1, 2. Cadea sar phenel-pe ando Psalmo 34:8, sar daisaras te prinjianas o lașimos le Iehovasco?

GÂNDISAR TUT că si angla tute iech haben cai ci halean-les niciechdata. Daștis te jianes sar silo dacă diches-les, simțosares sar chandel, jianes so si ande leste sau des duma averența cai mai hale anda leste. Tha, daștis te jianes ciaces sar silo numai dacă les tu anda leste hai has.

² Sa cadea, daisaras te jianas unele buchia anda o lașimos le Iehovasco andai Biblia hai anda amare publicații hai vi anda le experiențea codolenghe cai sas-le binecuvântime lestar. Tha, va avela te hachiaras ciaces chichi de lașio si o Iehova cana amen las anda lesco lașimos. (Citisar Psalmo 34:8.) Te gândisaras-ame ca iech exemplo. Te phenas că cames te începosares o pionierato, tha, caște arăsăs ca cado obiectivo trebul te cheres chi viața mai simplo. Prinjianes mișto i promisiunea le Isusoschi anda Matei 6:33, cai phenel că o Iehova va avela te del tut le buchia cai trebun tuche dacă șios lesco Regato po iechto than. Tha, tu ci simțosardean pe chi morci te pherel-pe cadai promisiunea. Cu sea cadala, dacă si tut pachiamos ande le cuvintea le Isusosche ci mai chines cadea de but buchia, ci mai cheres cadea de but buchi hai cheres mai but andi lucrarea de predicare. Cadea, les anda o lașimos le Iehovasco cana diches pe chi morci sar lel sama pe le buchia cai trebun tuche.

3. Cadea sar sicavel-pe ando Psalmo 16:1, 2, con primisarel o lașimos le Iehovasco?

³ O Iehova „silo lașio” savorența chiar vi codolența cai ci prinjianen-les. (Ps. 145:9; Mat. 5:45) Tha codola cai iubin le Iehovas hai slujin lesche anda sea o ilo primisaren but lașe buchia lestar. (Citisar Psalmo 16:1, 2.) Te dichas chichiva modalități prin save o Iehova sicavel amenghe lașimos.

4. Sar sicavel o Iehova pesco lașimos caring codola cai sile pașă lestar?

 ⁴ De fiesavi data cana cheras so phenel amenghe o Iehova, dichas so but ajutil-ame cadaia ande amari viața. Ando timpo so sichileam anda leste hai arăsleam te iubisaras-les, o Iehova ajutisardea-ame te mechas i gândirea hai le buchia cai încărenas-ame dur lestar. (Col. 1:21) Pala so dedichisardeam-ame le Iehovasche hai boldeam-ame, simțosardeam lesco lașimos vi mai but anda codoia că vo dea-ame iech conștiința lași hai țârdea-ame leste caște avas lesche amala pașă. (1 Pet. 3:21)

5. Sar simțosaras o lașimos le Iehovasco andi lucrarea de predicarea?

⁵ O Iehova sicavel pesco lașimos caring amende vi cana las partea andi predicare. Daștil-pe că san iech manuș lajiavuno cadea sar but slujitori le Iehovasche. Angla te arăsăs iech Martoro le Iehovasco daștil-pe că ci gândisardean tut niciechdata că va avela te mares co udar le manușengo cai ci prinjianes-le hai te des lenghe duma andai Biblia. Tha, aghies predichisares sea o timpo. Mai but, o Iehova ajutisardea tut te araches bucuria ande cadai lucrarea. Dichlean o vast le Iehovasco mai butivar. Vo ajutisardea tut te na holiares-tu cana varecon phiradea-pe nasul tuia andi predicarea. Vo mai ajutisardea tut te anes tuche amintea o verseto potrivime caște phenes-les ieche manușesche cai camlea te așunel tut. Sa cadea, vo dea tut o zuralimos te jias mai dur andi predicarea vi cana le manușa anda chio teritorio ci camle te așunen tut. (Ier. 20:7-9)

6. Sostar o sicaimos cai primisaras-les catar o Iehova sicavel lesco lașimos?

⁶ Sa cadea, dichas o lașimos le Iehovasco cana sicavel-ame so te cheras andi predicarea. (Ioan 6:45) Ca i întrunirea anda o mașcar le curchesco, dichas conversații model mișto gândime, hai sam sicade te folosisaras-le vi amen andi predicarea. Daștil-pe te avel amenghe pharo te încercosaras vareso nevo andi predicarea, tha, cana cheras cadea sar sam sicade ca i întrunirea, dichas că jial mișto ando teritorio. Ca le întruniri hai le congresea, sam zuriarde te folosisaras neve metodea andi predicarea cai ci încercosardeam-le niciechdata mai anglal. Cana paruvas amare metode andi lucrarea hai ci mai cheras codola savența samas sicade, o Iehova va binecuvântila-ame. Te dichas chichiva miștimata cai daștin te aven-ame cana rodas modalități neve te das le Iehovasche sea so si ame mai lașio, ande orisavi situația sam. Pala codoia, va avela te dichas sar daisaras te cheras mai but ando servicio le Iehovasco.

