1-2. Sprema Psalm 34:8, sar šaj te haljova kobor tano šukar o Jehova?

ZAMISLIN tuke kaj nekoj dela tut te ha nešto so nikogaš na probingjan angleder. Sar ka džane dali ka svidžinel pe tuke? Agjaar so ka dikhe le, ka mirišine le, ka dikhe soj čhivdo andre, ili ka puče e javeren dali svidžinela pe lenge. Ama, o edinstveno način te doznajne dali ka svidžinel pe tuke adava hajbe ili na, tano ako tu probinea le.

² Amen šaj te doznajna nešto bašo e Jehovaskoro šukaripe agjaar so ka čitina i Biblija, amari literatura hem agjaar so ka šuna e javeren keda raskažinena bašo adava sar dobingje bereketija taro Jehova. Ama, najšukar ka haljova kobor tano šukar o Jehova ako amen korkori „probinaja“ kobor tano šukar. (Čitin Psalm 34:8.) Te dikha jekh primer sar šaj te kera adava. Šaj mangaja te služina e Jehovaske ki polnovremeno služba, ama te šaj te kera adava ka valjani te poednostavina amaro životo. Šaj but puti čitingjem e Isuseskoro vetuvanje kaj ako čhivaja o Carstvo ko prvo than o Jehova ka del amen adava so valjani amenge, ama amen korkori nikogaš na doživingjem te ispolninel pe upri amende akava vetuvanje (Mat. 6:33). Sepak, adaleske so isi amen doverba ko akala lafija so vakergja len o Isus, amen trudinaja amen pohari te trošina pare, kratinaja taro amaro rabotno vreme hem koncentririnaja amen ki služba. Keda keraja agjaar dikhaja taro lično iskustvo kaj o Jehova čače grižinela pe bašo amare potrebe. Agjaar amen „probinaja“ e Jehovaskoro šukaripe.

3. Sprema Psalm 16:1, 2, kaske o Jehova posebno sikavela šukaripe?

³ O Jehova tano šukar sarinencar, čak okolencar so na džanena le (Ps. 145:9; Mat. 5:45). Ama ov posebno dela šukar bukja okolenge so mangena le hem so služinena leske  celo dušaja. (Čitin Psalm 16:1, 2.) Te dikha nekobor šukar bukja so kergja len amenge o Jehova.

4. Sar sikavela o Jehova plo šukaripe okolenge so ovena lea paše?

⁴ Sekova puti keda primeninaja adava so sikljovaja taro Jehova, dikhaja kaj adava vlijajnela šukar upro amaro životo. Na primer, keda zapoznajngjem e Jehova hem počmingjem te zamanga le, ov pomožingja amenge te menina amaro način sar razmislinaja hem te čhinava te kera bukja kola so nane sprema leskiri volja (Kol. 1:21). A keda krstingjem amen panda poviše dikhlem leskoro šukaripe, sar soj i čisto sovest hem o paše amalipe lea (1. Pet. 3:21).

5. Sar dikhaja e Jehovaskoro šukaripe ki amari služba?

⁵ Amen isto agjaar dikhaja e Jehovaskoro šukaripe keda siem ki služba. Dali sian ladžutno manuš? But džene taro e Jehovaskoro narodo tane ladžutne. Šaj angleder te ove e Jehovaskoro sluga, nikogaš na zamislingjan tuke kaj ka dža ko kher nekaste so na džanea le hem ka kere lea lafi baši Biblija. Sepak, avdive redovno kerea adava. Hem na samo adava, o Jehova pomožingja tuke te uživine džikote sian ki služba! Ov isto agjaar poddržingja tut ko javera da načinija. Ov pomožingja tuke te ačhove smirimo keda nekoj protivingja pe tuke ki služba. O Jehova isto agjaar pomožingja tuke te setine tut baš ko adala stihija so valjani sine te čitine len e stanareske. Hem dengja tut sila ponadari da te propovedine e manušenge iako šaj na mangena sine te šunen tut (Erem. 20:7-9).

6. Sar adava so o Jehova obučinela amen baši služba tano dokaz bašo leskoro šukaripe?

⁶ O Jehova isto agjaar sikavgja amenge plo šukaripe agjaar so obučinela amen baši služba (Jovan 6:45). Ko sostanok Amaro životo hem služba, šunaja but šukar spremime predlogija bašo razgovor hem amen siem pottiknime te koristina len ki služba. Ko početok, šaj isi amen trema te koristina o neve predlogija, ama keda keraja adava ka dikha kaj akala predlogija tane uspešna ko amaro podračje. Isto agjaar, ko amare sostanokija hem kongresija siem pottiknime te probina neve načinija propovedibaske. Akava da isto agjaar šaj nane te ovel lokho, ama ako keraja adava tegani daja prilika e Jehovaske te del amen bereketi. Akana te dikha nesave taro bereketija kola so dela amen o Jehova keda probinaja neve načinija te da leske amaro najšukar, bizi razlika save tane amare okolnostija. Palo adava, ka dikha ko save načinija šaj te bajrara amari služba.

