1-2. Ia Salamo 34:8, akapeea tatou e kite ei i te meitaki o Iehova?

AKAMANAKO ana e kua orongaia mai tetai kai naau, inara kare koe i tamata ake i te reira. Ka kite koe i te tu o teia kai na te akara anga, te kakara, te tu i maaniia ai, e te ui anga ki tetai ke i to ratou manako. Inara, ko te ravenga anake kia kite i tona reka, na te tongi anga i te reira.

² Ka kite mai tatou no runga i to Iehova meitaki na te tatau anga i te Pipiria e ta tatou au puka Pipiria, e pera te akarongo anga ki tetai ke me akakite mai i te au akameitakianga ta Iehova i oronga kia ratou. Inara ka kite tikai tatou i to Iehova meitaki me “tongi” tatou i te reira. (E tatau ia Salamo 34:8.) Teia tetai akaraanga. Akamanako ana e ka inangaro tatou i te tavini tamou, inara kia rauka teia, ka anoanoia tatou kia akamāmā i to tatou oraanga. Penei kua tatau ana tatou i ta Iesu taputou e me kimi tatou i te Patireia na mua, ka oronga mai a Iehova i te au mea ta tatou ka anoano, inara kare rava tatou i kite ana i teia taputou te akatupuia anga. (Mata. 6:33) Noatu ra, ma te irinaki ki ta Iesu taputou, kua akaiti tatou i ta tatou akapouanga moni, te ora no te angaanga, e kua akamou ki runga i te angaanga tutu aere. Me rave tatou i te reira, ka kite meitaki tatou e ka akono a Iehova ia tatou. Ka “tongi” tikai tatou i te meitaki o Iehova.

3. Ia Salamo 16:1, 2, koai ma ta Iehova e akameitaki ana?

³ E “takinga-meitaki to Iehova ki te tangata ravarai,” e ki te aronga katoa kare i kite iaia. (Sala. 145:9; Mata.  5:45) Inara, ka akameitaki maata a Iehova i te aronga tei inangaro iaia e te ka tavini iaia ma te ngakau katoa. (E tatau ia Salamo 16:1, 2.) Ka akara tatou i te au ravenga kia puapingaia tatou mei to Iehova meitaki.

4. Akapeea a Iehova me akaari i tona meitaki ki te aronga tei akavaitata atu kiaia?

⁴ Te au taime me taangaanga tatou i ta Iehova apiianga, ka kite tatou i te meitaki. Te apii anga tatou no runga iaia e te akatupu i to tatou inangaro nona, kua tauturu aia ia tatou kia kopae i te au manako e te peu tei akataka ke ia tatou mei iaia. (Kolo. 1:21) Te akatapu e te papetitoia anga tatou, kua kite mai tatou i te meitaki o Iehova, kua oronga mai aia i te akava ngakau meitaki, e kua akavaitata ia tatou kiaia.​—1 Pete. 3:21.

5. Akapeea tatou e kite ei i to Iehova meitaki i roto i te angaanga tutu aere?

⁵ Ka kite katoa tatou i to Iehova meitaki i roto i te angaanga tutu aere. E tangata akamā ua ainei koe? Maata te Au Kite o Iehova mei tera te tu. Penei, i mua ake ka riro mai ei koe ei Kite no Iehova, kare rava koe i manako ana e ka tae koe i te aere ki te ngutuare o tetai tangata ke e te tuatua kiaia no runga i te Pipiria. Inara, i teianei te rave putuputu ra koe i te reira. Tei maata atu, ma te tauturu a Iehova, kua kite mai koe i te tu mataora o te angaanga tutu aere! Kua kite mai koe i ta Iehova tauturu na roto i te au ravenga tukeke. Kua tauturu aia ia koe kia noo marū ua me patoi mai tetai tangata. Kia maara ia koe te au irava ka tano ki te pu ngutuare. E kua oronga mai Aia i te maroiroi kia tutu aere ua atu rai koe noatu kare te tangata e akarongo mai.​—Iere. 20:7-9.

