1, 2. Σο πρέπει τι κεράς για τι σικλιάς ότι ο Ιεχωβά ισί λατσσό σαρ βακερένα ο εδάφια Ψαλμός 34:8;

ΒΑΚΕΡΕΝ ότι ντένα-τουμέν τι χαν κάτι σο να χαλέν γιαβέρ φαρ. Κα μπορίνενας τι σικλιόν κάτι ανταλέσκε κάνα ντικχένα-λες, σουνγκένα-λες, διαβάνενα σαρ κερντιόλα ή πουτσένα ι γιαβερέν άμα μπεϊντίνενα-λες. Αλλά για τι αβέν σίγουροι ότι μπεϊντίνενα-λες πρέπει τι δοκιμάνεν-λες τουμέν.

² Μπορίνασα τι σικλιάς ότι ο Ιεχωβά ισί λατσσό εμ κάνα διαβάνασα ι Γραφή ντα ο έντυπα αλλά εμ κάνα ασουνάσα γιαβερέν τι βακερέν αμένγκε σαρ ευλογισάλε κατά Ιεχωβά. Αλλά κα αγαβάς καζόμ λατσσό ισί ο Ιεχωβά κάνα κα “δοκιμάνας” λέσκο λατσσιπέ αμέν. (Διαβάνεν Ψαλμός 34:8) Ντικχέν εκ παράδειγμας. Βακερέν χάι ότι μανγκάσα τι υπηρετίνας ι Ιεχωβάς ολοχρόνια, αλλά για τι κεράς-λες ανταβά, πρέπει τι κεράς πιο απλή αμαρί ζωή. Μπέκιμ διαβαντάμ μπουτ φαρ ι υπόσχεση ι Ιησούσκι ότι, άμα τσσουντάμ πρώτα ι Βασιλεία, ο Ιεχωβά κα ντελ-αμέν σο-ντα τθεράσα ανάγκη, αλλά ποτές να ντικχλάμ ι Ιεχωβάς τι κερέλ-λες ανταβά αμένγκε. (Ματθ. 6:​33) Αλλά επειδή τθεράσα πίστη κι υπόσχεση κι Ιησούσκι, προσπαθίνασα τι χαλαβάς πιο χάνικ λοβέ, τι κεράς πιο χάνικ μπουτί ντα τι κεράς πιο μπουτ πράγματα κο έργος. Καζόμ κεράσα-λες ανταβά, ντικχάσα αμαρέ γιακχίντζαρ ότι ο Ιεχωβά ντέλα-αμέν σαρέ οντουλά σο χρειαζίντιβασα. “Δοκιμάνασα” αμέν ο ίδιοι καζόμ λατσσό ισί ο Ιεχωβά.

3. Κάστε σικάντιβελα ο λατσσιπέ ι Ιεχωβάσκο σαρ βακερένα ο εδάφια Ψαλμός 16:1, 2;

³ Ο Ιεχωβά ισί «λατσσό σαριλέντζαρ», ατζέ-ντα οντουλέντζαρ σο να τζανένα-λες. (Ψαλμ. 145:9· Ματθ. 5:​45) Αλλά πιο μπουτ ευλογίες κατά Ιεχωβά λένα οντουλά σο μανγκένα-λες ντα υπηρετίνενα-λες σαρέ πουμαρέ γκίσαρ. (Διαβάνεν Ψαλμός 16:1, 2) Για τι ντικχάς ακανά χάνικ λατσσέ πράγματα σο κερντάς ο Ιεχωβά αμένγκε.