7. Save bereketija isi amen keda trudinaja amen te bajrara amari služba?

⁷ Ovaja panda popaše e Jehovaja. Razmislin bašo primer jekhe starešinaskoro so vikinela pe Samuel, * kova so zaedno ple romnjaja služinela ki Kolumbija. Ola uživingje ki pionersko služba ko plo sobranie, ama mangena sine te bajraren pumari služba agjaar so ka pomožinen kote so sine pobari potreba. Te šaj te ispolninen adaja cel ola mora sine te keren nesave žrtve. O Samuel vakerela: „Primeningjem o lafija taro Matej 6:33 hem čhinavgjem te kina bukja kola so na valjangje amenge. Ama najpharo sine te mukha amaro kher. O kher sine baš sar amen so mangaja hem na sine amen nisave davačke“. Keda selingje pe ko nevo sobranie, ola halile kaj šaj te živinen but pohari  parencar nego angleder. O Samuel vakerela: „Dikhlem sar o Jehova vodinela amen hem odgovorinela ko amare molitve. Dikhaja kaj o Jehova tano zadovolno amendar hem osetinaja leskoro mangipe sar nikogaš angleder“. Dali šaj tu ko nesave načinija te bajrare tli služba? Ako oja, šaj te ove sigurno kaj ka ove popaše e Jehova hem kaj ov ka grižinel pe tuke (Ps. 18:25).

8. So sikljovea taro e Ivaneskoro hem e Viktorijakoro iskustvo?

⁸ I služba kerela amen bahtale. Primetin so vakerena o Ivan hem i Viktorija, jekh bračno pari kola so služinena sar pionerija ko Kirgistan. Ola živinena ednostavno životo te šaj te služinen dobrovolno ki bilo savi dodelba, a isto agjaar ki izgradba. O Ivan vakerela: „Dengjem amendar sa ki sekoja zadača so sine amen. Iako ko krajo taro dive siem sine but umorna, sepak osetinaja amen sine šukar hem zadovolna, adaleske so koristingjem amari sila bašo Carstvo. Isto agjaar, siem sine bahtale soske kergjem amenge but neve amala hem sine amen but šuže iskustvija“ (Mar. 10:29, 30).

9. So kergja jekh phen te šaj te bajrarel pli služba čak ko phare okolnostija, hem save sine o rezultatija?

⁹ Bahtale siem ki služba e Jehovaske čak keda isi amen phare okolnostija. Na primer, i Mirej, jekh phuri udovica tari Zapadno Afrika, sine doktorka. Keda khuvgja ki penzija oj počmingja e pionersko službaja. E Mireja isi la pharo artritis hem šaj te džal ki služba taro kher ko kher samo jekh saati. Ama oj šaj te ovel poviše vreme ki služba ko prometna thana. Isi la but povtorna posete hem bibliska kursija, hem nesavenge lendar javinela pe preku telefoni. So pottikningja la te kerel poviše bašo Jehova? Oj vakerela: „Mlo vilo tano pherdo mangipe bašo Jehova hem bašo Isus Hristos. Hem često molinava e Jehova te pomožinel mange te šaj te kerav so poviše ki služba“ (Mat. 22:36, 37).

10. Sprema 1. Petrovo 5:10, so dobinena taro Jehova okola so bajrarena pli služba?

¹⁰ Dobinaja dodatno obuka taro Jehova. O Keni, jekh pioneri kova so služinela ko Mavricius, doživingja akava ki pli koža. Keda šungja bašo čačipe ov mukhlja o fakulteti, krstingja pe hem počmingja ki polnovremeno služba. Ov vakerela: „Trudingjum man te živinav sprema o lafija so vakergja len o proroko o Isaija: ’Ake sium me! Bičhal man!‘“ (Isa. 6:8). O Keni kergja buti ko but proektija baši izgradba hem pomožingja te prevedinel pe amari literatura ki leskiri čhib. Ov vakerela: „Dobingjum obuka kolaja so sikliljum veštine kola so valjani sine mange te šaj te završinav mli zadača“. Ama, ov siklilo but poviše nego samo sar te kerel pli buti. Ov vakerela: „Isto agjaar, sikliljum kola tane mle ograničuvanja hem kola osobine valjani te razvinav te šaj te ovav pošukar sluga e Jehovaske“. (Čitin 1. Petrovo 5:10.) Soske tu da na razmislinea bašo tle okolnostija, hem te dikhe dali šaj te kere nesave promene te šaj te dobine dodatno obuka taro Jehova?