6. Akapeea te tereni anga ta Iehova i oronga mai te akaarianga mai i tona meitaki?

⁶ Akaari katoa mai a Iehova i tona meitaki na te tereni anga ia tatou no te angaanga tutu aere. (Ioa. 6:45) I ta tatou au uipaanga epetoma, ka akarongo tatou ki te au akatutuanga tei akapapa meitakiia, e ka akamaroiroiia tatou kia taangaanga i te reira. Penei ka emiemi tatou i te tamata i teia ravenga ou, inara ka kite mai tatou e ka tano meitaki teia i roto i te angaanga tutu aere. E akamaroiroi katoaia ana tatou i ko i te au uipaanga e te uruoaanga kia tamata i te au ravenga ou no te tutu aere. Te aiteanga, ka tamata tatou i tetai apinga kare tatou i matau, e me pera tatou, ka akameitaki a Iehova i te reira. Akara tatou i te au akameitakianga ka rauka me tavini tatou ia Iehova na roto i te au ravenga tukeke, noatu to tatou turanga. E oti, ka akara tatou i te au ravenga no te akamaata atu i ta tatou angaanga tutu aere.

7. Eaa te akameitakianga ka rauka me akamaata tatou i ta tatou angaanga tutu aere?

⁷ Ka akapiri vaitata atu tatou kia Iehova. Akamanako i te akaraanga o te tangata pakari ko Samuel, * te tavini ra e tana vaine i Columbia. Mataora raua i te painia i roto i ta raua putuputuanga, inara kua inangaro mai raua i te neke ki tetai putuputuanga ke tei anoano maata i te tauturu. Ka anoanoia raua kia rave i tetai au akaatingaanga. Karanga a Samuel, “Kua taangaanga maua ia Mataio 6:33 e kua akaiti i ta maua akapouanga moni. Ko te mea ngatā, ko te akarukeanga i  to maua kainga. Tano meitaki teia are no maua e kua peke i te tutaki.” Roto i ta raua putuputuanga ou, kua kite mai raua e kua iti mai te moni ka pou no te akono ia raua. Karanga a Samuel, “Kite mai maua i ta Iehova aratakianga e kua pau mai aia i ta maua pure. Kite katoa maua i tona aroa na roto i te au ravenga manako koreia.” Ka rauka ainei ia koe i te akamaata i taau angaanga tutu aere? Me koia ïa, ka papu ia koe e ka akapiri vaitata atu koe kia Iehova e ka akono aia ia koe.​—Sala. 18:25.

8. Eaa ta tatou ka apii mai mei ta Ivan e Viktoria i tuatua?

⁸ Kia rekareka i roto i ta tatou tavini anga. Teia ta Ivan e Viktoria i tuatua, e nga tokorua akaipoipo te painia ra i Kyrgyzstan. Kua akamāmā raua i to raua oraanga kia rauka i te tavini i tetai ua atu ngai, e pera te angaanga pātu are. Karanga a Ivan: “Kua rave maroiroi maua i te au tuanga angaanga tukeke. Noatu kua roiroi maua i te openga o te au rā, kua kite maua i te tu mataora no te mea kua pou to maua maroiroi ki roto i te angaanga a Iehova. Mataora katoa maua no te au tupuanga manea e te au oa ta maua i akatupu.”​—Mare. 10:29, 30.

9. Eaa ta tetai tuaine i rave kia akamaata atu i tana angaanga tutu aere, e eaa tei tupu?

⁹ Ka mataora katoa tatou i te tavini ia Iehova noatu to tatou turanga ngatā. Ei akaraanga, ko Mirreh, e tuaine pakarikari e te takaua i Aperika, kua akaruke aia i tana angaanga ei taote e kua akamata i te painia. No te mamae o tona maki arthritis, ka tutu aere a Mirreh mei tera are ki tera are e tai ora. Inara ka rauka iaia i te tutu aere maata atu i te ngai tangata e tana pereoo puka. E maata tana au atoro akaou e te apii Pipiria, e ka apii aia i tetai pae na runga i te tereponi. Eaa tei akakeu ia Mirreh kia tavini maata atu? “Kua kī toku ngakau i te inangaro no Iehova e Iesu. E ka pure ua rai au kia Iehova no te tauturu kia rauka iaku i te tavini iaia.”​—Mata. 22:36, 37.

10. Ia 1 Petero 5:10, eaa ta Iehova ka oronga ki te aronga tei tavini maata atu iaia?

¹⁰ Ka tereni ua rai a Iehova ia tatou. Kua kite a Kenny, e painia i Mauritius, i te tika o teia. Te apii anga aia i te tuatua mou, kua akaruke aia i te apii university, kua papetito e kua painia tamou atu. Karanga aia, “E tauta ana au kia aite au ki te peroveta ko Isaia, tei karanga: ‘I na, teia au; ko au taau e tono.’” (Isa. 6:8) Kua tauturu ana a Kenny i te au angaanga pātu are, e pera katoa i te uri i tetai au puka Pipiria ki roto i tona reo. Karanga aia, “Kua tereniia au kia rauka iaku i te rave i te au angaanga tei orongaia mai kiaku.” Inara e maata atu tana i apii mai. Karanga aia, “Kua kite katoa mai au i toku au tu paruparu e te au tu ka anoanoia kia akameitaki mai, kia rauka iaku i te tavini meitaki atu ia Iehova.” (E tatau ia 1 Petero 5:10.) Ka rauka ainei ia koe i te akara i toou turanga kia kite me ka rauka ia Iehova i te tereni ia koe?