4. Σαρ σικαβέλα ο Ιεχωβά πο λατσσιπέ οντουλένγκε σο αβένα πασέ λέστε;

 ⁴ Κάθε φαρ σο κεράσα οντουλά σο σικλιάσα κατά Ιεχωβά, ντικχάσα σαρ βοηθίνελα-αμέν. Για παράδειγμας, κάνα σικλιλάμ πιο μπουτ λέσκε ντα μανγκλάμ-λες, βοβ βοηθιντάς-αμέν τι τσσιναβάς τι σκεφτίνας ντα τι κεράς πράγματα σο να μπεϊντίνελα. (Κολ. 1:​21) Κάνα ντινάμ αμαρό λάφι κο Ιεχωβά ντα μπολντιλάμ, βοβ ντινάς-αμέν ατζέ πιο λατσσέ πράγματα, σαρ ισί η λατσσί συνείδηση ντα η λατσσί φιλία σο τθεράσα λέσαρ.​—1 Πέτρ. 3:21.

5. Σαρ μπορίνασα τι δοκιμάνας ο λατσσιπέ σο σικαβέλα αμένγκε ο Ιεχωβά κο έργος;

⁵ Συνεχίνασα τι δοκιμάνας ο λατσσιπέ ι Ιεχωβάσκο καζόμ τζάσα κο έργος. Μήπως ισινέν λατζανέ; Μπουτ τζενέ αντρέ κο λαός κι Ιεχωβάσκο ισί. Μπέκιμ πριν τι αβέν υπηρέτες ι Ιεχωβάσκε ποτές να νακχλόας τουμαρέ γκοντιάταρ ότι κα τζάνας κο κχερ εκχέ αμπατζή τζενέσκο ντα κα κερένας λάφι λέσαρ ι Γραφιάκε. Αντιβές όμως κερένα-λες ανταβά μπουτ φαρ. Ι Ιεχωβάσκε βοηθειάσαρ, σικλιλέν τι μπεϊντίνεν ο έργος! Ο Ιεχωβά βοηθιντάς-τουμέν μπουτέ τροπόντζαρ. Βοβ βοηθιντάς-τουμέν τι ατσσόν ήρεμοι κάνα γκιλό τουμέντζαρ κόντρα εκ τζενό. Επίσης, βοηθιντάς-τουμέν τι ντεν-τουμέν γκοντί ο εδάφιος σο μανγκένας τι σικαβέν εκχέ τζενέσκε σο μανγκέλας τι ασουνέλ-τουμέν. Ντα ντινάς-τουμέν ι ζορ μα τι τσσιναβέν τι κερέν έργος ατζέ-ντα κάνα ο τζενέ να μανγκένας τι ασουνέν-τουμέν.​—Ιερ. 20:​7-9.

6. Σαρ σικαβέλα ο σικλιαριπέ σο ντέλα ο Ιεχωβά καζόμ λατσσό ισί;

⁶ Επίσης, ο Ιεχωβά σικαβέλα αμένγκε πο λατσσιπέ κάνα σικλιαρέλα-αμέν σαρ τι κεράς ο έργος. (Ιωάν. 6:​45) Κι συνάθροιση σο αβέλα-πες αντρέ κι εβδομάδα, ασουνάσα λατσσέ συζητήσεις ντα μπορίνασα τι κεράς-λεν αμέν-ντα κο έργος. Κι αρχή, μπέκιμ τι σακιντίνασα τι κεράς κάτι νεβό, αλλά κάνα κεράσα-λες, ντικχάσα ότι τθερέλα λατσσέ αποτελέσματα κο τομέας αμαρό. Κο συναθροίσεις ντα κο συνελεύσεις βακερένα αμένγκε τι προσπαθίνας τι κεράς ο έργος γιαβερέ τροπόντζαρ σο μπέκιμ να κερντάμ-λεν γιαβέρ φαρ. Ανταβά μπορεί τι αγχώνελα-αμέν, αλλά κάνα προσπαθίνασα τι κεράς ανταλά πράγματα, ο Ιεχωβά κα ευλογίνελ-αμέν. Ακανά κα ντικχάς χάνικ λατσσέ πράγματα σο κα ντελ-αμέν ο Ιεχωβά κάνα ντάσα λέσκε μπέσα ντα αρακχάσα νεβέ τρόπους για τι κεράς λέσκε ο πιο λατσσό σο μπορίνασα, σαρ-ντα τι αβέν ο πράγματα αμαρέ ζωγιάτε. Σοράν, κα ντικχάς σαρ τι κεράς πιο μπουτ πράγματα κι υπηρεσία κι Ιεχωβάσκι.

