa Jehová Diosmantan mañakunanchis, kallpachakunanchistaqmi chay sasachakuykunata atipananchispaq (Prov. 3:21). Europa ladopi tiyaq Sonia hermananchismi precursora kashan romaní simita rimaq grupopi. Paymi nin: “Imachus ruway munasqaytan qelqani, jinaspa rikunaypaq jina churani. Mesaypipas juj dibujon kashan, chaypin iskay carreterakuna kashan. Chaymi imatapas decidinay kaqtinqa chayta qhawaspa nini: ‘¿Kay decidisqay yanapawanqachu imachus munasqayta junt’anaypaq?’, nispa”. Sasachakuykunapi tarikuspapas Soniaqa manan nishutachu llakikun. Paymi nin: “Juj sasachakuyqa perqa jinan jark’awasunman imachus ruwananchista, otaq puente jina kanman, chaytan utilizasunman imachus munasqanchista ruwananchispaq”, nispa.

19. ¿Imata ruwaspan rikuchisunman imaymana qowasqanchismanta Jehová Diosta agradecekusqanchista?

¹⁹ Jehová Diosqa imaymanapin bendeciwashanchis. Chaymi agradecekusqanchista rikuchisunman atisqanchisman jina payta servispa (Heb. 13:15). Atisunmanmi Diospa llaqtanpi imaymanapi yanapakuyta. Sichus chayta ruwasun chayqa, Jehová Diosmi astawanraq bendeciwasun. Chhaynaqa kallpachakushallasun Jehová Dios may sumaqchus kasqanta rikunanchispaq. Chayta ruwasun chayqa, Jesús jinan nisunchis: “Mijunayqa kachamuwaqniypa munayninta ruwaymi, qowasqan llank’aytapas tukunaykama junt’aymi”, nispa (Juan 4:34).