1-2. Спрема Псалм 34:8, сар шај те хаљова кобор тано шукар о Јехова?

ЗАМИСЛИН туке кај некој дела тут те ха нешто со никогаш на пробинѓан англедер. Сар ка џане дали ка свиџинел пе туке? Аѓаар со ка дикхе ле, ка миришине ле, ка дикхе сој чхивдо андре, или ка пуче е јаверен дали свиџинела пе ленге. Ама, о единствено начин те дознајне дали ка свиџинел пе туке адава хајбе или на, тано ако ту пробинеа ле.

² Амен шај те дознајна нешто башо е Јеховаскоро шукарипе аѓаар со ка читина и Библија, амари литература хем аѓаар со ка шуна е јаверен кеда раскажинена башо адава сар добинѓе берекетија таро Јехова. Ама, најшукар ка хаљова кобор тано шукар о Јехова ако амен коркори „пробинаја“ кобор тано шукар. (Читин Псалм 34:8.) Те дикха јекх пример сар шај те кера адава. Шај мангаја те служина е Јеховаске ки полновремено служба, ама те шај те кера адава ка ваљани те поедноставина амаро живото. Шај бут пути читинѓем е Исусескоро ветување кај ако чхиваја о Царство ко прво тхан о Јехова ка дел амен адава со ваљани аменге, ама амен коркори никогаш на доживинѓем те исполнинел пе упри аменде акава ветување (Мат. 6:33). Сепак, адалеске со иси амен доверба ко акала лафија со вакерѓа лен о Исус, амен трудинаја амен похари те трошина паре, кратинаја таро амаро работно време хем концентриринаја амен ки служба. Кеда кераја аѓаар дикхаја таро лично искуство кај о Јехова чаче грижинела пе башо амаре потребе. Аѓаар амен „пробинаја“ е Јеховаскоро шукарипе.

3. Спрема Псалм 16:1, 2, каске о Јехова посебно сикавела шукарипе?

³ О Јехова тано шукар сариненцар, чак околенцар со на џанена ле (Пс. 145:9; Мат. 5:45). Ама ов посебно дела шукар буќа околенге со мангена ле хем со служинена леске  цело душаја. (Читин Псалм 16:1, 2.) Те дикха некобор шукар буќа со керѓа лен аменге о Јехова.

4. Сар сикавела о Јехова пло шукарипе околенге со овена леа паше?

⁴ Секова пути кеда применинаја адава со сикљоваја таро Јехова, дикхаја кај адава влијајнела шукар упро амаро живото. На пример, кеда запознајнѓем е Јехова хем почминѓем те заманга ле, ов поможинѓа аменге те менина амаро начин сар размислинаја хем те чхинава те кера буќа кола со нане спрема лескири волја (Кол. 1:21). А кеда крстинѓем амен панда повише дикхлем лескоро шукарипе, сар сој и чисто совест хем о паше амалипе леа (1. Пет. 3:21).

5. Сар дикхаја е Јеховаскоро шукарипе ки амари служба?

⁵ Амен исто аѓаар дикхаја е Јеховаскоро шукарипе кеда сием ки служба. Дали сиан лаџутно мануш? Бут џене таро е Јеховаскоро народо тане лаџутне. Шај англедер те ове е Јеховаскоро слуга, никогаш на замислинѓан туке кај ка џа ко кхер некасте со на џанеа ле хем ка кере леа лафи баши Библија. Сепак, авдиве редовно кереа адава. Хем на само адава, о Јехова поможинѓа туке те уживине џикоте сиан ки служба! Ов исто аѓаар поддржинѓа тут ко јавера да начинија. Ов поможинѓа туке те ачхове смиримо кеда некој противинѓа пе туке ки служба. О Јехова исто аѓаар поможинѓа туке те сетине тут баш ко адала стихија со ваљани сине те читине лен е станареске. Хем денѓа тут сила понадари да те проповедине е манушенге иако шај на мангена сине те шунен тут (Ерем. 20:7-9).

6. Сар адава со о Јехова обучинела амен баши служба тано доказ башо лескоро шукарипе?

⁶ О Јехова исто аѓаар сикавѓа аменге пло шукарипе аѓаар со обучинела амен баши служба (Јован 6:45). Ко состанок Амаро живото хем служба, шунаја бут шукар спремиме предлогија башо разговор хем амен сием поттикниме те користина лен ки служба. Ко почеток, шај иси амен трема те користина о неве предлогија, ама кеда кераја адава ка дикха кај акала предлогија тане успешна ко амаро подрачје. Исто аѓаар, ко амаре состанокија хем конгресија сием поттикниме те пробина неве начинија проповедибаске. Акава да исто аѓаар шај нане те овел локхо, ама ако кераја адава тегани даја прилика е Јеховаске те дел амен берекети. Акана те дикха несаве таро берекетија кола со дела амен о Јехова кеда пробинаја неве начинија те да леске амаро најшукар, бизи разлика саве тане амаре околностија. Пало адава, ка дикха ко саве начинија шај те бајрара амари служба.