11. Eaa ta tetai au tuaine i Korea Apatonga i rave kia rauka i te tutu aere, e eaa tei tupu? (Akara i te tutu i te kapi mua.)

¹¹ Ka puapinga katoaia te au taeake tukatau me tamata ratou i te au ravenga ou. Te tupu anga te maki COVID-19, tata te aronga pakari o tetai putuputuanga i Korea Apatonga: “Tetai pae tei manako ana e kare e rauka ia ratou i te tutu aere  no to ratou turanga maki, kua rauka ia ratou i teianei na roto i te vitio karangaranga. E toru tuaine, e 80 tuma o ratou mataiti, tei apii i teia ravenga ou e te tutu aere nei ratou i te au rā ravarai.” (Sala. 92:14, 15) Ka inangaro ainei koe i te akamaata atu i taau angaanga tutu aere e te tongi i te meitaki o Iehova? Teia tetai au ravenga te ka tauturu ia koe.

12. Eaa ta Iehova i taputou ki te aronga tei irinaki iaia?

¹² Irinaki ia Iehova. Taputou aia i te oronga mai i te au akameitakianga me irinaki e me tavini ua rai tatou iaia. (Mala. 3:10) Kua kite te tuaine ko Fabiola, no Columbia, te akatupuanga a Iehova i teia taputou. Inangaro aia i te painia tamou i muri ake i tona papetitoanga. Inara, kua anoanoia aia kia angaanga moni no te akono i tana tane e te tamariki e toru. Te tae anga tona tuatau no te akangaroi mei te angaanga, kua pure aia no ta Iehova tauturu. Karanga aia: “E pou ana tetai tuatau roa e rauka mai ei te moni pakari, inara e tai rai marama i rauka mai ei taku. E temeio tikai teia!” E rua marama i muri mai, akamata aia i te painia. E 70 tuma ona mataiti i teianei, e kua painia ana aia no tetai 20 mataiti. Kua rauka iaia i te tauturu e varu tangata kia papetitoia. Karanga aia: “Noatu ka paruparu au i tetai taime, kua tauturu mai a Iehova iaku kia painia ua atu rai.”

13-14. Eaa te au akaraanga te ka tauturu ia tatou kia irinaki ia Iehova e kia tavini maata atu?

 ¹³ Apii mei te akaraanga o te aronga tei irinaki ia Iehova. E maata te au akaraanga i roto i te Pipiria no te aronga tei tavini maroiroi ia Iehova. Te maata anga o te taime, ka anoanoia te au tavini o Iehova kia tavini iaia i mua ake ka oronga mai ei a Iehova i tana akameitakianga. Ei akaraanga, i muri ake i to Aberahama akarukeanga i tona kainga​—“ma te kite kore i taua enua i aereia e ia ra”​—i akameitaki ei a Iehova iaia. (Ebe. 11:8) I muri ake i to Iakoba kukumianga i te angera, i akameitaki ei a Iehova iaia. (Gene. 32:24-30) Te vaitata anga te iti tangata o Iseraela ki te enua taputouia, i muri ake i te takai anga te au taunga ki roto i te vai i Ioridana i rauka ai ia ratou i te tikoti i te kauvai.​—Iosu. 3:14-16.

¹⁴ Ka puapinga katoaia koe mei te au akaraanga o te Au Kite o teia tuatau tei irinaki e tei tavini maata atu ia Iehova. Ei akaraanga, e reka ana tetai tokorua, ko Payton e Diana, i te tatau no runga i te au taeake e te au tuaine tei akamaata i ta ratou tavinianga ia Iehova i roto i te au atikara “Itae Anga i te au Akakoroanga Pae Vaerua.” * Karanga a Payton: “Me tatau maua i to ratou tua, mei te mea atura e te akara nei maua ia ratou e kaikai meitaki ra. Te roa atu i ta maua akara anga, te maata atu ïa i to maua inangaro kia ‘tongi i te meitaki o Iehova.’” Muri mai, kua neke a Payton e Diana ki tetai ngai tei anoano maataia te tauturu. Kua tatau ana ainei koe i teia au atikara? Kua akara ake koe i te vitio Witnessing in Isolated Territory​—Australia e te Witnessing in Isolated Territory​—Ireland i runga i te jw.org? Ka tauturu teia i te akamaata atu i taau tavinianga ia Iehova.