7. Καγιά ευλογία λάσα κάνα μαράσα-αμέν τι κεράς πιο μπουτ πράγματα κο έργος;

⁷ Αβάσα ατζέ πιο πασέ κο Ιεχωβά. Ντικχέν ο παράδειγμας εκχέ πρεσβυτερόσκο, σο βακερένα λέσκε Σάμιουελ, * ντα υπηρετίνελα πι ρομνιάσαρ κι Κολομβία. Ανταβά ζευγάρι μπεϊντίνενας τι κερέν ο σκαπανικός πουμαρέ κχανγκιριάτε, αλλά μανγκένας τι κερέν πιο μπουτ πράγματα κο έργος ντα τι βοηθίνεν εκχέ κχανγκιριάτε σο τθερέλας πιο μπαρί ανάγκη. Για τι κερέν-λες ανταβά, έπρεπε τι τσσιναβέν τι κερέν μερικά πράγματα σο μπεϊντίνενας. «Κερντάμ αμαρέ ζωγιάτε οντουβά σο βακερέλα ο Ματθαίος 6:​33 ντα τσσιναντάμ τι κινάς πράγματα σο να τθεράας-λεν ανάγκη», βακερέλα ο Σάμιουελ. «Αλλά ο πιο δύσκολος ισινέ τι νασάς αμαρέ κχερέσταρ. Ισινέ κερντό αντικάς σαρ μανγκάας αμέν, ντα να τθεράας καέκ μπόρτζι λέσκε». Κάνα γκιλέ πουμαρέ νεβέ κχανγκιριάτε, μανγκένας πιο χάνικ λοβέ οντουλένταρ σο μανγκένας ανγκλέ για τι ντεν-λεν πέρα. «Ντικχλάμ ότι ο Ιεχωβά οδηγίνελα-αμέν ντα απαντίνελα αμαρέ προσευχιέντε», βακερέλα ο Σάμιουελ. «Νιωθίνασα ότι ο Ιεχωβά ισί χαρούμενος αμέντζαρ ντα νιωθίνασα λέσκι αγάπη με τρόπους σο να  ντικχλάμ γιαβέρ φαρ». Μπορίνενα τι κερέν πιο μπουτ πράγματα κο έργος; Άμα βα, τι αβέν σίγουροι ότι κα αβέν πιο πασέ κο Ιεχωβά ντα ότι βοβ κα ντελ-τουμέν οντουλά σο τθερένα ανάγκη.​—Ψαλμ. 18:25.

8. Σο σικλιόνα οντουλένταρ σο βακερένα ο Ιβάν ντα η Βικτόρια;

⁸ Αρακχάσα χαρά κι υπηρεσία κι Ιεχωβάσκι. Ντικχέν σο βακερέλα ο Ιβάν ντα η Βικτόρια, εκ αντρόγυνος σο ισί σκαπανείς κο Κιργιζιστάν. Ατσσικιαρντέ απλή πουμαρί ζωή για τι υπηρετίνεν κατέ-ντα κα χρειαζίντιβελας, σαρ για παράδειγμας τι βοηθίνεν τι κερντιόν κτίρια για τι ντιντιόλ λατρεία κο Ιεχωβά. Ο Ιβάν βακερέλα: «Μαράας-αμέν τι κεράς ο πιο λατσσό κο κάθε διορισμός σο τθεράας. Παρόλο σο ισινάμας μπουτ κχινέ κο τέλος κάθε ντιβεσέσκο, ισινάμας χαρούμενοι σόσκε τζανάας ότι κερντάμας ο πιο λατσσό για τι υπηρετίνας ι Ιεχωβάς. Επίσης, ισινάμας χαρούμενοι επειδή κερντάμ μπουτέ νεβέ αμαλέν ντα τθεράας τι ντας-αμέν γκοντί μπουτ σουκάρ πράγματα».​—Μάρκ. 10:​29, 30.