7. Саве берекетија иси амен кеда трудинаја амен те бајрара амари служба?

⁷ Оваја панда попаше е Јеховаја. Размислин башо пример јекхе старешинаскоро со викинела пе Самуел, * кова со заедно пле ромњаја служинела ки Колумбија. Ола уживинѓе ки пионерско служба ко пло собрание, ама мангена сине те бајрарен пумари служба аѓаар со ка поможинен коте со сине побари потреба. Те шај те исполнинен адаја цел ола мора сине те керен несаве жртве. О Самуел вакерела: „Применинѓем о лафија таро Матеј 6:33 хем чхинавѓем те кина буќа кола со на ваљанѓе аменге. Ама најпхаро сине те мукха амаро кхер. О кхер сине баш сар амен со мангаја хем на сине амен нисаве давачке“. Кеда селинѓе пе ко нево собрание, ола халиле кај шај те живинен бут похари  паренцар него англедер. О Самуел вакерела: „Дикхлем сар о Јехова водинела амен хем одговоринела ко амаре молитве. Дикхаја кај о Јехова тано задоволно амендар хем осетинаја лескоро мангипе сар никогаш англедер“. Дали шај ту ко несаве начинија те бајраре тли служба? Ако оја, шај те ове сигурно кај ка ове попаше е Јехова хем кај ов ка грижинел пе туке (Пс. 18:25).

8. Со сикљовеа таро е Иванескоро хем е Викторијакоро искуство?

⁸ И служба керела амен бахтале. Приметин со вакерена о Иван хем и Викторија, јекх брачно пари кола со служинена сар пионерија ко Киргистан. Ола живинена едноставно живото те шај те служинен доброволно ки било сави доделба, а исто аѓаар ки изградба. О Иван вакерела: „Денѓем амендар са ки секоја задача со сине амен. Иако ко крајо таро диве сием сине бут уморна, сепак осетинаја амен сине шукар хем задоволна, адалеске со користинѓем амари сила башо Царство. Исто аѓаар, сием сине бахтале соске керѓем аменге бут неве амала хем сине амен бут шуже искуствија“ (Мар. 10:29, 30).

9. Со керѓа јекх пхен те шај те бајрарел пли служба чак ко пхаре околностија, хем саве сине о резултатија?

⁹ Бахтале сием ки служба е Јеховаске чак кеда иси амен пхаре околностија. На пример, и Миреј, јекх пхури удовица тари Западно Африка, сине докторка. Кеда кхувѓа ки пензија ој почминѓа е пионерско службаја. Е Миреја иси ла пхаро артритис хем шај те џал ки служба таро кхер ко кхер само јекх саати. Ама ој шај те овел повише време ки служба ко прометна тхана. Иси ла бут повторна посете хем библиска курсија, хем несавенге лендар јавинела пе преку телефони. Со поттикнинѓа ла те керел повише башо Јехова? Ој вакерела: „Мло вило тано пхердо мангипе башо Јехова хем башо Исус Христос. Хем често молинава е Јехова те поможинел манге те шај те керав со повише ки служба“ (Мат. 22:36, 37).

10. Спрема 1. Петрово 5:10, со добинена таро Јехова окола со бајрарена пли служба?

¹⁰ Добинаја додатно обука таро Јехова. О Кени, јекх пионери кова со служинела ко Маврициус, доживинѓа акава ки пли кожа. Кеда шунѓа башо чачипе ов мукхља о факултети, крстинѓа пе хем почминѓа ки полновремено служба. Ов вакерела: „Трудинѓум ман те живинав спрема о лафија со вакерѓа лен о пророко о Исаија: ’Аке сиум ме! Бичхал ман!‘“ (Иса. 6:8). О Кени керѓа бути ко бут проектија баши изградба хем поможинѓа те превединел пе амари литература ки лескири чхиб. Ов вакерела: „Добинѓум обука колаја со сиклиљум вештине кола со ваљани сине манге те шај те завршинав мли задача“. Ама, ов сиклило бут повише него само сар те керел пли бути. Ов вакерела: „Исто аѓаар, сиклиљум кола тане мле ограничувања хем кола особине ваљани те развинав те шај те овав пошукар слуга е Јеховаске“. (Читин 1. Петрово 5:10.) Соске ту да на размислинеа башо тле околностија, хем те дикхе дали шај те кере несаве промене те шај те добине додатно обука таро Јехова?