15. Akapeea te au oa meitaki me tauturu ia tatou?

¹⁵ Iki i te au oa meitaki. Ka rauka ia tatou i te tamata i tetai kai ou me kapiti tatou ki te aronga tei reka i te reira. Mei te reira rai, me kapiti tatou ki te aronga te tavini maroiroi ra ia Iehova, ka akakeuia tatou kia akamaata atu i ta tatou tavinianga. Teia ta Kent e Veronica i kite mai. Karanga a Kent: “Kua akamaroiroi te au oa e te ngutuare tangata ia maua kia tamata i te au ravenga ou. Kite mai maua e na te kapiti anga ki te au taeake tei kimi i te Patireia na mua, kua rauka ia maua i te rave i te reira.” Te tavini nei a Kent e Veronica ei painia takake i Serbia.

16. Mei ta Iesu akatutuanga ia Luka 12:16-21, eaa tatou ka akaatinga ai i tetai au mea?

¹⁶ Akaatinga i tetai au mea no Iehova. Kare tatou e anoanoia kia akaatinga i te au mea katoatoa kia akamareka ia Iehova. (Kohe. 5:19, 20) Inara, me kare tatou e inangaro i te rave i te au akaatingaanga kia rauka i te tavini maata atu ia Iehova, ka aite tatou ki te tangata i roto i ta Iesu akatutuanga tei kimi i te oraanga meitaki, e kare i te Atua. (E tatau ia Luka 12:16-21.) Karanga te taeake ko Christian, tei noo i Varani, “Kare au i akapou ana i toku taime e te maroiroi no Iehova e toku ngutuare.” Kua iki aia e tana vaine kia painia. Inara kia rauka te reira, kua akaruke raua i ta raua ngai angaanga. E kua akamata i tetai pitiniti tāmā are, e kua mareka ua i te reira. Kua puapingaia ainei teia akaatingaanga? Karanga a Christian, “Mataora tikai ta maua angaanga tutu aere e te  kite anga i te aronga apii Pipiria e apii ra no runga ia Iehova.”

17. Eaa te ka arai ia tatou kia tamata i tetai ravenga ou no te tutu aere?

¹⁷ Tamata i te au tu tavini anga ou. (Anga. 17:16, 17; 20:20, 21) Ko Shirley, e tuaine painia i Marike, tei taui i tana ravenga tutu aere te tupu anga te COVID-19. Kua emiemi aia i te tutu aere na runga i te tereponi. Inara, te tereni anga te akaaere kotinga iaia, kua akamata aia i te rave i te reira. Karanga aia: “I te akamataanga kua mataku tikai au, e i teianei te reka nei au i te rave i te reira. Maata te tangata taku ka tuatua na runga i te tereponi, i te aere mei tera are ki tera are!”

18. Eaa te ka tauturu ia tatou kia akamaata atu i te angaanga tutu aere noatu te au arairaianga?

¹⁸ Parani e oti e rave. Me tupu tetai arairaianga, e pure no te tauturu kia rauka i te parani i taau ka rave. (Mase. 3:21) Karanga a Sonia, e painia tamou i roto i tetai pupu reo Romani i Europa, “Ka tata au i taku au parani ki runga i te pepa, e ka tuku ki tetai ngai kia kite au i te reira. Ka tuku au i tetai tutu no te ngai tikoti anga mataara ki runga i te kaingakai. Me e ikianga taku ka rave, ka akara au i teia tutu e ka akamanako, ka arataki teia ikianga iaku kiea.” Ka tauta a Sonia kia vai rekareka ua noatu te au manamanata. Karanga aia, “Ka aite teia au manamanata ki te patu te ka arai iaku, me kore ki te ana te ka tauturu iaku​—tei runga ua i toku uaorai tu.”

19. Eaa ta tatou ka tauta i te rave?

¹⁹ Ka akameitaki a Iehova ia tatou na roto i te au ravenga tukeke. Ka akaari tatou i te tu rekareka no te reira me tavini ua rai tatou Iaia. (Ebe. 13:15) Te ō maira te au ravenga ou no te akamaata atu i ta tatou angaanga tutu aere. No reira, e tamata i teia au ravenga kia rauka ia koe i te ‘tongi i te meitaki o Iehova.’ Kia aite tatou mei ia Iesu, tei karanga: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.”​—Ioa. 4:34.