11. So trudingje pe te keren o phenja tari Južno Koreja te šaj te džan poviše ki služba, hem savo sine o rezultati? (Dikh i slika tari naslovno strana.)

¹¹ Čak e iskusna objavitelen isi len korist tari obuka keda probinena neve načinija službake. Ko vreme tari pandemija KOVID-19, o starešine taro jekh sobranie ki Južno Koreja, pišingje: „Nesave so angleder našti sine te džan ki služba adaleske so sine nasvale, akana adava kerena le preku videokonferencija. Trin phenja kolen  so isi len poviše taro 80 berš siklile sar te koristinen i nevi tehnologija hem akana tane ki služba skoro sekova dive“ (Ps. 92:14, 15). Mangea li te bajrare tli služba hem te probine e Jehovaskoro šukaripe panda poviše? Ake nekobor bukja so šaj te kere te šaj te ispolnine adaja cel.

12. So vetinela o Jehova kaj ka kerel okolenge so isi len doverba ki leste?

¹² Sikljov te ovel tut doverba ko Jehova. Ov vetinela kaj ka del amen but bereketija ako isi amen doverba ki leste hem ako daja le amaro najšukar (Mal. 3:10). Jekh phen tari Kolumbija, so vikinela pe Fabiola, dikhlja sar o Jehova ispolninela akava vetuvanje ko lakoro slučaj. Kratko otkeda krstingja pe oj mangela sine te služinel ki opšto pionersko služba. Ama mora sine te kerel buti te šaj te pomožinel ple romeske te izdržinen pumare familija. Adaleske, keda valjani sine te khuvel ki penzija, but molinela pe sine e Jehovaske te šaj te pomožinel lake. Oj vakerela: „O manuša obično adžikerena but vreme te šaj te odobrinel pe lenge i penzija hem te počminen te dobinen la, ama me dobingjum la odma palo jekh masek otkeda predajngjum o dokumentija. Adava sine čudo!“ Duj masekija palo adava, oj počmingja e pionersko službaja. Akana isi la poviše taro 70 berš hem služinela sar pioneri poviše taro 20 berš. Ko adala berša, i Fabiola pomožingja ofto manušenge te krstinen pe. Oj vakerela: „Iako  ponekogaš osetinava man slabo, o Jehova pomožinela man sekova dive te prodolžinav e pionersko službaja“.

13-14. Kola iskustvija šaj te pomožinen amenge te sikava doverba ko Jehova hem te bajrara amari služba?

¹³ Sikljov taro primerija okolengere so sikavgje doverba ko Jehova. Ki Biblija isi but primerija taro manuša kola so dengje pestar sa ki služba bašo Jehova. Ko but slučaija o Jehova dengja bereketija akale verna slugenge samo otkeda ola prvo kergje nešto te šaj te sikaven pli doverba ki leste. Na primer, čak otkeda o Avraam mukhlja plo kher hem „gelo bizo te džanel kaj džala“, o Jehova dengja le bereketi (Evr. 11:8). Čak otkeda o Jakov boringja pe e angelea, dobingja bereketi (1. Moj. 32:24-30). Kratko angleder o Izraelcija te khuven ki Vetimi phuv, prvo mora sine o sveštenikija te khuven ki reka Jordan te šaj sa o Izraelcija te nakhen latar (Is. Nav. 3:14-16).

¹⁴ Isto agjaar, šaj but te sikljove taro primerija e verna slugengere taro amaro vreme kola so sikavgje doverba ko Jehova hem bajrargje pli služba. Na primer, jekh phral so vikinela pe Pajton hem leskiri romni i Dijana, uživinena sine te čitinen iskustvija taro phralja hem phenja kola so bajrargje pli služba. Asavke iskustvija šaj te arakhen pe ki rubrika „Tie se stavile na raspolagjanje“. * O Pajton vakerela: „Keda čitinaja sine lengere iskustvija sar ka phene dikhaja len sine sar uživinena ko but šužo hajbe. So poviše dikhaja sine, doborom poviše mangaja sine ’te probina hem te dikha kobor tano šukar o Jehova‘“. Palo nesavo vreme, o Pajton hem i Dijana gele te služinen kote so isi pobari potreba. Dali dikhljan o videoklipija Se preselile da služat vo druga zemja hem O najšukar način te dživdinel pe, kola so iklile ki jw.org? Akala iskustvija šaj te pomožinen tuke te dikhe ko kola načinija šaj tu da te bajrare tli služba.