9. Σο κερντάς εκ πφεν για τι κερέλ πιο μπουτ πράγματα κο έργος παρόλο σο να τζάνα λατσσές ο πράγματα λάκε ζωγιάτε, ντα καβά ισί ο αποτέλεσμας;

⁹ Αρακχάσα χαρά κι υπηρεσία κι Ιεχωβάσκι ατζέ-ντα κάνα ο πράγματα αμαρέ ζωγιάτε να τζάνα λατσσές. Για παράδειγμας, η Μιρέι, εκ πφουρί χήρα κι Δυτική Αφρική, ισινέ γιατρός. Κάνα λιντάς σύνταξη, αρχισάλι ο σκαπανικός. Η Μιρέι τθερέλα αρθρίτιδα ντα μπορίνελα τι νικιόλ κο έργος κχερ κχερέστε σάντε εκ σαάτι κάθε φαρ. Αλλά νικιόλα πιο μπουτ σαάτι κο έργος με το σταντ. Τθερέλα μπουτ επανεπισκέψεις ντα μελέτες, σο μερικές κερέλα-λεν κατά τηλέφωνος. Σο τσσιντιντάς-λα τι κερέλ πιο μπουτ πράγματα; «Μο γκι ισί πφερντό αγάπη ι Ιεχωβάσκε ντα ι Ιησού Χριστόσκε. Ντα προσευχίντιβαβα μπουτ φαρ τι βοηθίνελ-μαν ο Ιεχωβά τι κεράβ καζόμ πιο μπουτ πράγματα μπορίναβα λέσκε».​—Ματθ. 22:​36, 37.

10. Σο λένα κατά Ιεχωβά οντουλά σο μανγκένα τι κερέν πιο μπουτ πράγματα λέσκε σαρ βακερέλα ο εδάφιος 1 Πέτρου 5:10;

¹⁰ Λάσα πιο μπουτ σικλιαριπέ κατά Ιεχωβά. Ο Κένι, εκ σκαπανεάς σο υπηρετίνελα κο Μαυρίκιος, αγαντάς-λες ανταβά. Κάνα σικλιλό ι αλήθεια, τσσιναντάς ο πανεπιστήμιος, μπολντιλό ντα αρχισάλο τι υπηρετίνελ ι Ιεχωβάς ολοχρόνια. Βοβ βακερέλα: «Προσπαθίναβα τι κεράβ ο λάφια ι Ησαϊάσκε, σο βακερντάς: “Ακατέ ισινόμ! Μπούτσσαβ-μαν!”» (Ησ. 6:8) Ο Κένι βοηθιντάς τι κερντιόν μπουτ κτίρια για τι ντιντιόλ λατρεία κο Ιεχωβά ντα βοηθιντάς τι μεταφράντιβεν έντυπα λέσκε τσσιμπάτε. «Σικλιλόμ πράγματα σο κερντέ-μαν τι αβάβ πιο λατσσό κο διορισμούς σο τθεράβα», βακερέλα βοβ. Αλλά να σικλιλό σάντε σαρ τι κερέλ ανταγιά μπουτί. Βακερέλα: «Σικλιλόμ καλά πράγματα ναστί κεράβα ντα καλά ιδιότητες χρειαζίντιβελα τι μπαριαράβ για τι αβάβ πιο λατσσό υπηρέτης ι Ιεχωβάσκο». (Διαβάνεν 1 Πέτρου 5:​10) Μήπως κα μπορίνενας τουμέν-ντα τι κερέν μερικές αλλαγές για τι λεν πιο μπουτ σικλιαριπέ κατά Ιεχωβά;