7. Ce binecuvântări va avena-ame dacă das amari zor te cheras mai but anda o Iehova?

⁷ Te pașioas vi mai but le Iehovastar. Te las o exemplo ieche phuresco de congregație po anav Samuel *, cai, ande iech than pesca rromniaia, slujin andi Columbia. Von sas-le pionieri andi congregația dar camenas te slujin mai but le Iehovasche hai te jian ande iech congregația cai sas mai bari nevoia. Caște arăsăn te cheren pengo obiectivo, trebunas te cheren chichiva paruimata. O Samuel phenel: „Leam-ame pala so si phendo ando Matei 6:33 hai ci mai chindeam cadea de but buchia cai ci trebunas amenghe. Tha o mai pharo sas amenghe te mechas amaro apartamento, anda codoia că sas cărdo cadea sar camleam-ame hai sas-lo pochindo cu sea”. Ande lenghi nevi repartiția von dine penghi seama că daștinas te train  mai țâra lovența sar mai anglal. „Dichas sar o Iehova ajutil-ame ande sea so cheras hai del răspunso ca amare rugăciuni”, phenel o Samuel. „Simțosaras că o Iehova aprobil-ame hai iubil-ame sar niciechdata ji acana.” Daștias te cheres vi tu mai but andi predicarea? Dacă da, av siguro că va avela te aves mai pașă le Iehovastar hai vo va lela sama pe tute. (Ps. 18:25)

8. So sichioas anda so phenen o Ivan hai i Viktoria?

⁸ Arachas bucuria ande amaro servicio. Te dichas so phenen o Ivan hai i Viktoria, cai slujin sar pionieri ande Kârgâzstan. Len sas-le iech viața simplo caște daștin te slujin ande diferime repartiții hai vi ca le proiectea de construcții. O Ivan phenel: „Cărdeam sea so daisardeam anda fiesavo proiecto. Chiar cana samas chine pala iech ghies pherdo buchi, sas amen but pacea hai samas zurales bucurime te das sea amari zor andi buchi le Regatoschi. Le lașe amala cai cărdeam-le amenghe hai le amintiri șucar cai sas amen, așile ande amaro ilo hai anen amenghe iech bari bucuria”. (Mar. 10:29, 30).

9. So cărdea iech phei cai sas-la iech situația mai phari caște cherel mai but ando servicio le Iehovasco hai so miștimata sas-la?

⁹ Arachas bucuria ando servicio le Iehovasco chiar cana si amen iech situația phari. Sar exemplo, i Mirreh, iech phei phuri hai pivli anda Africa de Vest, începosardea o pionierato pala so arăsli ca i pensia. Anda codoia că sila artrita, iech nasfalimos cai del-la bare ducha, i Mirreh ci daștil te beșel mai but de iech ora andi lucrarea chăr chărestar. Tha, voi daștil te beșel mai but timpo andi mărturia publico. Sa cadea, sila but vizitea ulterioro hai studii biblico, hai iechența încărel o phanglimos prin o telefono. So cărdea la Mirreha te cherel mai but ando servicio le Iehovasco? „Iubisarav anda sea mânro ilo le Iehovas hai le Isus Cristosos, rughisarav butivar le Iehovas te ajutil-ma te cherav sea so daștiv ande leschi buchi.” (Mat. 22:36, 37)

10. Cadea sar phenel-pe ando 1 Petru 5:10, so primisaren codola cai den sea penghi zor caște cheren mai but anda o Iehova?

¹⁰ Primisaras vi mai but sicaimos catar o Iehova. O Kenny, iech pionierii cai slujil ando Mauritius simțosardea pe peschi morci cadai buchi. Cana prinjiandea o ciacimos mechlea i facultatea, boldea-pe hai începosardea o pionierato. Vo phenel: „Încercosarav te traiv mânri viața pala le cuvintea cai phendea-le o profeto Isaia: «Ita-ma, bișal-ma!»”. (Is. 6:8) O Kenny lea partea ca mai but proiectea de construcție hai ca i traducerea chichiva publicațienghi biblico ande leschi șib. Primisardem o sicaimos cai trebulas man caște cherav mișto mânri buchi” phenel o Kenny. Tha, so sichilea ci arăslea numai ande leschi goghi. Vo mai phenel: „Dem mânri sama save sas le buchia cai sas mai phare anda mande hai ce calități trebulas te bariarav caște avav iech slujitorii mai lașio le Iehovasco”. (Citisar 1 Petru 5:10.) Daștias te diches vi tu savi si chi situația hai te des le Iehovasche ocazii caște del tut mai but sicaimos?