15. Sar šaj o ispravno društvo te pomožinel amenge?

¹⁵ Družin tut okolencar so čhivena o Carstvo ko prvo than. Polokho ka manga te probina nesavo nevo hajbe ako siem nekasaja so uživinela ko adava hajbe. Slično, ako družinaja amen okolencar kaske so i služba tani ko prvo than, tegani poviše ka manga te arakha načinija sar šaj te bajrara amari služba. O Kent hem leskiri romni i Veronika doživingje akava. O Kent vakerela: „Amare amala hem i familija pottikningje amen te čhiva amenge neve celija baši služba. Halilem kaj adava so družinaja amen okolencar so čhivena o Carstvo ko prvo than, kergja amen pohrabra te probina nešto nevo“. O Kent hem i Veronika akana služinena sar specijalna pionerija ki Srbija.

16. Sar so dikhaja tari e Isuseskiri sporedba ko Luka 12:16-21, soske valjani te ova spremna te kera žrtve?

¹⁶ Ker žrtve e Jehovaske. Te šaj te kera e Jehovaskiri volja, na valjani te otkažina amen taro sa amare udobnostija (Prop. 5:19, 20). Ama, ako na keraja poviše ki služba bašo Jehova samo adaleske so na mangaja te kera žrtve, šaj te kera i isto greška sar o manuš tari e Isuseskiri sporedba kova so kergja peske udobno životo, a na manglja te razmislinel bašo Devel. (Čitin Luka 12:16-21.) O phral Kristijan tari Francija vakerela: „Na dava sine mlo najšukar e Jehovaske hem mle familijake“. Adaleske ov hem leskiri romni odlučingje te oven pionerija. Ama, te šaj sine te uspejnen ki  adaja cel mora sine te den otkaz tari buti. Te šaj te izdržinen pe ola počmingje te čistinen khera hem kancelarie, hem siklile te oven zadovolna pohari parencar. Dali vredinela sine adaja žrtva so kergje la? O Kristijan vakerela: „Akana poviše uživinaja ki služba hem bahtale siem keda dikhaja sar o interesentija zapoznajnena e Jehova“.

17. So šaj te pomožinel amenge te počmina te svedočina ko nevo način?

¹⁷ Ov spremno te probine neve načinija službake (Dela 17:16, 17; 20:20, 21). I Širli, jekh pionerka tari Amerika, valjani sine te kerel promene ki pli služba džikote trajnela i pandemija KOVID-19. Ko početok, oj na sine baš sigurno dali te svedočinel preku telefoni. Ama otkeda dobingja obuka džikote sine i poseta taro pokrainsko nadgledniko, oj počmingja redovno te svedočinel preku telefoni. Oj vakerela: „Ko početok darava sine, ama akana uživina ki služba. Akana keraja poviše manušencar lafi nego angleder keda džaja sine taro kher ko kher!“

18. So šaj te pomožinel amenge te nakhava o predizvikija džikote trudinaja amen te bajrara amari služba?

¹⁸ Čhiv tuke cel hem trudin tut te ispolnine la. Keda isi amen problemija amen molinaja amen e Jehovaske te del amen mudrost, te šaj te džana sar te rešina adala problemija (Izr. 3:21). I Sonja, koja so služinela sar opšto pioneri ki romani grupa ki Evropa, vakerela: „Pišinava mle celija ko jekh listo hem čhivava len negde kote so šaj lokhe te dikhav len. Ko mlo garderoberi isi man zakačimi slika duje drumoncar kola so ingarena ko različna pravcija. Keda valjani te anav nesavi odluka dikhava ko adala duj drumija hem razmislinava dali mli odluka ka pomožinel mange te ispolninav mli cel ili na“. I Sonja trudinela pe te ovel la pozitivno stavi bašo predizvikija so isi la. Oj vakerela: „But zavisinela taro mlo stavi dali sekoja nevi okolnost ka ovel mange sar zido soj angli mande ili sar mosti kova so ka pomožinel mange te ispolninav mli cel“.

19. So mangaja te kera?

¹⁹ O Jehova dela amen bereketija ko but načinija. Šaj te sikava kobor ceninaja adala bereketija agjaar so ka kera sa so šaj te slavina le (Evr. 13:15). Adava šaj te kera le agjaar so ka probina neve načinija te bajrara amari služba hem agjaar ka da prilika e Jehovaske te del amen panda poviše bereketija. Sekova dive te roda načinija ’te probina hem te dikha kobor tano šukar o Jehova‘. Tegani ka ova sar o Isus, kova so vakergja: „Mlo hajbe tano te kerav i volja okoleskir7i so bičhalgja man hem celosno te završinav i buti so dengja la mange“ (Jovan 4:34).