11. Σο προσπάθειες κερντέ μερικά πφενιά κι Νότια Κορέα για τι νικιόν πιο μπουτ κο έργος, ντα καβά ισί ο αποτέλεσμας; (Ντικχέν ι φωτογραφία κι ανγκλαϊνί σελίδα)

¹¹ Ατζέ-ντα πφραλά σο ισί μπουτ μπρεσά κι αλήθεια χρειαζίντιβελα τι σικλιόν τι κερέν ο έργος νεβέ τροπόσαρ. Κο νασφαλιπέ κι Κορωνοϊόσκο, ο πρεσβύτεροι εκχέ κχανγκιριάτε κι Νότια Κορέα βακερντέ: «Μερικοί σο ανγκλέ πακιάνας ότι ναστί νικιόνας κο έργος επειδή τθερένας εκ πρόβλημας υγείας ακανά κερένα-λες αντράλ κατά Ίντερνετ. Τριν πφενιά σο ισί πιο μπουτ από 80 μπρεσένγκε σικλιλέ σαρ τι χρησιμοποιήνεν ο υπολογιστής για τι κερέν έργος, ντα ακανά κερένα-λες ανταβά ο πιο μπουτ ντιβεσά αντρέ κι εβδομάδα». (Ψαλμ. 92:​14, 15) Κα μανγκένας τι κερέν πιο μπουτ πράγματα κο έργος ντα τι δοκιμάνεν ατζέ πιο μπουτ καζόμ λατσσό ισί ο Ιεχωβά; Ντικχέν μερικά πράγματα  σο μπορίνενα τι κερέν για τι αβέλ-πες ανταβά.

12. Σο ντέλα πο λάφι ο Ιεχωβά τι κερέλ οντουλένγκε σο ντένα λέσκε μπέσα;

¹² Σικλιόν τι ντεν μπέσα κο Ιεχωβά. Βοβ ντέλα πο λάφι ότι κα πφερέλ-αμέν ευλογίες κάνα ντάσα λέσκε μπέσα ντα ντάσα-λες ο πιο λατσσό. (Μαλ. 3:​10) Εκ πφεν κι Κολομβία, σο βακερένα λάκε Φαμπιόλα, ντικχλάς ι Ιεχωβάς τι ατσσικιαρέλ ανταβά λάφι σο ντινάς. Σοράν, κάνα μπολντιλί, μανγκέλας τι κερέλ ο τακτικός σκαπανικός. Αλλά έπρεπε τι κερέλ μπουτί για τι βοηθίνελ πι φαμιλί. Κάνα νικίστιλι κι σύνταξη, κερντάς προσευχή κο Ιεχωβά αντράλ πι γκίσταρ για τι βοηθίνελ-λα. Βόι βακερέλα: «Ο τζενέ ο πιο μπουτ φαρ μπεκλεντίνενα μπουτ για τι νικιόλ λένγκι σύνταξη, αλλά μιρί νικίστιλι αντρέ εκχέ μασικέστε. Ισινέ σαρ θαύμας!» Ντούι μάσεκ σοράν, λιντάς ο σκαπανικός. Ακανά ισί πιο μπαρί από 70 μπρεσένγκι ντα κερέλα ο σκαπανικός πιο μπουτ από 20 μπρεσά. Σαρέ ανταλά μπρεσά, βοηθιντάς οχτώ τζενέν τι ερεσέν κο μπολντιπέ. Βόι βακερέλα: «Παρόλο σο μπάζιμα νιωθίναβα ότι νανέ-μαν ζορ, ο Ιεχωβά βοηθίνελα-μαν κάθε ντιβές τι κεράβ ο σκαπανικός».