11. So eforturi cărde trin pheia andai Coreea de Sud caște daștin te len partea ca i predicarea hai so miștimata sas len? (Dich vi i imaginea pa i coperta.)

¹¹ Chiar vi le slujitori le Iehovasche cai silen experiența primin sicaimos cana încercon iech nevi forma de predicare. Andi pandemia de COVID-19 le phure anda iech congregația andai Coreea de Sud phende: „Unii anda codola cai pachianas că ci daștin te len partea ca i predicarea anda codoia că ci sas len iech sastimos lașio, acana daștin te len partea late prin videoconferința.  Trin pheia cai silen mai but sar 80 bărșa sichile te folosisaren i tehnologia hai acana len partea ca i predicarea cam ande fiesavo ghies”. (Ps. 92:14, 15) Cameias vi tu te cheres mai but anda o Iehova hai te les anda lesco baro lașimos? Te dichas chichiva buchia cai daisaras te cheras-le caște arăsas ca amaro obiectivo.

12. So promitil o Iehova codolenghe cai pachian-pe ande leste?

¹² Te sichioas te șioas amaro pachiamos ando Iehova. O Iehova phenel că va șiorela binecuvântări pe amende dacă pachias-ame ande leste hai cheras sea so daisaras caște slujisaras lesche. (Mal. 3:10) I Fabiola, iech phei andai Columbia, simțosardea sar pherdea-pe cadai promisiunea ande lachi viața. Pala țâra timpo pala so boldea-pe, voi camlea te cherel o pionierato regularo. Tha, voi trebulas te anel love chăre anda laco rrom hai anda lache trin șiave. Anda codoia, angla te arăsăl ca i pensia voi rughisardea zurales but le Iehovas te ajutil-la. I Fabiola phenel: „Butivar, le manușa trebun te ajucăren but timpo ji cana cheren-pe lenghe lila andai pensia. Tha, mânro manglimos sas sigo aprobime, cadea că primisardem i pensia pala iech șion. Sas ciaces iech miracolo!”. Dui șiona pala codoia, voi slujilas sar pioniera regularo. Aghies, sila mai but sar 70 bărșa. Ande mai but sar 20 bărșa sar pioniera, voi ajutisardea ohto manușen te bolen-pe. I Fabiola mai phenel: „Vi cana po iechdata simțov-ma covli, o Iehova del-ma zuralimos ande  fiesavo ghies te cherav mai dur mânro servicio”.

13, 14. So exemplea ajutin-ame te șioas amaro pachiamos ando Iehova hai te slujisaras lesche vi mai but?

¹³ Te sichioas anda o exemplo codolengo cai șiute pengo pachiamos ando Iehova. Andi Biblia arachas but exemplea manușenghe cai cărde bare eforturi ando servicio le Iehovasco. Butivar, cadal slujitori le Iehovasche trebuisarde te cheren o iechto paso angla so te primin bare binecuvântări le Iehovastar. Sar exemplo, o Iehova binecuvântisardea le Avraamos numai pala so cadava mechlea pesco chăr „chiar cana ci jianelas cai jial”. (Evr. 11:8) O Iacov primisardea iech bari binecuvântarea numai pala so mardea-pe ieche îngeroia. (Gen. 32:24-30) I națiunea Israel daisardea te nachel o Iordano caște jial ando them promiso numai pala so le rașaia șiute penghe pânre ando pai cai thabdelas sigo. (Ios. 3:14-16)

¹⁴ Sa cadea, daisaras te sichioas andal exemplea le Martorenghe le Iehovasche de aghies cai șion pengo pachiamos ando Iehova caște slujin lesche vi mai but. Sar exemplo, iech phral po anav Payton hai leschi rromni, Diana, bucurinas-pe te citin le experiențea ieche phralenghe hai pheianghe cai camle te cheren mai but ando servicio le Iehovasco, sar avelas codola andal articolea „Von camle te slujin” *. O Payton phenel: „Cana citisardem cadala articolea sas sar cana dichlemas varecas cai hal anda iech haben zurales lașio. Chichi dichleam mai dur cadichi camleam mai but «te las hai te dichas so lașio si o Iehova»”. Pala codoia, o Payton hai i Diana găle te slujin ande iech than cai sas mai bari nevoia phralendar. Citisardean cadala articolea? Dichlean le materialea video pa o site-o jw.org Predicarea andel thana duriarde – Australia hai Irlanda? Cadal materialea daștin te ajutin tut te diches sar daștis te cheres mai but ando servicio le Iehovasco.