11. Со трудинѓе пе те керен о пхења тари Јужно Кореја те шај те џан повише ки служба, хем саво сине о резултати? (Дикх и слика тари насловно страна.)

¹¹ Чак е искусна објавителен иси лен корист тари обука кеда пробинена неве начинија службаке. Ко време тари пандемија КОВИД-19, о старешине таро јекх собрание ки Јужно Кореја, пишинѓе: „Несаве со англедер нашти сине те џан ки служба адалеске со сине насвале, акана адава керена ле преку видеоконференција. Трин пхења колен  со иси лен повише таро 80 берш сиклиле сар те користинен и неви технологија хем акана тане ки служба скоро секова диве“ (Пс. 92:14, 15). Мангеа ли те бајраре тли служба хем те пробине е Јеховаскоро шукарипе панда повише? Аке некобор буќа со шај те кере те шај те исполнине адаја цел.

12. Со ветинела о Јехова кај ка керел околенге со иси лен доверба ки лесте?

¹² Сикљов те овел тут доверба ко Јехова. Ов ветинела кај ка дел амен бут берекетија ако иси амен доверба ки лесте хем ако даја ле амаро најшукар (Мал. 3:10). Јекх пхен тари Колумбија, со викинела пе Фабиола, дикхља сар о Јехова исполнинела акава ветување ко лакоро случај. Кратко откеда крстинѓа пе ој мангела сине те служинел ки општо пионерско служба. Ама мора сине те керел бути те шај те поможинел пле ромеске те издржинен пумаре фамилија. Адалеске, кеда ваљани сине те кхувел ки пензија, бут молинела пе сине е Јеховаске те шај те поможинел лаке. Ој вакерела: „О мануша обично аџикерена бут време те шај те одобринел пе ленге и пензија хем те почминен те добинен ла, ама ме добинѓум ла одма пало јекх масек откеда предајнѓум о документија. Адава сине чудо!“ Дуј масекија пало адава, ој почминѓа е пионерско службаја. Акана иси ла повише таро 70 берш хем служинела сар пионери повише таро 20 берш. Ко адала берша, и Фабиола поможинѓа офто манушенге те крстинен пе. Ој вакерела: „Иако  понекогаш осетинава ман слабо, о Јехова поможинела ман секова диве те продолжинав е пионерско службаја“.

13-14. Кола искуствија шај те поможинен аменге те сикава доверба ко Јехова хем те бајрара амари служба?

¹³ Сикљов таро примерија околенгере со сикавѓе доверба ко Јехова. Ки Библија иси бут примерија таро мануша кола со денѓе пестар са ки служба башо Јехова. Ко бут случаија о Јехова денѓа берекетија акале верна слугенге само откеда ола прво керѓе нешто те шај те сикавен пли доверба ки лесте. На пример, чак откеда о Авраам мукхља пло кхер хем „гело бизо те џанел кај џала“, о Јехова денѓа ле берекети (Евр. 11:8). Чак откеда о Јаков боринѓа пе е ангелеа, добинѓа берекети (1. Мој. 32:24-30). Кратко англедер о Израелција те кхувен ки Ветими пхув, прво мора сине о свештеникија те кхувен ки река Јордан те шај са о Израелција те накхен латар (Ис. Нав. 3:14-16).

¹⁴ Исто аѓаар, шај бут те сикљове таро примерија е верна слугенгере таро амаро време кола со сикавѓе доверба ко Јехова хем бајрарѓе пли служба. На пример, јекх пхрал со викинела пе Пајтон хем лескири ромни и Дијана, уживинена сине те читинен искуствија таро пхраља хем пхења кола со бајрарѓе пли служба. Асавке искуствија шај те аракхен пе ки рубрика „Тие се ставиле на располаѓање“. * О Пајтон вакерела: „Кеда читинаја сине ленгере искуствија сар ка пхене дикхаја лен сине сар уживинена ко бут шужо хајбе. Со повише дикхаја сине, добором повише мангаја сине ’те пробина хем те дикха кобор тано шукар о Јехова‘“. Пало несаво време, о Пајтон хем и Дијана геле те служинен коте со иси побари потреба. Дали дикхљан о видеоклипија Се преселиле да служат во друга земја хем О најшукар начин те џивдинел пе, кола со иклиле ки jw.org? Акала искуствија шај те поможинен туке те дикхе ко кола начинија шај ту да те бајраре тли служба.