13, 14. Καλά παραδείγματα μπορίνενα τι βοηθίνεν-αμέν τι ντας μπέσα κο Ιεχωβά ντα τι μανγκάς τι κεράς πιο μπουτ πράγματα λέσκε;

¹³ Τι σικλιόν κατά παράδειγμας τζενένγκο σο ντινέ μπέσα κο Ιεχωβά. Η Γραφή τθερέλα αντρέ μπουτ παραδείγματα τζενένγκε σο μαρντέ-πες κι υπηρεσία κι Ιεχωβάσκι. Μπουτ φαρ, ο Ιεχωβά ευλογίνελας-λεν σάντε κάνα κερένας κάτι σο σικαβέλας ότι ντένας λέσκε μπέσα. Για παράδειγμας, ο Αβραάμ πρώτα νασλό πι τθεμέσταρ​—«παρόλο σο να τζανέλας κατέ τζάλας»—​ντα σοράν  ευλογιντάς-λες ο Ιεχωβά. (Εβρ. 11:8) Ο Ιακώβ πρώτα ουσαρντάς εκχέ αγγελόσαρ ντα σοράν ευλογισάλο. (Γέν. 32:​24-30) Κάνα ο λαός Ισραήλ ετοιμάνελας-πες τι τσσουβέλ-πες κο Υποσχεμέ Τθεμ, πρώτα ισταντέ ο ιερείς κι Λεν Ιορδάνης ντα σοράν μπορισάλο τι νακχέλ ο λαός.​—Ιησ. Ναυή 3:​14-16.

¹⁴ Μπορίνασα επίσης τι σικλιάς κατά παράδειγμας πφραλένγκο ντα πφενίνγκο αμαρέ ντιβεσέντε σο ντινέ μπέσα κο Ιεχωβά ντα μανγκένας τι κερέν πιο μπουτ πράγματα λέσκε. Για παράδειγμας, ο Πέιτον ντα λέσκι ρομνί, η Νταϊάνα, μπεϊντίνενας τι διαβάνεν πφραλένγκε ντα πφενίνγκε σο κερντέ πιο μπουτ πράγματα ι Ιεχωβάσκε, σαρ ισί ο πφραλά ντα ο πφενιά σο ντικχάσα κο θέματα «Πρόσφεραν Πρόθυμα τον Εαυτό Τους». * Ο Πέιτον βακερέλα: «Κάνα διαβάναας ανταλά εμπειρίες, ισινέ σαρ τι ντικχάας εκχέ τζενές τι χαλ εκ μπουτ λατσσό χαμπέ σο μπεϊντίνελα-λες μπουτ. Καζόμ πιο μπουτ ντικχάας-λες ανταβά, αζόμ πιο μπουτ μανγκάας τι “δοκιμάνας ντα τι ντικχάς ότι ο Ιεχωβά ισί λατσσό”». Τελικά, ο Πέιτον ντα η Νταϊάνα γκιλέ τι βοηθίνεν οτθέ σο η ανάγκη ισινέ πιο μπαρί. Τουμέν διαβαντέν ανταλά θέματα; Ντα ντικχλέν ο βίντεα Κήρυγμα σε Απομονωμένες Περιοχές​—Αυστραλία ντα Κήρυγμα σε Απομονωμένες Περιοχές​—Ιρλανδία σο νικίστιλε κο jw.org; Ανταλά μπορίνενα τι βοηθίνεν-τουμέν τι αρακχέν πιο μπουτ τρόπους για τι κερέν πιο μπουτ πράγματα κι υπηρεσία κι Ιεχωβάσκι.