15. Sostar si importanto te avas goghiaver cana alosaras amenghe amala?

¹⁵ Te avas goghiaver cana alosaras amare amala. Si amenghe mai ușoro te has iech nevo haben cana beșas pașa codola cai placian-le te han-les. Sa cadea, dacă beșas pașa codola cai camen te cheren mai but ando servicio le Iehovasco, daștil-pe că camas vi amen te cheras mai but ande lesco servicio. I experiența le phraleschi Kent hai lesca rromniachi, Veronica, sicavel cado ciacimos. O Kent phenel: „Amare amala hai amari familia zuriarde-ame te rodas moduri te slujisaras mai but. Anda codoia că beșleam pașa codola cai șion o Regato po iechto than ande lenghi viața, sas amen o tromai te cheras vareso nevo”. Aghies, o Kent hai i Veronica slujin sar pionieri speciali andi Serbia.

16. Cadea sar phenel-pe andi ilustrarea le Isusoschi anda Luca 12:16-21, sostar trebulas te cheras sacrificii?

¹⁶ Te cheras sacrificii anda o Iehova. Cadaia ci însemnol că trebul te mechas sea le buchia cai placian-ame. (Ecl. 5:19, 20) Tha, dacă încăras-ame parpale te slujisaras mai but le Iehovasche anda codoia că ci camas te mechas unele buchia cai placian-ame, daștilas-pe te cheras i greșeala cai cărdea-la vi o murș andai ilustrarea le Isusoschi, cai, anda codoia că camlea te avel-les iech viața mai lași, ci încărdea conto le Devlestar. (Citisar Luca 12:16-21.) O Christian, cai beșel andi Franța phenel: „Dem mânri sama că ci dem sea so sas-ma mai lașio nici le Iehovasche  nici mânra familiache”. Vo hai leschi rromni line i decizia te începon o pionierato. Tha, caște daștin te cheren cadaia, trebuisarde te mechen penghi buchi. Von începosarde iech afacerea țâni ando ujimos hai sichile te aven mulțumime mai țâra lovența. Si lenghi viața mai șucar că cărde cadal sacrificii? O Christian phenel: „Sam bucurime ande amaro servicio mai but sar oricana hai amaro ilo bariol cana dichas că amare studii biblico hai vizite ulterioare sichion anda o Iehova”.

17. So ajutisardea iecha pheia te încercosarel vareso nevo andi predicarea?

¹⁷ Te încercosaras neve metodea andi predicarea. (Fap. 17:16, 17; 20:20, 21) Andi pandemia de COVID-19, i Shirley, iech pioniera andal Statele Unite, trebuisardea te cherel chichiva paruimata ande soste priveal i predicarea. Co începuto, voi încărdea-pe parpale te cherel predicarea prin o telefono. Tha, cana sas-la i vizita le supraveghetoroschi de circumscripție, voi primisardea o sicaimos cai trebulas-la, cadea că, aghies, voi lel partea ande cadai forma de predicare. I Shirley phenel: „Co începuto darailem iech țâra, tha acana placial-ma zurales but. Arăsav te dav duma mai bute manușența sar mai anglal andi lucrarea chăr chărestar”.

18. So daștilas te ajutil-ame te nachas părdal le pharimata cai daștinas te aven cana camas te cheras mai but ando servicio le Iehovasco?

¹⁸ Te cheras amenghe iech plano hai te nachas ca acțiunea. Cana nachas prin pharimata si importanto te rughisaras-ame le Iehovasche hai te folosisaras amaro goghiaverimos caște cheras amenghe iech plano. (Prov. 3:21) I Sonia, cai slujil sar pioniera regularo ande iech grupa de șib rromani andai Europa phenel: „Scriisarav pe iech cotor lilesco le obiectivea savende camav te arăsav hai șioav-le ande iech than caște dichav-le. Pe mânro dulapo, si man iech deseno duie dromența. Cana trebul te lav iech decizia, dichav-ma co deseno hai gândisarav-ma cai îngărenas-ma le dui droma hai savo va ajutila-ma te arăsav ca mânro obiectivo”. I Sonia încercosarel te dichel avere iachența le pharimata cai sila. Voi phenel: „Fiesavi situația nevi daștil te avel sar iech zido cai așiavel-ma sau sar iech podo cai ajutil-ma”.

19. Sar daisaras te sicavas amari recunoștința?

¹⁹ O Iehova binecuvântil-ame ande mai but feluri. Daisaras te sicavas amari recunoștința cana cheras sea so daisaras caște așaras-les. (Evr. 13:15) Daisaras te încercosaras neve metodea andi predicarea hai cadea te mechas le Iehovas te binecuvântil-ame vi mai but. Te rodas ande fiesavo ghies modalități caște ‘las hai te dichas so lașio si o Iehova!”. Cadea, va daisaraia te phenas sar o Isus: „Mânro haben si te cherav i voia codoleschi cai bișaldea-ma hai te cherav cu sea leschi buchi”. (Ioan 4:34)