15. Сар шај о исправно друштво те поможинел аменге?

¹⁵ Дружин тут околенцар со чхивена о Царство ко прво тхан. Полокхо ка манга те пробина несаво нево хајбе ако сием некасаја со уживинела ко адава хајбе. Слично, ако дружинаја амен околенцар каске со и служба тани ко прво тхан, тегани повише ка манга те аракха начинија сар шај те бајрара амари служба. О Кент хем лескири ромни и Вероника доживинѓе акава. О Кент вакерела: „Амаре амала хем и фамилија поттикнинѓе амен те чхива аменге неве целија баши служба. Халилем кај адава со дружинаја амен околенцар со чхивена о Царство ко прво тхан, керѓа амен похрабра те пробина нешто нево“. О Кент хем и Вероника акана служинена сар специјална пионерија ки Србија.

16. Сар со дикхаја тари е Исусескири споредба ко Лука 12:16-21, соске ваљани те ова спремна те кера жртве?

¹⁶ Кер жртве е Јеховаске. Те шај те кера е Јеховаскири волја, на ваљани те откажина амен таро са амаре удобностија (Проп. 5:19, 20). Ама, ако на кераја повише ки служба башо Јехова само адалеске со на мангаја те кера жртве, шај те кера и исто грешка сар о мануш тари е Исусескири споредба кова со керѓа песке удобно живото, а на мангља те размислинел башо Девел. (Читин Лука 12:16-21.) О пхрал Кристијан тари Франција вакерела: „На дава сине мло најшукар е Јеховаске хем мле фамилијаке“. Адалеске ов хем лескири ромни одлучинѓе те овен пионерија. Ама, те шај сине те успејнен ки  адаја цел мора сине те ден отказ тари бути. Те шај те издржинен пе ола почминѓе те чистинен кхера хем канцеларие, хем сиклиле те овен задоволна похари паренцар. Дали врединела сине адаја жртва со керѓе ла? О Кристијан вакерела: „Акана повише уживинаја ки служба хем бахтале сием кеда дикхаја сар о интересентија запознајнена е Јехова“.

17. Со шај те поможинел аменге те почмина те сведочина ко нево начин?

¹⁷ Ов спремно те пробине неве начинија службаке (Дела 17:16, 17; 20:20, 21). И Ширли, јекх пионерка тари Америка, ваљани сине те керел промене ки пли служба џикоте трајнела и пандемија КОВИД-19. Ко почеток, ој на сине баш сигурно дали те сведочинел преку телефони. Ама откеда добинѓа обука џикоте сине и посета таро покраинско надгледнико, ој почминѓа редовно те сведочинел преку телефони. Ој вакерела: „Ко почеток дарава сине, ама акана уживина ки служба. Акана кераја повише манушенцар лафи него англедер кеда џаја сине таро кхер ко кхер!“

18. Со шај те поможинел аменге те накхава о предизвикија џикоте трудинаја амен те бајрара амари служба?

¹⁸ Чхив туке цел хем трудин тут те исполнине ла. Кеда иси амен проблемија амен молинаја амен е Јеховаске те дел амен мудрост, те шај те џана сар те решина адала проблемија (Изр. 3:21). И Соња, која со служинела сар општо пионери ки романи група ки Европа, вакерела: „Пишинава мле целија ко јекх листо хем чхивава лен негде коте со шај локхе те дикхав лен. Ко мло гардеробери иси ман закачими слика дује друмонцар кола со ингарена ко различна правција. Кеда ваљани те анав несави одлука дикхава ко адала дуј друмија хем размислинава дали мли одлука ка поможинел манге те исполнинав мли цел или на“. И Соња трудинела пе те овел ла позитивно стави башо предизвикија со иси ла. Ој вакерела: „Бут зависинела таро мло стави дали секоја неви околност ка овел манге сар ѕидо сој англи манде или сар мости кова со ка поможинел манге те исполнинав мли цел“.

19. Со мангаја те кера?

¹⁹ О Јехова дела амен берекетија ко бут начинија. Шај те сикава кобор ценинаја адала берекетија аѓаар со ка кера са со шај те славина ле (Евр. 13:15). Адава шај те кера ле аѓаар со ка пробина неве начинија те бајрара амари служба хем аѓаар ка да прилика е Јеховаске те дел амен панда повише берекетија. Секова диве те рода начинија ’те пробина хем те дикха кобор тано шукар о Јехова‘. Тегани ка ова сар о Исус, кова со вакерѓа: „Мло хајбе тано те керав и волја околескир7и со бичхалѓа ман хем целосно те завршинав и бути со денѓа ла манге“ (Јован 4:34).