15. Σαρ μπορίνενα τι βοηθίνεν-αμέν ο λατσσέ αμαλά;

¹⁵ Τι τραμπίνεν λατσσέ αμαλέν. Κα αβέλ αμένγκε πιο εύκολος τι χας εκ χαμπέ σο να χαλάμ-λες γιαβέρ φαρ άμα ισινάμ γιαβερέντζαρ σο μπεϊντίνενα οντουβά χαμπέ. Αντικάς, άμα ντάσα αμαρέ σαατίσταρ για τι αβάς τζενέντζαρ σο τσσουβένα πρώτα πουμαρέ ζωγιάτε ι Ιεχωβάς, κα αβέλ αμένγκε πιο εύκολος τι αρακχάς νεβέ τρόπους για τι κεράς πιο μπουτ πράγματα ι Ντεβλέσκε. Εκ ζευγάρι, ο Κεντ ντα η Βερόνικα, αγαντέ-λες ανταβά. «Αμαρέ αμαλά ντα αμαρί φαμιλί βακερένας αμένγκε τι δοκιμάνας νεβέ τρόπους κι υπηρεσία κι Ιεχωβάσκι», βακερέλα ο Κεντ. «Αγαντάμ ότι, καζόμ ντάας αμαρέ σαατίσταρ για τι αβάς πφραλέντζαρ σο τσσουβένας πρώτα πουμαρέ ζωγιάτε ι Βασιλεία, λιντάμ ζορ τι κεράς αμέν-ντα κάτι νεβό». Ο Κεντ ντα η Βερόνικα ισί ακανά ειδικοί σκαπανείς κι Σερβία.

16. Σόσκε πρέπει τι μουκχάς μερικά πράγματα σο μπεϊντίνασα μάξους ι Ντεβλέσκε σαρ σικαβέλα η ιστορία σο βακερντάς ο Ιησούς κο εδάφια Λουκάς 12:​16-21;

¹⁶ Τι μουκχέν μερικά πράγματα μάξους ι Ιεχωβάσκε. Να χρειαζίντιβελα τι μουκχάς σαρέ ο πράγματα σο μπεϊντίνασα για τι κεράς ι Ιεχωβάσκο γκι. (Εκκλ. 5:​19, 20) Αλλά άμα σακιντίνασα τι κεράς πιο μπουτ πράγματα ι Ιεχωβάσκε επειδή να μανγκάσα τι μουκχάς οντουλά σο μπεϊντίνασα, κα κεράας ο λάθος σο κερντάς ο τζενό κι ιστορία κι Ιησούσκι σο να τραμπιντάς τι κερέλ πράγματα ι Ντεβλέσκε αλλά τραμπιντάς τι γκίντελ πέσκε μπερεκέτι λατσσέ πράγματα. (Διαβάνεν Λουκάς 12:​16-21) Ο Κριστιάν, εκ πφραλ σο τζουβντιόλα κι Γαλλία, βακερέλα: «Να ντάβας κο Ιεχωβά ντα μι φαμιλιάτε ο πιο λατσσό μι σαατίσταρ ντα μι ζοριάταρ». Βοβ ντα η ρομνί λέσκι λιντέ ο σκαπανικός. Αλλά για τι κερέν-λες ανταβά, έπρεπε τι μουκχέν πουμαρέ μπουτιά. Για τι τθερέν οντουλά σο χρειαζίντιβενας, καθαρίνενας κχερά ντα γραφεία, ντα σικλιλέ τι τζουβντιόν πιο χάνικ λοβέντζαρ. Ισινέ χαρούμενοι σο μουκχλέ μερικά πράγματα για τι λεν ο σκαπανικός; Ο Κριστιάν βακερέλα: «Μπεϊντίνασα πιο μπουτ αμαρό έργος ακανά, ντα τθεράσα ι χαρά τι ντικχάς οντουλέν σο κεράσα-λεν μελέτη ντα αμαρέ επανεπισκέψεις τι σικλιόν ι Ιεχωβάσκε».

17. Σόσκε μπορεί τι σακιντίνασα τι κεράς ο έργος νεβέ τροπόσαρ;

¹⁷ Τι κερέν αντράλ τουμαρέ γκίσταρ ο έργος νεβέ τροπόντζαρ. (Πράξ. 17:​16, 17· 20:​20, 21)  Η Σίρλεϊ, εκ σκαπάνισσα κο Ηνωμένες Πολιτείες, έπρεπε τι σικλιόλ τι κερέλ πο έργος νεβέ τροπόσαρ αντρέ κο νασφαλιπέ κι Κορωνοϊόσκο. Κι αρχή, σακιντίνελας τι κερέλ έργος αντράλ κατά τηλέφωνος. Αλλά κάνα γκιλό ο επίσκοπος περιοχής λάκε κχανγκιριάτε, σικλιλί τι κερέλ έργος αντράλ κατά τηλέφωνος. Βόι βακερέλα: «Κι αρχή νταραβέλας-μαν ανταβά, αλλά ακανά μπεϊντίναβα-λες μπουτ. Κο έργος κχερ κχερέστε να αρακχάας αζόμ τζενέν καζόμ αρακχάσα ακανά!»

18. Σο μπορεί τι βοηθίνελ-αμέν άμα αβιλό-πες εκ πρόβλημας καζόμ μανγκάσα τι κεράς πιο μπουτ πράγματα κο έργος;

¹⁸ Τσσουβέν στόχους ντα κερέν-λεν. Κάνα τθεράσα προβλήματα, προσευχίντιβασα για βοήθεια ντα σκεφτίνασα λατσσές σαρ τι ντας-λεν πέρα. (Παρ. 3:​21) Η Σόνια, σο υπηρετίνελα σαρ τακτική σκαπάνισσα εκχέ ρομανέ ομιλόστε κι Ευρώπη, βακερέλα: «Μπεϊντίναβα τι γραφίναβ εκχέ χαρτίστε οντουλά σο μανγκάβα τι κεράβ ντα τσσουβάβα οντουβά χαρτίς εκχέ τθανέστε σο κα ντικχάβ-λες. Οπράλ μι τραπεζίστε τθεράβα εκ ζωγραφιά σο σικαβέλα ντούι ντρομά. Ντικχάβα ανταλά ντούι ντρομά ντα σκεφτίναβα καγιά απόφαση κα βοηθίνελ-μαν τι κεράβ ο στόχος σο τσσουντόμ ντα καγιά να κα βοηθίνελ-μαν». Η Σόνια κερέλα σο νακχέλα λάκε βαστένταρ για τι ατσσικιαρέλ πι χαρά παρόλο σο τθερέλα προβλήματα. Βόι βακερέλα: «Κάθε νεβό πρόβλημας μπορεί τι αβέλ σαρ εκ ντουβάρι σο να μουκχέλα-μαν τι κεράβ τίποτα ή σαρ εκ πφουρτ σο βοηθίνελα-μαν​—ανάλογα σαρ ντικχάβα ο πράγματα σο αβένα-πες».

19. Σαρ μπορίνασα τι σικαβάς ότι εκτιμίνασα ο λατσσέ πράγματα σο ντινάς-αμέν ο Ιεχωβά;

¹⁹ Ο Ιεχωβά ευλογίνελα-αμέν μπουτέ τροπόντζαρ. Μπορίνασα τι σικαβάς καζόμ εκτιμίνασα ανταλά ευλογίες κάνα κεράσα ο πιο λατσσό για τι ντας-λες δόξα. (Εβρ. 13:​15) Μπορίνασα τι κεράς μπουτ πράγματα για τι υπηρετίνας ι Ιεχωβάς. Ντα σοράν ο Ιεχωβά κα ευλογίνελ-αμέν ατζέ πιο μπουτ. Κάθε ντιβές, πρέπει τι αρακχάς τρόπους για τι “δοκιμάνας ντα τι ντικχάς ότι ο Ιεχωβά ισί λατσσό”. Αζομάν κα αβάς σαρ ο Ιησούς, σο βακερντάς: «Μο χαμπέ ισί τι κεράβ ο θέλημας οντουλέσκο σο μπουτσσαντάς-μαν ντα τι τελειώναβ λέσκο έργος».​—Ιωάν. 4:34.